Voice of Tibet

རྒྱ་ནག་གི་སྲིད་འཛིན་ཞི་ཅན་ཕིང་སང་ཉིན་ཕྱི་ཚེས་ ༡༢ ཉིན་རྒྱ་གར་གྱི་རྒྱལ་ས་ལྡི་ལིར་ BRICS ཚོགས་ཆེན་ཆེད་དུ་འབྱོར་གྱི་ཡོད་པ་དང་བསྟུན།  དེ་རིང་བོད་ཀྱི་གཞོན་ནུ་ལྷན་ཚོགས་ཀྱི་ངོས་ནས་ལྡི་ལིའི་ནང་ཞི་ཅིན་ཕིང་ལ་ངོ་རྒོལ་གྱི་ལས་འགུལ་ཤུགས་ཆེ་སྤེལ་བ་མ་ཟད། བོད་རང་བཙན་སློབ་ཕྲུག་ཚོགས་པའི་ལས་འགུལ་བ་ཁག་གཅིག་དང་བོད་མིའི་གསར་འགོད་པ་ཁག་གཅིག་སྐོར་སྲུང་བས་འཛིན་བཟུང་བཀག་ཉར་བྱས་པའི་གནས་ཚུལ་ཡང་ཐོན་འདུག དེ་ཡང་དེ་རིང་ནས་བཟུང་ཉིན་གྲངས་གསུམ་གྱི་རིང་རྒྱལ་ས་ལྡི་ལིའི་ནང་རྒྱལ་སྤྱིའི་ BRICS ཚོགས་ཆེན་དེ་དབུ་འཛུགས་གནང་གི་ཡོད་པ་ལྟར།   རྒྱལ་ས་ལྡི་ལིའི་གནམ་ཐང་ནས་ཚོགས་འདུ་འཚོགས་ཡུལ་གྱི་ས་གནས་གཡས་གཡོན་བར་ཉེན་སྲུང་གྱི་དམ་དྲག་ཤུགས་ཆེན་གནང་ཡོད་པར་ལྟོས་མེད།   བོད་ཀྱི་གཞོན་ནུ་ལྷན་ཚོགས་ཀྱི་དབུས་ས་གཉིས་དང་ལྡི་ལི་ས་གནས་ཀྱི་མང་ཚོགས་བཅས་མི་གྲངས་ ༢༠༠ བརྒལ་བས་དེ་རིང་སྔ་དྲོ་བོད་སྒར་བསམ་ཡས་གླིང་ནས་དབུ་འཛུགས་ཀྱིས་ Punjab Basti རྒྱབ་ངོས་ཀྱི་ལམ་གཞུང་དེར་ངོ་རྒོལ་སྐད་འབོད་ཀྱི་ལས་འགུལ་སྤེལ་ཡོད་པ་དང་།  གཞོན་ནུ་ལྷན་ཚོགས་ཀྱི་ཚོགས་གཞོན་བཀྲ་ཤིས་རྟགས་རྒྱས་ལགས་ཀྱིས་ཁོང་ཚོའི་ངོས་ནས་རྒྱ་ནག་གཞུང་གིས་བོད་མིར་འཛིན་པའི་སྲིད་བྱུས་དང་།   ལྷག་པར་ད་རེས་སྲིད་འཛིན་ཞི་ཅིན་ཕིང་ཚོགས་ཆེན་དེར་འབྱོར་གྱི་ཡོད་པར་མཐའ་གཅིག་ཏུ་ངོ་རྒོལ་ཡོད་ཅེས་གསུང་གི་འདུག  ད་རེས་ཀྱི་ BRICS ཚོགས་ཆེན་དང་བསྟུན་ནས།   ཨུ་རུ་སུའི་སྲིད་འཛིན་ Putin དེ་རིང་ཐོ་རེངས་རྒྱལ་ས་ལྡི་ལིར་འབྱོར་ཟིན་ཡོད་ཀྱང་།  རྒྱ་ནག་གི་སྲིད་འཛིན་སང་ཉིན་འབྱོར་འཆར་ཡོད་པ་རེད།   ཚོགས་ཆེན་དེ་དང་བསྟུན་ཏེ།   རྒྱ་གར་གཞུང་གི་ངོས་ནས་རྒྱལ་ཁབ་ཀྱི་ཆེ་མཐོང་ལ་ལྡི་ལིའི་ནང་བདེ་འཇགས་ཀྱི་རྙོག་གླེང་རིགས་མི་ཡོང་བའི་ཆེད།   སློབ་གྲྭ་ཁག་དང་གཞུང་སྒེར་ལས་ཁུངས་ཁག་དེ་རིང་ཉིན་གཅིག་རིང་གུང་སེང་བཏང་བ་མ་ཟད།   ལྡི་ལིའི་ནང་ཉེན་རྟོག་སྐོར་སྲུང་བ་དང་དམག་མི་ ༣༥༠༠༠ ལྷག་ཞིག་འགྲེམས་འཇོག་གནང་ཡོད་པ་རེད།  འོན་ཀྱང་། བོད་ཀྱི་གཞོན་ནུ་ལྷན་ཚོགས་ཀྱི་ས་གནས་ཁག་ ༢༠ ལྷག་ནས་ཕེབས་པའི་ལས་འགུལ་བ་ཚོས་ཚོར་ཤུགས་ཆེན་པའི་ཐོག   རྒྱ་ནག་གིས་བོད་མིར་འཛིན་པའི་སྲིད་བྱུས་ལ་ངོ་རྒོལ་དང་འདོད་བློ་མེད་པའི་རྣམ་འགྱུར་ཤུགས་ཆེན་པོ་བསྟན་ཡོད།   དེ་རིང་གི་རྒྱལ་ས་ལྡི་ལིའི་གཞོན་ནུའི་ལས་འགུལ་དེར།  བོད་མིའི་སྒྲིག་འཛུགས་ཀྱི་བདེ་སྲུང་བཀའ་བློན་ཟུར་པ་རྒྱ་རི་སྒྲོལ་མ་མཆོག་གི་དབུས་པའི་ཚོགས་གཞོན་ཟུར་པ་ཨ་ཅརྱ་ཡེ་ཤེས་ཕུན་ཚོགས་ལགས་དང་། གཞན་ཡང་སྤྱི་འཐུས་ཁག་གཅིག་ནས་ཀྱང་ལྷན་བཞུགས་གནང་སོང་བ་དང་།  གནས་ཚུལ་ཤེས་རྟོགས་བྱུང་བ་གཞིར་བཟུང་བྱས་ན།  རྒྱལ་ས་ལྡི་ལིའི་ནང་ཉེན་སྲུང་ཀྱི་དམ་དྲག་ཆེན་པོ་ཡོད་པ་དེའི་འོག  དེ་རིང་སྔ་དྲོ་བོད་རང་བཙན་སློབ་ཕྲུག་ཚོགས་པའི་ལས་འགུལ་བ་དང་བོད་མི་གསར་འགོད་པ་ཁག་གཅིག་བཅས་ལྡི་ལི་ས་གནས་སྐོར་སྲུང་བས་འཛིན་བཟུང་བྱས་འདུག The post རྒྱལ་ས་ལྡི་ལིའི་ནང་རྒྱ་ནག་གི་སྲིད་འཛིན་ཞི་ཅིན་ཕིང་ལ་ངོ་རྒོལ། appeared first on vot.

འདི་ལོར་རྒྱ་གར་ལྷོ་ཕྱོགས་ཀར་ན་ཊ་ཀ་མངའ་སྡེའི་ Chamarajanagara ཅམརཱ་ཇཱ་ནཱ་སྒར་རྫོང་ནང་དུ་ཆར་ཆུ་དུས་སུ་མ་བབས་པའི་རྐྱེན་གྱིས། ས་གནས་ཡུལ་མི་དང་ལྷག་པར་དུ་ཀོ་ལེ་གྷལ་དོན་ལྡན་གླིང་གི་སོ་ནམ་ཞིང་ལས་གཉེར་མཁན་གཞིས་མི་རྣམས་ལ་དཀའ་ངལ་འཕྲད་བཞིན་འདུག འདི་ག་རླུང་འཕྲིན་ཁང་ནས་དོན་ལྡན་གླིང་ས་གནས་འགོ་འཛིན་ཐུབ་བསྟན་ཚེ་རིང་ལགས་སུ་བཅར་འདྲི་ཞུས་སྐབས། ཁོང་གིས་ཀོ་ལེ་གྷལ་དོན་ལྡན་གླིང་ཁུལ་དུ་འདས་པའི་ལོ་ངོ་ལྔ་ཙམ་ནས་ཆར་ཆུ་དུས་ཐོག་མ་བབས་པའི་དཀའ་ངལ་འཕྲད་བཞིན་ཡོད་ཀྱང་། སྔ་ལོའི་ནང་ཆར་ཆུ་དུས་ཐོག་བབས་ཡོད་པ་དང་། ད་ལོ་སླར་ཡང་ཆར་ཆུ་མེད་པའི་དཀའ་ངལ་འོག །དུས་རྒྱུན་ཕྱི་ཟླ་ ༧ ཚེས་ ༡༥ ཡས་མས་ནས་ཨ་ཤོམ་འདེབས་ལས་འགོ་འཛུགས་བྱེད་ཀྱི་ཡོད་པ་མ་ཟད། ཕྱི་ཟླ་ ༨ པའི་ཚེས་ཤར་ནས་ཞིང་ལས་འདེབས་འཛུགས་གནང་གི་ཡོད་སྟབས། ཕྱི་ཟླ་ ༨ པའི་ནང་དུའང་ཆར་པ་འབབ་མེད་པའི་དཀའ་ངལ་ཕྲད་དེ་ས་ཞིང་སྟོང་པར་ལུས་ཡོད་པ་འགྲེལ་བརྗོད་གནང་སོང་། ཁོང་གིས་ད་དུང་གཞིས་ཆགས་ཀྱི་གྲོང་སྡེ་སྟོད་ཕྱོགས་རི་མཚམས་སུ་ཆར་པ་བབས་ཏེ། ཁུལ་དེའི་གཞིས་མི་རྣམ་པས་ས་ཞིང་འདེབས་ལས་འགོ་འཛུགས་གནང་ཡོད་པ་གསུངས་སོང་། མ་ཟད་རྫོང་གི་ཡུལ་མི་རྣམས་ལ་དེ་འབྲེལ་གནས་སྟངས་འོག་འཐུང་ཆུའི་དཀའ་ངལ་ཆེན་པོ་འཕྲད་བཞིན་ཡོད་པ་དང་། གཞིས་ཆགས་ལ་ད་ལྟའི་ཆར་འཐུང་ཆུའི་དཀའ་ངལ་མེད་ཀྱང་ད་དུང་ཆར་པ་མུ་མཐུད་མ་བརྒྱབ་ཚེ་འཐུང་ཆུའི་དཀའ་ངལ་འཕྲད་སྲིད་པའི་སེམས་འཚབ་མངོན་གསལ་གནང་སོང་། ལྷག་པར་གཞིས་ཆགས་ནང་ཞིང་ལས་གཉེར་མཁན་བརྒྱ་ཆ་ ༧༠ ཡོད་པ་དང་། ཉེ་བའི་ལོ་ཤས་ནང་གཞིས་ཆགས་སུ་སྟོན་ཉེས་བྱུང་བ་དང་ཆར་ཆུ་དུས་ཐོག་མ་བབས་པའི་རྐྱེན་གྱི་ས་ཞིང་སྟོང་པ་འཇོག་མཁན་ཡོད་ཅིང་། སྟོན་ཉེས་བྱུང་བའི་སྐབས་དེར་བོད་མིའི་སྒྲིག་འཛུགས་ནས་སོ་ནམ་པ་རྣམས་ལ་གུན་གསབ་ཆེད་དུ་སྔ་ལོ་ཕུད་པའི་འདས་པའི་ལོ་གསུམ་ནང་ཧི་སྒོར་འབུམ་ ༧༤༠༠༠ ཙམ་གནང་ཡོད་པ་འགྲེལ་བརྗོད་གནང་སོང་། The post ཀོ་ལེ་གྷལ་ཁུལ་དུ་ཆར་ཆུ་དུས་ཐོག་མ་བབས་པར་བོད་མི་དང་ས་གནས་ཡུལ་མིར་དཀའ་ངལ་ཇེ་ཆེར་འཕྲད་བཞིན་འདུག appeared first on vot.

ཚེ་རིང་མཐར་ཕྱིན་ལགས་ཀྱིས་རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱི་ཞག་ཞེ་དགུའི་ཉིན་རང་བཙན་གོམ་བགྲོད་ཀྱི་ལས་འགུལ་དབུ་འཛུགས་གནང་སྟེ་ད་ཆ་རྒྱ་གར་གྱི་གྲོང་ཁྱེར་ཨམ་བྷ་ལ་རུ་འབྱོར་འདུག དེ་ཡང་ཟླ་ ༧ ཚེས་ ༢ ཉིན་ཨ་རི་ནིའུ་ཡོག་འཛམ་གླིང་མཉམ་འབྲེལ་རྒྱལ་ཚོགས་ཀྱི་མདུན་དུ་རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱིས་བོད་བསྟན་སྲིད་མི་རིགས་ཀྱི་ཆེད་དུ་རང་ལུས་མེར་བསྲེགས་བཏང་བ་དང་བསྟུན། འཛམ་གླིང་ས་ཕྱོགས་གང་སར་གནས་པའི་བོད་མི་དང་བོད་དོན་རྒྱབ་སྐྱོར་བ་རྣམས་ཀྱི་ལས་འགུལ་འདྲ་མིན་སྤེལ་བའི་ཁྲོད། དཔའ་བོ་དམ་པ་ཁོང་གི་ཞག་ཞེ་དགུའི་ཉིན་རྡ་རམ་ས་ལའི་ས་གནས་བོད་ཀྱི་གཞོན་ནུ་ལྷན་ཚོགས་ཀྱི་དྲུང་ཆེ་ཚེ་རིང་མཐར་ཕྱིན་ལགས་ཀྱིས་རྡ་རམ་ས་ལའི་ཉེན་རྟོག་ལས་ཁུངས་ཀྱི་ཐང་ཆེན་ནས་རྒྱ་གར་གྱི་རྒྱལ་ས་ལྡི་ལི་བར་རང་བཙན་གོམ་བགྲོད་ཅེས་པའི་ལས་འགུལ་ཞིག་དབུ་འཛུགས་གནང་ཡོད་ཅིང་། དེ་རིང་ཉིན་གྲངས་ ༢༡ པ་དེ་ཆགས་ཀྱི་འདུག འདི་གའི་གསར་འགོད་པས་ཚེ་རིང་མཐར་ཕྱིན་ལགས་སུ་ལྡི་ལི་བར་གྱི་གོམ་བགྲོད་དབུ་འཛུགས་གནང་ནས་ཉིན་ ༢༡ སོང་བའི་མཚམས་འདིར་བོད་ཀྱི་གནད་དོན་དང་འབྲེལ་ཏེ་སེམས་ཚོར་ཇི་ཡོད་བཀའ་འདྲི་ཞུ་སྐབས། རྒྱ་ནག་གཞུང་གི་སྡུག་རྩུབ་སྲིད་བྱུས་ཇེ་སྡུག་ཏུ་མ་གཏོགས་འགྲོ་ཡས་མེད་སྟབས་ཁོང་སྒེར་ངོས་ནས་རྒྱ་གཞུང་ལ་ཡིད་ཆེས་དང་རེ་བ་སོགས་ཡོངས་སུ་དོར་ཟིན་པ་དང་། ད་ལྟའི་ཆར་བོད་རང་བཙན་སླད་གོམ་པ་མདུན་སྤོད་བྱེད་ན་མ་མཏོགས་གཞན་ཐབས་ཤེས་རྩ་བ་ནས་མེད་པ་གསུང་གི་འདུག སྤྱིར་ཚེ་རིང་མཐར་ཕྱིན་ལགས་ཀྱི་གོམ་བགྲོད་ཁྲོད་ཁོང་ལ་དཀའ་ངལ་ཆུང་ཚགས་རིགས་ཕྲད་ཡོད་ཀྱང་། དཔའ་བོ་བློ་དགའ་རང་བཙན་ལགས་ཀྱིས་གཙོས་བོད་མི་ ༡༧༠ ལྷག་གི་རང་གི་གཅེས་པའི་ལུས་སྲོག་བློས་གཏོང་གནང་ཡོད་པ་རྣམས་རྗེས་སུ་དྲན་པའི་ཐོག་གོམ་བགྲོད་སྐབས་སེམས་ཤུགས་ཆགས་པའམ་དཀའ་ངལ་ཆེན་པོ་ཕྲད་པ་གང་ཡང་བྱུང་མེད་སྐོར་འགྲེལ་བརྗོད་གནང་སོང་བ་མ་ཟད། གོམ་བགྲོད་གནང་བའི་སྐབས་ས་གནས་ཀྱི་འགོ་ཁྲིད་འདྲ་མིན་དང་ཐུག་འཕྲད་ཀྱིས་བོད་ཀྱི་གནད་དོན་ངོ་སྤྲོད་གང་ཐུབ་གནང་ཡོད་སྐོར་གསུང་བ་དང་འབྲེལ། རྒྱ་གར་མང་ཚོགས་ཁྲོད་ནས་བོད་ཀྱི་གནད་དོན་སྤྱི་དང་ལྷག་པར་དུ་ཁོང་གིས་ཕྱག་ཏུ་བསྣམས་པའི་བོད་ཀྱི་རྒྱལ་དར་དང་འབྲེལ་བའི་དྲི་བ་མང་དག་ཅིག་ཡོད་པ་གསུང་གི་འདུག རྩ་བའི་ཚེ་རིང་མཐར་ཕྱིན་ལགས་ཀྱིས་རང་བཙན་གོམ་བགྲོད་ཅེས་པའི་ལས་འགུལ་དེ་བཞིན་ཟླ་ ༨ པའི་ཚེས་ ༢༠ རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱིས་སྐུ་ལུས་མེར་བསྲེགས་བཏང་ནས་ཞག་ཞེ་དགུ་ཧྲིལ་པོ་འཁོར་བའི་ཉིན་མོ་དང་བསྟུན་ནས་འགོ་འཛུགས་གནང་ཞིང་།  དེ་རིང་བར་ཁྱིན་ཉིན་གྲངས་ ༢༡ ཕྱིན་ཡོད་པ་དང་ཟླ་འདིའི་ཟླ་མཇུག་ཏུ་རྒྱ་གར་གྱི་རྒྱལ་ས་ལྡི་ལིར་འབྱོར་གྱི་ཡོད་པ་དང་། ལྡི་ལིའི་ནང་རྒྱ་གར་གྱི་མཐོ་སློབ་ཁག་གི་སློབ་ཕྲུག་རྣམ་པ་དང་གཞུང་ཚབ་ཁག་སོགས་ལ་ཆེད་བསྐྱོད་ཀྱིས་བོད་ཀྱི་གནད་དོན་ངོ་སྤྲོད་དང་དཔའ་བོ་བློ་དགའ་རང་བཙན་ལགས་ཀྱིས་སྐུ་ལུར་མེར་བསྲེགས་བཏང་བའི་གནས་ཚུལ་སོགས་ངོ་སྤྲོད་དང་ཁྱབ་སྤེལ་གནང་བའི་རྗེས་སུ་གཞི་ནས་ལྡི་ལི་བོད་སྒར་བསམ་ཡས་གླིང་དུ་ལས་འགུལ་མཇུག་སྒྲིལ་གནང་རྒྱུ་ཡིན་པ་རེད་འདུག The post རང་བཙན་གོམ་བགྲོད་ལས་འགུལ་བ་ཚེ་རིང་མཐར་ཕྱིན་ལགས་རྒྱ་གར་གྱི་གྲོང་ཁྱེར་ཨམ་བྷ་ལ་རུ་འབྱོར་འདུག appeared first on vot.

རྒྱ་རིགས་མང་གཙོ་དོན་གཉེར་བས་བོད་དོན་སེལ་ཐབས་དང་རྒྱ་ནག་ནང་མང་གཙོ་འཛུགས་སྐྲུན་གྱི་དམིགས་ཡུལ་ཅི་ཞིག་ཡིན་རུང་། གོམ་པ་དང་པོ་ནི་རྒྱ་ནག་དམར་ཤོག་ཚོགས་པའི་སྲིད་དབང་ལ་བཅོས་བསྒྱུར་བྱེད་རྒྱུ་དེ་ཡིན་པ་གསུངས་སོང་། ཨོ་གླིང་དུ་གནས་བཞུགས་ Chin Jin ལགས་ནི་རྒྱ་ནག་གི་རིག་གནས་གསར་བརྗེ་དང་མདུན་བསྐྱོད་ཆེན་མོ་བཅས་ཀྱི་གོད་ཆགས་དངོས་སུ་མཐོང་ཐོས་མྱོང་མཁན་ཞིག་དང་། ཕྱི་ལོ་ ༡༩༨༩ ལོའི་པེ་ཅིང་གནམ་སྡེ་སྒོ་མོ་ཆེའི་མི་གསོད་ཁྲག་སྦྱོར་གྱི་དོན་རྐྱེན་རྗེས་རྒྱ་ནག་ནང་མང་གཙོ་རྩོད་ཐབས་སླད་གསར་བཙུགས་གནང་བའི་ Federation for a Democratic China ཞེས་པའི་ཚོགས་པའི་རྒྱལ་ཡོངས་ཚོགས་གཙོ་ཡིན་པ་རེད། ཁོང་ཉེ་ལམ་བཞུགས་སྒར་དུ་ཕེབས་པ་དང་བསྟུན་འདི་ག་རླུང་འཕྲིན་ཁང་ནས་དམིགས་བསལ་བཅར་འདྲིའི་ལས་རིམ་ཞིག་གི་ཐོག་བོད་མིའི་རང་དབང་འཐབ་རྩོད་དང་རྒྱ་ནག་ནང་མང་གཙོ་འཐབ་རྩོད་བཅས་ཀྱི་གནད་དོན་དང་འབྲེལ་ནས་བཀའ་འདྲི་ཁག་གཅིག་ཞུ་སྐབས། ཁོང་གིས་བོད་རྒྱའི་དཀའ་རྙོག་སེལ་ཐབས་དང་རྒྱ་ནག་མང་གཙོ་ཅན་དུ་བསྒྱུར་རྒྱུ་བཅས་དམིགས་ཡུལ་ཅི་ཞིག་ཡིན་རུང་། གོམ་པ་དང་པོ་ནི་རྒྱ་ནག་དམར་ཤོག་ཚོགས་པའི་སྲིད་དབང་ལ་བཅོས་བསྒྱུར་བྱེད་རྒྱུ་དེ་ཡིན་པ་གསུངས་སོང་། ཁོང་གིས་ད་དུང་དེང་རབས་རྒྱ་ནག་གི་དམངས་གཙོ་ལས་འགུལ་དང་བོད་དོན་ལས་འགུལ་ནི་རང་བཞིན་གྱི་མཐུན་གྲོགས་ཤིག་ཡིན་ཞིང་། བོད་མི་དང་རྒྱ་ནག་གི་དམངས་གཙོ་དོན་གཉེར་བ་ཚོས་དགྲ་ཕྱོགས་གཅིག་མཚུངས་ཡིན་པ་དེ་ནི་རྒྱ་དམར་སྲིད་གཞུང་ཡིན་པ་གསུངས་ཏེ། རྒྱ་ནག་དམར་ཤོག་ཚོགས་པའི་གནད་དོན་ཐག་མ་གཅོད་བར་དུ། རྒྱ་ནག་གི་དཀའ་ངལ་སེལ་མི་ཐུབ་ལ། བོད་ཀྱི་གནད་དོན་དེ་བས་ཀྱང་ཐག་གཅོད་ཐུབ་རྒྱུ་མིན་པ་གསུངས་སོང་། སྤྱིར་ Chin Jin ལགས་ནི་ཉེ་ལམ་བོད་མིའི་སྒྲིག་འཛུགས་ངོས་ནས་བཞུགས་སྒར་དུ་མང་གཙོའི་རྒྱ་ནག་དང་བོད་ཀྱི་མ་འོངས་པའི་གླེང་སྟེགས་ཞེས་ཉིན་གྲངས་གསུམ་རིང་གི་ཚོགས་འདུ་ཞིག་གོ་སྒྲིག་གནང་ཡོད་པ་དེའི་ཐོག་ལྷན་ཞུགས་སླད་ཕེབས་ཡོད་པ་རེད། ཚོགས་འདུ་དེའི་རིང་ཚོགས་བཅར་བ་རྣམས་ཀྱིས་ཚོགས་འདུའི་ཉིན་མཐའ་མའི་ཐོག ༸རྒྱལ་བའི་ཡང་སྲིད་ཀྱི་གནད་དོན་ཐད་༸གོང་ས་༸སྐྱབས་མགོན་ཆེན་པོ་མཆོག་མ་གཏོགས་རྒྱ་ནག་ལ་བདག་དབང་རྩ་བ་ནས་མེད་པ་དང་། འཚེ་མེད་ཞི་བའི་ཐབས་ལམ་ལ་མུ་མཐུད་འཇུག་སྐྱོང་གནང་རྒྱུ། མང་གཙོའི་དམིགས་ཡུལ་བསྒྲུབ་པར་བོད་རྒྱའི་དབར་ཐུན་མོང་གྱི་གཞི་རྟེན་འཚོལ་རྒྱུ། དེ་བཞིན་རྒྱ་རིགས་སྤྱི་ཚོགས་ཁྲོད་བོད་ཀྱི་གནད་དོན་དང་བོད་དོན་འཐབ་རྩོད། དབུ་མའི་ལམ་གྱི་སྲིད་བྱུས་བཅས་ཀྱི་སྐོར་ལ་གོ་རྟོགས་གང་མང་སྤེལ་རྒྱུ་དང་ལྷག་པར་འདི་ལོ་རྒྱ་ནག་གིས་ལག་བསྟར་བྱེད་འགོ་བཙུགས་པའི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་དེ་ཉིན་འཕྲལ་མར་ཕྱིར་འཐེན་དགོས་པ་སོགས་དོན་ཚན་ལྔ་ཅན་གྱི་བསྒྲགས་གཏམ་ཞིག་སྤེལ་ཡོད་པ་རེད། ཚོགས་འདུ་དེའི་ཐོག་ཕེབས་པའི་ Institute for China’s Democratic Transition ཞེས་རྒྱ་ནག་གི་དམངས་གཙོའི་འཕོ་འགྱུར་གྱི་ལྟེ་གནས་ཁང་གི་འགན་འཛིན་དང་། དམངས་གཙོའི་རྒྱ་ནག་དུས་དེབ་གྱི་རྩོམ་སྒྲིག་འགན་འཛིན་ Wang Tiancheng ལགས་ཀྱིས་འདི་ག་རླུང་འཕྲིན་ཁང་ལ་། རྒྱ་གཞུང་གིས་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་འདི་ལག་བསྟར་བྱ་རྒྱུའི་ཐག་གཅོད་བྱས་པ་ནི། རྩ་བ་ནས་བརྟག་དཔྱད་མ་འདང་བའི་ཐག་གཅོད་ཅིག་ཡིན་ཞིང་། དེས་སྲིད་གཞུང་དེའི་ནང་ཁུལ་དུ་ཉིན་རེ་བཞིན་ཉེན་ཁའི་ཚོར་བ་ཇེ་ཆེར་འགྲོ་བཞིན་པ་མཚོན་པ་དང་། དེ་དག་གིས་རྒྱལ་ཁབ་གཅིག་སྒྱུར་ཞེས་པར་བརྟེན་ནས་མི་རིགས་བསྲེས་བའི་ཐབས་ལམ་སྤྱད་དེ་སྲིད་དབང་བཟུང་འདོད་བྱེད་ཀྱི་ཡོད། འོན་ཀྱང་ཐབས་ཤེས་འདི་ནི་ཧ་ཅང་ནོར་འཁྲུལ་ཅན་ཞིག་རེད་ཅེས་གསུངས་སོང་། ཁོང་གིས་ད་དུང་རྒྱ་ནག་གི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཡིག་ཟེར་བ་དེའི་དམིགས་ཡུལ་ནི་བོད་མི་དང་གྲངས་ཉུང་མི་རིགས་གཞན་རྣམས་རིམ་བཞིན་རྒྱ་རིགས་ཅན་དུ་བསྒྱུར་རྒྱུ་ཡིན་པ་ནི་ཧ་ཅང་གསལ་པོ་ཡིན་པ་མངོན་གསལ་དང་སྦྲགས། ཁྲིམས་ཡིག་དེས་བོད་ཀྱི་ཆོས་དང་། རིག་གཞུང་། སྐད་ཡིག་བཅས་ལ་ཤུགས་རྐྱེན་ཚབས་ཆེན་ཞིག་འཕོག་སྲིད་པ་གསུངས་བ་མ་ཟད། ལོ་རྒྱུས་ལ་ཕྱིར་བལྟས་བྱས་ན་མི་རིགས་ཤིག་ལ་བཙན་དབང་གིས་རང་གི་ཆོས་དང་། རིག་གཞུང་། […] The post བོད་རྒྱའི་དཀའ་རྙོག་སེལ་བར་རྒྱ་ནག་མང་གཙོ་བཅོས་བསྒྱུར་བྱ་གལ་ཡིན་པ་གསུངས་སོང་། appeared first on vot.

སུད་སི་གནས་བཞུགས་བོད་རིགས་རྐང་སྤོལ་རྩེད་འགྲན་པ་ Tsawa Cheveyo ལགས་ཀྱིས། ཡོ་རོབ་རྐང་སྤོལ་རྩེད་འགྲན་ཆེ་ཤོས་ UEFA Champions League ནང་ཆེས་ཐོག་མའི་མཉམ་ཞུགས་ཀྱིས་རྩེད་འགྲན་དང་པོ་དེ་རྩེད་གནང་འདུག་པ་དང་། ཁོང་ནི་རྩེད་འགྲན་ནང་མཉམ་ཞུགས་གནང་མཁན་བོད་པ་ཐོག་མ་དེ་ཆགས་འདུག དེ་ཡང་ཁ་སང་ནས་ཡོ་རོབ་ནང་གི་རྐང་སྤོལ་རྩེད་འགྲན་གྲགས་ཆེ་ཤོས་ UEFA Champions League དངོས་སུ་འགོ་འཛུགས་ཀྱིས་ཁྱོན་རྐང་སྤོལ་རུ་ཁག་ ༣༦ བར་རྩེད་འགྲན་གནང་གི་ཡོད་པ་དང་། རྩེད་འགྲན་གྱི་ཉིན་དང་པོའི་ནང་བོད་རིགས་རྐང་སྤོལ་རྩེད་འགྲན་པ་ Tsawa Cheveyo ལགས་ཀྱི་རུ་ཁག་ Club Brugge དང་ Aston Villa གཉིས་དབར་རྩེད་འགྲན་གནང་ཡོད་ཅིང་། རྩེད་འགྲན་དེའི་ཁྲོད་ Club Brugge ལ་སྤོ་ལོ་ ༢ དང་ Aston Villa ལ་སྤོ་ལོ་ ༣ བཅས་ཀྱི་ཐོག་ནས་ Club Brugge རུ་ཁག་ལ་སྤོ་ལོ་གཅིག་གི་ཕམ་ཉེས་སུ་བྱུང་འདུག རྩེད་འགྲན་སྐབས་བོད་རིགས་རྩེད་འགྲན་པ་ Tsawa Cheveyo ལགས་ཀྱི་སྟོད་ཐུང་ཨང་གྲངས་ ༡༦ གྱོན་ཏེ། རྩེད་འགྲན་གྱི་སྐར་མ་ ༧༦ ཐོག་རྩེད་ཐང་དུ་ཐོན་ནས་རྩེད་མོ་རྩེད་འགོ་བཙུགས་འདུག་པ་དང་ཁྱོན་སྐར་མ་ ༡༤ རིང་རྩེད་མོའི་ནང་མཉམ་ཞུགས་བྱེད་རྒྱུ་བྱུང་འདུག་པ་མ་ཟད། སྤྱི་ཚོགས་དྲྭ་ལམ་ཁག་ཏུ་བོད་རིགས་མང་པོས་ Tsawa Cheveyo […] The post Tsawa Cheveyo ལགས་ཡོ་རོབ་རྐང་སྤོལ་རྩེད་འགྲན་ཆེ་ཤོས་ Champions League ནང་རྩེད་འགྲན་གནང་མཁན་བོད་པ་ཐོག་མ་དེ་ཆགས་འདུག appeared first on vot.

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་འདས་པའི་ཟླ་གཉིས་ལྷག་རིང་ལ་དྭགས་སུ་སྐུ་ལྷོད་བཞུགས་སླད་ཆིབས་བསྒྱུར་མཛད་ཡོད་པར་བརྟེན།  དུས་རྒྱུན་ཡུལ་སྐོར་སྤྲོ་འཆམ་པ་ཕོན་ཆེན་འདུ་འཛོམས་བྱུང་སའི་བཞུགས་སྒར་དེ་བཞིན་གནས་སྐབས་སྟོང་ལྷང་ལྷང་དུ་གྱུར་ཡོད་པ་རེད།  འོན་ཀྱང་ཉེ་ལམ་ཕྱི་ཟླ་ ༩ ཚེས་ ༤ ཉིན་མགོན་པོ་༸གང་ཉིད་མཆོག་བཞུགས་སྒར་དུ་ཕྱིར་ཕེབས་མཛད་ཡོད་པ་དང་འབྲེལ།  ཁ་སང་ཕྱི་ཚེས་ ༧ ཉིན་ནས་བཟུང་༸གོང་ས་མཆོག་གིས་ཐུགས་བརྩེ་བ་ཆེན་པོས་དད་ལྡན་མཇལ་བཅར་བ་ཚོར་མང་མཇལ་སྩལ་གནང་དབུ་འཛུགས་མཛད་ཡོད་སྟབས།  སླར་ཡང་བཞུགས་སྒར་དུ་འཛམ་གླིང་ཡུལ་གྲུ་གང་ས་ནས་དད་ལྡན་མང་ཚོགས་མཇལ་ཁར་བཅར་མཁན་རིམ་པས་ཇེ་མང་སླེབ་བཞིན་པའི་ཁྲོད།  དེ་རིང་ཕྱི་ཚེས་ ༨ ཉིན་གྱི་སྔ་དྲོ་བཞུགས་སྒར་༸རྒྱལ་བའི་ཕོ་བྲང་དུ་མཇལ་ཁ་ཞུ་མཁན་ཁོངས་སུ་ཨ་རི་གཙོས་པའི་བཙན་བྱོལ་བོད་མིའི་གཞིས་ཆགས་པོན་ཊ་ཆོལ་གསུམ་གྱི་ལོ་ན་ ༦༥ ཡན་གྱི་བགྲེས་སོང་ ༣༨ ཙམ་དང་།  འབྲས་ལྗོངས་མི་རིགས་ཀྱི་རུ་ཁག་གཅིག  དེ་བཞིན་རྒྱ་གར་བ་དང་ཕྱི་རྒྱལ་བ་ཁག་གཅིག་བཅས་ཁྱོན་མཇལ་བཅར་བ་ ༡༢༠ སྐོར་ལ་མང་མཇལ་སྩལ་གནང་མཛད་ཡོད་པ་རེད།   སྐབས་དེར་འདི་ག་རླུང་འཕྲིན་ཁང་གིས་དད་ལྡན་མཇལ་བཅར་བ་ཁག་གཅིག་ལ་ཁོང་རྣམ་པའི་སེམས་ཚོར་སོགས་དང་འབྲེལ་ཏེ་བཅར་འདྲི་ཁག་གཅིག་ཞུ་སྐབས་ཁོང་རྣམས་ཀྱིས།  དེ་རིང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཇལ་ཁ་ཞུ་རྒྱུ་བྱུང་བར་ཤིན་ཏུ་ནས་སྐལ་པ་བཟང་པོ་དང་སྨོན་འདུན་གྲུབ་སོང་བསམ་པའི་ཚོར་བ་དམིགས་བསལ་ཞིག་བྱུང་སོང་བ་འགྲེལ་བརྗོད་དང་འབྲེལ།  བོད་མི་ཚང་མས་༸མགོན་པོ་མཆོག་གི་ཐུགས་རྗེ་བཀའ་དྲིན་དྲན་པའི་ཐོག་ནས་སྤྱི་ཚོགས་ནང་ཁུལ་མཐུན་པོ་གནང་དགོས་གལ་དང་།  གཉན་འཕྲང་ཅན་གྱི་ད་ལྟའི་དུས་ཚོད་འདིར་བོད་མི་རིགས་ཀྱི་སྐད་ཡིག་དང་རིག་གཞུང་ཐོག་ཚང་མས་གང་ཐུབ་ཐུགས་འཁུར་བཞེས་དགོས་པ་མ་ཟད།  གཞོན་སྐྱེས་ཁྲོད་ཆང་རག་དང་དུག་རྫས་ཀྱི་ངན་གོམས་བཀག་འགོག་སླད་ཕན་ཚུན་ཁ་ཏཱ་བསླབ་བྱ་བསྐྱོན་དགོས་གལ་ཡིན་པ་གསུངས་སོང་།  རྩ་བའི་༸གོང་ས་༸སྐྱབས་མགོན་ཆེན་པོ་མཆོག་ཟླ་འདིའི་ཚེས་ ༤ ཉིན་གྱི་སྔ་དྲོ་བཞུགས་སྒར་༸རྒྱལ་བའི་ཕོ་བྲང་དུ་ཞབས་སོར་བདེ་བར་འཁོད་གནང་མཛད་མ་ཐག  ཕྱི་ཉིན་ཕྱི་ཚེས་ ༥ ཉིན་མགོན་པོ་༸གང་ཉིད་མཆོིག་ནས་ཉེ་ལམ་བོད་མིའི་སྒྲིག་འཛུགས་ཀྱི་གོ་སྒྲིག་འོག་མང་གཙོའི་རྒྱ་ནག་དང་བོད་ཀྱི་མ་འོངས་གླེང་སྟེགས་ཞེས་པའི་ཚོགས་འདུ་ཞིག་སྐོང་འཚོགས་གནང་ཡོད་པ་དེའི་ནང་མཉམ་ཞུགས་གནང་མཁན་རྒྱ་རིགས་མང་གཙོ་དོན་གཉེར་བ་ ༢༥ ཙམ་ལའང་དམིགས་བསལ་གྱི་གཟིམ་ཆུང་མཇལ་ཁ་སྩལ་གནང་མཛད་ཡོད་པ་རེད།  The post ༸གོང་ས་མཆོག་ཕྱིར་ཕེབས་མཛད་པ་དང་བསྟུན་བཞུགས་སྒར་དུ་དད་ལྡན་མཇལ་བཅར་བ་ཇེ་མང་སླེབ་བཞིན་པ། appeared first on vot.

བཞུགས་སྒར་རྡ་རམ་ས་ལར་རྟེན་གཞི་བྱས་པའི་དབུས་གཙང་ཆོལ་ཁ་དང་།  མདོ་སྟོད།  མདོ་སྨད།  བོད་ཀྱི་བུད་མེད་ལྷན་ཚོགས།  རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་བཅས་གཞུང་འབྲེལ་མ་ཡིན་པའི་ཚོགས་པ་ལྔའི་ངོས་ནས།   རིང་མིན་རྒྱལ་ས་ལྡི་ལིར་འཚོག་རྒྱུའི་རྒྱལ་སྤྱིའི་ BRICS གྱི་ཚོགས་འདུར་རྒྱ་ནག་གི་སྲིད་འཛིན་ཞི་ཅིང་ཕིང་ཡང་མཉམ་ཞུགས་བྱ་འཆར་ཡོད་པ་དང་བསྟུན།   དེ་རིང་རྒྱ་གར་གྱི་རྒྱལ་ས་ལྡི་ལིའི་ Press Club of India ནང་གསར་འགོད་ལྷན་ཚོགས་ཤིག་འདུ་སྐོང་དང་སྦྲགས།  རྒྱ་ནག་གཞུང་གི་ངོས་ནས་སྔོན་འགྲོའི་ཆ་རྐྱེན་མེད་པར་དབུ་མའི་ཐབས་ལམ་འོག་ནས་བོད་རྒྱའི་དཀའ་རྙོག་སེལ་དགོས་པ་མ་ཟད།   བོད་མིའི་ཆོས་དང་རིག་གཞུང་སྐད་ཡིག་བཅས་མི་རིགས་ཀྱི་ངོ་བོ་སྲུང་སྐྱོབ་བྱེད་པའི་རང་དབང་སྤྲོད་དགོས་པ་སོགས་ཀྱི་དགོས་འདུན་བཏོན་སོང་། གསར་འགོད་ལྷན་ཚོགས་དེའི་ཐོག་ཚོགས་པ་ལྔའི་སྐུ་ཚབ་སོ་སོས་བོད་སྐད་དང་།  དབྱིན་ཇི།  ཧིནྡི།   རྒྱ་སྐད་བཅས་སྐད་ཡིག་བཞིའི་ཐོག་ནས་གཏམ་བཤད་གནང་ཡོད་པ་དང་།    ཁོང་ཚོས་བཏོན་པའི་ཡོངས་ཁྱབ་བསྒྲགས་གཏམ་དེའི་ནང་། ཞི་ཅིང་ཕིང་ད་རེས་འཚེ་མེད་ཞི་བདེ་དང་རང་དབང་ལ་ཡིད་ཆེས་གནང་མཁན་རྒྱ་གར་འཕགས་པའི་ཡུལ་དུ་འབྱོར་གྱི་ཡོད་པར་དགའ་བསུ་ཞུ་རྒྱུ་ཡིན་ཡང་།  རྒྱ་ནག་ཕྱོགས་ནས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཞལ་ཞེ་གཉིས་མེད་ཀྱི་འདོན་གནང་མཛད་ཅིང་།    ལོ་ངོ་ ༤༠ ལྷག་དེ་མུར་ལུས་པའི་དབུ་མའི་ལམ་གྱི་དགོངས་གཞིའི་འོག་ནས་བོད་དོན་དཀའ་རྙོག་སེལ་དགོས་པ་མ་ཟད།  སྲིད་འཛིན་ཞི་ཅིང་ཕིང་གི་ངོས་ནས་རྒྱ་ནག་གི་རྒྱལ་ཁབ་དང་མི་རིགས་བཅས་པ་བརྟན་ལྷིང་དང་ཡར་རྒྱས་ཕྱོགས་སུ་འགྲོ་རྒྱུར་རླབས་ཆེན་གྱི་ཡིད་ཆེས་དང་རེ་བ་ཡོད་སྟབས།  བསམ་བློ་དེའི་ཐོག་ནས་མདུན་བསྐྱོད་ཆེན་མོ་ཞིག་གནང་བའི་ཡིད་ཆེས་དང་རེ་བ་ཞུ་བཞིན་ཡོད་ཅེས་ཀྱང་བཀོད་འདུག། གཞུང་འབྲེལ་མ་ཡིན་པའི་ཚོགས་པའི་ལྔའི་དགོས་འདུན་དོན་ཚན་གསུམ་བཏོན་ཡོད་པ་དེའི་ནང་། ཀྲུང་གོའི་གཞུང་ནས་བོད་མི་རིགས་ཁ་བྲལ་གཏོང་འདོད་མེད་ཚེ།  དབུ་མ་ལས་ལྷག་པའི་བོད་རྒྱའི་དཀའ་རྙོག་སེལ་བའི་ལམ་མེད་པས།  སྔོན་འགྲོའི་ཆ་རྐྱེན་མེད་པར་༸གོང་ས་མཆོག་དང་བོད་མིའི་སྒྲིག་འཛུགས་ཀྱི་སྐུ་ཚབ་ལྷན་དུ་དོན་སྙིང་ལྡན་པའི་གྲོས་མོལ་གནང་དགོས་པ་དང་། སྐད་ཡིག་དང་།  རིག་གཞུང་།  ཆོས་ལུགས།   ངོ་བོ་བཅས་ནི་མི་རིགས་གང་ཞིག་གསོ་གནས་ཀྱི་སྲོག་རྩ་ཡིན་སྟབས།   རྒྱ་ནག་གཞུག་གི་ངོས་ནས་བོད་མི་དང་གྲངས་ཉུང་མི་རིགས་གཞན་གྱི་ཐུན་མོང་མ་ཡིན་པའི་ངོ་བོ་ཉམས་དམས་སུ་གཏོང་བའི་སྲིད་བྱུས་སྤྱི་དང་།   ཉེ་ཆར་གཏན་འབེབས་བྱས་པའི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་ཁྲིམས་ཡིག་ཐོག་བསྐྱར་བཅོས་དགོས་པ། དེ་བཞིན་གྲངས་ཉུང་མི་རིགས་ཚང་མར་རང་ཉིད་ཀྱི་ངོ་བོ་སྲུང་སྐྱོབ་བྱེད་པའི་རང་དབང་སྤྲོད་དགོས་པ་བཅས་ཀྱི་དགོས་འདུན་ཁག་གསུམ་བཏོན་ཡོད་པ་རེད། བཞུགས་སྒར་རྡ་རམ་ས་ལའི་ཚོགས་པ་ལྔའི་སྐུ་ཚབ་ཚོས་གསུངས་དོན་ལ།   ཁོང་ཚོས་དགོས་འདུན་གྱི་བསྒྲགས་གཏམ་དེ་ལྡི་ལིར་ཡོད་པའི་རྒྱ་ནག་གཞུང་ཚབ་ཏུ་འཕྲོད་ཐབས་གནང་རྒྱུ་མ་ཟད།   ད་དུང་ཟླ་བ་རྗེས་པའི་ནང་བཞུགས་སྒར་རྡ་རམ་ས་ལ་ནས་རྒྱལ་ས་ལྡི་ལི་བར་དུ་ཞི་བའི་གོམ་བགྲོད་ཀྱི་ལས་འགུལ་ཞིག་སྤེལ་རྒྱུའི་འཆར་གཞི་ཡང་ཡོད་པ་གསུང་གི་འདུག། The post བོད་རྒྱ་ནག་དང་ཁ་བྲལ་གཏང་འདོད་མེད་ཚེ་༸གོང་ས་མཆོག་གི་སྐུ་ཚབ་དང་ལྷན་ཆ་རྐྱེན་གང་ཡང་མེད་པར་གྲོས་མོལ་གནང་དགོས། appeared first on vot.

དེ་རིང་བོད་པའི་སློབ་གྲྭ་ནང་ཁུལ་གྱི་རྩོམ་རིག་དང་རིག་གཞུང་འདུ་འཛོམས་ཆེན་མོ་ཐེངས་ ༣ པ་དེ་དབུ་འཛུགས་གནང་སོང་། དེ་ཡང་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་གོ་སྒྲིག་འོག་ཕྱི་ལོ་ ༢༠༢༣ ནས་འགོ་འཛུགས་ཀྱིས་ལོ་ལྟར་བཙན་བྱོལ་བོད་མིའི་སློབ་གྲྭ་ཁག་ནང་ཁུལ་རྩོམ་རིག་དང་རིག་གཞུང་འདུ་འཛོམས་ཆེན་མོ་འཚོག་གི་ཡོད་པ་ལྟར། འདི་ལོའི་འདུ་འཛོམས་ཆེན་མོ་དེ་བཞིན། རྡ་ས་ཁུལ་གྱི་སློབ་གྲྭ་ཁག་དང་། ལྡེ་ར་ལྡུན་ཁུལ་གྱི་སློབ་གྲྭ་ཁག  བྱང་ཤར་ཁུལ་གྱི་སློབ་གྲྭ་ཁག དེ་བཞིན་ལྷོ་ཕྱོགས་ཁུལ་གྱི་སློབ་གྲྭ་ཁག་བཅས་དབྱེ་བ་ ༤ ལ་བགོས་ཏེ་དེ་རིང་ནས་བཟུང་ཁྱོན་ཉིན་གྲངས་ ༣ གྱི་རིང་འཚོག་གི་ཡོད་པ་དང། དེ་རིང་སྔ་དྲོ་བཞུགས་སྒར་རྡ་སྟེང་བོད་ཁྱིམ་ཚོགས་ཁང་དུ་གོ་སྒྲིག་གནང་བའི་འདུ་འཛོམས་དེའི་ཐོག སྐུ་མགྲོན་གཙོ་བོ་ཤེས་རིག་བཀའ་བློན་ཨོ་རྒྱན་བསྟན་འཛིན་ལགས་དབུ་བཞུགས་ཐོག་སློབ་གྲྭ་འདྲ་མིན་ཁག་བརྒྱད་ནས་དགེ་རྒན་དང་སློབ་ཕྲུག་གི་སྐུ་ཚབ་རྣམ་པ་བཅས་མཉམ་ཞུགས་གནང་སོང་། མཛད་སྒོ་གྲུབ་མཚམས་སུ་འདི་ག་རླུང་འཕྲིན་ཁང་གིས་ཤེས་རིག་བཀའ་བློན་ཨོ་རྒྱན་བསྟན་འཛིན་ལགས་སུ་བཅར་འདྲི་ཞུས་པར། ཁོང་གིས་ལས་འཆར་འདི་ལྟ་བུ་ཡིན་ན་ཤེས་རིག་ལས་ཁུངས་ནས་ལས་དོན་གལ་ཆེ་བ་ཞིག་ལ་ངོས་འཛིན་གནང་གི་ཡོད་པ་དང་། ལས་དོན་འདི་བརྒྱུད་ནས་བོད་ཀྱི་ཆོས་དང་རིག་གཞུང་། དེ་བཞིན་སྐད་ཡིག་བཅས་ཉམས་པ་སོར་ཆུད་དང་མི་ཉམས་གོང་འཕེལ་ཡོང་རྒྱུའི་ཐབས་ལམ་ཞིག་རེད་ཅེས་འགྲེལ་བརྗོད་དང་འབྲེལ། ད་བར་རྩོམ་རིག་དང་རིག་གཞུང་འདུ་འཛོམས་ཆེན་མོ་ཐེངས་ ༢ ནང་མཉམ་ཞུགས་གནང་མྱོང་མཁན་གྱི་སློབ་ཕྲུག་དང་། ཁོང་རྣམས་ལ་ལམ་སྟོན་གནང་མཁན་དགེ་རྒན་རྣམས་ཀྱིས་འདུ་འཛོམས་འདི་བརྒྱུད་ནས་སློབ་ཕྲུག་ལ་ཁེ་ཕན་བྱུང་ཡོད་པ་གསུང་གི་འདུག ཕྱོགས་མཚུངས་སློབ་གྲྭ་ནང་ཁུལ་གྱི་རྩོམ་རིག་དང་རིག་གཞུང་འདུ་འཛོམས་ཆེན་མོ་ཐེངས་ ༣ པའི་འགན་འཁུར་བ་ཚེ་རིང་དབྱངས་སྐྱིད་ལགས་ཀྱིས་འདུ་འཛོམས་འདི་ལྟ་བུ་གོ་སྒྲིག་ཞུ་དགོས་པའི་དམིགས་ཡུལ་གཙོ་བོ་ནི་རྒྱུན་ལྡན་གྱི་སློབ་སྦྱོང་ཙམ་མ་ཡིན་པར་སློབ་ཕྲུག་རྣམས་ལ་རྩོམ་རིག་དང་རིག་གཞུང་གི་ནུས་པ་གོང་མཐོར་ཡོང་རྒྱུའི་ཆེད་དུ་ཡིན་པ་དང་། སློབ་གྲྭ་འདྲ་མིན་ནས་ཕེབས་པའི་སློབ་ཕྲུག་རྣམས་ལ་ཤེས་ཡོན་བརྗེ་ལེན་གྱི་ལྡིངས་ཆ་བསྐྲུན་རྒྱུ་ཡིན་པ་མ་གཏོགས་སློབ་ཕྲུག་ཕན་ཚུན་ལ་འགྲན་བསྡུར་གྱི་རྣམ་པ་ཡོང་རྒྱུ་དེ་མིན་ཞེས་གསུངས་སོང་། རྩ་བའི་བོད་པའི་སློབ་གྲྭ་ནང་ཁུལ་གྱི་རྩོམ་རིག་དང་རིག་གཞུང་འདུ་འཛོམས་ཆེན་མོ་དེ་བཞིན་ཕྱི་ལོ་ ༢༠༢༣ ནས་འགོ་འཛུགས་གནང་སྟེ་ད་ལན་གྱི་འདུ་འཛོམས་དེ་བཞིན་ཐེངས་ ༣ དེ་ཆགས་ཀྱི་འདུག་ཅིང་། ཕྱི་ལོ་ ༢༠༢༥ ལོའི་འདུ་འཛོམས་དེ་བཞིན་ལོ་གཅིག་རིང་ཕར་རྒྱང་གནང་སྟེ་ཚོགས་ཐུབ་མེད་པ་རེད། སྤྱིར་རྒྱ་གར་བྱང་ཕྱོགས་དང་ལྡེ་ར་ལྡུན། དེ་བཞིན་བྱང་ཤར་ཁག་གི་སློབ་གྲྭ་ནང་ཁུལ་གྱི་འདུ་འཛོམས་དེ་བཞིན་དེ་རིང་དབུ་འཛུགས་གནང་ཡོད་པ་དང་། རྒྱ་གར་ལྷོ་ཕྱོགས་ཁག་གི་སློབ་གྲྭ་ནང་ཁུལ་གྱི་རྩོམ་རིག་དང་རིག་གཞུང་འདུ་འཛོམས་དེ་བཞིན་རིང་མིན་ཟླ་ ༡༠ ཚེས་ ༦ ནས་མོན་གྷོ་སམ་བྷོ་ཊ་གཏན་ཉིན་སློབ་གྲྭའི་ནང་དབུ་འཛུགས་གནང་རྒྱུ་ཡིན་པ་མ་ཟད། འདུ་འཛོམས་ཐོག་ལས་རིམ་དབྱེ་བ་ ༧ ལ་བགོས་ཏེ་བོད་སྐད་བགྲོ་གླེང་དང་ཨིན་སྐད་བགྲོ་གླེང་། བོད་སྐད་སྙན་ངག་གྱེར་འདོན། ཨིན་སྐད་སྙན་ངག་གྱེར་འདོན། བོད་སྐད་གཏམ་བརྗོད། འཁྲབ་གཞས། ཟུང་གཞས་སོགས་ཡོད་པ་རེད། The post བོད་མིའི་སློབ་གྲྭ་ནང་ཁུལ་གྱི་རྩོམ་རིག་དང་རིག་གཞུང་འདུ་འཛོམས་ཆེན་མོ་ཐེངས་ ༣ པ་དབུ་འཛུགས། appeared first on vot.

རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱིས་ནིའུ་ཡོག་འཛམ་གླིང་མཉམ་འབྲེལ་རྒྱལ་ཚོགས་ཀྱི་མདུན་དུ། བོད་བསྟན་སྲིད་མི་རིགས་ཀྱི་ཆེད་དུ་སྐུ་ལུས་མེར་བསྲེགས་བཏང་ནས་ཟླ་གཉིས་ལྷག་འགྲོ་བཞིན་པ་དང་བསྟུན། དམ་པ་ཁོང་གི་དྲན་རྟེན་གྱི་ཆེད་དུ་ཕི་ཀྲི་ ༦ ཅན་གྱི་བཀོད་པ་ཕུན་ཚོགས་སྡེ་བཞིའི་ཚོགས་ཁང་དུ་གདན་ཞུས་གནང་འདུག དེ་ཡང་ཟླ་འདིའི་ཚེས་ ༨ ནས་འགོ་འཛུགས་ཀྱིས་ཁྱོན་ཟླ་གཅིག་རིང་ཨ་རི་ནིའུ་ཡོག་ནང་འཛམ་གླིང་མཉམ་འབྲེལ་རྒྱལ་ཚོགས་ཀྱི་ལོ་འཁོར་ཚོགས་ཆེན་ཐེངས་ ༨༡ པ་དེ་འཚོགས་གཏན་ཁེལ་ཡོད་པ་དང་བསྟུན། ས་གནས་གཞུང་གིས་བཀའ་ཁྱབ་འོག་རྒྱལ་ཚོགས་གཡས་གཡོན་གྱི་ལམ་ཁ་ཆ་ཚང་བཀག་འཁྱིལ་བྱེད་དགོས་པ་དང་འབྲེལ། ཁ་སང་སྔ་དྲོ་ཆུ་ཚོད་ ༩ པའི་ཐོག་ས་གནས་བོད་མི་བརྒྱ་ཕྲག་ལྷག་གིས་ནིའུ་ཡོག་མཉམ་འབྲེལ་རྒྱལ་ཚོགས་ཀྱི་མདུན་དུ་ངོ་རྒོལ་སྐད་འབོད་ཀྱི་ལས་འགུལ་སྤེལ་ཡོད་པ་དང་སྦྲགས། རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱིས་འདྲ་པར་དང་མེ་ཏོག་སོགས་ས་གནས་བོད་རིགས་སྤྱི་མཐུན་ཚོགས་པའི་ཚོགས་ཁང་ཕུན་ཚོགས་བདེ་བཞིའི་ཚོགས་ཁང་ནང་གདན་ཞུས་གནང་འདུག མ་ཟད་ས་གནས་ནིའུ་ཡོག་དང་ནིའུ་འཇར་སི་བོད་རིགས་སྤྱི་མཐུན་ཚོགས་པས་གསལ་བསྒྲགས་ཤིག་སྤེལ་བའི་ནང་། ས་གནས་ནིའུ་ཡོག་ཏྲེ་ཧོར་སྐྱིད་སྡུག་ཚོགས་པའི་མཐུན་འགྱུར་འོག རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱི་ཆེད་དུ་དྲན་རྟེན་བཀོད་པ་ཞིག་བཞེངས་འདུག་པ་དང་། བཀོད་པ་དེ་བཞིན་ས་གནས་བོད་རིགས་སྤྱི་མཐུན་ཚོགས་པར་རྩིས་སྤྲོད་ཀྱིས་བོད་རིགས་སྤྱི་མཐུན་ཚོགས་པའི་ངོས་ནས་ཚོགས་ཁང་ཉེ་འགྲམ་གྱི་ 52-12 Tibet Way, 32nd Avenue, Woodside, NY 11377 ས་ཚིགས་སུ་གཏན་འཇགས་བཞག་རྒྱུའི་ཐག་གཅོད་བྱུང་འདུག་པ་མ་ཟད། རིམ་པའི་ས་གནས་གཞུང་ནས་བཀའ་ཁྲོལ་དང་སྦྲགས། ཁྲིམས་མཐུན་གྱི་ཐོག་ནས་བཞག་རྒྱུའི་ཐག་གཅོད་ཀྱི་གསལ་བསྒྲགས་སྤེལ་འདུག གསལ་བསྒྲགས་ལ་གཞིགས་ན། གལ་ཏེ་ས་གནས་གཞུང་ནས་ཆོག་མཆན་ཐོབ་པ་ཡིན་ན་རིམ་པའི་ས་གནས་བོད་རིགས་སྤྱི་མཐུན་ཚོགས་པའི་ངོས་ནས་བཟོ་བཀོད་པ་དང་འཆར་འགོད་པ། དེ་བཞིན་བཟོ་བཀོད་ཀྱི་གན་རྒྱ་འཇོག་མཁན་སོགས་དང་འབྲེལ་བ་གནང་སྟེ། དཔའ་བོ་དམ་པ་ཁོང་གི་དྲན་རྟེན་གྱི་བཀོད་པ་དེ་གཏན་འཇགས་བཞེངས་རྒྱུ་ཡིན་པ་དང་། ས་གནས་བོད་མི་མང་ཚོགས་ནས་ཀྱང་དེ་འབྲེལ་རྒྱབ་སྐྱོར་གནང་དགོས་གལ་ཆེ་བ་ཡིན་པ་བརྗོད་འདུག རྩ་བའི་ཁ་སང་ནིའུ་ཡོག་འཛམ་གླིང་མཉམ་འབྲེལ་རྒྱལ་ཚོགས་ཀྱི་མདུན་ནས་རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱི་འདྲ་པར་དང་མེ་ཏོག་སོགས་ས་གནས་བོད་རིགས་སྤྱི་མཐུན་ཚོགས་པའི་ཚོགས་ཁང་དུ་གདན་ཞུ་གནང་བའི་སྐབས། གླེང་སློང་བྱུང་བའི་བརྙན་པར་ཁག་ཅིག་སྤྱི་ཚོགས་དྲྭ་རྒྱའི་སྟེང་ཁྱབ་གདལ་འགྲོ་བཞིན་པར་གཞིགས་ན། རྗེས་དྲན་བཀོད་པ་དེ་བཞིན་གཏན་འཇགས་འཇོག་སའི་ས་ཚིགས་ཀྱི་གནད་དོན་དེ་ཆགས་ཀྱི་འདུག་ཅིང་། མི་མང་རྣམ་པས་དེ་འབྲེལ་ས་ཚིགས་གཏན་འཁེལ་ཡོང་བའི་ཡིག་ཐོག་གསལ་བསྒྲགས་དགོས་པའི་དགོས་འདུན་བཏོན་པ་བཞིན་བོད་རིགས་སྤྱི་མཐུན་ཚོགས་པའི་དེ་འབྲེལ་གསལ་བསྒྲགས་སྤེལ་བ་ཞིག་ཆགས་ཀྱི་འདུག གཞན་ཡང་དཔའ་བོ་ཁོང་གི་འདྲ་པར་དང་མེ་ཏོག་གདན་ཞུ་དང་མཉམ་དུ། བོད་ཀྱི་གཞོན་ནུ་ལྷན་ཚོགས་ཀྱིས་གོ་སྒྲིག་ཞུས་པའི་རྒྱུན་མཐུད་ཟད་བཅད་ངོ་རྒོལ་ཡང་མཚམས་བཞག་དགོས་བྱུང་འདུག་ཀྱང་། བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཞོན་བཀྲིས་རྟགས་རྒྱས་ལགས་ཀྱིས་བརྗོད་དོན་ལྟར་ན་ངོ་རྒོལ་སྐད་འབོད་སོགས་ཀྱི་ལས་འགུལ་སྣ་མང་ཞིག་མུ་མཐུད་ནས་སྤེལ་རྒྱུ་ཡིན་པ་འགྲེལ་བརྗོད་གནང་གི་འདུག The post དཔའ་བོ་བློ་དགའ་རང་བཙན་ལགས་ཀྱི་ཆེད་དུ་དྲན་རྟེན་གྱི་བཀོད་པ་ཕུན་ཚོགས་སྡེ་བཞིའི་ཚོགས་ཁང་དུ་གདན་ཞུས། appeared first on vot.

བྱང་ཨ་རིའི་བོད་རིགས་སྤྱི་མཐུན་ཚོགས་པའི་ཚོགས་ཆེན་ཐེངས་ ༢༤ པ་འཚོགས་བཞིན་པ་དང་། ཚོགས་ཆེན་དེའི་ཐོག་རྒྱ་ནག་གི་མི་རིགས་མཐུན་སྒྲིལ་ཡར་ཐོན་སྐུལ་འདེད་ཟེར་བའི་ཁྲིམས་ཡིག་ལ་གདོང་ལེན་སོགས་ཀྱི་གྲོས་གཞི་དོན་ཚན་ ༡༠ ཐོག་གོ་བསྡུར་སྦྱང་བཤད་གནང་བཞིན་འདུག དེ་ཡང་སྔ་ལོར་དེ་འབྲེལ་ཚོགས་ཆེན་ཐོག་གྲོས་ཆོད་གཏན་འབེབས་གཞིར་བཟུང་ཐེངས་འདིའི་ཚོགས་ཆེན་དེ་ནིའུ་ཡོག་ནང་དུ་འཚོགས་གཏན་ཁེལ་བ་བཞིན། ཟླ་བ་འདིའི་ཕྱི་ཚེས་ ༤ ནས་འགོ་འཛུགས་ཀྱིས་དེ་རིང་ཚེས་ ༧ བར་ཉིན་གྲངས་བཞིའི་རིང་ཨ་རིའི་ནིའུ་ཡོག་ནིའུ་ཇར་སི་བོད་རིགས་སྤྱི་མཐུན་ཚོགས་པའི་ཚོགས་ཁང་དུ་འཚོག་བཞིན་ཡོད་ཅིང་། ཚོགས་ཆེན་ཐོག་དེབ་སྐྱེལ་ཡོད་པའི་བྱང་ཨ་རིའི་བོད་རིགས་སྤྱི་མཐུན་ཚོགས་ཁག་ ༢༨ ནས་ ༢༥ ཡིས་མཉམ་ཞུགས་གནང་འདུག འདི་ག་རླུང་འཕྲིན་ཁང་ནས་བྱང་ཨ་རི་བོད་ཀྱི་སྐུ་ཚབ་དོན་གཅོད་རྣམ་རྒྱལ་མཆོག་གྲུབ་ལགས་སུ་ད་རེས་ཚོགས་ཆེན་ཐོག་གི་གྲོས་གཞི་དང་འབྲེ་ལ་ནས་བཀའ་འདྲི་ཞུས་སྐབས། ཁོང་གིས་གྲོས་གཞི་དོན་ཚན་ ༡༠ ཡོད་པ་དང་། དེ་དག་གི་ནང་དུ་བོད་ཀྱི་སྐད་ཡིག་དང་རིག་གཞུང་སྲུང་སྐྱོབ་དང་འབྲེལ་ནས་གཟའ་མཇུག་སློབ་གྲྭའི་ནང་བོད་ཡིག་ཡར་རྒྱས་དང་། དགེ་རྒན་གྱི་སློབ་ཁྲིད་ཐབས་ལམ། དེ་བཞིན་ཕ་མའི་ངོས་ནས་འགན་འཁུར་བཞེས་ཕྱོགས་ཐད་གོ་བསྡུར་གནང་ཡོད་ཅིང་། ༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་དགོངས་ལྟར་སཱི་ཤེས་ཡོན་སློབ་གསོ་ཐད་སྤྱི་མཐུན་ཚོགས་པ་ཁག་གིས་ལག་བསྟར་བྱེད་བཞིན་པ་དེ་སྔར་ལྷག་ཚགས་ཚུད་དང་ཡར་རྒྱས་གཏོང་ཕྱོགས་ཐད་གོ་བསྡུར། དེ་བཞིན་བྱང་ཨ་རིའི་ནང་བོད་དོན་ཞུ་གཏུག་ལས་འགུལ་ཇེ་ཤུགས་ཆེ་རུ་གཏོང་ཕྱོགས་དང་བརྒྱུད་ལམ་ཁག་ལ་སྔར་ལྷག་འབྲེལ་བ་དམ་གཟབ་གཏོང་རྒྱུ་སོགས་ཡིན་པ་འགྲེལ་བརྗོད་གནང་སོང་། ད་རེས་ཚོགས་ཆེན་ཐོག་གཞན་ཡང་བྱང་ཨ་རིའི་གཟའ་མཇུག་སློབ་གྲྭའི་སློབ་སྤྱི་དང་དགེ་རྒན་རྣམ་པའི་ཚོགས་ཆེན་དེ་བཞིན་ཏོག་དབྱིབས་གཉེན་རིམ་ཁྱབ་གདལ་རྗེས་ད་བར་དྲ་ཐོག་ནས་ཚོགས་ཡོད་ཀྱང་། ལོ་རྗེས་མ་དེ་འབྲེལ་ཚོགས་ཆེན་དངོས་སུ་ཨ་རི་མི་ནི་སོ་ཊར་འཚོགས་གཏན་ཁེལ་ཡོད་པ་དང་། དེ་བཞིན་སྔ་ལོ་༸རྒྱལ་བའི་གོ་སྟོན་དང་འབྲེལ་ནས་བྱང་ཨ་རིའི་གཟའ་མཇུག་སློབ་གྲྭ་ཁག་ ༡༠ མཉམ་ཞུགས་ཀྱིས་རིག་སྩལ་འགྲན་བསྡུར་ཚོགས་ཡོད་པར་བོད་མིའི་སྒྲིག་འཛུགས་ཤེས་རིག་ལས་ཁུངས་དང་ས་ཆ་གང་སར་ནས་རྗེས་སུ་ཡི་རང་དང་མུ་མཐུད་གནང་དགོས་གལ་གྱི་དགོངས་ཚུལ་ལ་གཞིགས་ཏེ། ལོ་གཉིས་རེ་མཚམས་སུ་གནང་རྒྱུ་ཐག་གཅོད་བྱུང་བ་བཞིན། ཕྱི་ལོ་ ༢༠༢༨ ལོའི་རིག་རྩལ་འགྲན་བསྡུར་དེ་བཞིན་བྱང་ཀེ་ལི་ཕོར་ནི་ཡཱ་འཚོགས་གཏན་འཁེལ་འདུག མ་ཟད་བློ་དགའ་རང་བཙན་ལགས་དང་འབྲེལ་བའི་གྲོས་ཆོད་གཞག་རྒྱུ་ཡིན་ཞིང་། བོད་མིའི་སྒྲིག་འཛུགས་བཀའ་ཤག་གི་ངོས་ནས་རྒྱ་ནག་གི་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་ཟེར་བ་དེར་གདོང་ལེན་ཆེད་དུ་ཟླ་བ་འདིའི་བདུན་ཕྲག་བཞི་པར་བོད་མི་རིགས་ཀྱི་ངོ་བོ་གཅེས་སྲུང་ཀྱི་བདུན་ཕྲག་སྲུང་བརྩི་ཞུ་རྒྱུའི་བཀོད་ཁྱབ་བཏང་བ་གཞིར་བཟུང་། ས་གནས་ནས་ལས་གཞི་སྤེལ་ཕྱོགས་ཐད་གོ་བསྡུར་གནང་བཞིན་པ་རེད་འདུག གཞི་རྩའི་བྱང་ཨ་རིའི་བོད་རིགས་སྤྱི་མཐུན་ཚོགས་པའི་ཚོགས་ཆེན་ཐེངས་ ༢༣ དེ་བཞིན་སྔ་ལོའི་ཕྱི་ཟླ་ ༨ ཚེས་ ༣༡ ནས་ཕྱི་ཟླ་ ༩ ཚེས་ ༢ བར་ཉིན་གྲངས་གསུམ་རིང་ཨ་རིའི་མི་ནི་སོ་ཊའི་མངའ་སྡེའི་བོད་རིགས་སྤྱི་མཐུན་ཚོགས་པའི་སྤྱི་ཁང་ལུགས་གཉིས་ཕུན་ཚོགས་ཁང་དུ་ཚོགས་ཡོད་པ་རེད། The post བྱང་ཨ་རིའི་བོད་རིགས་སྤྱི་མཐུན་ཚོགས་པའི་ཚོགས་ཆེན་ཐེངས་ ༢༤ པ་འཚོག་བཞིན་པ། appeared first on vot.

བོད་མིའི་སྒྲིག་འཛུགས་ཀྱི་གོ་སྒྲིག་འོག་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་ India International Centre ལྟེ་གནས་ཁང་དུ། བོད་ཀྱི་རིག་པའི་གནས་ལྔ་དང་འཚེ་མེད་ཞི་བའི་ཆབ་སྲིད་ཀྱི་ལྟ་གྲུབ་བཅས་ལ་ཞི་བཅོལ་བའི་ཉིན་གྲངས་གསུམ་རིང་གི་བོད་ཀྱི་དུས་སྟོན་དེ་རིང་ཕྱི་ཚེས་ ༣ ཉིན་སྲིད་སྐྱོང་སྤེན་པ་ཚེ་རིང་མཆོག་ནས་དབུ་འབྱེད་གནང་སོང་། སྲིད་སྐྱོང་མཆོག་ནས་དབུ་འབྱེད་མཛད་སྒོའི་ཐོག་རྒྱ་གར་གྱི་རིག་གནས་ཀྱི་ཤུགས་རྐྱེན་འོག་དར་བའི་བོད་ཀྱི་རྩ་ཆེའི་རིག་གནས་ཁག་བརྒྱུད་དེང་གི་སྲ་བརྟན་མེད་པའི་འཛམ་གླིང་འདིར་ཞི་བདེའི་ཕན་རླབས་བསྐྲུན་ཐུབ་པའི་རེ་བ་ཡོད་པ་དང་། ལྷག་པར་ཉེ་ཆར་རྒྱ་ནག་གཞུང་གིས་ཆབ་སྲིད་ཀྱི་དགོས་མཁོའི་འོག་ནས། བོད་མི་རིགས་ཀྱིས་ད་བར་བདག་གཅེས་བྱས་པའི་རྩ་ཆེའི་རིག་གཞུང་དེ་ཁྲིམས་ཐོག་ནས་རྩ་མེད་བཟོ་རྒྱུའི་འབད་རྩོལ་བྱེད་བཞིན་ཡོད་སྟབས། དུས་སྟོན་འདི་ལྟ་བུ་བརྒྱུད་རྒྱ་གར་གྱི་མི་རབས་རྒན་གཞོན་རྣམས་དང་། ལྷག་པར་འཛམ་གླིང་ཀུན་ལ་བོད་ཀྱི་རྩ་ཆེའི་རིག་གཞུང་སྐོར་གོ་རྟོགས་སྤེལ་ཏེ། རྒྱ་ནག་གི་ཁྱོག་བཤད་ལ་གདོང་ལེན་བྱ་རྒྱུ་ཡིན་པ་གསུངས་སོང་། དེ་རིང་ཕྱི་ཟླ་ ༩ ཚེས་ ༣ ནས་དབུ་འཛུགས་གནང་བའི་བོད་ཀྱི་དུས་སྟོན་དེའི་ཁོངས་སུ། ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གི་ངོས་ནས། བོད་ཀྱི་ཐང་ཀའི་རྒྱུ་རྩལ་། ཤིང་བཀོད། རི་མོ་སོགས་ཀྱི་འགྲེམས་སྟོན་དང་ཚོང་ལས་བཤམ་སྟོན་དང་། འགྲོ་ཕན་བོད་ཀྱི་སྨན་རྩིས་ཁང་གི་ངོས་ནས། རིན་མེད་སྨན་བཅོས་བརྟག་དཔྱད་དང་། སྐར་རྩིས་ཀྱི་སློབ་སྟོན། སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་ངོས་ནས་དེང་རབས་གྲངས་འཛིན་གི་དུས་རབས་འདིར་བོད་ཀྱི་སྐད་ཡིག་དང་རིག་གཞུང་སྲུང་སྐྱོབ་གནང་ཕྱོགས་སོགས་བོད་ཀྱི་རིག་གཞུང་དང་ཆབ་སྲིད་ཁོར་ཡུག་སོགས་ཀྱི་བརྗོད་གཞི་འདྲ་མིན་ཐོག་མཁས་པའི་བགྲོ་གླེང་དང་གཏམ་བཤད། བོད་ཀྱི་འགྲེམས་སྟོན་ཁང་གི་ངོས་ནས་ལོ་རྒྱུས་ཀྱི་པར་རིས་འགྲེམས་སྟོན་གནང་རྒྱུ་མ་ཟད། ཕྱི་དྲོ་བོད་ཀྱི་ཟློས་གར་ཚོགས་པའི་ངོས་ནས་རིག་གཞུང་གཞས་སྣ་འཁྲབ་སྟོན་གནང་གི་འདུག དེ་བཞིན་དུས་སྟོན་དེའི་ཆ་ཤས་སུ་བོད་ཀྱི་ཡིག་གཟུགས་དང་རི་མོ། དཀྱིལ་འཁོར་བཞེངས་བསྐྲུན་དང་། གློག་བརྙན་གཟིགས་འབུལ་ཞུ་རྒྱུ་རེད་འདུགདེ་རིང་བོད་ཀྱི་དུས་སྟོན་དབུ་འབྱེད་ཀྱི་མཛད་སྒོ་གྲུབ་མཚམས་རྒྱ་གར་གྱི་གསར་འགོད་པ་དང་། རྒྱལ་ཡོངས་བདེ་འཇགས་དཔྱད་ཞིབ་པ་སྐུ་ཞབས་ Nitin A Gokhale ལགས་ཀྱི་གཙོ་སྐྱོང་འོག སྲིད་སྐྱོང་སྤེན་པ་ཚེ་རིང་མཆོག་དང་། རྩོམ་སྒྲིག་པ་དང་ལྷོ་ཨེ་ཤི་ཡའི་ཞིབ་འཇུག་ལྟེ་གནས་ཁང་གི་འགན་འཛིན་དང་རྒྱལ་སྤྱིའི་ཆབ་སྲིད་དཔྱད་ཞིབ་པ་གྲགས་ཅན་ C Raja Mohan ལགས། དེ་བཞིན་Atma Nirbar Soch ཞེས་པའི་ཆབ་སྲིད་ལྟེ་གནས་ཁང་གསར་འཛུགས་གནང་མཁན་མཁས་དབང་དམག་དཔོན་ཟུར་པ་ Brigadier Anshuman Narang བཅས་ཀྱིས་དཔལ་ཡོན་དར་སྤེལ་གྱི་འབྲེལ་ལམ་དང་། དེང་གི་ཐབས་བྱུས་ལམ་ཕྱོགས་ཀྱི་བརྗོད་གཞིའི་ཐོག་བགྲོ་གླེང་གནང་ཡོད། གཞི་རྩའི་དེ་རིང་ནས་དབུ་འཛུགས་ཀྱིས་ཕྱི་ཚེས་ ༥ བར་ཉིན་གྲངས་གསུམ་རིང་བོད་ཀྱི་དུས་སྟོན་དེ་མུ་མཐུད་འཚོག་གི་ཡོད་པ་དང་། […] The post བོད་མིའི་སྒྲིག་འཛུགས་ནས་ལྡི་ལིར་བོད་ཀྱི་རིག་གཞུང་དུས་སྟོན་དབུ་འཛུགས་གནང་། appeared first on vot.

འདི་ལོའི་ཕྱི་ཟླ་ ༧ པའི་ཚེས་ ༢ ཉིན་ཨ་རིའི་ནིའུ་ཡོག་གྲོང་ཁྱེར་ནང་དུ་བཅའ་བཞུགས་བོད་རང་བཙན་འཐབ་རྩོད་པ་བློ་དགའ་རང་བཙན་ལགས་ཀྱིས་ཨ་རིའི་ནིའུ་ཡོག་གྲོང་ཁྱེར་ནང་རྟེན་གཞི་བྱས་པའི་རྒྱལ་ཚོགས་ཀྱི་ལས་ཁུངས་ཨ་མའི་མདུན་དུ། རྒྱ་ནག་གཞུང་ལ་ངོ་རྒོལ་དང་བོད་བསྟན་སྲིད་མི་རིགས་ཀྱི་ཆེད་དུ་རང་ལུས་མེར་བསྲེགས་བཏང་ནས་ཟླ་བ་གཉིས་ཕྱིན་ཡོད་པ་དང་བསྟུན། བོད་མིའི་འདུ་སྡོད་ས་གནས་ཁག་ནང་ལས་འགུལ་རྣམ་པ་འདྲ་མན་ཐོག་སྤེལ་བཞིན་པའི་ཁྲོད། ཁ་སང་རྒྱ་གར་བྱང་ཤར་ཀ་ལོན་སྦུག་ས་གནས་གཞོན་ནུས་དམ་པ་ཁོང་ལ་རྗེས་དྲན་ཞུ་སླད་གོམ་བགྲོད་ལས་འགུལ་སྤེལ་འདུག དེ་ཡང་ཁ་སང་ཕྱི་ཚེས་ ༢ ཉིན་ཀ་སྦུག་ས་གནས་གཞོན་ནུའི་གོ་སྒྲིག་འོག་སྔ་དྲོ་ཕྱག་ཚོད་དྲུག་པ་ནས་ས་གཞོན་རྒྱུན་ལས་དང་གཞན་ཡང་ལོ་ན་ ༨༢ ལ་ཕེབས་པའི་ལོ་ན་བགྲེས་སོང་གཅིག་སོགས་ཁྱོན་མི་གྲངས་ ༩ ཙམ་ནས་རྒྱ་གར་ནུབ་སྦང་གྷལ་མངའ་སྡེའི་ཀ་སྦུག་ནས་ས་ལུ་གྷ་ར་གྲོང་ཁྱེར་བར་ཁྱོན་མེ་ལེ་ ༦༠ ཙམ་གྱི་གོམ་བགྲོད་ལས་གུལ་ཞིག་སྤེལ་འདུག་པ་དང་། དེ་རིང་ས་ལུ་གྷ་ར་གྲོང་ཁྱེར་དུ་མ་འབྱོར་སྔོན་ཀ་སྦུག་ས་གཞོན་གྱི་དྲུང་ཆེ་ལགས་སུ་བཀའ་འདྲི་ཞུས་སྐབས་ཁོང་གིས་ཕྱི་དྲོ་ཕྱག་ཚོད་ ༤ ཙམ་ལ་ས་ལུ་གྷ་རར་འབྱོར་རྒྱུའི་འཆར་གཞི་ཡོད་པ་གསུངས་སོང་། འདི་ག་གསར་འགོད་པས་གནད་དོན་དེ་འབྲེལ་ཀ་སྦུག་ས་གནས་གཞོན་ནུའི་དྲུང་ཆེ་ལེགས་བཟང་འཕེལ་རྒྱས་ལགས་སུ་བཀའ་འདྲི་ཞུས་སྐབས་ཁོང་གིས། ཐེངས་འདིའི་ལས་འགུལ་ངོ་སྤྲོད་དང་འབྲེལ། ཉིན་གྲངས་གཉིས་རིང་གི་ལས་འགུལ་དེའི་བརྒྱུད་འཛམ་གླིང་མཉམ་འབྲེལ་རྒྱལ་ཚོགས་ལ་བློ་དགའ་རང་བཙན་ལགས་ཀྱིས་རང་ལུས་མེར་བསྲེགས་བཏང་ནས་ཟླ་བ་གཉིས་ཙམ་ཕྱིན་ཡོད་ཀྱང་། ད་བར་དེ་འབྲེལ་གསལ་ཁ་གང་ཡང་གནང་མེད་པ་དང་། རྒྱ་གཞུང་གིས་གཏན་འབེབས་བྱས་པའི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་ཟེར་བའི་ཁྲིམས་གསར་ལ་ངོས་ལེན་རྩ་བ་ནས་མེད་པ། གཞན་ཡང་ཡོང་རྒྱུའི་ཚེས་ ༡༢ ཉིན་རྒྱ་གར་གྱི་རྒྱལ་ས་ལྡི་ལིར་ BRICS ཚོགས་འདུ་ཐེངས་ ༡༨ པ་དེ་འཚོགས་གཏན་ཁེལ་ཡོད་པ་ལྟར་དེར་སྲིད་འཛིན་ཞི་ཅིན་ཕིང་སླེབས་འཆར་ཡོད་པ་དེར་རྩ་བ་ནས་ངོས་ལེན་མེད་ཅེས་གསུངས་སོང་། གཞན་ཡང་ཁ་སང་གི་ཉིན་མོ་དང་བསྟུན། དྷ་ས་ས་གནས་འགོ་འཛིན་ཚོགས་ཁང་ནང་ཉིན་རྒྱབ་སུ་ཇཱ་བོད་ཁྱིམ་སློབ་གྲྭའི་བོད་ཡིག་དགེ་རྒན་ཟུར་པ་རྒན་ཚེ་རིང་ལོ་བརྒྱ་ལགས་དང་། ཁོང་ལ་ཕྱག་རོགས་གནང་མཁན་ཨེ་ཤི་ཡ་རང་དབང་རླུང་འཕྲིན་ཁང་གི་གསར་འགོད་པ་ཟུར་པ་ལོ་ཡག་བཀྲ་ཤིས་རྣམ་གཉིས་ཀྱི་རྩོམ་སྒྲིག་གནང་བའི་བློ་དགའ་རང་བཙན་ལ་ཕུལ་བའི་ཆེད་རྩོམ་དཔེ་དེབ་ཅིག་དབུ་འབྱེད་གནང་འདུག དཔེ་དེབ་དེའི་ནང་དུ་རྩོམ་པ་པོ་བདུན་ཅུ་ཙམ་གྱིས་རྒྱལ་གཅེས་དཔའ་བོ་བློ་དགའ་རང་བཙན་ལགས་ལ་ཕུལ་བའི་སྙན་ངག་དང་རྩོམ་ཡིག་ཙམ་མ་ཟད། དམ་པ་ཁོང་གི་སྐུ་ཚེའི་ལོ་རྒྱུས་དང་ཞལ་ཆེམས། བཀའ་སྤྱི་གཉིས་ཀྱི་གསར་འགོད་བསྒྲགས་གཏམ་སོགས་འཁོད་འདུག གཞི་རྩའི་རྒྱལ་གཅེས་པ་དམ་པ་ཁོང་གིས་རང་ལུས་མེར་བསྲེགས་བཏང་བ་ནས་བཟུང་བོད་མིའི་འདུ་སྡོད་ས་གནས་ཁག་ནང་ཚོགས་སྒེར་ཁག་གིས་དམ་པ་ཁོང་ལ་རྗེས་དྲན་ཞུ་སླད་ལས་འགུལ་སྣ་མིན་སྤེལ་དང་སྤེལ་མུས་ཡིན་པ་ལྟར། དམ་པ་དེ་ཉིད་ཀྱི་བདུན་ཚིགས་བདུན་པ་སྟེ་ཞག་ཞེ་དགུའི་དུས་ཚིགས་རྗེས་སུའང་མི་སྒེར་ཁག་གཅིག་གིས་གོམ་བགྲོད་ལས་འགུལ་སྤེལ་བཞིན་པ་དང་། དེ་བཞིན་ཨ་རིའི་ནིའུ་ཡོག་ནང་དུའང་མུ་མཐུད་རྒྱལ་ཡོངས་རྒྱུན་མཐུད་ཟས་བཅད་ངོ་རྒོལ་གནང་བཞིན་པ་མ་ཟད། ཁག་གཅིག་གིས་སྙན་ངག་སྒེར་འདོན་སོགས་མུ་མཐུད་ལས་འགུལ་སྤེལ་བཞིན་ཡོད་པ་རེད། The post བློ་དགའ་རང་བཙན་ལགས་ཀྱིས་རང་ལུས་མེར་བསྲེགས་བཏང་སྟེ་ཟླ་བ་གཉིས་ཕྱིན་པར་ཀ་སྦུག་ས་གཞོན་ནས་གོམ་བགྲོད་ལས་འགུལ་སྤེལ་འདུག appeared first on vot.

དེ་རིང་ཕྱི་ཟླ་ ༩ ཚེས་ ༡ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་ལ་དྭགས་ཞི་བའི་ཚལ་གསུང་ཆོས་ར་བར་ལ་དྭགས་ནང་ཚོགས་དང་། དགོན་ཚོགས། ཁ་ཆེ་དང་ཡེ་ཤུའི་སྡེ་ཚོགས་བཅས་ཀྱིས་བཀྲིན་གཏང་རག་དང་འབྲེལ་བསྙེན་བཀུར་གསོལ་སྟོན་གྱི་མཛད་སྒོ་འཚོགས་སོང་། དེའང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་འདི་ལོའི་ཕྱི་ཟླ་ ༦ པའི་ནང་རྒྱ་གར་གྱི་རྒྱལ་ས་ལྡི་ལིར་ཞབས་པུས་སྨན་བཅོས་ལེགས་གྲུབ་བྱུང་རྗེས་ཟླ་དེའི་ཕྱི་ཚེས་ ༢༨ ཉིན་ལ་དགས་སུ་ཞབས་སོར་བཀྲིན་མཛད་དེ་ད་བར་ཟླ་བ་གཉིས་ལྷག་ཙམ་འགྲོ་བཞིན་པའི་ཁྲོད། དེ་རིང་ལ་དྭགས་ནང་པའི་ཚོགས་འདུ་དང་དགོན་ཚོགས་ཙམ་མ་ཟད། ལ་དྭགས་ཨན་ཇུ་མན་ཨི་མ་མི་ཡ། (Anjuman Immamia) དང་། ཨན་ཇུ་མན་མོ་ཡིན་ཨུལ་ཨི་སི་ལཱམ་ (Anjuman Moin-Ul Islam) བཅས་ཁ་ཆེའི་སུ་ནི་དང་ཤི་ཡ་ཆོས་ཚོགས། དེ་བཞིན་གླེ་ཡི་ཡེ་ཤུའི་སྤྱི་ཚོགས་བཅས་ཐུན་མོང་གི་གོ་སྒྲིག་འོག ལ་དྭགས་དང་བོད་ཀྱི་ཐུན་མོང་མ་ཡིན་པའི་རྐང་བྲོ་གླུ་གཞས་གཟིགས་འབུལ་སོགས་ཀྱི་ལམ་ནས་༸གོང་ས་མཆོག་ལ་བཀྲིན་གཏང་རག་དང་གྱེས་སྟོན་མཛད་སྒོ་གཟབ་རྒྱས་ཤིག་འཚོགས་སོང་། སྐབས་དེར་ལ་དྭགས་ནང་ཚོགས་ཀྱི་ཚོགས་གཙོ་སྐུ་ཞབས་ཚེ་རིང་རྡོ་རྗེ་ལགས་ཀྱིས་གསུང་བཤད་ཁྲོད། འདི་ལོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དྭགས་སུ་ཞབས་སོར་བསྐྱངས་ནས་ཟླ་བ་གཉིས་ཙམ་གྱི་རིང་སྐུ་ལྷོད་བཞུགས་མཛད་རྒྱུ་བྱུང་བར་སྙིང་ཐག་པ་ནས་ཐུགས་རྗེ་ཆེ་ཞུས་གནང་བ་མ་ཟད། ༸གོང་ས་མཆོག་གིས་དུས་ཡུན་དེའི་ཁྲོད་ལ་དྭགས་ཀྱི་དད་ལྡན་པ་ཐོག་མཐའ་བར་གསུམ་ལ་ཉིན་ལྟར་ཐུགས་བརྩེ་བ་ཆེན་པོས་མཇལ་ཁ་སྩལ་བའི་ཁོངས་སུ་འདི་ལོ་དམིགས་བསལ་གྱིས་གཞོན་སྐྱེས་ཚོར་མཇལ་ཁ་སྩལ་བ་དེ་ནི་ལ་དྭགས་ཀྱི་ལོ་རྒྱུས་ནང་ཐོག་མ་ཆགས་ཀྱི་ཡོད་པ་དང་། གཞོན་ནུ་ཚོས་༸གོང་ས་མཆོག་གི་མཇལ་ཁ་ཞུས་པའི་རྗེས་སུ་ཁོང་ཚོའི་སེམས་རྒྱུད་ལ་འགྱུར་བ་ཆེན་པོ་བྱུང་ཡོད་པ་ང་ཚོས་གསལ་པོར་ཤེས་རྟོགས་ཐུབ་ཀྱི་འདུག་ཅེས་གསུངས་སོང་། མཛད་སྒོའི་ཐོག་གཞན་ཡང་ཁ་ཆེ་དང་ཡེ་ཤུའི་སྤྱི་ཚོགས་ཀྱི་སྐུ་ཚབ་དབུ་ཁྲིད་རྣམས་ཀྱིས་ཀྱང་༸གོང་ས་མཆོགས་གི་མཛད་རྗེས་དག་ལ་ཆེ་བསྟོད་ཞུས་པ་མ་ཟད། མགོན་པོ་༸གང་ཉིད་མཆོག་ནི་ནང་པ་གཅིག་པོ་མ་ཡིན་པར་འཛམ་གླིང་ཡོངས་ཀྱི་དབུ་འཁྲིད་ཅིག་ཡིན་པ་མངོན་གསལ་དང་འབྲེལ་དམིགས་བསལ་གྱི་ཐུགས་རྗེ་ཆེ་ཞུས་སོང་ལ། དེ་ཡང་ལ་དྭགས་ཨན་ཇུ་མན་ཨི་མཱམ་མཱི་ཡཱའི་ (Anjuman Immamia) ཚོགས་གཞོན་ Sheikh Nazir མཆོག་གིས་གསུང་བཤད་ཁྲོད། ང་ཚོ་ཆོས་ལུགས་ལ་དད་པ་བྱེད་མཁན་ཡོངས་ནས་༸གོང་ས་མཆོག་ཁྱེད་ལ་ཐུགས་རྗེ་ཆེ་དང་བཀའ་དྲིན་ཆེ་ཞུ་རྒྱུ་ཡིན། གང་ཡིན་ཞེ་ན། ༸གོང་ས་མཆོག་ནི་ལ་དྭགས་གཅིག་པོ་མིན་པར་འཛམ་གླིང་ཡོངས་ཀྱི་ཆོས་ལུགས་ལ་དད་པ་བྱེད་མཁན་སུ་ཡིན་རུང་། མིག་གི་འོད་ཟེར་ལྟ་བུའི་ཁྱེད་ཀྱི་བཀའ་སློབ་ལམ་སྟོན་བཟང་པོའི་བཀའ་དྲིན་ལ་བརྟེན་ནས། ང་ཚོ་ལ་དྭགས་པ་རྣམས་ལ་ཁྱེད་ནི་དེ་རིང་འོད་སྣང་འཕྲོ་བའི་ཉི་མ་ལྟ་བུ་ཡིན། ཉི་མས་དྲོ་སྐྱིད་དང་འོད་སྣང་གིས་སེམས་ཅན་ཡོངས་ལ་བཀའ་དྲིན་བསྐྱངས་པ་བཞིན། ༸གོང་ས་མཆོག་ཀྱང་དེ་དེ་བཞིན་ཡིན་ཞེས་གསུངས་སོང་། གཞི་རྩའི་༸གོང་ས་མཆོག་ཕྱི་ཟླ་ ༦ ཚེས་ ༢༨ ཉིན་ལ་དྭགས་སུ་ཞབས་སོར་བཀའ་དྲིན་མཛད་པ་དང་། ཁ་སང་ཕྱི་ཟླ་ ༨ ཚེས་ ༣༠ ཉིན་ལ་དྭགས་ནང་ཚོགས་དང་དགོན་ཚོགས། ལ་བྱང་བོད་མི་བཅས་ནས་༸གོང་ས་མཆོག་ལ་གནས་བཅུ་དང་འབྲེལ་བའི་མདོ་ལུགས་བརྟན་བཞུགས་བསྟར་འབུལ་ཞུས་ཡོད་པ་མ་ཟད། […] The post ༸གོང་ས་མཆོག་ལ་ལ་དྭགས་ནང་བཀྲིན་གཏང་རག་དང་བསྙེན་བཀུར་གསོལ་སྟོན། appeared first on vot.

རྒྱ་ནག་གཞུང་གིས་བལ་བོད་ས་མཚམས་སུ་བྱུང་བའི་ཆུ་ལོག་གོད་ཆགས་ནང་བོད་སྐྱིད་གྲོང་ཁུལ་དུ་མི་ཤི་རྐྱེན་འདས་ཀྱི་ཆག་སྒོ་བྱུང་བའི་གནས་ཚུལ་སྦས་གསང་བྱེད་བཞིན་པའི་ཁྲོད། བོད་ཀྱི་གཞུང་འབྲེལ་མ་ཡིན་པའི་ཚོགས་པ་ཁག་གིས་རྒྱ་ནག་གཞུང་ནས་ཆུ་ལོག་དང་འབྲེལ་བའི་གནས་ཚུལ་ཁ་གསལ་མཁོ་སྤྲོད་དང་། རྒྱལ་སྤྱིའི་རང་དབང་ལྡན་པའི་གསར་ཁང་ཁག་ལ་དེ་དོན་གནས་ཚུལ་མཁོ་སྒྲུབ་བྱེད་འཇུག་དགོས་པའི་དགོས་འདུན་བཏོན་སོང་། དེ་ཡང་ཟླ་བ་འདིའི་ཚེས་ ༢༦ ཉིན་བལ་བོད་ས་མཚམས་སུ་འཁྱག་རུད་བྱུང་ནས་བདུན་ཕྲག་གཅིག་འདས་པའི་རྗེས་སུ། བལ་ཡུལ་ཕྱོགས་སུ་མི་གྲངས་ ༡༠༠༠ ལྷག་འདས་གྲོངས་དང་། མི་གྲངས་ ༣༠༠༠ བརྒལ་བ་གར་སོང་ཆ་མེད་དུ་གྱུར་བའི་གནས་ཚུལ་ཐོན་ཡོད་ནའང་། རྒྱ་ནག་གཞུང་གིས་བོད་ཕྱོགས་སུ་མི་གྲངས་ ༡༦ འདས་གྲོངས་དང་། མི་གྲངས་ ༥༥༨ གར་སོང་ཆ་མེད་དུ་གྱུར་བའི་གནས་ཚུལ་ཙམ་ལས་བཏོན་མེད་པ་མ་ཟད། རྒྱ་ནག་གི་སྤྱི་ཚོགས་དྲྭ་ལམ་ཁག་ཏུ་ཆུ་ལོག་དང་འབྲེལ་བའི་གནས་ཚུལ་ལ་དམ་བསྒྲགས་དང་། རྒྱལ་སྤྱིའི་རང་དབང་ལྡན་པའི་གསར་ཁང་ཁག་ལ་ས་གནས་སུ་གནས་ཚུལ་མཁོ་སྒྲུབ་བྱེད་བཅུག་གི་མེད་པ་རེད། དེ་འབྲེལ་དེ་རིང་ཟླ་བ་ ༩ ཚེས་ ༡ ཉིན་བོད་ཀྱི་གཞུང་འབྲེལ་མ་ཡིན་པའི་ཚོགས་པ་བོད་རང་བཙན་སློབ་ཕྲུག་ཚོགས་པ་དང་། རྒྱལ་སྤྱིའི་བོད་དོན་འབྲེལ་མཐུད་ལས་ཁང་གཉིས་ནས། རྒྱ་ནག་གི་བྱེད་ཕྱོགས་ལ་སྐྱོན་བརྗོད་དང་སྦྲགས། རྒྱ་ནག་གིས་བོད་ནང་གི་གནས་ཚུལ་མཁོ་སྤྲོད་བྱེད་དགོས་པ་དང་། བོད་ནང་གི་འཁྱག་རོམ་དང་ཆུ་ཚད་སྐོར་གནས་ཚུལ་བལ་ཡུལ་མཚོན་པའི་གཤམ་འོག་རྒྱལ་ཁབ་ལ་སྤྲོད་དགོས་པ། བོད་ནང་ཆུ་ལོག་གི་གོད་ཆགས་ཕོག་མཁན་རྣམས་ལ་རྒྱལ་སྤྱིའི་རོགས་རམ་མཐུན་འགྱུར་སྦྱོར་འཇུག་དགོས་པ། ཆུ་ལོག་དང་འབྲེལ་བའི་གནས་ཚུལ་བརྒྱུད་སྤེལ་བྱེད་མཁན་རྣམས་ལ་ཉེས་ཆད་འགེལ་མི་ཆོག་པ། རྒྱལ་སྤྱིའི་ཚོགས་སྡེ་དང་གསར་ཁང་ཁག་གིས་བོད་ཀྱི་ས་ཆའི་མིང་ངོ་མ་འབོད་དགོས་པའི་དགོས་འདུན་དོན་ཚན་ལྔ་བཏོན་གནང་ཡོད། གསར་འགོད་གསལ་སྒྲགས་དེའི་ཐོག་བོད་ཀྱི་སྲིད་བྱུས་ཉམས་ཞིབ་ཁང་གི་ཁོར་ཡུག་ཉམས་ཞིབ་པ་དོན་གྲུབ་དབང་མོ་ལགས་དང་། རྒྱལ་སྤྱིའི་བོད་དོན་འབྲེལ་མཐུད་ལས་ཁང་གི་བློ་བཟང་གཡང་མཚོ་ལགས། བོད་རང་བཙན་སློབ་ཕྲུག་ཚོགས་པའི་ལས་འགུལ་འབྲེལ་མཐུད་པ་ བཀྲ་ཤིས་དོན་གྲུབ་ལགས། སྐྱིད་གྲོང་ནས་ཡིན་པའི་ཕ་བྱམས་པ་དཔལ་ལྡན་ལགས་གཙོ་བཞུགས་གནང་ཡོད་པ་དང་། སྐབས་དེར་དོན་གྲུབ་དབང་མོ་ལགས་ཀྱིས་བོད་མཐོ་སྒང་ནི་གནམ་གཤིས་འགྱུར་ལྡོག་གི་ཤུགས་རྐྱེན་ཐེབས་སླ་ཤོས་ཀྱི་ས་ཁུལ་ཞིག་ཡིན་པའི་ཆ་ནས་རྒྱ་ནག་གཞུང་གིས་བོད་མཐོ་སྒང་དུ་འཛུགས་སྐྲུན་ལས་གཞི་སྤེལ་རྒྱུར་དོ་གཟབ་དང་འགན་ཁུར་དགོས་པའི་འབོད་སྐུལ་གནང་སོང་། དེ་བཞིན་རྒྱལ་སྤྱིའི་བོད་དོན་འབྲེལ་མཐུད་ལས་ཁང་གི་ཁོར་ཡུག་ཉམས་ཞིབ་པ་བློ་བཟང་གཡང་མཚོ་ལགས་ཀྱིས་བོད་དང་བལ་ཡུལ་ལྟ་བུར་མཚོན་ན། མཁའ་དབྱིངས་སུ་དུག་རླངས་འདོན་མཁན་ཉུང་ཤོས་ཡིན་ནའང་། ཁོང་ཚོར་གནམ་གཤིས་འགྱུར་ལྡོག་ལ་བརྟེན་པའི་འབྱུང་བའི་དཀའ་ངལ་མང་ཤོས་འཕྲད་ཀྱི་ཡོད་པ་མ་ཟད། རྒྱུན་ལྡན་གོ་ལའི་གནམ་གཤིས་ཚོགས་འདུའི་སྐབས་སུའང་བོད་ཀྱི་ཁོར་ཡུག་དང་གནམ་གཤིས་སྐོར་གླེང་སློང་བྱེད་པར་གོ་སྐབས་སྤྲོད་ཀྱི་མེད་པ་དང་། ལྷག་པར་རྒྱ་གར་མཚོན་པའི་གཤམ་འོག་ཏུ་ཡོད་པའི་རྒྱལ་ཁབ་ཁག་ནས་རྒྱ་ནག་གཞུང་ལ་ཆུ་དང་འབྲེལ་བའི་གནས་ཚུལ་མཁོ་གཏོང་དགོས་པའི་གནོན་ཤུགས་སྤྲོད་དགོས་པ་གསུང་གི་འདུག མ་ཟད་རྒྱ་གར་བོད་རང་བཙན་སློབ་ཕྲུག་ཚོགས་པའི་ལས་འགུལ་འབྲེལ་མཐུད་པ་བཀྲ་ཤིས་དོན་གྲུབ་ལགས་ཀྱིས། རྒྱ་ནག་གཞུང་གི་དབང་སྒྱུར་འོག་བོད་མི་ཚོར་སོ་སོའི་ས་ཆ་ཇི་ལྟར་བྱེད་སྤྱོད་བྱ་རྒྱུའི་ཐག་གཅོད་བྱེད་པའི་རང་དབང་མེད་པ་དང་། རྒྱ་ནག་གི་བཟོ་གྲྭ་ཁག་གིས་ཚོང་ལས་ཆེད་བོད་ཀྱི་རང་བྱུང་ཁོར་ཡུག་གཏོར་སྐྱོན་གཏོང་སྐབས་བོད་མི་རྣམས་ལ་གྲོས་བསྡུར་བྱེད་ཀྱི་མེད་པ་གསུང་གི་འདུག་ལ། དེ་བཞིན་སྐྱིད་གྲོང་ནས་ཡིན་པའི་ཕ་བྱམས་པ་དཔལ་ལྡན་ལགས་ཀྱིས་སྐྱིད་གྲོང་ཀྱི་ལོ་རྒྱུས་དང་ས་ཚིགས་ཀྱི་གལ་གནད། ད་ལྟའི་ཆར་སྐྱིད་གྲོང་ཁུལ་དུ་དམ་བསྒྲགས་དབང་གིས་ཆུ་ལོག་དང་འབྲེལ་བའི་གནས་ཚུལ་རག་ཁག་པོ་ཡོད་པའི་སྐོར་ངོ་སྤྲོད་གནང་སོང་། The post རྒྱ་ནག་གཞུང་ནས་བལ་བོད་ས་མཚམས་སུ་ཆུ་ལོག་གི་གོད་ཆགས་དང་འབྲེལ་བའི་གནས་ཚུལ་ཕྱི་གསལ་ནང་གསལ་བཟོ་དགོས། appeared first on vot.

ཁ་སང་ཕྱི་ཟླ་ ༨ ཚེས་ ༢༧ ཉིན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་གོ་སྒྲིག་འོག །ས་རྭ་བོད་ཀྱི་མཐོ་རིམ་སློབ་གཉེར་ཁང་དུ་ཉིན་གྲངས་གཉིས་རིང་བཙན་བྱོལ་བོད་མིའི་འཕྲོད་བསྟེན་བསྐྱར་ཞིབ་ཚོགས་འདུ་ཐེངས་ ༨ པ་བསྐོང་ཚོགས་གནང་ཡོད་པ་དང་། ཐེངས་འདིའི་ཚོགས་འདུའི་ཐོག་བཙན་བྱོལ་བོད་མིའི་འཕྲོད་བསྟེན་སྲིད་བྱུས་གཏན་འབེབས་དང་འབྲེལ་ནས་འཕྲོད་བསྟེན་སྨན་པའི་སློབ་སྟོན་ཚོགས་ཆུང་ཞིག་ཆེད་འཛུགས་དང་། ཚོགས་མི་གཏན་འབེབས་གནང་བ་མ་ཟད། དེ་རིང་ཚོགས་འདུ་མཇུག་སྡོམ་དང་འབྲེལ། Health Information System ཞེས་འཕྲོད་བསྟེན་ལས་ཁུངས་ཀྱི་ནད་པའི་གྲངས་མཛོད་གསར་བསྐྲུན་གྱིས་དེའི་ནང་བཙན་བྱོལ་བོད་མིའི་སྤྱི་ཚོགས་ཁྲོད་ཀྱི་རྒན་གཞོན་བར་གསུམ་ཁྲོད། ལུས་སེམས་གཉིས་ཀྱི་དཀའ་ངལ་སེལ་རྒྱུའི་གྲོས་བསྡུར་དང་ཐབས་ལམ་ཚོལ་ཐབས། བཙན་བྱོལ་བོད་མིའི་འཕྲོད་བསྟེན་སྲིད་ཇུས་རགས་ཟིན་བཅས་གྲོས་ཆོད་ཁག་གཅིག་བཞག་འདུག དེ་ཡང་ཁ་སང་སྔ་དྲོ་ཆུ་ཚོད་ ༩ ཡས་མས་སུ་མཛད་སྒོ་དབུ་འཛུགས་གནང་ཡོད་པ་དང་། སྐབས་དེར་སྐུ་མགྲོན་གཙོ་བོར་བོད་མིའི་སྒྲིག་འཛུགས་ཀྱི་འཕྲོད་བསྟེན་བཀའ་བློན་པདྨ་མཚོ་མཆོག་དང་། འཕྲོད་བསྟེན་དྲུང་ཆེ་དང་དྲུང་འཕར། སྐུའི་བླ་སྨན་པ་རྣམ་པ། ས་རཱ་བོད་ཀྱི་མཐོ་རིམ་སློབ་གཉེར་ཁང་གི་སློབ་སྤྱི་དང་སློབ་སྤྱི་གཞོན་པ། དེ་བཞིན་བལ་ཡུལ་སྐུ་ཚབ་དོན་གཅོད་དང་དགོན་སྡེ་ཁག་གི་སྨན་ཁང་གི་དབུ་འཛིན་དང་སྨན་པ། འགྲོ་ཕན་བོད་ཀྱི་སྨན་རྩིས་ཁང་དང་དབུས་བདེ་ལེགས་སྨན་ཁང་གི་འགན་འཛིན་རྣམ་པ། བོད་ཀྱི་གསོ་བ་རིག་པའི་སྨན་པའི་ལྷན་ཚོགས་ཀྱི་ཚོགས་གཙོ་གཙོས། འཕྲོད་བསྟེན་ལས་ཁུངས་ཀྱི་ཁྱབ་ཁོངས་སྨན་ཁང་གི་དབུ་འཛིན་དང་སྨན་པ་སོགས་ཁྱོན་མི་གྲངས་ ༤༦ ལྷན་འཛོམས་གནང་སོང་། འཕྲོད་བསྟན་བཀའ་བློན་པདྨ་མཚོ་མཆོག་གིས། འཕྲོད་བསྟེན་གྱི་གལ་གནད་ཐོག་ནན་བརྗོད་ཁྲོད། ཕྱིའི་དངོས་པོ་དང་འཕྲུལ་ཆས་ཡར་རྒྱས་ཇི་ཙམ་ཕྱིན་ཡང་སྔོན་འགོག་གི་ཐབས་ལམ་དང་བྱེད་ཐབས་ཡག་ཤོས་ཤིག་ནི་བོད་ཀྱི་གསོ་བ་རིག་པའི་ཐབས་ལམ་ཡིན་པ་དང་། མ་འོངས་པར་བོད་ཀྱི་གསོ་བ་རིག་པ་དང་ཕྱི་ལུགས་ཀྱི་སྨན་ཟུང་སྦྲེལ་ཐོག་ནས་སྔོན་འགོག་གི་ཐབས་ལམ་ཐོག་ནུས་པ་བཏོན་ཐུབ་དགོས་གལ་སྐོར་གསུངས་བ་དང་། ལྷག་པར་དེང་སྐབས་གཞོན་སྐྱེས་ཁྲོད་སེམས་ཁམས་ཀྱི་དཀའ་ངལ་ཇེ་མང་དུ་འགྲོ་བཞིན་པ་དང་། ཁོང་ཚོས་དཀའ་ངལ་སེལ་བར་མྱོ་རྫས་དང་ཆང་རག་ལོངས་སུ་སྤྱོད་པ་སོགས་ཀྱི་གནས་ཚུལ་མང་དུ་ཕྱིན་པ་དེ་དག་ལ་སྔོན་འགོག་གི་ཐབས་ལམ་འཚོལ་དགོས་པ་ནན་བརྗོད་ཙམ་མ་ཟད། བོད་པའི་སྤྱི་ཚོགས་ཁྲོད་ཉམ་ཐག་དང་ཛ་དྲག་ཅན་གྱི་ནད་པ་སྐྱོབ་ཐབས་ཐོག་འཕྲོད་བསྟེན་ལས་ཁུངས་ཀྱི་མཁྱེན་རྟོགས་ཡོད་པའི་ཐོག་སྤྱི་མང་ཞལ་འདེབས་བསྡུ་རུབ་ཀྱིས་ཕན་ཐོགས་སྒྲུབ་དགོས་པ་སོགས་གསུངས་སོང་། རྩ་བའི་འཕྲོད་བསྟེན་ལས་ཁུངས་ནས་ལོ་གཉིས་རེའི་མཚམས་སུ་བཙན་བྱོལ་བོད་མིའི་འཕྲོད་བསྟེན་བསྐྱར་ཞིབ་ཚོགས་འདུ་བསྐོང་ཚོགས་གནང་སྲོལ་ཡོད་པ་དེ་ལྟར་ཡང༌། ཐེངས་འདིའི་ཚོགས་ཆེན་འདི་བཞིན་ཕྱི་ལོ་ ༢༠༢༢ རྗེས་ཐེངས་དང་པོ་ཆགས་ཀྱི་འདུག ཐེངས་འདིའི་ཚོགས་འདུའི་ཐོག་གཙོ་བོ་འཕྲོད་བསྟེན་སྲིད་བྱུས་གཏན་འབེབས་ཐོག་གྲོས་བསྡུར་དང་། དེ་སྔ་སྐབས་ ༧ པའི་ཚོགས་འདུའི་ཐོག་གཏན་འབེབས་གནང་བའི་གྲོས་ཆོད་རྣམས་མཇུག་སྐྱོང་དང་ལག་བསྟར་ཇི་བྱུང་གོ་བསྡུར། དེ་བཞིན་བཙན་བྱོལ་བོད་མིའི་འཕྲོད་བསྟེན་སློབ་སྟོན་ཚོགས་ཆུང་ཞིག་ཆེད་འཛུགས་གནང་རྒྱུར་དམིགས་ཡོད་པ་རེད། ཚོགས་འདུའི་ཐོག་བཙན་བྱོལ་བོད་མིའི་འཕྲོད་བསྟེན་སྲིད་བྱུས་གཏན་འབེབས་དང་འབྲེལ་ནས་འཕྲོད་བསྟན་སྨན་པའི་སློབ་སྟོན་ཚོགས་ཆུང་ཞིག་ཆེད་འཛུགས་གནང་ཡོད་པ་ལྟར། ཚོགས་ཆུང་གི་ཚོགས་མིའི་ཁོངས་སུ་སྐུའི་བླ་སྨན་པ་ས་འདུ་ཚང་ཚེ་བརྟན་རྡོ་རྗེ་ལགས་དང་། སྐུའི་བླ་སྨན་པ་ཚེ་དབང་རྟ་མགྲིན་ལགས། དེ་བཞིན་འགྲོ་ཕན་བོད་ཀྱི་སྨན་རྩིས་ཁང་གི་འགན་འཛིན་དང་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་དྲུང་འཕར། དབུས་བདེ་ལེགས་སྨན་ཁང་གི་འགན་འཛིན་སྨན་པ་བསྟན་འཛིན་བཙོན་གྲུས་ལགས། སྨན་པ་དོན་སྒྲུབ་བཀྲིས་ལགས་དང་། འཕྲོད་བསྟེན་ལས་ཁུངས་ཀྱི་ལས་བྱེད་བཅས་བསྐོ་འཛུགས་གནང་འདུག གཤམ་ལ་འདི་ག་གསར་འགོད་པས་འཕྲོད་བསྟེན་ལས་ཁུངས་ཀྱི་དྲུང་ཆེ་བྱམས་པ་ཕུན་ཚོགས་ལགས་སུ་ཚོགས་འདུའི་མཐའ་མའི་འབྲུ་དོན་དང༌། དེ་བཞིན་ཚོགས་འདུའི་ཐོག་བཅར་བའི་སྨན་པ་དང་སྐུ་ཚབ་ཁག་གཅིག་ས་གནས་སོ་སོའི་ནང་གི་འཕྲོད་བསྟེན་གྱི་གནས་འབབ་སྐོར་བཀའ་འདྲི་ཞུས་ཡོད་པས་གོང་གི་སྒྲ་སྒམ་ནས་གསན་ཐུབ། The post བོད་མིའི་སྒྲིག་འཛུགས་འཕྲོད་བསྟོན་ལས་ཁུངས་ཀྱི་གོ་སྒྲིག་འོག་འཕྲོད་བསྟེན་བསྐྱར་ཞིབ་ཚོགས་འདུ་ཐེངས་ ༨ པ་འཚོགས་པ། appeared first on vot.

