Truecopy THINK - Malayalam Podcasts

ലഹരിയെ തോൽപ്പിച്ച് സാധാരണ ജീവിതത്തിലേക്ക് തിരിച്ചെത്തിയവർ സ്വന്തം അനുഭവങ്ങൾ പങ്കുവെച്ചുകൊണ്ട് മറ്റുള്ളവരെ എങ്ങനെ ജീവിതത്തിലേക്ക് കൈപിടിച്ചുയർത്തുന്നു എന്ന സമീപനമാണ് ആൽക്കഹോളിക്സ് അനോണിമസ് എന്ന സംഘടന മുന്നോട്ടുവെക്കുന്നത്.ലഹരിയിൽ നിന്ന് മോചനം നേടുന്ന വ്യക്തിയുടെ പേരോ വ്യക്തിത്വമോ സമൂഹത്തിന് മുന്നിൽ വെളിപ്പെടുത്താതെ രഹസ്യസ്വഭാവം സൂക്ഷിക്കുന്നു എന്നതാണ് ഇതിന്റെ ഏറ്റവും വലിയ പ്രത്യേകത.ലഹരി അടിമത്തം ഒരു വ്യക്തിയെ മാത്രമല്ല, ഒരു കുടുംബത്തെയും സമൂഹത്തെയുമാണ് പാടെ തകർത്തുകളയുന്നത്. സോഷ്യോളജിസ്റ്റും എഴുത്തുകാരനുമായ എൻ.പി. ഹാഫിസ് മുഹമ്മദ് ലഹരിയുടെ സാമൂഹിക പ്രത്യാഘാതങ്ങളെക്കുറിച്ചും, അതിൽ നിന്നും മോചനം നേടാനുള്ള പ്രായോഗിക വഴികളെക്കുറിച്ചും സംസാരിക്കുന്നു.

സർക്കാരിന്റെ ദുർബലമായ സാമ്പത്തിക സ്ഥിതിയുടെയും കോർപ്പറേറ്റ് ആശുപത്രികളിൽ കുതിച്ചുകയറുന്ന ചികത്സാചെലവിന്റെയും മുന്നിൽ നമ്മുടെ ആരോഗ്യരംഗത്തെ ചരിത്രപരമായ നേട്ടങ്ങൾ എങ്ങനെ നിലനിർത്താം എന്നുള്ളതാണ് ഇന്ന് കേരളം നേരിടുന്ന ഏറ്റവും വലിയ വെല്ലുവിളി. കേരളത്തിന്റെ ആരോഗ്യമേഖലയുമായി ബന്ധപ്പെട്ട് ഒരു ആരോഗ്യ ധനകാര്യ വീക്ഷണം അവതരിപ്പിക്കുന്നു, മുൻ അഡീഷണൽ ചീഫ് സെക്രട്ടറിയും ആരോഗ്യവകുപ്പ് സെക്രട്ടറിയുമായിരുന്ന രാജീവ് സദാനന്ദൻ, ആരോഗ്യ സംവിധാന ഗവേഷക ഡോ. പല്ലവി മുരളീധരൻ എന്നിവർ.

നാടകഗാനങ്ങളിലൂടെയും ലളിതഗാനങ്ങളിലൂടെയും സിനിമാപാട്ടുകളിലൂടെയും മലയാളത്തിന്റെ പ്രിയ ശബ്ദമായി മാറിയ രാജലക്ഷ്മി, പാട്ടുകാരിയായതിനുപുറകിൽ അനുഭവിച്ച പ്രതിസന്ധികളെക്കുറിച്ച് തുറന്നുപറയുന്നു, സനിത മനോഹറുമായുള്ള അഭിമുഖത്തിൽ. ചില പെർഫോർമെൻസുകളിൽ ‘കാണാൻ അത്ര പോരാ’, ‘ഡ്രസ്സിംഗ് ശരിയല്ല’ തുടങ്ങിയ ആക്ഷേപങ്ങൾ നേരിട്ട്, അവയെ അതിജീവിച്ച അനുഭവങ്ങൾ. സ്വന്തം കലയിൽ വിശ്വസിച്ച്, ആരുടെയും മുന്നിൽ കീഴടങ്ങാതെ തലയുയർത്തി നിന്ന് നേടിയെടുത്ത പാട്ടിന്റെ സ്വന്തം ലോകം.രാഘവൻ മാസ്റ്റർ, രവീന്ദ്രൻ മാസ്റ്റർ, ജോൺസൺ, വിദ്യാസാഗർ, എം. ജയചന്ദ്രൻ, ബിജിപാൽ തുടങ്ങിയവർക്കൊപ്പം പ്രവർത്തിച്ച; യേശുദാസ്, എസ്. പി. ബി, ചിത്ര, ജയചന്ദ്രൻ തുടങ്ങിയവർക്കൊപ്പം വേദികൾ പങ്കിട്ട അനുഭവങ്ങൾ.

ഡാം മാനേജ്മെൻ്റിലെ അനാസ്ഥ എങ്ങനെയാണ് മനുഷ്യരുടേയും പുഴകളുടേയും ദുരന്തത്തിലേക്ക് നയിക്കുന്നത് എന്ന് പറയുകയാണ് ആൾ കേരള റിവർ പ്രൊട്ടക്ഷൻ കൗൺസിൽ പ്രസിഡൻ്റും എഴുത്തുകാരനുമായ എസ്. പി. രവി. ലോകത്തെവിടെയാണെങ്കിലും താങ്ങാവുന്നതിലേറെ ഡാമുകൾ നദികളിൽ പണിയുന്നത് പ്രവചിക്കാനാവാത്ത ദുരന്തങ്ങൾക്ക് കാരണമാവും.

18-ാമത് BRICS ഉച്ചകോടി സപ്തംബർ 12, 13 തീയതികളിൽ ദൽഹിയിൽ നടക്കുമ്പോൾ, അത് എങ്ങനെയാണ് ഇപ്പോൾ വഴിത്തിരിവിലായിരിക്കുന്ന ഇന്ത്യ- ചൈന ബന്ധങ്ങളുടെ ഭാവി നിർണയിക്കുക എന്ന് പരിശോധിക്കുകയാണ്, മഹാത്മാഗാന്ധി സർവകലാശാല സമകാലിക ചൈന പഠനകേന്ദ്രത്തിൽ പ്രവർത്തിക്കുന്ന അരുൺ ദ്രാവിഡ്.

ഒരു കാലത്ത് ലഹരിക്ക് അടിമയായിരുന്ന വ്യക്തി അതിൽ നിന്ന് മുക്തമായി സാധാരണജീവിതം നയിക്കുമ്പോൾ പോലും സമൂഹം അംഗീകരിച്ചുവെന്ന് വരില്ല. അവരെ ക്രിമിനലുകളെ പോലെ കാണുന്ന സമൂഹത്തിൻെറ മനോഭാവം മാറേണ്ടതുണ്ട്. ഡീ അഡിക്ഷൻ എന്നത് വലിയ സാമ്പത്തികച്ചെലവ് കൂടി വരുന്ന ഘട്ടമാണ്. ചികിത്സക്കൊപ്പം തന്നെ ബോധവൽക്കരണവും സമൂഹത്തിൻെറ പിന്തുണയുമൊക്കെ ഈ ഘട്ടത്തിൽ നിർണായകമാണ്. ലഹരി അഡിക്ഷനിൽ നിന്ന് ഡീ അഡിക്ഷനിലേക്കുള്ള വഴികളിലെ പ്രതീക്ഷകളെക്കുറിച്ച് സംസാരിക്കുകയാണ് മുഹമ്മദ് ബഷീർ പി.എ .

