RSG Landbou

17 Augustus 2026: Rico is ‘n Merino-ram wat vir langer as vyf jaar op sy eie in uiterste toestande in die Moordenaarskaroo oorleef het. Sy verhaal van veerkragtigheid skep nou ‘n geleentheid vir hardwerkende jongmense deur middel van 'n beursfonds. Dan Kriek van die Nasionale Wolkwekersvereniging vertel van die nuwe moontlikhede wat hieruit voortvloei. Die eerste Suid-Afrikaanse Tafeldruifkonferensie het onlangs plaasgevind, en Christo van der Westhuizen van Netafim het daar met ons gesels oor die keuse van ‘n besproeiingstelsel. Ons hoor ook wat Friedl von Maltitz oor die afgelope Vrystaat Landbou-kongres gesê het.

15 Augustus 2026: Jo-Andra Cloete Greegory se landboupad was aanvanklik onbeplan, maar die hartsreis wat sy onderneem het om haar plaas te vestig, het een geword waarop daar nie terugedraai kon word nie. Our Poultry Place is die naam van haar plaas en onderneming, en dis hier waar duisende kuikens hulle eerste lig onder haar wakende oog aanskou. Jo-Andra het destyds lewende kuikens en hoenders uit haar Opel Corsa in informele nedersettings verkoop. Vandag bestuur sy een van die snelgroeiendste hoenderplase in Suid-Afrika.

14 Augustus 2026: Ons kyk na die belangrikheid van plantgesondheid-navorsing. Ons plaas die kollig op hoe die bedryf die volgende geslag kan inspireer om hulle plek in een van Suid-Afrika se belangrikste ekonomiese sektore in te neem. En, ons hoor hoe om suksesvol van naakslakke en dopslakke ontslae te raak.

12 Augustus 2026: Die Brahman SA-beestelersgenootskap se vleisgehalte navorsingsprojek is reeds ‘n paar jaar aan die gang. Die bevindinge wys dat die vleis van suiwer Brahmankarkasse wat uit geregistreerde ouers geteel is, genoegsame variasie het om seleksie vir goeie gehalte vleis moontlik te maak. Sytze Smit praat met ons hieroor, en hy vertel wat ons van hulle nasionale veiling op 5 September buite Potchefstroom kan verwag. Het jy geweet aalwurms is ‘n groot probleem by subtropiese gewasse, veral by koejawels, piesangs, lietsjies en granadillas? Ons het dr. Mieke Daneel van die Landbounavorsingraad uitgevra oor die doeltreffende bestuur van aalwurms.

11 Augustus 2026: Die Anatoliese herdershond-veewagterprojek is in 2005 deur die Cheetah Outreach Trust begin om mens/roofdier-konflik op plase te verminder. Hierdie projek plaas dié kenmerkende honde by boere om hulle kleinvee teen roofdiere soos jagluiperds te beskerm. Hoe word plantenergie gemeet? At van Schalkwyk van World Focus Agri verduidelik.

10 Augustus 2026: Die eerste nasionale Suid-Afrikaanse Preserveerkampioenskap, wat in 2025 deur Agri-Expo aangebied is, het 456 inskrywings van 66 vervaardigers gelok. Vanjaar se aflewering het ‘n rekord 700 inskrywings van 85 vervaardigers ontvang. Die beoordeling het onlangs in Durbanville plaasgevind. Ons gesels met hoofbeoordelaar, Susina Jooste. Louma Boerdery en Nedibest Brahman se derde Brahman-bulveiling vind op 20 Augustus in die Thabazimbi-omgewing plaas.

8 Augustus 2026: Richard Hutton-Squire is aangewys as Agri Wes-Kaap Santam se Jongboer van die Jaar. Hy boer in die Elgin/Grabouw-omgewing met appels en pere. Hy is ook ‘n kampioenseiljagvaarder wat al sy staal getoon het in internasionale waters. Selfs wanneer hy die uithoeke van die aarde besoek, sorg hy dat sy plaas besproei word, deur gebruik te maak van tegnologie.

