Naja LG

Wer sich i die Folgebeschriebig verirrt hett, ide Hoffnig, da en Antwort uf d’Frag im Titel z’finde, de oder die müemer leider enttüsche. Clickbait isch Clickbait – sind froh, isch die Folg nöd hinder ere Paywall. Jeeeedefalls lueged d’Vivi und d’Kleo i dere Folg zrugg uf es kunterbunts Geburtstagsfäschtli und vezelled eu, welli Cypher-Parts sie das Jahr zum lache bracht hend und bi wellne fasch es paar Tränli gflosse sind. Denn werded paar cringe Bewertige gspitted und es erwarted eu wie gwohnt Samples vo Internetperle. Ach und d’Vivi vezellt no, dass sie churzerhand es neus Festival gründet hett – aso, fascht. PS: S’Ristorante Italia hett a dem Abig komplett verseit und mir sind im Rote Delfin glandet – meh dezue denn ide nächste Folg… Vilicht.

Welle Oscar würsch am liebste günne? Muess mer de Timothée Salamé cancle? Spukts wükli im Coop am Stadelhofe? Wie hend sich denn etz d’Lüüt im Mittelalter gweckt?! Was, wemmer sich in Sache Hürate nöd einig wird? Was füres Hölle-Werk isch de Globi-Film? I weles rabbit hole isch d’Kleo wieder gheit? Zwüsched wellne Internetperle cha sich d’Vivi dasmal nöd entscheide? Und werded di beide eines Tages wieder normal chöne sege: «SO GEIL!»?!  Wer, wie was, wieso, weshalb, warum? Wer nicht hört, bleibt dumm.

He, so geil! Geil wie Zahreinigung am Mäntigmorge, wie 30 Kilometer z’Fuess zrugglegge, wie s’alte Tramdepot z’Bern. Geil wienes Boomer-Theater ame Fritigabig, wie Schach spiele ufem Handy, wienen Vogel im Briefchaste. Geil wienes neus Roman Empire, wie lustigi Hate-Kommentär, wienen Ohrwurm, wie Ice Tea Lemon und vor allem: Geil wiene neui Folg Naja LG! Das isches doch, oder Claudia?! Mir finded scho. Und bitte, und los!

«Alles glänzt so schön neu» - aber kei Angst! D’Vivi und d’Nina hend ihres Studio nöd verbrennt und d’Asche nöd wie Koks gschnupft. De Peter Fox macht da sis eigene Ding. Di beide started aber miteme neue Cover i ihres 3. Podcastjahr. Es wird verhältnismässig früeh im Podcast über s’Mittelalter gredet, uf Wiehnachte und Silvester zruggglueget, Danger Dan zitiert und endlich wiedermal di eint oder ander Frag vom Publikum beantwortet. Usserdem werded ihr mitgnoh uf e Reis anes DJ Bobo Konzert im Europapark. Und last but not least fiired d’Vivi und d’Kleo de Uftakt vonere neue Rubrik: D’Internetperle chunnt es Gschwüsterti über – wir gehen rein!

Stimm ahgschlage, trotzdem da – Naja LG Antifa! D’Gschänkli sind uspackt, d’Guetzli verdaut und d’Vivi und d’Kleo lueged gmeinsam uf s’2025i zrugg. Wie sie ihres Jahr würed nenne, wenns en Film wär und wie sich de Plot wür zemefasse lah, was ihri Highlights und Tüüfpünkt gsii sind, was sie us dem Jahr glernt hend, ob’s inzwüsche meh Dating-Tipps uf Lager hend und welle Soundtrack ihres Lebe di letschte 12 Mönet gha hett, all das vezelled di beide ide neue Folg. Irgendwo zwüsched Wandtattoo-Zitat und Pause zum Umsitze, wills sone langi Folg worde isch… Irgendwo dezwüsched wird’s so persönlich wie vilich nonie. Will eis isch für di beide nach diverse ihschniedende Moment das Jahr klar: Alli Macht de Authentizität! D’Vivi und d’Kleo träged ihres Herz uf de Zunge und sind ready, au 2026 zu sich selber z’stah – ganz egal, was di andere denked. Kitschig, aber wahr. Schön, wenn ihr wiiterhin debii sind. Merry crisis und happy new year!

