Voice of Tibet

ཉེ་ལམ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་གཞོན་ནུ་ཚོར་མྱོ་རྫས་ངན་གོམས་དང་འབྲེལ་བའི་ཡིག་ཐོག་གསུང་འཕྲིན་ཞིག་སྩལ་ཡོད་པ་དང་།  དེ་འབྲེལ་ལ་དྭགས་གཞོན་སྐྱེས་ཁག་གཅིག་གིས་༸གང་ཉིད་མཆོག་གི་བཀའ་སློབ་ལམ་སྟོན་དེ་དག་ཡིག་ཐོག་ཁོ་ནར་ལུས་སུ་མ་བཅུག་པར་ངེས་པར་དུ་རང་སོ་སོའི་མི་ཚེའི་ཁྲོད་ལག་བསྟར་དགོས་པའི་གཞེན་སྐུལ་གནང་འདུག  དེ་ཡང་༸གོང་ས་མཆོག་ལ་ལ་དྭགས་ཞི་བའི་ཚལ་ཕོ་བྲང་དུ་མང་མཇལ་སྐབས།  ལ་དྭགས་གཞོན་ནུ་ཁག་གཅིག་གིས་སེམས་ངལ་སོགས་ཀྱི་བདེ་སྡུག་འདྲ་མིན་སྐོར་བཀའ་འདྲི་ཞུས་ཡོད་པ་དང་།  དེ་དག་ཁོངས་ནས་གཅིག་གིས་ཡུལ་དེའི་ནང་གི་གཞོན་སྐྱེས་ཁྲོད་མྱོ་རྫས་རྐྱེན་པས་དཀའ་ངལ་འཕྲད་མཁན་ཇེ་མང་དུ་འགྲོ་བཞིན་པའི་སྐོར་བཀའ་འདྲི་ཞུས་ཡོད་པར།  དེ་འབྲེལ་༸གོང་ས་༸སྐྱབས་མགོན་ཆེན་པོ་མཆོག་གིས་དྲྭ་རྒྱའི་སྟེང་ཡིག་ཐོག་གསུང་འཕྲིན་ཞིག་སྩལ་ཡོད་པའི་ནང་།  མྱོ་རྫས་ལོངས་སུ་སྤྱོད་པའི་གནོད་སྐྱོན་གྱི་རང་བཞིན་དང་དེ་ནི་གོམས་གཤིས་ངན་པ་ཞིག་ཡིན་པ་ཤེས་རྟོགས་དགོས་རྒྱུ་གལ་ཆེན་པོ་ཡིན་པ་མ་ཟད།  ནམ་ཞིག་མྱོ་རྫས་བེད་སྤྱོད་བྱེད་པའི་མཇུག་འབྲས་སྐོར་བསམ་གཞིག་བྱེད་ན།  དེས་སྡུག་བསྔལ་ཁོ་ན་ལས་ཡོང་གི་མེད་པ་མངོན་གསལ་ཡིན་སྐོར་བཀའ་སྩལ་འདུག་པ་དང་།  མྱོ་རྫས་ངན་གོམས་ལས་བཅོས་ཐབས་དང་དྲག་སྐྱེད་ཀྱི་ལམ་དུ་གནས་རྒྱུ་དེར་དངོས་ནས་ཀྱི་སྙིང་སྟོབས་དང་ཆོད་སེམས་བརྟན་པོ་དགོས་པ་མཁྱེན་གྱི་ཡོད་སྐོར་དང་།  དཀའ་ངལ་དེ་དག་ལས་ཐར་བར་བྱེད་མཁན་གཞོན་སྐྱེས་ཡོངས་ལ་ཡིད་རངས་བསྔགས་བརྗོད་ཡོད་ཅེས།  ལ་དྭགས་གཞོན་ནུ་ཚོའི་ངོས་ནས་མྱོ་རྫས་ལོངས་སུ་སྤྱོད་རྒྱུར་འཛེམ་དགོས་པ་དང་།  ངན་གོམས་དེའི་རྐྱེན་པས་དཀའ་ངལ་འཕྲད་བཞིན་པ་ཡོངས་ལ་མྱུར་དུ་བདེ་ཐང་དང་དོན་སྙིང་ལྡན་པའི་མི་ཚེ་སྐྱིད་པོ་ཞིག་སྐྱེལ་ཐུབ་པའི་སྨོན་ལམ་འདེབས་ཀྱིན་ཡོད་པ་བཀའ་སྩལ་འདུག འདི་ག་རླུང་འཕྲིན་ཁང་གི་བཅར་འདྲིར་དང་ལེན་ཁྲོད་ལ་དྭགས་གཞོན་སྐྱེས་ཁག་གཅིག་གིས་ཉེ་ལམ་༸གོང་ས་མཆོག་གི་མྱོ་རྫས་ངན་གོམས་སོགས་དང་འབྲེལ་བའི་གསུང་འཕྲིན་དེའི་སྐོར་ཁོང་རྣམས་ཀྱིས།  ༸གོང་ས་༸སྐྱབས་མགོན་ཆེན་པོ་མཆོག་ལ་ཐུགས་འགན་གྲངས་ལས་འདས་པ་ཡོད་ཀྱང་།  ༸གང་ཉིད་མཆོག་གིས་ཐུགས་བརྩེ་བ་ཆེན་པོས་ལ་དྭགས་གཞོན་སྐྱེས་ཚོའི་བདེ་སྡུག་ཆ་ཚང་གསན་བཞེས་ཀྱིས་དུས་མཐུན་འོས་ཤིང་འཚམས་པའི་ཐབས་ལམ་སྟོན་གནང་མཛད་པ་དེར་ཐུགས་རྗེ་ཆེ་ཞུས་ཀྱི་བཀའ་དྲིན་རྗེས་དྲན་ཞུས་པ་མ་ཟད།  གསུང་འཕྲིན་ནང་དམིགས་བསལ་གྱིས་༸གོང་ས་མཚོག་ནས་རང་གཅེས་འཛིན་གྱི་བློ་དོར་ཏེ་གཞན་གཅེས་འཛིན་གྱི་བློ་ཇི་ལྟར་གོང་འཕེལ་གཏོང་དགོས་པ་སོགས་སེམས་ལ་སྦྱོང་བརྡར་སྤྲད་དགོས་གལ་སྐོར་གྱི་བཀའ་སློབ་ལམ་སྟོན་ཕེབས་ཡོད་པ་དེ་དུས་ལ་བབས་པ་ཞིག་རེད་འདུག་ཅེས་གསུངས་འདུག  མ་ཟད་བདེ་བ་ངོ་མ་དེ་སེམས་ཀྱི་ཞི་བདེ་དང་གཞན་ཕན་གྱི་བསམ་བློ་ནས་ཡོང་གི་ཡོད་སྐོར་བཀའ་སློབ་ལམ་སྟོན་སྩལ་བ་དེ་ལ་དྭགས་མི་མང་ལ་ཧ་ཅང་གི་གལ་ཆེན་པོ་ཆགས་ཀྱི་ཡོད་པ།  ལྷག་པར་དུ་༸གོང་ས་མཆོག་གིས་བཀའ་སློབ་ལམ་སྟོན་ལྟར་སྡུག་བསྔལ་ཅི་འདྲ་ཞིག་ཡིན་རུང་མཐར་ཐུག་ན་ནང་སེམས་ལ་རག་ལས་ཀྱི་ཡོད་པ་དང་།  ལ་དྭགས་གཞོན་སྐྱེས་ཚོའི་ངོས་ནས་ཀྱང་གཞི་རྩའི་ལྟ་གྲུབ་ཤེས་ཀྱི་ཡོད་ཀྱང་གཙོ་བོ་ལག་ལེན་ལ་ཐུག་ཡོད་པ་དང་།  སྤྱིར་དེང་དུས་སྤྱི་ཚོགས་དྲྭ་རྒྱ་སོགས་ཀྱི་རྣམ་གཡེང་གི་གནས་སྟངས་འོག་བཀའ་སློབ་དེ་དག་ལག་བསྟར་གནང་རྒྱུ་ཁག་པོ་ཏན་ཏན་ཡོད་རེད་དེ།  གོམ་པ་རེ་རེ་བྱས་ཏེ་སྤོ་ནས་རིམ་པས་གང་ཟག་བྱམས་བརྩེ་ལྡན་པ་དྲང་པོ་ཞིག་ཏུ་འགྱུར་རྒྱུར་འབད་བརྩོན་བྱས་ན།  དེ་ནི་༸གང་ཉིད་མཆོག་ལ་ལེགས་སྐྱེས་ཡག་ཤོས་ཤིག་རེད་ལ།   མ་འོངས་ལ་དྭགས་དེ་བཞིན་བདེ་སྐྱིད་བདེ་ཐང་ལྡན་པ་ཞིག་ཏུ་འགྱུར་རྒྱུར་རེ་བ་འཆང་གི་ཡོད་པ་གསུངས་འདུག  དེ་བཞིན་ཉེ་ལམ་༸གོང་ས་མཆོག་གིས་གསུང་འཕྲིན་ནང་དམིགས་བསལ་གྱིས་ལ་དྭགས་གཞོན་ནུ་ཚོས་མྱོ་རྫས་ལོངས་སུ་སྤྱོད་རྒྱུ་འཛེམ་དགོས་པའི་སྐོར་བཀའ་མངགས་སྩལ་བའི་སྐོར་དང་འབྲེལ།  མྱོ་རྫས་བེད་སྤྱོད་བྱས་ན།  རང་སོ་སོའི་འཕྲོད་བསྟེན་ལ་གནོད་པ་ཙམ་མིན་པར།  ནང་མི་སྤུན་མཆེད་ཡོངས་རྫོགས་གཏོར་བཤིག་གཏོང་གི་ཡོད་པ་དང་།  ༸གོང་ས་༸སྐྱབས་མགོན་ཆེན་པོ་མཆོག་གིས་དེ་འབྲེལ་གསུང་འཕྲིན་སྩལ་བ་དེ་ནི་བཀའ་སློབ་ལམ་སྟོན་ཙམ་མིན་པར།  དེ་དག་ང་ཚོས་ཇི་ལྟར་ལག་བསྟར་དགོས་པའི་སྐུལ་མ་ཞིག་ཀྱང་ཡིན་ལ།  ༸གང་ཉིད་མཆོག་གིས་བཀའ་སྩལ་ལྟར།  མྱོ་རྫས་ལོངས་སུ་སྤྱོད་མཁན་ཚོར་མཐོང་ཆུང་གི་ལྟ་སྟངས་ཤིག་འཁྱེར་རྒྱུ་མེད་པ་དང་།  ཁོང་རྣམས་ལ་བྱམས་དང་བརྩེ་བས་སྒོ་ནས་དེ་ལས་ཐར་བར་བྱེད་པར་རོགས་རམ་བྱེད་དགོས་པ་མ་ཟད།  གང་ཟག་སུ་འདྲ་ཞིག་ཡིན་རུང་ཚང་མ་ལ་ཡར་རྒྱས་གཏོང་རྒྱུའི་ཐོབ་ཐང་ཡོད་པ་སོགས་ཀྱི་དྲན་སྐུལ་གྱིས།  ང་ཚོ་ཚང་མས་རང་སོ་སོའི་སེམས་དྭངས་མ་དེའེི་ཐོག་ནས་སྔར་ལས་ལྷག་པའི་མི་བཟང་པོ་ཞིག་ཏུ་འགྱུར་ཐུབ་པར་འབད་བརྩོན་གནང་དགོས་པ་གསུངས་འདུག  སྤྱིར་ཐེངས་འདའི་བཅར་འདྲི་ཁྲོད་ལ་དྭགས་གཞོན་ནུ་གཅིག་གིས་ཉེ་ལམ་༸གོང་ས་མཆོག་གི་གསུང་འཕྲིན་དེ་ཉིད་ལ་དྭགས་གཞོན་ནུ་ཁོ་ནར་དམིགས་པ་ཞིག་མ་ཡིན་པར་དེ་ནི་འཛམ་གླིང་ཀུན་ལ་ཁྱབ་པ་ཞིག་ཡིན་སྐོར་གསུངས་ཡོད་སྟབས།  འདི་ག་རླུང་འཕྲིན་ཁང་ལ་ཁུལ་དེར་གནས་སྡོད་བོད་མི་གཅིག་གིས།  