7 Augustus 2026: Ons bring hulde aan die Vroue Landbouvereniging van Kaapland. Prof. Pieter Gouws van die Universiteit Stellenbosch vetrel van nuwe loopbaangeleenthede in voedselveiligheid. Prof. Wessel du Toit van die Departement Wingerd- en Wynkunde aan die Universiteit Stellenbosch verduidelik waarom daar ‘n ouderdomsperk op alkoholvrye produkte is.

6 Augustus 2026: Het jy geweet dit kos bykans €400 om houtskilde of monteerplate vir jagtrofeë uit te voer? Dié hoë koste is as gevolg van ‘n CITES-permit wat tans van geld. Die Koalisie vir Volhoubare Benutting in Suid-Afrika (Suco-SA) en een van sy lede, die Suid-Afrikaanse Taksidermie- en Leerlooieryvereniging, het in Julie ‘n versoek ingedien dat die amptelike terminologie oor houtprodukte uitgebrei moet word. Pieter Swart vertel van die deurbraak wat hulle hiermee gehad het. Chris Derksen is op sy pos met nuus oor vleispryse, en vir die jongste landbou-weervooruitsig is Johan van den Berg aan die woord.

5 Augustus 2026: Wie veg vir die Suid-Afrikaanse wynbedryf se plek aan die tafel? Agter elke bottel wyn staan ‘n span mense en Christo Conradie van South Africa Wine. Ons praat met hom oor marktoegang en beleid. “Saam groei ons beter” is die tema van vanjaar se Nampo Kaap. As een skakel van die landbouwaardeketting seer kry, kan die res nie optimaal funksioneer nie, sê die voorsitter van Bredasdorp Park, Henk Aggenbach. Nampo Kaap word van 9 ot 12 September aangebied.

4 Augustus 2026: Verkeerde weidingsbestuur, wat plantegroei beskadig in droë gebiede soos dele van die Noord-Kaap, kan tot 100 jaar neem om te herstel! Dr. Mark Chimes van Melk SA is die projekleier van die Melkprodusente-organisasie se dierewelsyn- en gesondheidsprojek. Een van hulle navorsingsprojekte is om vas te stel hoe lank die bek-en-klouseervirus in melk uitgeskei word, en in die uier van besmette koeie oorleef.

3 Augustus 2026: Aartappels SA het onlangs sy jaarkongres in Johannesburg aangebied. Volgens Willie Jacobs het Suid-Afrika vanjaar die grootste volume aartappels nóg in die geskiedenis afgehaal, in weerwil van hoër insetkoste, aartappelpryse en uitdagende produksie-omstandighede. Het jy geweet dat aartappels en uie die enigste nie-verwerkte produkte in ‘n tipies Suid-Afrikaanse stapelvoedselmandjie is?

1 Augustus 2026: Wat en waar is die oudste (190 jaar) lewende dier? Daar is ander spesies wat tot 500 jaar oud kan word! Ons vind uit wat biologiese immortaliteit behels.

31 Julie 2026: Van 45 grade-hitte wat sitrusboorde in Citrusdal verskroei, tot swaar reën wat tafeldruifwingerde benadeel: Suid-Afrikaanse produsente raak al hoe meer vertroud met een van die grootste uitdagings van moderne landbou - weeruiterstes wat gewasse onder erge fisiologiese stres plaas. Die Jack Human Bewaringslandbouweek word van 5 Augustus af aangebied. Professor Johann Strauss van die Wes-Kaapse Departement van Landbou, vertel waarna produsente kan uitsien. Pieter Brune van die nuwe Landbou-innovasie Hub in Stellenbosch, vertel van werksgeleenthede in die landbousektor.

30 Julie 2026: Landbouvakke word deesdae in al hoe meer hoërskole in Suid-Afrika aangebied. Dis nou ook die tyd van die jaar wanneer skoolleerders loopbaanbesluite moet maak en instansies vir verdere studie oorweeg. Shaun Welmans van Agri Skills Transfer beantwoord ‘n luisteraarsvraag oor erkende kwalifikasies wat ‘n kandidaat by ‘n tersiêre instelling kan verwerf. Johan van den Berg is terug met hierdie week se landbouweervooruitsigte. Chris Krugell van Bloemendal Bonsmaras praat oor hulle veiling van 12 Augustus in die Delmas-omgewing, en Chris Derksen vertel wat hierdie week met vleispryse in die Noord-Vrystaat gebeur het.