དེ་རིང་བོད་མིའི་སྒྲིག་འཛུགས་ཀྱི་བསྟི་གནས་གངས་ཅན་སྐྱིད་གཤོངས་ཀྱི་སྲིད་སྐྱོང་ཚོགས་ཁང་དུ། བོད་མིའི་མཉམ་འབྲེལ་བཅོ་ལྔའི་ལོ་འཁོར་འཛིན་སྐྱོང་ཚོགས་ཆེན་ཐེངས་ ༢༥ པ་དེ་དབུ་འཛུགས་གནང་སོང་། དེ་ཡང་དེ་རིང་ནས་བཟུང་ཉིན་བཞིའི་རིང་འཚོགས་གཏན་ཁེལ་བའི་བོད་མིའི་མཉམ་འབྲེལ་བཅོ་ལྔའི་ལོ་འཁོར་འཛིན་སྐྱོང་ཚོགས་ཆེན་དུ། སྔ་དྲོ་ཚོགས་ཆེན་ཐོག་སྐུ་མགྲོན་གཙོ་བོ་ནང་སྲིད་བཀའ་བློན་དཔལ་ལྡན་དོན་གྲུབ་མཆོག་དང་དམིགས་བསལ་སྐུ་མགྲོན་བོད་མིའི་སྒྲིག་འཛུགས་ཀྱི་ཁྲིམས་ཞིབ་པ་ཆེ་བ་ཡེ་ཤེས་དབང་མོ་མཆོག་དང་བོད་མི་མང་སྤྱི་འཐུས་ཚོགས་གཙོ་སྒྲོལ་མ་ཚེ་རིང་མཆོག བོད་མི་མང་སྤྱི་འཐུས་རྒྱུན་ལས་རྣམ་པ་དང་དྲུང་ཆེ་རྣམ་པ། དེ་བཞིན་བོད་མིའི་སྤྱི་མཐུན་མཉམ་འབྲེལ་གྱི་ཚོགས་གཙོ་པདྨ་བདེ་ལེགས་ལགས་དང་ས་གནས་ཁག་བཅོ་ལྔའི་མཉམ་འབྲེལ་གྱི་ཚོགས་གཙོ་དང་དྲུང་ཆེ་བཅས་མཉམ་ཞུགས་གནང་སོང་། མཛད་སྒོའི་ཐོག་བོད་མིའི་སྒྲིག་འཛུགས་ཀྱི་ཁྲིམས་ཞིབ་པ་ཆེ་བ་ཡེ་ཤེས་དབང་མོ་མཆོག་གིས། བོད་མིའི་སྤྱི་མཐུན་མཉམ་འབྲེལ་གྱི་དྲྭ་ཚིགས་གསར་པ་དབུ་འབྱེད་གནང་སོང་བ་མ་ཟད། སྐུ་མགྲོན་གཙོ་བོ་ནང་སྲིད་བཀའ་བློན་དཔལ་ལྡན་དོན་གྲུབ་མཆོག་གིས་བོད་མིའི་མཉམ་འབྲེལ་གྱི་བྱུང་རིམ་དང་གལ་གནད་སྐོར་གསུངས་བ་དང་སྦྲགས། འཛིན་སྐྱོང་ནང་ཕྱག་ལས་གནང་བའི་སྐབས་འཐུས་ཤོར་གང་ཕྱིན་པ་རྣམས་ལ་ལྟ་རྟོག་བྱེད་ཐུབ་དགོས་པ་དང་།  གཞིས་ཆགས་ནང་རྙོག་གྲ་གང་བྱུང་པ་རྣམས་དུས་ཐོག་ལ་ཐག་གཅོད་བྱེད་ཐུབ་དགོས་གལ་ཡིན་པ་དང་ངེས་པར་དུ་རྒྱ་གར་གྱི་ཁྲིམས་དང་མཐུན་པའི་ཕྱག་ལས་གནང་དགོས་གལ་ཡིན་པའི་ལམ་སྟོན་གནང་སོང་། ཕྱོགས་མཚུངས་བོད་མི་མང་སྤྱི་འཐུས་ཚོགས་གཙོ་སྒྲོལ་མ་ཚེ་རིང་མཆོག་གིས། ལས་བྱེད་རྣམས་ནས་ཕྱག་ལས་གནང་བའི་སྐབས་ལྷག་བསམ་ཡོད་པའི་ཐོག་ནས་ཕྱག་ལས་གནང་དགོས་གལ་ཡིན་པ་ནན་བརྗོད་དང་སྦྲགས། ད་རེས་མཉམ་འབྲེལ་གྱི་ལས་བྱེད་ནང་ནམ་རྒྱུན་དང་མི་འདྲ་བའི་བུད་མེད་བརྒྱ་ཆ་ ༤༩ ཡོད་པ་ནི་དགའ་འོས་པ་ཞིག་དང་སྤོབས་པ་བྱེད་འོས་པ་ཞིག་རེད་ཅེས་གསུངས་བ་མ་ཟད། བུད་མེད་རྣམས་ནས་སྤུངས་པ་མཉམ་གཤིབ་ཀྱི་དཀའ་ལས་རྒྱག་དགོས་པ་གསུངས་སོང་། མཛད་སྒོ་གྲུབ་མཚམས་སུ་འདི་ག་རླུང་འཕྲིན་ཁང་གིས་བོད་མིའི་མཉམ་འབྲེལ་གྱི་ཚོགས་གཙོ་པདྨ་བདེ་ལེགས་ལགས་སུ་བཅར་འདྲི་ཞུས་ཡོད། རྩ་བའི་ཐེངས་འདིའི་བོད་མིའི་མཉམ་འབྲེལ་བཅོ་ལྔའི་ལོ་འཁོར་འཛིན་སྐྱོང་ཚོགས་ཆེན་ཐེངས་ ༢༥ པ་དེ་བཞིན་དེ་རིང་ནས་བཟུང་ཚེས་ ༣༠ བར་ཉིན་གྲངས་བཞིའི་རིང་འཚོག་རྒྱུ་ཡིན་པ་དང་ས་གནས་ཁག་ ༡༥ ནས་མཉམ་འབྲེལ་ཚོགས་གཙོ་དང་དྲུང་ཆེ་རྣམ་པ་ཆེད་ཕེབས་གནང་ཡོད་པ་མ་ཟད། ཉིན་བཞིའི་རིང་བོད་མིའི་མཉམ་འབྲེལ་ཁག་གི་ལས་དོན་གནང་ཕྱོགས་དང་ལྷག་པར་དུ་ལོ་འཁོར་ལས་བསྡོམས་དང་རྩིས་ཁྲ་སྙན་སེང་བཅས་ཞུ་རྒྱུ་ཡིན་པ་རེད་འདུག The post བོད་མིའི་མཉམ་འབྲེལ་བཅོ་ལྔའི་ལོ་འཁོར་འཛིན་སྐྱོང་ཚོགས་ཆེན་ཐེངས་ ༢༥ པ་དབུ་འཛུགས། appeared first on vot.

བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་ཁ་སང་སྙན་ཐོ་ཞིག་འདོན་སྤེལ་གནང་བའི་བརྒྱུད། རྒྱ་ནག་གཞུང་གིས་འདི་ལོའི་ཕྱི་ཟླ་ ༣ པའི་ཚོགས་འདུའི་ཐོག་གཏན་འབེབས་དང་ཕྱི་ཟླ་ ༧ པའི་ཚེས་ ༡ ནས་ལག་བསྟར་བྱས་འགོ་བཙུགས་པའི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་ཟེར་བའི་ཁྲིམས་གསར་པ་དེས་རྒྱལ་ཁབ་གཅིག་གྱུར་གྱི་སྐད་ཡིག་དང་རྒྱ་མི་རིགས་ཀྱི་ངོ་བོ་གཙོ་བོར་འཛིན་པའི་སྲིད་བྱུས་ལ་ཁྲིམས་ཐོག་ནས་གཞི་འཛིན་ས་བཟོས་ཡོད་སྟབས།  དེས་བོད་ཀྱི་སྐད་ཡིག་དང་ཤེས་ཡོན་གྱི་ལམ་སྲོལ་རྩ་མེད་གཏང་ཉེན་གྱི་སེམས་འཚབ་གསར་པ་བཟོ་བཞིན་པ་མངོན་གསལ་གནང་འདུག དེ་ཡང་ཁ་སང་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་དྲྭ་གནས་ཐོག་བོད་ནང་དུ་རྒྱ་ནག་གི་མི་རིགས་མཐུན་སྒྲིལ་གྱི་ཁྲིམས་གསར་པ་དེ་ལག་བསྟར་དང་འབྲེལ་བའི་གནས་སྟངས་སྐོར་སྙན་ཐོ་འདོན་སྤེལ་གནང་བ་དེའི་ནང་དུ། ཁྲིམས་ཡིག་དེའི་ནང་རིམ་ཁག་སློབ་གྲྭ་དང་ཤེས་ཡོན་ཁྱབ་ཁོངས་ནང་རྒྱལ་ཁབ་གཅིག་གྱུར་གྱི་སྐད་ཡིག་དེ་སློབ་ཁྲིད་ཀྱི་རྩ་འཛིན་དུ་གཏན་འཁེལ་བྱས་པ་མ་ཟད།  སློབ་གྲྭ་ཁག་གི་ཤེས་ཡོན་སློབ་གསོའི་ལམ་སྲོལ་ནང་རྒྱ་མི་རིགས་ཀྱི་འདུ་ཤེས་དང་རྒྱལ་ཁབ་གཅིག་གྱུར་གྱི་སློབ་དེབ་བེད་སྤྱོད་བྱེད་དགོས་པ་གཏན་འབེབས་བྱས་ཡོད་འདུག་ལ། ཁྲིམས་ཡིག་དེས་བོད་དང་གྲངས་ཉུང་མི་རིགས་གཞན་དག་གི་ཁྲོད་དུ་ཤེས་ཡོན་ནི་རྒྱལ་ཁབ་གཅིག་གྱུར་གྱི་ངོ་བོ་སྲ་བརྟན་དུ་གཏོང་བའི་གཞི་རྒྱ་ཆེ་བའི་ལས་འགུལ་ཞིག་བཟོས་ཡོད་པ་ཐེར་འདོན་གནང་འདུག ལྷག་པར་དུ་ཁྲིམས་དེའི་དོན་ཚན་བཅོ་ལྔ་པའི་ནང་སློབ་གྲྭ་ཚང་མས་རྒྱལ་ཁབ་གཅིག་གྱུར་གྱི་སྐད་ཡིག་དེ་སློབ་གསོ་སློབ་ཁྲིད་ཀྱི་གཙོ་བོར་འཇོག་དགོས་པ་དང་།  དེ་བཞིན་བུ་བཅོལ་ཁང་གི་བྱིས་པ་ཚོས་ཀྱང་རྒྱལ་ཁབ་གཅིག་གྱུར་གྱི་སྐད་ཡིག་སློབ་སྦྱོང་དང་། འོས་འགན་སློབ་གསོའི་འགྲིམས་པའི་སློབ་མ་ཚོས་གཞི་རྩའི་ཆ་ནས་རྒྱལ་ཁབ་གཅིག་གྱུར་གྱི་སྐད་ཡིག་རང་རྐྱ་འཕེར་དགོས་པ་གཏན་འབེབས་བྱས་ཡོད་པ་འཁོད་ཡོད་པ་དང་། དོན་ཚན་བཅུ་དྲུག་པའི་ནང་སློབ་གྲྭ་དང་ཤེས་ཡོན་སྡེ་ཚན་གྱིས་སློབ་གསོའི་བརྒྱུད་རིམ་ཧྲིལ་པོར་མི་རིགས་མཉམ་འདྲེས་ཀྱི་འདུ་ཤེས་བསྐྲུན་དགོས་པ་དང་།  དེ་ཡང་འཛིན་གྲྭའི་ནང་གི་སློབ་ཁྲིད་དང་། སྤྱི་ཚོགས་ཀྱི་ལག་ལེན། དེ་བཞིན་གཙོ་གནད་སློབ་གསོ་དང་དྲྭ་ཐོག་སློབ་གསོ།  དེའི་ནང་ད་དུང་རྒྱལ་ཁབ་གཅིག་གྱུར་གྱི་སློབ་དེབ་བེད་སྤྱོད་བྱ་རྒྱུ་བཅས་ཚུད་ཡོད་པ་དང་། སློབ་གསོའི་ལས་ཁུངས་ཀྱིས་སློབ་དེབ་རྩོམ་སྒྲིག་དང་ཞིབ་བཤེར་གྱི་འགན་འཁྲི་འཁུར་དགོས་པ་མ་ཟད།  ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བསྐྲུན་རྒྱུའི་སློབ་གཞི་རྩོམ་སྒྲིག་དགོས་པའི་ནན་བརྗོད་བྱས་ཡོད་པར་བརྟེན།  ཁྲིམས་ཡིག་དེ་ནི་རྒྱལ་ཁབ་གཅིག་གྱུར་གྱི་སྐད་ཡིག་ཁྱབ་གདལ་གཏོང་རྒྱུའི་ས་མཚམས་ལས་བརྒལ་ཏེ། སྐད་ཡིག་དང་། སློབ་ཚན། རྒྱལ་ཁབ་ཀྱི་ངོ་བོ་བཅས་ཤེས་ཡོན་གྱི་ཁྲིམས་ཡིག་ནང་བཅུག་ཡོད་པ་གསུངས་འདུག དེའི་ཁྲོད་བོད་ནང་དུ་འབྲེལ་ཡོད་ལས་ཁུངས་ཁག་གིས་གཏན་འབེབས་དེ་དག་དང་འབྲེལ་བའི་ཤེས་ཡོན་གྱི་ལས་འགུལ་སྤེལ་འགོ་ཚུགས་པའི་ཁྲོད། ཟླ་བ་འདིའི་ཚེས་ ༡༢ ཉིན་བོད་རང་སྐྱོང་ལྗོངས་ཟེར་བའི་གསར་འགྱུར་གཞུང་ལས་ཁང་ཟེར་བས་གསར་འགོད་ལྷན་ཚོགས་ཤིག་སྐོང་འཚོགས་བྱས་པའི་ཐོག་བོད་རང་སྐྱོང་ལྗོངས་སློབ་གསོའི་ལས་ཁུངས་ཀྱི་འགན་འཛིན་གཞོན་པ་ལི་ཇེ་ཡིས་རྒྱ་ནག་ལ་དགའ་ཞེན་གྱི་ས་བོན་འདེབས་པའི་ལས་འགུལ་གཏིང་ཟབ་སྤེལ་རྒྱུ་ཡིན་པ་ནན་བརྗོད་བྱས་པ་མ་ཟད། མི་རིགས་མཐུན་སྒྲིལ་ཡར་ཐོན་གྱི་སློབ་ཚན་དེ་སློབ་གྲྭ་ཆེ་འབྲིང་ཆུང་གསུམ་དང་།  ཐ་ན་བུ་བཅོལ་ཁང་ནང་དུའང་ཁྱབ་གདལ་གཏོང་རྒྱུའི་ཐག་གཅོད་བྱས་ཡོད་པ། དེ་བཞིན་མི་རིགས་ཁག་གི་དགེ་སློབ་བར་ཕན་ཚུན་མཉམ་འདྲེས་དང་མཉམ་འདུས་ཀྱི་བྱེད་སྒོ་སྤེལ་དགོས་པ་དང་། རྒྱལ་ཁབ་གཅིག་གྱུར་གྱི་ངོ་བོ་དང་སྤྱི་སྤྱོད་སྐད་ཡིག་ཁྱབ་གདལ་ལ་ཤུགས་སྣོན་དང་སློབ་དེབ་གསར་རྩོམ་དང་སློབ་གྲྭ་ཁག་ཏུ་བསམ་བློ་ཆབ་སྲིད་ཀྱི་སློབ་གསོ་གཏིང་ཟབ་སྤེལ་དགོས་པའི་ནན་བརྗོད་བྱས་ཡོད་པ་རེད་འདུག འདི་ཚེས་ ༡༢ ཉིན་གྱི་གསར་འགོད་ལྷན་ཚོགས་ཐོག་གཞན་ཡང་ད་དུང་། བོད་པའི་བྱིས་པ་ཚོར་ཆུང་དུས་ནས་རྒྱལ་ཁབ་གཅིག་གྱུར་གྱི་སྐད་ཡིག་སྦྱང་ཤེས་དང་རྒྱ་མི་རིགས་ཀྱི་ངོ་བོ་གཙོ་བོར་འཛིན་རྒྱུའི་སློབ་གསོ་སྤེལ་རྒྱུ་དང་འབྲེལ་ནས་སྔོན་འགྲོ་ནས་སློབ་གྲྭ་ཆེན་མོ་བར་གྱི་རིམ་པ་ཁག་གི་སློབ་གྲྭར་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་སྐོར་གྱི་སློབ་དེབ་རྩོམ་སྒྲིག་བྱེད་བཞིན་ཡོད་པ་དང་།  སློབ་དེབ་དེ་དག་གི་ཁོངས་སུ་སྔོན་འགྲོའི་སློབ་གྲྭའི་ནང་ཀྲུང་ཧྭ་མི་རིགས་ཁྱིམ་ཚང་གཅིག་ཟེར་བ་དང་། སློབ་ཆུང་ནང་དུ་ཀྲུང་ཧྭ་མི་རིགས་ཁྱིམ་ཚང་ཆེན་མོ་ཟེར་བ།སློབ་འབྲིང་ནང་ཀྲུང་ཧྭ་མི་རིགས་མཐུན་སྒྲིལ་ཆེན་མོ་ཟེར་བ།  དེ་བཞིན་སློབ་གྲྭ་ཆེན་མོའི་ནང་ཀྲུང་ཧྭ་མི་རིགས་གཅིག་མཐུན་ཚོགས་པའི་གཞུང་ལུགས་ཟེར་བ་བཅས་གཏན་འབེབས་བྱེད་དགོས་པའི་ཐག་གཅོད་ལག་བསྟར་བྱེད་བཞིན་ཡོད་པ་རེད་འདུག ཁྲིམས་ཡིག་དེ་དངོས་སུ་ལག་བསྟར་བྱས་ཏེ་བདུན་ཕྲག་གཉིས་ཙམ་སོང་རྗེས་ཀྱི་ཕྱི་ཟླ་ ༧ པའི་ཚེས་ ༡༥ ཉིན་གཞིས་བཞུགས་བོད་མི་ཞིག་གིས་ལྟེ་གནས་ཁང་ལ་གནས་ཚུལ་མཁོ་སྤྲོད་གནང་བའི་ནང་དུ། བོད་མཚོ་སྔོན་དང་ ཟི་ཁྲོན།  དེ་བཞིན་ཀན་སུའུ་ཞིང་ཆེན་བཅས་ཀྱི་ནང་བོད་ཡིག་སློབ་དེབ་གསར་པ་རྩོམ་སྒྲིག་བྱེད་བཞིན་ཡོད་པ་དང་། སློབ་དེབ་དེ་དག་གི་ནང་སྙན་ངག་མེ་ལོང་དང་། ཆུ་ཤིང་བསྟན་བཅོས། དེ་བཞིན་གུང་ཐང་བསྟན་པའི་སྒྲོན་མེས་བརྩམས་པའི་ཉམས་མྱོང་རྒན་པོའི་འབེལ་གཏམ་སོགས་བོད་ཀྱི་སྲོལ་རྒྱུན་གྱི་རྩོམ་རིག་དང་བརྩམས་ཆོས་མང་པོ་ཕྱིར་འཐེན་བྱས་ཡོད་པ་མ་ཟད། སློབ་དེབ་གསར་པ་དེ་དག་གི་ནང་བོད་ཀྱི་རིག་གཞུང་གི་ནང་དོན་མེད་པའམ་ཡང་ན་ཧ་ཅང་ཉུང་ཉུང་ཡིན་པར་བརྟེན་བོད་ཕྲུག་ཚོས་སོ་སོའི་མི་རིགས་ཀྱི་རིག་གཞུང་ལ་རྒྱུུས་ལོན་དང་གོ་རྟོགས་ཧ་ཅང་ཞན་པོ་ཆག་རྒྱུའི་ཐུགས་འཚབ་འགྲེལ་བརྗོད་གནང་ཡོད་འདུག འདི་གའི་གསར་འགོད་པས་དེ་རིང་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་བསྟན་འཛིན་ཟླ་བ་ལགས་སུ་སྙན་ཐོ་དེའི་སྐོར་བཀའ་འདྲི་ཞུ་སྐབས་ཁོང་གིས། […] The post རྒྱ་ནག་གི་མི་རིགས་མཐུན་སྒྲིལ་གྱི་ཁྲིམས་གསར་པས་བོད་ཀྱི་སྐད་ཡིག་དང་ཤེས་ཡོན་གྱི་ལམ་སྲོལ་རྩ་མེད་གཏང་བའི་སེམས་འཚབ་བཟོ་བཞིན་པ་མངོན་གསལ། appeared first on vot.

དཔའ་བོ་བློ་དགའ་རང་བཙན་ལགས་ཀྱིས་རྒྱ་དམར་གཞུང་ལ་ངོ་རྒོལ་གྱིས་བོད་བསྟན་སྲིད་མི་རིགས་དོན་དུ་རང་ལུས་མེར་བསྲེགས་བཏང་བ་ནས་བཟུང་། འཛམ་གླིང་ཡུལ་གྲུ་གང་སར་བོད་མིའི་འདུ་སྡོད་ས་གནས་ཁག་ཏུ་ལས་འགུལ་རིམ་པ་སྤེལ་དང་སྤེལ་བཞིན་ཡོད་ཅིང་། ལས་འགུལ་ཁྲོད་བོད་མི་ཁག་གཅིག་གི་བོད་དོན་དང་འབྲེལ་བའི་གོམ་བགྲོད་ཀྱི་ལས་འགུལ་སྤེལ་བའི་ཁྲོད། ཨ་རིར་གནས་བཞུགས་བོད་མི་བསོད་ནམས་རྡོ་རྗེ་ལགས་ཀྱིས་ Chicago རྒྱ་ནག་གཞུང་ཚབ་ལས་ཁུངས་ནས་ Washington DC ཝ་ཤིང་ཊོན་ཌི་སི་རྒྱ་ནག་གཞུང་ཚབ་ལས་ཁུངས་བར་མེ་ལེ་ ༡༠༠༠ ཡི་རྒྱང་ཐག་ལྡན་པའི་རང་དབང་གོམ་བགྲོད་ཀྱི་ལས་འགུལ་འགོ་འཛུགས་གནང་འདུག དེ་ཡང་ཁ་སང་ཕྱི་ཟླ་ ༨ ཚེས་ ༢༥ ཉིན་བོད་མི་བསོད་ནམས་རྡོ་རྗེ་ལགས་ཀྱིས་ཉིན་གྲངས་ ༤༠ ཙམ་གྱི་རང་དབང་གོམ་བགྲོད་ཀྱི་ལས་འགུལ་འདི་བཞིན་ Chicago ཅི་ཀ་གོ་རྒྱ་ནག་གཞུང་ཚབ་ལས་ཁུངས་ཀྱི་མདུན་དུ་སྐད་འབོད་དང་བཅས་འགོ་འཛུགས་གནང་འདུག་པ་དང་། སྐབས་དེར་ཅི་ཀ་གོ་བོད་རིགས་སྤྱི་མཐུན་ཚོགས་པའི་ཚོགས་གཙོ་ཚུལ་ཁྲིམས་ངག་གྲགས་ལགས་དང་སྤྱི་མཐུན་ཚོགས་པའི་ཚོགས་གཙོ་ཟུར་པ་བཀྲ་ཤིས་ཚེ་རིང་ལགས་ནས་གོམ་བགྲོད་དེ་ཉིད་དབུ་འབྱེད་དང་། ས་གནས་མང་ཚོགས་ཁག་གཅིག་ཆེད་ཕེབས་གནང་འདུག རྩ་བའི་དེ་སྔོན་བསོད་ནམས་རྡོ་རྗེ་ལགས་ཀྱིས་རང་དབང་གོམ་བགྲོད་དེ་དང་འབྲེལ་བའི་གསལ་བསྒྲགས་སྤེལ་བའི་ནང་། ལས་འགུལ་འདི་ད་བར་གཞིས་བྱེས་གཉིས་སུ་རྒྱལ་གཅེས་དཔའ་བོ་དཔའ་མོ་བོད་མི་ ༡༧༠ ལྷག་གི་རང་ལུས་མེར་བསྲེགས་ཀྱིས་བློས་བཏང་ལ་གདུང་སེམས་མཉམ་བསྐྱེད་དང་། ཁོང་རྣམ་པའི་སྐུ་ཚབ་བྱས་ཏེ། གྲོང་ཁྱེར་ཆེ་ཁག་ Chicago ཅི་ཀ་གོ་དང་ Indianapolis དེ་བཞིན་ Ohio དང Virginia མངའ་སྡེའི་བརྒྱུད་ནས་བོད་དོན་ཞུ་གཏུག་ཀྱིས་གོམ་བགྲོད་ལས་འགུལ་སྤེལ་རྒྱུ་དང་། ལྷག་པར་དུ་ལས་འགུལ་འདིའི་ནང་དབུ་མའི་ལམ་དང་རང་བཙན་གྱི་ལངས་ཕྱོགས་ཇི་འདྲ་ཡིན་རུང་མཉམ་ཞུགས་གནང་ན་དགའ་བསུ་ཡོད་སྐོར་བརྗོད་ཡོད་པ་མ་ཟད། ད་ལྟའི་དུས་སྐབས་དུ་རྡོག་རྩ་ཆིག་སྒྲིལ་གྱིས་ནུས་པ་འདོན་རྒྱུ་དང་བོད་དོན་དྲིལ་བསྒྲགས་ཀྱི་ལས་འགུལ་སྤེལ་དགོས་རྒྱུ་ཤིན་ཏུ་ནས་གལ་ཆེན་པོ་ཡིན་པ་གསལ་སྟོན་གནང་འདུག ཁ་སང་ལས་འགུལ་ཉིན་དང་པོ་གྲུབ་རྗེས། ཁོང་གིས་དེ་འབྲེལ་བརྙན་ཐུང་ཞིག་འདོན་སྤེལ་གནང་འདུག་པ་དང་། དེའི་ནང་ཁོང་གིས་གོམ་བགྲོད་གནང་བཞིན་པའི་བར་དུ་བཀའ་མོལ་གནང་བའི་ཁྲོད་ནས། ལས་འགུལ་འདི་ཉེ་སྔོན་ཨ་རི་ Minnesota མི་ནི་སོ་ཊ་ནས་ Chicago ཅི་ཀ་གོ་བར་བོད་མི་ཁག་གཅིག་ནས་བོད་དོན་གོམ་བགྲོད་གནང་བའི་དེའི་རྒྱུན་མཐུད་ལས་འགུལ་ཞིག་ཀྱང་མཚོན་གྱི་ཡོད་ཅིང་། གོམ་བགྲོད་འདི་བཞིན་ཟླ་བ་གཅིག་གི་ནང་དུ་མཇུག་སྒྲིལ་ཟིན་ཐུབ་ཀྱི་ཡོད་ཀྱང་། ཉིན་གྲངས་ ༡༠ འཕར་མ་བཞག་དགོས་དོན་ནི་ལམ་བར་དུ་དཀའ་ངལ་འཕྲད་པའི་གནས་སྟངས་རིགས་བྱུང་ཚེ་ཉལ་གསོ་རྒྱག་རྒྱུར་དམིགས་པ་ཞིག་ཡིན་པ་བརྗོད་འདུག ལྷག་པར་ཕྱི་ཟླ་ ༡༠ ཚེས་ ༢ ཉིན་མཇུག་སྒྲིལ་གནང་རྒྱུའི་དུས་ཚིགས་དེ་ཡང་། […] The post ཅི་ཀ་གོ་ནས་ཝ་ཤིང་ཊོན་རྒྱ་ནག་གཞུང་ཚབ་ལས་ཁུངས་བར་རང་དབང་གོམ་བགྲོད་ཀྱི་ལས་འགུལ་དབུ་འཛུགས། appeared first on vot.

བོད་པའི་གློག་བརྙན་བཟོ་བསྐྲུན་པ་གཞན་ཕན་ཁྱིམ་གསར་ལགས་ཀྱིས་བཟོ་བསྐྲུན་གནང་བའི་གློག་བརྙན་ཆུ་བཞི་སྒང་དྲུག་ཞེས་པ་དེ་འདི་ལོའི་ཕྱི་ཟླ་ ༩ པའི་ཚེས་ ༡༡ ནས་འགོ་བཙུགས་ཏེ་རྒྱ་གར་རྒྱལ་ཡོངས་ཀྱི་གློག་བརྙན་ཁང་ཁག་གི་ནང་དུ་གཟིགས་འབུལ་ཞུ་རྒྱུ་ཡིན་པ་དང་བསྟུན། ཉེ་ཆར་རྒྱ་ནག་གཞུང་གིས་གློག་བརྙན་འདིས་ལོ་རྒྱུས་རྫུན་བཟོ་བྱེད་ཀྱི་ཡོད་པའི་སྐྱོན་བརྗོད་བྱས་འདུག དེ་ཡང་ཉེ་ཆར་ཕྱི་ཚེས་ ༢༠ ཉིན་ CGTN ཞེས་པའི་རྒྱ་ནག་གཞུང་འབྲེལ་བརྒྱུད་ལམ་ཐོག་དཔྱད་རྩོམ་ཞིག་སྤེལ་བའི་ནང་དུ། ཟླ་བ་རྗེས་མའི་ནང་ཆུ་བཞི་སྒང་དྲུག་ཞེས་པའི་གློག་བརྙན་དེ་རྒྱ་གར་རྒྱལ་ཡོངས་ནང་དུ་གཟིགས་འབུལ་འགོ་འཛུགས་རྒྱུ་ཡིན་སྐོར་དང་། ལྷག་པར་དུ་གློག་བརྙན་བཟོ་བསྐྲུན་པ་གཞན་ཕན་ཁྱིམ་གསར་ལགས་ཀྱིས་དེ་སྔོན་རང་ཉིད་ཀྱི་ངོ་དེབ་ཐོག་གློག་བརྙན་དེའི་སྐོར་གླེང་སློང་ཁྲོད་བོད་དེ་ནམ་ཡང་རྒྱ་ནག་གི་ཆ་ཤེས་མ་རེད་ཅེས་འགྲེལ་བརྗོད་བྱས་པ་ལུང་འདྲེན་དང་སྦྲགས། ཁོང་གི་འགྲེལ་བརྗོད་བྱས་པ་དེ་དག་གཞི་མེད་ཡིན་པ་མ་ཟད། ལོ་རྒྱུས་རྫུན་བཟོ་བྱས་པ་ཞིག་ཡིན་པའི་སྐྱོན་བརྗོད་བྱས་འདུག དེའང་དུས་རབས་ ༡༣ ཙམ་ནས་བོད་ཐོག་རྒྱ་ནག་གི་བདག་དབང་ཡོད་པ་མ་ཟད། ཕྱི་ལོ་ ༡༩༤༩ ལོར་རྒྱ་ནག་མི་མང་སྤྱི་མཐུན་རྒྱལ་ཁབ་ཞེས་པ་དེ་ཆགས་པའི་སྐབས་སུའང་བོད་དེ་རྒྱ་ཁོངས་ཡིན་ཚུལ་དང་། ཕྱི་ལོ་ ༡༩༥༡ ལོའི་ཕྱི་ཟླ་ ༢ པའི་ནང་དུ་གྲོས་མཐུན་དོན་ཚན་ ༡༧ ཟེར་བ་བཞག་སྟེ་བོད་བཅིངས་བཀྲོལ་བཏང་སྐབས་བོད་མི་དང་༸གོང་ས་མཆོག་གིས་ཀྱང་དགའ་བསུ་དང་རྒྱབ་སྐྱོར་གནང་ཡོད་ཚུལ་བརྗོད་འདུག  གཞན་ཡང་བཙན་བྱོལ་ནང་གི་བོད་མིའི་སྒྲིག་འཛུགས་ཀྱི་གཞུང་དེ་བཞིན་ཁྲིམས་འགལ་གྱི་གཞུང་ཡིན་པ་དང་རྒྱལ་སྤྱིའི་ངོས་ལེན་མེད་ལུགས། དེ་བཞིན་བོད་ནང་བརྟན་ལྷིང་དང་འཛུགས་བསྐྲུན་ཡར་རྒྱས་ཡོད་ལུགས་སོགས་རྒྱ་ནག་གི་འཁྱོག་བཤད་དྲིལ་བསྒྲགས་ཡོངས་རྫོགས་བཀོད་དེ། གཞན་ཕན་ཁྱིམ་གསར་ལགས་ཀྱིས་གློག་བརྙན་ཀྱི་གླེང་སྟེགས་དེ་ཁ་བྲལ་གྱི་བྱ་འགུལ་སྤེལ་རྒྱུར་བེད་སྤྱོད་གཏོང་བཞིན་པ་དང་གློག་བརྙན་དེ་ཡང་ལོ་རྒྱུས་ལ་འཁྱོག་བཤད་རང་ཡིན་སྐོར་སོགས་བརྗོད་འདུག རྩ་བའི་ཆུ་བཞི་སྒང་དྲུག་ཞེས་པའི་གློག་བརྙན་འདི་བཞིན་དེ་སང་བོད་རྒྱ་ནག་གི་བཙན་བཟུང་བྱས་པའི་སྐབས་སུ་ཆུ་བཞི་སྒང་དྲུག་གཙོས་པའི་བོད་མི་རྣམས་ཀྱིས་རྒྱ་ནག་གི་བཙན་འཛུལ་ལ་འགོག་རྒོལ་དང་༸གོང་ས་མཆོག་རྒྱ་གར་ལ་གདན་འདྲེན་ཞུ་རྒྱུ་དང་འབྲེལ་བའི་ལོ་རྒྱུས་མངོན་གསལ་གནང་གི་ཡོད་པ་དང་། གློག་བརྙན་དེ་བཞིན་ Mustang ཞེས་བོད་ཀྱི་ས་ཁམས་མཚུངས་པའི་ Mustang གྱི་ས་ཁུལ་དུ་འཁྲབ་སྟོན་གནང་ཡོད་པ་རེད། གློག་བརྙན་འདི་ཐོག་མར་དབྱིན་སྐད་ཐོག་བཟོ་བསྐྲུན་གནང་བའི་རྗེས་སུ་ད་ཆ་རྒྱ་གར་སྐད་ནང་སྐད་སྒྱུར་བྱས་ཏེ་གཟིགས་འབུལ་བྱེད་ཀྱི་ཡོད་པའི་ཁར། རྒྱ་གར་སྐད་ནང་སྒྲ་འཇུག་བྱེད་མཁན་གཙོ་བོ་གཅིག་ནི་རྒྱ་གར་གྱི་གློག་བརྙན་འཁྲབ་སྟོན་པ་གྲགས་ཅན་ Nawaz Uddin Siddiqi ཞེས་པ་ཡིན་པ་རེད། རྒྱ་ནག་གཞུང་གིས་ད་ལན་ཙམ་མ་ཟད། དེ་སྔ་ཕྱི་ལོ་ ༢༠༢༥ ལོར་གློག་བརྙན་དེ་ Rotterdam གློག་བརྙན་དུས་སྟོན་ཐོག་ཐོག་མར་གཟིགས་འབུལ་ཞུས་པའི་སྐབས་སུའང་རྒྱ་ནག་གཞུང་འབྲེལ་བརྒྱུད་ལམ་ཐོག་ཆུ་བཞི་སྒང་དྲུག་གི་གློག་བརྙན་དེ་དང་བཟོ་བསྐྲུན་པ་གཉིས་ལ་སྐྱོན་བརྗོད་ཀྱི་གནས་ཚུལ་སྤེལ་ཡོད་པ་རེད། ད་ལན་རྒྱ་ནག་གི་སྐྱོན་བརྗོད་གནས་ཚུལ་དེའང་རིང་མིན་ཕྱི་ཟླ་ ༩ པའི་ཚེས་ ༡༡ ཉིན་གློག་བརྙན་དེ་རྒྱ་གར་རྒྱལ་ཡོངས་ནང་གཟིགས་འབུལ་འགོ་བཙུགས་ལ་རན་སྐབས་རྒྱ་ནག་གིས་དེ་ལྟར་སྐྱོན་བརྗོད་བྱས་པའི་གནད་དོན་ཐད་གཞན་ཕན་ཁྱིམ་གསར་ལགས་སུ་བཀའ་འདྲི་ཞུ་སྐབས་ཁོང་གིས། རྒྱ་ནག་གི་བྱ་སྤྱོད་དེ་དག་དགོད་བྲོ་བ་དང་ཐབས་སྐྱོ་བའི་གནད་དོན་ཞིག་ལ་ངོས་འཛིན་གནང་གི་ཡོད་པ་གསུངས་སོང་། The post རྒྱ་ནག་གཞུང་འབྲེལ་བརྒྱུད་ལམ་གྱིས་བོད་ཀྱི་ལོ་རྒྱུས་དང་འབྲེལ་བའི་གློག་བརྙན་ལ་སྐྱོན་བརྗོད། appeared first on vot.

 དེ་རིང་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ཁྱབ་ཁོངས་ས་གནས་འགོ་འཛིན་དང་སོ་ནམ་སློབ་སྟོན་པ་རྣམས་ཀྱི་འཛིན་སྐྱོང་ཚོགས་ཆེན་ཐེངས་ ༡༧ པ་དབུ་འཛུགས་དང་འབྲེལ། ཚོགས་ཆེན་ཐོག་རྒྱ་དམར་གཞུང་གི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཡིག་ཟེར་བར་གདོང་ལེན་བྱེད་ཕྱོགས་དང་། དབུས་ས་གཉིས་ཀྱི་འཛིན་སྐྱོང་ཚགས་ཚུད་ཡོང་ཐབས་སོགས་གྲོས་གཞི་དོན་ཚན་ལྔའི་ཐོག་གོ་བསྡུར་གནང་རྒྱུ་ཡིན་འདུག དེ་ཡང་དེ་རིང་ཕྱི་ཟླ་ ༨ ཚེས་ ༢༥ ཉིན་བོད་མིའི་སྒྲིག་འཛུགས་སྤྱི་ཐབས་ཀྱི་ཡང་སྟེང་ཚོགས་ཁང་དུ། ནང་སྲིད་ལས་ཁུངས་ཀྱི་ཁྱབ་ཁོངས་ས་གནས་འགོ་འཛིན་དང་སོ་ནམ་སློབ་སྟོན་པ་རྣམས་ཀྱི་འཛིན་སྐྱོང་ཚོགས་ཆེན་ཐེངས་ ༡༧ པ་དབུ་འཛུགས་གནང་སོང་བ་དང་། དབུ་འབྱེད་མཛད་སྒོའི་ཐོག་སྐུ་མགྲོན་གཙོ་བོར་སྲིད་སྐྱོང་སྤེན་པ་ཚེ་རིང་མཆོག་གིས་དབུས་པའི་ནང་སྲིད་བཀའ་བློན་དཔལ་ལྡན་དོན་གྲུབ་མཆོག བཀའ་བློན་གཞན་རྣམ་པ། དེ་བཞིན་ལྷན་ཁང་ཁག་གི་དྲུང་ཆེ་རྣམ་པ་དང་ནང་སྲིད་ལས་ཁུངས་ཀྱི་སྲི་ཞུ་ལས་བྱེད། ས་གནས་འགོ་འཛིན་ཁག་ ༣༦ དང་སོ་ནམ་སློབ་སྟོན་པ་ ༡༢ བཅས་ལྷན་ཞུགས་གནང་སོང་། ད་རེས་ཚོགས་ཆེན་འདི་ཉིད་འདི་ཚེས་ ༢༨ བར་ཉིན་གྲངས་བཞིའི་རིང་འཚོགས་རྒྱུ་དང་། འདི་ག་རླུང་འཕྲིན་ཁང་ནས་ནང་སྲིད་དྲུང་ཚབ་ཚེ་རིང་གཡུ་སྒྲོན་ལགས་སུ་ཐེངས་འདིའི་ཚོགས་ཆེན་གྲོས་གཞི་སྐོར་བཀའ་འདྲི་ཞུས་སྐབས། ཁོང་གིས་གཙོ་བོ་རྒྱ་ནག་གཞུང་གཏན་འབེབས་བྱས་པའི་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་ཟེར་བར་གདོང་ལེན་བྱེད་ཕྱོགས་དང་། གཞིས་ཆགས་སོ་སོའི་ནང་ཞིང་ས་སྟོང་པ་མ་ལྷག་པར་ཐོག་མའི་དམིགས་ཡུལ་ལྟར་བེད་སྤྱོད་ཚུལ་མཐུན་ཡོང་ཐབས་སྐོར། རྒྱ་བལ་འབྲུག་གསུམ་ཁུལ་གྱི་བཙན་བྱོལ་བོད་མིའི་གཞིས་ཆགས་དང་ཁ་འཐོར་ས་གནས་ཁག་གི་སྤྱི་མིའམ་བརྒྱ་དཔོན་རྣམ་པའི་ལས་དོན་འགན་འཁུར་ཞུ་ཕྱིགས་ཀྱི་རྩ་འཛིན་ལམ་སྟོན་ལག་བསྟར་ཞུ་ཕྱོགས་སྐོར། ནང་སྲིད་ལས་ཁུངས་ཀྱི་ཁྱབ་ཁོངས་རྒས་གསོ་ཁང་གི་འཛིན་སྐྱོང་ཚགས་ཚུད་གཏོང་ཕྱོགས་སྐོར་དང་། དབུས་ས་གཉིས་ཀྱི་འཛིན་སྐྱོང་ཚགས་ཚུད་ཡོང་ཐབས་སྐོར་དང་སྤྱི་སྨན་དགོངས་འཆར་བཅས་གྲོས་གཞི་དོན་ཚན་ལྔ་ཡོད་པ་འགྲེལ་བརྗོད་གནང་སོང་། སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། ཚོགས་བཅར་བ་རྣམས་ལ་ལས་དོན་གནང་སྐབས་བོད་སྤྱི་པའི་རྩ་དོན་ཆེད་དུ་ཞབས་ཕྱི་ཞུ་མཁན་ཞིག་ཡིན་བསམ་པའི་ཀུན་སློང་སྙིང་བཅངས་དང་། ཁྲིམས་སྒྲིག་གཞི་དང་དཔའ་འབྱོར་གྱི་གནས་བབ་ཡག་པོ་ཤེས་དགོས་རྒྱུ། དེ་བཞིན་ལས་དོན་ཇི་འདྲ་ཞིག་གནང་ཡང་བཅའ་ཁྲིམས་དགོངས་དོན་དང་། ལྷག་པར་ཡུལ་ཁྲིམས་ལ་བརྩི་སྲུང་ངེས་པར་དུ་ཞུ་དགོས་པ། ༸གོང་ས་༸སྐྱབས་མགོན་ཆེན་པོ་མཆོག་ཐུགས་སུན་མི་ཡོང་བ་དང་བོད་ནང་གི་བོད་མིའི་རེ་བ་མ་བརླག་པ་བྱ་དགོས་གལ་ཡིན་པ་དྲན་སྐུལ་གནང་སོང་། ལྷག་པར་རྒྱ་ནག་གི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཡིག་ཟེར་བ་དེའི་ནང་དོན་ཞིབ་ཚགས་པོ་ཤེས་པའི་ཐོག་ནས་གདོང་ལེན་གནང་དགོས་ཤིང་། མཐོ་སློབ་ཁག་ཏུ་གཏམ་བཤད་གོ་སྒྲིག་གིས་ཆ་ཤས་བླངས་དགོས་གལ། ས་གནས་དཔོན་རིགས་ཁག་དང་འབྲེལ་བ་འཐུས་ཚང་ཡོང་བ་བྱ་དགོས་པ། འཐབ་རྩོད་རྒྱུན་ཁྱོང་ཆེད་དུ་མི་རབས་གསར་པ་གསོ་སྐྱོང་གནང་དགོས་པ། མ་ཟད་རྒྱ་གར་གཞུང་གིས་ཕྱི་དངུལ་ལེན་ཕྱོགས་ཐད་ཁྲིམས་དམ་དུ་གཏོང་བཞིན་ཡོད་སྟབས། ས་གནས་འགོ་འཛིན་རྣམ་པས་ཕྱི་དངུལ་ལེན་ཕྱོགས་དང་བེད་སྤྱོད་བྱེད་ཕྱོགས། དེ་བཞིན་རྩིས་དང་འབྲེལ་བའི་ལས་དོན་ཐོག་ལ་དམིགས་བསལ་གྱི་དོ་སྣང་གནང་དགོས་གལ་གྱི་ལམ་སྟོན་གནང་སོང་། ནང་སྲིད་བཀའ་བློན་དཔལ་ལྡན་དོན་གྲུབ་མཆོག་གིས། ཚོགས་བཅར་བ་རྣམས་འདིར་ཚོགས་ཆེན་ཐོག་ཕེབས་གོ་ཆོད་པ་ཞིག་བྱ་དགོས་ཤིང་། གཞིས་བྱེས་བོད་མི་མཉམ་འཛོམས་མ་བྱུང་བར་དུ་མང་ཚོགས་རྣམས་ལ་ཆབ་སྲིད་དང་༸རྒྱལ་བའི་མཛད་འཕྲིན་སྐོར་གོ་རྟོགས་ཡག་པོ་སྤེལ་དགོས་པ་དང་། སྤྱི་ཚོགས་འཁྲུག་གཞི་བཟོ་མཁན་ངོས་འཛིན་གྱིས་གདོང་ལེན་འཐུས་ཚང་གནང་དགོས་རྒྱུ། ལྷག་པར་ས་གནས་འགོ་འཛིན་གྱི་ལས་དོན་ནི་མི་མང་དང་། བོད་བསྟན་སྲིད་མི་རིགས། དེ་བཞིན་མི་རིགས་གསོ་སྐྱོང་དང་འབྲེལ་བའི་ཞབས་ཕྱི་ཞིག་ཡིན་པ་དུས་རྟག་ཏུ་དྲན་དགོས་པའི་སྐུལ་འདེབས་གནང་སོང་། གཞི་རྩའི་ད་རེས་ཚོགས་ཆེན་ཐོག་ས་གནས་འགོ་འཛིན་དང་སོ་ནམ་སློབ་སྟོན་པ་རྣམས་ཀྱི་འཛིན་སྐྱོང་ཚོགས་ཆེན་ཐེངས་ ༡༦ པའི་གྲོས་ཆོད་ཁག་ལ་དབུས་དང་ས་གནས་གཉིས་ཀྱིས་ལག་བསྟར་ག་རེ་ཞུས་ཐུབ་པ་དང་ཞུས་ཐུབ་མེད་པའི་སྐོར། གཞིས་སྤོས་ལས་གཞི་ལག་བསྟར་ཐོག་འབྲེལ་ཡོད་ས་གནས་འགོ་འཛིན་དང་ས་གནས་ལས་བྱེད་ཀྱིས་འགན་འཁུར་ཞུ་ཕྱོགས། གཞི་རིམ་བཅོས་མའི་རིག་ནུས་སྦྱོང་བརྡར། […] The post ནང་སྲིད་ཁྱབ་ཁོངས་ས་གནས་འགོ་འཛིན་དང་སོ་ནམ་སློབ་སྟོན་པ་རྣམས་ཀྱི་འཛིན་སྐྱོང་ཚོགས་ཆེན་ཐེངས་ ༡༧ པ་དབུ་འཛུགས། appeared first on vot.

བོད་ཀྱི་གཞོན་ནུ་ལྷན་ཚོགས་ཀྱི་ Global Chain Protest འམ་རྒྱལ་སྤྱིའི་རྒྱུན་མཐུད་ངོ་རྒོལ་ལས་འགུལ་གྱི་ཆ་ཤས་སུ་ལུ་དྷི་ཡཱ་ནཱར་འགྲོ་ཞེས་པའི་ཞི་བའི་གོམ་བགྲོད་ཀྱི་ལས་འགུལ་སྤེལ་ཏེ། དཔའ་བོ་བློ་དགའ་རང་བཙན་དམ་པ་དེ་ཉིད་ཀྱི་བོད་རྒྱལ་ཁབ་དང་མི་རིགས་ཆེ་དུ་རང་སྲོག་བློས་བཏང་ལ་རྗེས་དྲན་དང་། རྒྱ་ནག་གི་མི་རིགས་མཐུན་སྒྲིལ་ཁྲིམས་ཡིག་ཟེར་བ་ངོས་ལེན་མེད་པའི་སྐྱོན་བརྗོད་གནང་འདུག དེ་ཡང་ཟླ་བ་འདིའི་ཚེས་ ༢༢ ཉིན་བྷན་དྷ་ར་ས་གནས་གཞོན་ནུ་ལྷན་ཚོགས་ཀྱི་གོ་སྒྲིག་འོག་  Chalo Ludhiana ལུ་དྷི་ཡཱ་ནཱར་འགྲོ་ཞེས་པའི་ཞི་བའི་གོམ་བགྲོད་ཀྱི་ལས་འགུལ་དེ་བཞིན་ 3Division Chowk ས་ཚིགས་ནས་ Sundar Nagar Chowk ས་ཚིགས་བར་བོད་མི་ཚོང་པ་དང་ལས་འགུལ་བ་ ༣༥༠ ལྷག་ནས་མཉམ་ཞུགས་གནང་འདུག་པ་མ་ཟད། རྒྱ་གར་གྱི་ཚོང་དཔོན་ Lala ཁག་གཅིག་མཉམ་ཞུགས་ཀྱིས་རྒྱབ་སྐྱོར་མངོན་གསལ་གནང་འདུག སྐབས་དེར་ངོ་རྒོལ་བ་རྣམས་པས་རྒྱ་ནག་གི་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་ཟེར་བའི་ངོ་བཤུས་ཕྲལ་ཏེ། ཁྲིམས་ཡིག་དེ་ནི་ཁྲིམས་ཡིག་ནག་པོ་ཞིག་ཡིན་པའི་སྐྱོན་བརྗོད་དང་འབྲེལ། ཁྲིམས་ཡིག་དེ་ལག་བསྟར་འཕྲལ་མར་མཚམས་འཇོག་དགོས་པའི་དགོས་འདུན་བཏོན་འདུག མ་ཟད་ངོ་རྒོལ་བ་རྣམ་པས་ང་བོད་པ་ཡིན། བོད་ཀྱི་བདག་པོ་བོད་མི་ཡིན་ཞེས་པའི་འབོད་སྒྲ་ཆེ་ཆེར་བསྒྲགས་ཡོད་ཅིང་། དེ་བཞིན་རང་བཙན་རང་བཙན། བློ་དགའ་རང་བཙན། བློ་དགའ་རང་བཙན་རང་བཙན་དོན་དུ་སྐུ་སྲོག་བློས་བཏང་གནང་ཡོད། རྒྱ་མི་བོད་ནས་ཕར་རྒྱུག་ཤིག་སོགས་ཀྱི་འབོད་ཚིགས་བསྒྲགས་འདུག འདི་ག་རླུང་འཕྲིན་ཁང་ནས་བོད་ཀྱི་གཞོན་ནུ་ལྷན་ཚོགས་ཀྱི་སྤྱི་ཁྱབ་དྲུང་ཆེ་བསྟན་འཛིན་བློ་བཟང་ལགས་སུ་རྒྱལ་སྤྱིའི་རྒྱུན་མཐུད་ངོ་རྒོལ་ལས་འགུལ་སྐོར་དང་དེའི་དགོས་འདུན། དེ་བཞིན་ད་ལྟ་འགྲོ་བཞིན་པའི་བོད་ཀྱི་གཞོན་ནུ་ལྷན་ཚོགས་ཀྱི་ལས་འགུལ་དང་མ་འོངས་ལས་འགུལ་སྤེལ་འཆར་བཅས་ཀྱི་ཐོག་ལ་བཀའ་འདྲི་ཞུས་སྐབས། ཁོང་གིས་རྒྱལ་སྤྱིའི་རྒྱུན་མཐུད་ངོ་རྒོལ་ལས་འགུལ་ནི་བོད་ཀྱི་གཞོན་ནུ་ལྷན་ཚོགས་ཀྱི་རྒྱལ་སྤྱིའི་ཁྱོན་ཡོངས་ལ་རྣམ་པ་འདྲ་མིན་གྱི་སྒོ་ནས་ངོ་རྒོལ་གྱི་ལས་འགུལ་ཞིག་ཆགས་ཀྱི་ཡོད་པ་དེ་ལྟར་ཡང་དགོས་འདུན་དོན་ཚན་ལྔ་གཅིག་མཚུངས་ཞིག་ཆགས་ཀྱི་ཡོད་པ་འགྲེལ་བརྗོད་གནང་སོང་། ཁོང་གི་འགྲེལ་བརྗོད་གནང་དོན་ལྟར་དགོས་འདུན་དོན་ཚན་དང་པོ་ནི། མཉམ་འབྲེལ་རྒྱལ་ཚོགས་ཀྱིས་དཔའ་བོ་བློ་དགའ་རང་བཙན་གྱི་གནད་དོན་ཐོག་གླེང་སློང་གནང་དགོས་པ་དང་། གཉིས་པ་ནི་ད་བར་བོད་མི་ ༡༧༠ ལྷག་གི་བོད་བསྟན་སྲིད་མི་རིགས་ཀྱི་དོན་དུ་རང་ལུས་མེར་བསྲེགས་བཏང་ཡོད་པར་དེ་དག་གི་འགན་འཁྲི་ཡོངས་རྫོགས་རྒྱ་དམར་གཞུང་གིས་ལེན་དགོས་པ། གསུམ་པ་ནི་རྒྱལ་སྤྱིའི་སྤྱི་ཚོགས་ནས་བོད་འདི་ལོ་རྒྱུས་ཀྱི་ཐོག་ནས་རང་བཙན་གཙང་མའི་རྒྱལ་ཁབ་ཅིག་ཡིན་པ་ངོས་འཛིན་གྱིས་རྒྱབ་སྐྱོར་གནང་དགོས་པ། བཞི་པ་ནི་རྒྱ་ནག་གི་མི་རིགས་མཐུན་སྒྲིལ་ཟེར་བའི་ཁྲིམས་ཡིག་དེ་ནི་མི་རིགས་སྡེབས་གསོད་ཀྱི་ཁྲིམས་ཤིག་ཡིན་པར་འཕྲལ་མར་མཚམས་འཇོག་དང་ཕྱིར་འཐེན་དགོས་པ། ལྔ་པ་ནི་ཀུན་གཟིགས་༸པན་ཆེན་རིན་པོ་ཆེས་གཙོས་པའི་བོད་ཀྱི་ཆབ་སྲིད་བཙོན་པ་རྣམས་འཕྲལ་མར་གློད་བཀྲོལ་དགོས་པ་སོགས་གསུངས་སོང་། ཁོང་གིས་ད་ལྟའི་ཆར་ནིའུ་ཡོག་མཉམ་འབྲེལ་རྒྱལ་ཚོགས་ལས་ཁུངས་ཀྱི་མདུན་དུ་རྒྱལ་གཅེས་དཔའ་བོའི་རྒྱུན་མཐུད་ཟས་བཅད་ངོ་རྒོལ་གྱི་ལས་འགུལ་སྤེལ་བཞིན་ཡོད་དང་། རིམ་པས་ཡོ་རོབ་ཁུལ་དང་ལྷག་པར་སུད་སི་ཇི་ནི་ཝ་ནང་དུ་ལས་འགུལ་རིམ་པ་སྤེལ་འཆར་ཡོད་པ་འགྲེལ་བརྗོད་གནང་སོང་། གཞན་ཡང་དབུས་བོད་ཀྱི་བུད་མེད་ལྷན་ཚོགས་ཀྱི་ངོས་ནས་ཟླ་བ་འདིའི་ཚེས་ ༡༧ ནས་ ༡༩ བར་རྒྱལ་ས་ལྡི་ལིར་རྟེན་གཞི་བྱས་པའི་རྒྱལ་སྤྱིའི་གཞུང་ཚབ་ཁག་ ༣༣ ལ་རྒྱ་དམར་གཞུང་གིས་བོད་ཐོག་འཛིན་པའི་སྲིད་ཇུས་སྤྱི་དང་ལྷག་པར་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཟེར་བ་དེ་འཕྲད་དུ་མཚམས་འཇོག་ལ་རྒྱབ་སྐྱོར་ཡོང་བའི་ཞུ་སྙན་ཕུལ་འདུག མ་ཟད་ཚེས་ […] The post རྒྱལ་སྤྱིའི་རྒྱུན་མཐུད་ངོ་རྒོལ་ལས་འགུལ་ཁྲོད་ལུ་དྷི་ཡཱ་ནཱར་ཞི་བའི་གོམ་བགྲོད་ཐོག་རྒྱ་གར་གྱི་ཚོང་པ་ཁག་ཅིག་མཉམ་ཞུགས། appeared first on vot.

བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་ཆུ་སྐྱ་སྦྲ་གཉིས་ཚེ་རྒྱལ་མཆོག་གིས་མོན་གྷོ་འདོད་རྒུ་གླིང་དུ་ཆེས་ཐོག་མའི་གཞུང་འབྲེལ་འཚམས་གཟིགས་དང་འབྲེལ། ཁུལ་དེའི་མང་ཚོགས་ལ་བཀའ་སློབ་དང་དྲི་བར་དྲི་ལན་ཁྲོད། དཔལ་རྒྱལ་དབང་ཀརྨ་པ་རིན་པོ་ཆེ་མཆོག་བཞུགས་སྒར་རྡ་རམ་ས་ལར་བཅའ་བཞུགས་སྐབས་སུ་སྐུ་ངལ་ཕྲད་པ་དང་འབྲེལ་ནས་ད་ལྟ་རྒྱ་གར་ཁྲིམས་ཁང་ནང་དུ་གནད་དོན་དེ་འགྲོ་བཞིན་ཡོད་སྟབས། རིང་མིན་རྒྱ་གར་ཁྲིམས་ཁང་ནང་གི་གནད་དོན་དེ་དག་གསལ་པོ་ཆགས་པའི་རེ་བ་ཆེན་པོ་ཡོད་པ་དང་། དེ་ལྟར་བྱུང་བའི་རྗེས་སུ་རིན་པ་ཆེ་མཆོག་རྒྱ་གར་ལ་ཕྱིར་ལོག་མཛད་སྲིད་པ་གསུངས་འདུག དེ་ཡང་ཆོས་རིག་བཀའ་བློན་ཆུ་སྐྱ་སྦྲ་གཉིས་ཚེ་རྒྱལ་མཆོག་གིས་ཟླ་བ་འདིའི་ཚེས་ ༡༦ ནས་དབུ་འཛུགས་ཀྱིས་ཕྱི་ཟླ་ ༩ པའི་ཚེས་ ༡ བར་རྒྱ་གར་ལྷོ་ཕྱོགས་ཀར་ན་ཊ་ཀ་མངའ་སྡེའི་མོན་གྷོ་འདོད་རྒུ་གླིང་དང་རྒྱ་གར་བྱང་ཕྱོགས་ Uttrakhand མངའ་སྡེའི་རྡེ་ར་སྡུན་དང་རྡོ་ལན་ཇི་བོན་པོའི་གཞིས་ཆགས་དང་ཤིམ་ལ་བཅས་སུ་གཞུང་འབྲེལ་འཚམས་གཟིགས་གནང་བཞིན་པ་ལྟར། ཉེ་ཆར་མོན་གྷོ་ས་གནས་མང་ཚོགས་ལྷན་དུ་མཇལ་མོལ་དང་གཏམ་བཤད། དྲི་བར་དྲི་ལན་གྱི་ལས་རིམ་ཁྲོད། བོད་མི་ཞིག་གིས་རྒྱལ་དབང་ཀརྨ་པ་རིན་པོ་ཆེ་མཆོག་གི་གནད་དོན་ཐོག་བོད་མིའི་སྒྲིག་འཛུགས་ཀྱི་ག་རེ་གནང་གི་ཡོད་མིན་ཐད་དྲི་བ་ཕེབས་འདུག སྐབས་དེར་བཀའ་བློན་མཆོག་གིས་དེ་སྔ་རིན་པོ་ཆེ་མཆོག་བཞུགས་སྒར་རྡ་རམ་ས་ལར་སྐུ་བཞུགས་མཛད་སྐབས་སྐུ་ངལ་ཁག་གཅིག་བྱུང་བ་དང་འབྲེལ་ནས་གནད་དོན་དེ་རྒྱ་གར་ཁྲིམས་ཁང་ནང་མུ་མཐུད་གནས་བསྡད་ཡོད་པ་དང་། བོད་མིའི་སྒྲིག་འཛུགས་སྲིད་སྐྱོང་མཆོག་གིས་དེ་སྔ་ཕྱི་རྒྱལ་ལ་ནམ་ཕེབས་སྐབས་རིན་པོ་ཆེ་མཆོག་དང་མཇལ་འཕྲད་གནང་ཐབས་ཁྲོད། ཁོང་དང་ཐད་ཀར་མཇལ་མོལ་བྱུང་མེད་ཀྱང་རིན་པོ་ཆེ་མཆོག་གི་སྲིང་མོ་ལྷན་དུ་བཀའ་མོལ་བྱུང་ཐུབ་ཡོད་པ་མ་ཟད། བོད་མིའི་སྒྲིག་འཛུགས་ཀྱི་འབྲེལ་ཡོད་རྒྱ་གར་གཞུང་གི་མི་སྣའི་ལྷན་དུ་ཡང་བཀའ་མོལ་བྱུང་ཡོད་པའི་ཁར། རྒྱ་གར་གཞུང་གི་ངོས་ནས་ཀརྨ་པ་རིན་པོ་ཆེ་མཆོག་གི་གལ་གནད་བཅས་ཀྱི་སྐོར་ཤེས་བཞིན་པའི་ཐོག རྒྱ་གར་ལ་ཕྱིར་ལོག་གནང་དགོས་པ་ཡང་ཡང་གསུང་བཞིན་ཡོད་སྐོར་གསུངས་པ་མ་ཟད། རིང་མིན་རྒྱ་གར་ཁྲིམས་ཁང་ནང་གི་གནད་དོན་རྣམས་གསལ་པོ་ཆགས་རྒྱུའི་རེ་བ་ཆེན་པོ་ཡོད་སྟབས། དེའི་རྗེས་སུ་རིན་པོ་ཆེ་མཆོག་རྒྱ་གར་ལ་ཕྱིར་ལོག་གནང་སྲིད་པ་སོགས་གསུངས་འདུག   ཐེངས་འདིའི་སྐོར་སྐྱོད་ཐོག་ཆོས་རིག་བཀའ་བློན་མཆོག་གིས་ཁུལ་དེའི་གདན་ས་ཁག་ལ་གནས་གཟིགས་དང་། དགའ་ལྡན་ཁྲི་རིན་པོ་ཆེ་དབུས་པའི་ཤར་བྱང་ཆོས་རྗེ་རྣམ་གཉིས་དང་མཇལ་འཕྲད། ས་གནས་བོད་མི་དང་ཚོགས་སྡེ་ཁག་གི་སྐུ་ཚབ་དང་མི་མང་ལྷན་དུ་མཇལ་འཕྲད་སོགས་གནང་རྒྱུ་ཡིན་པའི་ཁྲོད། ཕྱི་ཚེས་ ༡༦ ཉིན་མོན་གྷོ་འདོད་རྒུ་གླིང་དུ་ཕེབས་འབྱོར་རྗེས་གདན་ས་ཁག་ལ་མཆོད་མཇལ་དང་འབྲེལ། དགོན་པའི་ནང་འགྲོ་བཞིན་པའི་གྲངས་འཛིན་དཔེ་མཛོད་གཙོས་པའི་བོད་མིའི་སྒྲིག་འཛུགས་དང་སྒོས་སུ་ཆོས་རིག་ལས་ཁུངས་ཀྱི་ལས་འཆར་ཁག་ལ་གཟིགས་ཞིབ་གནང་ཡོད་པ་མ་ཟད། ས་གནས་ཀྱི་གསོ་རིག་དང་དེང་དུས་སྨན་ཁང་། ཨ་རིའི་དགོན་པ་དང་སློབ་གྲྭ་ཁག་ལ་གཟིགས་སྐོར་གནང་བ་མ་ཟད། ཕྱི་ཚེས་ ༢༠ ཉིན་ས་གནས་སུ་དཔའ་བོ་བློ་དགའ་རང་བཙན་ལགས་དམ་པ་དེ་ཉིད་སྐུ་གྲོངས་་པའི་ཞག་ ༤༩ མྱ་ངན་རྗེས་དྲན་གྱི་མཆོད་འབུལ་སྨོན་ལམ་དང་ཞི་བའི་གོམ་བགྲོད་ཀྱི་ལས་འགུལ་ནང་དུའང་མཉམ་ཞུགས་གནང་ཡོད་འདུག འདི་གའི་ལྷོ་ཕྱོགས་ས་གནས་གསར་འགོད་པ་སངས་རྒྱས་རྒྱ་མཚོ་ལགས་ཀྱིས་ཆོས་རིག་བཀའ་བློན་མཆོག་ལ་བཀའ་འདྲི་ཞུ་སྐབས། ཆོས་རིག་བཀའ་བློན་མཆོག་གིས་རིང་མིན་ཡོང་རྒྱུའི་ལོ་ལྔའི་ནང་དུ། ཆོས་རིག་ལས་ཁུངས་ཀྱི་རྒྱུན་ལྡན་ལས་དོན་རྣམས་རྒྱུན་སྐྱོང་ཐོག་ལ་དགོན་སྡེ་ཁག་ནང་གི་དཔེ་ཆ་གསར་རྙིང་རྣམས་བཤེར་འབེབས་གནང་སྟེ་གྲངས་འཛིན་དཔེ་མཛོད་ནང་འཇུག་རྒྱུའི་ལས་གཞི་དང་གནས་སྐོར་མཉན་ཆས་ཀྱི་ལས་གཞི་གཉིས་ཀྱི་ཐོག་དམིགས་བསལ་ཤུགས་རྒྱག་འཆར་ཡོད་པ་དང་། ད་ལྟའི་ཆར་གྲངས་འཛིན་དཔེ་མཛོད་ཀྱི་ལས་གཞི་དེ་འགྲོ་བཞིན་པ་དང་། གནས་སྐོར་མཉན་ཆས་ཀྱི་ལས་གཞི་དེ་ཧ་ལམ་ལེགས་གྲུབ་ཀྱི་མཚམས་སུ་སླེབས་ཡོད་པ་སོགས་གསུངས་འདུག The post ༸རྒྱལ་བ་ཀརྨ་པ་རིན་པོ་ཆེ་རིན་པོ་ཆེ་མཆོག་གི་རྒྱ་གར་ཁྲིམས་ཁང་ནང་གི་གནད་དོན་གསལ་པོ་ཆགས་པའི་རྗེས་སུ་རྒྱ་གར་ལ་ཕྱིར་ལོག་མཛད་སྲིད་པ་གསུངས་འདུག appeared first on vot.

ཟླ་བ་སྔོན་མའི་ཕྱི་ཚེས་ ༡༥ ཉིན་སྐལ་བཟང་མཐར་ཕྱིན་ལགས་ཀྱིས་ཀ་ཁ་ག་ང་རྣམ་པར་རྒྱལ་གྱུར་གཅིག་ཅེས་པའི་འབོད་སྒྲའི་ཐོག་བཞུགས་སྒར་རྡ་རམ་ས་ལ་ནས་ལ་དྭགས་ཀྱི་འཕགས་བོད་ས་མཚམས་བར་གོམ་བགྲོད་ལས་འགུལ་ཞིག་དབུ་འཛུགས་གནང་ཡོད་ཀྱང་། ཁ་སང་ཁོང་དང་ཁོང་གི་ཕྱག་རོགས་གཉིས་ལ་དྭགས་བྱང་ལ་ནས་ཀི་ལོ་མི་ཊར་ ༢༠ སར་ཡོད་པའི་ས་གནས་ཤིག་ལ་འབྱོར་སྐབས་ཉེན་རྟོག་པས་བཀག་འགོག་རྐྱེན་པས་ལས་འགུལ་འདི་གནས་སྐབས་མཚམས་བཞག་དགོས་བྱུང་འདུག དེ་ཡང་རྒྱ་གར་ལྷོ་ཕྱོགས་མོན་གྷོ་འབྲས་སྤུངས་སྒོ་མང་དུ་གནས་བཞུགས་བོད་མི་སྐལ་བཟང་མཐར་ཕྱིན་ལགས་ཀྱིས་མ་སྐུལ་དྭང་བླངས་ཐོག་དཔའ་བོ་བློ་དགའ་རང་བཙན་དམ་པར་རྗེས་དྲན་དང་འབྲེལ། གཙོ་བོ་བོད་ཀྱི་སྐད་ཡིག་རྒྱུན་འཛིན་དང་སྲུང་སྐྱོབ་སླད་ཞི་བའི་གོམ་བགྲོད་གནང་བ་དེ་ནི་ཟླ་བ་ ༧ ཚེས་ ༡༥ ཉིན་བཞུགས་སྒར་ཐེག་ཆེན་གླིང་གཙུག་ལག་ཁང་ནས་འགོ་འཛུགས་ཀྱིས། ད་བར་ཟླ་བ་གཅིག་ལྷག་འགྲོ་བཞིན་ཡོད་པ་དང་། དུས་ཡུན་དེའི་ཁྲོད་ཁོང་གིས་རྡ་རམ་ས་ལ་ནས་ཀུ་ལུ་མ་ན་ལི་ཁུལ་དང་། ཀི་ལོང་ནས་ Jispa ། ཟངས་དཀར་དཔལ་ལྡུམ་ནས་ཟངས་ལ། དེ་ནས་ Nyerak ནས་ Nyemo བརྒྱུད་ལ་དྭགས་གླེ་བཅས་སུ་ཁྱོན་སྤྱི་ལེ་ ༨༠༠ ཡས་མས་ཙམ་གོམ་བགྲོད་གནང་རྗེས། ཁ་སང་ཕྱི་དྲོ་ཕྱག་ཚོད་ ༤ ཡོལ་ཙམ་ལ་ལ་དྭགས་བྱང་ལ་བརྒལ་ནས་ཀི་ལོ་མི་ཊར་ ༢༠ སར་འབྱོར་སྐབས་ས་གནས་ཉེན་རྟོག་པས་རྒྱ་གར་གཞུང་གི་ཕྱི་འབྲེལ་སྲིད་བྱུས་དབང་གིས་བཀག་འགོག་གནང་སྟེ་ཕྱིར་སློག་གནང་འདུག གསར་འགོད་པས་དེ་རིང་སྔ་དྲོ་སྐལ་བཟང་མཐར་ཕྱིན་ལགས་སུ་ལས་འགུལ་འདི་འཆར་གཞི་ལྟར་ལམ་ལྷོང་མ་བྱུང་བའི་སྐོར་དང་འབྲེལ་ནས་བཀའ་འདྲི་ཞུས་ཡོད། དེ་བཞིན་སྐལ་བཟང་ལགས་ཀྱིས་ལས་འགུལ་སྤྱི་ཡོངས་དང་འབྲེལ་ནས་ཐོག་མའི་དམིགས་ཡུལ་གཞིར་བཟུང་བཞུགས་སྒར་རྡ་རམ་ས་ལ་ནས་ལ་དྭགས་འཕགས་བོད་ས་མཚམས་བར་གོམ་བགྲོད་གནང་མ་ཐུབ་ཀྱང་། དུས་ཡུན་དེའི་ཁྲོད་བོད་རིགས་གཙོས་ཧི་མཱ་ལ་ཡའི་མི་རིགས་ལ་བོད་ཀྱི་སྐད་ཡིག་སྲུང་སྐྱོབ་ཀྱི་གལ་གནད་སྐོར་གོ་རྟོགས་དང་མི་མང་ལ་སེམས་སྐུལ་གང་ཙམ་ཐེབས་ཡོད་པར་ངོས་འཛིན་ཞུས་པ་དང་ཆབས་ཅིག དེའི་ནང་ནས་གལ་ཆེ་ཤོས་ནི་ཆོས་ཕྱོགས་ཀྱི་ཐོག་ནས་ཞུས་ན་རང་གི་ཉམས་ལེན་གནང་ཐུབ་ན་ཕན་རླབས་ཆེན་པོ་ཡོད་པར་ཡིད་ཆེས་གནང་ཐོག་ཐེངས་འདིའི་གོམ་བགྲོད་དེ་བཞིན་འདོད་བློ་ཁེངས་པ་ཞིག་བྱུང་སོང་ཞེས་གསུང་གི་འདུག ཁོང་གིས་གཞི་རྩའི་ཀ་ཁ་ག་ང་རྣམ་པར་རྒྱལ་གྱུར་ཅིག་ཅེས་པའི་ལས་འགུལ་སྤེལ་གོ་དོན་ནི། བོད་ཀྱི་རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱིས་བོད་རྒྱལ་ཁབ་དང་མི་རིགས། སྐད་ཡིག རིག་གཞུང་གི་ཆེད་དུ་རང་སྲོག་བློས་བཏང་གནང་ཡོད་སྟབས། སོ་སོའི་ངོས་ནས་གང་ཐུབ་ཅི་ཐུབ་ཀྱིས་འདི་ལྟ་བུའི་ལས་འགུལ་ཞིག་མ་སྤེལ་ཐབས་མེད་ལྟ་བུའི་ཚོར་སྣང་ཞིག་བྱུང་ཡོད་པ་དང་། ལས་འགུལ་འདི་ནི་གཙོ་བ་དཔའ་བོ་བློ་དགའ་ལགས་ཀྱི་བློས་བཏང་ལ་ཆེ་མཐོང་འབུལ་རྒྱུ་དང་། རྒྱ་ནག་གཞུང་གི་གདུག་རྩུབ་དང་ཁྲིམས་ཡིག་གསར་བཟོ་ལག་བསྟར་བྱས་པ་དེར་དུས་དང་རྣམ་པ་ཀུན་དུ་ངོ་རྒོལ་མཚོན་བྱེད་ཡིན་པ་གསུངས་སོང་། The post བོད་ཀྱི་སྐད་ཡིག་སྲུང་སྐྱོབ་དང་འབྲེལ་བའི་ཞི་བའི་གོམ་བགྲོད་ལས་འགུལ་གནས་སྐབས་མཚམས་བཞག་དགོས་བྱུང་བ། appeared first on vot.

འདི་ལོའི་ཕྱི་ཟླ་ ༧ པའི་ཚེས་ ༡ ཉིན་རྒྱ་ནག་གི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་ཞེས་བཙན་དབང་གི་མི་རིགས་མཉམ་བསྲེས་དང་བོད་གཙོས་པའི་གྲངས་ཉུང་མི་རིགས་ཀྱི་ངོ་བོ་རྩ་མེད་གཏོང་ཐབས་ཀྱི་ཁྲིམས་གསར་ལག་བསྟར་བྱས་འགོ་བཙུགས་པ་དང་འབྲེལ། དེའི་ཕྱི་ཉིན་སྟེ་ཕྱི་ཟླ་ ༧ པའི་ཚེས་ ༢ ཉིན་ཨ་རིའི་ནིའུ་ཡོག་གྲོང་ཁྱེར་ནང་དུ་བཅའ་བཞུགས་བོད་རང་བཙན་འཐབ་རྩོད་པ་བློ་དགའ་རང་བཙན་ལགས་ཀྱི་ཨ་རིའི་ནིའུ་ཡོག་གྲོང་ཁྱེར་ནང་རྟེན་གཞི་བྱས་པའི་རྒྱལ་ཚོགས་ཀྱི་ལས་ཁུངས་ཨ་མའི་མདུན་དུ་རྒྱ་ནག་གཞུང་ལ་ངོ་རྒོལ་དང་བོད་བསྟན་སྲིད་མི་རིགས་ཀྱི་ཆེད་དུ་སྐུ་ལུས་མེར་མཆོད་ཕུལ་ནས་སྐུ་གྲོངས་པའི་གནད་དོན་བྱུང་བ་ལྟར། དེ་རིང་དམ་པ་དེ་ཉིད་ཀྱི་བདུན་ཚིགས་བདུན་པ་སྟེ་ཞག་ཞེ་དགུའི་དུས་ཚིགས་འཁེལ་ཡོད་པ་རེད། རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱིས་བོད་རྒྱལ་ཁབ་དང་མི་རིགས་དོན་དུ་སྐུ་ལུས་མེར་བསྲེགས་ཀྱི་ལས་འགུལ་སྤེལ་བའི་གནད་དེན་དེ་བྱུང་བའི་རྗེས་སུ་བོད་དོན་འཐབ་རྩོད་ཀྱི་མེ་ལྕེ་གསར་པ་ཞིག་འབར་ཏེ། ནིའུ་ཡོག་གཙོས་རྒྱལ་སྤྱི་ཁྱོན་ཡོངས་ཀྱི་བོད་མི་གནས་སྡོད་ས་གནས་གང་སར་ངོ་རྒོལ་སྐད་འབོད་དང་ཟས་བཅད་ལས་འགུལ། ཞི་བའི་གོམ་བགྲོད། སྦག་སྦག་དང་རྐང་འཁོར་སྐོར་སྐྱོད། སྐྲ་བཞར་ལས་འགུལ་སོགས་རྣམ་པ་འདྲ་མིན་བརྒྱུད་བློ་དགའ་རང་བཙན་ལགས་དམ་པ་དེ་ཉིད་ཀྱི་བློས་བཏང་ལ་རྗེས་དྲན་དང་མྱ་ངན་གུས་འདུད་ཙམ་མ་ཟད། རྒྱ་ནག་གཞུང་གི་མི་རིགས་རྩ་གཏོར་གྱི་སྲིད་བྱུས་དང་དྲག་རྩུབ་ལ་ངོ་རྒོལ་གནང་དང་གནང་མུས་ཡིན་པ་རེད། རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱིས་སྐུ་ལུས་མེར་བསྲེགས་མ་བཏང་བའི་སྐར་མ་ཁ་ཤས་སྔོན་དུ་དམ་པ་ཁོང་གིས་ཞལ་ཆེམས་ཀྱི་བརྙན་ཐུང་ཞིག་འདོན་སྤེལ་གནང་བའི་ནང་དུ་རྒྱ་ནག་གིས་བོད་ཐོག་འཛིན་པའི་དྲག་གནོན་གྱི་སྲིད་བྱུས་ལ་སྐྱོན་བརྗོད་ཤུགས་ཆེ་དང་།  བཙན་བྱོལ་བོད་མི་ཚོར་ཆོལ་གསུམ་རྡོག་རྩ་ཆིག་སྒྲིལ་དགོས་པ།  དེ་བཞིན་བོད་རང་བཙན་འཐབ་རྩོད་སླད་མཉམ་ལས་དགོས་པའི་སྐུལ་འདེད་གནང་ཡོད་པ་རེད། དེ་རིང་དམ་པ་དེ་ཉིད་ཀྱི་བདུན་ཚིགས་བདུན་པ་ཞག་ཞེ་དགུ་དང་བསྟུན།  རྒྱལ་སྤྱི་ཁྱོན་ཡོངས་ཀྱི་བོད་མི་གནས་སྡོད་ས་གནས་གང་སར་ལས་འགུལ་རྣམ་པ་འདྲ་མིན་སྒོ་ནས་རྒྱལ་གཅེས་པ་ཁོང་ལ་རྗེས་དྲན་དང་རྒྱ་ནག་ལ་ངོ་རྒོལ་གྱི་རྣམ་པ་ཤུགས་ཆེ་བསྟན་པའི་ཁྲོད། བཞུགས་སྒར་རྡ་རམ་ས་ལར་མཚོན་ན། དབུས་བོད་མིའི་སྒྲིག་འཛུགས་ཀྱི་བཀའ་སྤྱི་གཉིས་ཐུན་མོང་གི་གོ་སྒྲིག་འོག ཐེག་ཆེན་ཆོས་གླིང་གཙུག་ལག་ཁང་དུ་མི་མང་སྟོང་ཚོ་བརྒལ་བ་འདུ་འཛོམས་ཀྱིས་མཆོད་འབུལ་སྨོན་ལམ་འཚོགས་པ་མ་ཟད། མང་གཙོ་ཀ་བ་གསུམ་གྱི་མཛད་གཙོ་རྣམ་པའི་སྣེ་ཁྲིད་འོག་ཐེག་ཆེན་ཆོས་གླིང་གཙུག་ལག་ཁང་ནས་རྡ་ཤོད་ཀྱི་ཉེན་རྟོག་ལས་ཁུངས་མདུན་ཐང་བར་ཞི་བའི་གོམ་བགྲོད་ཀྱི་ལས་འགུལ་གཞི་རྒྱ་ཆེ་བ་ཞིག་སྤེལ་གནང་སོང་། སྐབས་དེར་ཉེན་རྟོག་ཐང་ཆེན་དུ་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་གིས། རྒྱལ་གཅེས་དཔའ་བོ་བློ་དགའ་རང་བཙན་དམ་པ་དེ་ཉིད་ལ་རྗེས་དྲན་ཐོག རྒྱ་དམར་གཞུང་གིས་བོད་མི་རིགས་རྩ་མེད་གཏོང་བའི་སྲིད་བྱུས་ལ་ངོ་རྒོལ་དུས་དང་རྣམ་པ་ཀུན་ཏུ་གཞིས་བྱེས་བོད་མི་ཐུན་མོང་ནས་གདུང་ཤུགས་ཆིག་སྒྲིལ་དང་གྲུང་པོ། རྣམ་དཔྱོད་ལྡན་པའི་ཐོག་ནས་གདོང་ལེན་མཐར་སྐྱེལ་བྱེད་དགོས་ཤིང་། མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཡིག་དེའི་ངན་བྱུས་ནི། བོད་ཀྱི་སྐད་ཡིག་བེད་སྤྱོད་མེད་པ་བཟོ་རྒྱུ་དང་། བོད་ཀྱི་ལོ་རྒྱུས་དང་མི་རིགས་ཀྱི་ངོ་རྟགས་རྫུན་བཟོ་བྱེད་རྒྱུ། སྤྱི་ཚོགས་གཞི་རིམ་བར་དུ་རིག་གཞུང་བཙན་བསྒྱུར་བྱ་རྒྱུ། བོད་བརྒྱུད་ནང་བསྟན་རྒྱ་ནག་ཅན་དུ་བསྒྱུར་རྒྱུ། མི་རིགས་མཉམ་བསྲེས། འཕྲུལ་རིག་གི་ལྟ་སྲུང་། ཆབ་སྲིད་དང་སྤྱི་ཚོགས་འཛུགས་སྐྲུན་གྱི་གནོན་ཤུགས། བོད་རིགས་ལས་བྱེད་པར་ཆབ་སྲིད་ཞིབ་བཤེར། རང་སྐྱོང་གི་ཐོབ་ཐང་བརྩི་མེད་གཏོང་ཐབས་བཅས་ལ་དམིགས་ཡོད་པ་ཐེར་འདོན་དང་སྦྲགས། སྲིད་བྱུས་དེ་རིགས་འཕྲལ་དུ་མཚམས་འཇོག་དགོས་པའི་བརྡ་ལན་གནང་སོང་། དེ་བཞིན་གཞིས་བྱེས་བོད་མི་ཚོས། སོ་སོའི་ཁྱིམ་ཚང་ནས་འགོ་བཙུགས་ཏེ། རྒྱ་དམར་གཞུང་གི་སྲིད་བྱུས་ངན་པར་འགོག་རྒོལ་དང་། བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་། སྐད་ཡིག ཡུལ་གོམས་གཤིས་ལུགས་སྲུང་སྐྱོབ་ཐད་སྔར་ལྷག་འབད་བརྩོན་བྱ་དགོས་པའི་དྲན་སྐུལ་དང་། རྒྱལ་སྤྱིའི་སྤྱི་ཚོགས་ངོས་ནས་བོད་རྒྱའི་རྩོད་རྙོག་གི་ངོ་བོ་ནི་རྒྱ་ནག་གི་ནང་སྲིད་ཀྱི་གནད་དོན་མ་ཡིན་པར། ཐག་ཆོད་མེད་པའི་རྒྱལ་སྤྱིའི་ཁྲིམས་ལུགས་ཀྱི་གནད་དོན་ཞིག་ཡིན་པར་ངོས་འཛིན་གྱིས་སྔོན་འགྲོའི་ཆ་རྐྱེན་མེད་པར་གཉིས་སྨན་དབུ་མའི་ལམ་གྱི་ཐོག་ནས་བོད་རྒྱ་ཞི་མོལ་ཡོང་བར་རྒྱབ་སྐྱོར་ཡོང་བའི་རེ་སྐུལ་ཞུས་སོང་། བོད་མི་མང་སྤྱི་འཐུས་ཚོགས་གཙོ་བཀྲས་ཁང་སྒྲོལ་མ་ཚེ་རིང་མཆོག་གིས་སྤྱི་འཐུས་ཀྱི་གསུང་བཤད་སྒྲོགས་སྦྱང་གནང་བའི་ཁྲོད། དཔའ་བོ་ཁོང་ལ་རྗེས་དྲན་དང་འབྲེལ། དུས་སྐབས་དང་གནས་སྟངས་ཛ་དྲག་ཅན་འདིར་རྒྱལ་སྤྱིའི་སྤྱི་ཚོགས་ལ་རྒྱ་དམར་གཞུང་གིས་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་ཟེར་བ་ལག་བསྟར་བྱས་པ་དེས་འགྲོ་བ་མིའི་ཐོབ་ཐང་ལ་ཤུགས་རྐྱེན་ཇི་ཐེབས་བལྟ་ཞིབ་ནན་པོ་བྱ་དགོས་པ་དང་། རྒྱལ་ཁབ་ཕན་ཚུན་བར་འབྲེལ་བ་གནང་སྐབས་དང་རྒྱལ་ཚོགས་དང་རྒྱལ་སྤྱིའི་རྒྱལ་ཁབ་མང་པོ་འདུས་པའི་སྒྲིག་འཛུགས་སམ་ལྷན་ཚོགས་དེ་དག་གི་ཐོག་ལ་གནད་དོན་དེའི་ཐོག་གླེང་སློང་གནང་དགོས་པ། རྒྱ་དམར་གཞུང་གིས་ཁྲིམས་འགལ་བཙན་བཟུང་མ་བྱས་གོང་བོད་འདི་ལོ་རྒྱུས་ཀྱི་ཐོག་ནས་རང་བཙན་གཙང་མའི་རྒྱལ་ཁབ་གཅིག་ཡིན་པར་ངོས་འཛིན་གནང་དགོས་ཤིང་། བོད་རྒྱའི་དཀའ་རྙོག་དེ་བཞིན་འབྲེལ་མོལ་བརྒྱུད་ནས་སེལ་ཐབས་ཆེད་རྒྱ་དམར་གཞུང་གི་འགོ་ཁྲིད་རྣམས་ལ་སྐུལ་འདེད་གནང་དགོས་པ་སོགས་དོན་ཚན་བརྒྱད་ཅན་གྱི་ཐོག་ནས་འབོད་སྐུལ་ཞུས་སོང་། […] The post རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱི་ཞག་ཞེ་དགུ་དང་བསྟུན་དམ་པ་ཁོང་གི་བློས་བཏང་ལ་རྗེས་དྲན། appeared first on vot.

རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱིས་བོད་རྒྱལ་ཁབ་དང་མི་རིགས་ཀྱི་ཆེད་དུ་རང་ལུས་མེར་བསྲེགས་བཏང་ནས་དེ་རིང་ཞག་ཞེ་དགུ་དང་བསྟུན།  བོད་ཀྱི་རྒྱལ་གཅེས་དཔའ་བོ་དཔའ་མོ་ཡོངས་ལ་རྗེས་དྲན་གྱི་ཆེད་དུ་རྡ་ས་ས་གནས་གཞོན་ནུ་ལྷན་ཚོགས་ཀྱི་དྲུང་ཆེ་ཚེ་རིང་མཐར་ཕྱིན་ལགས་ཀྱིས་བཞུགས་སྒར་ཉེན་རྟོག་ལས་ཁུངས་ཀྱི་ཐང་ཆེན་ནས་རྒྱལ་ས་ལྡི་ལི་བར་རང་བཙན་གོམ་བགྲོད་ཅེས་པའི་ལས་འགུལ་ཞིག་དབུ་འཛུགས་གནང་སོང་། དེ་ཡང་དེ་རིང་ཕྱི་ཟླ་ ༨ ཚེས་ ༢༠ ཉིན་རྒྱབ་བོད་མིའི་སྒྲིག་འཛུགས་བཀའ་སྤྱི་གཉིས་ཐུན་མོང་གི་ཐོག་ནས་གོ་སྒྲིག་ཞུས་པའི་གཞི་རྒྱ་ཆེ་བའི་ཞི་བའི་གོམ་བགྲོད་ཀྱི་ལས་འགུལ་མཇུག་སྒྲིལ་མཚམས་སུ།  བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ཚེ་རིང་མཐར་ཕྱིན་ལགས་ཀྱི་གོམ་བགྲོད་ཀྱི་ལས་འགུལ་དེ་ཉིད་དབུ་འབྱེད་གནང་སོང་བ་མ་ཟད།  ཁོང་གི་གོམ་བགྲོད་དེ་བཞིན་བར་ཆད་མེད་པར་ལམ་ལྷོང་ཡོང་ཆེད་བོད་མིའི་སྒྲིག་འཛུགས་ཀྱི་མཛད་གཙོ་རྣམས་ནས་ཁོང་ལ་མཇལ་དར་བསྒྲོན་འབུལ་གྱིས་ལས་འགུལ་དེར་རྒྱབ་སྐྱོར་གྱི་རྣམ་པ་གསལ་སྟོན་གནང་སོང་།  རྩ་བའི་ཚེ་རིང་མཐར་ཕྱིན་ལགས་ནི་བོད་དུ་སྐྱེས་ཞིང་ལོ་ངོ་བཅུ་བཞི་བར་རྒྱ་ནག་གི་བཙན་འོག་ཏུ་འཚར་ལོང་བྱུང་བ་ཞིག་རེད་འདུག་ལ།  བཙན་བྱོལ་དུ་འབྱོར་ནས་ཁོང་གིས་ཤེས་ཡོན་གོ་སྐབས་དམ་འཛིན་གྱིས་རྒྱ་ནག་གི་ཐོག་ཆེད་ལས་སློབ་སྦྱོང་གནང་འདུག  ད་རེས་ཁོང་བཞུགས་སྒར་རྡ་རམ་ས་ལ་ནས་རྒྱལ་ས་ལྡི་ལི་བར་ཁྱོན་བསྡོམས་སྤྱི་ལེ་ ༥༠༠ ལྷག་བོད་དོན་ཞུ་གཏུག་དང་གསལ་བཤད་བརྒྱུད་དེ་ཞི་བའི་གོམ་བགྲོད་གནང་དགོས་པའི་རྒྱུ་མཚན་གཙོ་བོ་ནི།  རྒྱལ་གཅེས་དཔའ་བོ་བློ་དགའ་རང་བཙན་ལགས་གཙོས་པའི་ད་བར་བོད་རྒྱལ་ཁབ་དང་མི་རིགས་ཀྱི་ཆེད་དུ་རང་གི་གཅེས་པའི་ལུས་སྲོག་བློང་གཏོང་གནང་མཁན་རྒྱལ་གཅེས་དཔའ་བོ་དཔའ་མོ་རྣམས་ཀྱི་སྙིང་སྟོབས་ལ་རྗེས་དྲན་དང་།  ཁོང་གི་ཕ་མ་སྤུན་མཆེད་གཙོས་པའི་རྒྱ་ནག་གི་བཙན་དབང་མྱངས་དང་མྱོང་བཞིན་པའི་གཞིས་བཞུགས་སྤུན་ཟླ་རྣམས་ཀྱི་དཀའ་སྡུག་དང་།  བོད་ནང་གི་ཛ་དྲག་གནས་སྟངས་ཁག་གནས་ཡུལ་རྒྱ་གར་གཞུང་དམངས་དབུས་པའི་རྒྱལ་སྤྱིའི་ཚོགས་སྡེ་ཁག་ལ་ཞུ་འབོད་དང་གསལ་བཤད་གནང་ཆེད་དུ་ཡིན་པ་རེད་འདུག The post བཞུགས་སྒར་རྡ་ས་ནས་རྒྱལ་ས་ལྡི་ལི་བར་རང་བཙན་གོམ་བགྲོད་ཅེས་པའི་ལས་འགུལ་དབུ་འཛུགས། appeared first on vot.

འདི་ལོའི་ཕྱི་ཟླ་ ༧ པའི་ཚེས་ ༢ ཉིན་རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱིས་རྒྱ་ནག་གཞུང་ལ་ངོ་རྒོལ་གྱིས་སྐུ་ལུས་མེར་སྲེགས་བཏང་སྟེ་སྐུ་གྲོངས་པའི་ཡིད་སྐྱོའི་གནས་ཚུལ་བྱུང་བ་དང་འབྲེལ། འཛམ་གླིང་ཁྱོན་ཡོངས་སུ་བོད་མི་གནས་སྡོད་གང་སར་ངོ་རྒོལ་སྐད་འབོད་དང་ཟས་བཅད་ངོ་རྒོལ། བོད་དོན་གོམ་གྲོད་དང་། རྐང་འཁོར་དང་སྦག་སྦག་སྐོར་སྐྱོད་སོགས་ཀྱི་ལས་འགུལ་ཚ་ཚ་འུར་འུར་ངང་སྤེལ་བཞིན་པའི་ཁྲོད། སང་ཉིན་རྒྱལ་གཅེས་དཔའ་བོ་བླ་དགའ་རང་བཙན་ལགས་སྐུ་གྲོངས་པའི་ཞག་ ༤༩ པའི་དུས་ཚིགས་དང་བསྟུན། དེ་རིང་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་གི་བདུན་དུ་དབུས་བོད་ཀྱི་གཞོན་ནུ་ལྷན་ཚོགས་ཀྱི་རྒྱུན་མཐུད་ཟས་བཅད་ངོ་རྒོལ་གྱི་ལས་འགུལ་སྤེལ་སའི་འདུན་དུ། པོན་ཊ་ས་གནས་བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲིག་འོག ཟླ་བ་འདིའི་ཚེས་ ༡༣ ཉིན་པོན་ཊ་གྲོང་ཁྱེར་ནས་དབུ་འཛུགས་གནང་བའི་སྤྱི་ལེ་ ༤༠༠ མིན་ཙམ་གྱི་རྒྱལ་གཅེས་དཔའ་བོའི་མངོན་འདོད་རྐང་འཁོར་སྐོར་སྐྱོད་ཀྱི་ལས་འགུལ་འདི་མཇུག་སྒྲིལ་གནང་སོང་། དེ་ཡང་དེ་རིང་སྔ་དྲོ་ཕྱག་ཚོད་ ༩ པའི་ཐོག་དབུས་བོད་ཀྱི་གཞོན་ནུ་ལྷན་ཚོགས་གཙོས་པའི་བོད་པའི་གཞུང་འབྲེལ་མིན་པའི་ཚོགས་པ་ཁག་གི་ཚོགས་མི་རྣམས་ནས་ཕེབས་བསུ་གཟབ་རྒྱས་ཞུས་པའི་ཐོག པོན་ཊ་ནས་རྡ་ས་བར་གྱི་རྐང་འཁོར་སྐོར་སྐྱོད་པ་རྣམས་བཞུགས་སྒར་དུ་ཕེབས་འབྱོར་བྱུང་སོང་བ་དང་། ཐེངས་འདིའི་ལས་འགུལ་ནང་དུ་པོན་ཊ་ས་གནས་གཞོན་ནུའི་ཚོགས་གཙོ་ངག་དབང་དཔལ་འབྱོར་གཙོས་པའི་ལས་འགུལ་བ་བཅུ་དང་ཕྱག་རོགས་གནང་མཁན་བཅས་མི་གྲངས་ ༡༨ ཡོད་པ་རྣམས་དེ་རིང་བཞུགས་སྒར་དུ་ཕེབས་འབྱོར་བྱུང་རྗེས། སང་བཞུགས་སྒར་དུ་བོད་མིའི་སྒྲིག་འཛུགས་བཀའ་སྤྱི་གཉིས་ཀྱི་གོ་སྒྲིག་གནང་བའི་མཆོད་འབུལ་སྨོན་ལམ་དང་གོམ་བགྲོད་ཀྱི་ལས་འགུལ་ནང་མཉམ་ཞུགས་གནང་རྒྱུ་རེད་འདུག  དེའི་སྐོར་པོན་ཊ་ས་གནས་གཞོན་ནུའི་ཚོགས་གཙོ་ངག་དབང་དཔལ་འབྱོར་ལགས་སུ་བཀའ་འདྲི་ཞུས་ཡོད།  རྩ་བའི་སང་དཔའ་བོ་བློ་དགའ་རང་བཙན་ལགས་ཀྱི་བོད་དོན་ཆེད་དུ་སྐུ་ལུས་མེར་མཆོད་ཕུལ་བ་ནས་བཟུང་སྟེ་བཞུགས་སྒར་རྡ་རམ་ས་ལ་གཙོས་པའི་འཛམ་གླིང་ཁྱོན་ཡོངས་སུ་བོད་མི་གནས་སྡོད་གང་སར་ངོ་རྒོལ་སྐད་འབོད་དང་ཟས་བཅད་ངོ་རྒོལ། ཞི་བའི་གོམ་བགྲོད་དང་སྦག་སྦག་དང་རྐང་འཁོར་སྐྱོད། དེ་བཞིན་སྐྲ་བཞར་བཅས་མ་གྲོས་བསམ་པ་གཅིག་མཐུན་གྱི་ལས་འགུལ་འདྲ་མིན་སྤེལ་ཡོད་པ་དང་། སང་ཕྱི་ཟླ་ ༨ པའི་ཚེས་ ༢༠ དེ་བཞིན་བློ་དགའ་རང་བཙན་ལགས་སྐུ་གྲོངས་ནས་ཞག་ ༤༩ པའི་དུས་ཚིགས་དང་བསྟུན། བཞུགས་སྒར་རྡ་རམ་ས་ལར་བོད་མིའི་སྒྲིག་འཛུགས་ཀྱི་བཀའ་ཤག་དང་བོད་མི་མང་སྤྱི་འཐུས་ལྷན་ཚོགས་གཉིས་མཉམ་རུབ་ཐོག་ཐེག་ཆེན་ཆོས་གླིང་གཙུག་ལག་ཁང་དུ་མཆོད་འབུལ་སྨོན་ལམ་དང་ཞི་བའི་གོམ་བགྲོད་ཀྱི་ལས་འགུལ་ཞིག་གོ་སྒྲིག་གནང་ཡོད་པ་མ་ཟད། བོད་མིའི་སྒྲིག་འཛུགས་ཀྱི་ཁྱབ་ཁོངས་ས་གནས་ཁག་གི་འགོ་འཛིན་རྣམས་ལ་ཡང་བོད་མི་བློས་གཏོང་བ་རྗེས་དྲན་དང་འབྲེལ་བའི་མཆོད་འབུལ་སྨོན་ལམ་གྱི་ལས་འགུལ་གོ་སྒྲིག་གནང་ཡོད་པའི་བཀོད་ཁྱབ་བཏང་ཡོད་པ་རེད་འདུག དེའི་བར་ན་ཁ་སང་ཨ་རིའི་ནིའུ་ཡོག་གྲོང་ཁྱེར་གྱི་འཛམ་གླིང་མཉམ་འབྲེལ་རྒྱལ་ཚོགས་ཀྱི་ལས་ཁུངས་ཨ་མའི་འདུན་དུ་དཔའ་བོ་བློ་དགའ་རང་བཙན་ལགས་ཀྱིས་རང་ལུས་མེར་བསྲེགས་གནང་ཡུལ་དུ་ནིའུ་ཡོག་ས་གནས་མདོ་ཁམས་ཆུ་བཞི་སྒང་དྲུག་གི་ཆུ་ཚོད་ ༢༤ རིང་གི་ཟས་བཅད་ངོ་རྒོལ་གྱི་ལས་འགུལ་ཞིག་ཀྱང་སྤེལ་མུས་ཡིན་པ་རེད། མ་ཟད་སང་ཉིན་ཨོ་གླིང་རྒྱལ་ས་ Canberra ནང་དུ་ཨོ་གླིང་ས་ཕྱོགས་གང་ས་ནས་ཕེབས་པའི་བོད་མི་ལས་འགུལ་བ་ ༤༠ ཙམ་གྱི་ཡུལ་དེའི་གྲོས་ཚོགས་ཀྱི་བདུན་དུ་སྐྲ་བཞར་གྱི་ལས་འགུལ་དང་། རྗེས་སུ་མཆོད་འབུལ་སྨོན་ལམ་གྱི་ལས་འགུལ་བཅས་གོ་སྒྲིག་གནང་གི་ཡོད་པ་རེད། The post པོན་ཊ་ནས་རྡ་ས་བར་གྱི་རྒྱལ་གཅེས་དཔའ་བོའི་མངོན་འདོད་རྐང་འཁོར་སྐོར་སྐྱོད་ཀྱི་ལས་འགུལ་འཇུག་སྒྲིལ། appeared first on vot.

ཀ་ཁ་ག་ང་རྣམ་པར་རྒྱལ་འགྱུར་གཅིག་ཅེས་པའི་འབོད་སྒྲའི་ཐོག་བཞུགས་སྒར་རྡ་རམ་ས་ལ་ནས་ལ་དྭགས་བར་གོམ་བགྲོད་ལས་འགུལ་སྤེལ་མཁན་སྐལ་བཟང་མཐར་ཕྱིན་ལགས་དང་། ཟངས་དཀར་སྟོང་སྡེ་ནས་ཡིན་པའི་ལ་དྭགས་པའི་གཞོན་སྐྱེས་བསྟན་འཛིན་ཆོས་གྲགས་ལགས་རྣམ་གཉིས་ཁ་སང་ཕྱི་ཟླ་ ༨ པའི་ཚེས་ ༡༦ ཉིན་གྱི་ཞོགས་པ་ཆུ་ཚོད་ ༨།༣༠ ཐོག་ལ་དྭགས་བསོད་ནམས་གླིང་ལ་སྤྱི་ལས་ཁུངས་ཀྱི་མདུན་ཐང་དུ་བདེ་འབྱོར་བྱུང་ཞིང་། ལ་དྭགས་བོད་ཁྱིམ་སློབ་ཟུར་ཚོགས་པའི་སྣེ་ཁྲིད་འོག་བོད་མི་རྣམས་ནས་ཁོང་གཉིས་ལ་སྣེ་ལེན་གཟབ་རྒྱས་ཞུས་ཏེ་མཛད་རིམ་སྟབས་བདེ་ཞིག་གོ་སྒྲིག་ཞུས་འདུག དེ་ཡང་མཛད་སྒོའི་ཐོག་ལ་སྤྱི་ལས་ཁུངས་ཀྱི་ལས་དྲུང་བསྟན་འཛིན་ཀུན་བཟང་ལགས་དང་། ས་གནས་མང་གཙོ་ཀ་བ་གསུམ་གྱི་མཛད་གཙོ་རྣམས་པ། གཞུང་འབྲེལ་དང་གཞུང་འབྲེལ་མིན་པའི་སྐུ་ཚབ་ཁག གཞན་ཡང་མང་ཚོགས་ཁག་ཅིག་ནས་ཁོང་རྣམས་གཉིས་ལ་མཇལ་དར་སྒྲོན་འབུལ་གནང་སོང་། སྐབས་དེར་ས་གནས་འཐུས་མིའི་ཚོགས་གཙོ་དོན་གྲུབ་ཚེ་རིང་ལགས་ནས་གསུང་བཤད་གནང་བའི་ཁྲོད། རྒྱ་ནག་གི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཡིག་ཟེར་བ་དེ་ལག་བསྟར་བྱེད་འགོ་བཙུགས་པའི་ཉིན་རྗེས་མ་ཕྱི་ཟླ་ ༧ ཚེས་ ༢ ཉིན་བོད་ཀྱི་རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱིས། ཨ་རི་ནིའུ་ཡོག་གྲོང་ཁྱེར་དུ་ཡོད་པའི་རྒྱལ་ཚོགས་ཀྱི་ལས་ཁུངས་ཀྱི་མདུན་དུ་བོད་དོན་ཆེད་སྐུ་ལུས་མེར་མཆོད་ཕུལ་རྗེས། སྐལ་བཟང་མཐར་ཕྱིན་ལགས་ཀྱིས་མ་སྐུལ་དྭངས་བླངས་ཐོག་དམ་པ་དེ་ཉིད་ལ་རྗེས་དྲན་དང་འབྲེལ། གཙོ་བོ་བོད་ཀྱི་སྐད་ཡིག་རྒྱུན་འཛིན་དང་སྲུང་སྐྱོབ་སླད་ཞི་བའི་གོམ་བགྲོད་གནང་བར་ཡི་རང་བསྔགས་བརྗོད་ཡོད་བཅས་གསུངས་སོང་། གཞན་ཡང་མང་ཚོགས་ཁག་ཅིག་ལ་སྐལ་བཟང་མཐར་ཕྱིན་ལགས་སུ་ལས་འགུལ་དེ་དང་འབྲེལ་ནས་བཀའ་འདྲི་ཞུས་སྐབས། ཁོང་གིས་གཞི་རྩའི་ཀ་ཁ་ག་ང་རྣམ་པར་རྒྱལ་གྱུར་གཅིག་ཅེས་པའི་ལས་འགུལ་སྤེལ་གོ་དོན་ནི། བོད་ཀྱི་རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱིས་བོད་རྒྱལ་ཁབ་དང་མི་རིགས། སྐད་ཡིག རིགས་གཞུང་གི་ཆེད་དུ་རང་སྲོག་བློས་བཏང་གནང་ཡོད་སྟབས། སོ་སོའི་ངོས་ནས་གང་ཐུབ་ཅི་ཐུབ་ཀྱིས་འདི་ལྟ་བུའི་ལས་འགུལ་ཞིག་མ་སྤེལ་ཐབས་མེད་ལྟ་བུའི་ཚོར་སྣང་ཞིག་བྱུང་ཡོད་པ་དང་། ལས་འགུལ་འདི་ནི་གཙོ་བ་དཔའ་བོ་བློ་དགའ་ལགས་ཀྱི་བློ་གཏོང་ལ་ཆེད་མཐོང་འབུལ་རྒྱུ་དང་། རྒྱ་ནག་གཞུང་གི་གདུག་རྩུབ་དང་ཁྲིམས་ཡིག་གསར་བཟོ་ལག་བསྟར་བྱེད་པ་དེར་དུས་དང་རྣམ་པ་ཀུན་དུ་ངོ་རྒོལ་མཚོན་བྱེད་ཡིན་པ་གསུངས་སོང་། དེ་བཞིན་ལས་འགུལ་འདིའི་ངོ་བོའི་ཐོག་ནས་ཀ་ཁ་ག་ང་རྣམ་པར་རྒྱལ་གྱུར་གཅིག་ཅེས་པ་ནི། བོད་མི་རིགས་ཀྱི་སྐད་ཡིག་མཚོན་གྱི་ཡོད་ཅིང་། འགའ་རེས་ནས་རང་བཙན་གྱི་འབོད་སྒྲ་མེད་པར་ཞི་བའི་འབོད་སྒྲ་འམ་སྐད་ཡིག་གི་ཐོག་ནས་ལས་འགུལ་སྤེལ་གོ་དོན་གང་ཡིན་ནམ་ཞེས་མང་ཚོགས་ནང་དགོངས་ཚུལ་ཡོང་གི་ཡོད་སྟབས། མང་གཙོའི་ལམ་ལུགས་ནང་དེ་ལྟ་བུའི་བསམ་ཚུལ་ཡོང་ཆོག་གི་ཡོད་ལ་དེ་ནི་མང་གཙོའི་ཁྱད་ཆོས་ཤིག་ཡིན་པ་དེ་ལྟར་ཡང་། ལས་འགུལ་གྱི་ངོ་བོ་གཙོ་བོ་ནི་བོད་ཀྱི་སྐད་ཡིག་ཀ་ཁ་ག་ང་རྣམ་པར་རྒྱལ་འགྱུར་གཅིག་ཅེས་པ་དེ་ཡིན་པ་འགྲེལ་བརྗོད་གནང་སོང་། The post བོད་ཀྱི་སྐད་ཡིག་སྲུང་སྐྱོབ་སླད་གོམ་བགྲོད་ལས་འགུལ་བ་ལ་དྭགས་ཀྱི་རྒྱལ་ས་གླེར་བདེ་འབྱོར་བྱུང་འདུག appeared first on vot.

