Ritter und Pirate

ZOË MË macht ungloubleche Bilingual Poesie Pop und verzeut üs Gschichtli us ihrere musikalische und persönleche Entwicklig. Im März isch si vo RTS aus Newcomerin vom Monat gwählt worde! Grad letscht Fritig isch ihri neui EP: «Dorienne Gris» usecho. Wies mit ihre aus Musikerin witergeit und was ihri Meinig zu TikTok-Fame isch erfahret dir hie.

Liebi RiPs Schön bisch du wieder derbi i dr 78 Foug vo Ritter u Pirate. I dere Wuche redä mir über ds Wäutau u Könige. P.S.: Darf mä säch ä Panzer choufe?

Was bechunnsch, wede e Peperonipizza ir USA bsteusch? Emu sicher ke Pizza mit Peperoni druffe sondern mit scharfer Wurscht. U was zur Höu si de Peperoncini? Die Diskussion, weli guilty pleasures üs momentan beschäftige, üsi Cypher-Highlights und ganz viu meh fingsch du i dere nöie Foug vo Ritter und Pirate!

Es isch sowit, di erschti Folg vom neue Format "Was louft eigentlech bi..." isch itz für eui Ohre bereit. Viu Spass bim zuelose.

I derä Wuche isches um ds neue Album vo "Matro Matro" und um Schübi sini Erfahrige am Poetry Slam gange. Mir wünsche viu Spass bim zuelose.

Zalleti liebi RiP's I dere Foug dörft dir euch wiedermau uf cooli Stories freue. Mir hei über ässe im Zug, übere Stress vo Begrüessige u no über vieles meh gredt. Viu Spass bim lose.

Nach fasch 2 Mönet Winterpouse mäude säch dr Nick u dr Schübi wieder zrügg. Natürlech hets da viu ds Berede gä. Gniess auso di Folg u häb ä guete Start id Wuche. Dini Ritter u Pirate

Es schneielet, es beielet es geit ä chüehlä Wind. Dr Nick schiesst ä Schneebau u trifft dr Schübi am Grind.Mit däm Gedicht lade mir öich härzlech ih zur letzte Folg vom Jahr 2023. Ah und es isch GÜETZIFOUG!!!

Juhuu es isch Fonduezyt. Dr Nick u dr Schübi reize das beidi vou us u villech isch ja dr eint oder die angeri vo öich oh scho eis i di brkannti Fonduefaue gheit u het säch chli überässä. Wie oh immer, viu spass bim lose.

Botz Hiummugüegeli, ds Gricht vom Schübi disi Wuche isch es absoluts 10 vo 10 gsi. Nick isch chäsig ungerwägs gsi u het säch vom Winterwunderland lah inspiriere. Viu Spass bim lose u gniesset di verschneiti Wuche!

D Grippe isch ume u dr Nick hets vou verwütscht. Gueti Besserig a dere Stell. Ihgsprunge isch ganz spontan dr Lukas "Wägi" Wegmüller wo dr Schübi scho sit dr erschte Klass muess ertrage. Zäme hei mir über diversi Filme gredet u wieso e Regisseur u ä Produzent eigentlech di glichi Person isch u natürlech über no viele witere Gugus.Hey, folgsch du üs no gar nid? De abonnier doch de Podcast u wed scho grad dranne bisch, chasch ohno grad ä Follow uf üsem Insta dalah! @RitteruPirate

I derä Wuche hei dr Nick u dr Schübi wiedermau öppis vorbereitet. Es geit um Unpopular Opinions. Dr Schübi polarisiert mit sine druchus extreme Ahsichte. Dr Nick hingege bringt ä Idee für d Rettig vo dä Wäutmeer.Viu Spass!

RiPs präsentiere «Dr Kafi muesch niedergahre»

Dr Schübi verzeut vo sim Spitauerlebnis und mir diskutiere über Anästhesie.

Dr Schübi isch früsch usem Spitau wege dem duet der Andy ihn hüt würdig verträte.Dr Andy verzeut vo sire Unihockey, sorry Floorball (!), Karriere und mir kläre uf werum me Chatze sött dinne bhaute.

RiPs präsentiere «So geht das!»