ཐེངས་འདིའི་༸གོང་ས་མཆོག་གི་གསུང་འཕྲིན་དེའི་ནང་གཙོ་བོ་ལ་དྭགས་གཞོན་ནུ་ཁྲོད་སེམས་ངལ་དང་མྱོ་རྫས་ལངས་ཤོར་སྐོར་བཀའ་སློབ་ལམ་སྟོན་སྩལ་ཡོད་པར།  ༸གང་ཉིད་མཆོག་གིས་བཀའ་མངགས་ལྟར་དེ་དག་གི་རྒྱུ་རྐྱེན་ཕལ་ཆེ་བ་བཟང་སྤྱོད་དང་གཞན་ཕན་གྱི་སེམས་མ་འདང་བའི་རྒྱུ་མཚན་གྱིས་ཡོང་གི་ཡོད་དུས།  ང་ཚོའི་མི་རབས་རྒན་པ་ཚོའི་ངོས་ནས་ཐུགས་འགན་བཞེས་ཏེ་གཞོན་སྐྱེས་ཁྲོད་རིན་ཐང་དེ་དག་གོང་འཕེལ་ཐད་ཤུགས་སྣོན་རྒྱག་དགོས་གལ་ཡིན་པ་གསུང་གི་འདུག  གཞི་རྩའི་༸གོང་ས་མཆོག་གིས་ཉེ་ལམ་ནས་ལ་དྭགས་གཞོན་སྐྱེས་ཚོར་མང་མཇལ་སྩལ་གནང་མཛད་ཀྱི་ཡོད་པ་ལྟར།  ཁ་ཉིན་ཕྱི་ཚེས་ ༢༥ ཉིན་མཇལ་བཅར་ཞུས་མཁན་ཁོངས་སུ་ལ་དྭགས་ནང་གི་གཞོན་སྐྱེས་གཞས་པ་གྲགས་ཅན་གྲས་དང་མྱོ་རྫས་ངན་གོམས་སྤངས་ཟིན་པའི་གཞོན་ནུ་ཁག་གཅིག་གིས་༸གང་ཉིད་མཆོག་ལ་མྱོ་རྫས་ལོངས་སུ་སྤྱོད་རྒྱུ་མཚམས་འཇོག་བྱེད་ཡིན་སྐོར་སྙན་སེང་ཞུས་པར་༸གོང་ས་མཆོག་གིས་ཀྱང་ཐུགས་རྗེ་ཆེ་ཞེས་བཀའ་སྩལ་ཡོད་པ་དང་།  གཞོན་ནུ་དེ་དག་ཁོངས་ནས་གཅིག་གིས་འདི་ག་རླུང་འཕྲིན་ཁང་གིས་བཅར་འདྲིར་དང་ལེན་ཁྲོད།  ཁོང་མྱོ་རྫས་ལ་ཧ་ཅང་ལངས་ཤོར་ཕྱིན་ཏེ་སྤང་ཐུབ་ཡག་མེད་མཁན་གྱི་གང་ཟག་ཅིག་ཏུ་གྱུར་ཡོད་ནའང་།  རིམ་པས་ནང་མིའི་སེམས་འཚབ་དང་སོ་སོའི་འཕྲོད་བསྟེན་ལ་གཞིགས་ཏེ།  ད་ཡིན་ན་སྤང་དགོས་འདུག་བསམ་བྱུང་ཅེས།  དུས་དེ་ནས་བཟུང་ནང་མིར་དམ་བཅའ་བཞག་སྟེ་དགོན་པར་མཆོད་མཇལ་གྱིས་རིམ་པས་དུག་རྫས་ལོངས་སུ་སྤྱོད་རྒྱུ་མཚམས་འཇོག་བྱས་ཡིན་ཅེས་དང་།   ཁག་གཅིག་གིས་མྱོ་རྫས་ངན་གོམས་ཤོར་ཚར་ན་དུས་ནམ་ཡང་སྤང་ཐུབ་ཀྱི་མ་རེད་ཅེས་བཤད་མཁན་ཡོད་ཀྱང་།  དེ་ནི་ནོར་འཁྲུལ་ཆེན་པོ་ཞིག་ཡིན་པ་དང་།  འཇིག་རྟེན་འདིའི་ནང་ཅི་ཞིག་བྱ་དགོས་བསམ་ན་བྱེད་ཐུབ་ཡག་མེད་པ་གཅིག་ཀྱང་མི་འདུག་ཅེས།  ད་ལྟ་ཁོང་མྱོ་རྫས་ལོངས་སུ་སྤྱོད་རྒྱུ་མཚམས་འཇོག་བྱས་ཟིན་དུས།  ནང་མི་ལྷན་དུའང་སྙིང་ཉེ་བོར་གྱུར་ཡོད་པ་དང་།  སྤྱི་ཚོགས་ཁྲོད་མང་ཚོགས་ཀྱིས་ཀྱང་རྒྱབ་བཤད་མེད་པར་ལྟ་སྟངས་ཡག་ཏུ་ཕྱིན་པ་གཙོས་པའི་བསྟོད་ར་གཏོང་གི་ཡོད་དུས་སེམས་པའང་སྐྱིད་པོ་འདུག་ཅེས་གསུང་གི་འདུག་ལ།  […] The post ལ་དྭགས་གཞོན་སྐྱེས་ཚོས་༸གོང་ས་མཆོག་གི་མྱོ་རྫས་ངན་གོམས་དང་འབྲེལ་བའི་གསུང་འཕྲིན་ལག་བསྟར་དགོས་པའི་གཞེན་སྐུལ་གནང་འདུག appeared first on vot.

རིང་མིན་བལ་ཡུལ་དུ་འཚོག་གཏན་ཁེལ་བའི་རྒྱལ་སྤྱིའི་བོད་རིག་པའི་ཞིབ་འཇུག་ཚོགས་པའི་ཚོགས་འདུ་ཐེངས་བཅུ་བདུན་པའི་ཐོག་རྒྱ་ནག་གི་གནོན་ཤུགས་འོག་བོད་མིའི་སྒྲིག་འཛུགས་ཀྱི་སྐུ་ཚབ་ཉམས་ཞིབ་པ་བཅར་རྒྱུ་ཕྱིན་འཐེན་བྱས་པའི་གནས་ཚུལ་ཐོན་ཡོད་ནའང་། བོད་མིའི་སྒྲིག་འཛུགས་ཀྱི་ཉམས་ཞིབ་པ་རྣམ་པ་སྔར་སྲོལ་བཞིན་ཞིབ་འཇུག་ཚོགས་འདུར་བཅར་གཏན་ཁེལ་ཡོད་པའི་སྐོར་བོད་ཀྱི་སྲིད་བྱུས་ཉམས་ཞིབ་ཁང་གི་འབྲེལ་ཡོད་ཉམས་ཞིབ་པ་ཞིག་གིས་གསལ་བཤད་གནང་སོང་། དེ་ཡང་འདི་ལོའི་ཟླ་བ་བརྒྱད་པའི་ནང་བལ་ཡུལ་གྱི་རྒྱལ་ས་ཀ་ཐ་མན་གྲུར་རྒྱལ་སྤྱིའི་བོད་རིག་པའི་ཞིབ་འཇུག་ཚོགས་པའི་ཚོགས་འདུ་ཐེངས་བཅུ་བདུན་པ་འཚོག་གཏན་ཁེལ་བར། བལ་ཡུལ་གནས་འཁོད་རྒྱ་ནག་གི་གཞུང་ཚབ་ཀྱིས་ཞིབ་འཇུག་ཚོགས་འདུའི་ཐོག་རྒྱ་ནག་ལ་སྐྱོན་བརྗོད་དང་། བོད་དོན་ཆབ་སྲིད་གླེང་སྲིད་པའི་བློ་འཚབ་བསྟན་ནས། བལ་ཡུལ་གཞུང་ནས་ཚོགས་འདུའི་བརྗོད་བྱར་བྱ་ར་སྟངས་འཛིན་དགོས་པའི་འབོད་སྐུལ་བྱས་པའི་རྗེས། བལ་ཡུལ་དང་རྒྱ་གར་གྱི་གསར་ཁང་ཁག་ཅིག་གི་ཐོག་རྒྱལ་སྤྱིའི་བོད་རིག་པའི་ཚོགས་འདུའི་ཐོག་བོད་མིའི་སྒྲིག་འཛུགས་ཀྱིས་ཉམས་ཞིབ་པ་གཞུང་འབྲེལ་ངོ་བོའི་ཐོག་ནས་གཏང་རྒྱུ་མིན་པའི་ཐག་གཅོད་བྱས་ཡོད་ལུགས་ཀྱི་གནས་ཚུལ་ཐོན་ཡོད། འོན་ཀྱང་། བོད་ཀྱི་སྲིད་བྱུས་ཉམས་ཞིབ་ཁང་གིས་དེ་ལྟ་བུའི་ཐག་གཅོད་ཅིག་བྱས་མེད་པ་དང་། གཞུང་འབྲེལ་ཉམས་ཞིབ་པ་རྣམས་སྔར་སྲོལ་བཞིན་དུ་ཚོགས་འདུར་བཅར་གཏན་ཁེལ་ཡོད་པ་བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་ཞིག་གིས་འདི་ག་གསར་ཁང་ལ་འགྲེལ་བརྗོད་གནང་བྱུང་། བལ་ཡུལ་གྱི་གསར་ཁང་ Nepalkhabar གྱིས་གནས་ཚུལ་སྤེལ་བ་ལྟར་ན། བལ་ཡུལ་ཐོག་རྒྱ་ནག་གི་གནོན་ཤུགས་དང་། ཚོགས་འདུར་བར་ཆད་མི་ཡོང་བའི་ཆེད་དུ་བལ་ཡུལ་དུ་འཚོག་འཆར་ཡོད་པའི་རྒྱལ་སྤྱིའི་བོད་རིག་པའི་ཚོགས་འདུའི་ཐོག་བོད་མིའི་སྒྲིག་འཛུགས་ཀྱིས་ཉམས་ཞིབ་པ་གཞུང་འབྲེལ་ངོ་བོའི་ཐོག་ནས་གཏང་རྒྱུ་མིན་པའི་ཐག་གཅོད་བྱས་ཡོད་པ་དང་། དེ་སྔོན་དེབ་སྐྱེལ་བྱས་ཟིན་པའི་ཉམས་ཞིབ་པ་རྣམས་སྒེར་གྱི་ངོ་བོའི་ཐོག་ནས་ཚོགས་འདུར་བཅར་འཐུས་ཚུལ་སྐོར་གནས་ཚུལ་སྤེལ་འདུག བོད་མིའི་སྒྲིག་འཛུགས་ནས་བོད་རིག་པའི་ཚོགས་འདུའི་ནང་གཞུང་འབྲེལ་ཉམས་ཞིབ་པ་གཏང་རྒྱུ་མ་ཟད། བོད་མིའི་སྒྲིག་འཛུགས་བོད་ཀྱི་སྲིད་བྱུས་ཉམས་ཞིབ་ཁང་ནས་ཚོགས་འདུར་བོད་རིགས་ཉམས་ཞིབ་པ་གཞན་གང་མང་བཅར་ཐུབ་ཐབས་སུ་དམིགས་ཏེ། བོད་རིགས་ཚོགས་བཅར་བ་མི་གྲངས་ ༢༥ ལ་ལམ་གྲོན་དང་ཁང་གླའི་ཆེད་ཧིན་སྒོར་ ༥༠,༠༠༠ རེ་གནང་རྒྱུུའི་གསལ་བསྒྲགས་དེ་སྔོན་ནས་སྤེལ་ཟིན་ཡོད།   རྒྱ་ནག་གཞུང་ནས་བལ་ཡུལ་དུ་ཚོགས་གཏན་ཁེལ་བའི་བོད་རིག་པའི་ཚོགས་འདུའི་ཐོག་རྒྱ་ནག་གཞུང་གི་བཤད་ཚུལ་དང་མི་མཐུན་པའི་ལོ་རྒྱུས་དང་། སྤྱི་ཚོགས་ཆབ་སྲིད་ཀྱི་གནད་དོན་གླེང་སློང་བྱ་རྒྱུར་བཀག་སྡོམ་བྱ་རྒྱུའི་ཆེད། ཚོགས་འདུ་དེར་བློ་འཚབ་ཡོད་སྐོར་གྱི་ཉེན་བརྡ་སྔོན་ཚུད་ནས་བཏང་བ་ཞིག་ཡིན་པ་དང་། ལྷག་པར་དུ་༸གོང་ས་སྐུ་ཕྲེང་བཅུ་བཞི་པའི་ཡང་སྲིད་གནད་དོན་དེ་རྒྱལ་སྤྱིའི་སྟེང་གླེང་གཞི་གལ་གནད་ཆེན་པོ་ཞིག་ཏུ་གྱུར་ཡོད་སྟབས། རྒྱ་ནག་གཞུང་གིས་བལ་ཡུལ་གྱི་ཚོགས་འདུའི་ནང་དུའང་སྐུའི་ཡང་སྲིད་དང་འབྲེལ་བའི་གནད་དོན་གླེང་སྲིད་པའི་འཇིགས་སྣང་བྱེད་ཀྱི་ཡོད་པ་གནད་དོན་དབྱེ་ཞིབ་པས་འགྲེལ་བརྗོད་གནང་གི་འདུག