Lama Tekbary Hatefhamy

السنة الجديدة دايمًا بتيجي ومعاها خطط عريضة، نوايا عظيمة، ووعود لنفسنا هنفكس حياتنا كلها في 12 شهر في الحلقة دي من لما تكبري هتفهمي بنرغي عن السنة اللي فاتت:كبرنا؟ اتغيرنا؟ فهمنا حاجة؟ ولا كبرنا في السن بس؟بنهزر، بنضحك، وبنحاول نفهم إحنا رايحين على فين… أو حتى ليه لسه واقفين مكانا.سواء فهمنا أو ما فهمناش، يكفينا شرف المحاولة.

مين قال إن الرجالة لازم يكونوا كده والستات لازم يكونوا كده؟ في الحلقة دي، هنسلط الضوء على كل الستريوتايبس اللي اتربينا عليها من صغرنا، ونكتشف مين اللي حط القواعد دي أصلاً! هنتكلم عن الحب، العلاقات، والاختلافات بين الرجالة والستات… بطريقة صريحة حلقة عن المجتمع، عن الأدوار اللي اتفرضت علينا، وعن كل اللي اتقال لنا إننا لازم نكونه

في الحلقة دي دخلنا التيكتوك بنية ننام بدري… وطلعنا منه الساعة ٤ الفجر.فتحنا صندوق اللايفات والقصص اللي بتبدأ ومش دايمًا تخلص، ومشاكل بنكمّلها لمجرد الفضول.ليه بنسحل نفسنا ورا كل حكاية؟ وليه بنفضل نكمّل حتى وإحنا عارفين إنها ولا قصة ولا حاجة؟تعالوا نضحك ونفكر سوا… هو إحنا ليه بنعمل في نفسنا كده؟

البدايات دايمًا بتحسّسنا إننا في فيلم… فراشات، excitement، وحماسة مالهاش تفسير. بس بعد شوية… بننزل من السحاب ونخش على الواقع اللي هو ولا وحش ولا حلو، هو بس واقع.وفي المقابل… النهايات؟ آه، مؤلمة شوية، بس مش لازم نعيشها وكأنها نهاية العالم.في الحلقة دي بنتكلم عن ليه البدايات بتسحرنا، وليه النهايات بتوجع… وليه الاتنين مهمين أكتر مما بنفتكر.

في الحلقة دي هنهزر مع بعض عن الناس اللي عايشة في النوستالجيا وبتفتكر إن أيام زمان كانت أحلى… وبتقفل على نفسها الباب وترجع تعيد نفس الذكريات ١٠٠ مرة! ليه بنهرب للماضي؟ وليه بنحس إن الحياة زمان كانت ألطَف؟ تعالوا نفوّق نفسنا شوية ونشوف الموضوع بعيون أصدق!

جيل العشرينات… الجيل اللي اتربّى على “اسكت وخليك عاقل"وفنفس الوقت اتقاله “عبر عن مشاعرك واطلع اللي جواك”!فبقينا جيل بيعرف يكتم… وبيعرف يعمل self therapy…بس مش بيعرف ياخد قرار

حلقة للناس اللي صحابها بيطمنوا… بس تصرفاتهم لأ.للناس اللي بتكتشف إن صاحب الشدة… هو نفسه شدة اليومالصاحب اللي بيظهر وقت الشدة… غالبًا بيكون هو سببها.

زمان كلن بيقولوا "بحبك"😭 دلوقتي بيقولك "احنا في حاجة كدة شبه حاجة بس مش حاجة"في الحلقة دي هنفك شفرة "العلاقات الحديثة". يعني لو كنت محتار ده حب ولا بيـ breadcrumb فينا..اسمعوا الحلقة دي وافتكروا ان محدش بيتجرح اوي الا لما بيصدق الvibe اوي

لو عمرك حسيت إنك عايز تمشي من الشغل من غير ما تسيبه، فالحلقة دي ليك. بنحكي عن جيل بيحاول يفهم يعني إيه “استقرار”، وإزاي كل جيل فاكر التاني مدلّع

المكان الوحيد اللي بنعترف فيه إننا مش فاهمين حاجة!😂 بودكاست 'لما تكبري هتفهمي'.. الدليل السريع للتوهان. 🎧 حلقة جديدة كل جمعة من كل اسبوع.