29 Julie 2026: Wie is vandag se rooivleisverbruiker? Dis een van die vrae wat tydens die LFR Veeskool bespreek sal word. Die Lewendehawe Registrerende Federasie bied dié geleentheid van 7 tot 9 Oktober aan by Aldam. Natuurwetenskaplike praktisyns wat by SACNASP geregistreer is, mag ook nou vir die eerste keer CPD-punte verdien indien hulle die Veeskool bywoon. Ons praat met Laurence Allem van Mielieboere Bonsmaras oor hulle 41ste produksieveiling op 13 Augustus by Viljoenskroon.

28 Julie 2026: Sowat 90% van Suid-Afrika se rosyntjies word uitgevoer. Die bedryf het onlangs weer die 100 000 ton merk gehaal. Ons gesels met Wessel Lemmer en Chantelle Kotzé van Raisins SA oor hierdie uitsonderlike prestasie. Augustus, September en Oktober word in die veebedryf as die sogenaamde ‘doodmaakmaande’ beskou. Dis 'n uitdagende oorgangstydperk tussen winter en somer, waartydens weidingsgehalte dikwels nog swak is en moet herstel. Dr, Josef van Wyngaard van Voermol Voere gee raad.

27 Julie 2026: Het jy al aan Graan SA se 2026 Groei vir Goud-opbrengskompetisie deelgeneem? Boere wat deelneem leer die beste by medeboere, en volgens Graan SA is dit die doel van die kompetisie. Daar is verskeie kategorieë waarvoor ingeskryf kan word. Mikrobioloë van die Universiteit Stellenbosch het ‘n nuwe grondbakteriespesie in die Kogelberg Natuurreservaat ontdek.

25 Julie 2026: Christi van den Heever is drie jaar gelede aangewys as Jongboer van die Jaar in die Wes-Kaap. Hy boer vir Graaff Fruit as landgoedbestuurder op die plaas, Rietfontein, in die Koue Bokkeveld. Hy beskryf die afgelope seisoen as die moeilikste een in 21 jaar. Hy deel van die lesse wat hy geleer het, en hoe hy moed gehou het in die uitdagendste van tye.

24 Julie 2026: Rooibos is op pad na die buitenste ruim! Marthane Swart van die SA Rooibosraad verduidelik waarom dit van waarde op aarde is. Lizette Nowers, ‘n wetenskaplike navorser by die Departement Landbou in die Wes-Kaap, en navoringstegnikus Piet Lombard deel ‘n dringende boodskap aan canolaboere, wat verband hou met ongewone mistige toestande wat op die oomblik voorkom.

23 Julie 2026: Nieu-Seeland, Australië, die VSA, Europese Unie en Argentinië is sleutel suiweluitvoerlande. Volgens die jongste statistiek van die Wêreld Monetêre Fonds is daar vir die eerste keer is baie jare ‘n sterk groei in onverwerkte melkproduksie. Wat beteken dit vir die Suid-Afrikaanse suiwelbedryf ? Melk SA se jaarlikse Lacto Data-verslag verskaf inligting oor die struktuur, prestasie en produksie van die suiwelbedryf in Suid-Afrika en elders. Reënvalvooruitsigte vir graangebiede in die Wes-Kaap lyk nie gunstig nie, maar dalk het die prentjie verander. Johan van den Berg het die jongste landbouweervooruitsigte. Chris Derksen terug met die week se vleispryse.

22 Julie 2026: Is Suid-Afrika gereed vir die volgende voëlgriepuitbreking? ‘n Webinaar is onlangs hieroor aangebied. ‘n Bonsmara-produsent van die Roedtan-omgewing in Limpopo vertel hoe hulle die afgelope jaar se uitdagings in die veebedryf hanteer het. Volgens Johan Boshoff van Sebadja Bonsmaras gee die hoër speenkalfprys hulle weer moed. Hy vertel ook van hulle veilingsaanbod van 7 Augustus op die plaas, Smallepad.