རྒྱ་གཞུང་གིས་རྒྱལ་སྤྱིའི་ཐོག་བོད་རིག་པའི་ཞིབ་འཇུག་ཚོགས་འདུའི་གལ་གནད་ཆེ་མཐོང་དང་། ཚོགས་བཅར་བའི་གྲངས་འབོར་མང་དུ་འགྲོ་བཞིན་པར་མཐོང་ནས། དེ་ལ་གདོང་ལེན་བྱ་རྒྱུར་ཕྱི་ལོ་ ༡༩༨༦ ཟླ་བ་ ༥ ཚེས་ ༢༠ ཉིན་ཀྲུང་གོ་བོད་རིག་པ་ཞིབ་འཇུག་ལྟེ་གནས་ཞེས་པ་ཞིག་པེ་ཅིང་དུ་གསར་འཛུགས་བྱས་ཏེ། ད་བར་རྒྱལ་སྤྱི་རྒྱལ་ནང་དུ་རྒྱ་ནག་གཞུང་གི་བཤད་ཚུལ་དང་མཐུན་པའི་བོད་ཀྱི་ལོ་རྒྱུས་རིག་གནས་ཁྱབ་སྤེལ་དྲིལ་བསྒྲགས་བྱ་རྒྱུར། ཚོགས་འདུ་ཆེ་ཆུང་རིམ་པ་མི་འདྲ་བ་མང་དག་བསྐོང་ཚོགས་བྱས་ཡོད། ཉེ་སྔོན་ཕྱི་ལོ་ ༢༠༢༣ ཟླ་བ་ ༨ ནང་པེ་ཅིན་རྒྱལ་སྤྱིའི་བོད་རིག་པའི་དཔྱད་གླེང་གྲོས་ཚོགས་སྐབས་བདུན་པ་ཞེས་པ་བསྐོང་ཚོགས་བྱས་ཡོད་པ་དང་། སྐབས་དེར་ཚོགས་བཅར་བ་རྣམས་ཀྱིས་དབྱིན་སྐད་ཐོག་བོད་ཀྱི་སྐད་དོད་དུ། Tibet  མ་ཡིན་པར་ Xizang ཞེས་འབོད་འགོ་བཙུགས་དགོས་པའི་གྲོས་འགོ་བཏོན་ཡོད་པ་དང་། གྲོས་འགོ་དེ་གཞིར་བཟུང་ཕྱིས་སུ་རྒྱ་ནག་གཞུང་གིས་གཞུང་འབྲེལ་ཡིག་ཆ་ཁག་དང་གསར་ཁང་སོགས་སུ་ཨིན་སྐད་ཐོག་བོད་ཀྱི་སྐད་དོད་དུ་ Xizang ཞེས་འབྲི་འགོ་བཙུགས་པ་དང་སྦྲགས། མིང་བརྡ་དེ་ཉིད་བོད་རང་ལྗོངས་ཟེར་བ་ཁོ་ན་ལས་མདོ་སྟོད་སྨད་གཉིས་ལ་འཇུག་གི་མེད་ལུགས་ཀྱི་མིང་བརྡའི་ཆབ་སྲིད་བརྩེ་འགོ་བཙུགས། རྒྱ་ནག་གཞུང་གིས་ཁ་གཏད་དུ་ངོས་འཛིན་བྱེད་པའི་རྒྱལ་སྤྱིའི་བོད་རིག་པའི་ཞིབ་འཇུག་ཚོགས་འདུ་ཐེངས་བཅུ་བདུན་པ་རྒྱ་ནག་གི་ཉེ་འགྲམ་བལ་ཡུལ་ནང་འཚོག་གཏན་འཁེལ་བར། […] The post རྒྱ་ནག་གི་གནོན་ཤུགས་ལ་མ་ལྟོས་པར་བོད་མིའི་སྒྲིག་འཛུགས་ཀྱི་ཉམས་ཞིབ་པ་བོད་རིག་པའི་ཚོགས་འདུར་མཉམ་ཞུགས་བྱ་རྒྱུ་རེད་འདུག appeared first on vot.

བོད་ཀྱི་གནད་དོན་དང་དཔའ་བོ་བློ་དགའ་རང་བཙན་ལགས་ཀྱིས་བློས་བཏང་ལ་མྱ་ངན་གུས་འདུད་ཆེད་རྒྱ་གར་དང་། ཡུ་རོབ། ཨ་རི་སོགས་རྒྱལ་ཁབ་ཕྱི་ནང་གཉིས་ཀའི་ནང་རྐང་འཁོར་སྐོར་སྐྱོད་དང་། སྦག་སྦག་སྐོར་སྐྱོད། ཟས་བཅད་ངོ་རྒོལ་སོགས་ཀྱི་ལས་འགུལ་འདྲ་མིན་སྤེལ་བཞིན་པ་རེད་འདུག དེ་ཡང་ཉེ་ལམ་རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱིས་བོད་བསྟན་སྲིད་མི་རིགས་ཆེད་དུ་རང་ལུས་མེར་བསྲེགས་བཏང་བའི་ཡིད་སྐྱོའི་གནས་ཚུལ་བྱུང་བ་ནས་བཟུང་། རྒྱལ་སྤྱིའི་ཁྱོན་ཡོངས་སུ་དམ་པ་ཁོང་གིས་བློས་བཏང་དང་རྒྱ་ནག་གིས་བོད་ནང་སྤེལ་བཞིན་པའི་སྲིད་བྱུས་ལ་ངོས་ལེན་མེད་པའི་ལས་འགུལ་རིམ་པ་སྤེལ་བཞིན་པའི་ཁྲོད། ཁ་སང་མེའོ་ཆོས་འཕེལ་གླིང་གཞིས་ཆགས་སུ་གནས་སྡོད་བོད་མི་བཟའ་ཚང་བསྟན་འཛིན་དབང་འདུས་ལགས་དང་།  ཟླ་བ་ལགས་གཉིས་ཀྱིས་ཁུལ་དེ་ནས་འགོ་འཛུགས་ཀྱིས་རྒྱལ་ས་ལྡི་ལི་བར་དུ། སྦག་སྦག་སྐོར་སྐྱོད་ཀྱི་ལས་འགུལ་དབུ་འཛུགས་གནང་འདུག ཕྱོགས་མཚུངས་ཡོ་རོབ་ཀྱི་རྒྱལ་ཁབ་ Austria ནང་གི་ Linz གྲོང་ཁྱེར་ནང་བོད་མི་ཉི་མ་ཚེ་རིང་ལགས་ཀྱིས། རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱི་ཆེད་དུ་དམ་པ་དེ་ཉིད་དགོངས་པ་རྫོགས་རྗེས་ཀྱི་ཞག་ ༤༩ མ་ཟིན་བར་རྐང་འཁོར་སྐོར་སྐྱོད་ཀྱི་ལས་འགུལ་སྤེལ་བཞིན་པ་དང་འབྲེལ། མང་ཚོགས་ཚང་མས་དམ་པ་ཁོང་གི་ཞལ་ཆེམས་ལག་བསྟར་གནང་དགོས་གལ་ཡིན་པའི་བརྡ་ལན་གནང་འདུག རྩ་བའི་བཞུགས་སྒར་དུ་ཟླ་འདིའི་ཕྱི་ཚེས་ ༡༩ རེས་གཟའ་ཉི་མའི་ཉིན་བོད་ཀྱི་གཞོན་ནུ་ལྷན་ཚོགས་ཀྱིས་རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱི་བློས་བཏང་ལ་ཆེ་བསྟོད་དང་། རྒྱ་ནག་གི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཡིག་ཟེར་བར་ངོ་རྒོལ་དང་འབྲེལ། བློ་དགའ་རང་བཙན་ལགས་དམ་པ་དེ་ཉིད་ཀྱི་མངོན་འདོད་རྒྱུན་མཐུད་སླད་ཟས་བཅད་ངོ་རྒོལ་གྱི་ལས་འགུལ་སྤེལ་མུས་ཡིན་པ་དང་། དེའང་འཛམ་གླིང་ཡོངས་སུ་ཆགས་པའི་གཞོན་ནུའི་ས་གནས་ཁག་དང་། བོད་དོན་རྒྱབ་སྐྱོར་བ་རྣམས་ཀྱི་བརྒྱུད་འཛམ་གླིང་ཡོངས་སུ་སྤེལ་རྒྱུའི་རྒྱུན་མཐུད་ཀྱི་ལས་འགུལ་ཞིག་ཡིན་སྐོར་གསུངས་ཡོད་པ་རེད། དེ་བཞིན་ཁ་སང་ཨ་རིའི་ནིའུ་ཡོག་ནང་དུའང་སྟོད་གོས་ནག་པོ་གྱོན་ནས་ཁུལ་དེའི་རྒྱ་ནག་གཞུང་ཚབ་མདུན་དུ་ངོ་རྒོལ་སྐད་འབོད་ཀྱི་ལས་འགུལ་སྤེལ་འདུག་པ་མ་ཟད། རྒྱལ་གཅེས་པ་དམ་པ་ཁོང་སྐུ་འདས་གྲོངས་སུ་ཕྱིན་ནས་བདུན་ཚིགས་གསུམ་པ་དང་བསྟུན། བོད་མིའི་འདུ་སྡོད་ས་གནས་གང་སར་མཆོད་འབུལ་སྨོན་ལམ་དང་། ཞི་བའི་ངོ་རྒོལ་སོགས་གནང་བཞིན་ཡོད་པ་རེད།  མ་ཟད་བོད་ཀྱི་གནད་དོན་དང་འབྲེལ་རྒྱ་གར་གྱི་ Youtube བརྙན་ཐུང་བཟོས་མཁན་ SANJEET WITH TTI STUDY ཞུ་བ་ཞིག་གིས། ཟླ་བ་འདིའི་ཕྱི་ཚེས་ ༢༦ ཉིན་གྱི་ཕྱི་དྲོ་ཕྱག་ཚོད་ ༧ པ་ནས་འགོ་འཛུགས་ཀྱིས་ X སྤྱི་ཚོགས་དྲྭ་ལམ་སྟེང་ #StandWithTibet དང་ #FreeTibet ཞེས་ (Hashtag) ཚིག་བེད་སྤྱོད་ཀྱིས་བོད་དོན་དྲིལ་བསྒྲགས་ཀྱི་གཞི་རྒྱ་ཆེ་བའི་ལས་འགུལ་ཞིག་སྤེལ་འཆར་ཡོད་པ་དེར་མང་ཚོགས་ནས་མཉམ་ཞུགས་དགོས་པའི་སྐུལ་མ་གནང་འདུག The post བོད་དོན་དང་དཔའ་བོ་བློ་དགའ་རང་བཙན་ལགས་ཀྱི་བློས་བཏང་ལ་མྱ་ངན་གུས་འདུད་སླད་རྒྱ་གར་དང་ཕྱི་རྒྱལ་གཉིས་ཀའི་ནང་ལས་འགུལ་འདྲ་མིན་སྤེལ་བཞིན་པ། appeared first on vot.