བོད་ཀྱི་གཞོན་ནུ་ལྷན་ཚོགས་ཀྱི་བྱང་ཨ་རིའི་འགན་འཛིན་ལྷན་ཚོགས་ཐེངས་ ༢༢ ཐོག་དཔའ་བོ་བློ་དགའ་རང་བཙན་དམ་པ་དེ་ཉིད་ལ་རྒྱལ་གཅེས་དཔའ་བོའི་གཟེངས་རྟགས་ཀྱི་ཆེ་བསྟོད་གནང་འདུག་པ་མ་ཟད། དཔའ་བོ་ཁོང་གིས་ཕྱི་ཟླ་ ༧ ཚེས་ ༢ ཉིན་བོད་རྒྱལ་ཁབ་དང་མི་རིགས། རང་བཙན་སླར་གསོའི་ཆེད་དུ་རང་ལུས་མེར་བསྲེགས་ཀྱིས་རང་སྲོག་བློས་བཏང་གནང་བའི་རྗེས་དྲན་སླད་དུ་ཉིན་དེར་གཏན་འབེབས་ལས་འགུལ་སྤེལ་རྒྱུ་ཡིན་པའི་གྲོས་ཆོད་སོགས་གཏན་འབེབས་གནང་འདུག དེ་ཡང་སྐབས་ ༡༩ པའི་ནིའུ་ཡོག་ནིའུ་ཇར་སི་ས་གནས་བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲིག་འོག ཕྱི་ཟླ་ ༨ ཚེས་ ༡༤ ནས་ ༡༦ བར་ཉིན་གྲངས་གསུམ་རིང་བོད་ཀྱི་གཞོན་ནུ་ལྷན་ཚོགས་ཀྱི་བྱང་ཨ་རིའི་འགན་འཛིན་ལྷན་ཚོགས་ཐེངས་ ༢༢ པ་དེ་ནུའུ་ཡོག་ཆོས་ཀྱི་ཁང་པར་ཚོགས་འདུག་པ་དང་། ཚོགས་འདུའི་ཐོག་གྲོས་གཞི་ཁག་དགུ་ལ་གྲོས་ཆོད་ ༡༥ ལྷག་གཏན་འབེབས་གནང་འདུག འདི་ག་རླུང་འཕྲིན་ཁང་ནས་བོད་ཀྱི་གཞོན་ནུ་ལྷན་ཚོགས་ཀྱི་སྤྱི་ཁྱབ་ཚོགས་གཙོ་ཚེ་རིང་ཆོས་འཕེལ་ལགས་སུ་བཀའ་འདྲི་ཞུ་སྐབས་ཁོང་གིས། རྩ་བའི་ད་རེས་བོད་ཀྱི་གཞོན་ནུ་ལྷན་ཚོགས་ཀྱི་བྱང་ཨ་རིའི་འགན་འཛིན་ལྷན་ཚོགས་དེ་ཉིད་ཐོག་མ་ཁེ་ན་ཌར་འཚོགས་གཏན་འཁེལ་ཡོད་ཀྱང་། ཉེ་བའི་ཆར་བོད་རྒྱལ་ཁབ་དང་མི་རིགས། རང་བཙན་སླར་གསོ་ཆེད་དུ་རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱིས་རང་ལུས་མེར་བསྲེགས་བཏང་སྟེ་རང་སྲོག་བློས་བཏང་གནང་བའི་གནས་ཚུལ་བྱུང་རྗེས། སྐབས་དེ་དུས་ཛ་དྲག་གི་གནས་སྟངས་གཞིར་བཞག་གི་ཐོག་ནས། ནིའུ་ཡོག་ནིའུ་ཇར་སི་ས་གནས་བོད་ཀྱི་གཞོན་ནུ་ལྷན་ཚོགས་ཀྱི་རྒྱུན་ལས་དང་། དབུས་དང་ས་གནས་རྒྱུན་ཟུར། ཚོགས་མི་བཅས་ཛ་དྲག་ཚོགས་འདུ་སྐོང་འཚོགས་གནང་སྟེ། དབུས་སྤྱི་ཁྱབ་རྒྱུན་ལས་ཁང་ལ་ད་རེས་འགན་འཛིན་ལྷན་ཚོགས་འདི་བཞིན་ངེས་པར་དུ་ནིའུ་ཡོག་ཏུ་སྐོང་འཚོགས་གནང་དགོས་པའི་འབོད་སྐུལ་ཞུ་དོན་ལྟར། དབུས་སྤྱི་ཁྱབ་རྒྱུན་ལས་ཁང་ནས་ཊོ་རོན་ཊོ་ས་གནས་བོད་ཀྱི་གཞོན་ནུ་ལྷན་ཚོགས་ལ་འབྲེལ་བ་གནང་རྗེས། མཐའ་མའི་ཐག་གཅོད་དེ་ནིའུ་ཡོག་ཏུ་འཚོགས་ཡོད་པ་འགྲེལ་བརྗོད་གནང་སོང་། ད་དུང་ད་རེས་འགན་འཛིན་ལྷན་ཚོགས་དེའི་ཐོག་གྲོས་གཞི་དོན་ཚན་དགུ་ལ་གྲོས་ཆོད་ཁག་ ༡༥ ལྷག་གཏན་འབེབས་གནང་ཡོད་ཅིང་། དེའི་ནང་༸རྒྱལ་བའི་སྐུ་ཕྱྭ་དང་། བོད་མི་གཞོན་སྐྱེས་རྣམས་ལ་བོད་རྒྱལ་ཁབ་དང་མི་རིགས་ལ་རྒྱལ་ཞེན་དང་འཐབ་རྩོད་ཀྱི་བསམ་བློ་བསྐྲུན་རྒྱུ་སོགས་ཚུད་ཡོད་པ་དང་། ལྷག་པར་དུ་ཕྱི་ཟླ་ ༧ ཚེས་ ༢ ཉིན་མོ་འདི་བཞིན་རྒྱལ་གཅེས་དཔའ་བོ་བློ་དགའ་རང་བཙན་ལགས་རྗེས་དྲན་དང་གདུང་སེམས་མཉམ་བསྐྱེད་ཀྱི་ཉིན་མོར་གཏན་འབེབས་ལས་འགུལ་སྤེལ་རྒྱུ་གཏན་འབེབས་གནང་ཡོད་པ་འགྲེལ་བརྗོད་གནང་སོང་། མ་ཟད་ཚོགས་འདུའི་དབུ་འབྱེད་མཛད་སྒོའི་ཐོག་བོད་ཀྱི་གཞོན་ནུ་ལྷན་ཚོགས་ངོས་ནས་དཔའ་བོ་ཁོང་གི་བློས་བཏང་ལ་ཆེ་བསྟོད་མཚོན་ཆེད་རྒྱལ་གཅེས་དཔའ་བོའི་གཟེངས་རྟགས་དེ་ཉིད་དཔའ་བོ་ཁོང་གི་ནང་མིར་འབུལ་བཞེས་གནང་ཡོད་པ་འགྲེལ་བརྗོད་གནང་སོང་། གཞན་ཡང་དེ་རིང་ཚེས་ ༡༧ ཉིན་བྱང་ཨི་རིར་གནས་བཞུགས་བོད་ཀྱི་གཞོན་ནུ་ལྷན་ཚོགས་ཀྱི་དབུས་དང་ས་གནས་རྒྱུན་ལས་ཟུར་པ་དང་ལས་ཐོག ཚོགས་མི་བཅས་ཚང་འཛོམས་ཀྱིས་དམིགས་བསལ་ལྷན་ཚོགས་སྐོང་འཚོགས་གནང་རྒྱུ་ཡིན་ཞིང་། དེའི་ནང་གཙོ་བོ་བོད་ཀྱི་གཞོན་ནུ་ལྷན་ཚོགས་ཀྱི་ལས་དོན་བྱེད་ཕྱོགས་དང་། མ་འོངས་བོད་རྒྱལ་ཁབ་ཀྱི་རང་བཙན་སླར་གསོའི་ཆེད་དུ་ལས་འགུལ་དང་ལས་གཞི་ཇི་ལྟར་རྒྱ་སྐྱེད་གཏང་དགོས་པའི་ཐོག་ལ་གོ་བསྡུར་ཞུ་རྒྱུ་ཡིན་པ་རེད་འདུག རྩ་བའི་བོད་ཀྱི་གཞོན་ནུ་ལྷན་ཚོགས་ཀྱི་བྱང་ཨ་རིའི་འགན་འཛིན་ལྷན་ཚོགས་ཐེངས་ ༢༢ པའི་དབུ་འབྱེད་མཛད་སྒོའི་ཐོག་སྐུ་མགྲོན་གཙོ་བོར་སྲིད་ཟུར་བློ་བཟང་སེང་གེ་ལགས་ཀྱིས་དབུས་པའི་པའི་དམིགས་བསལ་སྐུ་མགྲོན་སེར་བྱེས་ནང་པའི་རིག་གཞུང་ལྟེ་གནང་ཁང་གི་དབུ་འཛིན་ཆོས་འཁོར་རིན་པོ་ཆེ། […] The post བོད་ཀྱི་གཞོན་ནུ་ལྷན་ཚོགས་ཀྱི་བྱང་ཨ་རིའི་འགན་འཛིན་ལྷན་ཚོགས་ཐེངས་ ༢༢ སྐོང་འཚོགས། appeared first on vot.

རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱི་བློས་བཏང་ལ་རྗེས་དྲན་ཞུ་ཆེད། རྒྱལ་སྤྱིའི་ཁྱོན་ཡོངས་ནང་བཙན་བྱོལ་བོད་མི་འདུ་སྡོད་གང་སར་ལས་འགུལ་སྤེལ་མུས་ཁྲོད། ཁ་སང་ཨ་རིའི་ནང་རྒྱལ་ཚོགས་མདུན་དུ་བོད་མི་གཞོན་སྐྱེས་ཁོ་ནས་ངོ་རྒོལ་སྐད་འབོད་ཀྱི་ལས་འགུལ་ཞིག་གོ་སྒྲིག་གནང་བ་དང་འབྲེལ། རྒྱལ་གཅེས་དཔའ་བོ་ཁོང་གི་ཞལ་འཆེམས་དང་། བོད་རང་བཙན་འཐབ་རྩོད་མདུན་བསྐྱོད་གནང་དགོས་གལ་སོགས་ཀྱིས་གཏམ་བཤད་གནང་འདུག དེ་ཡང་ཁ་སང་ཨ་རིའི་ནང་ནིའུ་ཡོག་ནིའུ་འཇར་སི་ས་གནས་གཞོན་ནུ་ལྷན་ཚོགས་ཀྱིས་གོ་སྒྲིག་གནང་བའི་ལས་འགུལ་དེའི་ཐོག བོད་མི་གཞོན་སྐྱེས་རྣམས་ཀྱིས་སེམས་ཚོར་ཆེན་པོས་ལུས་ལ་བོད་མིའི་ཐུན་མོང་མ་ཡིན་པའི་བོད་ཆས་བསྣམས་པ་དང་། ལག་ཏུ་བོད་ཀྱི་རྒྱལ་དར་དང་། བོད་རང་བཙན་རྒྱལ་གྱུར་ཅིག་ཅེས་པའི་འཕྲེད་དར་སོགས་བསྣམས་ནས་ངོ་རྒོལ་སྐད་འབོད་གནང་བ་དང་།  སྐབས་དེར་གཞོན་སྐྱེས་བསྟན་འཛིན་དབང་རྒྱལ་ཞུས་པ་ཞིག་གིས་རྒྱལ་གཅེས་དཔའ་བའི་ཞལ་འཆེམས་ལ་གུས་བརྩི་དང་འབྲེལ་བོད་མི་རྒན་རབས་རྣམས་ཀྱིས་ད་བར་ཆོལ་ཁ་ཆོས་ལུགས་འཐེན་འཁྱེར་བྱས་པར་གཞོན་སྐྱེས་རྣམས་ལ་ངོ་གནོངས་བཅུག་གི་ཡོད་ཅིང་། ཆོལ་ཁ་ཆོས་ལུགས་ལ་དབྱེ་འབྱེད་ཁོ་ན་བྱས་ཏེ་མ་བཞུགས་པར་བོད་མི་ནང་ཁུལ་རྡོག་རྩ་ཆིག་སྒྲིལ་གནང་རྒྱུ་ནི་ཧ་ཅང་གལ་ཆེན་ཡིན་པ་མ་ཟད། ད་ཆ་བོད་རང་བཙན་ཆེད་དུ་འཐབ་རྩོད་སྔར་ལྷག་གནང་དགོས་གལ་ཡིན་པ་ནན་བཤད་གནང་སོང་། གཞན་ཡང་ཆུང་དུས་ནས་བློ་དགའ་རང་བཙན་ལགས་དང་ལྷན་དུ་འཚར་ལོངས་བྱུང་མཁན་གཞོན་སྐྱེས་བསྟན་འཛིན་བཀྲ་ཤིས་ལགས་ཞུ་བ་ཞིག་གིས། སེམས་ཚོར་ཆེན་པོས་དཔའ་བོ་ཁོང་གི་དཔའ་བློ་དང་བློས་བཏང་ལ་རྗེས་དྲན་ཞུས་པ་དང་ཆབས་ཅིག རྒྱལ་གཅེས་པ་ཁོང་ནི་བཀྲ་ཤིས་ལགས་ཀྱི་མི་ཚེ་ནང་བག་ཆགས་ཆེ་ཤོས་ལྡན་པའི་གང་ཟག་ཞིག་ཡིན་པ་འགྲེལ་བརྗོད་གནང་འདུག ཁུལ་དེར་ཁྲིམས་རྩོད་པའི་ཕྱག་ལས་གནང་བཞིན་པ་དཀོན་མཆོག་སྒྲོལ་མ་ལགས་ཀྱིས། བོད་མི་རྣམས་ཀྱིས་རྒྱལ་ཚོགས་ལ་རེ་བ་ཇི་ཙམ་འཆོལ་བཞིན་པ་དྲན་སྐུལ་དང་སྦྲགས། འཛམ་གླིང་མཉམ་འབྲེལ་རྒྱལ་ཚོགས་ནི་རྒྱལ་ཁབ་སྤྱི་ལ་གཟིགས་རྟོག་གནང་མཁན་གྱི་ལས་ཁུངས་ཤིག་ཡིན་པ་སོགས་གསུངས་སོང་། དེ་བཞིན་གཞན་གཞོན་སྐྱེས་ཁག་གཅིག་གིས་བོད་རྩ་དོན་སླད་གཞོན་སྐྱེས་ཚོར་འགན་འཕར་མ་ཡོད་པ་ནན་བཤད་ཀྱིས། དེང་གི་གཞོན་སྐྱེས་ཚོར་རྒྱལ་ཁབ་འདྲ་མིན་གྱི་མི་སེར་ཐོབ་ཐང་ཡོད་སྟབས། གོ་སྐབས་དེ་ལྟར་དམ་འཛིན་གནང་ནས་མི་རིགས་གཞན་རྣམས་ལ་བོད་ཀྱི་གནས་སྟངས་འགྲེལ་བཤད་སོགས་ཀྱིས། བོད་རང་དབང་དང་རང་བཙན་ཆེད་དུ་འཐབ་རྩོད་སྔར་ལྷག་གནང་དགོས་པ་གསུངས་སོང་། རྩ་བའི་བོད་རང་བཙན་ལས་འགུལ་བ་བློ་དགའ་རང་བཙན་ལགས་ཀྱི་བདུན་ཚིགས་དྲུག་པ་དང་སྟབས་བསྟུན། རྒྱ་གར་རྒྱལ་ནང་དུའང་ལས་འགུལ་འདྲ་མིན་སྤེལ་ཡོད་པ་ལྟར། ཁ་སང་ཚེས་ ༡༣ ཉིན་དབུས་ས་གཉིས་ཀྱི་བོད་ཀྱི་བུད་མེད་ལྷན་ཚོགས་དང་། ཆོལ་ཁ་གསུམ། རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་བཅས་བཞུགས་སྒར་དུ་རྟེན་གཞི་བྱས་པའི་གཞུང་འབྲེལ་མ་ཡིན་པའི་ཚོགས་པ་ལྔའི་གོ་སྒྲིག་འོག བློ་དགའ་རང་བཙན་ལགས་ཀྱི་གནད་དོན་དང་། རྒྱ་ནག་གིས་བོད་ནང་འཛིན་པའི་སྲིད་བྱུས་སོགས་ལ་རྒྱལ་ཚོགས་ཀྱི་ངོས་ནས་ཡ་ལན་དང་རྒྱ་ནག་གཞུང་ལ་ཉེན་བརྡ་གཏོང་དགོས་པའི་རེ་འདུན་དོན་ཚན་ཁག་གཅིག་བཏོན་པའི་ཐོག་དྲག་ཆར་བབས་མིན་ལ་ལྟོས་མེད་བཞུགས་སྒར་མེ་གྷན་ཁྲོམ་གཞུང་དུ་མར་མེ་ཁྲོམ་སྐོར་གྱི་ཞི་བའི་ལས་འགུལ་ཞིག་སྤེལ་ཡོད་པ་རེད། གཞི་རྩའི་བློ་དགའ་རང་བཙན་ལགས་ཀྱིས་བོད་བསྟན་སྲིད་མི་རིགས་ཀྱི་ཆེད་དུ་སྐུ་ལུས་མེར་བསྲེགས་བཏང་བ་ནས་བཟུང་། ཨ་རི་གཙོས་པའི་འཛམ་གླིང་ཡུལ་གྲུ་གང་སར་བཞུགས་པའི་བཙན་བྱོལ་བོད་མི་དང་བོད་དོན་རྒྱབ་སྐྱོར་བ་ཡོངས་ནས་ཚོར་བ་རྣོ་བོའི་ཐོག མར་མེ་ཁྲོམ་སྐོར་དང་། ཞི་བའི་གོམ་བགྲོད། ཟས་བཅད་ངོ་རྒོལ། ཞུ་གཏུག་ལས་འགུལ་སོགས་རྣམ་པ་འདྲ་མིན་གྱི་ཐོག་ནས་ལས་འགུལ་སྤེལ་དང་སྤེལ་མུས་ཁྲོད། ད་ཆ་རྒྱལ་གཅེས་པ་དམ་པ་ཁོང་རང་ལུས་མེར་བསྲེགས་བཏང་ནས་ཞག་ ༤༩ སླེབས་ལ་ཉེ་སྟབས། བཀའ་སྤྱི་ཐུན་མོང་ནས་བཞུགས་སྒར་དུ་མཆོད་འབུལ་སྨོན་ལམ་དང་ཞི་བའི་གོམ་བགྲོད་ཀྱི་ལས་འགུལ་སྤེལ་གཏན་འཁེལ་ཡོད་པ་དང་། གཞན་ཡང་ཉིན་དེར་བོད་མི་འདུ་སྡོད་ས་གནས་ཡོངས་སུ་ལས་འགུལ་འདྲ་མིན་སྤེལ་འཆར་ཡོད་པ་རེད། The post བོད་མིའི་རྒན་རབས་རྣམས་ཀྱིས་ཆོལ་ཁ་ཆོས་ལུགས་འཐེན་འཁྱེར་བྱས་པར་བོད་མི་གཞོན་སྐྱེས་རྣམས་ངོ་གནོངས་དགོས་བྱུང་བ་གསུངས་སོང་། appeared first on vot.

དེ་རིང་འདི་ག་རྒྱ་གར་གྱི་རྒྱལ་ས་ལྡི་ལིའི་མདོ་ཁམས་ཆུ་བཞི་སྒང་དྲུག་གྱི་དཔའ་བོ་རྗེས་དྲན་གྱི་ཚོགས་ཁང་ནང་།   བོད་མིའི་ཚོང་ལས་བདེ་ཚོགས་ཀྱི་ལོ་འཁོར་ཚོགས་ཆེན་སྐབས་བཅུ་དགུ་པ་དེ་འཚོགས་སོང་བ་དང་། ཚོགས་པ་དེའི་ཚོགས་གཙོ་འཕྲིན་ལས་ནོར་བུ་ལགས་ཀྱིས་གསུང་དོན་བྱས་པ་ཡིན་ན།  ཉིན་གཅིག་རིང་གི་ཚོགས་འདུ་དེའི་སྐབས་འདས་པའི་ལོ་གཅིག་གི་ལས་བསྡོམས་དང་མ་འོངས་ལས་འཆར་སྤེལ་ཕྱོགས་ཙམ་མ་ཟད།  རྩིས་ཁྲ་ཞིབ་འཇུག་བཅས་གནང་རྒྱུའི་འགྲེལ་བརྗོད་དང་།   ལྷག་པར་བོད་མིའི་ཚོང་ལས་བདེ་ཚོགས་ངོས་ནས་གང་མགྱོགས་བོད་མིའི་ཚོང་པ་ཚོར་ཕན་ཚུན་འབྲེལ་ལམ་གྱི་འཁོར་ཡུག་བསྐྲུན་ཐབས་ཀྱི་ལས་ཁུངས་ཤིག་དང་།   རྒྱ་གར་གཞུང་ལ་ཚོང་འབྲེལ་བཅའ་ཁྲལ་འབུལ་ཕྱོགས་སོགས་ཀྱི་ལམ་སྟོན་མཐུན་འགྱུར་གནང་རྒྱུའི་འཆར་གཞི་ཡོད་སྐོར་སོགས་གསུང་གི་འདུག བོད་མིའི་ཚོང་ལས་བདེ་ཚོགས་ཀྱི་དེ་རིང་གི་ཚོགས་ཆེན་དེའི་སྐབས་རྒྱ་གར་རྒྱལ་ཡོངས་ནས་ཚོགས་མི་གྲངས་ ༥༠ ལྷག་ཙམ་ཞིག་ཕེབས་འདུག་པ་དང་།  ཚོགས་ཆེན་དེའི་སྐུ་མགྲོན་གྱི་གཙོ་བོར་བོད་མིའི་སྒྲིག་འཛུགས་ཀྱི་དཔལ་འབྱོར་བཀའ་ཟུར་བློ་བཟང་སྙན་གྲགས་མཆོག་དང་།     དམིགས་བསལ་སྐུ་མགྲོན་དུ་ལྡི་ལི་སྐུ་ཚབ་དོན་གཅོད་འཇིགས་མེད་ཚེ་རིང་ལགས་དང་།    ལྡི་ལིར་རྟེན་གཞི་བྱས་པའི་ཐེ་ཝན་ཚོགས་ལས་སྡེ་ཚོགས་ཀྱི་ཚོགས་གཙོ་སྐུ་ཞབས་ Jason Ho བཅས་པ་གདན་ཞུ་གནང་འདུག་པ་ལྟར།   ཚོགས་འདུའི་དབུ་འབྱེད་སྐབས་སྐུ་མགྲོན་གཙོ་བོ་མཆོག་ནས་ཚོགས་པ་ཞིག་གི་གལ་གནད་སྐོར་སོགས་འགྲེལ་བརྗོད་གནང་སྟེ།  བོད་མིའི་ཚོང་ལས་སྡེ་ཚོགས་ཀྱི་ངོས་ནས་ངེས་པར་དུ་མི་མང་གི་ཡིད་ཆེས་དང་གདེང་འཇོག་ཐོབ་རྒྱུ་དེ་གལ་གནད་ཤིན་ཏུ་ནས་ཆེན་པོ་ཡིན་པ་མ་ཟད།  ལྷག་པར་དུ་ཚོགས་པའི་ཚོགས་མི་ཚོའི་ངོས་ནས་རྒྱབ་སྐྱོར་དང་མཉམ་ལས་གནང་རྒྱུ་ཤིན་ཏུ་ནས་གལ་ཆེན་ཡིན་པའི་སྐོར་སོགས་གསུངས་གནང་སོང་།   སྐབས་དེར་ད་དུང་དམིགས་བསལ་སྐུ་མགྲོན་ལྡི་ལིའི་ནང་རྟེན་གཞི་བྱས་པའི་ཐེ་ཝན་ཚོགས་ལས་སྡེ་ཚོགས་ཀྱི་ཚོགས་གཙོ་ Jason Ho ལགས་ཀྱིས་ཁོ་པ་རང་ཉིད་བཞུགས་སྒར་རྡ་རམ་ས་ལར་ཆེད་བཅར་གྱིས་༸གོང་ས་༸སྐྱབས་མགོན་ཆེན་པོ་མཆོག་གི་དམིགས་བསལ་མཇལ་ཁ་ཞུ་མྱོང་ཡོད་པ་མ་ཟད།  བོད་མིའི་ཚོང་ལས་བདེ་ཚོགས་དང་ཐེ་ཝན་གྱི་ཚོང་ལས་སྡེ་ཚོགས་གཉིས་བར་མ་འོངས་པར་མཉམ་འབྲེལ་གྱི་ལས་དོན་སྤེལ་ཕྱོགས་སོགས་ཀྱི་ཐབས་ལམ་ཐོག་བསམ་ཞིབ་གནང་གི་ཡོད་སྐོར་སོགས་གསུངས་ཡོད། དབུ་འབྱེད་མཛད་སྒོ་དེའི་མཐའ་བསྡོམས་སུ་ད་དུང་།    བོད་མི་མང་སྤྱི་འཐུས་ཟུར་པ་དང་ཁང་བཀོད་བཟོ་བདག་བདེ་བ་ཚང་རྡོ་རྗེ་ལགས་ཀྱིས་བོད་མིའི་སྒྲིག་འཛུགས་ནང་སྲིད་ལས་ཁུངས་དང་།  པོ་ཏཱ་ལ་ཨར་ལས་ཁང་གཉིས་ཀྱི་མིང་ཐོག་ནས་རྡེ་ར་རྡུན་ཁུལ་དུ་མ་གནས་ས་ཡ་བརྒྱ་ལྷག་གི་མགྲོན་ཁང་དང་ཟ་ཁང་ཚོང་ཁང་གློག་བརྙན་ཁང་སོགས་ཡོད་པའི་ཁྲོམ་གཟིགས་ཁང་ཆེན་པོ་ཞིག་གི་ལས་འཆར་འགོ་འཛུགས་ཟིན་པ་དང་།  ལོ་བཞིའི་ནང་ལེགས་གྲུབ་ཐུབ་པའི་ལས་འཆར་དེའི་ཐོག་ནས་ནང་སྲིད་ལས་ཁུངས་དང་།  པོ་ཏཱ་ཚོང་ལས་ཁང་གི་མ་ཤེར་མཁན་དང་།  བོད་མིའི་ཚོང་ལས་སྡེ་ཚོགས་བཅས་ལ་ཁེ་ཕན་ཇི་འདྲ་ཡོང་རྒྱུ་ཡིན་པ་སོགས་ཀྱི་བརྙན་པར་གཟིགས་འབུལ་གྱི་ལས་འཆར་འགྲེལ་བརྗོད་གནང་སོང་།   The post རྒྱལ་ས་ལྡི་ལིར་བོད་མིའི་ཚོང་ལས་བདེ་ཚོགས་ཀྱི་ལོ་འཁོར་ཚོགས་ཆེན་འཚོགས་སོང་། appeared first on vot.

རྒྱ་ནག་གཞུང་གི་དམག་སྲིད་ཁྱབ་ཁོངས་ལས་བོད་དམག་ཁུལ་ཁང་གི་དམག་དོན་སྒྲིག་འཛུགས་དང་འཛུགས་སྐྲུན། དེ་བཞིན་དེའི་འཕེལ་རིམ་ལ་དབྱེ་ཞིབ་གནང་བའི་ཉམས་ཞིབ་ཀྱི་སྙན་ཐོ་ཞིག་འདོན་སྤེལ་གནང་སོང་། དེ་ཡང་ཁ་སང་བོད་མིའི་སྒྲིག་འཛུགས་ཀྱི་ཕྱི་དྲིལ་ལས་ཁུངས་ཀྱི་ཁྱབ་ཁོངས་བོད་ཀྱི་སྲིད་བྱུས་ཉམས་ཞིོབ་ཁང་གི་ཚོགས་ཁང་དུ་སྐུ་མགྲོན་གཙོ་བོ་བཀའ་ཟུར་འབྲོང་ཆུང་དངོས་གྲུབ་མཆོག་གདན་ཞུས་ཐོག ཉམས་ཞིབ་པ་འབུམ་རམས་པ་བྱེ་གཞོང་ཚེ་དབང་རྡོ་རྗེ་ལགས་དང་ཕན་ཐོགས་ལགས། དེ་བཞིན་ཉམས་གསོ་ཉམས་ཞིབ་པ་བློ་བཟང་བཀྲ་ཤིས་ལགས་བཅས་གསུམ་གྱིས་ཉམས་ཞིབ་དང་རྩོམ་སྒྲིག་གནང་བའི་བོད་དམག་ཁུལ་ཁང་གི་བྱུང་བ་བརྗོད་པ་ A Historical Development of the Tibet Military District and China’s Military Infrastructure in Tibet ཞེས་པའི་ཉམས་ཞིབ་ཀྱི་སྙན་ཐོ་དེ་ཉིད་དབུ་འབྱེད་གནང་ཡོད་པ་དང་། མཛད་སྒོའི་ཐོག་སྐུ་མགྲོན་གཙོ་བོ་མཆོག་གིས་དབུས་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་བསྟན་འཛིན་ལེགས་བཤད་ལགས་དང་། ཉམས་ཞིབ་པ་རྣམ་པ། བོད་མིའི་སྒྲིག་འཛུགས་ཀྱི་ལས་ཁུངས་ཁག་གི་ལས་བྱེད་རྣམ་པ་བཅས་ཆེད་ཕེབས་གནང་འདུག སྐབས་དེར་བཀའ་ཟུར་འབྲོང་ཆུང་དངོས་གྲུབ་མཆོག་གིས་རྒྱ་ནག་གཞུང་གིས་བོད་བཙན་བཟུང་བྱས་པ་ནས་བཟུང་། བོད་དེ་བཞིན་ས་བབ་ཀྱི་ཆ་ནས་དམག་གི་འཐབ་བྱུས་ཐད་གལ་འགངས་ཆེན་པོ་ཆགས་ཡོད་པ་འགྲེལ་བརྗོད་དང་འབྲེལ། དེ་སྔ་རྒྱ་ནག་དབུ་ཁྲིད་ཚོས་རྒྱལ་ཁབ་ལྷིང་འཇགས་དགོས་ན་མཐའ་སྲུང་བརྟན་པོ་དགོས་ངེས་ཡིན་པ་དང་། མཐའ་སྲུང་བརྟན་པོ་ཡོད་ན་བོད་དེ་བཞིན་ལྷིང་འཇགས་ཡོང་ངེས་ཡིན་པ་ཐེངས་མང་བཤད་ཡོད་པ་ལུང་འདྲེན་དང་སྦྲགས། བོད་དེ་བཞིན་རྒྱ་ནག་ངོས་ནས་དམག་གི་འཐབ་བྱུས་ཀྱི་ཆེད་དུ་ག་ཚོད་ཀྱི་གལ་འགངས་ཆེན་པོ་ཆགས་ཡོད་པ་གསལ་པོ་ཤེས་ཐུབ་ཀྱི་རེད་ཅེས་གསུངས་བ་མ་ཟད། དྲན་གསོས་པ་ཞིག་ལ་དེ་སྔ་བོད་ནང་དམག་དོན་དང་འབྲེལ་བའི་གནམ་ཐང་ཁག་ཅིག་ཡོད་པ་གསལ་སྟོན་གྱིས། ས་བྱི་ཞི་རྒོལ་ཆེན་མོ་བྱུང་བ་ནས་བཟུང་རྒྱ་ནག་གཞུང་གིས་བོད་ས་ཡོངས་ལ་དམག་མི་འགྲོ་ལམ་མྱུར་པོ་ཡོང་རྒྱུའི་ཆེད་དུ་གནམ་ཐང་མང་དག་ཅིག་འཛུགས་སྐྲུན་བྱས་ཡོད་པ་ཐེར་འདོན་གནང་སོང་། སྙན་ཐོ་དེ་དང་འབྲེལ་ནས་ཉམས་ཞིབ་པ་བྱེ་གཞོང་ཚེ་དབང་རྡོ་རྗེ་ལགས་ཀྱིས་ཐོག་མར་བོད་ཀྱི་དམག་ཁུལ་ཁག་དང་འབྲེལ་བའི་ཉམས་ཞིབ་བྱེད་འགོ་བཙུགས་སྟངས་ཀྱི་རྒྱབ་ལྗོངས་ལོ་རྒྱུས་དང་བྱུང་རིམ། དེ་བཞིན་ཚོགས་ཆུང་བཙུགས་དགོས་པའི་བྱུང་རིམ་སོགས་ཀྱི་སྐོར་འགྲེལ་བརྗོད་གནང་སོང་། ཕྱོགས་མཚུངས་ཉམས་གསོའི་ཉམས་ཞིབ་པ་བློ་བཟང་བཀྲ་ཤིས་ལགས་ཀྱིས་ཕྱི་ལོ་ ༢༠༡༦ བར་བོད་དམག་ཁུལ་ཁང་གི་བྱུང་བ་དང་འཕེལ་རིམ་ངོ་སྤྲོད་དང་འབྲེལ། རྒྱ་ནག་གཞུང་གིས་བོད་དམག་ཁུལ་ཁང་ཆེད་དུ་རྒྱ་ལམ་དང་མེ་འཁོར་ལྕགས་ལམ། དེ་བཞིན་གནམ་ཐང་སོགས་འཛུགས་སྐྲུན་བྱས་པ་སོགས་གསལ་སྟོན་གྱིས། རྒྱ་ནག་གཞུང་གིས་བོད་རང་སྐྱོང་ལྗོངས་ནང་དམག་གི་གནམ་ཐང་ཁྱོན་ ༡༣ འཛུགས་སྐྲུན་བྱས་ཟིན་ཡོད་པ་གསུངས་སོང་། རྩ་བའི་ཤོག་གྲངས་ ༡༡༡ ཅན་གྱི་བོད་དམག་ཁུལ་ཁང་གི་བྱུང་བ་བརྗོད་པ་ཞེས་པའི་སྙན་ཐོ་དེ་བཞིན་བོད་ཡིག་ཐོག་རྩོམ་སྒྲིག་གནང་བ་ཞིག་ཡིན་འདུག་པ་དང་འབྲེལ། རིམ་པའི་དབྱིན་ཡིག་སོགས་ཀྱི་ནང་ཕབ་བསྒྱུར་གནང་འཆར་ཡོད་པ་དང་། སྙན་ཐོ་དེ་བཞིན་སྡེ་ཚན་གསུམ་ལ་དབྱེ་སྟེ། བོད་དམག་ཁུལ་ཁང་གི་བྱུང་བ་དང་། དེའི་དམག་སྲིད་ཀྱི་སྒྲིག་གཞིའི་སྐོར་དང་རྒྱ་ནག་གཞུང་གིས་བོད་དམག་ཁུལ་ཁང་བཙུགས་པའི་དགོས་དམིགས། དེ་བཞིན་བོད་ནང་དམག་དོན་ཆེད་འཛུགས་སྐྲུན་ཇི་ལྟར་བྱས་ཡོད་མེད་བཅས་ཀྱི་སྐོར་གསལ་ཡོད་འདུག The post བོད་དམག་ཁུལ་ཁང་གི་བྱུང་བ་བརྗོད་པ་ཞེས་པའི་སྙན་ཐོ་འདོན་སྤེལ། appeared first on vot.

རྒྱལ་སྤྱིའི་ཐོག་བོད་མིའི་སྒྲིག་འཛུགས་ལ་ཆེ་མཐོང་ངོས་འཛིན་དང་། ཨ་རི་གཞུང་གིས་བོད་མིའི་སྒྲིག་འཛུགས་ལྷན་ཐད་ཀར་འབྲེལ་བ་འཛུགས་ཐབས་ལ་དམིགས་ཏེ། ཨ་རིའི་གྲོས་ཚོགས་གོང་མའི་ནང་དུ་བོད་དོན་ལ་རྒྱབ་སྐྱོར་གྱི་ཁྲིམས་འཆར་བོད་ཀྱི་མ་འོངས་འགན་སྲུང་ཞེས་པ་ཞིག་ངོ་སྤྲོད་གནང་འདུག དེ་ཡང་ཕྱི་ལོ་ ༢༠༢༦ ཟླ་བ་ ༨ ཚེས་ ༡༡ ཉིན་ཨ་རིའི་གྲོས་ཚོགས་གོང་མའི་འཐུས་མི་ཇེབ་མར་ཀི་ལི་ (Jeff Merkley) ལགས་དང་། གྲོས་ཚོགས་གོང་མའི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཙོ་འཐུས་མི་ཇིམ་རི་ཤི་ (Jim Risch) ལགས་ཀྱིས་ཨ་རིའི་གྲོས་ཚོགས་གོང་མའི་ནང་དུ། ཨ་རི་གཞུང་གིས་རྒྱལ་སྤྱིའི་སྟེང་དུ་བོད་མིའི་སྒྲིག་འཛུགས་ཀྱི་ཆེ་མཐོང་ནུས་པ་གོང་མཐོར་དང་། གཞུང་འབྲེལ་ངོ་བོའི་ཐོག་ནས་བོད་མིའི་སྒྲིག་འཛུགས་ལྷན་དུ་མཉམ་ལས་ཡོང་ཐབས་ཀྱི་ཁྲིམས་འཆར་བོད་ཀྱི་མ་འོངས་འགན་སྲུང་། ཞེས་པ་དེ་ངོ་སྤྲོད་གནང་འདུག ཁྲིམས་འཆར་དེའི་ནང་དུ་ཨ་རི་གཞུང་གིས་བོད་མིའི་སྒྲིག་འཛུགས་དེ་བཞིན་བོད་མིའི་ཁྲིམས་མཐུན་གྱི་སྐུ་ཚབ་ཡིན་པ་དང་། དེ་ཉིད་༸གོང་ས་མཆོག་གིས་བསྐྱར་འཛུགས་མཛད་པའི་གཞུང་གི་རྒྱུན་འཛིན་པར་ངོས་འཛིན་གནང་བའི་ཐོག ཨ་རིའི་ཕྱི་སྲིད་ལྷན་ཁང་གིས་བོད་མིའི་སྒྲིག་འཛུགས་ཀྱི་སྲིད་སྐྱོང་ངམ་མཐོ་རིམ་སྐུ་ཚབ་ལ་ཆེ་མཐོང་མཚོན་ཆེད། ཁོང་ཚོར་རྒྱལ་ཁབ་ཀྱི་དབུ་ཁྲིད་དང་མཐུན་པའི་བརྩི་བཀུར་འབྲེལ་ལམ་ཞུ་དགོས་པའི་གྲོས་འགོ་བཏོན་འདུག བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས་ཀྱིས། ཨ་རིའི་སྲིད་དོན་ཚོགས་པ་ཟུང་སྦྲེལ་གྱི་རྒྱབ་སྐྱོར་ཡོད་པའི་བོད་དོན་ཁྲིམས་འཆར་དེ་བོད་ཀྱི་མ་འོངས་པའི་གནས་བབ་དང་། ལྷག་པར་དུ་བོད་མིའི་སྒྲིག་འཛུགས་ལ་རྒྱལ་སྤྱིའི་སྟེང་ཆེ་མཐོང་གདེང་འཇོགས་ཡོང་ཐབས་དང་། བོད་རྒྱའི་དཀའ་རྙོག་སེལ་ཐབས་སྐོར་ཡིན་དུས་ཧ་ཅང་གལ་ཆེན་པོ་ཆགས་ཀྱི་ཡོད་ཅེས་གསུང་གི་འདུག ཨ་རི་གཞུང་གིས་དེ་སྔོན་གཏན་འབེབས་ཞུས་པའི་བོད་དོན་དང་འབྲེལ་ཁྲིམས་ཡིག་ཁག་ཏུ་བོད་མིའི་སྒྲིག་འཛུགས་ཀྱི་མིང་ཁ་གསལ་མེད་པ་མ་ཟད། གཞུང་འབྲེལ་ཐོག་ནས་བོད་མིའི་སྒྲིག་འཛུགས་ལྷན་འབྲེལ་མོལ་མཉམ་ལས་བྱེད་ཕྱོགས་སྐོར་གང་ཡང་གསལ་མེད། གལ་ཏེ་ཐེངས་འདིའི་ཁྲིམས་འཆར་དེ་ཉིད་ཁྲིམས་ཡིག་ཏུ་གཏན་འབེབས་ཐུབ་ན། ཁྲིམས་ཡིག་དེ་ཉིད་བོད་མིའི་སྒྲིག་འཛུགས་དེ་བོད་མིའི་ཁྲིམས་མཐུན་གྱི་སྐུ་ཚབ་ཏུ་ངོས་འཛིན་དང་། བོད་མིའི་ཆབ་སྲིད་ཀྱི་སྒྲིག་འཛུགས་དེ་ལ་ཨ་རི་གཞུང་གིས་གཞུང་འབྲེལ་འབྲེལ་ལམ་སྒོ་འབྱེད་ཀྱི་ཁྲིམས་ཡིག་དང་པོ་དེ་ཆགས་ཀྱི་ཡོད། དེ་བཞིན་བོད་ཀྱི་མ་འོངས་འགན་སྲུང་ཞེས་པའི་ཁྲིམས་འཆར་དེའི་ནང་དུ། བོད་མིའི་འགྲོ་བ་མིའི་ཐོབ་ཐང་དང་རང་ཐག་རང་གཅོད་ཀྱི་ཐོབ་ཐང་ལ་རྒྱབ་སྐྱོར་དང་། འཛམ་གླིང་མཉམ་འབྲེལ་རྒྱལ་ཚོགས་སུ་བོད་མིའི་སྒྲིག་འཛུགས་ལ་ཟུར་ཉན་པའི་གནས་བབ་སྤྲད་རྒྱུ་མཚོན་པའི་རྒྱལ་སྤྱིའི་ཚོགས་སྡེ་ཁག་ནས་བོད་མིའི་སྒྲིག་འཛུགས་ལ་ངོས་འཛིན་རྒྱབ་སྐྱོར་ཡོང་ཐབས་ཞུ་རྒྱུ་དང་། བོད་རྒྱའི་དཀའ་རྙོག་བསལ་རྒྱུ་དེ་ཨ་རིའི་ཐབས་བྱུས་ཀྱི་ཁེ་ཕན་ཞིག་ཡིན་པ་ངོས་འཛིན་གྱིས། རྒྱ་ནག་མི་མང་སྤྱི་མཐུན་རྒྱལ་ཁབ་ལ་བོད་མིའི་མངོན་འདོད་བསྒྲུབ་རྒྱུར་སྐུལ་འདེད་གཏང་རྒྱུ། ཕྱོགས་མཚུངས་༸གོང་ས་སྐུ་ཕྲེང་བཅུ་བཞི་པ་མཆོག་གི་སྐུའི་ཡང་སྲིད་ངོས་འཛིན་ཞུ་རྒྱུའི་བདག་དབང་ཡོངས་རྫོགས་དགའ་ལྡན་ཕོ་བྲང་ཡིད་ཆེས་དགེ་རྩར་ཡོད་པ་དང་། ཨ་རི་གཞུང་གིས་༸གོང་ས་སྐུ་ཕྲེང་བཅུ་བཞི་པ་སྐུ་འཚོ་བཞུགས་མེད་པའི་སྐབས་སུའང་བོད་དོན་ལ་རྒྱབ་སྐྱོར་མུ་མཐུད་བྱ་རྒྱུའི་སྐོར་འཁོད་འདུག བོད་མིའི་སྒྲིག་འཛུགས་ཀྱི་ཆེ་མཐོང་གོང་མཐོར་གཏོང་ཐབས་ཀྱི་ཁྲིམས་དེ་གཏན་འབེབས་ཐུབ་ན། དེ་དོན་བོད་མིའི་སྒྲིག་འཛུགས་ནས་ཕྱི་འབྲེལ་ཐབས་བྱུས་ཀྱི་གོ་སྐབས་ལེན་ཐབས་སྐོར་བསྟན་འཛིན་ལེགས་བཤད་ལགས་ཀྱིས་གསུངས་དོན་ལ། “བོད་མིའི་སྒྲིག་འཛུགས་ཀྱི་མཐར་ཐུག་གི་དམིགས་ཡུལ་དེ་བོད་རྒྱའི་དཀའ་རྙོག་བསལ་རྒྱུ་ཡིན་པས། དེའི་ཆེད་དུ་ནུས་པ་ག་ཚོད་བཏོན་ཐུབ་ནའང་དགེ་མཚན་ཆེ་བ་ཡོད། ད་ཐེངས་ཀྱི་ཁྲིམས་འཆར་དེ་བོད་མིའི་སྒྲིག་འཛུགས་ལ་ཆེ་མཐོང་ཡོང་ཐབས་སྐོར་ཡིན་པ་དང་། དམིགས་བསལ་བོད་མིའི་སྒྲིག་འཛུགས་དེ་བཞིན་༸གོང་ས་མཆོག་གི་དབུ་ཁྲིད་པའི་སྲིད་གཞུང་གི་རྒྱུན་སྐྱོང་མཁན་ཞིག་ཏུ་ངོས་འཛིན་གྱིས་སྔ་མོའི་བོད་གཞུང་དང་ད་ལྟའི་བོད་མིའི་སྒྲིག་འཛུགས་དེ་གཞུང་གཅིག་ཡིན་པར་གཟིགས་ཀྱི་ཡོད་པ་མ་ཟད། ཨ་རི་གཞུང་གིས་མཉམ་འབྲེལ་རྒྱལ་ཚོགས་སུ་བོད་མིར་ཟུར་ཉན་པའི་གནས་བབ་སྤྲད་རྒྱུ་མཚོན་པའི་མཐུན་ཕྱོགས་རྒྱལ་ཁབ་ཁག་ལ་བོད་མིའི་སྒྲིག་འཛུགས་ལ་ངོས་འཛིན་རྒྱབ་སྐྱོར་སྐུལ་འདེད་གཏོང་གི་ཡོད་དུས། ཁྲིམས་འཆར་དེ་གལ་ཆེན་པོ་ཆགས་ཀྱི་ཡོད་པས། བོད་མིའི་སྒྲིག་འཛུགས་ནས་ཁྲིམས་འཆར་ངོ་སྤྲོད་གནང་མཁན་འབྲེལ་ཡོད་གྲོས་ཚོགས་འཐུས་མི་རྣམས་ལ་ཐུགས་རྗེ་ལེགས་འབུལ་ཞུ་གི་འདུག” ཅེས་གསུངས།   འབྱུང་འགྱུར་ཁྲིམས་འཆར་དེ་ཉིད་ཁྲིམས་ཡིག་ཏུ་བསྒྱུར་བར་དེའི་སྐོར་ཨ་རིའི་གྲོས་ཚོགས་གོང་འོག་གཉིས་སུ་བགྲོ་གླེང་དང་། མོས་མཐུན་གཏན་འབེབས་བྱེད་དགོས་པ་དང་། དེ་ལྟར་གྲུབ་བའི་རྗེས་སུ་ཨ་རིའི་སྲིད་འཛིན་གྱིས་མོས་མཐུན་མཚན་རྟགས་འགོད་དགོས་ཀྱི་ཡོད། གྲོས་ཚོགས་གོང་མའི་འཐུས་མི་ཇེབ་མར་ཀི་ལི་ […] The post ཨ་རིའི་གྲོས་ཚོགས་གོང་མའི་ནང་དུ་རྒྱལ་སྤྱིའི་སྟེང་བོད་མིའི་སྒྲིག་འཛུགས་ལ་ངོས་འཛིན་ཆེ་མཐོང་ཡོང་ཐབས་ཀྱི་ཁྲིམས་འཆར་ཆེད་འདོན། appeared first on vot.

དེ་རིང་ཕྱི་ཟླ་ ༨ ཚེས་ ༡༢ ཉིན་གྱི་སྔ་དྲོ་ཆུ་ཚོད་༡༠།༣༠ཐོག་བཞུགས་སྒར་དུ་རྟེན་གཞི་བྱས་པའི་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་དུ་ཕྱི་རྒྱལ་ནས་རྒྱ་གར་དུ་ཕྱིར་ལོག་གནང་མཁན་བོད་མི་ཞིག་གི་འོས་བསྡུ་ཐོབ་ཐང་དང་འབྲེལ་ཁ་མཆུ་ཨང་ ༢༣ པའི་གནད་དོན་གཏན་འབེབས་ཀྱིས་ཉན་ཞིབ་ལས་རིམ་འཚོགས་སོང་། དེ་ཡང་གནད་དོན་གཏན་འབེབས་ཀྱི་ཉན་ཞིབ་ལས་རིམ་ཐོག་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་ཡེ་ཤེས་དབང་མོ་མཆོག་དབུས་པའི་ཁྲིམས་ཞིབ་པ་རྣམ་པ་དང་། ཆེས་མཐོའི་ཁྲིམས་ཞིབ་ཁང་གི་ལས་བྱེད་རྣམ་པ། གྱོད་ཡ་ཞུ་སྦྱོར་བ་བསྟན་འཛིན་མཁས་གྲུབ་ལགས་དང་ཁོང་གི་ཁྲིམས་རྩོད་པ་བོད་མིའི་ཁྲིམས་ལུགས་རིག་པ་བའི་ཁྲིམས་རྩོད་པ་རིན་ཆེན་དབང་རྒྱལ་ལགས་དང་བསྟན་འཛིན་ཡར་རྒྱས་ལགས། དེ་བཞིན་གྱོད་ཡ་རྩོད་ལེན་པ་དབུས་འོས་བསྡུ་ལས་ཁང་གི་སྤྱི་ཁྱབ་འགན་འཛིན་བློ་བཟང་ཡེ་ཤེས་མཆོག་དང་། གཞན་ཡང་ཟུར་ཉན་པ་དང་གསར་འགོད་པ་བཅས་ཕེབས་འདུག སྐབས་དེར་ཆེས་མཐོའི་ཁྲིམས་ཞིབ་པ་རྣམ་པས་བཙན་བྱོལ་བོད་མིའི་བཅའ་ཁྲིམས་ཀྱི་སྤྱི་དམངས་གཏུག་བཤེར་ཁྲིམས་སྒྲིག་གི་དགོངས་དོན་ལྟར་གྱོད་ཡ་ཞུ་སྦྱོར་བ་དང་གྱོད་ཡ་རྩོད་ལེན་པ་གཉིས་ཀྱི་ཞུ་རྩའི་ནང་གང་དང་གང་འཁོད་མེད་དང་། ལྷག་པར་དུ་ཕྱི་ཚེས་ ༥ ཉིན་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་དུ་ཁ་མཆུ་དེ་ཉིད་དང་འབྲེལ་ཉན་ཞིབ་ཐོག་མའི་སྐབས་ཞུ་རྩ་དང་། ཞུ་ལན་བཅས་ལ་འདྲི་ཞིབ་གནང་རྗེས་ཐག་གཅོད་གང་གནང་ཡོད་མེད་བཅས་ལ་གཞིར་བཞག་ནས་གྱོད་ཡ་ཞུ་སྦྱོར་བའི་ཁྲིམས་རྩོད་པར་ཐེངས་རྗེས་མའི་ཁྲིམས་རའི་ཐོག་དབུས་འོས་བསྡུ་ལས་ཁང་གི་ཞུ་སྦྱོར་བ་དང་འབྲེལ་བའི་ཐག་གཅོད་དེ་དག་བཅའ་ཁྲིམས་དང་འོས་བསྡུའི་སྒྲིག་གཞི་དང་འགལ་ཡོད་པ་དང་། ལྷག་པར་དོ་བདག་ཞུ་སྦྱོར་བ་རང་ཉིད་ཁེ་ན་ཌའི་མི་སེར་དང་དཔྱ་ཁྲལ་ལག་དེབ་ཀྱི་ཐོབ་ཁུངས་ཡང་ཁེ་ན་ཌ་ཡིན་བཞིན་དུ། གནས་སྡོད་ཅེས་པའི་ཚིག་གཞི་དེ་དང་འབྲེལ་ནས། ཁྱེད་རང་ཁེ་ན་ཌའི་གནས་སྡོད་མིན་པ་དང་། རྒྱ་བལ་འབྲུག་གསུམ་གྱི་ཆོལ་ཁའི་སྤྱི་འཐུས་ཀྱི་འོས་གཞིར་ཞུགས་རྒྱུའི་ཐོབ་ཐང་ཡོད་པའི་ཁྲིམས་དོན་གྱི་གནད་དོན་དོན་ཚན་གཉིས་ཀྱི་ཐོག་ཁུངས་སྐྱེལ་གནང་དགོས་ཞེས་གསུངས་སོང་། འདི་གའི་གསར་འགོད་པས་ད་རེས་ཀྱི་གནད་དོན་གཏན་འབེབས་ཀྱི་ཉན་ཞིབ་ལས་རིམ་གྲུབ་མཚམས་སུ་གྱོད་ཡ་ཞུ་སྦྱོར་བ་བསྟན་འཛིན་མཁས་གྲུབ་ལགས་ཀྱི་ཁྲིམས་རྩོད་པ་རིན་ཆེན་དབང་རྒྱལ་ལགས་དང་རྩོད་ལེན་པ་དབུས་འོས་བསྡུ་འགན་འཛིན་བློ་བཟང་ཡེ་ཤེས་ལགས་རྣམ་གཉིས་ལ་བཅར་འདྲི་ཁག་གཅིག་ཞུས་ཡོད། གཞི་རྩའི་ཐེངས་འདིའི་གནད་དོན་གཏན་འབེབས་ཀྱི་ཉན་ཞིབ་ལས་རིམ་ཐོག་ཆེས་མཐོའི་ཁྲིམས་ཞིབ་པ་མཆོག་ནས་ཁ་མཆུ་ཉན་ཞིབ་ཐོག་མའི་སྐབས་ཞུ་རྩ་དང་། ཞུ་ལན། གྱོད་ཡ་བརྟག་དཔྱད་ཉན་ཞིབ་བཅས་བྱས་འབྲས་སུ། གྱོད་ཡ་ཞུ་སྦྱོར་བས་ཞུ་ལན་གྱི་ནང་གསལ་ ༡ པོའི་ནང་། བཙན་བྱོལ་བོད་མིའི་བཅའ་ཁྲིམས་དོན་ཚན་ ༣༨ དང་། བཙན་བྱོལ་བོད་མིའི་འོས་བསྡུའི་སྒྲིག་གཞི་དོན་ཚན་ ༣༧ པ། སྤྱི་འཐུས་ཀྱི་འོས་ཆོས་དང་འབྲེལ་བའི་དོན་ཚན་ཁག་ལུང་འདྲེན་གྱིས་ཞུ་སྦྱོར་བ་དོ་བདག་རྒྱ་གར་ནས་སྤྱི་འཐུས་འོས་མིར་ལང་ཆོག་པའི་སྐོར་འགྲེལ་བརྗོད་གནང་ཡོད་པ་དེ་ལྟར་ཡང་། ཐོག་མའི་ཉན་ཞིབ་སྐབས་རྩོད་ལེན་པས། རྒྱ་བལ་འབྲུག་གསུམ་གྱི་ཐོབ་ཁུངས་ནང་འོས་བསྡུའི་ཆ་ཤས་ལེན་རྒྱུ་ཡིན་ན། འོས་བསྡུ་སྒྲིག་གཞི་དོན་ཚན་ ༢༢ ནང་གསལ་ལུང་འདྲེན་གྱིས་ཞུ་སྦྱོར་བ་ངོས་ནས་ཁེ་ན་ཌའི་མི་སེར་ལག་འཁྱེར་བློས་གཏོང་བྱ་དགོས་པ་དེ་ལྟར་བྱུང་མེད་པ་དང་། དོ་བདག་ཞུ་སྦྱོར་བ་ཁེ་ན་ཌའི་མི་སེར་ཡིན་པ། དཔྱ་ཁྲལ་ལག་དེབ་ཀྱི་ཨང་གྲངས་ཡང་ཁེ་ན་ཌའི་ཁོངས་ནས་ཡིན་པར་སོང་ཐོབ་ཁུངས་བྱང་ཨ་རི་དང་ལྷོ་ཨ་རི་ཁུལ་གནས་སྡོད་བོད་མིའི་ཁོངས་ཡིན་པའི་གསལ་བཤད་གནང་ཡོད་པས།  ཁྲིམས་ཞིབ་ཁང་ནས་གྱོད་ཡ་ཞུ་སྦྱོར་བའི་ཁྲིམས་རྩོད་པར་ ༡། དབུས་འོས་བསྡུ་ལས་ཁང་གི་ཞུ་སྦྱོར་བ་དང་འབྲེལ་བའི་ཐག་གཅོད་དེ་དག་བཅའ་ཁྲིམས་དང་འོས་བསྡུའི་སྒྲིག་གཞི་དང་འགལ་ཡོད་པ་ཁུངས་སྐྱེལ་ཐོག  ༢། དོ་བདག་ཞུ་སྦྱོར་བ་རང་ཉིད་ཁེ་ན་ཌའི་མི་སེར་དང་དཔྱ་ཁྲལ་ལག་དེབ་ཀྱི་ཐོབ་ཁུངས་ཡང་ཁེ་ན་ཌ་ཡིན་བཞིན་དུ། གནས་སྡོད་ཅེས་པའི་ཚིག་གཞི་དེ་དང་འབྲེལ་ནས། ཁྱེད་རང་ཁེ་ན་ཌའི་གནས་སྡོད་མིན་པ་དང་། རྒྱ་བལ་འབྲུག་གསུམ་གྱི་ཆོལ་ཁའི་སྤྱི་འཐུས་ཀྱི་འོས་གཞིར་ཞུགས་རྒྱུའི་ཐོབ་ཐང་ཡོད་པ་ཁུངས་སྐྱེལ་གནང་དགོས་ཞེས་གསུངས་སོང་། The post ཁ་མཆུ་ཨང་ ༢༣ པའི་གྱོད་དོན་གཏན་འབེབས་ཀྱི་ཉན་ཞིབ་འཚོགས་པ། appeared first on vot.