ഒരു പരസ്യ സിനിമയിൽ സൗണ്ട് സ്‌ക്രിപ്റ്റ് ചെയ്യുന്നതിനെക്കുറിച്ചാണ് പ്രകാശ് വർമ ഈ ഭാഗത്തിൽ സംസാരിക്കുന്നത്. ബോധപൂർവ്വം ഉണ്ടാക്കിയെടുക്കുന്ന സൈലൻസിനെക്കുറിച്ച്, നിറങ്ങളുടെ സംവിധാനത്തെക്കുറിച്ച്. ദാമൻ ആൻ്റ് ദിയു ടൂറിസത്തിനുവേണ്ടി ചെയ്ത പരസ്യ സിനിമയെക്കുറിച്ചുള്ള പ്രകാശ് വർമയുടെ നരേഷൻ ഒരു രസകരമായ പെർഫോമൻസാണ്. പരമ്പരയുടെ മൂന്നാം ഭാഗം.

നാല് മത്സരത്തിൽ 17 ഗോളുകൾ. ടീമിൽ റോഡ്രി, പെഡ്രി, റഫീഞ്ഞ, യമാൽ, ലോപസ് തുടങ്ങിയ നക്ഷത്ര സമൂഹം. കണക്കുകൾ അട്ടിമറിച്ചൊരു കിടിലൻ തുടക്കം. ഈ തുടക്കം ബാഴ്സയെ ചാമ്പ്യൻസ് ലീഗ് ചാമ്പ്യനാക്കുമോ? ഇംഗ്ലീഷ് പ്രീമിയർ ലീഗിലാവട്ടെ മാഞ്ചസ്റ്റർ സിറ്റിയുടെയും ആഴ്സനലിന്റെയും ടേബിളിൽ ടോപ്പായുള്ള കുതിപ്പ് തുടങ്ങി. ഇതിനർത്ഥം ഇവരിലൊരാൾ പ്രീമിയർ ലീഗ് കിരീടം നേടുമെന്നാണോ?ക്രിക്കറ്റിൽ അലിസ്റ്റർ കുക്ക് വലിയൊരു വിവാദത്തിന് തുടക്കമിട്ടിരിക്കയാണ്. ജെയ് ഷായ്ക്ക് പകരം പാകിസ്താൻ ക്രിക്കറ്റ് ബോർഡ് ചെയർമാൻ മൊഹ്സിൻ നഖ്വി ഐസിസി ചെയർമാനായി ആയി വരട്ടെ എന്ന്. കുക്ക് സീരിയസായിട്ട് തന്നെയാണോ ഇത് പറഞ്ഞത്?പ്രശസ്ത അന്താരാഷ്ട്ര സ്പോർട്സ് അനലിസ്റ്റ് ദിലീപ് പ്രേമചന്ദ്രനോട് കമൽറാം സജീവ് സംസാരിക്കുന്നു.

കേരളത്തിലെ പുഴകളുടെ ഇപ്പോഴത്തെ അവസ്ഥ എന്താണ്? പുഴകളുടെ പുനരുജ്ജീവനം എത്രത്തോളം സാധ്യമാണ്? പുഴകളിലെ മണൽ വാരൽ വെള്ളപ്പൊക്കത്തിനുള്ള ശാസ്‌ത്രീയമായ പരിഹാരമാണോ? ചെറിയ ജലവൈദ്യുതി പദ്ധതികൾ കേരളത്തിന് അഭികാമ്യമാവുന്നത് എങ്ങനെയാണ്? ആൾ കേരള റിവർ പ്രൊട്ടക്ഷൻ കൗൺസിൽ പ്രസിഡൻ്റും എഴുത്തുകാരനുമായ എസ്.പി. രവി സംസാരിക്കുന്നു.

സാധാരണക്കാരും തൊഴിലാളികളും വിനോദ സഞ്ചാരികളുമായ ആയിരക്കണക്കിന് മനുഷ്യരാണ് നേപ്പാൾ ദുരന്തത്തിൽപ്പെട്ട് ഇല്ലാതായത്. ദുരന്തമുണ്ടായതിൻ്റെയും ദുരന്തത്തിൻ്റെ വ്യാപ്തി ഇത്രയും അധികമായതിൻ്റെയും കാരണങ്ങൾ യഥാർത്ഥ്യബോധത്തോടെ മനസ്സിലാക്കേണ്ടിയിരിക്കുന്നു. ഒപ്പം അതിർത്തികളില്ലാത്ത കാലാവസ്ഥാ വ്യതിയാനത്തിന് ഹിമാലയത്തോടും പശ്ചിമഘട്ടത്തോടും പൊതുവായി പലതും പറയുവാനുമുണ്ട്. ആൾ കേരള റിവർ പ്രൊട്ടക്ഷൻ കൗൺസിൽ പ്രസിഡൻ്റും എഴുത്തുകാരനുമായ എസ്.പി. രവി സംസാരിക്കുന്നു.

നേപ്പാളിലുണ്ടായ പ്രകൃതി ദുരന്തത്തിൻ്റെ യഥാർത്ഥ കാരണമെന്തെന്ന് സമഗ്രമായി വിശദീകരിക്കുകയാണ് കുസാറ്റിലെ ഡിപ്പാർട്മെൻ്റ് ഓഫ് മറൈൻ ജിയോളജി ആൻ്റ് ജിയോ ഫിസിക്സ് മേധാവിയും ഹിമാലയൻ മേഖലകളിലും ധ്രുവപ്രദേശങ്ങളിലും പഠനം നടത്തുകയും ചെയ്യുന്ന ശാസ്‌ത്രജ്ഞനായ ഡോ. സുനിൽ പി.എസ്. ആയിരത്തിലേറെപ്പേർ മരിക്കുകയും 4000 ലേറെപ്പേരെ കാണാതാവുകയും ചെയ്ത ദുരന്തം കാലാവസ്ഥാ - പ്രകൃതി പ്രതിഭാസങ്ങൾ എത്രമാത്രം പ്രവചനാതീതമാണ് എന്ന മുന്നറിയിപ്പ് നൽകുന്നു. ഒപ്പം ദുരന്തങ്ങളെ നേരിടാൻ എങ്ങനെ സമൂഹങ്ങൾ തയ്യാറാവേണ്ടതുണ്ട് എന്നും വിശകലനം ചെയ്യുന്നു.

