Día a Día

O tudense Iván Alonso foi gañador absoluto en k1 en dúas ocasións do Descenso Internacional do Miño. A última o ano pasado antes de retirarse de forma profesional do piragüismo. Amais ten dobre récord no Descenso en K2, a primeira vez con Diego Domínguez Aristegui e a segunda con Diego Piña. Hoxe falamos dos seus inicios, dos éxitos deportivos, e do Descenso Internacional do Miño.

O Paseo da Corredoira acollerá este sábado, a partir das 11 h, partidas amistosas de xadrez e un Torneo Area. Así nolo contaron hoxe Luís Fernández e Cibrián Álvarez do Club Xadrez Tui organizador do evento.

A ribeira de Caldelas acolle este venres e sábado o VI Rocha Folk, Dúas xornadas de concertos, un obradoiro, e coma novidade un Encontro Internacional de Bombos e zona de acampada. José Álvarez e Vicki Méndez da organización déronnos todos os detalles.

Este venres ás 21 h celébrase a 31ª edición do Festival de Bandas de Música. Este evento, tradicional no verán tudense, cambia de emprazamento e se celebrará no Paseo Fluvial. En concerto estarán a Banda de Música de Salcedo e a Banda de Música Popular que Tui, que previamente farán un pasarrúas dende a Corredoira. Eloy Carrera, director, e Gustavo Barcia, música déronnos conta de como vai ser o festival no que 3 músicas tocarán por vez primeira coa banda tudense.

Hoxe no Espazo Comercio, que realizamos cada martes en colaboración con ACITUI, Lucía Nogueira, vicepresidenta da asociación, deunos conta do que debemos ter en conta na campaña de Volta ao Cole, se nos queremos beneficiar da bonificación no IRPF. Tamén destacou a existencia das follas de reclamación con código QR.

Los Ángeles 1984, Seúl 1988 e Barcelona 1992 foron os tres Xogos Olímpicos nos que participou o tudense Enrique Míguez Gómez. Hoxe lembrou na nosa sintonía como foi o multitudinario recibimento en Tui tras lograr o bronce en C2 xunto a Narciso Suárez en Los Ángeles, e a espiñiña cravada de non lograr a medalla en Barcelona 1992. Repasamos a súa longa carreira deportiva, como se iniciou no mundo do piragüismo, e que representa o Descenso Internacional do Miño que se celebra este sábado 22. Emociónase ao lembrar a imaxe deste sábado no descenso popular de centos de persoas gozando do río practicando piragüismo, un deporte que segue a ser a súa vida.

Donicelas abrirá este venres o Rocha Folk en Caldelas. Estarán en concerto ás 20.30 h no exterior do Balneario de Caldelas, o lugar onde precisamente gravaron o videoclip do seu tema "Portuguesiña". Así nolo contaron dúas das integrantes do grupo Noelia Martínez e Rosa González.

“La catedral medieval de Santa María de Tui” é o título da conferencia que mañá martes, 18 de agosto, vai ofrecer a investigadora Carmen Manso. Será no Espazo Sociocultural dentro do ciclo "Coñece o noso patrimonio".

A Fada do Aloia realizará mañá sábado ás 11 h unha nova ruta de A Casa da Lontra, amais durante este mes ten a súa propia casa no cumio do monte. Así nolo contou hoxe Natalia Lago dando conta das actividades de educación medioambiental que realiza.

Até este domingo 16 están abertas as inscricións para o XX Rastrexo de Pesegueiro que se celebra o próximo sábado 22. Este ano a temática é La Casa de Papel, baixo o título “Plan de atraco: 20 anos na sombra”. Para participar é necesario formar un equipo de entre 6 e 12 persoas, e inscribirse no correo [email protected]. Hoxe déronnos todos os detalles Carolina e Julio, da Comisión de Festas de Pesegueiro.

O estadio Álvarez Durán acollerá mañá ás 20 h un partido de pretemporada entre o Pontevedra e o Ourense. Así nolo contou hoxe Lis Montes, presidente da Comisión organizadora do centenario do Tyde, quen lembrou tamén a vinculación do Pontevedra co Tyde. Amais avanzou outras actividades que van realizar dentro da programación do Centenario, coma o Trofeo Cidade de Tui que se disputará o 29 deste mes. Lis Montes tivo tamén palabras de lembranza para Víctor Coyote con que o Tyde estaba a traballar, xunto a Pancho Álvarez, no himno do club.