Ritter und Pirate präsentiere «Es chönnt oh e Piuz si»

RiPs präsentiere «Doppu A»

Dr Nick isch disi Wuche leider abwesend gsi, da er für sis neue Studium di ganz Wuche ds Brig muess sy. Si Platz het ä Fründ vom Podcast u oh ä Fründ vom Schübi u vom Nick übernoh. Dr Simu Leuenberger verzeut dervo winer d Handbaugrossmacht Harz 4 gründet het. Wi ds Lebe aus fertige Lehrer isch u was er aues erlebt het, wo dr Schübi si Praktikant isch gsi. Merci viu mau Simu für dini Zyt u öich viu Spass bim lose!

Ja dismau nid 2 Millione Liter Bier sondern Wii!Nei nid d Nintendo Konsole. Isch euch o ufgfaue wie müehsam das aube isch gsi, die blöde schiss Controller z verbinde? Oder isch das nume mir so gange (auso am Nick).Nei würklech, wede da ds viert hesch wöue spile bisch e haube Namitag am verbinde gsi. Guet vilech isches ja o a üsere Wii gläge. Wär weiss das scho.

Dr Nick isch (nachemne stränge Vorbereitigstag) ide Ferie z Italie glandet. Dr Schübi sendet vor sturmfreie Buuude deheime und verzeut vo sire Verträtig und no viles meh i dere Foug.

Stinkendi Söcke, Wättersturz und Abstürz.

Üsi erschti Foug vom Balkon. Mits ir Nacht. Schlafet guet.

D Summerpouse isch verbi. Es isch e länge Summer gsi die paar Wuche. Üs hets auso scho gfäut so chli zeme ds plöiderle. Ize aber freue mir üs umso meh zrügg ds si :) Schön bisch o wieder drbi.

Die letschti Foug vor üsere Summerpouse! Nach em chrankheitsbedingte Usfau ume mit beidne vouwärtige Mitglieder. Dr Schübi schaffet grad im Autersheim und verzeut, werum dass mer mängisch sötte dankbarer si. Dr Nick isch anere Hochzit gsi wos sehr feins z esse het gä.

Neeei, Nick isch chrank. U dr Schübi het so weni Zyt, dass er ke Gast het chönne organisiere. Aber eifach so ke Foug use houe wär oh scheisse, drum macht dr Schübi churzerhand eifach sis eigetä Ding.  Für aui Nick Fans isches leider e schwarze Tag aber es wird wieder besser. Ganz Wichtig: Gueti Besserig Nick <B

Alte Schule. Früecher isch ebe glich nid aus schlechter gsi. Ja wöu die Foug isch wie in guete aute Zyte. Mitem SCHÜBI undem NICK. Auso eigetlech wie immer ussert wes ebe nid so isch. Aber dases mau nid so isch, gits chli weniger aus dases so isch wies meistens isch.

Dr Nico schaffet mitem Nick zeme und möcht si eiget Podcast starte! Dass dr Nico gad so richtig warm cha i sini erschti Pilotfoug starte biete mir hie d Plattform. Auso quasi es Podcast-Ideeeehne.Dr Schübi üse herzauerliebscht gniessts in Konstanz. Konstant viu Spass mit dere Foug!

Uno ballon de vino rosso mini liebe Rips! Das wird eine Folge internationale.Ja liebi Aschis oder Ernestos uf dere Wäut. Die Foug isch für euch.

Foug 51 nei leider geits nid um Aliens. Ds faut mer ersch ize uf.

Der Schübi dä aut Festival-Haas laht sini Festivaltipps lah springe. Dr Nick, e eher unerfahrnige Festivalgänger isch da natürlech froh drüber! Ja nid nume das liebi RiP's was zum Bispiu bim Altstadtslam in Bärn passiert isch, erfahret dir i dere Foug.

Ja mini liebe Rips es düe üs aui Leid wo e Polleallergie hei. Wöu mir hei o eini. Das und was d Arbeiterflächine vo de Händ si erfahret dir i dere Foug.

Ovo mischt me mit Miuch oder? Fautsch! Emu lut der Verpackig. Aber wes aui lüt fautsch mache isches de nid richtig?

Dr Nick isch im Chino gsi und het dert GotG gluegt! Ja immer die abkürzige nei wük wtf... usgschribnigi wörter ftw! Was isch eui Popchorntaktik im Chino?

E churzi und knackigi Foug wiene Ischbärgsalat!Dr Schübi verzeut chli über sini BEA Erfahrige und dr Nick verzeut vo sim Chutzefescht-Bsuech.