സ്ത്രീകൾ വീട്ടിൽ അടങ്ങിയൊതുങ്ങി ജീവിക്കണമെന്നും സ്ത്രീകൾ പൊതു രംഗത്തിറങ്ങിയാൽ അത് വലിയ നാശത്തിന് കാരണമാകുമെന്നുമുള്ള കാന്തപുരം എ.പി. അബൂബകർ മുസ്ലിയാരുടെ പ്രസംഗം വിവാദമായതിൻ്റെ പശ്ചാത്തലത്തിൽ കെ.ഇ.എൻ സംസാരിക്കുന്നു.

ഒരു ബ്രാൻഡ് അല്ലെങ്കിൽ ഒരു ഉത്‌പന്നം മനുഷ്യരുടെ മനസിൽ ഉറപ്പിച്ചെടുക്കുന്ന ഘടകം അതിൻ്റെ പരസ്യങ്ങളാണ്. പ്രത്യേകിച്ച് വീഡിയോ പരസ്യങ്ങൾ. അത്തരം പരസ്യങ്ങളുടെ നിർമാണത്തിനു പിന്നിൽ കലാപരവും വാണിജ്യപരവുമായ വലിയ പ്രയത്നവും ചിന്തകളുമുണ്ട്. ഇന്ത്യൻ പരസ്യരംഗത്തെ ഹിറ്റ് മേക്കറായ പ്രകാശ് വർമ ബ്ലാക്ബെറി, ഐ ഫോൺ, ഇന്ത്യൻ റെയിൽവേ എന്നിവയ്ക്കു വേണ്ടി ചെയ്ത പരസ്യങ്ങളുടെ പിന്നിലെ കഥ പറയുകയാണ്. പരമ്പര തുടരുന്നു - പ്രകാശ് വർമയുടെ പരസ്യജീവിതം

ഒ.വി. വിജയന്റെ വ്യക്തിജീവിതവും എഴുത്തുജീവിതവും ഓർക്കുകയാണ് സഹോദരിയും കവിയുമായ ഒ.വി. ഉഷ. 'ഖസാക്കിന്റെ ഇതിഹാസം’ എന്ന നോവലിന്റെ പിറവി, ജീവിതത്തിലും എഴുത്തിലും അദ്ദേഹം പിന്തുടർന്ന വേറിട്ട സമീപനങ്ങൾ, സഹോദരി ഒ.വി. ശാന്ത അദ്ദേഹത്തിന്റെ എഴുത്തിൽ ചെലുത്തിയ സ്വാധീനം, വിമർശനങ്ങളോടുള്ള അദ്ദേഹത്തിന്റെ നിലപാട് എന്നിവയെക്കുറിച്ച് സംസാരിക്കുന്നു ഒ.വി. ഉഷ, സനിത മനോഹറുമായുള്ള അഭിമുഖത്തിൽ. ‘എഴുത്തുവഴിയിലെ ഒറ്റ ചുവട്’- PART TWO.

‘ഏതു സമയത്താണ് ഞാൻ എന്റെ ഐഡന്റിറ്റി discard ചെയ്യാൻ തയ്യാറാകുന്നത്, ആ സമയത്താണ് നമ്മൾ ലിബറേറ്റഡാകുക. ചിലർ നമുക്ക് മേൽവിലാസമൊക്കെ തരും. എന്നാൽ അത്തരം അഡ്രസുകളെല്ലാം കുടഞ്ഞുകളഞ്ഞ വ്യക്തിയാണ് ഞാൻ’- നൃത്തം എന്ന ആവിഷ്കാരത്തിന്റെയും നർത്തകി എന്ന കലാകർതൃത്വത്തിന്റെയും വേറിട്ട വഴികളിലൂടെ സഞ്ചരിക്കുന്ന മേതിൽ ദേവികയുടെ നൃത്തജീവിതം. അഭിമുഖം: സനിത മനോഹർ.

കേരളത്തിന്റെ അരനൂറ്റാണ്ടുമുമ്പത്തെ സാംസ്​കാരിക - രാഷ്​ട്രീയ ചരിത്രത്തിലെ അപൂർവ സന്ദർഭങ്ങളടങ്ങിയ ഓർമക്കുറിപ്പുകളാണ് യു. ജയചന്ദ്രൻ എഴുതിയ ‘വെയിൽക്കാലങ്ങൾ’. റാറ്റ് ബുക്സ് പ്രസിദ്ധീകരിച്ച ഈ പുസ്തകത്തിന്റെ ആദ്യ അധ്യായം കേൾക്കാം. യു. ജയചന്ദ്രൻ മരിച്ചിട്ട് ഇന്ന് ഒരു വർഷം തികയുന്നു.

‘‘നാല് ദശാബ്ദത്തിലേറെയുള്ള എന്റെ സജീവ മാധ്യമകാലത്ത് മാധ്യമപ്രവർത്തകർ ഇത്രയധികം വെറുക്കപ്പെട്ട കാലം ഓർമ്മയിലില്ല. സഹിഷണതയും ക്ഷമയും കുറഞ്ഞകാലത്ത് അവസരം കിട്ടുമ്പോഴെല്ലാം “മാപ്രാകളെ” ആക്രമിക്കാൻ കാത്തിരിക്കുന്നവരുടെ എണ്ണം പെരുകുന്നു’’- രാധാകൃഷ്ണൻ എം.ജി എഴുതിയ ലേഖനത്തിന്റെ പോഡ്കാസ്റ്റ് കേൾക്കാം

വിശ്വാസ്യത സമ്പൂർണമായി ഇല്ലാതാക്കി, മാധ്യമപ്രവർത്തനത്തിന്റെ പേരിൽ കുറ്റകൃത്യമാണ് ചില ചാനലുകൾ നടത്തുന്നത്. പിടികിട്ടാപ്പുള്ളി സുകുമാരക്കുറുപ്പിനെ ‘കണ്ടെത്തി’ എന്ന വാർത്തയും ലയണൽ മെസ്സിയുടെ പേരിൽ, ഒരു ചാനൽ ഉടമസ്ഥതയെ മറയാക്കി അര​ങ്ങേറിയ തട്ടിപ്പുകളും ജേണലിസത്തിന്റെ ഏറ്റവും പ്രാഥമികമായ അടിസ്ഥാനങ്ങളെയാണ് തകർത്തുകളയുന്നത്. EDITORS ASSEMBLY: മനില സി. മോഹൻ, കെ. കണ്ണൻ, ടി. ശ്രീജിത്ത്.

മുത്തങ്ങ സമരവുമായി ബന്ധപ്പെട്ട കേസിൽ 22 ദിവസത്തെ തടവുശിക്ഷയ്ക്കുശേഷം ജയിൽമോചിതരായ രമേശൻ, അനിൽകുമാർ, ബിനു, എം. ഗീതാനന്ദൻ എന്നിവർ ട്രൂകോപ്പി തിങ്കുമായി സംസാരിക്കുന്നു. മുത്തങ്ങ സംഭവത്തിൽ ആദിവാസികൾക്കെതിരെ നടന്ന സംഘടിത ഗൂഢാലോചന, കേസിലും വിചാരണയിലും നേരിട്ട വിവേചനങ്ങൾ, കൊല്ലപ്പെട്ട ജോഗിയ്ക്കും പീഡനത്തിനിരയായ സ്ത്രീകളും കുട്ടികളുമടങ്ങുന്ന ഗോത്രമനുഷ്യർക്കും നീതി ലഭ്യമാക്കാനുള്ള നിയമനടപടികൾ, യു.ഡി.എഫ് സർക്കാർ പ്രഖ്യാപിച്ച ‘രണ്ടാം ഭൂപരിഷ്കരണ’ത്തിന്റെ പാശ്ചാത്തലത്തിൽ ഭൂസമരങ്ങളുടെ ഭാവി തുടങ്ങിയ വിഷയങ്ങൾ കെ. കണ്ണനുമായി സംസാരിക്കുന്നു.