Wie hett einscht scho de Dichter und Denker Daddy Yankee gseit?! «Dame más gasolina!» - zu Deutsch: «Gib mir mehr Benzin!» (Eigentlich redt er vo Sperma, aber das isch en anderi Gschicht…) Naja, jedefalls sind d’Vivi und d’Kleo absolut volltankt i die Folg gstartet. Di eint mit Schnudder, di ander mit überschüssige Energie. Kei Alkohol, defür scho de 3. Kafi intus – oder wie mir’s nenned: S’Kokain vode Huusfraue. I dere Folg gahts um s’Kennelerne vode Vivi und em Röbi Carpe Diem, de Nina ihre Papi. Es gaht um hipps Velofahre, Girlhood am Arsch vo Uster, en neue Instaname für d’Kleo und eimal meh chamer de Bumms mitere niederländische Pointe zemefasse: «Kan ik deodorant kopen?» Wer nicht fragt, bleibt dumm. Abfahrt!

Nöd eis, nöd zwei, nöd drüü - nei, VIER Polenta-Rezept werded eu i dere Folg serviert. Statt eme Gruess us de Chuchi, gitts en Gruess us de Ostschwiiz und es chlises Deeptalk-Süppli wird auno usglöfflet. Zum Dessert folgt e Komposition vo Kulturtipps, serviert amene Internetperle-Schüümli in Zahputzgläser. UND, nöd z'vergesse - für di beide Chefs de Cuisine Vivien und Nina hett niemert griengers Chuchidienscht als de Herr B. himself. Auf die Plätze, fertig und los gaht s'wilde Säulirenne!

Liebe Gemeinde – ich zitiere aus dem ersten Brief, den Paulus an seine Mutti schrieb. Darin heisst es: Herzlich Willkomme zunere neue Folg Naja LG! Wär die Folg en Gottesdienst, denn hett de Priester uf jede Fall z’vill Messwii gsoffe. I dem Fall macht d’Vivi de Priester und d’Nina haltet sie us. Aso eigentlich alles wie immer: Die beide Podcastvögel diskutiered drüber, wie wiit sie bi Squid Games würed cho, mit wem sie gern inere WG wohne würed, wer ihri Celebrity Crushes sind und vor allem chömeds wiedermal grandios vo all ihrne Theme ab. En bsundrige Gruess id Ostschwiiz und vill Freud mit dere absolute Perle als Bonus für eues Lebe. Amen!

D’August-Folg Naja LG: Wienen chüehle Schluck Lemon Soda, wie en alte Phenomden-Song, wo dur d’Steibi tönt, wienes Wuchenend ufeme italienische Wiiguet, wie mit Fründinne zu Chappell Roan Songs tanze, wie Trinkspieli ame random Zischtigmorge am 2, wie s’Ufwache und wüsse: Hüt gahts in Europapark! De Monet isch wienes nöd endends Summer-Märli gsii und mein Gott, die beide Podcast-Müüs hends gliebt! D’Vivi und d’Nina vezelled vo ihrne Musigfestwuche-Highlights, vom Ufenandtreffe miteme Schwiizer Peinlich-Promi, vo Erfolg und Misserfolg, Rabbit-Holes in Sache Internetperle und vode Klingeltön vo ihrne Mamis. Und bizli Liebi für s’Naja LG Publikum isch s’Chriesi uf de auditive Kirschwälderturte! Wänn die Folg en Drink wär, denn en tüüforange, bittersüesse Aperol – cheers!

Die haarsträubenden Fälle der Vivi und Nina – heute: «Ist der Wixxer noch zu haben?» Erster Teil: D’Vivi hett denkt, wenn es Jahr scho alles uf de Chopf stellt, denn erscht recht. Drum hett sie di letschte paar Wuche mit Zügle verbracht. D’Nina isch ihre dadebii nöd vode Siite gwiche – au während eme chliine Abstecher zum Winterthurer Polizeiposchte. Wellem Verbreche di beide hend müese nahgah, ob sich ide Akte Desigual nomal öppis tah hett und warum de Nina ihre Papi eimal meh de Held vom Monet isch – all die Frage beantwortet eu die Folg. «Üble Sache, Maloney!» – aber für d’Story isch’s geil!

Es lauft bide beide Podcastmüüs! Ab de Stirn, de Rugge durab, de Wädli entlang… Mit vill Hitz und Schwitz begrüessed eu d’Vivi und d’Nina zunere neue Folg und eme farbige Bouquet a blüehende Gschichte: D’Nina vezellt vo ihrem Usflug is Filmmuseum uf Sizilie, es gitt es Update im Falle Desigual und vilich de Ahfang vode romantischte Liebesgschicht sitt Susi & Strolch (Eiermaa, bitte meld dich!). D’Vivi wiederum erchlärt, warum sie neuerdings Heuschnupfe hätt und offebart lebensveränderndi Tipps, wo ihre Alltag z’letscht erliechteret hend. Liebs Publikum, liebs zuekünftigs Arbets-Team vode Vivi und liebe Züri Oberländer – mached eu parat für hotti Storys (im wahrschte Sinn vom Wort).