Mañá sábado ás 23 h Gabriel Fandi estará en concerto nas festas da Virxe do Camiño en Rebordáns. Será unha actuación especial na que haberá sorpresas e na que interpretará, entre outros temas do seu repertorio, o último lanzamento "Bonita" que intepretou en directo hoxe na nosa sintonía.

A Asociación de Muiñeiros do río Tripes organiza para o próximo mércores 19 de agosto un paseo botánico pola senda do Tripes. Será a partir das 19 h con inicio e fin na área recreativa de Circos, en Pazos de Reis. O prezo é de 5€. O paseo estará guiado por Xesús Fernández, doutor enxeñeiro e agrónomo, especialista en flora ornamental. O presidente da asociación, Rocardo Dasilva, explicou hoxe que as prazas son limitadas e o prazo de inscrición remata o próximo martes 18.

Máis de 450 persoas van participar este sábado, 15 de agosto, no Descenso Popular do Miño. Así nolo contou o presidente do Kaiak Tudense, Manuel Pedrares, que nos achegou a información práctica sobre a sañida dos autobuses lanzadeira dende a rúa Tenencia e sobre a recollida de dorsais. Dende ás 12 h na ribeira de Caldelas celebrarase a Romaría Popular cunha proposta gastronómica a cargo da Asociación A Insua. Por outra parte Manuel Pedrares avanzou que Manu Garrido logrou esta mañá a praza en c1 senior para competir no Campionato do Mundo de Maratón en Arxentina. Mañá será a quenda de Tania Fernández xunto a Tania Álvarez no K2.

Unha xornada de convivencia que se vive na rúa, así é a Festa do Miño que se celebra este sábado na rúa Compostela. Unha data que o Concello de Tui, as asociacións culturais e a cidadanía suman sinerxías nunha actividade que celebra a súa décimo cuarta edición. Así o explica a concelleira de Cultura, Sonsoles Vicente. Unha festa que define o arraigo de Tui co Miño, que forman parte da identidade local, e coas asociacións do municipio. Dende ás 20 h haberá gastronomía, e a música será tamén un dos ingredientes da festa con tres agrupacións A tú Ritmo, Fanfarria Takicardia e Mekánica Rolling Band.

Coa procesión de San Roque comezan este sábado as festas na honra a San Roque e San Bartolomeu no barrio tudense de San Bartolomeu. Do programa previsto tanto esta coma a próxima fin de semana déronnos conta hoxe Francisco Cañedo e Javier Rodríguez, da Comisión de Festas de San Roque e San Bartolomeu.

Mañá viviremos un eclipse solar que na nosa zona será singular aínda que non acadará o 100% de ocultación do sol. Coñecemos todos os detalles deste fenómeno astronómico e cómo velo con seguridade co presidente da Fundación CEO, Ciencia e Cultura, Enrique Alonso.

Borja Núñez, remeiro do Club Remo do Miño fixo historia esta fin de semana ao colgarse a medalla de ouro no Campionato do Mundo Sub 19 en Catro Sen Temoneiro en Plovdiv. É o primeiro remeiro galego sub 19 en lograr subir ao máis alto do podio nun mundial. Compartiu connosco como viviu esa final . Canda a el estivo tamén o seu adestrador Manuel Angel González, presidente do Club Remo do Mño, que seguiur a final dende o club cos seus compañeiros, contounos tamén como viviu esa final coa confianza de que a medalla era posible.

Cales son as vantaxes que ofrece a Asociación de Comerciantes e Industriais de Tui, ACITUI, aos establecementos asociados, e cales son as vantaxes de ser socio foron presidente da asociación, Pepe Míguez. Fomentar o comercio local, darlle visibilidade e ofertar actividades de formación son algúns dos obxectivos de ACITUI. As persoas interesadas poden contactar con calquera membro da directiva, ou dirixirse á oficina situada no edificio Francisco Sánchez. Neste momemento son 116 asociados.

A vinculación do Mosteiro de Ganfei e de San Teotonio con Tui será dada a coñecer esta tarde na visita guiada “Os tempos do románico en Ganfei: o mosteiro de O Salvador e San Teotonio”. Comezará ás 20.30 h ES no propio mosteiro dentro do ciclo “Coñece o noso patrimonio” que promove o Instituto de Estudios Tudenses coa colaboración do Concello de Tui. Será guiada por Isilda Salvador, museóloga, investigadora e técnica cultural que avanzou algúns detalles da visita.

