Schnäu, Wiud und Sexy

S02E25 - Ungarn Mir si bacc us dr Summerpause und ready für meh - es isch Zyt für Ungarn! Dr Leclerc loht d Ferrarifans mau widr la träume, dr Hamilton gheit i auti Muster zrügg u dr Lando und dr Oscar gäbe zäme gas… und dr Max luegt vo de letschte Punkteräng zue. Ohni Horner. Bis auso derbi wenns widr heisst: “Schnäu, Wiud & Sexy! - Live”

S02E20 - Kanada Kanada we done, und au dasmau isches wiud zue und här gange: dr Norris begrabt sini Hoffnige uf ne Championship, d Mercedes-Dominanz chönnt längwiilig wärde und dr Huuulkenberg fahrt klammheimlech scho widr id Pünkt! Bis auso derbi wenns widr heisst: “Schnäu, Wiud & Sexy! - Review”

S02E19 - Kanada  Nachem absolute Knüller vom letschte Johr macht is dasmau s Wätter e Strich dür d Rächnig - es isch sunnig. Drum fahrt us irgend emne Grund dr Russell aune dervo, dr Kimi und dr Stroll göi zäme id Gschicht ii und dr Norris chlöpft sini Titelhoffnige linggerhand id Wand. Bis auso drbi wenns widr heisst: “Schnäu, Wiud & Sexy! - Live”

S02E18 - Barselona Review Barselona, mir wärde di vermisse! Wär cha scho säge, er heigi mau e taktische 4-Stopper gseh… u das bi schönem Wätter! Es isch s Wuchenändi gsi vo de McLarens, de wiude Strategie u de Strafpünkt füre Max - a he u der Huuulkenberg isch füfte worde! Bis auso derbi wes widr heisst: “Schnäu, Wiud & Sexy! - Review”

S02E17 - Barselona Au in Katalunien sägemer vorläufig Ade zumne schöne klassische Track für die nöchste paar Saisons. Aber was für es Ändi für die ehemaligi Teststrecki - verschideni Reifestrategie, waghalsigi Overtakes, kompetitivi Saubers, kaputti Motore, do stunsch nume no. Und isch do nid no öppis gsi ir letschte Rundi? Der Max seg schins hässig. Bis derbi und fings use wenns wider heisst: “Schnäu, Wiud & Sexy! - Live”

S02E15 - Monaco Review Monaco isch gschafft - und zrede hets au gnue gä! Über die neui Regeländerig und die ungahnte Konsequänze wo die chöi ha, überd Rennstrecki wo haut eifach zschmau isch für die neue Autos (oder umgekehrt?)... und de heimer d Quali no gar nid erwähnt! Bis auso derbi wenns wider heisst: “Schnäu, Wiud & Sexy! - Review”

S02E15 - Monaco Meh Boxestopps, meh Boot und meh Drama - das isch dr GP vo Monaco, neu mit doppleter Action! Nachdem Dr Norris am Samschti scho s Renne gwunne het, ischs am Sunnti derfür hinge richtig spannend worde. D Mercedes löh sech vo de Williams usbrämse, dr Alonso verzichtet unfreiwillig uf Pünkt und dr Hadjar macht was RedBull-Juniore so gärn mache… Besser als dr zwöit RedBull si! Bis auso derbi wenns widr heisst: “Schnäu, Wiud & Sexy! - Live”

S02E14 - Imola Review Das isches gsi - s letschte mau Imola, und mir si derbi gsi! Chum zrügg ir F1 zeigt sech dr Colapinto vo sire mässige Site, dr Max dabt ufd haters, dr Lewis flügt u dr Alonso wartet immer no uf si erscht Punkt i dere Saison… Imola haut! Bis auso derbi wenns widr heisst: “Schnäu, Wiud & Sexy!”