പുതിയ തലമുറയുടെ രീതികളിൽ നിന്നും സമരങ്ങളിൽ നിന്നും യാഥാസ്ഥിതികരായ മനുഷ്യർക്ക് ധാരാളം കാര്യങ്ങൾ ഉൾക്കൊള്ളാനുണ്ട് എന്ന് പറയുകയാണ് അഭിമുഖത്തിൻ്റെ രണ്ടാം ഭാഗത്തിൽ പരിസ്ഥിതി - മനുഷ്യാകാശ പ്രവർത്തകനും എഴുത്തുകാരനുമായ ശ്രീധർ രാധാകൃഷ്ണൻ. സി.ജെ.പി സമരം, ജെല്ലിക്കെട്ട് സമരം, അർബർ ഫ്ലഡ്, കേരളത്തിലെ നിർമാണ രീതികൾ തുടങ്ങി നിരവധി കാര്യങ്ങൾ സംസാരിക്കുന്നു.

കേരളത്തിൽ മുഖ്യ തിരഞ്ഞെടുപ്പ്‌ ഓഫീസർ പദവിയിലെത്തുന്ന ആദ്യ സ്ത്രീയും ചീഫ് സെക്രട്ടറി പദവിയിലെത്തുന്ന നാലാമത്തെ സ്ത്രീയുമായിരുന്നു നളിനി നെറ്റോ. സ്കൂൾ/കോളേജ് കാലഘട്ടത്തിലെ ഓർമകളിൽ നിന്ന് തുടങ്ങി ഭരണനേതൃത്വത്തിന്റെ പരമോന്നത പദവി വരെ എത്തിയ സംഭവബഹുലമായ സർവീസ് ജീവിതം പറയുകയാണ് അവർ. മുഖ്യ തെരഞ്ഞെടുപ്പ് ഓഫീസർ, ചീഫ് സെക്രട്ടറി തുടങ്ങിയ നിർണായക പദവികളിലിരുന്ന് അഭിമുഖീകരിച്ച അനുഭവങ്ങൾ, നേരിട്ട സമ്മർദ്ദങ്ങൾ, നിലപാടുകളിൽ ഉറച്ചു നിന്ന സർവീസ് കാലം, ഐ.എ.എസ് ഉദ്യോഗസ്ഥർ സർവീസ് ജീവിതത്തിൽ പുലർത്തേണ്ട നിലപാടുകൾ എന്നിവയെ കുറിച്ച് സനിത മനോഹറുമായി സംസാരിക്കുന്നു.

ഒൻപത് തവണ മികച്ച ഗായകനും ഇത്തവണ സംഗീത സംവിധായകനുമുള്ള സംസ്ഥാന നാടക അവാർഡ് നേടിയിട്ടുണ്ട് പ്രശസ്ത പിന്നണി ഗായകനും സംഗീത സംവിധായകനുമായ കല്ലറ ഗോപൻ. ലളിതഗാനത്തിന് നൽകിയ സമഗ്രസംഭവനകൾക്ക് സംഗീത നാടക അക്കാദമി ആദരവും നേടി. നാടകഗാനങ്ങളുടെ അതിസമ്പന്നമായ ഒരു കാലം കല്ലറ ഗോപന്റെ ശബ്ദത്തിലൂടെയാണ് മലയാളികൾ അനുഭവിച്ചത്. ആ കാലം അദ്ദേഹം ഓർത്തെടുക്കുന്നു. ജി. ദേവരാജൻ, എം. ജി. രാധാകൃഷ്ണൻ, കെ. പി. ഉദയഭാനു, എം. കെ. അർജുനൻ എന്നീ മാസ്റ്റർമാർ വഴികാട്ടികളായ അനുഭവം. പ്രിയ സുഹൃത്തുക്കളായ പി. ജയചന്ദ്രൻ, വേണുഗോപാൽ എന്നിവരുമൊത്തുള്ള സൗഹൃദം. ഒപ്പം, നിറയെ പാട്ടുകളും പാടി, സനിത മനോഹറിനൊപ്പം ഒരു പാട്ടുസഞ്ചാരം.

മയക്കു മരുന്നുകളുടെ സപ്ലൈ മുറിച്ചുമാറ്റിയതു കൊണ്ട് മാത്രം ലഹരിയെന്ന സാമൂഹിക വിപത്ത് സമൂഹത്തിൽ നിന്ന് ഇല്ലാതാക്കാനാവില്ല എന്ന് പറയുകയാണ് മനശാസ്‌ത്രജ്ഞനായ ഡോ. മനോജ് കുമാർ. വ്യക്തി മുതൽ ഭരണകൂടം വരെയുള്ള എല്ലാ അടരുകളിലും ഒരുപോലെയുള്ള പരിശ്രമം ഉണ്ടെങ്കിൽ മാത്രമേ അത് സാധ്യമാവൂ. മയക്കുമരുന്ന് ഉപയോഗിക്കുന്നവരുടെ പുനരധിവാസവും അതിനുള്ള തുടർച്ചയും അതിപ്രധാനമായ കാര്യമാണ്. അത് ഭരണകൂട തലത്തിൽത്തന്നെ ഉണ്ടാവേണ്ടതുണ്ട്.

കേരളത്തിൽ കടൽ മനുഷ്യർ ഇപ്പോഴും അദൃശ്യസമൂഹമായി തുടരുന്നതിന്റെയും അവരുടെ പ്രതികരണങ്ങൾ വംശീയ ആക്രമണങ്ങൾക്കിരയാകുന്നതിന്റെയും കാരണങ്ങൾ സ്വന്തം അനുഭവത്തിൽനിന്ന് വിശദീകരിക്കുകയാണ് കടലോര മനുഷ്യാവകാശപ്രവർത്തകനായ വിപിൻ ദാസ് തോട്ടത്തിൽ. യൂണിയൻ സർക്കാറിന്റെയും സംസ്ഥാന സർക്കാറിന്റെയും പദ്ധതികൾ കടലോര മനുഷ്യരെ പാർശ്വവൽക്കരിക്കുന്നതിന്റെ അനുഭവങ്ങൾ, തൊഴിൽസമൂഹമായി മാറിയ കടൽപ്പണിക്കാരുടെ സമരജീവിതം, സ്ത്രീകളും വിദ്യാർത്ഥികളുമടങ്ങുന്ന അവരുടെ പുതിയ നേതൃത്വം എന്നിവയെക്കുറിച്ചും വിപിൻ ദാസ്, കെ. കണ്ണനുമായുള്ള അഭിമുഖത്തിൽ സംസാരിക്കുന്നു.