༸སྐྱབས་རྗེ་རྫོང་གསར་འཇམ་དབྱངས་མཁྱེན་བརྩེ་རིན་པོ་ཆེ་མཆོག་གིས་དབུ་འཛུགས་གནང་བའི་ 84000: Translating the Words of the Buddha ཞེས་སངས་རྒྱས་ཀྱི་ཆོས་ཕུང་ ༨༤༠༠༠ ཡིག་སྒྱུར་གྱི་ལས་གཞི་ཁྲོད་ཉེ་ཆར་བཀའ་འགྱུར་ནང་གི་མདོ་རིང་ཤོས་ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་ཕྲག་བརྒྱ་པ་ The Perfection of Wisdom in One Hundred Thousand Lines དེ་ཉིད་དབྱིན་སྒྱུར་གནང་ཟིན་འདུག དེ་ཡང་ལས་གཞི་དེའི་དྲྭ་གནས་ཐོག་སྤེལ་བའི་གནས་ཚུལ་ནང་གསལ་ལྟར་ན།  ཉེ་ལམ་བོད་ཟླ་དྲུག་པའི་ཚེས་བཞི་སྟེ་ཆོས་འཁོར་དུས་ཆེན་གྱི་དུས་ཚིགས་ཁྱད་པར་ཅན་དང་བསྟུན་ནས།  པོད་བཅུ་གཉིས་དང་ཤོག་གྲངས་དགུ་སྟོང་བཞི་བརྒྱ་ཉི་ཤུ་ཅན་གྱི་གཞུང་༼ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་ཕྲག་བརྒྱ་པ་༽དེ་བཞིན་ལོ་ངོ་བཅུ་གཉིས་རིང་ལོ་ཙཱ་བ་མི་གྲངས་བཅུ་གསུམ་གྱིས་དབྱིན་སྒྱུར་གནང་ཡོད་པ་སྟེ་ད་ལྟའི་ཆར་ལེགས་གྲུབ་ཀྱིས་ལས་གཞིའི་དེའི་དྲྭ་ཚིགས་ནས་མང་ཚོགས་ཀྱིས་རིན་མེད་ཐོག་ལྟ་ཀློག་ཐུབ་པ་བཟོས་གནང་ཡོད་པ་རེད་འདུག མ་ཟད།  བོད་བརྒྱུད་ནང་བསྟན་གྱི་བཀའ་འགྱུར་ནང་ནས་མདོ་རིང་ཤོས་འདི་པར་བསྐྲུན་གནང་ཐུབ་པར་དྲན་གསོའི་ཆེད་དུ།  ལས་གཞི་དེའི་ཚོགས་མི་རྣམས་ནས་རིན་པོ་ཆེ་དང་། བླ་མ།  ལོ་ཙཱ་བ།  ཉམས་ལེན་པ་བཅས་ལ་གྲུབ་འབྲས་དམིགས་བསལ་ཅན་དེའི་ཐད་ཁོང་རྣམ་པའི་དགོངས་ཚུལ་ཇི་ཡོད་སྐོར་བཀའ་འདྲི་ཞུས་པའི་བརྙན་ཐུང་ཞིག་འདོན་སྤེལ་གནང་འདུག་པ་དེའི་ནང་།   ཡོངས་དགེ་མི་འགྱུར་རིན་པོ་ཆེ་མཆོག་དང་།  ས་སྐྱ་ཁྲི་འཛིན་ཞེ་གསུམ་པ་ཛྙཱན་བཛྲ་རིན་པོ་ཆེ་མཆོག  ཆོས་ཀྱི་ཉི་མ་རིན་པོ་ཆེ་མཆོག  དེ་བཞིན་བོད་བརྒྱུད་ནང་བསྟན་དང་ཕྱི་རྒྱལ་གྱི་བླ་སྤྲུལ་ལོ་ཙཱ་བ་དང་མཁས་པ་སོགས་ཀྱིས་གཞུང་ཆེན་འདི་བཞིན་དབྱིན་སྒྱུར་དུ་ལེགས་གྲུབ་བྱུང་བ་ལ་དགའ་བསུ་དང་འབྲེལ།  དེར་འགྲེལ་བརྗོད་ཁྲོད། རང་དབང་དང་།  བདེན་པ།  ཧ་ལས་པ།  དུས་ལས་འདས་པ། ཤེས་རབ།  དྲན་རྟེན་སོགས་ཀྱི་ཚིག་བེད་སྤྱོད་གནང་མཁན་བྱུང་འདུག   མ་ཟད་ཁག་གཅིག་གིས་དེའི་གལ་གནད་མང་ཚོགས་ཀུན་ལ་ཁྱབ་ཐུབ་པ་བྱ་དགོས་པ་དང་།  དེ་ཉིད་མཆོད་པ་སོགས་ཀྱི་སྟེང་བཤམ་པ་ཙམ་མིན་པར་དེའི་ཐོག་ཐོས་བསམ་སྒོམ་གསུམ་གནང་དགོས་གལ་ཡིན་པ་གསུངས་འདུག་ལ།   ལྷག་པར་དུ་ཆོས་ཕུང་ ༨༤༠༠༠  ཡིག་སྒྱུར་གྱི་ལས་གཞི་དབུ་འཛུགས་གནང་མཁན་༸སྐྱབས་རྗེ་རྫོང་གསར་འཇམ་དབྱངས་མཁྱེན་བརྩེ་རིན་པོ་ཆེ་མཆོག་གིས་ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་ཕྲག་བརྒྱ་པའི་གཞུང་ཆེན་འདི་ནི་ཐེག་པ་ཆེན་པོའི་རྗེས་འབྲངས་པ་ཚོར་སངས་རྒྱས་ཆོས་ཀྱི་ཁོག་པའི་སྙིང་དང་། གློ་བ། ཁྲག་ལྟ་བུ་ཤིན་ཏུ་ནས་གལ་ཆེན་པོ་ཆགས་ཡོད་པ་གསུངས་འདུག དེ་འབྲེལ་ཆོས་ཕུང་ ༨༤༠༠༠ ཡིག་སྒྱུར་གྱི་ལས་གཞིའི་ཞིབ་འཇུག་རྩོམ་སྒྲིག་པ་ Nathaniel Rich ལགས་ཀྱིས།  ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་ཕྲག་བརྒྱ་པའི་གཞུང་ཆེན་འདི་ནི་སངས་རྒྱས་ཤཱཀྱ་ཐུབ་པས་བྱ་རྒོད་ཕུང་པོའི་རིར་སྩལ་བའི་ཤེར་ཕྱིན་གྱི་ཆོས་ཀྱི་ཟིན་ཐོ་ཞིབ་ཚགས་ཤོས་དེ་ཡིན་པ་དང་།  […] The post བཀའ་འགྱུར་ནང་གི་མདོ་རིང་ཤོས་ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་ཕྲག་བརྒྱ་པ་དབྱིན་སྒྱུར་གནང་ཟིན་འདུག appeared first on vot.

བཙན་བྱོལ་བོད་མིའི་བཅའ་ཁྲིམས་དང་སྤྱི་མང་གཏུག་བཤེར་འགྲོ་ལུགས་རྩ་འཛིན་ཁྲིམས་ཡིག དཔང་རྟགས་རྩ་འཛིན་ཁྲིམས་ཡིག་བཅས་ཀྱི་ཐོག་བཙན་བྱོལ་བོད་མིའི་ཁྲིམས་དང་ལམ་ལུགས་ཀྱི་ཁྲིམས་རྩོད་པའི་སྦྱོང་བརྡ་ཐེངས་བཅུ་པ་གནང་བཞིན་པ་དང་དེ་ནི་ཕྱི་ལོ་ ༢༠༡༩ རྗེས་སུ་གོ་སྒྲིག་ཞུས་ཐུབ་པ་ཞིག་ཆགས་ཀྱི་འདུག དེ་ཡང་དྷ་ས་འཛིན་སྐྱོང་སྦྱོང་བརྡར་ཁང་དུ་བོད་མིའི་སྒྲིག་འཛུགས་ཆེས་མཐོའི་ཁྲིམས་ཞིབ་ཁང་གི་གོ་སྒྲིག་འོག་ཟླ་བ་འདིའི་ཚེས་ ༢༠ ནས་ ༢༩ བར་བཙན་བྱོལ་བོད་མིའི་ཁྲིམས་དང་ལམ་ལུགས་ཀྱི་ཁྲིམས་རྩོད་པའི་སྦྱོང་བརྡར་ཐེངས་བཅུ་པ་གོ་སྒྲིག་གནང་ཡོད་ཅིང་། སྦྱོང་བརྡར་དེའི་ཐོག་ཁྲིམས་ལུགས་རིག་པ་བ་དང་ཁྲིམས་རྩོད་པ། བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད། བཙན་བྱོལ་བོད་མིའི་ཁྲིམས་ཞིབ་ཁང་གི་ཁྲིམས་དོན་ལས་བྱེད་བཅས་ཚོགས་བཅར་བ་ཁྱོན་ ༣༠ ཙམ་མཉམ་ཞུགས་གནང་འདུག འདི་ག་རླུང་འཕྲིན་ཁང་ནས་ཆེས་མཐོའི་ཁྲིམས་ཞིབ་ཁང་གི་སྤྱི་ཁྱབ་ཁྲིམས་དྲུང་ཆེན་མོ་ལྷ་འབྲུག་ལགས་སུ་སྦྱོང་བརྡར་དེའི་དམིགས་ཡུལ་སྐོར་བཀའ་འདྲི་ཞུས་པར། ཁོང་གིས་བོད་མི་དཀྱུས་མ་ས་གནས་སོ་སོ་ནས་སྤྱི་སྒེར་སུ་རུང་ལ་རྩོད་གཞི་གང་འདྲ་ཞིག་བྱུང་ཚེ། ཁྲིམས་ཞིབ་ཁང་འོག་མ་ནས་གོང་རིམ་ལ་ཁྲིམས་གཏུག་ཆེད་རོགས་རམ་བྱེད་ཐུབ་པའི་ཆེད་དུ་སྦྱོང་བརྡར་སྤྲོད་ཀྱི་ཡོད་ཅིང་། སྤྱིར་ཁྲིམས་ལུགས་ཀྱི་སློབ་སྦྱོང་ནི་ཉིན་གྲངས་བཅུའི་ནང་ཡོང་ཐུབ་རྒྱུ་ཞིག་མིན་ཡང་། སྦྱོང་བརྡར་འདིའི་ནང་ཁ་མཆུ་གཏུག་སྟངས་ཀྱི་འགྲོ་ལུགས་གང་ཡིན་པ་ཞིབ་ཕྲ་ཤེས་རྟོགས་སླད་དུ་བཙན་བྱོལ་བོད་མིའི་ཁྲིམས་ཞིབ་ཁང་གི་སྤྱི་མང་གཏུག་བཤེར་འགྲོ་ལུགས་རྩ་འཛིན་ཁྲིམས་ཡིག་དང་། ཁ་མཆུ་བྱུང་བའི་རྗེས་དཔང་རྟགས་ནི་དགོས་ངེས་ཅན་ཞིག་ཡིན་པར་དེའི་བརྒྱུད་རིམ་ཤེས་རྟོགས་སླད་དུ་བཙན་བྱོལ་བོད་མིའི་ཁྲིམས་ཞིབ་ཁང་གི་དཔང་རྟགས་རྩ་འཛིན་ཁྲིམས་ཡིག་གཉིས་ཀྱི་ཞིབ་ཕྲ་སློབ་ཁྲིད་གནང་གི་ཡོད་པ་དང་། དེ་བཞིན་ཁྲིམས་ཡིག་དེ་གཉིས་ཀ་འགྲོ་ལུགས་ཁྲིམས་ཡིག་ཡིན་པ་དང་། ཁ་མཆུ་བྱུང་བའི་རྗེས་འགྲོ་ལུགས་དེ་མེད་ཚེ་བྱེད་སྟངས་མི་ཤེས་པ་དང་ཐག་གཅོད་ཡང་བྱེད་མི་ཤེས་པའི་གནས་སྟངས་ཡོང་གི་ཡོད་སྟབས། གཉིས་ཀ་མཉམ་དུ་འགྲོ་དགོས་པ་མ་ཟད། དཔེ་མཚོན་དང་རྒྱལ་སྤྱིའི་ཁྲིམས་ལུགས་ཡང་ལུང་འདྲེན་བྱ་དགོས་ཚེ་དེ་ལྟར་གནང་གི་ཡོད་པ་འགྲེལ་བརྗོད་གནང་སོང་། ལྷག་པར་ཕྱི་ལོ་ ༢༠༡༩ ནས་ད་བར་ལོ་བདུན་རིང་དེ་འབྲེལ་སྦྱོང་བརྡར་གནང་མ་ཐུབ་པའི་གནས་སྟངས་ཇི་བྱུང་སྐོར་བཀའ་འདྲི་ཞུས་པར། ཁོང་གིས་ཕྱི་ལོ་ ༢༠༡༩ ལོར་སྦྱོང་བརྡར་ཐེངས་དགུ་པ་ཚོགས་ཡོད་པ་དང་། ད་བར་ཚོགས་མ་ཐུབ་པའི་བརྒྱུད་རིམ་ནི། ཕྱི་ལོ་ ༢༠༢༠ ཡས་མས་སུ་བཀའ་འཁྲོལ་ཐོབ་པའི་འོག་ནས་དེ་འབྲེལ་ཟབ་སྦྱོང་གཉིས་གོ་སྒྲིག་ཞུ་གཏན་འཁེལ་ཡང་། སྐབས་དེར་སྤྱི་ཚོགས་ནང་ཤེས་གསལ་ལྟར་ཆེས་མཐོའི་ཁྲིམས་ཞིབ་ཁང་ལ་དཀའ་ངལ་ཞིག་ཕྲད་དེ་ཁྲིམས་ཞིབ་པ་མེད་པའི་གནས་སྟངས་བྱུང་ཡོད་སྟབས། སྦྱོང་བརྡར་སྤྲོད་པ་ལ་ཁྲིམས་ཞིབ་ཁང་གི་དབང་ལྡན་མི་སྣ་མེད་ཚེ་ལག་བསྟར་བྱེད་ཐུབ་ཀྱི་མེད་པ་དང་། ད་རེས་ཐེངས་བཅུ་པ་དེའང་ལོ་སྔོན་མའི་བཀའ་འཁྲོལ་གསར་པ་ཞུས་པའི་ཐོག་ནས་ཚོགས་པ་ཐུབ་ཡོད་པ་འགྲེལ་བརྗོད་གནང་སོང་། ད་དུང་སྦྱོང་བརྡར་དེའི་ནང་སྲི་ཞུ་ལས་བྱེད་ཡང་མཉམ་ཞུགས་གནང་ཡོད་སྟབས་ཁོང་རྣམ་པའི་ཁྲིམས་རྩོད་པའི་ཕྱག་ལས་གནང་ཆོག་གི་ཡོད་མེད་སྐོར་བཀའ་འདྲི་ཞུས་པར། བོད་མིའི་སྒྲིག་འཛུགས་ཀྱི་ལས་ཁུངས་བྱེ་བྲག་གང་ཡིན་པ་ཞིག་ལ་གནས་ཚུལ་ཞིག་བྱུང་ནས་ལས་ཁུངས་དེས་རེ་བ་བརྒྱབ་ཚེ། སྲི་ཞུ་བ་དེར་ཁྲིམས་རྩོད་པའི་སློབ་སྦྱོང་ཡོད་ཀྱང་ཁྲིམས་དེ་ལེན་དང་མ་ལེན་དོ་དག་རང་ཉིད་ལ་རག་ལུས་ཡོད་པ་འགྲེལ་བརྗོད་གནང་སོང་། ཁོང་གིས་ད་དུང་དེ་དང་འབྲེལ་ནས་ཆེས་མཐོའི་ཁྲིམས་ཞིབ་ཁང་གི་མི་སྣ་མང་པོར་སྦྱོང་བརྡར་གནང་ཡོད་ཀྱང་ཁྲིམས་ཡིག་ལ་རྒྱུན་དུ་དོ་སྣང་མ་བྱས་པར་གློ་བུར་དུ་ཁྲིམས་རྩོད་པ་གནང་ཚེ་ནོར་འཁྲུལ་མང་པོ་བྱུང་གི་ཡོད་པར་བརྟེན། ཁྲིམས་ཡིག་དེ་དག་ལ་ཡང་ནས་ཡང་དུ་དོ་སྣང་བྱ་དགོས་གལ་ཡིན་པ་མ་ཟད། སྦྱོང་བརྡར་འདིའི་ནང་སྲི་ཞུ་ལས་བྱེད་གཉིས་དེ་སྔ་སྦྱོང་བརྡར་ཐོབ་ཚར་བ་དང་ད་རེས་བསྐྱར་སྦྱོང་ཆགས་ཀྱི་ཡོད་སྟབས་མགོ་ཚོད་རྒྱུ་ཕན་ཐོགས་ཆེན་པོ་བྱུང་ཡོད་པ་གསུང་གིན་འདུག་ཅེས་འགྲེལ་བརྗོད་གནང་སོང་། ཆེས་མཐོའི་ཁྲིམས་ཞིབ་ཁང་གི་སྤྱི་ཁྱབ་ཁྲིམས་དྲུང་ཆེན་མོས་ད་ལྟའི་བོད་པའི་སྤྱི་ཚོགས་ནང་ལ་ཁྲིམས་རྩོད་པའི་གནས་བབ་སྐོར་དང་འབྲེལ་ནས། དེ་སྔོན་ཁྲིམས་ལུགས་རིག་པ་ཐོན་མཁན་གང་ཞིག་བོད་པའི་སྤྱི་ཚོགས་ནང་ཁ་མཆུ་གཏུག་ནས་རོགས་པ་བྱེད་མཁན་མེད་པ་ལྟ་བུ་ཡིན་པ་དང་། ད་ལྟའི་དུས་སྐབས་སུ་དུས་ཚོད་འགྱུར་བའི་དབང་གིས་མང་དུ་འགྲོ་ཡི་ཡོད་པར་དེ་ནི་བཟང་ཕྱོགས་ཀྱི་རྣམ་པ་ཞིག་ཏུ་ངོས་འཛིན་བྱེད་ཀྱིན་ཡོད་ཅིང་། དེ་ནི་ངེས་པར་དུ་དགོས་ངེས་ཤིག་ཡིན་པ་མ་ཟད། ཁོང་རྣམ་པ་ཚོར་ཁྲིམས་ལུགས་རིག་པའི་རྒྱབ་ལྗོངས་ཡོད་པར་བརྟེན། བོད་པའི་སྤྱི་ཚོགས་ནང་གི་ཁྲིམས་ཡིག་དེ་དག་མགོ་ཚོད་རྒྱུ་ལས་སླ་པོ་ཡོད་པའི་ཁེ་ཕན་ཡོད་པ་འགྲེལ་བརྗོད་གནང་སོང་། རྩ་བའི་འདི་ཚེས་ ༢༠ ཉིན་དབུ་འབྱེད་མཛད་སྒོའི་ཐོག་ཁྲིམས་ཞིབ་པ་ཆེ་བ་ཡེ་ཤེས་དབང་མོ་མཆོག་དང་ཁྲིམས་ཞིབ་པ་གཞན་འཕགས་པ་ཚེ་རིང་མཆོག་བཅས་དབུ་བཞུགས་གནང་ཡོད་པ་དང་། སྐབས་དེར་ཁྲིམས་ཞིབ་པ་ཆེ་བ་ཡེ་ཤེས་དབང་མོ་མཆོག་གིས་མི་མང་ཁྲོད་ཁྲིམས་ཀྱི་གོ་རྟོགས་ཧ་ཅང་ཞན་པོ་ཡོད་པར་བརྟེན། ཆེས་མཐོའི་ཁྲིམས་ཞིབ་ཁང་གི་ངོས་ནས་ཁྲིམས་ལུགས་རིག་པའི་རྒྱབ་ལྗོངས་ཡོད་མཁན་གང་མང་ལ་སྦྱོང་བརྡར་གོ་སྒྲིག་གནང་གི་ཡོད་པ་མ་ཟད། མཉམ་ཞུགས་གནང་མཁན་རྣམས་བཙན་བྱོལ་བ་ཞིག་ཡིན་པའི་ཆ་ནས་རྒྱལ་ཁབ་གཞན་དུ་མང་གཙོའི་ལམ་ལུགས་ལག་བསྟར་བྱ་རྒྱུའི་གོ་སྐབས་ཐོབ་པ་དེ་ནི་༸གོང་ས་༸སྐྱབས་མགོན་ཆེན་པོའི་བཀའ་དྲིན་དང་བོད་མིའི་སྒྲིག་འཛུགས་འདི་གཙིགས་ཆེར་འཛིན་དགོས་གལ་ཡིན་པ་གསུངས་ཡོད། […] The post བཙན་བྱོལ་བོད་མིའི་ཁྲིམས་དང་ལམ་ལུགས་ཀྱི་ཁྲིམས་རྩོད་པའི་སྦྱོང་བརྡར་ཐེངས་བཅུ་པ་གནང་བཞིན་པ། appeared first on vot.