S02E13 - Imola D F1 isch zrügg im Härze vom Motorsport - es isch zum letschte mau Zyt für Imola! Nach emne wiude Quali müesse sech d Ferraris is Züg lege, dr Colapinto knickt d Alpine-Hoffnige no vor sim erste Renne und dr Max zeigt sech usnahmswiis mau vo sire guete Site. Und das aues ohni Räge! Bis ause derbi wenns s nächst mau heisst: “Schnäu, Wiud & Sexy! - Live”

S02E12 - Mäiämi Review Dr erscht Usflug id Staate isch düre - und er het sech glohnt! Nachemne wiude Sprint am Samschti mit spannende Wätterkapriole ischs am Sunnti när gad nomou hert zur Sach. D Rookies droppe wie d Flöige, d Ferraris hei scho widr Drama im Funk und Williams zeigt de Ferraris wies geit. Bis auso derbi wenns widr heisst: “Schnäu, Wiud & Sexy! - Review”

S02E11 - Mäiämi Mäiämi mir si zrugg! Und au dasmau isch d Ungerhaltig i de Staate gross: dr Antonelli mauseret sech zum Qualikönig, bi de Ferrari isch dr shit am dampfe und usem nüt isch do e Williams vordranne. Dr Verstappen bringt d Dad-Witze, dr Haas explodiert und dr Piastri zeigt am Norris wies geit… scho widr… Bis auso derbi wenns wider heisst: “Schnäu, Wiud & Sexy! - Live”

S02E10 - Tscheddah Review Saudi Arabie - Done! Au dasmau hautet Tscheddah, was es verspricht: 100 Prozänt Safetycar-chance und eine vo de schnäuschte Tracks. Dr Noris begrabt sini Hoffnige für d Championship scho ir Quali, dr Tsunoda und dr Gasly göi uf Crashkurs und plötzlech steit e wiude Osi ar Spitze von Leaderbord! Bis auso derbi wenns wider heisst: “Schnäu, Wiud & Sexy! - Review”

S02E09 - Tscheddah Saudi Arabie mir chöme - zmitzt ir Wüesti wird z’Tscheddah widr gas gä! Nachemne wiude Start het dr Max dNase vou vo dene blöde Regle, dr Norris vergit sini Hoffnige uf d Championship u dr Hamilton wünscht sech zrügg i nes schnäuers Auto. Bis auso derbi wenns wider heisst: “Schnäu, Wiud & Sexy! - Live”

S02E08 - Bachrein Review Bachrein isch Gschicht - u mir si mit derbi gsi und hei drumm fiu z’verzeue! Vom Max sim Eeländ mit em Auto, em Sainz sim usrütscher mit em Tsunoda und der Machtdemostration vom Piastri isch für aui öbbis derbi gsi… u wie isch jetz dr Russell ufs zwöi gfahre? Bis derbi wenns wider heisst: “Schnäu, Wiud & Sexy! - Review”

S02E07 - Bachrein We bacc to back in Bachrein! Nachdem dr Piastri sech d Pole gschnappt het loht er nüt me la aabrönne - hinge use geits derfür hoch zue u här. Dr Sainz geit uf Crashkurs, dr Gasly zeigt am Verstappen wies geit u de verhoue d Redbull ersch no ihri Boxestopps. Bis auso derbi wenns wider heisst: “Schnäu, Wiud & Sexy! - Live”

S02E06 - Susuka Review Susuka isch gschafft - Zyt das mer üse Sänf derzuegä! Dr Max zeigt sine Teamkollege wies geit, dr Hamilton realisiert d Tragwiiti vo sine Entscheide und mir si fliissig am diskutiere… wüu jetz mau so ganz unger üs - vüu meh isch nid passiert. Drum gönn der üses Review und bis derbi wenns wider heisst: “Schnäu, Wiud & Sexy! - Review”

S02E05 - Susuka Zum Abschluss vom erste “Früech-am-Morge”-GP Abschnitt vo dere F1 Saison si üsi Fahrer uf der berüemt-berüchtigte Strecki z Susuka unterwägs. Bluemig agmouti Autos, Redbull wo gmerkt het das ihres Junior Team die besseri Farb usgwählt het und der Stroll wo wider zu alter Grössi zruggfindet hei definitiv für Unterhautig gsorgt. Und das obwou der Max sech aui Müeh het gäh d Formel 1 wider längwilig zmache. Bis auso derbi wenns wider heisst “Schnäu, Wiud und Sexy! - Live”

S02E04 - Schanghai Review Schanghai isch düre - mir gäbe widr üse Sänf derzue! Nachdäms churz nachem Renne no gad 3 Disqualifikatione gä het steit nid nume s Klassement, sondern au d Strategieabteilig vo Ferrari chopf. Derwile isch dr Max am mötzle, dr Russell flügt ungerem Radar und dr Antonelli macht sim Name alli Ehre. Bis auso derbi wenns wider heisst: “Schnäu, Wiud und Sexy! - Review