കാലാവസ്ഥാ മാറ്റങ്ങളോടുള്ള സർക്കാരുകളുടേയും സമൂഹത്തിൻ്റെയും വ്യക്തികളുടേയും സമീപനം അടിയന്തരമായി പുതുക്കിപ്പണിയേണ്ടതുണ്ട് എന്ന് പറയുകയാണ് കാലാവസ്ഥാ ശാസ്ത്രജ്ഞനായ പ്രൊ.എസ്. അഭിലാഷ്. കാലാവസ്ഥാ പ്രവചനത്തിന് തീരദേശ മേഖലയിലും പശ്ചിമഘട്ടത്തിലെ പല മേഖലകളിലും ഫലപ്രദമായി പ്രായോഗിച്ച് വിജയിച്ച മോഡലുകൾ പ്രൊഫ അഭിലാഷിൻ്റെ നേതൃത്വത്തിൽ വികസിപ്പിച്ചെടുത്തിട്ടുണ്ട്. ഈ പ്രവചന മോഡലുകളെ സംസ്ഥാനം വേണ്ട രീതിയിൽ പ്രയോജനപ്പെടുത്തുകയാണ് വേണ്ടത്. ആഗോള തലത്തിലെ കാലാവസ്ഥാ വ്യതിയാനങ്ങളെ ഉൾക്കൊണ്ട് വികസന നയങ്ങളിൽ ദീർഘവീക്ഷണത്തോടെയുള്ള മാറ്റങ്ങൾ വരുത്താൻ സർക്കാർ തയ്യാറാവണം. ഒപ്പം ജില്ലാ തലത്തിലും പഞ്ചായത്തു തലത്തിലുമുള്ള ആസൂത്രണങ്ങൾ നടക്കുകയും വേണം.

‘സനാതനികളുടെ ഹിന്ദുത്വ വഴികൾ' എന്ന ബെസ്റ്റ് സെല്ലറിലൂടെ കേരളത്തിലെ ഹിന്ദുത്വ വർഗീയതയുടെ ചരിത്രവും വർത്തമാനവും അന്വേഷിക്കുകയാണ് പ്രമുഖ സി പി എം നേതാവായ പി.ജയരാജൻ. മതവിശ്വാസികളോട് സി പി എം പുലർത്തിയ നയങ്ങളിൽ എന്തെങ്കിലും തെറ്റുപറ്റിയോ? കഴിഞ്ഞ നിയമസഭാ തെരഞ്ഞെടുപ്പിൽ പാർട്ടി പ്രകടിപ്പിച്ചതായി വിമർശിക്കപ്പെടുന്ന മുസ്ലിം വിരുദ്ധതയെന്ന ആരോപണത്തിൻ്റെ യാഥാർഥ്യമെന്ത്? എന്താണ് പി.ജയരാജൻ്റെ മതവിശ്വാസം?പുസ്തകത്തെക്കുറിച്ചുള്ള ചോദ്യങ്ങൾക്കൊപ്പം ഇത്തരം ചോദ്യങ്ങൾക്കു കൂടി ഉത്തരം പറയുകയാണ് പി.ജയരാജൻ, കമൽറാം സജീവുമായുള്ള ഈ ദീർഘ സംഭാഷണത്തിൽ.

‘‘ഒറിസ്സയിൽ, 1997-ൽ ജെ.ബി. പട്നായിക് മന്ത്രിസഭയുടെ കാലത്ത് നടന്ന ചോദ്യപേപ്പർ ചോർച്ചയ്ക്കെതിരെ, പരീക്ഷാ സംവിധാനത്തിൽ സുതാര്യതയും ഉത്തരവാദിത്തവും ഉറപ്പാക്കാനാവശ്യപ്പെട്ട് സെക്രട്ടറിയേറ്റ് വളഞ്ഞ് പ്രതിഷേധിച്ച 1500-ഓളം വിദ്യർത്ഥികളെ നയിച്ചത് പതിനെട്ടുകാരൻ ധർമേന്ദ്ര പ്രധാൻ ആയിരുന്നു’’ ലീഷ മഞ്ജു എഴുതിയ ലേഖനത്തിന്റെ പോഡ്കാസ്റ്റ് കേൾക്കാം

ഇന്നത്തെ രാഷ്ട്രീയക്കാരിൽ വൻ പുസ്തകശേഖരവും വലിയ വായനയുമുള്ള ആളാണ് ഡോ. എം.കെ. മുനീർ. ഒന്നിലും, മുപ്പത് സെക്കൻഡിൽ കൂടുതൽ ശ്രദ്ധിക്കാൻ കഴിയാത്ത ഡിജിറ്റൽ കാലത്ത് ഡീപ് റീഡിംഗ് വീണ്ടെടുത്താലുണ്ടാകുന്ന മാനസിക ആരോഗ്യത്തെക്കുറിച്ച് പറയുകയാണ് അദ്ദേഹം. ഒപ്പം എങ്ങനെയാണ് പുസ്തകങ്ങളെ പ്രേമിച്ചു തുടങ്ങിയതെന്നും ഇഷ്ട പുസ്തകങ്ങൾ ഏതൊക്കെയെന്നും രാഷ്ട്രീയ പ്രവർത്തകർ എങ്ങനെയാണ് വായിക്കാൻ സമയം കണ്ടെത്തേണ്ടതെന്നും കമൽറാം സജീവുമായി സംസാരിക്കുകയാണ് ഡോ. മുനീർ.

പുതിയ നെറ്റ്ഫ്ലിക്സ് ഡോക്യുമെൻ്ററി സീരീസായ ‘മൊറീഞ്ഞോ’ ഫുട്ബോളിനെ സ്നേഹിക്കുന്ന എല്ലാവരും കാണണമെന്നാണ് പ്രശസ്ത അന്താരാഷ്ട്ര ഫുട്ബോൾ അനലിസ്റ്റായ ദിലീപ് പ്രേമചന്ദ്രൻ പറയുക. ഫുട്ബോളിലെ ജീവിതവും മാനേജ്മെൻ്റും, എങ്ങനെ മനുഷ്യജീവിതത്തിലെ തകർച്ചകളുടെയും ഉയർച്ചകളുടെയും നേർ പതിപ്പാകുന്നു എന്ന്, ഇതിലും നന്നായി കാണിച്ചുതരുന്ന മറ്റൊരു കഥാകഥനമില്ല. ചെൽസി, ഇൻ്റർ മിലാൻ, മാഞ്ചസ്റ്റർ യുനൈറ്റഡ്, ടോട്ടനം, റോമ, പോർട്ട എന്നിവിടങ്ങളിലെ ഫുട്ബോൾ ജീവിതത്തിനു ശേഷം വീണ്ടും റയാൽ മാഡ്രിഡ് മാനേജറായെത്തുന്ന ഇതിഹാസമനുഷ്യൻ ജോസേ മൊറീഞ്ഞോയെക്കുറിച്ചുള്ള ഡോക്യുമെൻ്ററിയെക്കുറിച്ചാണ് ഇത്തവണ ദിലീപും കമൽറാം സജീവും സംസാരിക്കുന്നത്.