21 Julie 2026: Suid-Afrika bied vanjaar vir die eerste keer die Dohne-Merino Wêreldkongres aan. Dit vind laat in Oktober in die Wes-Kaap plaas. Wikus Bekker van Crux Dohnes in die Edenburg-distrik deel sy opgewondenheid oor dié kongres, én vertel wat op aanbod is by hulle veiling op 30 Julie 2026. ‘n Paneelbespreking by die jaarkongres van die Suid-Afrikaanse Vereniging van Veekunde, het gefokus op die samewerking tussen veekundiges en veeartse.

20 Julie 2026: Die 56ste jaarkongres van die Vereniging van Veekunde het vanjaar in Kaapstad plaasgevind. Een van die hoogtepunte van die kongres is die Veeplaas en Stockfarm studentevasvra. Noordwes-Universiteit, die Universiteit van Pretoria en Stellenbosch Universiteit was die top drie universiteite. Maar wie het as wenners uit die stryd getree? Die Oos-Vrystaat het in Junie die meeste aartappels in die land gelewer. Om te hoor hoe die res van die land se produksie gevaar het, kyk ons na Aartappels SA se jongste markverslag.

18 Julie 2026: Die Landbou Innovasie Hub is enig in sy soort in Suid-Afrika. Hierdie nuwe sentrum is tot stand gebring om jongmense ‘n plek en geleentheid te gun om met landbou-oplossings vorendag te kom. Dit sluit in sagteware-ontwikkeling, grondbestuur en selfs die ontwerp van nuwerwetse uitrustings vir vrouelandbouers. Pieter Brune is op ouderdom 29 een van die landbou-innoveerders wat aan stuur van sake is by die nuwe sentrum in Stellenbosch.

17 Julie 2026: Veekundige dr. Chris de Brouwer praat oor noodsaaklike nutriënte en lekaanvullings in vleisbees-produksiestelsels. Ons vind ook uit wat die verskil tussen ‘n os en ‘n bul is. Gerard Martin van South Africa Wine verduidelik hoe wetenskap en tegnologie help om die bedryf meer volhoubaar, mededingend en gereed vir die toekoms te maak.

16 Julie 2026: Die eerste konferensie vir Suid-Afrika se tafeldruifbedryf word vroeg in Augustus op Franschhoek aangebied. Talitha Venter van die SA Vereniging vir Wingerd- en Wynkunde het die besonderhede. Nematodes is mikroskopiesklein ronde- of aalwurms wat in grond, water en plantweefsel voorkom. Sommige is uiters voordelig, terwyl ander groot skade kan aanrig. Nematode-monsterneming en diagnostiese ontleding is noodsaaklik vir die bestuur hiervan, maar wat presies behels hierdie proses?

15 Julie 2026: Hoe ontwikkel geelvet by beeste? Is dit gesonder as witvet? ‘n Rooivleisprodusent van die Lindley-omgewing in die Vrystaat, Pieter Meyer, is aangestel as voorsitter van die Rooivleisprodusente-organisasie in dié provinsie. Ons vind meer uit oor hom en sy visie. Die Departement van Landbou het 'n skikkingsooreenkoms met die landbou-organisasies, Saai, Vrystaat Landbou en Sakeliga bereik nadat die partye vroeër vanjaar 'n hofsaak teen die minister en sy departement gewen het. Ons praat met die minister van landbou, Willie Aucamp, en van die ander rolspelers.

14 Julie 2026: Die Sandveldstreek in die Wes-Kaap is die enigste gebied in die land waar aartappels dwarsdeur die jaar geproduseer word. Ons kuier by Stephan & Seun familieboerdery om meer uit te vind oor die groei en sukses van dié boerderybesigheid. Nelius Ferreira van Ferrero Bonsmaras praat oor hulle produksieveiling op 21 Julie op die plaas Grootdraai in die Harrismith-omgewing. Nelius is ook voorsitter van Bonsmara SA, en hy deel sy siening oor die stand van die rooivleisbedryf.