S02E03 - Schanghai Nachem wiude Uftakt in Australie geits i der zwöite rundi vor Saison nach China. Nachdem der Hamilton im Sprint scho d Ferrarihärze het chönne verzücke, gsehts am Sunnti nümme so roosig us. D RacingBulls zeige am Lawson wies geit, dr Helmut chochet und dr Perez lacht sech is Füschtli. Fäut nume no, das nach 20 Johr mau no e Williams es Renne aafüehrt. Bis auso derbi wenns wider heisst: “Schnäu, Wiud und Sexy! - Live”

S02E02 - Melbörn Review Schnäu und wiud chunnt üses neue Format derhär - das isch üsi erschti Folg vo SWS! - Review Churz und knackig löh mer dr Saisonuftakt in Melbörn nomau Revue passiere, rede über d Gwünner und d Verlürer vom Wuchenändi und gäbe wie immer mit vüu Sex-Äppiel üse Sänf derzue. Drum bis derbi wenns zum erschte Mau heisst: “Schnäu, Wiud und Sexy! - Review”

S02E01 - Melbörn Es isch so wiit, es isch Formel 1 Ziit und somit au ändlech wider Ziit für Schnäu, Wiud und Sexy. Zum erste Mou sit 5 Johr startet d Saison ändlech mou wider z Australie, do störts nid mou das mer scho am vieri hei uf müesse. Und was fürne Uftakt isches gsi. Räge, Wahnsinns-Taktik, Rookies, Shunts vo do bis äne use und mou nid e RedBull ufem erste Platz zum Saison-Start? Das cha jo nume guet cho! Bis auso derbi wenns ändlech wider heisst: “Schnäu, Wiud und Sexy! - Live”

S01E22 - Abudaabi Zum letschte Mou das Johr si üsi F1-Pilote fürd Abschlussrundi vor Saison ir Yaas Queen Marina unterwägs - und si wöis offebar nomou wüsse. Ir Quali wird der Lineal füregno zum luege wär ez au e legali Ziit het gfahre und näbem Track gäbe sech der Max und der George ume Gring. Im Renne git Ferrari aues um vilech glich no der Konstrukteurs-Titel zhole und mit aune Zwüschefäu uf der Strecki chömemer chum derzue uf Saison zrügzluege und üs vorzfreue uf was nöchst Johr chunnt. Bis auso derbi wenns zum letschte Mou das Johr heisst: “Schnäu, Wiud & Sexy!”

S01E21 - Kattar Einisch meh het sech der F1-Zirkus uf d second-rate-Töffstrecki irgendwo im nirgendwo verirrt - aber dasmau im Winter! Wenn sech d Ferraris und McLarens ume Titel strite, der Perez sech es guets Weekend wünscht und dr Hinwiler Rennstall guzzi git weisch dases wider heisst: “Schnäu, Wiud und Sexy!”

S01E20 - Las Wegas Langsam aber sicher geits as Ändi vo dere Saison, und wenns nachem Verstappen geit, macht är hüt der Sack zue. Dr Norris begrabt sini Hoffnige, der Hamilton verkackt d Quali und Alpine zieht d Riissleine und git uuf. Bis auso derbi wenns wider heisst: “Schnäu, wiud und Sexy!

S01E19 - Braziu Zum Abschluss vo däm Triple Header simmer für euch hüt z Interlagos unterwägs. Es absoluts Fest für d Mechaniker und aui Entusiaschte für Saftycars wöu der Räge het sech fürs ganze Wuchenänd igschliche. Astons im Gravel, Williamses ir Wand und der letscht Nagu i aui Championshiphoffnige? Do vergissisch fast d Franzose obe us. Bis auso derbi wenns wider heisst: “Schnäu, Wiud & Sexy!”

S01E18 - Megsiko Zobe spot si mir z Megsiko für di am Start! Und was für nes Renne das isch gsi: dr Tsunoda macht sudoku mit em Albon, d Ferraris göi ab wie Zäpfli und der Verstappen gspürt vo de Stewards e ganz e stiiffe Wind. Bis auso derbi wenns wider heisst: “Schnäu, Wiud & Sexy!”