ཉེ་ལམ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ལ་དྭགས་ཞི་བའི་ཚལ་ཕོ་བྲང་དུ་མང་མཇལ་སྐབས།  ལ་དྭགས་གཞོན་ནུ་ཁག་གཅིག་གིས་གནད་དོན་འདྲ་མིན་སྐོར་བཀའ་འདྲི་ཞུས་ཡོད་པ་དང་།  དེ་དག་ཁོངས་ནས་གཅིག་གིས་ཡུལ་དེའི་ནང་གི་གཞོན་སྐྱེས་ཁྲོད་མྱོ་རྫས་རྐྱེན་པས་དཀའ་ངལ་འཕྲད་མཁན་ཇེ་མང་དུ་འགྲོ་བཞིན་པའི་སྐོར་བཀའ་འདྲི་ཞུས་ཡོད་པ་རེད།    དེ་འབྲེལ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁ་ཉིན་ཕྱི་ཚེས་ ༢༠ ཉིན་དྲྭ་རྒྱའི་སྟེང་ཡིག་ཐོག་གསུང་འཕྲིན་ཞིག་སྩལ་ཡོད་པའི་ནང་།  ༸གང་ཉིད་མཆོག་གིས་མྱོ་རྫས་ལོངས་སུ་སྤྱོད་པའི་གནོད་སྐྱོན་གྱི་རང་བཞིན་དང་དེ་ནི་གོམས་གཤིས་ངན་པ་ཞིག་ཡིན་པ་ཤེས་རྟོགས་དགོས་རྒྱུ་གལ་ཆེན་པོ་ཡིན་པ་མ་ཟད།  ནམ་ཞིག་མྱོ་རྫས་བེད་སྤྱོད་བྱེད་པའི་མཇུག་འབྲས་སྐོར་བསམ་གཞིག་བྱེད་ན།  དེས་སྡུག་བསྔལ་ཁོ་ན་ལས་ཡོང་གི་མེད་པ་མངོན་གསལ་ཡིན་སྐོར་བཀའ་སྩལ་འདུག་པ་དང་།  མྱོ་རྫས་ངན་གོམས་ལས་བཅོས་ཐབས་དང་དྲག་སྐྱེད་ཀྱི་ལམ་དུ་གནས་རྒྱུ་དེར་དངོས་ནས་ཀྱི་སྙིང་སྟོབས་དང་ཆོད་སེམས་བརྟན་པོ་དགོས་པ་མཁྱེན་གྱི་ཡོད་སྐོར་དང་།  དཀའ་ངལ་དེ་དག་ལས་ཐར་བར་བྱེད་མཁན་གཞོན་སྐྱེས་ཡོངས་ལ་ཡིད་རངས་བསྔགས་བརྗོད་ཡོད་ཅེས།  ལ་དྭགས་གཞོན་ནུ་ཚོའི་ངོས་ནས་མྱོ་རྫས་ལོངས་སུ་སྤྱོད་རྒྱུར་འཛེམ་དགོས་པ་དང་།  ངན་གོམས་དེའི་རྐྱེན་པས་དཀའ་ངལ་འཕྲད་བཞིན་པ་ཡོངས་ལ་མྱུར་དུ་བདེ་ཐང་དང་དོན་སྙིང་ལྡན་པའི་མི་ཚེ་སྐྱིད་པོ་ཞིག་སྐྱེལ་ཐུབ་པའི་སྨོན་ལམ་འདེབས་ཀྱིན་ཡོད་པ་བཀའ་སྩལ་འདུག འདི་ག་རླུང་འཕྲིན་ཁང་གི་ལ་དྭགས་ས་གནས་གསར་འགོད་པས་ཡུལ་དེར་གནས་སྡོད་ལ་དྭགས་དང་བོད་མི་གཞོན་སྐྱེས་ཁག་གཅིག་ལ་༸གོང་ས་མཆོག་གི་གསུང་འཕྲིན་དེས་ཁོང་ཚོར་སེམས་འགུལ་ཇི་ལྟར་ཐེབས་ཡོད་སྐོར་བཀའ་འདྲི་ཞུས་པར་ཁོང་རྣམས་ཀྱིས།  ༸གང་ཉིད་མཆོག་ལ་སྐུ་ངལ་ཧ་ཅང་ཡོད་ཀྱང་ལ་དྭགས་གཞོན་སྐྱེས་ཚོའི་དྲི་བར་བཀའ་ལན་འཛད་མེད་སྩལ་གྱི་ཡོད་པ་དེ་ཤིན་ཏུ་ནས་བཀའ་དྲིན་ཆེན་པོ་ཡིན་པ་དང་།  ཁ་ཉིན་ལ་དྭགས་ཁུལ་གྱི་གཞོན་སྐྱེས་ཚོར་མྱོ་རྫས་སོགས་དང་འབྲེལ་བའི་བཀའ་སློབ་དེ་དག་འཛམ་གླིང་གཞོན་སྐྱེས་ཚང་མར་ཁྱབ་ཀྱི་ཡོད་ལ།  མྱོ་རྫས་ཀྱིས་གང་ཟག་སོ་སོའི་འཕྲོད་བསྟེན་ལ་གནོད་པ་ཙམ་མིན་པར་ནང་མི་ཕན་ཚུན་འཆམ་མཐུན་མེད་པ་བཟོ་ཡི་ཡོད་པར་བརྟེན།  ལ་དྭགས་གཞོན་སྐྱེས་ཚོས་ངོས་ནས་མྱོ་རྫས་ལོངས་སྤྱོད་ནི་རང་གི་སྡུག་བསྔལ་སེལ་བའི་ཐབས་ལམ་ཞིག་གཏན་ནས་མིན་པ་ཤེས་དགོས་པ་གསུངས་འདུག ༸གོང་ས་༸སྐྱབས་མགོན་ཆེན་པོ་མཆོག་གིས་ཁ་ཉིན་གསུང་འཕྲིན་སྩལ་བའི་ནང་གཞན་ཡང་ལ་དྭགས་གཞོན་ནུ་ཁག་གཅིག་གིས་སེམས་ཀྱི་ཞི་བདེ་ཇི་ལྟར་འཚོལ་དགོས་པ་མ་ཟད།  དངངས་འཚབ་དང་། ཁོང་ཁྲོ། སེམས་ངལ་སོགས་ཀྱི་ཉོན་མོངས་ལས་ཇི་ལྟར་རྒྱལ་དགོས་པའི་སྐོར་བཀའ་འདྲི་ཞུས་མཁན་བྱུང་སོང་ཞེས།  དེར་༸གང་ཉིད་མཆོག་གིས་བཀའ་ལན་དུ།  མི་ཚེ་ནང་གི་གཞི་རྩའི་དགོས་དོན་ནི་བདེ་བ་འཚོལ་རྒྱུ་དེ་ཡིན་དུས།  བདེ་བ་ངོ་མ་སྟེ་ཕྱིའི་རྒྱུ་ནོར་ལོངས་སྤྱོད་དང་དབང་ཆ་ནས་ཡོང་གི་མེད་པར་དེ་ནི་སེམས་ཀྱི་ཞི་བདེ་ནས་ཡོང་གི་ཡོད་པ་དང་།  དེ་ཡང་ང་ཚོས་སེམས་ལ་སྦྱོང་བརྡར་སྤྲད་དེ་བྱམས་བརྩེ་དང་གཞན་ཕན་གྱི་བསམ་བློ་གོང་འཕེལ་ལས་བསྒྲུབ་ཐུབ་ཀྱི་ཡོད་པ་བཀའ་སྩལ་དང་འབྲེལ།  གང་ཟག་རང་གི་བདེ་བ་སྟེ་གཞན་ཕན་གྱི་སེམས་ལ་རག་ལས་ཀྱི་ཡོད་པ་དང་།  རང་གཅེས་འཛིན་གྱི་བློ་དེ་བཞིན་གཞན་གཅེས་འཛིན་གྱི་བློར་བསྒྱུར་ཐུབ་ན་སེམས་ངལ་མཐའ་དག་དེ་ལས་ཞི་བར་འགྱུར་ཐུབ་པ་མ་ཟད། རང་དོན་སྒྲུབ་པའི་ཐབས་ཤེས་ཡག་ཤོས་ཏེ་དེ་ཡིན་པ་བཀའ་སྩལ་འདུག མ་ཟད་མགོན་པོ་༸གང་ཉིད་མཆོག་གིས་མི་ཚེ་དྲང་བདེན་དང་ཕྱི་གསལ་ནང་གསལ་ཐོག་སྐྱེལ་ཐུབ་པ་དེས་དངངས་སྐྲག་སོགས་ཉུང་དུ་གཏོང་ཐུབ་ལ།  སྤྱི་ཚོགས་ཁྲོད་གང་ཟག་གཞན་དང་འབྲེལ་བའང་ཡག་པོ་ཡོང་ངེས་ཡིན་པ་བཀའ་སྩལ་གྱིས།  ཕྱིའི་རྒྱ་རྐྱེན་ལས་སེམས་ཀྱི་ཞི་བདེ་བསྒྲུབ་ཐབས་མེད་པ་དང་།  ཤེས་ཡོན་དང་ཉམས་ལེན་བརྒྱུད་ནང་སེམས་ལ་སྦྱོང་བརྡར་སྤྲོད་དགོས་གལ་མ་ཟད།  ཞེ་སྡང་དང་། ཁྲོ་སེམས། ཕྲག་དོག་འཇོམས་བྱེད་དུ་བྱམས་སྙིང་རྗེ་དང་བཟོད་སྒོམ་སོགས་ཀྱི་བསམ་བློ་གོང་འཕེལ་གཏོང་དགོས་པ་བཀའ་སྩལ་འདུག སྤྱིར་ད་ལན་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་གཞོན་སྐྱེས་ཚོར་དམིགས་ཏེ་མྱོ་རྫས་ངན་གོམས་ཐོག་བཀའ་སློབ་སྩལ་ཡོད་པ་གང་ལྟར་ཡང་།  བཙན་བྱོལ་སྤྱི་ཚོགས་ཁྲོད་༸གང་ཉིད་མཆོག་གི་གསུང་འཕྲིན་དེ་སྤྱི་ཚོགས་དྲྭ་ལམ་སྟེང་བརྒྱུད་སྐུལ་དང་སྦྲགས།  བཀའ་སློབ་དེ་དག་བོད་མི་གཞོན་སྐྱེས་ཚོ་ལ་ཡང་ཁྱབ་ཀྱི་ཡོད་པ་དང་།  དེར་བོད་མི་གཞོན་ནུ་ཚོའི་ངོས་ནས་དོ་སྣང་གནང་དགོས་པ་གསུང་གི་འདུག རྩ་བའི་ལ་དྭགས་ཁུལ་དུ་མྱོ་རྫས་ཀྱི་ངན་གོམས་ཤོར་བའི་གཞོན་སྐྱེས་མང་དུ་འགྲོ་བཞིན་པའི་གནས་སྟངས་ལ་གཞིགས་ཏེ།  དེ་སྔ་ཡིན་ན་ཁུལ་དེར་ལོ་ངོ་བཅུ་ཕྲག་འགའ་ཤས་རིང་ཆང་རག་གི་ཚོང་ཁང་ ༢ ལས་མེད་ཀྱང་།  ད་ཆ་ས་གནས་སྲིད་གཞུང་གིས་ཡུལ་དེར་མྱོ་རྫས་བེད་སྤྱོད་བྱེད་མཁན་ཇེ་མང་དུ་འགྲོ་བཞིན་པ་ལ་གདོང་ལེན་ཆེད་དུ།  ཆང་རག་ཚོང་ཁང་ ༢༠ སྒོ་ཕྱེ་རྒྱུའི་གསལ་བསྒྲགས་སྤེལ་ཡོད་པ་དང་།  གནས་ཚུལ་དེར་ཁུལ་དེའི་ཚོགས་སྒེར་ཁག་གཅིག་གིས་སྐྱོན་བརྗོད་ཤུགས་ཆེ་དང་འབྲེལ།  མྱོ་རྫས་བེད་སྤྱོད་ཉུང་དུ་གཏོང་ཆེད་ཆང་རག་ཚོང་ཁང་མང་དུ་གཏོང་རྒྱུའི་ཐག་ཆོད་དེ་ནི་རྒྱུ་མཚན་རིག་པ་མེད་པ་ཞིག་དང་།  ཁག་གཅིག་གིས་དེ་ནི་ཚན་རིག་གི་ཐོག་ནས་ཀྱང་ཡོང་ཐབས་བྲལ་བ་ཞིག་ཡིན་པ་མ་ཟད།  གཞན་ལ་དྭགས་རང་སྐྱོང་དགོས་པར་འཐབ་རྩོད་བྱེད་མཁན་འགོ་ཁྲོད་ཚོས་ཐག་ཆོད་དེ་ནི་དབུས་གཞུང་གིས་ས་ཁུལ་དེའི་ཐོག་བཙན་བཀའ་བཏང་བ་ཞིག་ཡིན་པ་བརྗོད་ཡོད་པ་རེད།  The post གོང་ས་མཆོག་གིས་ལ་དྭགས་གཞོན་ནུ་ཚོས་མྱོ་རྫས་ལོངས་སུ་སྤྱོད་རྒྱུ་འཛེམ་དགོས་པ་བཀའ་སྩལ་འདུག appeared first on vot.