ཉེ་ལམ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་གཞོན་ནུ་ཚོར་མྱོ་རྫས་ངན་གོམས་དང་འབྲེལ་བའི་ཡིག་ཐོག་གསུང་འཕྲིན་ཞིག་སྩལ་ཡོད་པ་དང་།  དེ་འབྲེལ་ལ་དྭགས་གཞོན་སྐྱེས་ཁག་གཅིག་གིས་༸གང་ཉིད་མཆོག་གི་བཀའ་སློབ་ལམ་སྟོན་དེ་དག་ཡིག་ཐོག་ཁོ་ནར་ལུས་སུ་མ་བཅུག་པར་ངེས་པར་དུ་རང་སོ་སོའི་མི་ཚེའི་ཁྲོད་ལག་བསྟར་དགོས་པའི་གཞེན་སྐུལ་གནང་འདུག  དེ་ཡང་༸གོང་ས་མཆོག་ལ་ལ་དྭགས་ཞི་བའི་ཚལ་ཕོ་བྲང་དུ་མང་མཇལ་སྐབས།  ལ་དྭགས་གཞོན་ནུ་ཁག་གཅིག་གིས་སེམས་ངལ་སོགས་ཀྱི་བདེ་སྡུག་འདྲ་མིན་སྐོར་བཀའ་འདྲི་ཞུས་ཡོད་པ་དང་།  དེ་དག་ཁོངས་ནས་གཅིག་གིས་ཡུལ་དེའི་ནང་གི་གཞོན་སྐྱེས་ཁྲོད་མྱོ་རྫས་རྐྱེན་པས་དཀའ་ངལ་འཕྲད་མཁན་ཇེ་མང་དུ་འགྲོ་བཞིན་པའི་སྐོར་བཀའ་འདྲི་ཞུས་ཡོད་པར།  དེ་འབྲེལ་༸གོང་ས་༸སྐྱབས་མགོན་ཆེན་པོ་མཆོག་གིས་དྲྭ་རྒྱའི་སྟེང་ཡིག་ཐོག་གསུང་འཕྲིན་ཞིག་སྩལ་ཡོད་པའི་ནང་།  མྱོ་རྫས་ལོངས་སུ་སྤྱོད་པའི་གནོད་སྐྱོན་གྱི་རང་བཞིན་དང་དེ་ནི་གོམས་གཤིས་ངན་པ་ཞིག་ཡིན་པ་ཤེས་རྟོགས་དགོས་རྒྱུ་གལ་ཆེན་པོ་ཡིན་པ་མ་ཟད།  ནམ་ཞིག་མྱོ་རྫས་བེད་སྤྱོད་བྱེད་པའི་མཇུག་འབྲས་སྐོར་བསམ་གཞིག་བྱེད་ན།  དེས་སྡུག་བསྔལ་ཁོ་ན་ལས་ཡོང་གི་མེད་པ་མངོན་གསལ་ཡིན་སྐོར་བཀའ་སྩལ་འདུག་པ་དང་།  མྱོ་རྫས་ངན་གོམས་ལས་བཅོས་ཐབས་དང་དྲག་སྐྱེད་ཀྱི་ལམ་དུ་གནས་རྒྱུ་དེར་དངོས་ནས་ཀྱི་སྙིང་སྟོབས་དང་ཆོད་སེམས་བརྟན་པོ་དགོས་པ་མཁྱེན་གྱི་ཡོད་སྐོར་དང་།  དཀའ་ངལ་དེ་དག་ལས་ཐར་བར་བྱེད་མཁན་གཞོན་སྐྱེས་ཡོངས་ལ་ཡིད་རངས་བསྔགས་བརྗོད་ཡོད་ཅེས།  ལ་དྭགས་གཞོན་ནུ་ཚོའི་ངོས་ནས་མྱོ་རྫས་ལོངས་སུ་སྤྱོད་རྒྱུར་འཛེམ་དགོས་པ་དང་།  ངན་གོམས་དེའི་རྐྱེན་པས་དཀའ་ངལ་འཕྲད་བཞིན་པ་ཡོངས་ལ་མྱུར་དུ་བདེ་ཐང་དང་དོན་སྙིང་ལྡན་པའི་མི་ཚེ་སྐྱིད་པོ་ཞིག་སྐྱེལ་ཐུབ་པའི་སྨོན་ལམ་འདེབས་ཀྱིན་ཡོད་པ་བཀའ་སྩལ་འདུག འདི་ག་རླུང་འཕྲིན་ཁང་གི་བཅར་འདྲིར་དང་ལེན་ཁྲོད་ལ་དྭགས་གཞོན་སྐྱེས་ཁག་གཅིག་གིས་ཉེ་ལམ་༸གོང་ས་མཆོག་གི་མྱོ་རྫས་ངན་གོམས་སོགས་དང་འབྲེལ་བའི་གསུང་འཕྲིན་དེའི་སྐོར་ཁོང་རྣམས་ཀྱིས།  ༸གོང་ས་༸སྐྱབས་མགོན་ཆེན་པོ་མཆོག་ལ་ཐུགས་འགན་གྲངས་ལས་འདས་པ་ཡོད་ཀྱང་།  ༸གང་ཉིད་མཆོག་གིས་ཐུགས་བརྩེ་བ་ཆེན་པོས་ལ་དྭགས་གཞོན་སྐྱེས་ཚོའི་བདེ་སྡུག་ཆ་ཚང་གསན་བཞེས་ཀྱིས་དུས་མཐུན་འོས་ཤིང་འཚམས་པའི་ཐབས་ལམ་སྟོན་གནང་མཛད་པ་དེར་ཐུགས་རྗེ་ཆེ་ཞུས་ཀྱི་བཀའ་དྲིན་རྗེས་དྲན་ཞུས་པ་མ་ཟད།  གསུང་འཕྲིན་ནང་དམིགས་བསལ་གྱིས་༸གོང་ས་མཚོག་ནས་རང་གཅེས་འཛིན་གྱི་བློ་དོར་ཏེ་གཞན་གཅེས་འཛིན་གྱི་བློ་ཇི་ལྟར་གོང་འཕེལ་གཏོང་དགོས་པ་སོགས་སེམས་ལ་སྦྱོང་བརྡར་སྤྲད་དགོས་གལ་སྐོར་གྱི་བཀའ་སློབ་ལམ་སྟོན་ཕེབས་ཡོད་པ་དེ་དུས་ལ་བབས་པ་ཞིག་རེད་འདུག་ཅེས་གསུངས་འདུག  མ་ཟད་བདེ་བ་ངོ་མ་དེ་སེམས་ཀྱི་ཞི་བདེ་དང་གཞན་ཕན་གྱི་བསམ་བློ་ནས་ཡོང་གི་ཡོད་སྐོར་བཀའ་སློབ་ལམ་སྟོན་སྩལ་བ་དེ་ལ་དྭགས་མི་མང་ལ་ཧ་ཅང་གི་གལ་ཆེན་པོ་ཆགས་ཀྱི་ཡོད་པ།  ལྷག་པར་དུ་༸གོང་ས་མཆོག་གིས་བཀའ་སློབ་ལམ་སྟོན་ལྟར་སྡུག་བསྔལ་ཅི་འདྲ་ཞིག་ཡིན་རུང་མཐར་ཐུག་ན་ནང་སེམས་ལ་རག་ལས་ཀྱི་ཡོད་པ་དང་།  ལ་དྭགས་གཞོན་སྐྱེས་ཚོའི་ངོས་ནས་ཀྱང་གཞི་རྩའི་ལྟ་གྲུབ་ཤེས་ཀྱི་ཡོད་ཀྱང་གཙོ་བོ་ལག་ལེན་ལ་ཐུག་ཡོད་པ་དང་།  སྤྱིར་དེང་དུས་སྤྱི་ཚོགས་དྲྭ་རྒྱ་སོགས་ཀྱི་རྣམ་གཡེང་གི་གནས་སྟངས་འོག་བཀའ་སློབ་དེ་དག་ལག་བསྟར་གནང་རྒྱུ་ཁག་པོ་ཏན་ཏན་ཡོད་རེད་དེ།  གོམ་པ་རེ་རེ་བྱས་ཏེ་སྤོ་ནས་རིམ་པས་གང་ཟག་བྱམས་བརྩེ་ལྡན་པ་དྲང་པོ་ཞིག་ཏུ་འགྱུར་རྒྱུར་འབད་བརྩོན་བྱས་ན།  དེ་ནི་༸གང་ཉིད་མཆོག་ལ་ལེགས་སྐྱེས་ཡག་ཤོས་ཤིག་རེད་ལ།   མ་འོངས་ལ་དྭགས་དེ་བཞིན་བདེ་སྐྱིད་བདེ་ཐང་ལྡན་པ་ཞིག་ཏུ་འགྱུར་རྒྱུར་རེ་བ་འཆང་གི་ཡོད་པ་གསུངས་འདུག  དེ་བཞིན་ཉེ་ལམ་༸གོང་ས་མཆོག་གིས་གསུང་འཕྲིན་ནང་དམིགས་བསལ་གྱིས་ལ་དྭགས་གཞོན་ནུ་ཚོས་མྱོ་རྫས་ལོངས་སུ་སྤྱོད་རྒྱུ་འཛེམ་དགོས་པའི་སྐོར་བཀའ་མངགས་སྩལ་བའི་སྐོར་དང་འབྲེལ།  མྱོ་རྫས་བེད་སྤྱོད་བྱས་ན།  རང་སོ་སོའི་འཕྲོད་བསྟེན་ལ་གནོད་པ་ཙམ་མིན་པར།  ནང་མི་སྤུན་མཆེད་ཡོངས་རྫོགས་གཏོར་བཤིག་གཏོང་གི་ཡོད་པ་དང་།  ༸གོང་ས་༸སྐྱབས་མགོན་ཆེན་པོ་མཆོག་གིས་དེ་འབྲེལ་གསུང་འཕྲིན་སྩལ་བ་དེ་ནི་བཀའ་སློབ་ལམ་སྟོན་ཙམ་མིན་པར།  དེ་དག་ང་ཚོས་ཇི་ལྟར་ལག་བསྟར་དགོས་པའི་སྐུལ་མ་ཞིག་ཀྱང་ཡིན་ལ།  ༸གང་ཉིད་མཆོག་གིས་བཀའ་སྩལ་ལྟར།  མྱོ་རྫས་ལོངས་སུ་སྤྱོད་མཁན་ཚོར་མཐོང་ཆུང་གི་ལྟ་སྟངས་ཤིག་འཁྱེར་རྒྱུ་མེད་པ་དང་།  ཁོང་རྣམས་ལ་བྱམས་དང་བརྩེ་བས་སྒོ་ནས་དེ་ལས་ཐར་བར་བྱེད་པར་རོགས་རམ་བྱེད་དགོས་པ་མ་ཟད།  གང་ཟག་སུ་འདྲ་ཞིག་ཡིན་རུང་ཚང་མ་ལ་ཡར་རྒྱས་གཏོང་རྒྱུའི་ཐོབ་ཐང་ཡོད་པ་སོགས་ཀྱི་དྲན་སྐུལ་གྱིས།  ང་ཚོ་ཚང་མས་རང་སོ་སོའི་སེམས་དྭངས་མ་དེའེི་ཐོག་ནས་སྔར་ལས་ལྷག་པའི་མི་བཟང་པོ་ཞིག་ཏུ་འགྱུར་ཐུབ་པར་འབད་བརྩོན་གནང་དགོས་པ་གསུངས་འདུག  སྤྱིར་ཐེངས་འདའི་བཅར་འདྲི་ཁྲོད་ལ་དྭགས་གཞོན་ནུ་གཅིག་གིས་ཉེ་ལམ་༸གོང་ས་མཆོག་གི་གསུང་འཕྲིན་དེ་ཉིད་ལ་དྭགས་གཞོན་ནུ་ཁོ་ནར་དམིགས་པ་ཞིག་མ་ཡིན་པར་དེ་ནི་འཛམ་གླིང་ཀུན་ལ་ཁྱབ་པ་ཞིག་ཡིན་སྐོར་གསུངས་ཡོད་སྟབས།  འདི་ག་རླུང་འཕྲིན་ཁང་ལ་ཁུལ་དེར་གནས་སྡོད་བོད་མི་གཅིག་གིས།  ཐེངས་འདིའི་༸གོང་ས་མཆོག་གི་གསུང་འཕྲིན་དེའི་ནང་གཙོ་བོ་ལ་དྭགས་གཞོན་ནུ་ཁྲོད་སེམས་ངལ་དང་མྱོ་རྫས་ལངས་ཤོར་སྐོར་བཀའ་སློབ་ལམ་སྟོན་སྩལ་ཡོད་པར།  ༸གང་ཉིད་མཆོག་གིས་བཀའ་མངགས་ལྟར་དེ་དག་གི་རྒྱུ་རྐྱེན་ཕལ་ཆེ་བ་བཟང་སྤྱོད་དང་གཞན་ཕན་གྱི་སེམས་མ་འདང་བའི་རྒྱུ་མཚན་གྱིས་ཡོང་གི་ཡོད་དུས།  ང་ཚོའི་མི་རབས་རྒན་པ་ཚོའི་ངོས་ནས་ཐུགས་འགན་བཞེས་ཏེ་གཞོན་སྐྱེས་ཁྲོད་རིན་ཐང་དེ་དག་གོང་འཕེལ་ཐད་ཤུགས་སྣོན་རྒྱག་དགོས་གལ་ཡིན་པ་གསུང་གི་འདུག  གཞི་རྩའི་༸གོང་ས་མཆོག་གིས་ཉེ་ལམ་ནས་ལ་དྭགས་གཞོན་སྐྱེས་ཚོར་མང་མཇལ་སྩལ་གནང་མཛད་ཀྱི་ཡོད་པ་ལྟར།  ཁ་ཉིན་ཕྱི་ཚེས་ ༢༥ ཉིན་མཇལ་བཅར་ཞུས་མཁན་ཁོངས་སུ་ལ་དྭགས་ནང་གི་གཞོན་སྐྱེས་གཞས་པ་གྲགས་ཅན་གྲས་དང་མྱོ་རྫས་ངན་གོམས་སྤངས་ཟིན་པའི་གཞོན་ནུ་ཁག་གཅིག་གིས་༸གང་ཉིད་མཆོག་ལ་མྱོ་རྫས་ལོངས་སུ་སྤྱོད་རྒྱུ་མཚམས་འཇོག་བྱེད་ཡིན་སྐོར་སྙན་སེང་ཞུས་པར་༸གོང་ས་མཆོག་གིས་ཀྱང་ཐུགས་རྗེ་ཆེ་ཞེས་བཀའ་སྩལ་ཡོད་པ་དང་།  གཞོན་ནུ་དེ་དག་ཁོངས་ནས་གཅིག་གིས་འདི་ག་རླུང་འཕྲིན་ཁང་གིས་བཅར་འདྲིར་དང་ལེན་ཁྲོད།  ཁོང་མྱོ་རྫས་ལ་ཧ་ཅང་ལངས་ཤོར་ཕྱིན་ཏེ་སྤང་ཐུབ་ཡག་མེད་མཁན་གྱི་གང་ཟག་ཅིག་ཏུ་གྱུར་ཡོད་ནའང་།  རིམ་པས་ནང་མིའི་སེམས་འཚབ་དང་སོ་སོའི་འཕྲོད་བསྟེན་ལ་གཞིགས་ཏེ།  ད་ཡིན་ན་སྤང་དགོས་འདུག་བསམ་བྱུང་ཅེས།  དུས་དེ་ནས་བཟུང་ནང་མིར་དམ་བཅའ་བཞག་སྟེ་དགོན་པར་མཆོད་མཇལ་གྱིས་རིམ་པས་དུག་རྫས་ལོངས་སུ་སྤྱོད་རྒྱུ་མཚམས་འཇོག་བྱས་ཡིན་ཅེས་དང་།   ཁག་གཅིག་གིས་མྱོ་རྫས་ངན་གོམས་ཤོར་ཚར་ན་དུས་ནམ་ཡང་སྤང་ཐུབ་ཀྱི་མ་རེད་ཅེས་བཤད་མཁན་ཡོད་ཀྱང་།  དེ་ནི་ནོར་འཁྲུལ་ཆེན་པོ་ཞིག་ཡིན་པ་དང་།  འཇིག་རྟེན་འདིའི་ནང་ཅི་ཞིག་བྱ་དགོས་བསམ་ན་བྱེད་ཐུབ་ཡག་མེད་པ་གཅིག་ཀྱང་མི་འདུག་ཅེས།  ད་ལྟ་ཁོང་མྱོ་རྫས་ལོངས་སུ་སྤྱོད་རྒྱུ་མཚམས་འཇོག་བྱས་ཟིན་དུས།  ནང་མི་ལྷན་དུའང་སྙིང་ཉེ་བོར་གྱུར་ཡོད་པ་དང་།  སྤྱི་ཚོགས་ཁྲོད་མང་ཚོགས་ཀྱིས་ཀྱང་རྒྱབ་བཤད་མེད་པར་ལྟ་སྟངས་ཡག་ཏུ་ཕྱིན་པ་གཙོས་པའི་བསྟོད་ར་གཏོང་གི་ཡོད་དུས་སེམས་པའང་སྐྱིད་པོ་འདུག་ཅེས་གསུང་གི་འདུག་ལ།  […] The post ལ་དྭགས་གཞོན་སྐྱེས་ཚོས་༸གོང་ས་མཆོག་གི་མྱོ་རྫས་ངན་གོམས་དང་འབྲེལ་བའི་གསུང་འཕྲིན་ལག་བསྟར་དགོས་པའི་གཞེན་སྐུལ་གནང་འདུག appeared first on vot.

རིང་མིན་བལ་ཡུལ་དུ་འཚོག་གཏན་ཁེལ་བའི་རྒྱལ་སྤྱིའི་བོད་རིག་པའི་ཞིབ་འཇུག་ཚོགས་པའི་ཚོགས་འདུ་ཐེངས་བཅུ་བདུན་པའི་ཐོག་རྒྱ་ནག་གི་གནོན་ཤུགས་འོག་བོད་མིའི་སྒྲིག་འཛུགས་ཀྱི་སྐུ་ཚབ་ཉམས་ཞིབ་པ་བཅར་རྒྱུ་ཕྱིན་འཐེན་བྱས་པའི་གནས་ཚུལ་ཐོན་ཡོད་ནའང་། བོད་མིའི་སྒྲིག་འཛུགས་ཀྱི་ཉམས་ཞིབ་པ་རྣམ་པ་སྔར་སྲོལ་བཞིན་ཞིབ་འཇུག་ཚོགས་འདུར་བཅར་གཏན་ཁེལ་ཡོད་པའི་སྐོར་བོད་ཀྱི་སྲིད་བྱུས་ཉམས་ཞིབ་ཁང་གི་འབྲེལ་ཡོད་ཉམས་ཞིབ་པ་ཞིག་གིས་གསལ་བཤད་གནང་སོང་། དེ་ཡང་འདི་ལོའི་ཟླ་བ་བརྒྱད་པའི་ནང་བལ་ཡུལ་གྱི་རྒྱལ་ས་ཀ་ཐ་མན་གྲུར་རྒྱལ་སྤྱིའི་བོད་རིག་པའི་ཞིབ་འཇུག་ཚོགས་པའི་ཚོགས་འདུ་ཐེངས་བཅུ་བདུན་པ་འཚོག་གཏན་ཁེལ་བར། བལ་ཡུལ་གནས་འཁོད་རྒྱ་ནག་གི་གཞུང་ཚབ་ཀྱིས་ཞིབ་འཇུག་ཚོགས་འདུའི་ཐོག་རྒྱ་ནག་ལ་སྐྱོན་བརྗོད་དང་། བོད་དོན་ཆབ་སྲིད་གླེང་སྲིད་པའི་བློ་འཚབ་བསྟན་ནས། བལ་ཡུལ་གཞུང་ནས་ཚོགས་འདུའི་བརྗོད་བྱར་བྱ་ར་སྟངས་འཛིན་དགོས་པའི་འབོད་སྐུལ་བྱས་པའི་རྗེས། བལ་ཡུལ་དང་རྒྱ་གར་གྱི་གསར་ཁང་ཁག་ཅིག་གི་ཐོག་རྒྱལ་སྤྱིའི་བོད་རིག་པའི་ཚོགས་འདུའི་ཐོག་བོད་མིའི་སྒྲིག་འཛུགས་ཀྱིས་ཉམས་ཞིབ་པ་གཞུང་འབྲེལ་ངོ་བོའི་ཐོག་ནས་གཏང་རྒྱུ་མིན་པའི་ཐག་གཅོད་བྱས་ཡོད་ལུགས་ཀྱི་གནས་ཚུལ་ཐོན་ཡོད། འོན་ཀྱང་། བོད་ཀྱི་སྲིད་བྱུས་ཉམས་ཞིབ་ཁང་གིས་དེ་ལྟ་བུའི་ཐག་གཅོད་ཅིག་བྱས་མེད་པ་དང་། གཞུང་འབྲེལ་ཉམས་ཞིབ་པ་རྣམས་སྔར་སྲོལ་བཞིན་དུ་ཚོགས་འདུར་བཅར་གཏན་ཁེལ་ཡོད་པ་བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་ཞིག་གིས་འདི་ག་གསར་ཁང་ལ་འགྲེལ་བརྗོད་གནང་བྱུང་། བལ་ཡུལ་གྱི་གསར་ཁང་ Nepalkhabar གྱིས་གནས་ཚུལ་སྤེལ་བ་ལྟར་ན། བལ་ཡུལ་ཐོག་རྒྱ་ནག་གི་གནོན་ཤུགས་དང་། ཚོགས་འདུར་བར་ཆད་མི་ཡོང་བའི་ཆེད་དུ་བལ་ཡུལ་དུ་འཚོག་འཆར་ཡོད་པའི་རྒྱལ་སྤྱིའི་བོད་རིག་པའི་ཚོགས་འདུའི་ཐོག་བོད་མིའི་སྒྲིག་འཛུགས་ཀྱིས་ཉམས་ཞིབ་པ་གཞུང་འབྲེལ་ངོ་བོའི་ཐོག་ནས་གཏང་རྒྱུ་མིན་པའི་ཐག་གཅོད་བྱས་ཡོད་པ་དང་། དེ་སྔོན་དེབ་སྐྱེལ་བྱས་ཟིན་པའི་ཉམས་ཞིབ་པ་རྣམས་སྒེར་གྱི་ངོ་བོའི་ཐོག་ནས་ཚོགས་འདུར་བཅར་འཐུས་ཚུལ་སྐོར་གནས་ཚུལ་སྤེལ་འདུག བོད་མིའི་སྒྲིག་འཛུགས་ནས་བོད་རིག་པའི་ཚོགས་འདུའི་ནང་གཞུང་འབྲེལ་ཉམས་ཞིབ་པ་གཏང་རྒྱུ་མ་ཟད། བོད་མིའི་སྒྲིག་འཛུགས་བོད་ཀྱི་སྲིད་བྱུས་ཉམས་ཞིབ་ཁང་ནས་ཚོགས་འདུར་བོད་རིགས་ཉམས་ཞིབ་པ་གཞན་གང་མང་བཅར་ཐུབ་ཐབས་སུ་དམིགས་ཏེ། བོད་རིགས་ཚོགས་བཅར་བ་མི་གྲངས་ ༢༥ ལ་ལམ་གྲོན་དང་ཁང་གླའི་ཆེད་ཧིན་སྒོར་ ༥༠,༠༠༠ རེ་གནང་རྒྱུུའི་གསལ་བསྒྲགས་དེ་སྔོན་ནས་སྤེལ་ཟིན་ཡོད།   རྒྱ་ནག་གཞུང་ནས་བལ་ཡུལ་དུ་ཚོགས་གཏན་ཁེལ་བའི་བོད་རིག་པའི་ཚོགས་འདུའི་ཐོག་རྒྱ་ནག་གཞུང་གི་བཤད་ཚུལ་དང་མི་མཐུན་པའི་ལོ་རྒྱུས་དང་། སྤྱི་ཚོགས་ཆབ་སྲིད་ཀྱི་གནད་དོན་གླེང་སློང་བྱ་རྒྱུར་བཀག་སྡོམ་བྱ་རྒྱུའི་ཆེད། ཚོགས་འདུ་དེར་བློ་འཚབ་ཡོད་སྐོར་གྱི་ཉེན་བརྡ་སྔོན་ཚུད་ནས་བཏང་བ་ཞིག་ཡིན་པ་དང་། ལྷག་པར་དུ་༸གོང་ས་སྐུ་ཕྲེང་བཅུ་བཞི་པའི་ཡང་སྲིད་གནད་དོན་དེ་རྒྱལ་སྤྱིའི་སྟེང་གླེང་གཞི་གལ་གནད་ཆེན་པོ་ཞིག་ཏུ་གྱུར་ཡོད་སྟབས། རྒྱ་ནག་གཞུང་གིས་བལ་ཡུལ་གྱི་ཚོགས་འདུའི་ནང་དུའང་སྐུའི་ཡང་སྲིད་དང་འབྲེལ་བའི་གནད་དོན་གླེང་སྲིད་པའི་འཇིགས་སྣང་བྱེད་ཀྱི་ཡོད་པ་གནད་དོན་དབྱེ་ཞིབ་པས་འགྲེལ་བརྗོད་གནང་གི་འདུག རྒྱ་གཞུང་གིས་རྒྱལ་སྤྱིའི་ཐོག་བོད་རིག་པའི་ཞིབ་འཇུག་ཚོགས་འདུའི་གལ་གནད་ཆེ་མཐོང་དང་། ཚོགས་བཅར་བའི་གྲངས་འབོར་མང་དུ་འགྲོ་བཞིན་པར་མཐོང་ནས། དེ་ལ་གདོང་ལེན་བྱ་རྒྱུར་ཕྱི་ལོ་ ༡༩༨༦ ཟླ་བ་ ༥ ཚེས་ ༢༠ ཉིན་ཀྲུང་གོ་བོད་རིག་པ་ཞིབ་འཇུག་ལྟེ་གནས་ཞེས་པ་ཞིག་པེ་ཅིང་དུ་གསར་འཛུགས་བྱས་ཏེ། ད་བར་རྒྱལ་སྤྱི་རྒྱལ་ནང་དུ་རྒྱ་ནག་གཞུང་གི་བཤད་ཚུལ་དང་མཐུན་པའི་བོད་ཀྱི་ལོ་རྒྱུས་རིག་གནས་ཁྱབ་སྤེལ་དྲིལ་བསྒྲགས་བྱ་རྒྱུར། ཚོགས་འདུ་ཆེ་ཆུང་རིམ་པ་མི་འདྲ་བ་མང་དག་བསྐོང་ཚོགས་བྱས་ཡོད། ཉེ་སྔོན་ཕྱི་ལོ་ ༢༠༢༣ ཟླ་བ་ ༨ ནང་པེ་ཅིན་རྒྱལ་སྤྱིའི་བོད་རིག་པའི་དཔྱད་གླེང་གྲོས་ཚོགས་སྐབས་བདུན་པ་ཞེས་པ་བསྐོང་ཚོགས་བྱས་ཡོད་པ་དང་། སྐབས་དེར་ཚོགས་བཅར་བ་རྣམས་ཀྱིས་དབྱིན་སྐད་ཐོག་བོད་ཀྱི་སྐད་དོད་དུ། Tibet  མ་ཡིན་པར་ Xizang ཞེས་འབོད་འགོ་བཙུགས་དགོས་པའི་གྲོས་འགོ་བཏོན་ཡོད་པ་དང་། གྲོས་འགོ་དེ་གཞིར་བཟུང་ཕྱིས་སུ་རྒྱ་ནག་གཞུང་གིས་གཞུང་འབྲེལ་ཡིག་ཆ་ཁག་དང་གསར་ཁང་སོགས་སུ་ཨིན་སྐད་ཐོག་བོད་ཀྱི་སྐད་དོད་དུ་ Xizang ཞེས་འབྲི་འགོ་བཙུགས་པ་དང་སྦྲགས། མིང་བརྡ་དེ་ཉིད་བོད་རང་ལྗོངས་ཟེར་བ་ཁོ་ན་ལས་མདོ་སྟོད་སྨད་གཉིས་ལ་འཇུག་གི་མེད་ལུགས་ཀྱི་མིང་བརྡའི་ཆབ་སྲིད་བརྩེ་འགོ་བཙུགས། རྒྱ་ནག་གཞུང་གིས་ཁ་གཏད་དུ་ངོས་འཛིན་བྱེད་པའི་རྒྱལ་སྤྱིའི་བོད་རིག་པའི་ཞིབ་འཇུག་ཚོགས་འདུ་ཐེངས་བཅུ་བདུན་པ་རྒྱ་ནག་གི་ཉེ་འགྲམ་བལ་ཡུལ་ནང་འཚོག་གཏན་འཁེལ་བར། […] The post རྒྱ་ནག་གི་གནོན་ཤུགས་ལ་མ་ལྟོས་པར་བོད་མིའི་སྒྲིག་འཛུགས་ཀྱི་ཉམས་ཞིབ་པ་བོད་རིག་པའི་ཚོགས་འདུར་མཉམ་ཞུགས་བྱ་རྒྱུ་རེད་འདུག appeared first on vot.

བོད་ཀྱི་གནད་དོན་དང་དཔའ་བོ་བློ་དགའ་རང་བཙན་ལགས་ཀྱིས་བློས་བཏང་ལ་མྱ་ངན་གུས་འདུད་ཆེད་རྒྱ་གར་དང་། ཡུ་རོབ། ཨ་རི་སོགས་རྒྱལ་ཁབ་ཕྱི་ནང་གཉིས་ཀའི་ནང་རྐང་འཁོར་སྐོར་སྐྱོད་དང་། སྦག་སྦག་སྐོར་སྐྱོད། ཟས་བཅད་ངོ་རྒོལ་སོགས་ཀྱི་ལས་འགུལ་འདྲ་མིན་སྤེལ་བཞིན་པ་རེད་འདུག དེ་ཡང་ཉེ་ལམ་རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱིས་བོད་བསྟན་སྲིད་མི་རིགས་ཆེད་དུ་རང་ལུས་མེར་བསྲེགས་བཏང་བའི་ཡིད་སྐྱོའི་གནས་ཚུལ་བྱུང་བ་ནས་བཟུང་། རྒྱལ་སྤྱིའི་ཁྱོན་ཡོངས་སུ་དམ་པ་ཁོང་གིས་བློས་བཏང་དང་རྒྱ་ནག་གིས་བོད་ནང་སྤེལ་བཞིན་པའི་སྲིད་བྱུས་ལ་ངོས་ལེན་མེད་པའི་ལས་འགུལ་རིམ་པ་སྤེལ་བཞིན་པའི་ཁྲོད། ཁ་སང་མེའོ་ཆོས་འཕེལ་གླིང་གཞིས་ཆགས་སུ་གནས་སྡོད་བོད་མི་བཟའ་ཚང་བསྟན་འཛིན་དབང་འདུས་ལགས་དང་།  ཟླ་བ་ལགས་གཉིས་ཀྱིས་ཁུལ་དེ་ནས་འགོ་འཛུགས་ཀྱིས་རྒྱལ་ས་ལྡི་ལི་བར་དུ། སྦག་སྦག་སྐོར་སྐྱོད་ཀྱི་ལས་འགུལ་དབུ་འཛུགས་གནང་འདུག ཕྱོགས་མཚུངས་ཡོ་རོབ་ཀྱི་རྒྱལ་ཁབ་ Austria ནང་གི་ Linz གྲོང་ཁྱེར་ནང་བོད་མི་ཉི་མ་ཚེ་རིང་ལགས་ཀྱིས། རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱི་ཆེད་དུ་དམ་པ་དེ་ཉིད་དགོངས་པ་རྫོགས་རྗེས་ཀྱི་ཞག་ ༤༩ མ་ཟིན་བར་རྐང་འཁོར་སྐོར་སྐྱོད་ཀྱི་ལས་འགུལ་སྤེལ་བཞིན་པ་དང་འབྲེལ། མང་ཚོགས་ཚང་མས་དམ་པ་ཁོང་གི་ཞལ་ཆེམས་ལག་བསྟར་གནང་དགོས་གལ་ཡིན་པའི་བརྡ་ལན་གནང་འདུག རྩ་བའི་བཞུགས་སྒར་དུ་ཟླ་འདིའི་ཕྱི་ཚེས་ ༡༩ རེས་གཟའ་ཉི་མའི་ཉིན་བོད་ཀྱི་གཞོན་ནུ་ལྷན་ཚོགས་ཀྱིས་རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱི་བློས་བཏང་ལ་ཆེ་བསྟོད་དང་། རྒྱ་ནག་གི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཡིག་ཟེར་བར་ངོ་རྒོལ་དང་འབྲེལ། བློ་དགའ་རང་བཙན་ལགས་དམ་པ་དེ་ཉིད་ཀྱི་མངོན་འདོད་རྒྱུན་མཐུད་སླད་ཟས་བཅད་ངོ་རྒོལ་གྱི་ལས་འགུལ་སྤེལ་མུས་ཡིན་པ་དང་། དེའང་འཛམ་གླིང་ཡོངས་སུ་ཆགས་པའི་གཞོན་ནུའི་ས་གནས་ཁག་དང་། བོད་དོན་རྒྱབ་སྐྱོར་བ་རྣམས་ཀྱི་བརྒྱུད་འཛམ་གླིང་ཡོངས་སུ་སྤེལ་རྒྱུའི་རྒྱུན་མཐུད་ཀྱི་ལས་འགུལ་ཞིག་ཡིན་སྐོར་གསུངས་ཡོད་པ་རེད། དེ་བཞིན་ཁ་སང་ཨ་རིའི་ནིའུ་ཡོག་ནང་དུའང་སྟོད་གོས་ནག་པོ་གྱོན་ནས་ཁུལ་དེའི་རྒྱ་ནག་གཞུང་ཚབ་མདུན་དུ་ངོ་རྒོལ་སྐད་འབོད་ཀྱི་ལས་འགུལ་སྤེལ་འདུག་པ་མ་ཟད། རྒྱལ་གཅེས་པ་དམ་པ་ཁོང་སྐུ་འདས་གྲོངས་སུ་ཕྱིན་ནས་བདུན་ཚིགས་གསུམ་པ་དང་བསྟུན། བོད་མིའི་འདུ་སྡོད་ས་གནས་གང་སར་མཆོད་འབུལ་སྨོན་ལམ་དང་། ཞི་བའི་ངོ་རྒོལ་སོགས་གནང་བཞིན་ཡོད་པ་རེད།  མ་ཟད་བོད་ཀྱི་གནད་དོན་དང་འབྲེལ་རྒྱ་གར་གྱི་ Youtube བརྙན་ཐུང་བཟོས་མཁན་ SANJEET WITH TTI STUDY ཞུ་བ་ཞིག་གིས། ཟླ་བ་འདིའི་ཕྱི་ཚེས་ ༢༦ ཉིན་གྱི་ཕྱི་དྲོ་ཕྱག་ཚོད་ ༧ པ་ནས་འགོ་འཛུགས་ཀྱིས་ X སྤྱི་ཚོགས་དྲྭ་ལམ་སྟེང་ #StandWithTibet དང་ #FreeTibet ཞེས་ (Hashtag) ཚིག་བེད་སྤྱོད་ཀྱིས་བོད་དོན་དྲིལ་བསྒྲགས་ཀྱི་གཞི་རྒྱ་ཆེ་བའི་ལས་འགུལ་ཞིག་སྤེལ་འཆར་ཡོད་པ་དེར་མང་ཚོགས་ནས་མཉམ་ཞུགས་དགོས་པའི་སྐུལ་མ་གནང་འདུག The post བོད་དོན་དང་དཔའ་བོ་བློ་དགའ་རང་བཙན་ལགས་ཀྱི་བློས་བཏང་ལ་མྱ་ངན་གུས་འདུད་སླད་རྒྱ་གར་དང་ཕྱི་རྒྱལ་གཉིས་ཀའི་ནང་ལས་འགུལ་འདྲ་མིན་སྤེལ་བཞིན་པ། appeared first on vot.

༸སྐྱབས་རྗེ་རྫོང་གསར་འཇམ་དབྱངས་མཁྱེན་བརྩེ་རིན་པོ་ཆེ་མཆོག་གིས་དབུ་འཛུགས་གནང་བའི་ 84000: Translating the Words of the Buddha ཞེས་སངས་རྒྱས་ཀྱི་ཆོས་ཕུང་ ༨༤༠༠༠ ཡིག་སྒྱུར་གྱི་ལས་གཞི་ཁྲོད་ཉེ་ཆར་བཀའ་འགྱུར་ནང་གི་མདོ་རིང་ཤོས་ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་ཕྲག་བརྒྱ་པ་ The Perfection of Wisdom in One Hundred Thousand Lines དེ་ཉིད་དབྱིན་སྒྱུར་གནང་ཟིན་འདུག དེ་ཡང་ལས་གཞི་དེའི་དྲྭ་གནས་ཐོག་སྤེལ་བའི་གནས་ཚུལ་ནང་གསལ་ལྟར་ན།  ཉེ་ལམ་བོད་ཟླ་དྲུག་པའི་ཚེས་བཞི་སྟེ་ཆོས་འཁོར་དུས་ཆེན་གྱི་དུས་ཚིགས་ཁྱད་པར་ཅན་དང་བསྟུན་ནས།  པོད་བཅུ་གཉིས་དང་ཤོག་གྲངས་དགུ་སྟོང་བཞི་བརྒྱ་ཉི་ཤུ་ཅན་གྱི་གཞུང་༼ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་ཕྲག་བརྒྱ་པ་༽དེ་བཞིན་ལོ་ངོ་བཅུ་གཉིས་རིང་ལོ་ཙཱ་བ་མི་གྲངས་བཅུ་གསུམ་གྱིས་དབྱིན་སྒྱུར་གནང་ཡོད་པ་སྟེ་ད་ལྟའི་ཆར་ལེགས་གྲུབ་ཀྱིས་ལས་གཞིའི་དེའི་དྲྭ་ཚིགས་ནས་མང་ཚོགས་ཀྱིས་རིན་མེད་ཐོག་ལྟ་ཀློག་ཐུབ་པ་བཟོས་གནང་ཡོད་པ་རེད་འདུག མ་ཟད།  བོད་བརྒྱུད་ནང་བསྟན་གྱི་བཀའ་འགྱུར་ནང་ནས་མདོ་རིང་ཤོས་འདི་པར་བསྐྲུན་གནང་ཐུབ་པར་དྲན་གསོའི་ཆེད་དུ།  ལས་གཞི་དེའི་ཚོགས་མི་རྣམས་ནས་རིན་པོ་ཆེ་དང་། བླ་མ།  ལོ་ཙཱ་བ།  ཉམས་ལེན་པ་བཅས་ལ་གྲུབ་འབྲས་དམིགས་བསལ་ཅན་དེའི་ཐད་ཁོང་རྣམ་པའི་དགོངས་ཚུལ་ཇི་ཡོད་སྐོར་བཀའ་འདྲི་ཞུས་པའི་བརྙན་ཐུང་ཞིག་འདོན་སྤེལ་གནང་འདུག་པ་དེའི་ནང་།   ཡོངས་དགེ་མི་འགྱུར་རིན་པོ་ཆེ་མཆོག་དང་།  ས་སྐྱ་ཁྲི་འཛིན་ཞེ་གསུམ་པ་ཛྙཱན་བཛྲ་རིན་པོ་ཆེ་མཆོག  ཆོས་ཀྱི་ཉི་མ་རིན་པོ་ཆེ་མཆོག  དེ་བཞིན་བོད་བརྒྱུད་ནང་བསྟན་དང་ཕྱི་རྒྱལ་གྱི་བླ་སྤྲུལ་ལོ་ཙཱ་བ་དང་མཁས་པ་སོགས་ཀྱིས་གཞུང་ཆེན་འདི་བཞིན་དབྱིན་སྒྱུར་དུ་ལེགས་གྲུབ་བྱུང་བ་ལ་དགའ་བསུ་དང་འབྲེལ།  དེར་འགྲེལ་བརྗོད་ཁྲོད། རང་དབང་དང་།  བདེན་པ།  ཧ་ལས་པ།  དུས་ལས་འདས་པ། ཤེས་རབ།  དྲན་རྟེན་སོགས་ཀྱི་ཚིག་བེད་སྤྱོད་གནང་མཁན་བྱུང་འདུག   མ་ཟད་ཁག་གཅིག་གིས་དེའི་གལ་གནད་མང་ཚོགས་ཀུན་ལ་ཁྱབ་ཐུབ་པ་བྱ་དགོས་པ་དང་།  དེ་ཉིད་མཆོད་པ་སོགས་ཀྱི་སྟེང་བཤམ་པ་ཙམ་མིན་པར་དེའི་ཐོག་ཐོས་བསམ་སྒོམ་གསུམ་གནང་དགོས་གལ་ཡིན་པ་གསུངས་འདུག་ལ།   ལྷག་པར་དུ་ཆོས་ཕུང་ ༨༤༠༠༠  ཡིག་སྒྱུར་གྱི་ལས་གཞི་དབུ་འཛུགས་གནང་མཁན་༸སྐྱབས་རྗེ་རྫོང་གསར་འཇམ་དབྱངས་མཁྱེན་བརྩེ་རིན་པོ་ཆེ་མཆོག་གིས་ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་ཕྲག་བརྒྱ་པའི་གཞུང་ཆེན་འདི་ནི་ཐེག་པ་ཆེན་པོའི་རྗེས་འབྲངས་པ་ཚོར་སངས་རྒྱས་ཆོས་ཀྱི་ཁོག་པའི་སྙིང་དང་། གློ་བ། ཁྲག་ལྟ་བུ་ཤིན་ཏུ་ནས་གལ་ཆེན་པོ་ཆགས་ཡོད་པ་གསུངས་འདུག དེ་འབྲེལ་ཆོས་ཕུང་ ༨༤༠༠༠ ཡིག་སྒྱུར་གྱི་ལས་གཞིའི་ཞིབ་འཇུག་རྩོམ་སྒྲིག་པ་ Nathaniel Rich ལགས་ཀྱིས།  ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་ཕྲག་བརྒྱ་པའི་གཞུང་ཆེན་འདི་ནི་སངས་རྒྱས་ཤཱཀྱ་ཐུབ་པས་བྱ་རྒོད་ཕུང་པོའི་རིར་སྩལ་བའི་ཤེར་ཕྱིན་གྱི་ཆོས་ཀྱི་ཟིན་ཐོ་ཞིབ་ཚགས་ཤོས་དེ་ཡིན་པ་དང་།  […] The post བཀའ་འགྱུར་ནང་གི་མདོ་རིང་ཤོས་ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་ཕྲག་བརྒྱ་པ་དབྱིན་སྒྱུར་གནང་ཟིན་འདུག appeared first on vot.

བཙན་བྱོལ་བོད་མིའི་བཅའ་ཁྲིམས་དང་སྤྱི་མང་གཏུག་བཤེར་འགྲོ་ལུགས་རྩ་འཛིན་ཁྲིམས་ཡིག དཔང་རྟགས་རྩ་འཛིན་ཁྲིམས་ཡིག་བཅས་ཀྱི་ཐོག་བཙན་བྱོལ་བོད་མིའི་ཁྲིམས་དང་ལམ་ལུགས་ཀྱི་ཁྲིམས་རྩོད་པའི་སྦྱོང་བརྡ་ཐེངས་བཅུ་པ་གནང་བཞིན་པ་དང་དེ་ནི་ཕྱི་ལོ་ ༢༠༡༩ རྗེས་སུ་གོ་སྒྲིག་ཞུས་ཐུབ་པ་ཞིག་ཆགས་ཀྱི་འདུག དེ་ཡང་དྷ་ས་འཛིན་སྐྱོང་སྦྱོང་བརྡར་ཁང་དུ་བོད་མིའི་སྒྲིག་འཛུགས་ཆེས་མཐོའི་ཁྲིམས་ཞིབ་ཁང་གི་གོ་སྒྲིག་འོག་ཟླ་བ་འདིའི་ཚེས་ ༢༠ ནས་ ༢༩ བར་བཙན་བྱོལ་བོད་མིའི་ཁྲིམས་དང་ལམ་ལུགས་ཀྱི་ཁྲིམས་རྩོད་པའི་སྦྱོང་བརྡར་ཐེངས་བཅུ་པ་གོ་སྒྲིག་གནང་ཡོད་ཅིང་། སྦྱོང་བརྡར་དེའི་ཐོག་ཁྲིམས་ལུགས་རིག་པ་བ་དང་ཁྲིམས་རྩོད་པ། བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད། བཙན་བྱོལ་བོད་མིའི་ཁྲིམས་ཞིབ་ཁང་གི་ཁྲིམས་དོན་ལས་བྱེད་བཅས་ཚོགས་བཅར་བ་ཁྱོན་ ༣༠ ཙམ་མཉམ་ཞུགས་གནང་འདུག འདི་ག་རླུང་འཕྲིན་ཁང་ནས་ཆེས་མཐོའི་ཁྲིམས་ཞིབ་ཁང་གི་སྤྱི་ཁྱབ་ཁྲིམས་དྲུང་ཆེན་མོ་ལྷ་འབྲུག་ལགས་སུ་སྦྱོང་བརྡར་དེའི་དམིགས་ཡུལ་སྐོར་བཀའ་འདྲི་ཞུས་པར། ཁོང་གིས་བོད་མི་དཀྱུས་མ་ས་གནས་སོ་སོ་ནས་སྤྱི་སྒེར་སུ་རུང་ལ་རྩོད་གཞི་གང་འདྲ་ཞིག་བྱུང་ཚེ། ཁྲིམས་ཞིབ་ཁང་འོག་མ་ནས་གོང་རིམ་ལ་ཁྲིམས་གཏུག་ཆེད་རོགས་རམ་བྱེད་ཐུབ་པའི་ཆེད་དུ་སྦྱོང་བརྡར་སྤྲོད་ཀྱི་ཡོད་ཅིང་། སྤྱིར་ཁྲིམས་ལུགས་ཀྱི་སློབ་སྦྱོང་ནི་ཉིན་གྲངས་བཅུའི་ནང་ཡོང་ཐུབ་རྒྱུ་ཞིག་མིན་ཡང་། སྦྱོང་བརྡར་འདིའི་ནང་ཁ་མཆུ་གཏུག་སྟངས་ཀྱི་འགྲོ་ལུགས་གང་ཡིན་པ་ཞིབ་ཕྲ་ཤེས་རྟོགས་སླད་དུ་བཙན་བྱོལ་བོད་མིའི་ཁྲིམས་ཞིབ་ཁང་གི་སྤྱི་མང་གཏུག་བཤེར་འགྲོ་ལུགས་རྩ་འཛིན་ཁྲིམས་ཡིག་དང་། ཁ་མཆུ་བྱུང་བའི་རྗེས་དཔང་རྟགས་ནི་དགོས་ངེས་ཅན་ཞིག་ཡིན་པར་དེའི་བརྒྱུད་རིམ་ཤེས་རྟོགས་སླད་དུ་བཙན་བྱོལ་བོད་མིའི་ཁྲིམས་ཞིབ་ཁང་གི་དཔང་རྟགས་རྩ་འཛིན་ཁྲིམས་ཡིག་གཉིས་ཀྱི་ཞིབ་ཕྲ་སློབ་ཁྲིད་གནང་གི་ཡོད་པ་དང་། དེ་བཞིན་ཁྲིམས་ཡིག་དེ་གཉིས་ཀ་འགྲོ་ལུགས་ཁྲིམས་ཡིག་ཡིན་པ་དང་། ཁ་མཆུ་བྱུང་བའི་རྗེས་འགྲོ་ལུགས་དེ་མེད་ཚེ་བྱེད་སྟངས་མི་ཤེས་པ་དང་ཐག་གཅོད་ཡང་བྱེད་མི་ཤེས་པའི་གནས་སྟངས་ཡོང་གི་ཡོད་སྟབས། གཉིས་ཀ་མཉམ་དུ་འགྲོ་དགོས་པ་མ་ཟད། དཔེ་མཚོན་དང་རྒྱལ་སྤྱིའི་ཁྲིམས་ལུགས་ཡང་ལུང་འདྲེན་བྱ་དགོས་ཚེ་དེ་ལྟར་གནང་གི་ཡོད་པ་འགྲེལ་བརྗོད་གནང་སོང་། ལྷག་པར་ཕྱི་ལོ་ ༢༠༡༩ ནས་ད་བར་ལོ་བདུན་རིང་དེ་འབྲེལ་སྦྱོང་བརྡར་གནང་མ་ཐུབ་པའི་གནས་སྟངས་ཇི་བྱུང་སྐོར་བཀའ་འདྲི་ཞུས་པར། ཁོང་གིས་ཕྱི་ལོ་ ༢༠༡༩ ལོར་སྦྱོང་བརྡར་ཐེངས་དགུ་པ་ཚོགས་ཡོད་པ་དང་། ད་བར་ཚོགས་མ་ཐུབ་པའི་བརྒྱུད་རིམ་ནི། ཕྱི་ལོ་ ༢༠༢༠ ཡས་མས་སུ་བཀའ་འཁྲོལ་ཐོབ་པའི་འོག་ནས་དེ་འབྲེལ་ཟབ་སྦྱོང་གཉིས་གོ་སྒྲིག་ཞུ་གཏན་འཁེལ་ཡང་། སྐབས་དེར་སྤྱི་ཚོགས་ནང་ཤེས་གསལ་ལྟར་ཆེས་མཐོའི་ཁྲིམས་ཞིབ་ཁང་ལ་དཀའ་ངལ་ཞིག་ཕྲད་དེ་ཁྲིམས་ཞིབ་པ་མེད་པའི་གནས་སྟངས་བྱུང་ཡོད་སྟབས། སྦྱོང་བརྡར་སྤྲོད་པ་ལ་ཁྲིམས་ཞིབ་ཁང་གི་དབང་ལྡན་མི་སྣ་མེད་ཚེ་ལག་བསྟར་བྱེད་ཐུབ་ཀྱི་མེད་པ་དང་། ད་རེས་ཐེངས་བཅུ་པ་དེའང་ལོ་སྔོན་མའི་བཀའ་འཁྲོལ་གསར་པ་ཞུས་པའི་ཐོག་ནས་ཚོགས་པ་ཐུབ་ཡོད་པ་འགྲེལ་བརྗོད་གནང་སོང་། ད་དུང་སྦྱོང་བརྡར་དེའི་ནང་སྲི་ཞུ་ལས་བྱེད་ཡང་མཉམ་ཞུགས་གནང་ཡོད་སྟབས་ཁོང་རྣམ་པའི་ཁྲིམས་རྩོད་པའི་ཕྱག་ལས་གནང་ཆོག་གི་ཡོད་མེད་སྐོར་བཀའ་འདྲི་ཞུས་པར། བོད་མིའི་སྒྲིག་འཛུགས་ཀྱི་ལས་ཁུངས་བྱེ་བྲག་གང་ཡིན་པ་ཞིག་ལ་གནས་ཚུལ་ཞིག་བྱུང་ནས་ལས་ཁུངས་དེས་རེ་བ་བརྒྱབ་ཚེ། སྲི་ཞུ་བ་དེར་ཁྲིམས་རྩོད་པའི་སློབ་སྦྱོང་ཡོད་ཀྱང་ཁྲིམས་དེ་ལེན་དང་མ་ལེན་དོ་དག་རང་ཉིད་ལ་རག་ལུས་ཡོད་པ་འགྲེལ་བརྗོད་གནང་སོང་། ཁོང་གིས་ད་དུང་དེ་དང་འབྲེལ་ནས་ཆེས་མཐོའི་ཁྲིམས་ཞིབ་ཁང་གི་མི་སྣ་མང་པོར་སྦྱོང་བརྡར་གནང་ཡོད་ཀྱང་ཁྲིམས་ཡིག་ལ་རྒྱུན་དུ་དོ་སྣང་མ་བྱས་པར་གློ་བུར་དུ་ཁྲིམས་རྩོད་པ་གནང་ཚེ་ནོར་འཁྲུལ་མང་པོ་བྱུང་གི་ཡོད་པར་བརྟེན། ཁྲིམས་ཡིག་དེ་དག་ལ་ཡང་ནས་ཡང་དུ་དོ་སྣང་བྱ་དགོས་གལ་ཡིན་པ་མ་ཟད། སྦྱོང་བརྡར་འདིའི་ནང་སྲི་ཞུ་ལས་བྱེད་གཉིས་དེ་སྔ་སྦྱོང་བརྡར་ཐོབ་ཚར་བ་དང་ད་རེས་བསྐྱར་སྦྱོང་ཆགས་ཀྱི་ཡོད་སྟབས་མགོ་ཚོད་རྒྱུ་ཕན་ཐོགས་ཆེན་པོ་བྱུང་ཡོད་པ་གསུང་གིན་འདུག་ཅེས་འགྲེལ་བརྗོད་གནང་སོང་། ཆེས་མཐོའི་ཁྲིམས་ཞིབ་ཁང་གི་སྤྱི་ཁྱབ་ཁྲིམས་དྲུང་ཆེན་མོས་ད་ལྟའི་བོད་པའི་སྤྱི་ཚོགས་ནང་ལ་ཁྲིམས་རྩོད་པའི་གནས་བབ་སྐོར་དང་འབྲེལ་ནས། དེ་སྔོན་ཁྲིམས་ལུགས་རིག་པ་ཐོན་མཁན་གང་ཞིག་བོད་པའི་སྤྱི་ཚོགས་ནང་ཁ་མཆུ་གཏུག་ནས་རོགས་པ་བྱེད་མཁན་མེད་པ་ལྟ་བུ་ཡིན་པ་དང་། ད་ལྟའི་དུས་སྐབས་སུ་དུས་ཚོད་འགྱུར་བའི་དབང་གིས་མང་དུ་འགྲོ་ཡི་ཡོད་པར་དེ་ནི་བཟང་ཕྱོགས་ཀྱི་རྣམ་པ་ཞིག་ཏུ་ངོས་འཛིན་བྱེད་ཀྱིན་ཡོད་ཅིང་། དེ་ནི་ངེས་པར་དུ་དགོས་ངེས་ཤིག་ཡིན་པ་མ་ཟད། ཁོང་རྣམ་པ་ཚོར་ཁྲིམས་ལུགས་རིག་པའི་རྒྱབ་ལྗོངས་ཡོད་པར་བརྟེན། བོད་པའི་སྤྱི་ཚོགས་ནང་གི་ཁྲིམས་ཡིག་དེ་དག་མགོ་ཚོད་རྒྱུ་ལས་སླ་པོ་ཡོད་པའི་ཁེ་ཕན་ཡོད་པ་འགྲེལ་བརྗོད་གནང་སོང་། རྩ་བའི་འདི་ཚེས་ ༢༠ ཉིན་དབུ་འབྱེད་མཛད་སྒོའི་ཐོག་ཁྲིམས་ཞིབ་པ་ཆེ་བ་ཡེ་ཤེས་དབང་མོ་མཆོག་དང་ཁྲིམས་ཞིབ་པ་གཞན་འཕགས་པ་ཚེ་རིང་མཆོག་བཅས་དབུ་བཞུགས་གནང་ཡོད་པ་དང་། སྐབས་དེར་ཁྲིམས་ཞིབ་པ་ཆེ་བ་ཡེ་ཤེས་དབང་མོ་མཆོག་གིས་མི་མང་ཁྲོད་ཁྲིམས་ཀྱི་གོ་རྟོགས་ཧ་ཅང་ཞན་པོ་ཡོད་པར་བརྟེན། ཆེས་མཐོའི་ཁྲིམས་ཞིབ་ཁང་གི་ངོས་ནས་ཁྲིམས་ལུགས་རིག་པའི་རྒྱབ་ལྗོངས་ཡོད་མཁན་གང་མང་ལ་སྦྱོང་བརྡར་གོ་སྒྲིག་གནང་གི་ཡོད་པ་མ་ཟད། མཉམ་ཞུགས་གནང་མཁན་རྣམས་བཙན་བྱོལ་བ་ཞིག་ཡིན་པའི་ཆ་ནས་རྒྱལ་ཁབ་གཞན་དུ་མང་གཙོའི་ལམ་ལུགས་ལག་བསྟར་བྱ་རྒྱུའི་གོ་སྐབས་ཐོབ་པ་དེ་ནི་༸གོང་ས་༸སྐྱབས་མགོན་ཆེན་པོའི་བཀའ་དྲིན་དང་བོད་མིའི་སྒྲིག་འཛུགས་འདི་གཙིགས་ཆེར་འཛིན་དགོས་གལ་ཡིན་པ་གསུངས་ཡོད། […] The post བཙན་བྱོལ་བོད་མིའི་ཁྲིམས་དང་ལམ་ལུགས་ཀྱི་ཁྲིམས་རྩོད་པའི་སྦྱོང་བརྡར་ཐེངས་བཅུ་པ་གནང་བཞིན་པ། appeared first on vot.