S01E17 - Dr gross Priis vo Texas We bacc again! nach ere längere Pause macht sech der Formel 1 - Zirkus ufe Wäg id Staate. Nachdem dr professionell Australier i de letschte Wuche gspicktr isch worde versuecht dr Lawson nomou sis Glück, dr Toto verbrönnt sech si Pumpernickel und d Tiffooosi vermiise de McLaren d Suppe. Bis auso derbii wenns wider heisst: "Schnäu, Wiud & Sexy!"

S01E16 - Monsa Race review: Bacc from the underground, bacc for more! Nachemne wohlverdiente Sabaticcal hocke mer ane und ruume uf mit de verpasste Folge. Aues wo de übere GP vo Monsa muesch wüsse - und de no e chli meh ghörsch du wes heisst: “Schnäu, Wiud & Sexy - Rewiuded”

S01E15 - Sandfohrt Nach der Summerpause geiz witer nach Holland, a gross Priis vo Sandfohrt. Wiu der Lewis washed isch, chunnter nid übers Q2 us und wirt de erscht no Opfer vonere Hatecrime. Fröie tuet das der Norris, är macht sech uf zum de Rennsieg i der erschte Kurve z versieche, u der Max beschwährt sech über sis Auto - we bacc! Bis auso derbi wenns wider heisst: “Schnäu, Wiud & Sexy”

S01E14 - Schpa-Franggoschomp Es isch scho s letschte Renne vor der Summerpause, und d F1 macht Halt in Belgie. Uf der längschte Streckii vor Saison setzt sech der Max souverän ufd Pole - und startet glich nur ufem 11i. Freue duet das d Mclarens… oder öbbe doch d Mercedes? Bis derbi wenns wider heisst: “Schnäu, Wiud & Sexy!”

S01E12 - Britannie S dritte Renne i drü Wuche, und de erscht no z Silverstoun - das isch ja wie Wiehnachte und Geburtstag zäme! Nach ere wiude Quali sis die Wuche die beide Mercedes wo für Überraschige guet si. Der Verstappen mues mau wider schaffe für sis Gäut, der Hüüülkenberg setzt si Haas scho widr id Pünkt und d McLarens löh sech bir Strategie vo de Ferraris la inspiriere. Bis auso derbi wenns wider heisst: “Schnäu, Wiud & Sexy!”

S01E11 - Östriich Am Redbull Ring, weisch dä mitem grosse Stier ir Mitti, trifft sech d Formel 1  fürs dritte Sprintwuchenänd vor Saison. Und obwohl d Sprintquali immerno für i Ghüder isch hets huufe Unterhaltig gäh. Der Leclerc probierts ir SQ mitem Rückwärtsgang, d Franzose hei sech immernoni gärn, der Max macht sech wägem Norris so fest id Hose daser no meh mues umgränne im Funk und d FIA het sogar vergässe d Glüehbire ide Startliechter zwächsle! Bis auso derbi wenns wider heisst: “Schnäu, Wiud & Sexy!”

S01E10 - Barselona D Formel 1 isch zrügg in Barselona, eim vo de äutischte und beliebtiste Tracks vo der Saison. Nachdäm der Norris ir Quali brilliert, prophezeit der Verstappen scho der Wäutuntergang. Der Lewis bereut si Mercedes abgang, d Franzose si bacc, und no viles meh! Bis auso derbi wenns wider heisst: “Schnäu, Wiud & Sexy!”

S01E09 - Kanada Nach ere absolute Schlaafpartie bim letschte Renne verspricht der gross Priis vo Kanada vo Aafang aa besti Unterhaltig! Nach ere wiude Quali gsehts us als wäre Mercedes plötzlech bacc on track, dr Leclerc bechunt s Karma z gspüre und dr Max chunnt au mau wider iz schwitze - u irgned sone Gigu het am Sergeant vergässe zsäge daser en Rägeschirm söu iipacke. Bis auso derbi wenns wider heisst: “Schnäu, Wiud & Sexy!”

S01E08 - Monaggo Es isch wider so wiit, es isch Monaggo-Zyt! Nachere wiude Qualisession mache sech d Fahrer au das Jahr wider ufmache zur Auto-Bolognese-Parade, und Jahr für Jahr diskutiere mer wider übere Sinn und Unsinn vo dem Renne. Aber wenn der Verstappen scho mau nid gwünnt spiuts ja ke Rolle das i de top-ten kes einzigs Überholmanöver passiert. Bis auso derbi wenns wider heisst: “Schnäu, Wiud & Sexy!”