ཨོ་ཌི་ཤ་མངའ་སྡེ་དེ་ཉིད་འཛམ་གླིང་ནང་གི་ནང་པའི་གནས་དང་འབྲེལ་བའི་ཡུལ་སྐོར་སྤྲོ་འཆམ་པའི་ས་ཚིགས་འབུར་ཐོན་བཟོ་ཐབས་ལ་དམིགས་ནས་ལས་གཞི་སྣ་མང་སྤེལ་དང་སྤེལ་བཞིན་པའི་ཁྲོད་འདིར། ཉེ་ལམ་མངའ་སྡེའི་ཡུལ་སྐོར་སྤྲོ་འཆམ་པའི་ལས་ཁུངས་དང་ཁུལ་དེར་རྟེན་གཞི་བྱས་པའི་རི་དགོན་ཐུབ་བསྟན་སྨིན་གྲོལ་གླིང་དགོན་པའི་བར་ནང་པའི་ཤུལ་བཞག་དང་གཅེས་ནོར་སྲུང་སྐྱོབ་ཚུད་པའི་ཡུལ་སྐོར་སྤྲོ་འཆམ་འཕེལ་རྒྱས་ཡོང་ཐབས་སུ་གཉིས་མོས་གན་ཡིག་ཐོག་མཚན་རྟགས་བསྐྱོན་འདུག དེ་ཡང་ཟླ་བ་འདིའི་ཚེས་ ༡༥ ཉིན་ཨོ་ཌི་ཤའི་ Lok Seva Bhawan དུ་གན་ཡིག་བཞག་རྒྱུའི་མཛད་སྒོ་དེའི་ཐོག་མངའ་སྡེ་སྤྱི་ཁྱབ་བློན་ཆེན་གཞོན་པ་དང་ཡུལ་སྐོར་སྤྲོ་འཆམ་པའི་ལས་ཁུངས་ཀྱི་གཙོ་འཛིན་གཅིག་ལྕོགས་ Parvati Parida པཱར་ཝ་ཏི་པཱ་རི་ཌ་མཆོག་དང་། ཁུལ་དེའི་གཱ་ཇཱ་པ་ཏི་རྫོང་ནང་རྟེན་གཞི་བྱས་པའི་ Padmasambhava Mahavihara རམ་རི་དགོན་ཐུབ་བསྟན་སྨིན་གྲོལ་གླིང་དགོན་པའི་དབུ་འཛིན་༸སྐྱབས་རྗེ་དགེ་སྤྲུལ་འཇིགས་མེད་རིན་པོ་ཆེ་མཆོག དེ་བཞིན་མངའ་སྡེའི་སྐད་ཡིག་དང་རྩོམ་རིག རིག་གཞུང་། རྩེད་རིགས། གཞོན་སྐྱེས་ཞབས་ཞུ། མཐོ་རིམ་སློབ་གྲྭ་བཅས་ཀྱི་བློན་ཆེན་ Suryabanshi Suraj སུརྱ་ཝན་ཤི་སུ་རཇ་མཆོག མངའ་སྡེའི་སྤྱི་ཁྱབ་དྲུང་ཆེ་ Anu Garg ཨ་ནུ་གརྒ་ལགས་བཅས་དབུ་བཞུགས་ཀྱི་ཐོག་ནས་མཉམ་འབྲེལ་གན་ཡིག་ཐོག་མཚན་རྟགས་བསྐྱོན་འདུག ལས་གཞི་དེ་ནི་མངའ་སྡེ་གཞུང་གིས་ཁུལ་དེའི་ Jajpur ཇཱཇ་པུར་རྫོང་ནང་ཡོད་པའི་ནང་པའི་གནས་རཏྣ་གི་རི་ Ratnagiri དང་ཨུ་དྷེ་གི་རི་ Udayagiri ལ་ལིཏ་གི་རི་ Lalitgiri བཅས་དང་། བོད་མིའི་གནས་སྡོད་ཕུན་ཚོགས་གླིང་གཞིས་ཆགས་དང་དགོན་སྡེ་ཁག་བཅས་སུ་ཡུལ་སྐོར་སྤྲོ་འཆམ་མྱུར་ཚད་མཐོ་བོའི་ཐོག་ནས་འཕེལ་རྒྱས་འགྲོ་རྒྱུ་ཙམ་མ་ཟད། ནང་པའི་ཤུལ་བཞག་སྲུང་སྐྱོབ་བཅས་ལ་དམིགས་པ་ཞིག་ཆགས་ཀྱི་འདུག མཛད་སྒོའི་ཐོག་མངའ་སྡེའི་སྤྱི་ཁྱབ་བློན་ཆེན་གཞོན་པས་ནང་པའི་ཤུལ་བཞག་གི་རིག་གནས་དེ་དག་མངའ་སྡེའི་རིག་གཞུང་དང་འབྲེལ་བའི་གཅེས་ནོར་གལ་ཆེན་ཞིག་ཡིན་པ་དང་། དེར་ཡུལ་སྐོར་སྤྲོ་འཆམ་རྒྱ་སྐྱེད་ཀྱི་ནུས་པ་ཆེན་པོ་ཡོད་ཅེས་བརྗོད་འདུག དེ་བཞིན་མཉམ་འབྲེལ་གྱི་གན་ཡིག་དེའི་བརྒྱུད་ནས་འཛམ་གླིང་ཡུལ་གྲུ་གང་ནས་ཕེབས་མཁན་རྣམས་ལ་ཆོས་ཕྱོགས་ཀྱི་མྱོང་བ་ཚད་ལྡན་བསྐྲུན་ཐབས་དང་ཆབས་ཅིག མངའ་སྡེ་གཞུང་གི་ངོས་ནས་ནང་པའི་རིག་གནས་དེ་དག་སྲུང་སྐྱོབ་ལ་ཆོད་སེམས་བརྟན་པོ་མཚོན་གྱི་ཡོད་པ་འགྲེལ་བརྗོད་གནང་འདུག རྩ་བའི་ལས་གཞི་དེའི་ནང་མངའ་སྡེ་གཞུང་དང་དགོན་པ་ཟུང་སྦྲེལ་གྱི་ཐོག་ནས་རྒྱལ་ཁབ་ཕྱི་ནང་གཉིས་ཀྱི་ལྟ་སྐོར་བ་རྣམས་ལ་སྒོམ་སྒྲུབ་དང་ཟབ་སྦྱོང་། ཆོས་ཕྱོགས་ཀྱི་སློབ་སྦྱོང་དང་གནས་མཇལ་གྱི་བྱེད་སྒོ་སོགས་ཚུད་པའི་ཆོས་ཕྱོགས་དང་ནང་སེམས་ཀྱི་མྱོང་བ་བཅས་ལ་དམིགས་ནས་ཡུལ་སྐོར་སྤྲོ་འཆམ་པའི་ལས་གཞི་གོང་འཕེལ་གཏོང་རྒྱུ་དང་། ལྷག་པར་རྒྱལ་སྤྱིའི་ཚོགས་འདུ་དང་ཟུང་སྦྲེལ་གྱི་ཉམས་ཞིབ། སློབ་གྲྭ་ཕན་ཚུན་ཤེས་ཡོན་བརྗེ་ལེན་གྱི་ལས་གཞི་བཅས་ཀྱི་བརྒྱུད་ནས་ནང་པའི་རིག་གཞུང་དར་འཕེལ་གཏོང་རྒྱུ་སོགས་ཀྱི་ལས་གཞི་ཡོད་པ་རེད་འདུག དེ་བཞིན་མངའ་སྡེའི་རིག་གཞུང་བློན་ཆེན་མཆོག་གིས། མངའ་སྡེ་ནང་ཡོད་པའི་ནང་པའི་རིག་གཞུང་དེ་དག་ནི་ཐུན་མོང་མིན་པའི་ལོ་རྒྱུས་དང་ལྟ་གྲུབ་ཟུང་ལྡན་གྱི་ཁྱད་ཆོས་ཞིག་མཚོན་གྱི་ཡོད་པ་སོགས་བརྗོད་འདུག རྒྱ་གར་གཞུང་གི་ངོས་ནས་ད་ལྟའི་ཆར་ཨོ་ཌི་ཤ་ནང་ཡོད་པའི་ Diamond Triangle འམ་རྡོ་རྗེ་གྲུ་གསུམ་དུ་གྲགས་པའི་ནང་པའི་གནས་གསུམ་སྟེ། Ratnagiri རཏྣ་གི་རི་དང་། […] The post རྒྱལ་སྤྱིའི་ཁྲོད་ཨོ་ཌི་ཤ་ནང་པའི་གནས་འབུར་ཐོན་དང་རིག་གནས་སྲུང་སྐྱོབ་ཆེད་བོད་པའི་དགོན་པ་ཞིག་དང་ལྷན་དུ་གན་རྒྱ་བཞག་འདུག appeared first on vot.

ཟླ་འདིའི་ཕྱི་ཚེས་ ༢ ཉིན་ཨ་རི་གྲོང་ཁྱེར་ནིའུ་ཡོག་ཏུ་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ཀྱི་མདུན་དུ་རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱིས་བོད་བསྟན་སྲིད་མི་རིགས་ཀྱི་ཆེད་དུ་སྐུ་ལུས་མེར་བསྲེགས་ཕུལ་བ་དང་བསྟུན། ནིའུ་ཡོག་གཙོས་པའི་ཁེ་ན་ཌ་དང་རྒྱ་གར། ཡོ་རོབ་སོགས་ཀྱི་ནང་ལས་འགུལ་རྣམ་པ་འདྲ་མིན་གྱི་ཐོག་ནས་སྤེལ་དང་སྤེལ་མུས་ཁྲོད། ཁ་སང་ཕྱི་ཚེས་ ༡༥ དེ་བཞིན་དམ་པ་དེ་ཉིད་ཀྱི་བདུན་ཚིགས་གཉིས་པ་འཁེལ་གྱི་ཡོད་སྟབས་ཐའེ་ཝན་གྱི་རྒྱལ་ས་ཐའེ་པེ་ནང་དང་། རྒྱ་གར་ལྷོ་ཕྱོགས་མའེ་སོར་གྲོང་ཁྱེར་སོགས་སུ་རྒྱ་ནག་ལ་ངོ་རྒོལ་ལས་འགུལ་རྒྱ་ཆེ་སྤེལ་འདུག དེ་ཡང་བརྒྱུད་ལམ་ཁག་ཏུ་དེ་འབྲེལ་གནས་ཚུལ་སྤེལ་བར་གཞིགས་ན། ཁ་སང་ཐའེ་ཝན་ནང་ཐའེ་ཝན་བོད་ཀྱི་སྐུ་ཚབ་དོན་གཅོད་དང་། བོད་རིགས་ཚོགས་པ། དེ་བཞིན་བོད་དང་ཐའེ་ཝན་འགྲོ་བ་མིའི་ཐོབ་ཐང་ཚོགས་པའི་སྣེ་ཁྲིད་འོག་ཁུལ་དེའི་ Liberty Square ཞེས་པའི་ས་ཚིགས་སུ་དགོང་མོ་ཕྱག་ཚོད་ ༧།༣༠ ཙམ་ལ་བོད་བརྒྱུད་ནང་བསྟན་གྱི་མཁན་བླ་སྤུལ་ཁག་དང་། བོད་མི་གཙོས་བོད་དོན་རྒྱབ་སྐྱོར་བ་དང་། འགྲོ་བ་མིའི་ཐོབ་ཐང་རྩོད་ལེན་པ་སོགས་མང་ཚོགས་ ༣༠༠ ཙམ་འདུ་འཛོམས་ཐོག་རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱི་ཆེད་མྱ་ངན་གུས་འདུད་དང་། འདི་ཚེས་ ༡ ནས་རྒྱ་ནག་གཞུང་གིས་ལག་བསྟར་བྱས་པའི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་ཟེར་བའི་ཁྲིམས་ལ་ངོས་ལེན་རྩ་བ་ནས་མེད་པའི་ལས་འགུལ་སྤེལ་འདུག་ཅིང་། དེ་འབྲེལ་ལས་འགུལ་ཁོངས་མཉམ་ཞུགས་གནང་མཁན་ཐའེ་ཝན་མི་སེར་ Tess Cheng ལགས་ཀྱིས་ཐེ་ཝན་དང་བོད། ཧོང་ཀོང་། ཤིན་ཅང་བཅས་ནི་རྒྱ་ནག་གི་ཡུན་རིང་གདུག་རྩུབ་ཅན་གྱི་སྲིད་བྱུས་འོག་གནས་བཞིན་ཡོད་པ་དང་། སྤྱིར་རྒྱལ་གཅེས་པ་ཁོང་གིས་སྐུ་ལུས་མེར་བསྲེགས་བཏང་གནང་བའི་དོན་རྐྱེན་དེ་བཞིན་ཕྱི་རྒྱལ་དུ་བྱུང་ཡོད་ཀྱང་། དེ་ནི་ང་ཚོའི་དཀའ་ངལ་དང་གཅིག་འགྱུར་ཆགས་ཀྱི་ཡོད་པ་གསུངས་འདུག འདི་ག་རླུང་འཕྲིན་ཁང་གིས་གནད་དོན་དེ་འབྲེལ་བོད་དང་ཐའེ་ཝན་གྱི་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་སྤྱི་ཁྱབ་དྲུང་ཆེ་བཀྲ་ཤིས་ཚེ་རིང་ལགས་སུ་བཀའ་འདྲི་ཞུས་ཡོད། དེ་བཞིན་དཔའ་བོོ་བློ་དགའ་རང་བཙན་ལགས་སུ་མྱ་ངན་མཚོན་ཆེད་ SFT-Itanagar ཞེས་ཨི་ཊ་ན་གྷར་བོད་རང་བཙན་སློབ་ཕྲུག་ཚོགས་པས་གཟའ་འཁོར་འདིའི་རེས་གཟའ་ཟླ་བ་སྟེ་འདི་ཚེས་ ༡༣ ཉིན་ཁུལ་དེའི་ཐུབ་བསྟན་དགའ་ཚལ་གླིང་དགོན་པར་མར་མེ་ཁྲོམ་སྐོར་གྱི་ལས་འགུལ་ཞིག་གོ་སྒྲིག་གནང་འདུག་པ་དང་། འདུ་འཛོམས་དེའི་ཚོགས་པས་ངོས་ནས་བོད་དོན་ལས་འགུལ་སྤེལ་རྒྱུའི་ཁས་ལེན་བསྐྱར་ནན་དང་ཆབས་ཅིག བོད་མི་ཡོངས་ལ་གདུང་སེམས་མཉམ་སྐྱེད་མུ་མཐུད་གནང་དགོས་པའི་འབོད་སྐུལ་ཞུས་འདུག་ཅིང་། ལས་འགུལ་དེའི་བརྒྱུད་རྒྱལ་སྤྱིའི་སྤྱི་ཚོགས་དང་འཛམ་གླིང་གི་དབུ་ཁྲིད་རྣམས་ལ་བོད་ཀྱི་གནད་དོན་ཞི་བདེ་དང་དྲང་བདེན། མཐུན་སྒྲིལ་གྱི་ཐོག་ནས་ཐག་གཅོད་གནང་པའི་འབད་བརྩོན་ལ་རྒྱབ་སྐྱོར་བྱེད་དགོས་པའི་འབོད་སྐུལ་གནང་འདུག མ་ཟད་རྒྱ་གར་ལྷོ་ཕྱོགས་མའེ་སོར་གྲོང་ཁྱེར་དུའང་སྦེལ་ཀོབ་དང་ཧུན་སུར། ཀོ་ལི་གྷར་བཅས་ཀྱི་དབུ་མའི་ལམ་གྱི་བོད་ཀྱི་གཞོན་ནུ་དང་། བུད་མེད་ལྷན་ཚོགས། དེ་བཞིན་མའེ་སོར་བཅའ་བཞུགས་བོད་རིགས་སློབ་ཕྲུག་མཐུན་ཚོགས་ནས་གོ་སྒྲིག་འོག་རྔམ་སྟོན་ལས་འགུལ་གནང་འདུག་པ་དང་། གཞན་ཡང་བསྟན་འཛིན་སྒང་དང་། Italy རྒྱལ་ས་ Rome སོགས་ནང་དུ་ལས་འགུལ་འདྲ་མིན་སྤེལ་ཡོད་པ་རེད། ཕྱོགས་མཚུངས་དམ་པ་ཁོང་གི་བདུན་ཚིགས་གཉིས་པ་དང་བསྟུན་དེ་རིང་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། བཞུགས་སྒར་རྡ་སའི་ཐང་ཁྲོམ་ཚོགས་པས་མཆོད་འབུལ་སྨོན་གོ་སྒྲིག་གནང་ཡོད་པ་དང་། འདི་ཚེས་ […] The post དཔའ་བོ་བློ་དགའ་རང་བཙན་ལགས་སུ་གདུང་སེམས་མཉམ་སྐྱེད་དང་རྒྱ་ནག་གི་ཁྲིམས་གསར་པར་ངོས་ལེན་མེད་པའི་ལས་འགུལ། appeared first on vot.