Est-ce que tu parat für di neu Folg? Nous sommes aber sowas vo! Nachdems d’Nina für es Wuchenend usem paradiesische Uster is grosse, wiite Paris gschafft hett, versuecht sich d’Vivien anes paar französische Ziile – inklusive Jahreszahl vorlese! Stelled eu vor, mir würed «90» au als «vierzg-zwänzg-zäh» bezeichne… Birrehohl, oder?! Naja, jedefalls folgt uf e usführlichi Französischstund tatsächlich au wiedermal bizli en ernstere Talk. D’Vivi vezellt devo, wie’s ihre inzwüsche mitem Verlust vo ihrem Job gaht und au s’Thema Körper kommentiere wird ufgrollt. Aber, ihr wüssed wie’s isch: Humor isch, wemmer trotzdem lacht. Und das passiert selbstvertüürlich au i dere Folg! Sinder debii? Na denn: Allez & vive les podcasts!

There’s no Busney like Live-Busney: Nacheme churze Update usem April, lueged d’Vivi und d’Nina i dere Folg uf ihre erschti Live-Podcast Endi März zrugg. Warum sich d’Schwiizer Rap Szene uf neui Konkurrenz muess gfasst mache, welli Findus-Plätzli d’Nina am liebschte hett und was die beide würed mache, wenns e ganzi Nacht ellei inere Bibliothek chönnted verbringe – uf all die Frage und no vill meh werded eu Antworte serviert. En Mix us Rückblick und eme Live-Zemeschnitt vo ihrem Uftritt staht also ide Chuchi parat und wird per Knopfdruck uf Play vode Servierdüüse a eue auditiv Tisch bracht – en Guete bi Sex & Röschti!

Wer kennt’s nöd?! Mer isch dihei, wött gmüetlich online e Hose bstelle – und plötzlich findt mer sich wieder, wie mer füdliblutt voreme Massstab hockt und mitere Päcklischnur oder eme alte Schuehbändel de Umfang vo sinere Taille versuecht z’berechne. Oder, mer gnüsst grad en feine Zmittag inere neapolitanische Hafebeiz, wo plötzlich zwei muetmasslichi Mitglieder vode Mafia inespaziered?! Naja, irgendwo zwüsched dere erbärmliche Alltags-Situation und em Ahfang vome schlechte 80er-Jahr-Thriller, spillt di neu Podcast-Folg. Stieged mit eus in tuckernde Nachtzug ih und lönd eu wiedermal is Land vo 1001 Gschicht und no meh schlechte Wortwitz entfüehre. «Tschipfu, tschipfu, tuuut, tuuut!» (Das isch Zug-Sprach und heisst: Los gahts!).

Wie's einscht die weise Frau Hannah Montana gsunge hett: You got the best of both worlds – au i dere Folg: D'Nina und d'Vivien vezelled, was sie ide letschte paar Wuche beschäftiget, zum Brüelle und zum Lache bracht hett. Vo lustige Begegnige im Bus, über e Hannah Montana Tribute Show, bis zu unagnehme Sexszene im Gym. Jaja, ihr hend richtig glese: It's getting spicy. Nöd nur, will di beide wilde Müüs auno ihri Dating-Tipps abgebed. Arrrriba! Apropros wild: I dere Folg derf s'Comedy-Drama-Duo Naja LG s'erschte Mal en Live-Podcast ahchünde: Am Sa, 29. März 2025 nehmed d'Vivi und d'Nina e Folg Naja LG ide Bibliothek Wülflinge uf – am 18:00 gahts los!

"Heeey, guets Neus gäll, hesch schöni Fäschttäg gha?! Bisch guet grutscht?! Fit und munter?!" D'Vivien und d'Nina heissed eu mit de Wucht vo all dene unerträgliche Floskle herzlich willkomme im Jahr 2025! Die beide vezelled vo ihrne erschte Täg im neue Jahr, wo nöd unterschiedlicher hetted chöne sii: Während d'Nina sich usversehe ime Schlafzimmer z'Porto ihgsperrt hett, isch d'Vivi dur e FKK-Schlüüse is Abentüürland Wellneshotel gstolperet. Usserdem vezellt d'Nina vo ihrem erschte Solo-Usgang, es wird sich über Fat-Shaming i 2000er RomComs gnervt und d'Vivi offebart e Taktik vode Nina, zum ungewolltem Smalltalk gekonnt usem Weg z'gah... Aso ihr Liebe, setzed eue Saunahuet uf und gnüssed di neu Folg - oder wies de Michael wür sege: "Jetz tüemer die Musik abloh und dann gehts los!".