ཉེ་ལམ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ལ་དྭགས་ཞི་བའི་ཚལ་ཕོ་བྲང་དུ་མང་མཇལ་སྐབས།  ལ་དྭགས་གཞོན་ནུ་ཁག་གཅིག་གིས་གནད་དོན་འདྲ་མིན་སྐོར་བཀའ་འདྲི་ཞུས་ཡོད་པ་དང་།  དེ་དག་ཁོངས་ནས་གཅིག་གིས་ཡུལ་དེའི་ནང་གི་གཞོན་སྐྱེས་ཁྲོད་མྱོ་རྫས་རྐྱེན་པས་དཀའ་ངལ་འཕྲད་མཁན་ཇེ་མང་དུ་འགྲོ་བཞིན་པའི་སྐོར་བཀའ་འདྲི་ཞུས་ཡོད་པ་རེད།    དེ་འབྲེལ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁ་ཉིན་ཕྱི་ཚེས་ ༢༠ ཉིན་དྲྭ་རྒྱའི་སྟེང་ཡིག་ཐོག་གསུང་འཕྲིན་ཞིག་སྩལ་ཡོད་པའི་ནང་།  ༸གང་ཉིད་མཆོག་གིས་མྱོ་རྫས་ལོངས་སུ་སྤྱོད་པའི་གནོད་སྐྱོན་གྱི་རང་བཞིན་དང་དེ་ནི་གོམས་གཤིས་ངན་པ་ཞིག་ཡིན་པ་ཤེས་རྟོགས་དགོས་རྒྱུ་གལ་ཆེན་པོ་ཡིན་པ་མ་ཟད།  ནམ་ཞིག་མྱོ་རྫས་བེད་སྤྱོད་བྱེད་པའི་མཇུག་འབྲས་སྐོར་བསམ་གཞིག་བྱེད་ན།  དེས་སྡུག་བསྔལ་ཁོ་ན་ལས་ཡོང་གི་མེད་པ་མངོན་གསལ་ཡིན་སྐོར་བཀའ་སྩལ་འདུག་པ་དང་།  མྱོ་རྫས་ངན་གོམས་ལས་བཅོས་ཐབས་དང་དྲག་སྐྱེད་ཀྱི་ལམ་དུ་གནས་རྒྱུ་དེར་དངོས་ནས་ཀྱི་སྙིང་སྟོབས་དང་ཆོད་སེམས་བརྟན་པོ་དགོས་པ་མཁྱེན་གྱི་ཡོད་སྐོར་དང་།  དཀའ་ངལ་དེ་དག་ལས་ཐར་བར་བྱེད་མཁན་གཞོན་སྐྱེས་ཡོངས་ལ་ཡིད་རངས་བསྔགས་བརྗོད་ཡོད་ཅེས།  ལ་དྭགས་གཞོན་ནུ་ཚོའི་ངོས་ནས་མྱོ་རྫས་ལོངས་སུ་སྤྱོད་རྒྱུར་འཛེམ་དགོས་པ་དང་།  ངན་གོམས་དེའི་རྐྱེན་པས་དཀའ་ངལ་འཕྲད་བཞིན་པ་ཡོངས་ལ་མྱུར་དུ་བདེ་ཐང་དང་དོན་སྙིང་ལྡན་པའི་མི་ཚེ་སྐྱིད་པོ་ཞིག་སྐྱེལ་ཐུབ་པའི་སྨོན་ལམ་འདེབས་ཀྱིན་ཡོད་པ་བཀའ་སྩལ་འདུག འདི་ག་རླུང་འཕྲིན་ཁང་གི་ལ་དྭགས་ས་གནས་གསར་འགོད་པས་ཡུལ་དེར་གནས་སྡོད་ལ་དྭགས་དང་བོད་མི་གཞོན་སྐྱེས་ཁག་གཅིག་ལ་༸གོང་ས་མཆོག་གི་གསུང་འཕྲིན་དེས་ཁོང་ཚོར་སེམས་འགུལ་ཇི་ལྟར་ཐེབས་ཡོད་སྐོར་བཀའ་འདྲི་ཞུས་པར་ཁོང་རྣམས་ཀྱིས།  ༸གང་ཉིད་མཆོག་ལ་སྐུ་ངལ་ཧ་ཅང་ཡོད་ཀྱང་ལ་དྭགས་གཞོན་སྐྱེས་ཚོའི་དྲི་བར་བཀའ་ལན་འཛད་མེད་སྩལ་གྱི་ཡོད་པ་དེ་ཤིན་ཏུ་ནས་བཀའ་དྲིན་ཆེན་པོ་ཡིན་པ་དང་།  ཁ་ཉིན་ལ་དྭགས་ཁུལ་གྱི་གཞོན་སྐྱེས་ཚོར་མྱོ་རྫས་སོགས་དང་འབྲེལ་བའི་བཀའ་སློབ་དེ་དག་འཛམ་གླིང་གཞོན་སྐྱེས་ཚང་མར་ཁྱབ་ཀྱི་ཡོད་ལ།  མྱོ་རྫས་ཀྱིས་གང་ཟག་སོ་སོའི་འཕྲོད་བསྟེན་ལ་གནོད་པ་ཙམ་མིན་པར་ནང་མི་ཕན་ཚུན་འཆམ་མཐུན་མེད་པ་བཟོ་ཡི་ཡོད་པར་བརྟེན།  ལ་དྭགས་གཞོན་སྐྱེས་ཚོས་ངོས་ནས་མྱོ་རྫས་ལོངས་སྤྱོད་ནི་རང་གི་སྡུག་བསྔལ་སེལ་བའི་ཐབས་ལམ་ཞིག་གཏན་ནས་མིན་པ་ཤེས་དགོས་པ་གསུངས་འདུག ༸གོང་ས་༸སྐྱབས་མགོན་ཆེན་པོ་མཆོག་གིས་ཁ་ཉིན་གསུང་འཕྲིན་སྩལ་བའི་ནང་གཞན་ཡང་ལ་དྭགས་གཞོན་ནུ་ཁག་གཅིག་གིས་སེམས་ཀྱི་ཞི་བདེ་ཇི་ལྟར་འཚོལ་དགོས་པ་མ་ཟད།  དངངས་འཚབ་དང་། ཁོང་ཁྲོ། སེམས་ངལ་སོགས་ཀྱི་ཉོན་མོངས་ལས་ཇི་ལྟར་རྒྱལ་དགོས་པའི་སྐོར་བཀའ་འདྲི་ཞུས་མཁན་བྱུང་སོང་ཞེས།  དེར་༸གང་ཉིད་མཆོག་གིས་བཀའ་ལན་དུ།  མི་ཚེ་ནང་གི་གཞི་རྩའི་དགོས་དོན་ནི་བདེ་བ་འཚོལ་རྒྱུ་དེ་ཡིན་དུས།  བདེ་བ་ངོ་མ་སྟེ་ཕྱིའི་རྒྱུ་ནོར་ལོངས་སྤྱོད་དང་དབང་ཆ་ནས་ཡོང་གི་མེད་པར་དེ་ནི་སེམས་ཀྱི་ཞི་བདེ་ནས་ཡོང་གི་ཡོད་པ་དང་།  དེ་ཡང་ང་ཚོས་སེམས་ལ་སྦྱོང་བརྡར་སྤྲད་དེ་བྱམས་བརྩེ་དང་གཞན་ཕན་གྱི་བསམ་བློ་གོང་འཕེལ་ལས་བསྒྲུབ་ཐུབ་ཀྱི་ཡོད་པ་བཀའ་སྩལ་དང་འབྲེལ།  གང་ཟག་རང་གི་བདེ་བ་སྟེ་གཞན་ཕན་གྱི་སེམས་ལ་རག་ལས་ཀྱི་ཡོད་པ་དང་།  རང་གཅེས་འཛིན་གྱི་བློ་དེ་བཞིན་གཞན་གཅེས་འཛིན་གྱི་བློར་བསྒྱུར་ཐུབ་ན་སེམས་ངལ་མཐའ་དག་དེ་ལས་ཞི་བར་འགྱུར་ཐུབ་པ་མ་ཟད། རང་དོན་སྒྲུབ་པའི་ཐབས་ཤེས་ཡག་ཤོས་ཏེ་དེ་ཡིན་པ་བཀའ་སྩལ་འདུག མ་ཟད་མགོན་པོ་༸གང་ཉིད་མཆོག་གིས་མི་ཚེ་དྲང་བདེན་དང་ཕྱི་གསལ་ནང་གསལ་ཐོག་སྐྱེལ་ཐུབ་པ་དེས་དངངས་སྐྲག་སོགས་ཉུང་དུ་གཏོང་ཐུབ་ལ།  སྤྱི་ཚོགས་ཁྲོད་གང་ཟག་གཞན་དང་འབྲེལ་བའང་ཡག་པོ་ཡོང་ངེས་ཡིན་པ་བཀའ་སྩལ་གྱིས།  ཕྱིའི་རྒྱ་རྐྱེན་ལས་སེམས་ཀྱི་ཞི་བདེ་བསྒྲུབ་ཐབས་མེད་པ་དང་།  ཤེས་ཡོན་དང་ཉམས་ལེན་བརྒྱུད་ནང་སེམས་ལ་སྦྱོང་བརྡར་སྤྲོད་དགོས་གལ་མ་ཟད།  ཞེ་སྡང་དང་། ཁྲོ་སེམས། ཕྲག་དོག་འཇོམས་བྱེད་དུ་བྱམས་སྙིང་རྗེ་དང་བཟོད་སྒོམ་སོགས་ཀྱི་བསམ་བློ་གོང་འཕེལ་གཏོང་དགོས་པ་བཀའ་སྩལ་འདུག སྤྱིར་ད་ལན་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་གཞོན་སྐྱེས་ཚོར་དམིགས་ཏེ་མྱོ་རྫས་ངན་གོམས་ཐོག་བཀའ་སློབ་སྩལ་ཡོད་པ་གང་ལྟར་ཡང་།  བཙན་བྱོལ་སྤྱི་ཚོགས་ཁྲོད་༸གང་ཉིད་མཆོག་གི་གསུང་འཕྲིན་དེ་སྤྱི་ཚོགས་དྲྭ་ལམ་སྟེང་བརྒྱུད་སྐུལ་དང་སྦྲགས།  བཀའ་སློབ་དེ་དག་བོད་མི་གཞོན་སྐྱེས་ཚོ་ལ་ཡང་ཁྱབ་ཀྱི་ཡོད་པ་དང་།  དེར་བོད་མི་གཞོན་ནུ་ཚོའི་ངོས་ནས་དོ་སྣང་གནང་དགོས་པ་གསུང་གི་འདུག རྩ་བའི་ལ་དྭགས་ཁུལ་དུ་མྱོ་རྫས་ཀྱི་ངན་གོམས་ཤོར་བའི་གཞོན་སྐྱེས་མང་དུ་འགྲོ་བཞིན་པའི་གནས་སྟངས་ལ་གཞིགས་ཏེ།  དེ་སྔ་ཡིན་ན་ཁུལ་དེར་ལོ་ངོ་བཅུ་ཕྲག་འགའ་ཤས་རིང་ཆང་རག་གི་ཚོང་ཁང་ ༢ ལས་མེད་ཀྱང་།  ད་ཆ་ས་གནས་སྲིད་གཞུང་གིས་ཡུལ་དེར་མྱོ་རྫས་བེད་སྤྱོད་བྱེད་མཁན་ཇེ་མང་དུ་འགྲོ་བཞིན་པ་ལ་གདོང་ལེན་ཆེད་དུ།  ཆང་རག་ཚོང་ཁང་ ༢༠ སྒོ་ཕྱེ་རྒྱུའི་གསལ་བསྒྲགས་སྤེལ་ཡོད་པ་དང་།  གནས་ཚུལ་དེར་ཁུལ་དེའི་ཚོགས་སྒེར་ཁག་གཅིག་གིས་སྐྱོན་བརྗོད་ཤུགས་ཆེ་དང་འབྲེལ།  མྱོ་རྫས་བེད་སྤྱོད་ཉུང་དུ་གཏོང་ཆེད་ཆང་རག་ཚོང་ཁང་མང་དུ་གཏོང་རྒྱུའི་ཐག་ཆོད་དེ་ནི་རྒྱུ་མཚན་རིག་པ་མེད་པ་ཞིག་དང་།  ཁག་གཅིག་གིས་དེ་ནི་ཚན་རིག་གི་ཐོག་ནས་ཀྱང་ཡོང་ཐབས་བྲལ་བ་ཞིག་ཡིན་པ་མ་ཟད།  གཞན་ལ་དྭགས་རང་སྐྱོང་དགོས་པར་འཐབ་རྩོད་བྱེད་མཁན་འགོ་ཁྲོད་ཚོས་ཐག་ཆོད་དེ་ནི་དབུས་གཞུང་གིས་ས་ཁུལ་དེའི་ཐོག་བཙན་བཀའ་བཏང་བ་ཞིག་ཡིན་པ་བརྗོད་ཡོད་པ་རེད།  The post གོང་ས་མཆོག་གིས་ལ་དྭགས་གཞོན་ནུ་ཚོས་མྱོ་རྫས་ལོངས་སུ་སྤྱོད་རྒྱུ་འཛེམ་དགོས་པ་བཀའ་སྩལ་འདུག appeared first on vot.

ཨོ་ཌི་ཤ་མངའ་སྡེ་དེ་ཉིད་འཛམ་གླིང་ནང་གི་ནང་པའི་གནས་དང་འབྲེལ་བའི་ཡུལ་སྐོར་སྤྲོ་འཆམ་པའི་ས་ཚིགས་འབུར་ཐོན་བཟོ་ཐབས་ལ་དམིགས་ནས་ལས་གཞི་སྣ་མང་སྤེལ་དང་སྤེལ་བཞིན་པའི་ཁྲོད་འདིར། ཉེ་ལམ་མངའ་སྡེའི་ཡུལ་སྐོར་སྤྲོ་འཆམ་པའི་ལས་ཁུངས་དང་ཁུལ་དེར་རྟེན་གཞི་བྱས་པའི་རི་དགོན་ཐུབ་བསྟན་སྨིན་གྲོལ་གླིང་དགོན་པའི་བར་ནང་པའི་ཤུལ་བཞག་དང་གཅེས་ནོར་སྲུང་སྐྱོབ་ཚུད་པའི་ཡུལ་སྐོར་སྤྲོ་འཆམ་འཕེལ་རྒྱས་ཡོང་ཐབས་སུ་གཉིས་མོས་གན་ཡིག་ཐོག་མཚན་རྟགས་བསྐྱོན་འདུག དེ་ཡང་ཟླ་བ་འདིའི་ཚེས་ ༡༥ ཉིན་ཨོ་ཌི་ཤའི་ Lok Seva Bhawan དུ་གན་ཡིག་བཞག་རྒྱུའི་མཛད་སྒོ་དེའི་ཐོག་མངའ་སྡེ་སྤྱི་ཁྱབ་བློན་ཆེན་གཞོན་པ་དང་ཡུལ་སྐོར་སྤྲོ་འཆམ་པའི་ལས་ཁུངས་ཀྱི་གཙོ་འཛིན་གཅིག་ལྕོགས་ Parvati Parida པཱར་ཝ་ཏི་པཱ་རི་ཌ་མཆོག་དང་། ཁུལ་དེའི་གཱ་ཇཱ་པ་ཏི་རྫོང་ནང་རྟེན་གཞི་བྱས་པའི་ Padmasambhava Mahavihara རམ་རི་དགོན་ཐུབ་བསྟན་སྨིན་གྲོལ་གླིང་དགོན་པའི་དབུ་འཛིན་༸སྐྱབས་རྗེ་དགེ་སྤྲུལ་འཇིགས་མེད་རིན་པོ་ཆེ་མཆོག དེ་བཞིན་མངའ་སྡེའི་སྐད་ཡིག་དང་རྩོམ་རིག རིག་གཞུང་། རྩེད་རིགས། གཞོན་སྐྱེས་ཞབས་ཞུ། མཐོ་རིམ་སློབ་གྲྭ་བཅས་ཀྱི་བློན་ཆེན་ Suryabanshi Suraj སུརྱ་ཝན་ཤི་སུ་རཇ་མཆོག མངའ་སྡེའི་སྤྱི་ཁྱབ་དྲུང་ཆེ་ Anu Garg ཨ་ནུ་གརྒ་ལགས་བཅས་དབུ་བཞུགས་ཀྱི་ཐོག་ནས་མཉམ་འབྲེལ་གན་ཡིག་ཐོག་མཚན་རྟགས་བསྐྱོན་འདུག ལས་གཞི་དེ་ནི་མངའ་སྡེ་གཞུང་གིས་ཁུལ་དེའི་ Jajpur ཇཱཇ་པུར་རྫོང་ནང་ཡོད་པའི་ནང་པའི་གནས་རཏྣ་གི་རི་ Ratnagiri དང་ཨུ་དྷེ་གི་རི་ Udayagiri ལ་ལིཏ་གི་རི་ Lalitgiri བཅས་དང་། བོད་མིའི་གནས་སྡོད་ཕུན་ཚོགས་གླིང་གཞིས་ཆགས་དང་དགོན་སྡེ་ཁག་བཅས་སུ་ཡུལ་སྐོར་སྤྲོ་འཆམ་མྱུར་ཚད་མཐོ་བོའི་ཐོག་ནས་འཕེལ་རྒྱས་འགྲོ་རྒྱུ་ཙམ་མ་ཟད། ནང་པའི་ཤུལ་བཞག་སྲུང་སྐྱོབ་བཅས་ལ་དམིགས་པ་ཞིག་ཆགས་ཀྱི་འདུག མཛད་སྒོའི་ཐོག་མངའ་སྡེའི་སྤྱི་ཁྱབ་བློན་ཆེན་གཞོན་པས་ནང་པའི་ཤུལ་བཞག་གི་རིག་གནས་དེ་དག་མངའ་སྡེའི་རིག་གཞུང་དང་འབྲེལ་བའི་གཅེས་ནོར་གལ་ཆེན་ཞིག་ཡིན་པ་དང་། དེར་ཡུལ་སྐོར་སྤྲོ་འཆམ་རྒྱ་སྐྱེད་ཀྱི་ནུས་པ་ཆེན་པོ་ཡོད་ཅེས་བརྗོད་འདུག དེ་བཞིན་མཉམ་འབྲེལ་གྱི་གན་ཡིག་དེའི་བརྒྱུད་ནས་འཛམ་གླིང་ཡུལ་གྲུ་གང་ནས་ཕེབས་མཁན་རྣམས་ལ་ཆོས་ཕྱོགས་ཀྱི་མྱོང་བ་ཚད་ལྡན་བསྐྲུན་ཐབས་དང་ཆབས་ཅིག མངའ་སྡེ་གཞུང་གི་ངོས་ནས་ནང་པའི་རིག་གནས་དེ་དག་སྲུང་སྐྱོབ་ལ་ཆོད་སེམས་བརྟན་པོ་མཚོན་གྱི་ཡོད་པ་འགྲེལ་བརྗོད་གནང་འདུག རྩ་བའི་ལས་གཞི་དེའི་ནང་མངའ་སྡེ་གཞུང་དང་དགོན་པ་ཟུང་སྦྲེལ་གྱི་ཐོག་ནས་རྒྱལ་ཁབ་ཕྱི་ནང་གཉིས་ཀྱི་ལྟ་སྐོར་བ་རྣམས་ལ་སྒོམ་སྒྲུབ་དང་ཟབ་སྦྱོང་། ཆོས་ཕྱོགས་ཀྱི་སློབ་སྦྱོང་དང་གནས་མཇལ་གྱི་བྱེད་སྒོ་སོགས་ཚུད་པའི་ཆོས་ཕྱོགས་དང་ནང་སེམས་ཀྱི་མྱོང་བ་བཅས་ལ་དམིགས་ནས་ཡུལ་སྐོར་སྤྲོ་འཆམ་པའི་ལས་གཞི་གོང་འཕེལ་གཏོང་རྒྱུ་དང་། ལྷག་པར་རྒྱལ་སྤྱིའི་ཚོགས་འདུ་དང་ཟུང་སྦྲེལ་གྱི་ཉམས་ཞིབ། སློབ་གྲྭ་ཕན་ཚུན་ཤེས་ཡོན་བརྗེ་ལེན་གྱི་ལས་གཞི་བཅས་ཀྱི་བརྒྱུད་ནས་ནང་པའི་རིག་གཞུང་དར་འཕེལ་གཏོང་རྒྱུ་སོགས་ཀྱི་ལས་གཞི་ཡོད་པ་རེད་འདུག དེ་བཞིན་མངའ་སྡེའི་རིག་གཞུང་བློན་ཆེན་མཆོག་གིས། མངའ་སྡེ་ནང་ཡོད་པའི་ནང་པའི་རིག་གཞུང་དེ་དག་ནི་ཐུན་མོང་མིན་པའི་ལོ་རྒྱུས་དང་ལྟ་གྲུབ་ཟུང་ལྡན་གྱི་ཁྱད་ཆོས་ཞིག་མཚོན་གྱི་ཡོད་པ་སོགས་བརྗོད་འདུག རྒྱ་གར་གཞུང་གི་ངོས་ནས་ད་ལྟའི་ཆར་ཨོ་ཌི་ཤ་ནང་ཡོད་པའི་ Diamond Triangle འམ་རྡོ་རྗེ་གྲུ་གསུམ་དུ་གྲགས་པའི་ནང་པའི་གནས་གསུམ་སྟེ། Ratnagiri རཏྣ་གི་རི་དང་། […] The post རྒྱལ་སྤྱིའི་ཁྲོད་ཨོ་ཌི་ཤ་ནང་པའི་གནས་འབུར་ཐོན་དང་རིག་གནས་སྲུང་སྐྱོབ་ཆེད་བོད་པའི་དགོན་པ་ཞིག་དང་ལྷན་དུ་གན་རྒྱ་བཞག་འདུག appeared first on vot.

ཟླ་འདིའི་ཕྱི་ཚེས་ ༢ ཉིན་ཨ་རི་གྲོང་ཁྱེར་ནིའུ་ཡོག་ཏུ་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ཀྱི་མདུན་དུ་རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱིས་བོད་བསྟན་སྲིད་མི་རིགས་ཀྱི་ཆེད་དུ་སྐུ་ལུས་མེར་བསྲེགས་ཕུལ་བ་དང་བསྟུན། ནིའུ་ཡོག་གཙོས་པའི་ཁེ་ན་ཌ་དང་རྒྱ་གར། ཡོ་རོབ་སོགས་ཀྱི་ནང་ལས་འགུལ་རྣམ་པ་འདྲ་མིན་གྱི་ཐོག་ནས་སྤེལ་དང་སྤེལ་མུས་ཁྲོད། ཁ་སང་ཕྱི་ཚེས་ ༡༥ དེ་བཞིན་དམ་པ་དེ་ཉིད་ཀྱི་བདུན་ཚིགས་གཉིས་པ་འཁེལ་གྱི་ཡོད་སྟབས་ཐའེ་ཝན་གྱི་རྒྱལ་ས་ཐའེ་པེ་ནང་དང་། རྒྱ་གར་ལྷོ་ཕྱོགས་མའེ་སོར་གྲོང་ཁྱེར་སོགས་སུ་རྒྱ་ནག་ལ་ངོ་རྒོལ་ལས་འགུལ་རྒྱ་ཆེ་སྤེལ་འདུག དེ་ཡང་བརྒྱུད་ལམ་ཁག་ཏུ་དེ་འབྲེལ་གནས་ཚུལ་སྤེལ་བར་གཞིགས་ན། ཁ་སང་ཐའེ་ཝན་ནང་ཐའེ་ཝན་བོད་ཀྱི་སྐུ་ཚབ་དོན་གཅོད་དང་། བོད་རིགས་ཚོགས་པ། དེ་བཞིན་བོད་དང་ཐའེ་ཝན་འགྲོ་བ་མིའི་ཐོབ་ཐང་ཚོགས་པའི་སྣེ་ཁྲིད་འོག་ཁུལ་དེའི་ Liberty Square ཞེས་པའི་ས་ཚིགས་སུ་དགོང་མོ་ཕྱག་ཚོད་ ༧།༣༠ ཙམ་ལ་བོད་བརྒྱུད་ནང་བསྟན་གྱི་མཁན་བླ་སྤུལ་ཁག་དང་། བོད་མི་གཙོས་བོད་དོན་རྒྱབ་སྐྱོར་བ་དང་། འགྲོ་བ་མིའི་ཐོབ་ཐང་རྩོད་ལེན་པ་སོགས་མང་ཚོགས་ ༣༠༠ ཙམ་འདུ་འཛོམས་ཐོག་རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱི་ཆེད་མྱ་ངན་གུས་འདུད་དང་། འདི་ཚེས་ ༡ ནས་རྒྱ་ནག་གཞུང་གིས་ལག་བསྟར་བྱས་པའི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་ཟེར་བའི་ཁྲིམས་ལ་ངོས་ལེན་རྩ་བ་ནས་མེད་པའི་ལས་འགུལ་སྤེལ་འདུག་ཅིང་། དེ་འབྲེལ་ལས་འགུལ་ཁོངས་མཉམ་ཞུགས་གནང་མཁན་ཐའེ་ཝན་མི་སེར་ Tess Cheng ལགས་ཀྱིས་ཐེ་ཝན་དང་བོད། ཧོང་ཀོང་། ཤིན་ཅང་བཅས་ནི་རྒྱ་ནག་གི་ཡུན་རིང་གདུག་རྩུབ་ཅན་གྱི་སྲིད་བྱུས་འོག་གནས་བཞིན་ཡོད་པ་དང་། སྤྱིར་རྒྱལ་གཅེས་པ་ཁོང་གིས་སྐུ་ལུས་མེར་བསྲེགས་བཏང་གནང་བའི་དོན་རྐྱེན་དེ་བཞིན་ཕྱི་རྒྱལ་དུ་བྱུང་ཡོད་ཀྱང་། དེ་ནི་ང་ཚོའི་དཀའ་ངལ་དང་གཅིག་འགྱུར་ཆགས་ཀྱི་ཡོད་པ་གསུངས་འདུག འདི་ག་རླུང་འཕྲིན་ཁང་གིས་གནད་དོན་དེ་འབྲེལ་བོད་དང་ཐའེ་ཝན་གྱི་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་སྤྱི་ཁྱབ་དྲུང་ཆེ་བཀྲ་ཤིས་ཚེ་རིང་ལགས་སུ་བཀའ་འདྲི་ཞུས་ཡོད། དེ་བཞིན་དཔའ་བོོ་བློ་དགའ་རང་བཙན་ལགས་སུ་མྱ་ངན་མཚོན་ཆེད་ SFT-Itanagar ཞེས་ཨི་ཊ་ན་གྷར་བོད་རང་བཙན་སློབ་ཕྲུག་ཚོགས་པས་གཟའ་འཁོར་འདིའི་རེས་གཟའ་ཟླ་བ་སྟེ་འདི་ཚེས་ ༡༣ ཉིན་ཁུལ་དེའི་ཐུབ་བསྟན་དགའ་ཚལ་གླིང་དགོན་པར་མར་མེ་ཁྲོམ་སྐོར་གྱི་ལས་འགུལ་ཞིག་གོ་སྒྲིག་གནང་འདུག་པ་དང་། འདུ་འཛོམས་དེའི་ཚོགས་པས་ངོས་ནས་བོད་དོན་ལས་འགུལ་སྤེལ་རྒྱུའི་ཁས་ལེན་བསྐྱར་ནན་དང་ཆབས་ཅིག བོད་མི་ཡོངས་ལ་གདུང་སེམས་མཉམ་སྐྱེད་མུ་མཐུད་གནང་དགོས་པའི་འབོད་སྐུལ་ཞུས་འདུག་ཅིང་། ལས་འགུལ་དེའི་བརྒྱུད་རྒྱལ་སྤྱིའི་སྤྱི་ཚོགས་དང་འཛམ་གླིང་གི་དབུ་ཁྲིད་རྣམས་ལ་བོད་ཀྱི་གནད་དོན་ཞི་བདེ་དང་དྲང་བདེན། མཐུན་སྒྲིལ་གྱི་ཐོག་ནས་ཐག་གཅོད་གནང་པའི་འབད་བརྩོན་ལ་རྒྱབ་སྐྱོར་བྱེད་དགོས་པའི་འབོད་སྐུལ་གནང་འདུག མ་ཟད་རྒྱ་གར་ལྷོ་ཕྱོགས་མའེ་སོར་གྲོང་ཁྱེར་དུའང་སྦེལ་ཀོབ་དང་ཧུན་སུར། ཀོ་ལི་གྷར་བཅས་ཀྱི་དབུ་མའི་ལམ་གྱི་བོད་ཀྱི་གཞོན་ནུ་དང་། བུད་མེད་ལྷན་ཚོགས། དེ་བཞིན་མའེ་སོར་བཅའ་བཞུགས་བོད་རིགས་སློབ་ཕྲུག་མཐུན་ཚོགས་ནས་གོ་སྒྲིག་འོག་རྔམ་སྟོན་ལས་འགུལ་གནང་འདུག་པ་དང་། གཞན་ཡང་བསྟན་འཛིན་སྒང་དང་། Italy རྒྱལ་ས་ Rome སོགས་ནང་དུ་ལས་འགུལ་འདྲ་མིན་སྤེལ་ཡོད་པ་རེད། ཕྱོགས་མཚུངས་དམ་པ་ཁོང་གི་བདུན་ཚིགས་གཉིས་པ་དང་བསྟུན་དེ་རིང་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། བཞུགས་སྒར་རྡ་སའི་ཐང་ཁྲོམ་ཚོགས་པས་མཆོད་འབུལ་སྨོན་གོ་སྒྲིག་གནང་ཡོད་པ་དང་། འདི་ཚེས་ […] The post དཔའ་བོ་བློ་དགའ་རང་བཙན་ལགས་སུ་གདུང་སེམས་མཉམ་སྐྱེད་དང་རྒྱ་ནག་གི་ཁྲིམས་གསར་པར་ངོས་ལེན་མེད་པའི་ལས་འགུལ། appeared first on vot.

ཨོ་གླིང་དུ་རྟེན་གཞི་བྱས་པའི་ Rev. Bill Crews ཐེབས་རྩ་ཁང་དུ་༸སྐྱབས་རྗེ་ཀུན་བདེ་གླིང་རིན་པོ་ཆེ་མཆོག་དབུ་བཞུགས་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དེ་སྔ་ཨོསྟྲེ་ལི་ཡ་དང་ནིའུ་ཛི་ལེནྜ་ཁུལ་དུ་ཆིབས་བསྒྱུར་རིམ་པ་བསྐྱངས་པའི་པར་རིས་ཕྱག་དེབ་ ‘Ocean of Wisdom Over Southern Skies’ ཞེས་པ་ཞིག་དབུ་འབྱེད་གནང་འདུག འདི་གའི་གསར་འགོད་པས་གནས་ཚུལ་དེའི་སྐོར་ཨོ་གླིང་བོད་ཀྱི་སྐུ་ཚབ་དོན་གཅོད་ཀརྨ་སེང་གེ་ལགས་སུ་ཞལ་པར་བརྒྱུད་བཀའ་འདྲི་ཞུ་སྐབས་ཁོང་གིས།  པར་རིས་ཕྱག་དེབ་དེ་ཉིད་ཨོ་གླིང་བོད་ཀྱི་སྐུ་ཚབ་དོན་གཅོད་ལས་ཁངས་ཀྱི་རྐང་འགན་བཞེས་པའི་འོག་ Rev. Bill Crews ཐེབས་རྩ་དང་ལྷན་དུ་ཉམ་འབྲེལ་གྱིས་༸རྒྱལ་བའི་གོ་སྟོན་སྲུང་བརྩིའི་ལས་རིམ་གྱི་ཆ་ཤས་སུ་པར་བསྐྲུན་གནང་བ་ཞིག་ཡིན་པ་དང་།  ཕྱག་དེབ་དེའི་ནང་གཙོ་བོ་༸གོང་ས་མཆོག་དེ་སྔ་ཕྱི་ལོ་ ༡༩༨༢ ནས་ ༢༠༡༥ བར་ཨོསྟྲེ་ལི་ཡ་དང་ནིའུ་ཛི་ལེནྜ་ཁུལ་དུ་ཆིབས་བསྒྱུར་གྱིས་ཡུལ་དེ་གཉིས་ཀྱི་སྲིད་བློན་གཙོས་པའི་ཆོས་ཕྱོགས་དང་ཆབ་སྲིད་ཀྱི་གནད་ཡོད་མི་སྣ་མཇལ་འཕྲད་སོགས་ཀྱི་མཛད་འཕྲིན་བསྐྱངས་པའི་སྐབས་ཀྱི་པར་རིས་ཁག་འཁོད་ཡོད་པ་གསུངས་སོང་ལ།   ཕྱག་དེབ་དེ་ཉིད་དངོས་སུ་དབུ་འབྱེད་ཀྱི་མཛད་སྒོ་དེ་བཞིན་ཉེ་ཆར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༩༡ བདག་གིར་བཞེས་པའི་༸སྐུའི་འཁྲུངས་སྐར་སྲུང་བརྩི་དང་འབྲེལ་ཏེ་ཟླ་འདིའི་ཕྱི་ཚེས་ ༡༢ ཉིན་ཨོ་གླིང་དུ་རྟེན་གཞི་བྱས་པའི་ Rev. Bill Crews ཐེབས་རྩ་ཁང་དུ་༸སྐྱབས་རྗེ་ཀུན་བདེ་གླིང་རྟ་ཚག་རྗེ་དྲུང་རིན་པོ་ཆེ་མཆོག་དབུས་པའི་༸གོང་ས་མཆོག་དང་ཐུགས་འདྲིས་ཟབ་པའི་ཡེ་ཤུའི་ཆོས་དཔོན་ Bill Crews  དེ་བཞིན་ཁུལ་དེར་གནས་སྡོད་གནང་མཁན་ཡུན་རིང་ནས་བོད་དོན་ཐད་རྒྱབ་སྐྱོར་བ་ཁག་གཅིག་བཅས་འདུ་འཛོམས་ཐོག་འཚོགས་ཡོད་པ་གསུངས་སོང་།  ཕྱག་དེབ་དབུ་འབྱེད་ཀྱི་མཛད་སྒོའི་ཐོག་ ༸སྐྱབས་རྗེ་ཀུན་བདེ་གླིང་རིན་པོ་མཆོག་གིས་༸རྒྱལ་བའི་མཛད་འཕྲིན་སྐོར་དང་འབྲེལ་དམིགས་བསལ་གྱིས་༸གང་ཉིད་མཆོག་གི་ཐུགས་སྐྱེད་དམ་བཅའ་བཞི་དང་། ཆོས་ལུགས་ལ་མ་བརྟེན་པའི་བཟང་སྤྱོད། དེ་བཞིན་དུས་རྒྱུན་སྐུ་མདུན་གྱི་བྱམས་སྙིང་རྗེ་སྐོར་གྱི་བཀའ་སློབ་བཅས་ལུང་འདྲེན་གྱིས་གསུང་བཤད་གནང་ཡོད་པ་དང་།  རིན་པོ་ཆེ་མཆོག་གིས་ད་དུང་༸གོང་ས་༸སྐྱབས་མགོན་ཆེན་པོ་མཆོག་དང་བོད་དོན་ཐོག་སྔ་རྗེས་རྒྱབ་སྐྱོར་གནང་མཁན་ཨོསྟྲེ་ལི་ཡའི་གཞུང་དང་བོད་དོན་རྒྱབ་སྐྱོར་བ་ཡོངས་ལ་ཐུགས་རྗེ་ཆེ་ཞུས་གནང་འདུག་པ་མ་ཟད།  སྐབས་དེར་གདན་ཞུས་སྐུ་མགྲོན་གཞན་ཁག་གཅིག་གིས་དེ་སྔ་སྐུ་མདུན་ཁུལ་དེར་ཆིབས་བསྒྱུར་ཁྲོད་ཀྱི་མཇལ་འཕྲད་སྐོར་དང་འབྲེལ་རང་སོ་སོའི་མྱོང་ཚོར་གསུངས་ཡོད་པ་དང་།  ལྷག་པར་དུ་ཁོང་རྣམས་ནས་༸གོང་ས་མཆོག་དེ་སྔ་ཁུལ་དེར་ཆིབས་བསྒྱུར་རིམ་པ་བསྐྱངས་པ་དེ་དག་གིས་ཁོང་ཚོའི་མི་མང་ཁྲོད་བྱམས་སྙིང་རྗེ་དང་འཚེ་མེད་ཞི་བའི་བསམ་བློ་གོང་མཐོར་ཐད་ཕན་ཐོགས་ཆེན་པོ་བྱུང་ཡོད་སྐོར་གསུངས་འདུག  དེ་བཞིན་ཁོང་རྣམས་ནས་༸གང་ཉིད་མཆོག་ལ་ཆིབས་བསྒྱུར་ཁྲོད་ཞབས་ཞུ་ཕྲན་བུ་བསྒྲུབས་ཐུབ་པ་དེ་དག་ཁོང་རྣམས་ཀྱི་མི་ཚེ་ནང་གོ་སྐབས་རྩ་ཆེན་པོར་རྩིས་ཀྱི་ཡོད་ལ་སྤོབས་པའང་ཡོད་པ་གསུངས་འདུག་པ་མ་ཟད།  ༸གོང་ས་མཆོག་གི་བཀའ་དགོངས་གང་ཐུབ་ལག་ལེན་ཐུབ་པ་གནང་རྒྱུ་དང་སྤྱི་ཚོགས་ཁྲོད་དེ་དག་གོང་འཕེལ་ཐུབ་པར་གང་ཐུབ་འབད་བརྩོན་གནང་གི་ཡིན་བཅས་གསུངས་འདུག རྩ་བའི་ཟླ་འདིའི་ཕྱི་ཚེས་ ༡༢ ཉིན་ཨོ་གླིང་དུ་འཚོགས་པའི་༸གོང་ས་མཆོག་གི་ཆིབས་བསྒྱུར་དང་འབྲེལ་བའི་པར་རིས་ཕྱག་དེབ་ཀྱི་མཛད་སྒོའི་ཐོག་ཨོསྟྲེ་ལི་ཡ་ཨེ་ཤི་ཡའི་སྤྱི་འཐུས་སྐལ་བཟང་ཚེ་རིང་ལགས་ནས་ཀྱང་མཉམ་ཞུགས་ཀྱིས་༸རྒྱལ་བའི་སྐུ་ཚེའི་མཛད་འཕྲིན་སྐོར་དང་༸གང་ཉིད་མཆོག་གིས་འཚེ་མེད་ཞི་བ་དང་གྲོས་མོལ་ཐད་ཀྱི་ཆེད་སེམས་སྐོར་གསུང་བཤད་གནང་ཡོད་པ་མ་ཟད། ཉེ་ལམ་རྒྱ་ནག་གིས་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཡིག་ཟེར་བ་ལག་བསྟར་བྱེད་འགོ་བཙུགས་པའི་སྐོར་དང་དེས་བོད་ཐོག་སྤྱི་ཡོངས་ནས་ཤུགས་རྐྱེན་ཇི་ཡོད་སྐོར་བཅས་གསུངས་འདུག མཛད་སྒོའི་ཐོག་གཞན་ཡང་བོད་པའི་སྒྱུ་རྩལ་བ་གྲགས་ཅན་བསྟན་འཛིན་ཆོས་རྒྱལ་ལགས་གཙོས་པའི་སིཌ་ནི་གཟའ་མཇུག་སློབ་གྲྭའི་བོད་ཕྲུག་རྣམས་ནས་གཞས་སྣ་འཁྲབ་སྟོན་གཟིགས་འབུལ་ཡང་ཞུས་ཡོད་པ་རེད་འདུག The post ཨོ་གླིང་དུ་༸གོང་ས་མཆོག་གི་ཆིབས་བསྒྱུར་དང་འབྲེལ་བའི་པར་རིས་ཕྱག་དེབ་ཅིག་དབུ་འབྱེད་གནང་འདུག appeared first on vot.

ཉེ་ལམ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༩༡ བདག་གིར་བཞེས་པའི་༸སྐུའི་འཁྲུངས་སྐར་གྱི་དུས་ཚིགས་ཁྱད་པར་ཅན་དང་བསྟུན།  རྒྱ་གར་ལྷོ་ཕྱོགས་བྷང་ལོར་ས་གནས་སུ་ལྷོ་སྤྱི་དང་སྒོ་མང་མཁན་རིན་པོ་ཆེ་གཉིས་གཙོས་པའི་འབྲེལ་ཡོད་ལས་བྱེད་ཁག་གཅིག་བཅས་ནས་ཀར་ནཱ་ཊ་ཀ་མངའ་སྡེའི་སྲིད་སྐྱོང་མཆོག་དང་མཇལ་འཕྲད་ཀྱིས།  ༸རྒྱལ་བའི་མཛད་འཕྲིན་དང་བོད་ཀྱི་ཛ་དྲག་གནས་སྟངས་སྐོར་ངོ་སྤྲོད་གནང་འདུག་པ་མ་ཟད།  ཁུལ་དེར་རྟེན་གཞི་བྱས་པའི་མཐོ་སློབ་ཁག་གཅིག་གི་ནང་དེ་འབྲེལ་གཏམ་བཤད་ཀྱི་ལས་རིམ་དང་བོད་ཀྱི་རིག་གཞུང་མཚོན་པའི་གཞས་སྣ་འཁྲབ་སྟོན་གཟིགས་འབུལ་སོགས་ཀྱི་བརྒྱུད་༸རྒྱལ་བའི་འཁྲུངས་སྐར་སྲུང་བརྩི་རྒྱ་ཆེར་ཞུས་འདུག དེ་ཡང་འདི་ག་གསར་ཁང་ལ་འབྲེལ་ཡོད་ཀྱིས་གནས་ཚུལ་མཁོ་སྤྲོད་གནང་བ་གཞིར་བཟུང་ལྟར་ན།  ཉེ་ལམ་ལྷོ་སྤྱི་འཇིགས་མེད་ཚུལ་ཁྲིམས་ལགས་དང་འབྲས་སྤུངས་སྒོ་མང་གྲྭ་ཚང་གི་མཁན་རིན་པོ་ཆེ་འཇིགས་མེད་རྒྱ་མཚོ་ལགས་གཙོ་བོར་གྱུར་བའི་འབྲེལ་ཡོད་ལས་བྱེད་ཁག་གཅིག་བཅས་ནས་རྒྱ་གར་ལྷོ་ཕྱོགས་ཀར་ནཱ་ཊ་ཀ་མངའ་སྡེའི་སྲིད་སྐྱོང་སྐུ་ཞབས་ Thawar Chand Gehlot མཆོག་དང་མཇལ་འཕྲད་ཀྱིས།  ༸རྒྱལ་བའི་མཛད་འཕྲིན་དང་། ༸གང་ཉིད་མཆོག་གི་རླབས་ཆེན་གྱི་དགོངས་གཞི། ད་ལྟའི་བོད་ཀྱི་ཛ་དྲག་གནས་སྟངས་བཅས་ཀྱི་སྐོར་ངོ་སྤྲོད་གནང་ཡོད་པ།  དེ་བཞིན་རྒྱ་གར་གཞུང་དང་ལྷག་དོན་དུ་ཀར་ནཱ་ཊ་ཀ་མངའ་སྡེ་ནས་ད་བར་བོད་མིར་རྒྱབ་སྐྱོར་དང་རོགས་རམ་གནང་བར་དམིགས་བསལ་གྱིས་ཐུགས་རྗེ་ཆེ་ཞུས་གནང་འདུག་ལ།  སྐབས་དེར་མངའ་སྡེའི་སྲིད་སྐྱོང་མཆོག་གིས་ཀྱང་༸རྒྱལ་བའི་འཁྲུངས་སྐར་ལ་འཚམས་འདྲི་དང་འབྲེལ་སྙན་སེང་ཞུས་པའི་གནད་དོན་ཁག་གི་ཐད་ཐུགས་སྣང་ཆེན་པོས་བཀའ་མོལ་གནང་ཡོད་པ་རེད་འདུག  མ་ཟད་ཐེངས་འདིར་བོད་མིའི་སྒྲིག་འཛུགས་ཁྱབ་ཁོངས་ལྷོ་སྤྱི་ལས་ཁུངས་དང བྱེས་ཀྱི་གདན་ས་འབྲས་སྤུངས་སྒོ་མང་གྲྭ་ཚང་གཉིས་ཀྱིས་ཟུང་སྦྲེལ་ཐོག་རྒྱ་གར་ལྷོ་ཕྱོགས་བྷང་ལོར་གྲོང་ཁྱེར་ནང་དུ་ཟླ་འདིའི་ཕྱི་ཚེས་ ༨ ནས་བཟུང་ཉིན་གྲངས་གསུམ་ཙམ་གྱི་རིང་༸རྒྱལ་བའི་འཁྲུངས་སྐར་སྲུང་བརྩིའི་ཆ་ཤས་སུ་གོ་སྒྲིག་ཞུས་པའི་ལས་རིམ་ཁོངས་སུ་གཞན་ཡང་།  ཁུལ་དེར་རྟེན་གཞི་བྱས་པའི་རྒྱ་གར་གྱི་མཐོ་སློབ་ Jyoti Nivas College དང་། Mount Carmel College, St. Joseph’s University, Surana College, V.E.T First Grade College བཅས་སུ་སྒོ་མང་མཁན་རིན་པོ་ཆེ་འཇིགས་མེད་རྒྱ་མཚོ་ལགས་དང་ལྷོ་སྤྱི་འཇིགས་མེད་ཚུལ་ཁྲིམས་ལགས་གཉིས་ནས་༸རྒྱལ་བའི་ཐུགས་སྐྱེད་དམ་བཅའ་བཞིའི་སྐོར་གཙོས་པའི་ཆོས་ལུགས་ལ་མ་བརྟེན་པའི་བཟང་སྤྱོད་སྐོར་དང་།  ལྷག་པར་དུ་ཉེ་ལམ་རྒྱ་ནག་གིས་བཙན་དབང་ཐོག་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཡིག་ཟེར་བ་ལག་བསྟར་བྱས་པའི་སྐོར་དང་།  རྒྱལ་གཅེས་དཔའ་བོ་བློ་དགའ་རང་བཙན་ལགས་སོགས་བོད་ཕྱི་ནང་གཉིས་སུ་དབར་བོད་མི་ ༡༧༠ ཙམ་གྱིས་རྒྱ་ནག་ལ་ངོ་རྒོལ་མཚོན་བྱེད་དུ་རང་ལུས་མེར་བསྲེགས་བཏང་བ་བཅས་བོད་ཀྱི་ཛ་དྲག་གནས་སྟངས་ངོ་སྤྲོད་དང་།  དེ་འབྲེལ་དྲི་བ་དྲི་ལན་གནང་ཡོད་པ་མ་ཟད།  ཀ་ལོན་སྦུག་ནས་ཆེད་མངགས་ཕེབས་པའི་གངས་ལྗོངས་ཟློས་གར་ཚོགས་པའི་ངོས་ནས་བོད་ཀྱི་རིག་གཞུང་མཚོན་པའི་གཞས་སྣ་འཁྲབ་སྟོན་གཟིགས་འབུལ་ཡང་ཞུས་ཡོད་པ་རེད་འདུག དེའི་སྐོར་འདི་གའི་གསར་འགོད་པས་ལྷོ་སྤྱི་འཇིགས་མེད་ཚུལ་ཁྲིམས་ལགས་སུ་བཀའ་འདྲི་ཞུས་ཡོད།  The post རྒྱ་གར་ཀར་ནཱ་ཊ་ཀ་མངའ་སྡེའི་སྲིད་སྐྱོང་མཆོག་ལ་༸རྒྱལ་བའི་མཛད་འཕྲིན་དང་བོད་ནང་གི་ཛ་དྲག་གནས་སྟངས་ངོ་སྤྲོད། appeared first on vot.