S01E07 - Imola Nachdäms letscht Johr chli znass isch gsi simmer hür wider in Imola unterwägs füre - Achtung - Formula One MSC Cruises Grand Premio del Made in Italy e dell’Emilia-Romagna 2024. Uf der Strecki isch zwar nid der Bär los derfür bi üsne Audispekulatione und währendäm mir lavere bechömemer chum mit wie der McLaren schlichend am Super-Max geit go Angscht mache. Bis auso derbi wenns wider heisst:”Schnäu, Wiud & Sexy!”

S01E06 - Mäiämi Zäme mache mer üs uf, zum der dritt GP vo Miami z’luege - u das Mau ischs aso gar nid so schlimm gsi, imfau! Ufem Parkplatz vo irgend somne Rögbystadion spilt der Magnussen Penalty-Bingo, der Verstappen fahrt e Pfoste um, und der Lando No-wins setzt sim Spitzname ändlech es Ändi. Bis auso derbi wenns wider heisst:”Schnäu, Wiud & Sexy!”

S01E05 - Schanghai Nach föif Johr Pause isch der F1-Zirkus das Wuchenändi mau wider für e gross Priis vo China in Shanghai ungerwägs. Am erschte Sprintwuchenändi vo dere Saison loht der Verstappen mau wider nüüt lo aabrönne, der Hamilton mötzlet sech id Pünkt, der Stroll macht sim Name alle Ehre, und der Ricciardo zeigt dases ebe doch nid nume Chopfsach isch. Bis derbi wenns auso wider heisst: “Schnäu, Wiud & Sexy!”

S01E04 - Susuka Im vierte Renne vor Saison geits nomau früeh am Morge uf nach Susuka füre gross Priis vo Japan! Nachdem der Ricciardo und der Albon ir erschte Rundi uf Kuschelkurs göi, het der Zhou usversehe der Rückwärtsgang verwütscht und der Sargeant geit scho wider ga offroade. Bis auso derbi wenns wider heisst: “Schnäu, Wiud & Sexy”

S01E03 - Mellbörn Früech am Morge hei mer üs uufgmacht, zum dr GP vo Australie z’luege - und was für nes Renne das isch gsi! Nachdäm der Verstappen bim Start sini Handbräms vergisst zeige d Mercedes emau, werum si immer no zu de Top-Teams ghöre. Dr Sainz löst en italiänischi Identitätskriise us, dr Sargeant chillts im Streckerand und üse Hinwiler Rennstall stellt en Rekord im Boxestop uf. Bis derbii wenn mer üs am sch**** fu*** vieri am Morge der Wecker stelle unds wider heisst: “Schnäu, Wiud & Sexy”

S01E02 - Tscheddah Im zwöite Renne vor Saison geits uf nach Tscheddah id Wüesti. Während der Verstappen e churzi Pause vom Sim-Racing macht zum schnäu der GP vo Saudi-Arabie z gwünne, geit der Stroll uf tuechfüehlig mit der Streckenabsperrig. Bim Start vor F1-Academy gäbe d Fraue vougaas, und der Gasly demonstriert im Alpine einisch meh d Zueverlässigkeit vor französische Ingeniörskunscht. Bis derbii wenns wider heisst: “Schnäu, Wiud & Sexy”

S01E01- Bachrain Der Uuftakt i die nöii Saison glänzt überau - nume nid uf der Rönnstrecki z Bachrain. Während sech der Verstappen wider uf und derfoo macht, slidet der Christian “Horny” Horner gad i dini DM’s. Dr Günther lacht sech is füüschtli, und der Hamilton verzieht sech vo Mercedes wie d Ratte vom sinkende Schiff. Bis derbii wenns zum erste mal heisst: “Schnäu, Wiud & Sexy”

Bis derbii wenn mir am Rennsunti zämesitze um mit öich id Wäut vo der Formel 1 iiztauche. Wenn ke Zyt hesch gha zums Renne luege (oder nach der Höufti iigschlofe bisch) si mir zur Stell! Mit üs weisch was uf der Strecki und näbedra so lauft, bi welne Teams s grösste Drama abgeit, weli Fahrer wie oft im Funk umegränne und was d FIA zu däm ganze z'säge het. Bis starch wenn e Verstappen-Fan bisch und heb di fescht wenns s nöchscht mou heisst: Schnäu, Wiud und Sexy!