Rebordáns prepárase para vivir esta fin de semana as festas na honra á Virxe do Camiño. Previamente dende mañá celebran a Semana Cultural con teatro, gastronomía e música. Ismael Felgueiras e Ángel Vila, de Amigos da Festa de Rebordáns, presentaron hoxe na Radio Municipal de Tui a programación tanto da Semana Cultural con actos mañá martes e o mércores, como das festas que van celebrar xoves, venres e sábado.

Este domingo 16 comeza a Semana Cultural de Caldelas, con cinco xornadas de programación organizadas pola Asociación A Insua de Caldelas. Haberá actividades infantís, música, baile, humor, teatro, cine e playbacks. Todo na ribeira. Contáronnolo hoxe José Álvarez e Vicky Méndez, da Insua.

44 integrantes de Arume de Malvas porán rumbo mañá martes a Concarneau, en Francia, para participar no 104 Festival Filet Bleu. Alí ofrecerán un espectáculo de tradición, música e baile, tal e coma hoxe destacaron Mila González, presidenta de Arume de Malvas; Diego Alonso, profesor; e Manuel González, integrante da banda.

Miles de persoas gozarán esta fin de semana da programación das festas do Monte na Guarda. Mañá sábado grupos folclóricos, e 21 bandas mariñeiras participarán no desfile entre a Alameda e o Porto, e o domingo máis de 15 mil persoas subirán ao cumio do Monte. As verbenas e outras propostas culturais e de lecer forman parte do programa festivo. Así o explicou José Ángel Gándara, presidente da comisión de festas, quen lembrou a orixe dos festexos.

Dous días de festa na honra a San Mamede son os van ter esta fin de semana na parroquia tudense de Guillarei. Mañá sábado coincidindo coa celebracións da comunións comezarán xa con ambiente musical, e logo o domingo a xornada festiva que rematará coa presentación das festas da Virxe das Dores que celebra 130 anos e 75 anos do manto da virxe que vén de ser restaurado, cuestións que quedarán reflectidas no cartel.

Festas na honra a San Caetano vanse celebrar este sábado, domingo e luns na parroquia tudense de Paramos. Gastronomía, verbena, actos relixiosos, e punto de encontro festivo para toda a veciñanza que agarda xa por estes días. Así nolo contou hoxe Carmen Pérez, membro da Comisión de festas de San Caetano, quen indicacaba que o domingo ás 10.30 h terán un pasarrúas da Banda de Gaitas San Xoán de Paramos.

A violinista tudense Sara Areal regresa hoxe a Música no Claustro para presentar un proxecto moi persoal en ´casa´ e nun ´lugar seguro´ como ela mesma explicaba. Trátase de "Poema Infinito" unha proposta musical na que reflexiona sobre os sentimentos, a emoción, os momentos difíciles, e oregreso. Sobre o escenario estará acompañada por diferentes músicos, entre eles a súa irmá Raquel. Con Sara Areal conversamos sobre este proxecto, sobre os seus inicios, e sobre Música no Claustro.

O Centro Sociocomunitario de Tui acolle a primeira semana de setembro o obradoiro "Prepárome para o instituto", dirixido ás persoas que comezan esta nova etapa, e poidan aprender a elaborar esquemas, organización e técnicas de estudo. O prazo de inscrición remata o próximo venres 14 de agosto Ana García, pedagoga, indicou que a inscrición se pode realizar no teléfono 659 695 516 ou de xeito presencial no propio Centro.

A eclipse solar do próximo mércores, 12 de agosto, vivirase de forma especial no Monte das Penizas en Paramos, coa actividde organizada polo Concello de Tui en colaboración coa Comunidade de Montes de Paramos. Dende ás 18 h haberá música con Botz, gastronomía...e o concello agasallará gafas homologadas para a observación da eclipse. Así nolo contou a concelleira de Turismo, Ana Núñez.

Guadi Galego ofrece hoxe xoves ás 21 h no Festival Música no Claustro o seu único concerto en Galicia deste verán. Faino despois de transitar un periodo de reflexión, no que foi artellando e coñecendo o que nestes momentos quería expresar a través da música. Volver así ao festival para ofrecer unha proposta intimista, na que sentará ao piano e na que estará acompañada de Vic Moliner, produtor dos seus discos; e Iago Carro, baterista. Coñecemos toda a información con Guadi Galego e Samuel Diz, director do festival.

