我們的故事｜阮ê故事｜Goán ê kò͘-sū｜白話字(pe̍h-ōe-jī)字幕

Khiā tī故鄉ê土地，聽--tio̍h-ê是啥物話，kám是你慣勢聽--tio̍h ê hit款話？ 暗時gín-á睏無好，陷眠ê時teh講--ê，kám是咱爸母kā咱教ê hit款話？ 1 ê人1世人ē-tàng做ê tāi-chì有jōa chē，有意義--ê koh佔jōa-chē？ Goán chit tīn人，tì覺tio̍h chit ê無奈ê現實，sui-bóng能力有限，mā是the̍h出勇氣，想beh tàu出kóa力，tī 2023年6--月，開始討論tī goán有限ê人力中間，ē-tàng做啥物tāi-chì，尾--á chiah開始進行廣播劇ê製作，因為goán chit tīn有志，平常時lóng有ka-tī ê頭路ài無閒，為tio̍h生活，各人ē-tàng用ê時間mā真有限，só͘-pái，經過差不多半年ê時間，goán chiah有才調kā 【A郎廣播劇】chit ê作品，順利製作完成，真向望ta̍k-ke聽tio̍h ē kah意。另外，【A郎小詞典】算是延伸ê小單元，goán有想beh用真簡單ê話句，來紹介【A郎】內底有講--tio̍h ê詞，用台語來解說台語，單元lóng短短--á，輕鬆無負擔，mā希望chit ê單元對咱beh研究台語，a̍h是tng teh學台語ê朋友有所幫贊。 向望各位有志ē-tàng kā goán tàu支持、推薦，先kā各位說多謝，真ló͘-la̍t！ -- Hosting provided by SoundOn