കഴിഞ്ഞ നൂറ്റാണ്ടിന്റെ ആദ്യ പകുതിയിൽ കോൺഗ്രസിന്റെയും ദേശീയപ്രസ്ഥാനത്തിന്റെയും കേന്ദ്രമായി പ്രവർത്തിച്ച ആനന്ദ് ഭവന്റെ രാഷ്ട്രീയപ്രാധാന്യത്തെക്കുറിച്ച് ഡോ. നിസാർ കിഴക്കയിൽ എഴുതിയ ലേഖനത്തിന്റെ പോഡ്കാസ്റ്റ് കേൾക്കാം

മാറഡോണ മരിച്ചപ്പോൾ നീറിക്കരഞ്ഞ മലപ്പുറംകാരനുണ്ട്. അയാളുടെ ട്രോമ മാറ്റാൻ നിരവധി ചികിത്സകൾ വേണ്ടിവന്നു. ലയണൽ മെസ്സി ഇതാ വരുന്നു എന്നു പറഞ്ഞപ്പോൾ ചാടിക്കളിച്ച കോഴിക്കോട്ടുകാരുണ്ട്. അവരെ മുൻ സ്പോർട്സ് മന്ത്രി അബ്ദുറഹ്മാനും എൽ.ഡി.എഫും പറ്റിക്കുകയായിരുന്നോ? എന്താണ് കായിക - കച്ചവട യാഥാർഥ്യങ്ങൾ? ഇൻ്റർനാഷണൽ സ്പോർട്സ് അനലിസ്റ്റ് ദിലീപ് പ്രേമചന്ദ്രനും കമൽറാം സജീവും ചർച്ച ചെയ്യുന്നു.

കേരളത്തിന്, ക്യൂബ മുകുന്ദൻ എന്നൊരു കഥാപാത്രത്തെ ഉണ്ടാക്കിത്തന്നു ശ്രീനിവാസൻ. ഇന്നും, ക്യൂബയെ നെഞ്ചിലേറ്റുന്ന മാസ് മനസ് കേരളത്തിലുണ്ട്. പുതിയ ക്യൂബയുടെ സ്രഷ്ടാക്കളിൽ സഖാവ് ചെയെപ്പോലെ പ്രധാനിയായ സഖാവ് ഫിദൽ കാസ്ട്രോയുടെ നൂറാം ജൻമദിനം നാളെയാണ്. വിപ്ലവത്തിൻ്റെ അമ്പതാം വാർഷികത്തിൽ അവിടെയെത്തിയ പ്രശസ്ത അന്താരാഷ്ട്ര സ്പോർട്സ് അനലിസ്റ്റ് ദിലീപ് പ്രേമചന്ദ്രന് അന്നേ സംശയമുണ്ടായിരുന്നു. ഈ സിസ്റ്റം തകരാൻ പോവുകയാണോ എന്ന്‌. എക്കാലത്തും വിപ്ലവ ക്യൂബയുടെ ശത്രുവായ അമേരിക്കയേക്കാൾ, സ്വന്തം സഖാക്കളെ സംശയിച്ച ഒരു കമ്യൂണിസ്റ്റ് പാർട്ടി ആയിരുന്നോ അവിടെ ഭരിച്ചത്? ബാറുകളിൽ മാത്രം ജനാധിപത്യം സംസാരിച്ച ഒരു ജനത എന്തിൻ്റെ സൂചനയായിരുന്നു? ആ ബാറുകളിൽ ഒന്നിൻ്റെ ലിഫ്റ്റ് ഓപ്പറേറ്റർ ആയ ക്യൂബൻ യുവതിയുടെ പേര് എങ്ങനെ ഇന്ദിര എന്നായി? ആരായിരുന്നു ക്യൂബൻ ജനതയ്ക്ക് ചെഗുവാര? കാസ്ട്രോയുടെ നൂറാം ജന്മദിനത്തിൽ ദിലീപും കമൽറാം സജീവും സംസാരിക്കുന്നു, ഒരു കേരള ആംഗിളിൽ.

‘‘മുത്തങ്ങയിൽ പൊലീസുകാരൻ അബ്ദുൽ സലാമിനെ പരിക്കേൽപ്പിച്ചതിൽ ഗൂഢാലോചനയുണ്ട് എന്ന വിധി ആദിവാസി സമൂഹത്തിൽ നിരാശയുണ്ടാക്കിയിട്ടുണ്ട്. യഥാർത്ഥത്തിൽ ഗീതാനന്ദൻ മാഷ് ആ സമയം സ്ഥലത്തില്ല. മാഷിന് പങ്കുണ്ടെന്ന കാര്യത്തിൽ കൃത്യമായ തെളിവുമില്ല. പൊലീസിന്റെ വീഡിയോ അവർക്കാവശ്യമുള്ള വിധത്തിൽ ഉപയോഗിച്ചു. അങ്ങനെയാണ് ഇത്തരമൊരു വിധിയുണ്ടായത്’’- മുത്തങ്ങ സമരത്തിലെ കടുത്ത നീതിനിഷേധത്തെക്കുറിച്ച് ആദിവാസി ഗോത്രമഹാസഭ സെക്രട്ടറി പി.ജി. ജനാർദ്ദനൻ എഴുതിയ ലേഖനത്തിന്റെ പോഡ്കാസ്റ്റ് കേള്‍ക്കാം.

2003-ൽ മുത്തങ്ങ സമരഭൂമിയിലുണ്ടായിരുന്ന ഗർഭിണിയ്ക്കും അവരുടെ ചെറിയ രണ്ട് പെൺമക്കൾക്കും ജീവിതപങ്കാളിക്കും നേരെ നടന്ന പൊലീസ് വേട്ടയുടെ അനുഭവമാണിത്. അവകാശത്തിനായി സമരം ചെയ്തവരെ ശിക്ഷിച്ച നീതിന്യായസംവിധാനത്തിന്റെ പരിഗണനയിൽ ഒരിക്കലും വരാനിടയില്ലാത്ത ‘കേസ്’ കൂടിയാണിത്.

മുത്തങ്ങ സമരത്തിനിടെ, പൊലീസുകാരൻ വിനോദ് മരിച്ച കേസിലും മറ്റൊരു ​പൊലീസുകാരനായ അബ്ദുൽ സലാമിന് പരിക്കേറ്റ കേസിലും പ്രതിയാക്കപ്പെട്ട കവിത, മുത്തങ്ങയിൽ താൻ നേരിട്ട കടുത്ത പൊലീസ് അതിക്രമത്തെക്കുറിച്ച് ഓർക്കുന്നു. കവിതയുടെ ജീവിതപങ്കാളി അനിൽകുമാർ, അബ്ദുൽ സലാമിനെ ​ആക്രമിച്ചു​വെന്ന കേസിൽ എം. ഗീതാനന്ദനോടൊപ്പം ശിക്ഷിക്കപ്പെട്ട് ജയിലിലാണ്.