Xogos de equilibrio, frenadas, zig zag, relevos, obstáculos, os cambios, ou puntos a revisar antes de saír en bici, serán algún dos aspectos que aborde o Campus de Ciclismo organizado polo ciclista tudense David Fernández para as dúas últimas semanas deste mes de agosto en horario de 10 a 14 h. Vai dirixido a nenos e nenas de 8 a 14 anos, desenvolvéndose na praia fluvial de Areeiros, en Guillarei, e na explanada a carón das pistas de atletismo da Macoca. Coñecimos todo os detalles con David Fernández, quen tamén fixo balance da temporada.

Un concerto para deixarse envolver na Catedral de Tui, con voz e órgano e con obras de G. F. Haendel, John Dowland, F. Correa de Arauxo, J. S. Bach, J. Haydn e F. Mendelssohn. Así será o concerto de hoxe mércores ás 21 h no Festival Música no Claustro. A organista Silvia Márquez regresa ao festival xunto á soprano Eugenia Boix para presentar Salve Regina.

O próximo 12 de agosto está xa marcado no calendario para vivir unha cita histórica co eclipse solar total. Son miles as persoas que observarán o ceo para poder desfrutar deste fito, e quixemos coñecer cales son as recomendacións a ter en conta para facelo con seguridade. Esther Amado, a presidenta do Colexio de Ópticos-Optometristas de Galicia, confirmou que o máis importante é observalo con gafas homologadas.

A tudense Silvia Leiras vén de fichar polo Atlético Guardés despois de dúas temporadas no Ikasa Boadilla, en Madrid. Hoxe conversamos con ela sobre esta fichaxe, a súa traxectoria profesional e os seus inicios.

As actividades abertas do programa Resonancias do Festival Música no Claustro comezaron onte luns na Catedral de Tui e continuará con máis actividades e talleres. Mañá mércores a cita será sobre saúde mental e o xoves sobre o proxecto "Guitarra: o son da madeira galega". Amais aínda quedan prazas para os tres talleres que se impartirán sobre mantemento de instrumentos musicais e ilustración. Samuel Diz, director de Música no Claustro, indicou hoxe que toda a información e inscricións están dispoñibles na páxina web do festival.

Este sábado celébrase na Lagoa de Caldelas o VIII Torneo Virxe da Rocha de Kaiak Polo. Contará coa participación de 70 deportistas. Eva Ara, do Club Penedo, organizador do evento, deunos todos os detalles.

Os comercios e establecementos que venden produtos a través de internet deben cumprir unha serie de obrigas de cara a garantir un comercio seguro e fiable. Por exemplo, ofrecer información sobre cambios e devolucións, sobre a composición dos produtos ou sobre como contactar coa marca. Hoxe Lucía Nogueira, vicepresidenta de ACITUI, ofreceu no Espazo Comercio consellos e recomendacións para cumprir con estas normas.

A historiadora tomiñesa Natalia Jorge Pereira foi gañadora do Premio de Investigación Xesús Ferro Couselo. Por primeira vez dende que estes galardóns se celebran, unha mesma persoa obtivo o primeiro premio nas dúas modalidades: Traballos de Investigación e Becas de Estudo. Os proxectos recoñecidos foron “Pasaron polos ollos, pasaron polas mans. O contrabando no Miño” e “Fame na Valga da posguerra? Análise histórica dun concello rural durante a autarquía”. No seu contido profundou hoxe Natalia Jorge no programa Día a Día.

Temporada a histórica a de Sara Tui e o seu equipo o Higicontrol Melilla: gañaron a Liga, a Copa, a Supercopa e o Europeo. Agora encaran o reto de gañar o Mundialito de Turquía, en outubro. Sobre estes fitos, a Selección Española de Fútbol Praia e o seu proxecto de Fútbol 11 en Melilla conversamos hoxe con Sara Tui.

Este venres, ás 21 h, celébrase no Nött en Tui un desfile de moda de La Tortoisse e Iván Cross. Será un evento que combinará non só a presentación da colección final de verán senón tamén música en directo coa actuación de D'Crooners, e o sorteo dunha viaxe a Exipto. A entrada será libre. Así nolo contaron Bea Pichel de Planstur e José Diz de Nött.

Jaime Estévez, Hugo Lomba, Sira Pellicer e Miquel Flores, conforman Lítore Quartet, o cuarteto que hoxe ás 21 h actuará en Música no Claustro. Hoxe van interpretar un programa pensado especialmente para o festival, no que recollen obras do arquivo da Catedral, do mestre Matías García Benayas, pero amais van realizar a estrea absoluta de Lux Glaciei, unha obra da compositora Irene Cantos.