དེ་རིང་སྤྲུལ་སྐུ་བསྟན་འཛིན་བདེ་ལེགས་མཆོག་རྒྱ་ནག་གཞུང་གིས་སྐུ་བཀྲོངས་ནས་ལོ་ ༡༡ འཁོར་བའི་ཉིན་མོ་དང་བསྟུན། བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་ No Tongue in Their Mouths: Allegations of Assault in Tenzin Delek Rinpoche’s Death ཞེས་སྤྲུལ་སྐུ་བསྟན་འཛིན་བདེ་ལེགས་དམ་པ་ཁོང་གི་ཚ་མོ་གྲོང་རྟ་ཚང་ཉི་མ་ལྷ་མོ་ལགས་ཀྱིས་བརྩམས་གནང་བའི་བདེ་དོན་གླེང་བའི་གཏམ་ཞེས་པའི་ཕྱག་དེབ་དབྱིན་སྒྱུར་ཞུས་པ་དེ་དབུ་འབྱེད་གནང་སོང་། དེ་ཡང་དེ་རིང་སྔ་དྲོ་ཕྱག་ཚོད་ ༡༡།༣༠ ཐོག་བཞུགས་སྒར་དུ་རྟེན་གཞི་བྱས་པའི་ནོར་བུ་གསོལ་མགྲོན་ཁང་གི་ཚོགས་ཁང་ནང་དུ། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་གོ་སྒྲིག་དང་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གི་ཞབས་ཞུ་ཚོགས་པའི་མཐུན་འགྱུར་འོག བོད་མི་མང་སྤྱི་འཐུས་ཚོགས་གཙོ་སྒྲོལ་མ་ཚེ་རིང་མཆོག་གདན་ཞུས་ཐོག་ནས་དབྱིན་སྒྱུར་ ཕྱག་དེབ་དེ་དབུ་འབྱེད་ཀྱི་མཛད་སྒོ་ཞིག་འཚོགས་སོང་། ཚོགས་གཙོ་སྒྲོལ་མ་ཚེ་རིང་མཆོག་གིས་དེ་རིང་ཉི་མ་ལྷ་མོ་ལགས་ཀྱིས་དབྱིན་སྒྱུར་ཕྱག་དེབ་དེ་དབུ་འབྱེད་དང་འབྲེལ་ནས་གསུང་བཤད་གནང་བའི་ཁྲོད། སྤྲུལ་སྐུ་བསྟན་འཛིན་བདེ་ལེགས་མཆོག་གི་སྐུ་ཚའི་ལོ་རྒྱུས་ཀྱི་གནད་འགག་ཅན་གྱི་གནད་དོན་རྣམས་གསལ་སྟོན་དང་སྦྲགས། ཁོང་ནི་བོད་ནང་གི་བོད་མི་ཚོའི་མནར་གཅོད་ཇི་ཙམ་མྱངས་ཡོད་མིིན་དང་བོད་ཀྱི་ཆོས་དང་རིག་གཞུང་། སྐད་ཡིག་གི་ཆེད་དུ་བློས་གཏོང་ཇི་ཙམ་གནང་ཡོད་མིན་གྱི་བདེན་དཔང་ར་སྤྲོད་གནང་མཁན་ཞིག་ཡིན་པ་ལྟར་ཁོང་ནི་སྙིང་སྟོབས་ཀྱི་དཔའ་བོ་ཞིག་ཡིན་པ་དང་། ང་ཚོས་ཁོང་གི་སྙིང་སྟོབས་དཔེར་བླངས་ཏེ་དོན་མེད་ཀྱི་ཆོལ་ཁ་ཆོས་ལུགས་དབྱེ་འབྱེད་ཀྱི་གནད་དོན་ལ་མགོ་འཁོར་ནས་བསྡད་རྒྱུ་མེད་པར་བོད་མི་རིགས་དང་བོད་ཀྱི་རྩ་དོན་ཆེད་དུ་ཞབས་འདེགས་སྒྲུབ་ཕྱོགས་ཐད་བསམ་བློ་གཏོང་དགོས་གལ་ཡིན་པ་གསུངས་སོང་།   ཁོང་གིས་ད་དུང་དེང་སྐབས་འཛམ་གླིང་གང་སར་རྒྱ་ནག་གི་འཁྱོག་བཤད་དྲིལ་བསྒྲགས་ཤུགས་ཆེ་འགྲོ་བཞིན་པའི་དུས་སྐབས་འདིར། ང་ཚོས་འདི་ལྟ་བུའི་བདེན་དཔང་ར་སྤྲོད་ཀྱི་ཕྱག་དེབ་དེ་དག་གང་མང་འགྲེམས་སྤེལ་གནང་དགོས་པའི་སྐུལ་མ་གནང་སོང་། སྐབས་དེར་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་བསྟན་འཛིན་ཟླ་བ་ལགས་ཀྱིས། ཕྱག་དེབ་འདི་པར་བསྐྲུན་ཞུས་པའི་དགོས་པ་དང་གནད་འགག་སྐོར་ལ་གཏམ་བཤད་སྤེལ་བའི་ཁྲོད། ཉི་མ་ལྷ་མོ་ལགས་ནི་བོད་ནང་རྒྱ་ནག་གཞུང་གིས་བོད་མིའི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གྱི་སྡུག་རྩུབ་ཇི་ཙམ་གཏོང་གི་ཡོད་མིན་གྱི་དཔང་པོ་གལ་ཆེ་ཞིག་ཡིན་པ་དང་འབྲེལ་ནས་ཁོང་གི་བརྩམས་གནང་བའི་ཕྱག་དེབ་དེ་བདན་དཔང་ར་སྤྲོད་ཀྱི་ཐད་ནས་ཧ་ཅང་གལ་ཆེན་པོ་ཆགས་ཀྱི་ཡོད་པ་དང་། ལྟེ་གནས་ཁང་གི་ངོས་ནས་བོད་པའི་མི་རབས་གཞོན་པ་ཚོར་བོད་ནང་གི་དངོས་ཡོད་གནས་སྟངས་དང་བོད་མིའི་དཀའ་སྡུག་དང་བློས་གཏོང་གི་སྐོར་ལ་གོ་རྟོགས་མང་ཙམ་འཕེལ་རྒྱུར་དམིགས་ཏེ་ད་རེས་ཕྱག་དེབ་དེ་པར་བསྐྲུན་ཞུས་ཡོད་པ་གསུངས་སོང་། སྐབས་དེར་མཛད་སྒོའི་ཐོག་ཕེབས་པའི་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གི་ཞབས་ཞུ་ཚོགས་པའི་ཚོགས་གཙོ་དང་ཆབ་སྲིད་བཙོན་ཟུར་དགེ་བཤེས་ཚེ་རིང་རྡོ་རྗེ་ལགས་ཀྱིས། ཁོང་ཐོག་མར་བོད་ནས་རྒྱ་གར་ལ་ཕེབས་པའི་སྐབས་སུ་རང་གི་བླ་མ་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གིས་བཙན་བྱོལ་ནང་དུ་བོད་ཀྱི་རྩ་དོན་ཆེད་དུ་ཕྱག་ལས་གནང་དགོས་པ་དང་། ཆོལ་ཁ་ཆོས་ལུགས་འཐེན་འཁྱེར་གྱི་ལས་དོན་རིགས་སྤེལ་རྒྱུ་མེད་པའི་ཞལ་ཆེམས་སློབ་གསོ་བསྐྱོན་ཡོད་པ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་འབྲེལ་བཀའ་སློབ་རིམ་པ་ཕེབས་ཡོད་པ་ལུང་འདྲེན་དང་སྦྲགས། བོད་མི་ཚང་མས་ཡིད་གཟབ་གནང་དགོས་པའི་སྐུལ་མ་གནང་བ་མ་ཟད། དེ་རིང་གི་མཛད་སྒོའི་ཐོག་བོད་ནང་གི་བོད་མི་ཁག་གཅིག་གིས་དྲྭ་ལམ་བརྒྱུད་བརྡ་ལན་གནང་བ་སྒྲོག་སྦྱང་གནང་སོང་བའི་ནང་དུ། བོད་ནང་གི་བོད་མི་རྣམས་ལ་ངོ་རྒོལ་ཁྲོམ་སྐོར་བྱེད་རྒྱུའི་རང་དབང་མེད་པ་དང་། ལྷག་པར་དུ་སྨྲ་བརྗོད་རང་དབང་རིགས་རྩ་བ་ནས་མེད་པ་དང་། རྒྱ་གཞུང་གིས་མཐའ་ན་བོད་ཀྱི་ས་ཁུལ་གྱི་མིང་ཡང་བརྗེ་པོ་རྒྱག་སྟེ་ངོ་མ་ཤེས་པ་བཟོ་བཞིན་པའི་ཛ་དྲག་གནས་སྟངས་ཡོད་པ་མ་ཟད། བོད་ནང་གི་བོད་མི་ཚོས་བཙན་བྱོལ་བོད་མི་རྣམས་ཀྱི་བོད་དོན་དྲིལ་བསྒྲགས་དང་ལས་འགུལ་སྤེལ་རྒྱུའི་རེ་བ་བློ་གཏད་བཅོལ་བཞིན་ཡོད་པ་དྲན་སྐུལ་གྱིས། བཙན་བྱོལ་བོད་མི་རྣམས་ནས་བོད་པའི་འདུ་ཤེས་ཤེས་པའི་ཐོག་ནས་ཤུགས་རྒྱག་དགོས་པའི་སྐུལ་འདེབས་ཞུས་གནང་འདུག དེ་བཞིན་དེ་རིང་གི་མཛད་སྒོའི་ཐོག་ཧི་མཱ་ལ་ཡའི་ཆོས་རིག་ཉམས་ཞིབ་པ་དང་དགེ་རྒན་རྡོ་རྗེ་རིན་ཆེན་ལགས་ཀྱང་ཆེད་ཕེབས་གནང་ཡོད་པ་ལྟར། ཁོང་ནས་སྤྲུལ་སྐུ་བསྟན་འཛིན་འཛིན་བདེ་ལེགས་རིན་པོ་ཆེའི་སྐོར་སྤེལ་བའི་ཕྱག་དེབ་རིམ་པའི་སྐོར་དང་དེ་དག་གི་གལ་གནད་སྐོར་གསུངས་བཤད་ནན་པོ་གནང་སོང་། The post སྤྲུལ་སྐུ་བསྟན་འཛིན་བདེ་ལེགས་མཆོག་གི་ཚ་མོ་ཉི་མ་ལྷ་མོའི་བདེ་དོན་གླེང་བའི་གཏམ་ཞེས་པའི་དབྱིན་སྒྱུར་ཕྱག་དེབ་དབུ་འབྱེད། appeared first on vot.

དེ་ཡང་ཟླ་འདིའི་ཕྱི་ཚེས་ ༢ ཉིན་ཨ་རི་གྲོང་ཁྱེར་ནིའུ་ཡོག་ཏུ་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ཀྱི་མདུན་དུ་རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱིས་བོད་བསྟན་སྲིད་མི་རིགས་ཀྱི་ཆེད་དུ་སྐུ་ལུས་མེར་བསྲེགས་ཕུལ་བ་དང་བསྟུན། ནིའུ་ཡོག་གཙོས་པའི་ཁེ་ན་ཌ་དང་རྒྱ་གར། ཡོ་རོབ་སོགས་ཀྱི་ནང་ལས་འགུལ་རྣམ་པ་འདྲ་མིན་གྱི་ཐོག་ནས་སྤེལ་དང་སྤེལ་མུས་ཁྲོད། ཨ་རིའི་ནིའུ་ཡོག་དང་ནིའུ་ཇར་སིའི་བོད་རིགས་སྤྱི་མཐུན་ཚོགས་པའི་འགན་འཁུར་འོག་ནིའུ་ཡོག་གི་མཉམ་འབྲེལ་རྒྱལ་ཚོགས་ཀྱི་མདུན་དུ་དཔའ་བོ་དམ་པ་བློ་དགའ་རང་བཙན་ལགས་དང་འབྲེལ་བའི་དྲན་རྟེན་གྱི་འདྲ་སྐུ་ཞིག་བཞེངས་རྒྱུའི་ལས་འགུལ་སྤེལ་མུས་ཡིན་པ་རེད་འདུག དྲན་རྟེན་གྱི་འདྲ་སྐུ་དང་འབྲེལ་བའི་ལས་འགུལ་ནང་ actionnetwork.org ཞེས་པའི་དྲྭ་གནས་ཐོག་མཚན་རྟགས་བསྡུ་རུབ་གནང་བཞིན་འདུག་པས་ད་བར་མི་གྲངས་ ༡༠༥༧༩ ཡི་མཚན་རྟགས་བཀོད་འདུག་པ་དང་། འཆར་གཞི་ལ་གཞིགས་ན་ནིའུ་ཡོག་མཉམ་འབྲེལ་རྒྱལ་ཚོགས་ཀྱི་མདུན་དུ་དཔའ་བོ་བློ་དགའ་རང་བཙན་ལགས་ཀྱི་འདྲ་སྐུ་ཞིག་བཞེངས་རྒྱུ་དང་བོད་ཀྱི་རྒྱལ་དར་ཞིག་སྒྲེང་འཛུགས་གནང་རྒྱུ་ཡིན་པ་མ་ཟད། དཔའ་བོ་དམ་པ་ཁོང་གི་མཐའ་མའི་ཞལ་ཆེམས་དེ་བཞིན་ཚིག་ཐོ་ཐོག་བཀོད་རྒྱུ་ཡིན་པ་རེད་འདུག གནས་ཚུལ་དེ་འབྲེལ་འདི་ག་རླུང་འཕྲིན་ཁང་ལ་ཨ་རིའི་ནིའུ་ཡོག་དང་ནིའུ་ཇར་སིའི་ས་གནས་གཞོན་ནུ་ལྷན་ཚོགས་ཀྱི་ཚོགས་ཟུར་བློ་བཟང་ཚེ་རིང་ལགས་ཀྱིས་བརྗོད་དོན་ལྟར་ན། རེས་གཟའ་ཕུར་བུའམ་བདུན་ཚིགས་རེ་ལ་ས་གནས་གཞོན་ནུ་ལྷན་ཚོགས་ཀྱི་གོ་སྒྲིག་འོག་མཉམ་འབྲེལ་རྒྱལ་ཚོགས་ཀྱི་མདུན་དུ་ལས་འགུལ་འདྲ་མིན་སྤེལ་རྒྱུ་ཡིན་པ་འགྲེལ་བརྗོད་དང་སྦྲགས། བོད་ཀྱི་བུད་མེད་ལྷན་ཚོགས་ནས་ཀྱང་ཟས་བཅད་ངོ་རྒོལ་གྱི་ལས་འགུལ་སྤེལ་རྒྱུ་ཡིན་པ་དང་སྒེར་སོ་སོ་ནས་ཆོས་ཕྱོགས་ཀྱི་ལས་འགུལ་སོགས་སྤེལ་དང་སྤེལ་མུས་ཡིན་པ་མ་ཟད། དཔའ་བོ་དམ་པ་བློ་དགའ་རང་བཙན་ལགས་དང་འབྲེལ་བའི་དྲན་རྟེན་གྱི་འདྲ་སྐུ་ཞིག་བཞེངས་རྒྱུའི་འཆར་གཞི་ཡོད་པ་དང་དེའི་ལས་འགུལ་སྤེལ་མུས་ཡིན་པ་འགྲེལ་བརྗོད་གནང་སོང་། ཕྱོགས་མཚུངས་དཔའ་བོ་བློ་དགའ་རང་བཙན་ལགས་དང་འབྲེལ་བའི་འཛམ་གླིང་ས་ཕྱོགས་གང་སར་ངོ་རྒོལ་གྱི་ལས་འགུལ་སྤེལ་མུས་ཁྲོད། དེ་རིང་རྒྱ་གར་ཀོལ་ཀ་ཊ་རྒྱ་ནག་གཞུང་ཚབ་ཁང་གི་མདུན་དུ་གཞུང་ཁོངས་མ་ཡིན་པའི་ཚོགས་པ་ཁག་གཅིག་མཉམ་སྦྲེལ་ཐོག་ངོ་རྒོལ་གྱི་ལས་འགུལ་སྤེལ་འདུག་པ་དང་། ཡོ་རོབ་དང་ཁེ་ན་ཌ་གཙོས་པའི་ས་ཕྱོགས་གང་སར་དཔའ་བོ་དམ་པ་ཁོང་དང་འབྲེལ་བའི་མཆོས་འབུལ་སྨོན་ལམ་དང་མར་མེ་ཁྲོམ་སྐོར་སོགས་ཀྱི་བརྒྱུད་ནས་ཁོང་ཉིད་རྗེས་དྲན་གནང་བཞིན་པ་རེད་འདུག སྤྱིར་རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱིས་རྒྱལ་ཚོགས་མདུན་དུ་རང་ལུས་མེར་བསྲེགས་བརྒྱུད་རང་ཉིད་ཀྱི་གཅེས་པའི་ལུས་སྲོག་བློས་བཏང་གི་ལས་འགུལ་དེ་བཞིན་རྒྱ་ནག་གིས་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཡིག་ཟེར་བ་དངོས་སུ་ལག་བསྟར་བྱེད་འགོ་ཚུགས་ནས་ཉིན་གཅིག་གི་རྗེས་སུ་སྤེལ་བ་ཞིག་ཆགས་ཡོད། ཨ་རིར་རྟེན་གཞི་བྱས་པའི་རྒྱལ་སྤྱི་བོད་དོན་ལས་འགུལ་ཁང་གིས་རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱིས་བློས་བཏང་ལ་མྱ་ངན་གུས་འདུད་དང་འབྲེལ། མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཟེར་བ་དེའི་བརྒྱུད་ནས་བོད་ཀྱི་ཆོས་དང་རིག་གཞུང་སོགས་རྩ་མེད་དུ་གཏོང་རྒྱུའི་ཉེན་ཁ་ཡོད་པ་འགྲེལ་བརྗོད་ཀྱིས། མཚན་རྟགས་བསྡུ་རུབ་ཀྱི་ལས་འགུལ་བརྒྱུད་ནས་ཨ་རིའི་གྲོས་ཚོགས་འཐུས་མི་རྣམས་ལ་ཞུ་གཏུགས་ཀྱི་ལས་འགུལ་དབུ་འཛུགས་གནང་འདུག དེིའི་ཁྲོད་བོད་དོན་ལས་འགུལ་ལྟེ་གནས་ཁང་གི་ངེས་སྟོན་པ་བཀྲས་མཐོང་ལྷ་སྒྲོན་ལགས་ཀྱིས་ངོ་དེབ་བརྒྱུད་བསྒྲགས་གཏམ་ཞིག་སྤེལ་བའི་ནང་། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གཙོ་འཛིན་ Volker Turk ལགས་ཀྱིས་ད་བར་བོད་ནང་གི་འགྲོ་བ་མིའི་ཐོབ་ཐང་དང་ལྷག་པར་དུ་རྒྱ་ནག་གིས་བཙན་དབང་ཐོག་ལག་བསྟར་བྱེད་བཞིན་པའི་བཅའ་སྡོད་སློབ་གྲྭའི་སྐོར་ཚིག་གཅིག་ཀྱང་བཤད་མེད་པ་ནན་བརྗོད་དང་སྦྲགས། བོད་རིགས་གཙོ་བོར་འགྱུར་བའི་འགྲོ་བ་མིའི་ཐོབ་ཐང་རྩོད་ལེན་པ་རྣམས་ཀྱི་མཚན་རྟགས་བསྡུ་རུབ་ཀྱི་ལས་འགུལ་ཞིག་སྤེལ་འདུག་པ་དང་། ད་བར་མི་གྲངས་ ༡༦༦༠ ཡི་མཚན་རྟགས་བཀོད་ཟིན་པ་རེད་འདུག The post རྒྱལ་ཚོགས་ཀྱི་མདུན་དུ་དཔའ་བོ་བློ་དགའ་རང་བཙན་ལགས་ཀྱི་དྲན་རྟེན་འདྲ་སྐུ་བཞེངས་རྒྱུའི་ལས་འགུལ་སྤེལ་བཞིན་པ། appeared first on vot.

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ལ་དྭགས་བྱང་ཐང་ཁུལ་དུ་འཚམས་གཟིགས་ཀྱིས་མང་ཚོགས་ལ་གསུང་བཤད་གནང་བའི་ཁྲོད།   ཁུལ་དེར་འཛུགས་སྐྲུན་གྱི་ལས་གཞི་གང་དང་གང་ཡིན་རུང་མ་འོངས་ཕུགས་རྒྱང་རིང་པོར་དམིགས་ཏེ་འཆར་གཞི་ལྡན་པའི་འོག་ནས་སྤེལ་དགོས་པ་དང་།  ལ་དྭགས་གླེ་བྱང་ཚུད་པའི་བོད་མིའི་རུབ་སྡོད་ས་ཁུལ་ཆ་ཚང་ཚགས་ཚུད་དགོས་གལ་ཡིན་པ་མ་ཟད།  སྤྱི་ནོར་༸གོང་༸སྐྱབས་མགོན་ཆེན་པོ་མཆོག་གི་མཛད་འཕྲིན་ལ་ངེས་པར་དུ་བཀའ་དྲིན་རྗེས་དྲན་ཞུ་དགོས་པའི་སྐུལ་མ་གནང་འདུག  རྩ་བའི་ཉེ་ལམ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༩༡ བདག་གིར་བཞེས་པའི་༸སྐུའི་འཁྲུངས་སྐར་ལ་དྭགས་སུ་སྲུང་བརྩི་གཟབ་རྒྱས་དང་བསྟུན།  བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ནས་གསར་དུ་འདེམས་ཐོན་བྱུང་བའི་བཀའ་ཤག་སྐབས་བཅུ་བདུན་པའི་ཚབ་བྱས་ཏེ་ཁུལ་དེར་ཆེད་ཕེབས་ཀྱིས། ལ་དྭགས་བསོད་ནམས་གླིང་བོད་མིའི་གཞིས་ཆགས་དང་། བོད་ཕྲུག་ཁྱིམ་སྡེ། རྒས་གསོ་ཁང་བཅས་སུ་འཚམས་གཟིགས་གནང་ཡོད་པ་དང་།  ཕྱི་ཚེས་ ༩ ཉིན་སྲིད་སྐྱོང་མཆོག་ནས་ལ་དྭགས་བྱང་ཐང་ཉོ་མར་འཚམས་གཟིགས་ཀྱིས་མི་མང་ལ་གསུང་བཤད་གནང་ཡོད་པ་མ་ཟད།  ཕྱི་ཚེས་ ༡༠ ཉིན་ལ་བྱང་བཀག་གཞུང་དང་། རྒོད་ཡུལ། ཧན་ལེ་བཅས་སུ་འཚམས་གཟིགས་དང་འབྲེལ་མང་ཚོགས་ལ་གསུང་བཤད་གནང་ཡོད་པ།  ལྷག་པར་དུ་ཐེངས་འདིའི་ལ་བྱང་ཁུལ་དུ་འཚམས་གཟིགས་དེ་བཞིན་སླར་ཡང་སྲིད་སྐྱོང་དུ་འདེམས་ཐོན་བྱུང་བའི་སྤེན་པ་ཚེ་རིང་མཆོག་གིས་འཚམས་གཟིགས་གནང་བ་ཐེངས་གསུམ་པ་དེ་ཆགས་ཀྱི་ཡོད་པ་རེད།  སྲིད་སྐྱོང་སྤེན་པ་ཚེ་རིང་མཆོག་གིས་ལ་དྭགས་བྱང་ཐང་གི་མང་ཚོགས་ལ་གནད་དོན་མང་དག་ཅིག་གི་ཐོག་གསུང་བཤད་གནང་བའི་ཁོངས་སུ་གཙོ་བོ།  སྲིད་སྐྱོང་མཆོག་གིས་ཐེངས་འདིར་གླེ་བྱང་ཁུལ་དུ་རྟོག་ཞིབ་ཁྲོད་ས་གནས་དེར་ཡར་རྒྱས་གང་ལ་གང་ཙམ་ཕྱིན་ཡོད་པ་མངོན་རྒྱུ་འདུག་སྐོར་དང་འབྲེལ།  བོད་མིའི་སྒྲིག་འཛུགས་ཀྱི་ཕྱག་ལས་ནང་ནས་གལ་ཆེ་བ་གཅིག་ནི་གཞུང་དང་མི་མང་བར་འབྲེལ་བ་ཡག་པོ་ཉར་ཚགས་བྱ་རྒྱུ་དེ་ཡིན་པས།  བཀའ་ཤག་སྐབས་བཅུ་བདུན་པའི་ངོས་ནས་བོད་མིའི་འདུ་སྡོད་ས་གནས་ཁག་ཏུ་དེ་སྔོན་ལྟར་ཐེངས་གཉིས་རེ་འཚམས་གཟིགས་གནང་རྒྱུ་གལ་ཆེན་དོན་ཆེན་དུ་བརྩི་ཡི་ཡོད་པ་དང་།  བཙན་བྱོལ་སྤྱི་ཚོགས་ཀྱི་རྨང་གཞི་དེ་བཞིན་བོད་མིའི་གཞིས་ཆགས་དང་རུབ་སྡོད་ས་ཁུལ་རེ་རེ་ཡན་ཆད་ཀྱིས་མཚོན་གྱི་ཡོད་པ་མ་ཟད།  དེས་སྤྱི་ཡོངས་ཀྱི་བོད་མིའི་སྒྲིག་འཛུགས་ཀྱང་རང་བཞིན་གྱི་ཡག་པོ་ཞིག་ཆགས་རྒྱུ་ཡིན་དུས།  གླེ་བྱང་ཚུད་པའི་བོད་མིའི་རུབ་སྡོད་ས་ཁུལ་ཁག་ཚགས་ཚུད་དགོས་གལ་དང་།  གང་ལྟར་ཁུལ་འདིར་འཛུགས་སྐྲུན་གྱི་ལས་གཞི་གང་ཞིག་སྤེལ་གྱི་ཡོད་པ་དེ་དག་མ་འོངས་ལོ་མང་པོར་དམིགས་ཏེ་འཆར་གཞི་ལྡན་པའི་ཐོག་ནས་གནང་དགོས་པ་གསུངས་འདུག  ལྷག་པར་དུ་རྒྱལ་སྤྱིའི་སྤྱི་ཚོགས་ནས་ད་བར་བོད་མིའི་སྒྲིག་འཛུགས་ལ་དཔལ་འབྱོར་གྱི་རོགས་རམ་མཚོན་པའི་སྲིད་སྐྱོང་ལ་གུས་ཞབས་སྣེ་ལེན་གང་ཐོབ་ཀྱི་ཡོད་པ་དེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་ཉག་ཅིག་ལ་བརྟེན་ནས་ཡོང་གི་ཡོད་པ་དང་།  ༸མགོན་པོ་མཆོག་གིས་བཀའ་དགོངས་དབུ་མའི་ལམ་གྱི་གནད་འགག་སྐོར་ངོ་སྤྲོད་གནང་བ་མ་ཟད།  ༸གང་ཉིད་མཆོག་གི་ཐུགས་སྐྱེད་དམ་བཅའ་བཞི་སྟེ་དུས་ཀྱི་དགོས་མཁོ་དང་མཐུན་པའི་བཀའ་སློབ་ལམ་སྟོན་ཤ་སྟག་ཡིན་པ་དང་།  ༸གོང་ས་མཆོག་གིས་བོད་བརྒྱུད་ནང་བསྟན་ཏེ་བྱམས་སྙིང་རྗེ་དང་འཚེ་བ་མེད་པའི་རྩ་བ་ཚུགས་པའི་བསམ་བློའི་འཁྱེར་སོ་ཞིག་ཡིན་དུས་དེས་འཛམ་གླིང་ཡོངས་ལ་ཕན་ཐོགས་སྒྲུབ་ཐུབ་ཀྱི་ཡོད་པ་སོགས་བཀའ་སྩལ་མཛད་ཀྱི་ཡོད་པ་དག་ལ་དོ་སྣང་གནང་དགོས་པའི་དྲན་སྐུལ་གྱིས།  ༸གོང་ས་མཆོག་དགུང་གྲངས་ ༡༣༠ ལྷག་སྐུ་འཚོ་བཞུགས་མཛད་རྒྱུའི་ཞལ་བཞེས་ཡོད་ཀྱང་དེར་བླ་སློབ་ཀྱི་དམ་ཚིག་ཡག་པོ་དགོས་གལ་ཡིན་པ་དང་།  ༸མགོན་པོ་མཆོག་གིས་མུ་མཐུད་མཛད་པ་འཕྲིན་ལས་སྐྱོང་བཞིན་པ་ཁག་ལ་མི་མང་ཚོས་བཀའ་དྲིན་རྗེས་དྲན་ཞུ་དགོས་གལ། དེ་བཞིན་ང་རང་ཚོའི་བཙན་བྱོལ་སྤྱི་ཚོགས་ནང་གི་གནས་ཚུལ་ཆུང་ཆུང་རིགས་ཀྱིས་༸སྐུ་མདུན་ཐུགས་སུན་པོ་བཟོ་མི་དགོས་པ་ཞིག་ངེས་པར་དུ་གནང་དགོས་པ་གསུངས་འདུག་ལ།  ༸གང་ཉིད་སྐུ་འཚོ་བཞུགས་མེད་པའི་དུས་སུ་བོད་མིའི་སྒྲིག་འཛུགས་ལ་ད་ལྟ་བཞིན་ཆེ་མཐོང་མུ་མཐུད་ཐོབ་པའི་རེ་བ་དང་ང་ཚོའི་ངོས་ནས་ཀྱང་༸གོང་ས་མཆོག་གིས་སོན་བཏབ་གནང་མཛད་པའི་མང་གཙོའི་ལམ་ལུགས་མུ་མཐུད་རྒྱུན་སྐྱོང་ཐུབ་པ་གནང་དགོས་གལ་ཡིན་པ་གསུངས་འདུག  ལྷག་པར་དུ་སྲིད་སྐྱོང་མཆོག་གིས་མང་ཚོགས་ལ་བོད་ཀྱི་སྣོད་ཀྱི་བྱུང་རབས་ལོ་རྒྱུས་དང་དེང་དུས་རྒྱལ་སྤྱིའི་ས་ཁམས་ཆབ་སྲིད་སྐོར་ངོ་སྤྲོད་དང་འབྲེལ།  ད་ལྟའི་རྒྱ་ནག་རྒྱལ་ཁབ་སྟེ་ཕྱི་ཕྱོགས་ནས་བལྟས་ན་སྟོབས་ཤུགས་ཆེན་པོ་ཞིག་ཏུ་སྣང་གི་ཡོད་ཀྱང་སྲིད་གཞུང་ནང་ལོག་ལ་དཔོན་རིགས་ཕན་ཚུན་དོགས་པ་རྣམ་རྟོག་གི་ཁེངས་ཡོད་པ་མ་ཟད།  ཆབ་སྲིད་སོགས་གང་སྤྱིའི་ཐད་ནས་ཕྱི་གསལ་ནང་གསལ་མེད་པ་སོགས་ཐེར་འདོན་གྱིས།  ཉེ་ལམ་རྒྱ་ནག་གིས་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཡིག་ལག་བསྟར་བྱས་པའི་སྐོར་གསུངས་ཏེ།  ད་ལྟའི་རྒྱ་ནག་གིས་བྱེད་བབ་ལ་བལྟས་ན་སྐད་ཆ་བཤད་སའི་ལམ་ཁ་མེད་པ་དེ་ལྟར་ཡང་སྒོ་རྒྱབ་ཀྱི་འབྲེལ་བ་མུ་མཐུད་རྒྱུན་སྐྱོང་གནང་བཞིན་ཡོད་པ་གསུངས་འདུག མ་ཟད་སྲིད་སྐྱོང་མཆོག་གིས་ད་ལྟ་བྱང་ཐང་ཉོ་མར་ཁྱིམ་ཚང་ ༣༡ དང་། རྒོད་ཡུལ་དུ་ ༢༥། ཧན་ལེར་ཁྱིམ་ཚང་ ༨༦ བཅས་བྱང་ཐང་ཁུལ་གྱི་ས་ཁུལ་བཞིའི་ནང་གྲོང་པ་ ༢༠༠ ཙམ་ཡོད་པའི་གནས་སྟངས་གསལ་འདོན་དང་འབྲེལ།  ཁུལ་དེར་ཡུལ་སྐོར་སྤྲོ་འཆམ་པ་མང་དུ་འགྲོ་ཡི་ཡོད་པ་དང་།  བོད་མི་གནས་སྤོས་གནང་མཁན་ཡང་ཕྲན་བུ་འབྱུང་གི་ཡོད་དུས།  […] The post སྲིད་སྐྱོང་མཆོག་གིས་ལ་དྭགས་བྱང་ཐང་ཁུལ་དུ་འཚམས་གཟིགས་ཁྲོད་བོད་མིའི་རུབ་སྡོད་ས་ཁུལ་ཁག་ཚགས་ཚུད་དགོས་གལ་ཡིན་པ་གསུངས་འདུག appeared first on vot.

བོད་དོན་ལ་ཡུན་རིང་རྒྱབ་སྐྱོར་གནང་མཁན་ཨ་རིའི་གྲོས་ཚོགས་འཐུས་མི་ Lindsey Graham ལིནྜ་སི་གྷ་ར་ཧམ་ལགས་འདི་ཚེས་ ༡༡ ཉིན་སྙུང་གཞི་རྐྱེན་པས་དགུང་ལོ་ ༧༡ ཐོག་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་ཐོན་འདུག དེ་ཡང་དམ་པ་ཁོང་གིས། དེ་སྔོན་ཕྱི་ལོ་ ༢༠༢༠ ལོར་བོད་དོན་རྒྱབ་སྐྱོར་གྱི་ཁྲིམས་ཡིག་ Tibet Policy and Support Act 2020 དང་། ༢༠༢༤ ལོར་བོད་རྒྱའི་རྩོད་རྙོག་སེལ་ཐབས་ཀྱི་ཁྲིམས་ཡིག Resolve Tibet Act བཅས་ལ་རྒྱབ་སྐྱོར་གནང་ཡོད་པ་དང་། ཉེ་ལམ་ཕྱི་ཟླ་ ༦ ཚེས་ ༢༥ ཉིན་ཨ་རིར་རྟེན་གཞིས་བྱས་པའི་རྒྱ་ནག་གཞུང་ཚབ་ལ་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཡིག་ཟེར་བ་དེས་བོད་མི་སོགས་ཀྱི་སྐད་ཡིག་དང་རིག་གཞུང་ཐད་ཉེན་འཚབ་ཆེ་བས་ཕྱིར་བསྡུ་དགོས་པའི་དགོས་འདུན་བཏོན་མཁན་ཁོངས་སུ་ཡོད་པ་རེད། མ་ཟད་ཕྱི་ལོ་ ༢༠༡༨ ལོའི་སྲིད་འཛིན་ Trump ཊོམཔ་ཀྱིས་འཆར་འབུལ་ཞུས་པའི་ཨ་རིའི་སྔོན་རྩིས་ཁྲོད་བོད་མི་ཚོར་རོགས་དངུལ་སྤྲོད་རྒྱུ་མཚམས་འཇོག་གནང་འཆར་ལ་གྲོས་ཚོགས་ནས་རྒྱབ་སྐྱོར་གནང་རྒྱུ་མེད་པའི་ཞུ་སྙན་བསྡུ་རུབ་ཀྱི་ལས་འགུལ་ཞིག་སྤེལ་བའི་སྐབས། དམ་པ་ཁོང་ཨ་རིའི་གྲོས་ཚོགས་འཐུས་མི་དང་གྲོས་ཚོགས་ཀྱི་སྔོན་རྩིས་བསྐྱར་ཞིབ་ཚོགས་ཆུང་གི་ཚོགས་མི་ཡིན་པ་སོགས་བོད་དོན་ལ་ཡུན་རིང་ནས་རྒྱབ་སྐྱོར་གནང་མཁན་ཞིག་ཡིན་པ་རེད་འདུག རྩ་བའི་དམ་པ་ཁོང་ནི་ཕྱི་ལོ་ ༡༩༥༥ ལོར་སྐྱེས་ཤིང་། ཕྱི་ལོ་ ༢༠༠༣ ནས་བཟུང་འདས་གྲོངས་སུ་མ་གྱུར་བར་ South Carolina ལྷོ་ཀེ་རོ་ལི་ནཱའི་ཁུལ་གྱི་གྲོས་ཚོགས་འཐུས་མི་ཞིག་ཡིན་པ་རེད་འདུག ཕྱོགས་མཚུངས་ཕྱི་ཚེས་ ༡༡ ཉིན་བོད་ཀྱི་ཟློས་གར་ཚོགས་པའི་སྒྱུ་རྩལ་སློབ་ཁྲིད་འགན་འཛིན་ཟུར་པ་རྒན་བློ་བཟང་བསམ་གཏན་ལགས་དགུང་ལོ་ ༦༩ སྟེང་ཀེ་ལི་ཕོར་ནི་ཡའི་སྨན་ཁང་ཞིག་གི་ནང་དུ་སྐུ་ཚེའི་མ་ཟིན་པའི་ཡིད་སྐྱོའི་གནས་ཚུལ་ཐོན་འདུག་པ་དང་། དེ་རིང་བོད་ཀྱི་ཟློས་གར་ཚོགས་པའི་གཞུང་འབྲེལ་དྲ་ཚིགས་ཐོག་སྤེལ་བའི་གནས་ཚུལ་ནང་གསལ་ལྟར་ན། བོད་ཀྱི་ཟློས་གར་ཚོགས་པའི་དབུ་ལས་ཚོགས་མི་ཡོངས་ནས་བསྔོ་སྨོན་གསོལ་འདེབས་དང་གདུང་སེམས་མཉམ་སྐྱེད་ཞུས་འདུག རྩ་བའི་རྒན་བློ་བཟང་བསམ་གཏན་དམ་པ་དེ་ཉིད་ཕྱི་ལོ་ ༡༩༥༧ ལོར་གཙང་གྲུམ་པ་གླིང་དཀྱིལ་ཞེས་པའི་ཁྱིམ་ཚང་དུ་ཕ་སངས་རྒྱས་རྡོ་རྗེ་དང་། […] The post བོད་དོན་རྒྱབ་སྐྱོར་བ་ཨ་རིའི་གྲོས་ཚོགས་འཐུས་མི་ཞིག་དང་བོད་ཀྱི་ཟློས་གར་ཚོགས་པའི་སྒྱུ་རྩལ་སློབ་ཁྲིད་འགན་འཛིན་ཟུར་པ་གཉིས་སྐུ་ཚེ་མ་ཟིན་པའི་ཡིད་སྐྱོའི་གནས་ཚུལ་ཐོན་འདུག appeared first on vot.

ཕྱི་ལོ་ ༢༠༢༦ ཟླ་བ་ ༧ ཚེས་ ༦ ནས་ ༨ བར་ཉིན་གྲངས་གསུམ་རིང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་རྗེས་དྲན་དང་། འཛམ་གླིང་ཞི་བདེ་ལ་དམིགས་པའི་ཡུ་རོབ་ཆོ་འཕྲུལ་སྨོན་ལམ་ཆེན་མོ་ཐེངས་དང་པོ་དེ་ཧྥ་རན་སིའི་རྒྱལ་ས་པེ་རི་སིར་འཚོགས་འདུག ལོ་རྒྱུས་རང་བཞིན་ལྡན་པའི་ཆོ་འཕྲུལ་སྨོན་ལམ་ཆེན་མོ་དེར་༸སྐྱབས་རྗེ་དགའ་ལྡན་ཁྲི་རིན་པོ་ཆེ་མཆོག་དང་། མཚུངས་མེད་ཤར་བྱང་ཆོས་རྗེ་རྣམ་པ་གཉིས་གཙོས་པའི་རིས་མེད་ཀྱི་སྐྱེས་ཆེན་དམ་པ་ཁག་གཅིག་དབུ་བཞུགས་གནང་འདུག་ལ། ཡུ་རོབ་ཁུལ་དུ་ཆོ་འཕྲུལ་སྨོན་ལམ་ཆེན་མོ་གོ་སྒྲིག་ཞུ་དགོས་པའི་དམིགས་ཡུལ་གཙོ་བོ་དེ། ནང་པ་སངས་རྒྱས་པའི་བསྟན་པ་དར་ཞིང་རྒྱས་པ་དང་། ལྷག་པར་ཡུ་རོབ་ཁུལ་དུ་འཛམ་གླིང་དམག་ཆེན་གཉིས་ཀྱི་སྐབས་སུ་རྐྱེན་འདས་སུ་ཕྱིན་པ་དང་། ནད་ཡམས་དབང་གིས་ཚེ་ལས་འདས་པ་ཡོངས་ལ་བསྔོ་སྨོན་དང་། འཛམ་གླིང་ཞི་བདེ་ཡོང་བའི་ཆེད་དུ་ཡིན་པ་གོ་སྒྲིག་ཚོགས་ཆུང་ནས་འགྲེལ་བརྗོད་གནང་གི་འདུག The post ཧྥ་རན་སིའི་རྒྱལ་ས་པེ་རི་སིར་ཡུ་རོབ་ཆོ་འཕྲུལ་སྨོན་ལམ་ཆེན་མོ་ཐེངས་དང་པོ་སྐོང་འཚོགས། appeared first on vot.

ཁ་སང་ཨ་རིའི་ནང་གི་ཕྱི་ཚེས་ ༩ ཉིན་རྒྱབ་ནིའུ་ཡོག་ཏུ་ཡོད་པའི་རྒྱལ་ཚོགས་ལས་ཁུངས་ཀྱི་རྒྱལ་སྒོའི་མདུན་དུ་བོད་མི་ལས་འགུལ་བ་གསུམ་ནས་རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱི་བློས་བཏང་ལ་དྲང་བདེན་དགོས་པའི་དགོས་འདུན་ཐོག་ངོ་རྒོལ་ལས་འགུལ་སྤེལ་འདུག དེ་ཡང་ཁ་སང་རྒྱལ་གཅེས་དཔའ་བོ་བློ་དགའ་རང་བཙན་ལགས་དམ་པའི་བདུན་ཚིགས་དང་པོར་རྗེས་དྲན་ཞུ་ཕྱིར་ཉིན་རྒྱབ་ཕྱག་ཚོད་ ༣.༢༥ ཙམ་ལ་ཨ་རི་བོད་རང་བཙན་སློབ་ཕྲུག་ཚོགས་པ་ནས་ཚེ་ལྷ་ རྫོགས་སངས་ལགས་དང་། བསྟན་འཛིན་དཀོན་མཆོག་ལགས། བསྟན་འཛིན་ཚེ་བརྟན་ལགས་བཅས་གསུམ་གྱིས་ཕྱག་ཏུ་རྒྱལ་གཅེས་པ་བློ་དགའ་ལགས་ཀྱིས་བོད་རང་བཅན་ཆེད་སྐུ་ལུས་མེར་བསྲེགས་གནང་བ་དང་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་ནས་བོད་ཐོག་ཁ་ཁུ་སིམ་པོར་སྡོད་རྒྱུ་མཚམས་འཇོག་དགོས་པ་སོགས་ཀྱི་དགོས་འདུན་སྦྱར་ཡིག་རྣམས་འཕྱར་བཞིན་རྒྱལ་ཚོགས་ཀྱི་ལས་ཁུངས་ལྕགས་ཁྲའི་རྒྱལ་སྒོར་རང་ཉིད་ལྕགས་ཐག་གིས་བཅིངས་ནས་རྒྱལ་སྒོའི་འགྲོ་ལམ་བཀག་འགོག་གིས་ངོ་རྒོལ་སྐད་འབོད་གནང་སྐབས་ཉེན་རྟོག་པས་ལས་འགུལ་བ་གསུམ་པོ་འཛིན་བཟུང་གིས་ཆུ་ཚོད་ ༤ བཀར་ཉར་རྗེས་གློད་བཀྲོལ་བཏང་འདུག  དེའི་སྐོར་ཨ་རི་བོད་རང་བཙན་སློབ་ཕྲུག་ཚོགས་པའི་འགན་འཛིན་བསྟན་འཛིན་སྨིན་ལེགས་ལགས་སུ་དེ་རིང་སྔ་དྲོ་ཞལ་པར་བརྒྱུད་བཀའ་འདྲི་ཞུས་ཡོད། ཐེངས་འདིའི་ངོ་རྒོལ་ལས་འགུལ་དང་འབྲེལ་ཨ་རི་བོད་རང་བཙན་སློབ་ཕྲུག་ཚོགས་པས་གསར་འགོད་བསྒྲགས་གསལ་བསྒྲགས་ཤིག་འདོན་སྤེལ་གནང་བའི་བརྒྱུད། བོད་མི་གཞོན་སྐྱེས་ཚོས་འཛམ་གླིང་མཉམ་འབྲེལ་རྒྱལ་ཚོགས་དང་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་གཙོ་འཛིན་སྐུ་ཞབས་ Volker Türk ལགས་སུ་བོད་ཀྱི་གནད་དོན་ཐོག་ཁ་ཁུ་སིམ་པོར་སྡོད་རྒྱུ་མེད་པ་དང་རྒྱལ་ཚོགས་ཀྱིས་གནད་འགག་ཆེ་བའི་དུས་སྐབས་འདིར་རྒྱལ་གཅེས་དཔའ་བོ་བློ་དགའ་རང་བཙན་ལ་དྲང་བདེན་གྱི་རྒྱབ་སྐྱོར་མཚོན་པའི་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐད་ཡ་ལན་གང་ཡང་མ་བྱས་སྟབས། གོ་ལ་ཡོངས་ལ་བོད་དོན་ཐོག་ལས་འགུལ་སྤེལ་དགོས་པའི་སྐུལ་མ་གནང་བཞིན་ཡོད་ལ། ལྷག་པར་དུ་རྒྱལ་གཅེས་པ་བློ་དགའ་རང་བཙན་ལགས་དམ་པའི་སྙིང་སྟོབས་ཀྱིས་འཛམ་གླིང་ཡོངས་ཀྱི་བོད་མི་ཚོར་སེམས་ཤུགས་སྤོར་བཞིན་ཡོད་པས་ཁོང་ཚོས་ཀྱང་བོད་ཀྱི་གནད་དོན་ཐད་རང་ཉིད་ཀྱི་ལས་དོན་སྒྲུབ་རྒྱུ་ཡིན་ཞེས་ནན་བཤད་གནང་འདུག ཁ་སང་རྒྱལ་ཚོགས་ཀྱི་རྒྱལ་སྒོའི་མདུན་དུ་ལྕགས་ཐག་གིས་བཅིངས་ནས་ངོ་རྒོལ་གནང་མཁན་ཁོངས་སུ་ཡོད་པ་ཨ་རི་བོད་རང་བཙན་སློབ་ཕྲུག་ཚོགས་པའི་ལས་འགུལ་བ་ཚེ་ལྷ་རྫོགས་སངས་ལགས་ཀྱིས་གསར་འགོད་པའི་དྲི་བར་ལན་འདེབས་ཁྲོད། རྒྱ་ནག་གིས་ལོ་ངོ་བཅུ་ཕྲག་མང་པོའི་རིང་བོད་ལ་དམ་དྲག་ཤུགས་ཆེ་བྱས་ཡོད་ལ། བོད་མི་ ༡༧༠ ལྷག་གིས་རྒྱ་གཞུང་ལ་ངོ་རྒོལ་གྱིས་སྐུ་ལུས་མེར་བསྲེགས་གནང་སྟེ་ཉིན་ཞིག་རང་དབང་ལྡན་པའི་བོད་ཅིག་མཐོང་ཐུབ་པའི་རེ་འདུན་བཅངས་ཡོད་སྐོར་གསུངས་པ་མ་ཟད། ཟླ་བ་འདིའི་ཕྱི་ཚེས་ ༡ ནས་གཞུང་འབྲེལ་གྱིས་ལག་བསྟར་བྱེད་འགོ་བཙུགས་པའི་རྒྱ་ནག་གི་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཟེར་བ་དེ་མི་རིགས་བཙན་སྒྱུར་གྱི་སྲིད་བྱུས་ཤིག་ཡིན་པས་བོད་མིའི་ངོ་བོར་ཉེན་ཁ་ཆེན་པོ་བཟོ་བཞིན་ཡོད་པར་སྐྱོན་བརྗོད་གནང་འདུག སྐབས་དེར་ལས་འགུལ་ནང་མཉམ་ཞུགས་གནང་མཁན་ཁེ་ན་ཌར་གནས་བཞུགས་བོད་མི་ལས་འགུལ་བ་འཆི་མེད་ལྷ་མོ་ལགས་ཀྱིས་མཉམ་འབྲེལ་རྒྱལ་ཚོགས་ཀྱིས་ཡང་ནས་ཡང་དུ་བོད་དང་བོད་ནང་གི་གནས་སྟངས་ཇི་བྱུང་ཐད་བརྗེད་པ་དང་སྣང་མེད་གཏོང་བཞིན་པར་འགྱུར་བ་འདོད་ཀྱི་ཡོད་པ་ནན་བརྗོད་དང་སྦྲགས། རྒྱལ་ཚོགས་ལ་བོད་ནང་བཀམ་སྡོམ་མེད་པའི་འགྲོ་འོང་དང་ཞིབ་འཇུག་བྱེད་ཆོག་པའི་རང་དབང་སྤྲོད་དགོས་པའི་རེ་སྐུལ་ཞུས་པ་མ་ཟད། རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་གཙོ་འཛིན་ལ་བོད་ནི་རྒྱལ་ཁབ་ཅིག་ཡིན་པས་གྲངས་ཉུང་མི་རིགས་ཤིག་མིན་པས་ངེས་པར་དུ་བོད་སྐོར་གླེང་དགོས་པ་བརྗོད་འདུག རྩ་བའི་ཁ་སང་ནིའུ་ཡོག་བོད་མི་ལས་འགུལ་བ་གསུམ་གྱིས་རྒྱལ་ཚོགས་ཀྱི་ལས་ཁུངས་མདུན་དུ་ངོ་རྒོལ་གནང་བཞིན་པའི་དུས་ཡུན་སྐར་མ་འགའ་ཤས་རྗེས་ནིའུ་ཡོག་དང་ནིའུ་ཇར་སི་ས་གནས་བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲོག་འོག་ས་གནས་བོད་མི་མང་ཚོགས་ནས་ས་ཚིགས་དེ་རང་དུ་དགོང་དྲོ་ཆུ་ཚོད་ ༤ ནས་ ༧ པའི་བར་ངོ་རྒོལ་སྐད་འབོད་ཀྱི་ལས་འགུལ་ཤུགས་ཆེ་སྤེལ་བའི་བརྒྱུད་རྒྱལ་གཅེས་པ་བློ་དགའ་རང་བཙན་ལགས་དམ་པའི་བདུན་ཚིགས་དང་པོར་རྗེས་དྲན་ཞུས་འདུག  The post ནིའུ་ཡོག་བོད་མི་ལས་འགུལ་བ་གསུམ་གྱིས་རྒྱལ་ཚོགས་ཀྱི་ལས་ཁུངས་མདུན་དུ་ལྕགས་ཐག་བཅིངས་ནས་ངོ་རྒོལ་གནང་བ། appeared first on vot.

ཨ་རིའི་རྒྱལ་ས་ཝ་ཤིང་ཊོན་ཌི་སི་ནང་དུ་ཡུལ་དེའི་ཕྱི་སྲིད་ལས་ཁུངས་ཁྱབ་ཁོངས་བོད་དོན་དམིགས་བསལ་འབྲེལ་མཐུད་པ་མཆོག་དབུ་བཞུགས་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༩༡ ལ་ཕེབས་པའི་༸སྐུའི་འཁྲུངས་སྐར་སྲུང་བརྩི་ཞུས་འདུག དེ་ཡང་རྒྱལ་སྤྱིའི་བོད་དོན་ལས་འགུལ་ཁང་གིས་གནས་ཚུལ་སྤེལ་བར་གཞིགས་ན། ཁ་སང་ཕྱི་ཚེས་ ༩ ཉིན་བྱང་ཨ་རིའི་སྐུ་ཚབ་དོན་ཁང་དུ་གོ་སྒྲིག་ཞུས་པའི་མཛད་སྒོ་དེའི་ཐོག་སྐུ་མགྲོན་དུ་ཨ་རིའི་བོད་དོན་དམིགས་བསལ་འབྲེལ་འཐུད་པ་སྐུ་ཞབས་ Riley Barnes མཆོག་དང་། བྱང་ཨ་རིའི་སྐུ་ཚབ་དོན་གཅོད་རྣམ་རྒྱལ་ཆོས་འགྲུབ་ལགས། དེ་བཞིན་རྒྱལ་སྤྱིའི་བོད་དོན་ལས་འགུལ་ཁང་གི་ཚོགས་གཙོ་བསྟན་ཆོས་རྒྱ་མཚོ་ལགས་ཀྱི་གཙོས་གཞུང་དང་གཞུང་ཁོངས་མིན་པའི་ཚོགས་པ་ཁག་གི་སྐུ་ཚབ་རྣམ་པ། ས་གནས་ཀྱི་མི་མང་སོགས་མཉམ་ཞུགས་གནང་འདུག མཛད་སྒོའི་ཐོག་ཨ་རིའི་བོད་དོན་དམིགས་བསལ་འབྲེལ་འཐུད་པ་སྐུ་ཞབས་ Riley Barnes མཆོག་གིས། ད་ལན་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཁུངས་སྐར་སྲུང་བརྩི་ཞུ་རྒྱུའི་གོ་སྐབས་ཐོབ་པ་དེར་དགའ་སྤོབས་པ་དང་སྦྲགས། ད་དུང་ཡང་མ་འོངས་པར་མུ་མཐུད་ནས་ད་ལན་གྱི་འཁྲུངས་སྐར་གྱི་མཛད་སྒོ་དེ་བཞིན་མང་པོ་འཚོགས་རྒྱུ་བྱུང་བའི་རེ་བ་ཡོད་ཅེས་གསུངས་པ་དང་འབྲེལ། ༸གོང་ས་༸སྐྱབས་མགོན་ཆེན་པོ་མཆོག་གི་འཁྲུངས་སྐར་ལ་འཚམས་འདྲི་ཞུས་པ་མ་ཟད། ༸གང་ཉིད་མཆོག་གི་སྙིང་རྗེ་དང་གཏོང་ཕོད། བརྩེ་བ་ལྡན་པའི་ཐུགས་ཀྱི་ཡོན་ཏན་སྐོར་ལ་བཀའ་སློབ་གནང་འདུག དེ་བཞིན་བྱང་ཨ་རིའི་སྐུ་ཚབ་དོན་གཅོད་རྣམ་རྒྱལ་ཆོས་འགྲུབ་ལགས་ཀྱིས་མཛད་རིམ་འདི་ལྟ་བུ་ནི་༸གོང་ས་མཆོག་གི་འཁྲུངས་སྐར་གྱི་དུས་ཚིགས་ཁོ་ན་སྲུང་བརྩི་ཞུ་རྒྱུ་ཙམ་མ་ཡིན་པར། གཙོ་བོ་༸གང་ཉིད་མཆོག་གི་འཚེ་མེད་ཞི་བ་དང་ཆོས་ལུགས་མཐུན་སྒྲིལ། དེ་བཞིན་མིའི་བཟང་སྤྱོད་ཀྱི་རིན་ཐང་གོང་མཐོར་སོགས་དང་འབྲེལ་བའི་ཐུགས་ཀྱི་དགོངས་པ་གོང་འཕེལ་སླད་དམིགས་བསལ་གྱི་གནད་འགག་ཆེན་པོ་ཆགས་ཡོད་སྐོར་གསུངས་པ་མ་ཟད། ༸གང་ཉིད་ཀྱི་དགོངས་པ་དེ་དག་ནི་དེང་གི་དུས་སྐབས་སུ་ཧ་ཅང་དགོས་མཁོ་ཆེན་པོ་ཡིན་པ་ནན་བརྗོད་གནང་འདུག ཕྱོགས་མཚུངས་རྒྱལ་སྤྱི་བོད་དོན་ལས་འགུལ་ཁང་གི་ཚོགས་གཙོ་བསྟན་ཆོས་རྒྱ་མཚོ་ལགས་ཀྱིས་ད་ལན་འཛམ་གླིང་ས་ཕྱོགས་གང་སར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཁྲུངས་སྐར་གཟབ་རྒྱས་ངང་སྲུང་བརྩི་ཞུ་བཞིན་པ་ཡིན་ཡང་། ཉེ་ཆར་རྒྱལ་ཚོགས་ཀྱི་མདུན་དུ་རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱིས་སྐུ་ལུས་མེར་བསྲེགས་བཏང་བའི་གནས་ཚུལ་དེས་བོད་པའི་སྤྱི་ཚོགས་ཡོངས་ལ་སེམས་སྡུག་ཆེན་པོ་ཞིག་བཟོས་ཡོད་པ་འགྲེལ་བརྗོད་དང་སྦྲགས། ཁོང་གི་བློས་བཏང་དེའི་བརྒྱུད་ནས་བོད་མི་ཡོངས་ཀྱིས་རེ་བ་མ་བརླག་པར་བྱམས་བརྩེའི་ཐོག་ནས་བོད་ཀྱི་བདེན་མཐའ་གསལ་ཆེད་མུ་མཐུད་ནས་འཐབ་རྩོད་གནང་རྒྱུ་ནན་སྐུལ་ཞུས་ཡོད་པ་མ་ཟད། ད་ལན་བོད་མི་ཡོངས་ཀྱིས་མྱ་ངན་ཞུ་བཞིན་པའི་ཐོག་༸གོང་ས་༸སྐྱབས་མགོན་ཆེན་པོ་མཆོག་གི་འཚེ་མེད་ཞི་བའི་ལམ་ལ་བཞུགས་རྒྱུའི་སེམས་ཤུགས་གསར་པ་ཞིག་བསྐྲུན་ཡོད་པ་གསུངས་འདུག རྩ་བའི་ཟླ་འདིའི་ཕྱི་ཚེས་ ༦ ཉིན་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༩༡ བདག་གིར་བཞེས་པའི་༸སྐུའི་འཁྲུངས་སྐར་དེ་བཞིན་འཛམ་གླིང་ཡོངས་ལ་སྲུང་བརྩི་གཟབ་རྒྱས་ངང་ཞུས་ཡོད་པ་མ་ཟད། སྐབས་དེར་རྒྱལ་སྤྱིའི་དབུ་ཁྲིད་སོགས་ནས་མགོན་པོ་༸གང་ཉིད་མཆོག་ལ་འཚམས་འདྲི་ཞུས་ཡོད་པའི་ཁྲོད།  ཨ་རིའི་བོད་དོན་དམིགས་བསལ་འབྲེལ་འཐུད་པ་སྐུ་ཞབས་ Riley Barnes མཆོག་ནས་ཀྱང་ X སྤྱི་ཚོགས་དྲྭ་ལམ་བརྒྱུད་༸གོང་ས་༸སྐྱབས་མགོན་ཆེན་པོ་མཆོག་གི་འཁྲུངས་སྐར་ལ་འཚམས་འདྲི་དང་སྦྲགས། ཁོང་ཉིད་ཀྱིས་མུ་མཐུད་ནས་བོད་ཀྱི་ཆོས་དང་རིག་གཞུང་། སྐད་ཡིག་བཅས་ཉམས་པ་སོར་ཆུད་དང་མི་ཉམས་རྒྱུན་འཛིན་གྱི་ཐད་མུ་མཐུད་རྒྱབ་སྐྱོར་དང་ཤུགས་སྣོན་གནང་རྒྱུ་ཡིན་པ་གསུངས་ཡོད་པ་རེད། The post ཨ་རིའི་བོད་དོན་དམིགས་བསལ་འབྲེལ་འཐུད་པ་མཉམ་ཞུགས་ཐོག་༸སྐུའི་འཁྲུངས་སྐར་སྲུང་བརྩི། appeared first on vot.