2003-ൽ മുത്തങ്ങ സമരക്കാർക്കുനേരെ പൊലീസ് നടത്തിയ വെടിവെപ്പിൽ കൊല്ലപ്പെട്ട ജോഗിയുടെ മകൻ ശിവൻ സംസാരിക്കുന്നു. ജോഗിയോടൊപ്പം, 15 വയസ്സുകാരനായിരുന്ന ശിവനും 2003-ൽ മുത്തങ്ങയിലെ സമരഭൂമിയിലുണ്ടായിരുന്നു.

നമ്മൾ മനുഷ്യരുടെ സ്വഭാവ സവിശേഷതകളാണ് എന്ന് കരുതുന്ന പലതും മനുഷ്യ മസ്തിഷ്‌കത്തിലെ വ്യത്യസ്തതകളാണ് എന്ന ശാസ്‌ത്രത്തിൻ്റെ മനസ്സിലാക്കലിനെപ്പറ്റി സംസാരിക്കുയാണ് ഡോ. മനോജ് കുമാർ. ന്യൂറോ ഡൈവേർജൻ്റായ മനുഷ്യരെ എങ്ങനെയാണ് മനസ്സിലാക്കുകയും സമീപിക്കുകയും ചെയ്യേണ്ടത്? ഇത് ചികിത്സ സാധ്യമായ ഒന്നാണോ? തുടങ്ങി ഒട്ടേറെ കാര്യങ്ങൾ സംസാരിക്കുന്നു. മനസ്സിൻ്റെ മനോജ് ഡോക്ടർ - പരമ്പര തുടരുന്നു.

കളിക്കാരെ അടിമകളായി കണ്ടിരുന്ന ആ പഴയ കാലം അല്ല ഇത്. ഇന്ന് എംബാപ്പെയുടെ സൈനിംഗ് ഫീ കേട്ടാൽ മതി ഞെട്ടാൻ. എന്താണ് കാണികൾക്കും ക്ലബ്ബിനും കളിക്കാർക്കും ട്രാൻസ്ഫർ വിൻഡോ? രണ്ടാഴ്ചക്കുള്ളിൽ ഇംഗ്ലീഷ് പ്രീമിയർ ലീഗ് തുടങ്ങുമ്പോൾ ഈ വിഷയത്തിൽ സംസാരിക്കുകയാണ് പ്രശസ്ത അന്താരാഷ്ട്ര ഫുട്ബോൾ അനലിസ്റ്റ് ആയ ദിലീപ് പ്രേമചന്ദ്രനും കമൽറാം സജീവും.

സംസ്ഥാന നിയമസഭാ തെരഞ്ഞെടുപ്പുഫലം അവലോകനം ചെയ്യുന്ന സി.പി.എം കേന്ദ്രകമ്മിറ്റിയുടെ അവലോകന റിപ്പോർട്ട്, പാർട്ടിക്കുണ്ടായ ചരിത്രത്തോൽവിയെ യാഥാർഥ്യബോധത്തോടെയും പ്രത്യയശാസ്ത്രപരമായും സമീപിക്കുന്ന ഒന്നാണോ? എൽ.ഡി.എഫ് ഭരണകാലത്തുതന്നെ, കേരളത്തിലെ ജനാധിപത്യ പൗരസമൂഹം ഉയർത്തിയ വിമർശനങ്ങളെ പ്രത്യക്ഷമായി തന്നെ ശരിവെക്കുന്ന ഈ റിപ്പോർട്ട്, കേരളത്തിന്റെ ഇടതുപക്ഷ രാഷ്ട്രീയഭാവിയെക്കുറിച്ച് നൽകുന്ന സൂചനകൾ എന്താണ്? EDITORS ASSEMBLY: ദാമോദർ പ്രസാദ്, പ്രമോദ് പുഴങ്കര, എം.പി. പ്രശാന്ത്, മനില സി. മോഹൻ, കെ. കണ്ണൻ.

ഹൃദയാരോഗ്യത്തെ കുറിച്ചുള്ള അഭിമുഖ പരമ്പര 'Every beat Counts' ൻ്റെ അവസാന ഭാഗത്തിൽ, കേരളത്തിന് ആവശ്യമായ ഹെൽത്ത് സ്ട്രാറ്റജിയെ പറ്റി ചർച്ച ചെയ്യുകയാണ് ഡോ. കെ.പി. ബാലകൃഷ്ണനും രാജേഷ് ആത്രശ്ശേരിയും. ഹൃദയ സംബന്ധമായ പ്രശ്നങ്ങൾ വരുമ്പോൾ, അടിയന്തരമായി നൽകേണ്ട CPR പ്രഥമ ശുശ്രൂഷ എല്ലാവരും പഠിക്കേണ്ടതിനെ പറ്റിയും, അത്തരം കാര്യങ്ങൾ അക്കാദമിക കരിക്കുലത്തിൽ ഉൾപ്പെടുത്തേണ്ടതിനെ സംബന്ധിച്ചും ചർച്ച ചെയ്യുന്നു.

ജനസഞ്ചയപ്രക്ഷോഭങ്ങളുടെ ഏറ്റവും പുതിയ ഇന്ത്യൻ രൂപമാണ് കോക്രോച്ച് ജനതാ വിപ്ലവം എന്ന്, ട്രൂകോപ്പി വെബ്സീനുമായുള്ള അഭിമുഖത്തിൽ ബി. രാജീവൻ നടത്തിയ വിശലകനം, യാഥാർഥ്യത്തെ തെറ്റായി മനസ്സിലാക്കുന്ന ഒന്നാണ് എന്ന വിമർശനമുന്നയിക്കുകയാണ് നവീൻ പ്രസാദ് അലക്സ്.

ഡിജിറ്റൽ മാധ്യമങ്ങൾക്ക് ഭാവിയുണ്ടോ എന്ന ചോദ്യത്തിന് 'ഉണ്ട്' എന്നു തന്നെയാണ് ഉത്തരം; പക്ഷേ, ആ ഭാവി സാങ്കേതികവിദ്യയുടേതോ പ്ലാറ്റ്‌ഫോമുകളുടേതോ ബിസിനസ്സ് മോഡലുകളുടേതോ അല്ല- അത് മനുഷ്യരുടെ കൂട്ടായ്മയുടേതാണ്- അരുൺകുമാർ പി.കെ. എഴുതുന്നു.