Die Foug wieder mitem Nick zeme wieder in gewohnter Form oder. So förmig wienes Förmli.

Das cheibä Militär. Scho wieder muess dr Nick ä Folg ussetztä. Für euch bedütet das i dämsinn wieder eis e Gastfolg. Dieses Mau überchunnt dr Schübi ungerstützig vom Schübi. Nei, dass isch nid öppe es Säubstgspräch nenei, dr Brüetsch vom Schübi isches. Mir wünsche viu Spass.P.S. Es chönnt zu verwirige wäge ähnleche Stimme cho...

Ritter u Pirate - mir rede hüt über Sandale und Inlineskates oder sis doch Rollerblades? Hüt erfahret der o was passiert, we Schübi dr Schlüssu vergisst.

Ja liebi RiPs. Härdöpfu! Sones universells Dings. Ebe mau e Häbu o eifach wiene Öpfu mit Mayonaise hingerepfeffere oder aromate gäu mir respektiere o eui Gwürzvorliebine. Schübi mags ja mit Maggi. Nick dä Kandidat romantisiert meh mitem Aromat.

Das cheibä Militär het öiem gliebte Podcast-Duo scho wieder e Strich dürd Rechnig gmacht. Churzerhand isch drum dr Sebi ihgsprunge u het zämä mitem Schübi amne Poetry-Slam gwärklet. Derbi heissi säch gegesitig d Ideene zugworfe u ab und zue über die eigetä Witzli glachet. Mir wünsche öich viu Spass bim lose u es grosses MERCI a Sebi für dini Zyt.

Was si Sache wo d Pizza schlecht mache? Ja der Schübi het so super Frage wie die vorbereitet. Diskussion in drei Akten.

Mir bereue nüt – vorauem bereue mir nid, das mir wieder zeme ufnä! Ja liebi Rips scho gli simer im 4. Jahrzähnt. E nöii Wuche mit chaute Ohre und warme Härze!1

Dr Schübi erklärt, wie sini Stoumuurphobie entstande isch und dr Nicku verzeut vo Situatione wo Mönsche chli komischi Tierli si. Ize heimer ja glich viu Fouge wie d Bärebrüetsche! (Nei Schübi das chöimer nid drischribe) (Momou chum das schribe mer dri)

Wieder vereint die zwöi Jungs!Dr Schübi isch bim Nick deheime und si weihe zeme die nöii Füür-Tür ih!

Die cheibe kapitalistische Schneefarmer nei das chame nid studiere. Sogar vo der Fischtheke mache die nid haut. Si si unger üs. Hebet d Ouge offe.

Es passiert scho zum zwöite Mau! Nick isch nid ume u dr Schübi het säch öpper nöis gsuecht für disi Wuche. Nachdem mitem Döme scho ä Luzerner het dörfe sini Meinig gigä, hei mir itz wieder uf die guetä Thuner wärte gsetzt. Merci Kayla hesch dir Zyt gno u öich wünschi viu Spass bim lose.

Liebi Ritter:inne, liebi Pirat:inne wiukomme zure nöie Foug vo Ritter und Pirate. Dr Schübi isch ging no z Grenche und het höche Bsuech übercho vo Schübi 1! Dr Nick het chli Sunntigsblues aber hä eigetlech isch doch Mitwuch?! Ja es isch Mitwuch! Zit für Ritter und Pirate :-)

Die Foug wider mitem liebe Nick. Ufgno amne herrleche Samschtig Abe. Dr Schübi isch immerno ds Grenche und gniesst ds Eremitlebe i sire Chuchi.

I dere Wuche isch nüt wie dirs kennet. Disi Wuche werde eui Ohre nämlech nid vom Nick u vom Schübi verwöhnt. Nei, dr Nick isch geng no nid ume Wäg u drum hei mir churzerhand die ersti Gastfolg ufgleiset. Dr Döme wett gern zum Radio ga u de isch doch sone Podcast e super Glegeheit zum üebe. Natürlech rede mir oh über ds Gricht vor Wuche,  Après-Ski u vieles meh. Viu Spass.Es grosses Merci geit a Döme, wo säch di Zyt het gno u fasch ä Stung mitem Schübi gschnurret het.

Di letschti Foug vor dr RS vom Nick. Aber ke Angscht mir werde hie nid zum Militarischtepodcast! Dr Schübi isch immerno am Schiilehrerlä und verzeut wi naturverbunde er doch isch.