Alles hett es Endi… aber Naja LG hett no keis! Bide Nina und de Vivien «bleibt alles so, wie’s jetzt is’!». Die beide Fründinne planed au 2025 jede Monet e neui Folg usezhaue. Will wenns öppis gitt, wo ihne i dem Jahr konstant Freud gmacht hett, denn isches de Podcast und ihri Fründschaft gsii. Was susch no so gloffe isch, uf was die beide 2024 stolz gsii sind, a welem Ort sie das Jahr gern no chli länger bliebe wäred, welli Redewendige und Wörter sie bsunders oft gseit hend und welli Ziel ihne für s’neue Jahr vorschwebed – all das isch Thema ide letsche Folg vo dem erschte Jahr Naja LG. Danke fürs Zuelose – es isch eus es inners Bluemepflücke!

This is Seeed, ya! Mit summerlichem Soundtrack im Ohr startemer id November-Folg. Hinder de Vivi und de Nina liiht nämlich e Wuche Ferie uf Gran Canaria - oder wie sie's nenned: spanisches Las Vegas. Vo Roadtrips, Tapas und im Meer bade bis zu Aqua-Fitness: D'Gschichte-Chischte isch fliessig gfüllt worde und zrugg im graue November packed di beide Fründinne us, bevor au bi Naja LG d'Wiehnachtssaison ihglüütet wird. Es wird en winterliche Serie-Tipp serviert, Gschenkli-Inspiration glieferet und dankeme freudsche Versprecher hend die beide auno Sex bim Wichtle. Was?! Naja, losed selber... happy chrismis, merry chrysler!

Gran Canaria calling! Bevor d’Vivi und d’Nina i di erschte gmeinsame Ferie düüsed, hends di 10. Folg Naja LG ufgnoh und au die isch chli wiene Insle vode Erholig gsii. D’Vivi hett nemmli intensivi Arbetswuche hinder sich und d’Nina en richtige Scheisstag. Ahlass gnueg, s’erschte Mal e Folg im Bett ufzneh. Gmüetlich vezelled di beide über ihri Erlebnis im Oktober, über ungewollti Gschenk, ufdringlichi Wöschberge, unushaltbari Musiggenre und ufputschendi Lieblingslieder. Usserdem gitts wiedermal en Tipp vode Comedy-Vivi und d’Nina katapultiert eus mit ihrere Internetperle de Ohrwurm vom Tag in Chopf – isch gerngscheh!

«Was isch s'Gheimnis vo euem Erfolg, s'Gheimnis vom Märli vezelle?» Über die und en Huufe anderi Frage redemer ide September-Folg vo Naja LG. Und das mit niemer Gringerem als em LUUK. Er isch Rapper, Märlitante, mengisch dichtende Dichte und vor allem eifach en richtig guete Typ. Am 18. Oktober chunnt em LUUK sis neue Album «Poly» use - und mindestens öppis hett das Album mit eusere neue Podcastfolg gmeinsam: Driilose lohnt sich. Baci und LG! 

Herzlich Willkomme zude grosse Chaosfolg: Mir segeds mal so, de Name isch Programm! Zmitzt ide romantische Erzählige vode Vivi ihrem Adele-Konzert-Erlebnis, sorgt de Nina ihres Büsi für chli Stimmig im Podcast-Studio. Es isch fasch so wild wie de Nina ihri nächtliche August-Erlebnis und di schlimmste Restaurant-Erfahrige wo di beide je gha hend... we can nothing say to this issue! Aber kei Angst - hineuse gitts wie so oft no e Priise Chindheitsgschichte, gspickt mit Liebi. Vill Freud bim Zuelose! 

«It's me, hi, I'm the problem it's me»: D'Vivi und d'Nina started spontan miteme Taylor Swift Speech i di neu Folg. Happy Eras Tour Month a alli, wo fiired! Endlich wieder back in town, gitt d'Nina Ihblick hinder d'Kulisse vo ihrem liebschte Restaurant z'Züri. Usserdem beantworted d'Vivi und d'Nina d'Frag, wie sie sich kenneglernt hend, i wellere Stadt sie gern würed wohne und was sie würed mache, wenn sie en Tag lang en Maa chönnted sii. Und sie verrated ihri liebschte Erinnerige ad Chindheit. Was sind dini?