13 Julie 2026: Die aanteken van reënvalsyfers en die verstaan van reënvalsiklusse kan ‘n boer help om sy plaas beter te bestuur. Dr. Justin du Toit van Grootfontein Landboukollege het ‘n toepassing ontwikkel wat hy gratis aan boere beskikbaar stel vir die aanteken van reënvaldata. ‘n Span jong navorsers aan die Universiteit van Pretoria ontwikkel ’n gesondheidsaanvulling wat sitrusskilafval omskep in ’n hulpmiddel teen lewenstylsiektes.

11 Julie 2026: Ons klink ‘n glasie op die ontwikkeling van alkoholvrye wyn. Dié wêreldwye tendens word tans nagevors, met Suid-Afrika aan die wetenskaplike voorpunt. Ineke Herholdt is op ouderdom 24 doenig met haar doktorale studies wat te make het met mondgevoel. Wessel du Toit is ‘n vol professor in wynkunde by die departement wingerd en wynkunde aan die Universiteit Stellenbosch. Hy is onlangs deur die Kaapse Wynmeesters aangewys as Wynpersoonlikheid van die jaar.

10 Julie 2026: Jaco Thuynsma, bestuurder van Brandondersteuningsdienste by die Kaapse Wynland-distriksmunisipaliteit, het onlangs sy 40ste diensjaar in brandbestryding gevier. Hy verduidelik dat daar onlangs ‘n aanpassing gemaak is wat verband hou met die uitreik van permitte. Die Jack Human Bewaringslandbouweek word van 5 Augustus af aangebied. Ons vind uit waarna produsente en belanghebbers kan uitsien.

9 Julie 2026: Waarom is ‘n unieke oorplaatjie vir ‘n dier so belangrik/ Wat maak dit uniek? Wat gebeur daarmee wanneer daardie dier verkoop word? Rachelle Cloete van GMP Basic beantwoord ‘n paar vrae oor dié belangrike onderwerp. Ons gesels ook met Arthur de Villiers van AG Bonsmara in die Vrede-distrik oor hulle praktiese boeredag op 14 Augustus. Chris Derksen is op sy pos met nuus oor die week se vleispryse, en Johan van der Berg gesels weersake.

7 Julie 2026: Ons was by Overberg Agri se Bulk en Blêr-boeredag op Moorreesburg, waar die bek-en-klouseer-situasie in die Wes-Kaap ter sprake gekom het, Staatsveearts dr. Leana Janse van Rensburg gee terugvoer. Het jy geweet voedingsprobleme naby lam- of kalftyd kan tot groot produksieverliese lei? Ashley Grimsell van Voermol Voere het by dié boeredag ‘n paar voerwenke gedeel. Wat behels die sensoriese evaluering van ‘n kaasproduk? Die Suid-Afrikaanse Vereniging van Suiweltegnologie het ’n kaas-sensoriese werkswinkel by die Universiteit van Pretoria aangebied, en ons het by Rian Marren meer uitgevind.

7 Julie 2026: Die deelnemers aan die Sybokhaarbemagtigingstrust se produksie het die afgelope jaar met meer as 20% gegroei. Die sukses van dié trust is tydens die onlangse Sybokhaar SA-kongres op Graaff-Reinet uitgelig, en ons het daar met van die deelnemers gesels. Verbruikers glo dikwels dat intensiewe stelsels die welstand van ‘n dier beïnvloed. ‘n Navorsingsprojek is deur Stellenbosch Universiteit begin om vas te stel of lammers wat op hierdie manier gehuisves word, wel benadeel word.

6 Julie 2026: Tegnologie kan groot voordele vir die sybokhaarprodusent inhou, sê die stigter van House of Fibre, Pierre van der Vyver. Hy tree as hoof van dié instansie af, maar sy jarelange kundigheid is nie vir die bedryf verlore nie. Ons het by Sybokhaar SA se kongres op Graaff-Reinet met hom gesels oor sy loopbaan en die pad vorentoe. Agri-Expo het onlangs hulle ledeskoukongres aangebied. Volgens Chris Fourie, die organisasie se president, is ’n landbouskou meer as net ‘n geleentheid wat een maal ‘n jaar plaasvind. Die ekonomiese inspuiting wat die volle waardeketting en gemeenskap hieruit kry, is noemenswaardig. Ons hoor wat by die kongres gebeur het, en wat die toekoms van plattelandse landbouskoue is.