Música no Claustro é máis que un festival, é un “espazo nutritivo”, feito a escala humana, e o seu ADN insértase no ADN da cidade. Así nolo contaron esta mañá Samuel Díz, Jonathan Alvarado, Begoña Riobó, e Anxo Pintos, que xunto a Patricia González ofrecerán mañá sábado ás 21 h o concerto de apertura do festival que celebra a súa edición número vinte. Será unha tardiña cargada de emoción, de música de diversos estilos, de “regreso”,... na que non faltarán as sorpresas. O público volverá enchar o claustro cunha escoita atenta como destacan os e as artistas que xa actuaron en Música no Claustro e que co gallo destes 20 anos regresan a “casa”. A cita terá lugar no Claustro da Catedral de Tui.

A parroquia tudense de Rebordans celebra esta fin de semana a Romaría de San Fins. Comezarán xa mañá sábado á tardiña no entorno da capela, e o domingo realizarán a tradicional procesión dende o Centro Cultural até a ermida, na que participarán tractores e chimpíns. Déronnos todos os detalles Katia Rocha e Vanesa Alonso do Centro Cultural San Fins.

O tudense Carlos Fer recibiu hai uns días o Prémio Revelação IPDJ – Instituto Português do Desporto e Juventude na XXIV Bienal Internacional de Arte de Cerveira (@bienaldecerveira) pola súa obra “Além do Álveo”, que foi adquirida pola Fundación da Bienal. Trátase dunha videoinstalación formada por 225 pezas impresas en 3D inspiradas nos deseños de azulexos das dúas beiras do Miño sobre as que se proxectan imaxes deste río compartido. Así nolo contaba na Radio Municipal de Tui, ao tempo que facía balance de “Relicario” a intervención artística que até finais de setembro presenta na Catedral de Tui.

O proxecto Fortalezas de Fronteira realizou nas últimas semanas unha segunda intervención no complexo das Torres en Tomiño. Coa directora da iniciativa e arqueóloga Rebeca Blanco-Rotea coñeeimos o balance da actuación na que se despexaron algunhas incógnitas e na que se abriron novos interrogantes. Obtiveron máis de 700 piezas arqueolóxicas e atoparon evidencias dun gran incendio en época medieval.

Máis de 200 persoas voluntarias de todas as idades están a participar en "Ollos no Monte" unha iniciativa da Mancomunidade de Montes do Baixo Miño que se leva a cabo por segundo ano consecutivo. Hoxe coñecemos en qué consiste, como se desenvolve, a situación dos montes da comarca, e tamén os novos proxectos nos que a traballa a Mancomunidade co seu presidente José Antonio Rodríguez.

A tudense Patricia González volve "a casa" este sábado co concerto que vai ofrecer en Música no Claustro xunto a Samuel Diz. Volverá actuar no lugar onde estudaba frauta con 15 anos e onde actuou na primeira edición deste festival. Hoxe falamos con ela do especial deste concerto, do festival e tamén da súa traxectoria profesional. Este sábado poderemos gozar da súa interpretación con temas que teñen tamén un significado especial.

A Fada do Aloia, Natalia Lago, propón dúas rutas para esta fin de semana para darlle a benvida ao mes de agosto. O sábado será A Maxia das Libélulas e o domingo A Casa da Lontra. As dúas comezarán ás 11 h. A inscrición pode facerse no 619 96 90 90. Natalia Lago deunos todos os detalles desta proposta.

“Mirani, historia da miña familia” e o título da película que o Cineclub Tui vai proxectar mañá venres, ás 21 h, na Casa Cultural de Randufe,en colaboración coa Asociación Xuntanza. A entrada terá un prezo simbólico de 2 euros. Noemí Guisande do Cineclub Tui e Manuel Diz da Asociación Cultural Xuntanza, explicaron como xurdiu esta colaboración, que volverán repetir no mes de setembro.

"Arte con telas" é o título da exposición que dende mañá xoves, 30 de xullo, se poderá visitar no Balneario de Caldelas. A mostra reúne a obra de María Jesús Prieto e de Marta Pereira de Martei. María Jesús Prieto presentará gran variedade de pezas realizadas en patchwork e Marta Pereira a primeira colección da súa marca Martei xunto a complementos e outras creacións. Hoxe contáronnos coma xurdiu a exposición tras o reencontro, logo moitos anos, e profesora e alumna,coa costura coma paixón compartida.