It’s time to say goodbye – zmindest für d’Nina und ihres Koch-Praktikum. Während sie ihri letschte Täg in Brambode City verbringt und d’Vivien inen strenge Arbetssummer startet, nehmed di Beide s’erschte Mal getrennt vonenand Podcast uf. Ide erschte Remote-Folg gaht’s um Chilbi und Dorfete, um Sache, wo d’Vivi und d’Nina wükli so GAR nöd chönd und um momentani Lieblingsmusig. Usserdem gestaht d’Spieli-Hasserin Nina em Spieli-Ultra Vivien, dass sie mit Schach spiele ahgfange hett und d’Vivien liefertet e neui Zug-Gschicht für di gmeinsami Sammlig – schlechti Wortspiel inklusive. Vill Spass mit de Juni-Folg!

Frag vom Tag: Wat wil die Folg?! Spoiler: Mir wüsseds au nöd wükli... Direkt us Brambode-City vezelled d'Vivien und d'Nina vo ihrem gmeinsame Wuchenend a dem Ort, wo d'Nina ihres Koch-Praktikum macht. Es wird gschwärmt (i de Hoffnig, dass gwüssi Persone die Folg nie lose werded), d'Vivi haltet ihri Gmeinsamkeit mitem Mick Jagger fescht und d'Nina schwätzt vo «Balls» ame Siitespiegel. Usserdem verrated sie ihri gröschte Gheimnis (vilich), reded über Happy Ends, ihri meischt bruuchte Wörter und küüred ihri liebschte Abba-Songs. Das alles, während mer Chuehglogge im Hintergrund ghört. Tönt irgendwie überdreiht und bizli peinlich? Ja. Genau sone Folg isches. Aber losed am beschte selber...

I said A-He, A-Ha, A-Hoi mitenand! D'Vivi und d'Nina hend sich länger nöd gseh und was söll mer sege... mer merkts! Di beide updated sich über ihri letschte paar Wuche: D'Nina vezellt vode erschte Ziit i ihrem Koch-Praktikum und d'Vivien vo ihrne Ferie in Köln. Dadebii hend beidi vomene Erlebnis z'brichte, wo's jewiils um nassi Underhose gaht - schlüpfrig wie eh und je! Usserdem wird under anderem wiedermal unverhältnismässig seriös über de Globi gredet, gfolgt vo Peach Weber Gägs und eme chline Motivationsspeech über Niederlage. Danke fürs Zuelose und vill Spass mit de April-Folg!

Check it out, Joe! De Soundtrack zu dere Folg pendlet zwüsched Falco und Miley Cyrus. D’Vivi und d’Nina vezelled vo ihrem ufregendste und prägendste gmeinsame Erlebnis. Es gaht um e sehr langi Autofahrt, e nervösi Nina und um s’wichtigste 3-Minute-Ei vo ihrem Lebe. Es wird in Erinnerige gschwelgt, sich uf de Summer gfreut, vode Comfort-Film und -Serie vezellt und vilicht (nur vilicht) flüsst sogar di eint oder ander Freudeträne… E Folg für’s Herz – vill Freud bim Zuelose!

Ihstiege bitte! D'Vivi und d'Nina hend es paar Gschichte usem ÖV-Universum im Gepäck. Es werded Souvenirs us Bologna überreicht, e Internetperle für s'innere Chind empfohle und wer wiedermal chli inen Kinositz brüelle wett, cha sich uf en Filmtipp vo de Vivi freue. Usserdem gestaht d'Nina ihri gröschti Liebi us de Chindheit, d'Vivi vezellt, warum de peinlichsti Vortrag vo ihrem Lebe gliich en 6er geh hett und denn gaht's us irgendme Grund au sehr vill um Esse... I dem Sinn: en Guete!

Na, welles Lied würed ihr euere Gynäkologin vorsinge? Richtig: KEIS! Warum d'Vivi das trotzdem gmacht hett, vezellt sie ide erschte Viertelstund. Usserdem reded d'Vivien und d'Nina über ihri Podcastplän, de Europapark, bizli über Sex und Büecher und Film us de Chindheit. D'Nina vezellt, warum sie früehner mal wiene Illustration usgseh hett und d'Vivien verratet, warum de Tommi Schmitt ihre 2017 nöd nur in Sache Männergschmack neui Perspektive eröffnet hett. Usserdem fiired di beide de Uftakt vonere Herzens-Rubrik: de Internetperle! Es wird gnervöselet, glachet, durenand gredet und au bizli peinlich. Aber: Naja, LG!