Sona

Pertsona sentikorra da Julie Rouault eta bere kantatzeko eran argi geratu da hori. Duela 10 urte euskara ikasi zuen alzheimerra zuen amonarekin mintzatzeko era bakarra baitzen. Etxean txikitan entzundako doinuekin jolasean hasi eta “Eklore” izena duen diskoa kaleratu du uztariztarrak. Kabaretean ere abeslari, Baionako zezen plazan abestea du amets.

Izaki Gardenak taldeko Jon Basagurenek Martxoren 3ko kontzertuaren harira gertatutakoa gogoratu du. "Herio" kantua jotzear zirela entzule baten mobila jotzen hasi eta une intimoa erabat zapuztu zen. Irrifar batekin gogoratu du une hura, baita gaztetxoa zela sortu zuten Akatu metal taldearen hasiera ere. Kantuetara iristea gero eta zailagoa zaiola ukatu gabe, "Hibernazioa" kantua jo du akustikoan, eta, bertsioan, Anariren "Aingura Hegodunak" Libe Garcia de Kortazar kidearekin batera.

Etapa berria hasten ari da Flako Fonki. Orain, Chill Mafiaren etapa ez luke errepikatuko, baina aitortzen du garai polita izan zela, epikoa. Lasai eta presiorik gabe ari da musika egiten, noizbait aterako duen diskoaren abestiak egiten. Argi du lan berria euskaraz izango dela, eta euskal kantutegi tradizionaletik edango duela. Chill Mafiaren garaian idatzitako “Atzerrian” abestia jo du Xabi Esparza eta Suneorekin eta bertsioaren tartean, “Amalau eriyotzena”, 1825eko true crime bertsoak abestu ditu.

“Sona” euskal musikari eskainitako podcasta da eta Euskal Herriko soinu mapa osatzera dator.“Sona” podcastean musikariak gertutik ezagutu, zuzeneko musikaz gozatu eta abesti ezagunak beste modu batera entzungo ditugu: bertsionatuta.Istorioak, momentuak eta zuzenekoak Jokin Bereziartuak gidatuta.