എസ്.എഫ്.ഐയുടെ രൂപീകരണസമ്മേളനം മുതൽ ഇന്നോളമുള്ള ആ സംഘടനയുടെ ഗതി വീക്ഷിക്കുമ്പോൾ, ശക്തമായ കേഡർ സംവിധാനമുള്ള എല്ലാ സംഘടനകളും പല ഘട്ടങ്ങളിൽ നേരിടേണ്ടി വരുന്ന പ്രതിസന്ധികൾ ഇതിനെയും വെറുതേ വിട്ടിട്ടില്ലെന്നു കാണാം.കെ.എസ്.എഫിന്റെ കാലത്ത് തല്ലുകാരും അരാജകവാദികളുമായി കണക്കാക്കപ്പെട്ടിരുന്നവർ കാലക്രമേണ എങ്ങനെ ‘മര്യാദരാമന്മാ'രായി രൂപാന്തരം പ്രാപിച്ചു എന്നത് അന്വേഷണം ആവശ്യമുള്ള ഒരു കാര്യമാണ്. അതിന്റെ കാര്യകാരണങ്ങൾ നമുക്ക് കണ്ടുപിടിക്കാവുന്നതല്ലെന്ന് തീർത്തും അറിയാമെന്നിരിക്കിലും. യു. ജയചന്ദ്രൻ എഴുതിയ 'വെയിൽക്കാലങ്ങൾ' എന്ന ഓർമ്മക്കുറിപ്പിൽ നിന്നുള്ള ഒരു ഭാ​ഗം കേൾക്കാം

In this thought-provoking conversation, Sreenath Moorchilot reflects on a remarkable journey spanning technology, entrepreneurship, and leadership, while exploring how Artificial Intelligence, immersive technologies, and holographic systems are reshaping the way we live, work, and learn. Moving beyond innovation alone, the discussion examines the deeper questions of ethics, human potential, entrepreneurship, public impact, and the future of leadership in an increasingly digital world. Blending personal experiences with practical insights and philosophical reflection, this conversation with Dr. Rishikesh KB, invites viewers to think not only about the technologies we are creating, but also about the kind of future - and society - we choose to build with them.

എസ്. ജാനകിയ്ക്ക്, കാലാതീതമായ അവരുടെ പാട്ടുകളിലൂടെ സഞ്ചരിച്ച് ആദരമർപ്പിക്കുകയാണ് ഗായിക രാജലക്ഷ്മി. ബാല്യത്തിൽ താൻ കേട്ടു പഠിച്ചതും നിരവധി വേദികളിൽ പാടിയതുമായ ജാനകിയുടെ എക്കാലത്തെയും മികച്ച പാട്ടുകൾ രാജലക്ഷ്മി പാടുന്നു. ജാനകിയുടെ ആരാധികയായ രാജലക്ഷ്മിയുടെ അമ്മ പാർവതിയും പ്രിയ ജാനകിഗാനങ്ങൾ പാടുന്നു.

ഭരണഘടനാമൂല്യങ്ങളും ജനാധിപത്യരാഷ്ട്രീയവും മുറുകെപ്പിടിച്ച് സ്വേച്ഛാധിപത്യ ഭരണകൂടത്തെ നേരിടാം എന്ന പ്രതീക്ഷാവഹമായ രാഷ്ട്രീയമാണ് ജന്തർ മന്തറിലെ CJP സമരം ഇന്ത്യൻ സമൂഹവുമായി പങ്കിടുന്നതെന്ന് ദാമോദർ പ്രസാദ്.

‘‘ഡിജിറ്റൽ ലോകത്തിൻ്റെ സ്ഥൂലരാഷ്ട്രീയം എന്നത്, കുറേക്കൂടി ഏകാധിപത്യ പ്രവണതയുള്ള രാഷ്ട്രീയമാണ്. ഇത് മനസ്സിലാക്കണമെങ്കിൽ ഡിജിറ്റൽ ലോകത്തിൻ്റെ ഉടമസ്ഥാവകാശം ആർക്കെന്ന് നോക്കണം. പുതിയ സമ്പദ് വ്യവസ്ഥയ്ക്ക് സമ്പൂർണ്ണമായും കീഴ്പ്പെട്ട് പ്രവർത്തിക്കുന്ന ഒന്നാണ് ഇന്ന് ഡിജിറ്റൽ ലോകം’’- പി.എൻ. ഗോപീകൃഷ്ണൻ എഴുതിയ ലേഖനത്തിന്റെ പോഡ്കാസ്റ്റ് കേൾക്കാം

മയക്കുമരുന്നിൻ്റെ ചെറിയ അളവിലുള്ള ഉപയോഗം പോലും തലച്ചോറിലും ശരീരത്തിലും വരുത്തുന്ന മാറ്റങ്ങൾ ചെറുതല്ല. കുട്ടികളിലെയും മുതിർന്നവരിലെയും ലഹരി ഉപയോഗം, വ്യക്തിതലത്തിലും സാമൂഹിക തലത്തിലും ഉണ്ടാക്കുന്ന പ്രത്യാഘാതങ്ങൾ എന്തൊക്കെയാണ്? ലഹരി പ്രയോഗം കൊണ്ടുണ്ടാവുന്ന പ്രശ്നങ്ങൾ ചികിത്സിച്ച് മാറ്റാൻ പറ്റുന്നതാണോ? വ്യക്തി മാത്രം വിചാരിച്ചാൽ മറികടക്കാവുന്ന ഒന്നാണോ ലഹരിയുടെ ആഘാതങ്ങൾ? യൂണിവേഴ്സിറ്റി ഓഫ് മെൽബണിലെ സൈക്യാട്രി, ക്ലിനിക്കൽ അസോസിയറ്റ് പ്രൊഫസർ ഡോ. ആൽബി ഏലിയാസ് ലഹരി വസ്തുക്കളുടെ ഉപയോഗത്തിൻ്റെ ശാസ്‌ത്രീയ വശങ്ങൾ സംസാരിക്കുന്നു.

ഇവിടുത്തെ പുരോഗമന യുവജന പ്രസ്ഥാനക്കാർക്കും (പുരോഗമനമില്ലാത്തവർക്കും) കണ്ടെത്താനാവാത്ത പുതിയ തലമുറക്കുട്ടികൾ പെട്ടെന്ന് ഇപ്പോൾ എവിടെ നിന്നുവന്നു?അവരിവിടെത്തന്നെ ഉണ്ടായിരുന്നു, പുനഃപരീക്ഷകൾ എഴുതുന്നുണ്ടായിരുന്നു, തൊഴിലില്ലാതെ അലയുന്നുണ്ടായിരുന്നു. ഇവരോട് സംസാരിക്കാനുള്ള ഭാഷ പക്ഷേ, നമ്മുടെ രാഷ്‌ട്രീയപ്രസ്ഥാനങ്ങൾക്ക് വശമില്ലാതെ പോയി

‘‘വേണ്ടിവന്നാൽ പ്രധാനമന്ത്രി നരേന്ദ്ര മോദിയുടെ രാജിയും ആവശ്യപ്പെടുമെന്ന അടുത്ത വാചകത്തിലാണ് ഫാഷിസ്റ്റ് ഭരണകൂടം അതിന്റെ ശരിയായ പ്രതിസന്ധി തിരിച്ചറിയുന്നത്. മുഖമില്ലാത്ത മനുഷ്യർ അവരുടെ രാഷ്ട്രീയ സാധ്യതകൾ കണ്ടെത്തുമ്പോൾ ഒരു സമൂഹം അതിന്റെ ജനാധിപത്യ ആവാസവ്യവസ്ഥയെ സൃഷ്ടിക്കാൻ തുടങ്ങുന്നു. അപ്പോൾ ഫാഷിസ്റ്റുകൾക്ക് ശ്വാസം മുട്ടിത്തുടങ്ങും. അത്തരത്തിലൊരു സംഘർഷം രൂപംകൊണ്ടുകഴിഞ്ഞിരിക്കുന്നു’’- പ്രമോദ് പുഴങ്കര എഴുതുന്നു.