4 Julie 2026: Ons vier ons die Vroue Landbouvereniging. Het jy geweet dat talle vroue buite die landbousektor by hulle aansluit, deels om eendersdenkende vroue se humanitêre hulpverleningpogings te steun?

3 Julie 2026: Pogings word voortgesit om bek-en-klouseer die nekslag toe te dien. Noue samewerking tussen boere, veeartse en die regering is besig om vrugte af te werp. Die minister van landbou, ekonomiese ontwikkeling en toerisme in die Wes-Kaap, dr. Ivan Meyer, bring ons op hoogte van die stand van sake. Ons hoor wat alles in die jongste uitgawe van die gratis landboutydskrif, Agriprobe, gelees kan word. Die wynmaker by De Grendel, Morgan Steyn, praat oor die waarde van mentorskap in die landbou.

2 Julie 2026: Studente, gegradueerdes en nagraadse studente het die geleentheid om eersdaags by drie Suid-Afrikaanse universiteite met rolspelers van die landbousakewêreld te praat. Marianne van der Laarse van Agrijob gee besonderhede. Ons praat met André van der Heyde oor die Boschoek Bonsmara en Vriende-produksieveiling op 17 Julie by Bela-Bela, en met Don McHardy van Reeba Red Booster Beef oor hulle veiling op 7 Julie by Nottingham Road Brahman. Johan van den Berg is op sy pos met die weervooruitsigte, en Chris Derksen gee terugvoer oor die vleispryse wat hierdie week in die Noord-Vrystaat behaal is.

1 Julie 2026: Die minister van landbou, John Steenhuisen, het op 24 Junie die langverwagte beheermaatreëls vir die bestuur van bek-en-klouseer afgekondig ingevolge Artikel 9 van die Wet op Dieresiektes. Wat is die implikasies daarvan vir die landbousektor, veral vir beesvleisprodusente? Die impak van verhoogde koolstofdioksiedvlakke op weiding is in talle streke van Suid-Afrika duidelik sigbaar. Dr. Justin du Toit sal einde Julie by die Weidingsvereniging van Suidelike Afrika se kongres terugvoer gee oor die navorsing wat hy op dié gebied gedoen het.

30 Junie 2026: Produsente in Noordwes, Mpumalanga en Limpopo kan nou ou en onbruikbare plaagdoders gratis laat verwyder. CropLife SA se Program vir Produkverantwoordelikheid bied hierdie diens tot einde Julie vanjaar gratis aan. Dr. Gerhard Verdoorn verskaf meer besonderhede. Hoe herstel ’n sektor soos die wynbedryf van vloedskade, en hoe beplan hulle vir uitdagings soos die laer-alkohol-beweging, beleidsveranderinge en nuwe markte? Rico Basson van South Africa Wine beantwoord ’n paar vrae oor hulle vyfjaarplan. Ons praat ook met dr. Mackie Hobson, ’n veearts, oor die welstand van plaaslike sybokhaarkuddes.

29 Junie 2026: Het jy geweet Suid-Afrika produseer meer as vyftig persent van die wêreld se sybokhaar? Sybokhaar SA het onlangs op Graaff-Reinet kongres gehou, en ons hoor waarom Suid-Afrikaners trots kan wees op dié bedryf. Inskrywings vir die jaarlikse Lewendehawe Registrerende Federasie en Santam se Stoetteler van die Jaar-kompetisie sluit op 17 Julie. Die hoofbeoordelaar, prof. Frikkie Neser, praat oor die kriteria vir deelname. Syferfontein en Bonro Bonsmara se 27ste produksieveiling is met groot sukses op 16 Junie aangebied. Nico Pieterse gee terugvoer.

27 Junie 2026: Morgan Steyn, wynmaker by De Grendel, is ‘n jongman wat hom uitleef met behulp van tydvereerde tegnieke. Op 32 het landbou hom ‘n paspoort na die wêreld gegee. Al die internasionale uitnodigings wat hy kry, is ’n bewys van sy kundigheid.

26 Junie 2026: Jack Human word beskou as die pionier van bewaringslandbou in Suid-Afrika. Hy was 65 toe hy in 2015 ná ’n fratsongeluk op sy plaas oorlede is. Die Jack Human Bewaringslandbouweek word in Augustus aangebied. Professor Johann Strauss van die Wes-Kaapse Departement van Landbou en kenner op die gebied van volhoubare produksiestelsels en bewaringslandbou, vertel waarna produsente kan uitsien. Die Suid-Afrikaanse wynbedryf dra miljarde tot die ekonomie by, ondersteun werksgeleenthede, lok toeriste van regoor die wêreld en voer wyn uit na meer as 100 lande. Tog gaan een van die belangrikste gesprekke wat die toekoms daarvan vorm, nie net oor wyn nie. Dit gaan oor mense, geleenthede, en om te verseker dat meer Suid-Afrikaners betekenisvol kan deelneem aan die bedryf se sukses. Phil Bowes, bestuurder van inklusiewe groeistrategieë by South Africa Wine, verduidelik.

25 Junie 2026: Daar is tans 55 000 aktiewe geregistreerde Boranbeeste in Suid-Afrika. Gerrit Potgieter van die Boran-beestelersgenootskap van Suid-Afrika gesels oor die prestasie van dié ras, en van hulle nasionale veiling op 10 Julie in Pretoria. Shaun Welmans van Agri Skills Transfer verduidelik waarom praktiese opleiding so belangrik geword het in die moderne landboubedryf. Die plaagbeheer-operateurskursus trek deesdae baie aandag. Ons hoor waarom hierdie kwalifikasie so belangrik is vir mense wat in die bedryf wil werk.

24 Junie 2026: ‘n Merino-boer van Victoria-Wes is as die nasionale wenner aangewys in vanjaar se skeersel-kompetisie. Dié bes-geklasseerde skeersel het ’n gemiddeld van 87,65% behaal. Ons hoor wat mede-eienaar, Hennie van Heerden, oor dié prestasie te sê het, en wat dit vir die wolbedryf beteken. Ons gesels met Gerhard van den Burgh van die Buro vir Voedsel- en Landboubeleid oor die rooivleisbedryf.

23 Junie 2026: Het jy al van die groep, Safaripakke, gehoor? Johan Prins is ‘n lid hiervan en ook ‘n druiweboer van Goudini. Hy praat oor sy boerdery en oor die doen en late van dié unieke groep. Tru-Cape vier vanjaar sy 25ste bestaansjaar. Roelf Pienaar verduidelik hoe dié peer- en appelprodusentebesigheid in 2001 gestalte gekry het. Ons hoor ook wat tydens die 32ste kongres van die Rooivleis-abattoirvereniging in Somerset-Wes bespreek is.

22 Junie 2026: Het jy geweet houtvesel word ook in die tekstielbedryf gebruik? Madelaine Fourie van Sappi Verve verduidelik wat dié proses behels, en watter rol naspeurbaarheid in hierdie bedryf speel. Die Rooivleis-abattoirvereniging het onlangs hulle kongres in Somerset-Wes aangebied. Ons gesels met ‘n Bonsmara-boer van die Vryburg-omgewing oor sy betrokkenheid by jonger kommersiële Bonsmara-boere. Duncan Serapelwane van Moalosi Bonsmara is ‘n mentor, maar skenk ook elke jaar in Junie ‘n vers aan twee opkomende jongboere.

20 Junie 2026: Jannie Strydom, die hoof van Agri Wes-Kaap doen ‘n bestekopname van die eerste helfte van 2026, en bring ons op hoogte van die huidige stand van sake met bek-en-klouseer.

19 Junie 2026: Prinses Anne is eersdaags op pad na Suid-Afrika om die Statebond Landboukongres by te woon. Breyton Milford, die hoof van Agri Expo, verduidelik die waarde van die besoek en geleentheid vir plaaslike boere. Ons praat met dr. Chris de Brouwer’n veekundige, oor vleisbeesproduksiestelsels, aangeplante weidings en kuddegesondheid, veral bek-en-klouseer.