ཨོ་གླིང་དུ་རྟེན་གཞི་བྱས་པའི་ Rev. Bill Crews ཐེབས་རྩ་ཁང་དུ་༸སྐྱབས་རྗེ་ཀུན་བདེ་གླིང་རིན་པོ་ཆེ་མཆོག་དབུ་བཞུགས་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དེ་སྔ་ཨོསྟྲེ་ལི་ཡ་དང་ནིའུ་ཛི་ལེནྜ་ཁུལ་དུ་ཆིབས་བསྒྱུར་རིམ་པ་བསྐྱངས་པའི་པར་རིས་ཕྱག་དེབ་ ‘Ocean of Wisdom Over Southern Skies’ ཞེས་པ་ཞིག་དབུ་འབྱེད་གནང་འདུག འདི་གའི་གསར་འགོད་པས་གནས་ཚུལ་དེའི་སྐོར་ཨོ་གླིང་བོད་ཀྱི་སྐུ་ཚབ་དོན་གཅོད་ཀརྨ་སེང་གེ་ལགས་སུ་ཞལ་པར་བརྒྱུད་བཀའ་འདྲི་ཞུ་སྐབས་ཁོང་གིས།  པར་རིས་ཕྱག་དེབ་དེ་ཉིད་ཨོ་གླིང་བོད་ཀྱི་སྐུ་ཚབ་དོན་གཅོད་ལས་ཁངས་ཀྱི་རྐང་འགན་བཞེས་པའི་འོག་ Rev. Bill Crews ཐེབས་རྩ་དང་ལྷན་དུ་ཉམ་འབྲེལ་གྱིས་༸རྒྱལ་བའི་གོ་སྟོན་སྲུང་བརྩིའི་ལས་རིམ་གྱི་ཆ་ཤས་སུ་པར་བསྐྲུན་གནང་བ་ཞིག་ཡིན་པ་དང་།  ཕྱག་དེབ་དེའི་ནང་གཙོ་བོ་༸གོང་ས་མཆོག་དེ་སྔ་ཕྱི་ལོ་ ༡༩༨༢ ནས་ ༢༠༡༥ བར་ཨོསྟྲེ་ལི་ཡ་དང་ནིའུ་ཛི་ལེནྜ་ཁུལ་དུ་ཆིབས་བསྒྱུར་གྱིས་ཡུལ་དེ་གཉིས་ཀྱི་སྲིད་བློན་གཙོས་པའི་ཆོས་ཕྱོགས་དང་ཆབ་སྲིད་ཀྱི་གནད་ཡོད་མི་སྣ་མཇལ་འཕྲད་སོགས་ཀྱི་མཛད་འཕྲིན་བསྐྱངས་པའི་སྐབས་ཀྱི་པར་རིས་ཁག་འཁོད་ཡོད་པ་གསུངས་སོང་ལ།   ཕྱག་དེབ་དེ་ཉིད་དངོས་སུ་དབུ་འབྱེད་ཀྱི་མཛད་སྒོ་དེ་བཞིན་ཉེ་ཆར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༩༡ བདག་གིར་བཞེས་པའི་༸སྐུའི་འཁྲུངས་སྐར་སྲུང་བརྩི་དང་འབྲེལ་ཏེ་ཟླ་འདིའི་ཕྱི་ཚེས་ ༡༢ ཉིན་ཨོ་གླིང་དུ་རྟེན་གཞི་བྱས་པའི་ Rev. Bill Crews ཐེབས་རྩ་ཁང་དུ་༸སྐྱབས་རྗེ་ཀུན་བདེ་གླིང་རྟ་ཚག་རྗེ་དྲུང་རིན་པོ་ཆེ་མཆོག་དབུས་པའི་༸གོང་ས་མཆོག་དང་ཐུགས་འདྲིས་ཟབ་པའི་ཡེ་ཤུའི་ཆོས་དཔོན་ Bill Crews  དེ་བཞིན་ཁུལ་དེར་གནས་སྡོད་གནང་མཁན་ཡུན་རིང་ནས་བོད་དོན་ཐད་རྒྱབ་སྐྱོར་བ་ཁག་གཅིག་བཅས་འདུ་འཛོམས་ཐོག་འཚོགས་ཡོད་པ་གསུངས་སོང་།  ཕྱག་དེབ་དབུ་འབྱེད་ཀྱི་མཛད་སྒོའི་ཐོག་ ༸སྐྱབས་རྗེ་ཀུན་བདེ་གླིང་རིན་པོ་མཆོག་གིས་༸རྒྱལ་བའི་མཛད་འཕྲིན་སྐོར་དང་འབྲེལ་དམིགས་བསལ་གྱིས་༸གང་ཉིད་མཆོག་གི་ཐུགས་སྐྱེད་དམ་བཅའ་བཞི་དང་། ཆོས་ལུགས་ལ་མ་བརྟེན་པའི་བཟང་སྤྱོད། དེ་བཞིན་དུས་རྒྱུན་སྐུ་མདུན་གྱི་བྱམས་སྙིང་རྗེ་སྐོར་གྱི་བཀའ་སློབ་བཅས་ལུང་འདྲེན་གྱིས་གསུང་བཤད་གནང་ཡོད་པ་དང་།  རིན་པོ་ཆེ་མཆོག་གིས་ད་དུང་༸གོང་ས་༸སྐྱབས་མགོན་ཆེན་པོ་མཆོག་དང་བོད་དོན་ཐོག་སྔ་རྗེས་རྒྱབ་སྐྱོར་གནང་མཁན་ཨོསྟྲེ་ལི་ཡའི་གཞུང་དང་བོད་དོན་རྒྱབ་སྐྱོར་བ་ཡོངས་ལ་ཐུགས་རྗེ་ཆེ་ཞུས་གནང་འདུག་པ་མ་ཟད།  སྐབས་དེར་གདན་ཞུས་སྐུ་མགྲོན་གཞན་ཁག་གཅིག་གིས་དེ་སྔ་སྐུ་མདུན་ཁུལ་དེར་ཆིབས་བསྒྱུར་ཁྲོད་ཀྱི་མཇལ་འཕྲད་སྐོར་དང་འབྲེལ་རང་སོ་སོའི་མྱོང་ཚོར་གསུངས་ཡོད་པ་དང་།  ལྷག་པར་དུ་ཁོང་རྣམས་ནས་༸གོང་ས་མཆོག་དེ་སྔ་ཁུལ་དེར་ཆིབས་བསྒྱུར་རིམ་པ་བསྐྱངས་པ་དེ་དག་གིས་ཁོང་ཚོའི་མི་མང་ཁྲོད་བྱམས་སྙིང་རྗེ་དང་འཚེ་མེད་ཞི་བའི་བསམ་བློ་གོང་མཐོར་ཐད་ཕན་ཐོགས་ཆེན་པོ་བྱུང་ཡོད་སྐོར་གསུངས་འདུག  དེ་བཞིན་ཁོང་རྣམས་ནས་༸གང་ཉིད་མཆོག་ལ་ཆིབས་བསྒྱུར་ཁྲོད་ཞབས་ཞུ་ཕྲན་བུ་བསྒྲུབས་ཐུབ་པ་དེ་དག་ཁོང་རྣམས་ཀྱི་མི་ཚེ་ནང་གོ་སྐབས་རྩ་ཆེན་པོར་རྩིས་ཀྱི་ཡོད་ལ་སྤོབས་པའང་ཡོད་པ་གསུངས་འདུག་པ་མ་ཟད།  ༸གོང་ས་མཆོག་གི་བཀའ་དགོངས་གང་ཐུབ་ལག་ལེན་ཐུབ་པ་གནང་རྒྱུ་དང་སྤྱི་ཚོགས་ཁྲོད་དེ་དག་གོང་འཕེལ་ཐུབ་པར་གང་ཐུབ་འབད་བརྩོན་གནང་གི་ཡིན་བཅས་གསུངས་འདུག རྩ་བའི་ཟླ་འདིའི་ཕྱི་ཚེས་ ༡༢ ཉིན་ཨོ་གླིང་དུ་འཚོགས་པའི་༸གོང་ས་མཆོག་གི་ཆིབས་བསྒྱུར་དང་འབྲེལ་བའི་པར་རིས་ཕྱག་དེབ་ཀྱི་མཛད་སྒོའི་ཐོག་ཨོསྟྲེ་ལི་ཡ་ཨེ་ཤི་ཡའི་སྤྱི་འཐུས་སྐལ་བཟང་ཚེ་རིང་ལགས་ནས་ཀྱང་མཉམ་ཞུགས་ཀྱིས་༸རྒྱལ་བའི་སྐུ་ཚེའི་མཛད་འཕྲིན་སྐོར་དང་༸གང་ཉིད་མཆོག་གིས་འཚེ་མེད་ཞི་བ་དང་གྲོས་མོལ་ཐད་ཀྱི་ཆེད་སེམས་སྐོར་གསུང་བཤད་གནང་ཡོད་པ་མ་ཟད། ཉེ་ལམ་རྒྱ་ནག་གིས་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཡིག་ཟེར་བ་ལག་བསྟར་བྱེད་འགོ་བཙུགས་པའི་སྐོར་དང་དེས་བོད་ཐོག་སྤྱི་ཡོངས་ནས་ཤུགས་རྐྱེན་ཇི་ཡོད་སྐོར་བཅས་གསུངས་འདུག མཛད་སྒོའི་ཐོག་གཞན་ཡང་བོད་པའི་སྒྱུ་རྩལ་བ་གྲགས་ཅན་བསྟན་འཛིན་ཆོས་རྒྱལ་ལགས་གཙོས་པའི་སིཌ་ནི་གཟའ་མཇུག་སློབ་གྲྭའི་བོད་ཕྲུག་རྣམས་ནས་གཞས་སྣ་འཁྲབ་སྟོན་གཟིགས་འབུལ་ཡང་ཞུས་ཡོད་པ་རེད་འདུག The post ཨོ་གླིང་དུ་༸གོང་ས་མཆོག་གི་ཆིབས་བསྒྱུར་དང་འབྲེལ་བའི་པར་རིས་ཕྱག་དེབ་ཅིག་དབུ་འབྱེད་གནང་འདུག appeared first on vot.

ཉེ་ལམ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༩༡ བདག་གིར་བཞེས་པའི་༸སྐུའི་འཁྲུངས་སྐར་གྱི་དུས་ཚིགས་ཁྱད་པར་ཅན་དང་བསྟུན།  རྒྱ་གར་ལྷོ་ཕྱོགས་བྷང་ལོར་ས་གནས་སུ་ལྷོ་སྤྱི་དང་སྒོ་མང་མཁན་རིན་པོ་ཆེ་གཉིས་གཙོས་པའི་འབྲེལ་ཡོད་ལས་བྱེད་ཁག་གཅིག་བཅས་ནས་ཀར་ནཱ་ཊ་ཀ་མངའ་སྡེའི་སྲིད་སྐྱོང་མཆོག་དང་མཇལ་འཕྲད་ཀྱིས།  ༸རྒྱལ་བའི་མཛད་འཕྲིན་དང་བོད་ཀྱི་ཛ་དྲག་གནས་སྟངས་སྐོར་ངོ་སྤྲོད་གནང་འདུག་པ་མ་ཟད།  ཁུལ་དེར་རྟེན་གཞི་བྱས་པའི་མཐོ་སློབ་ཁག་གཅིག་གི་ནང་དེ་འབྲེལ་གཏམ་བཤད་ཀྱི་ལས་རིམ་དང་བོད་ཀྱི་རིག་གཞུང་མཚོན་པའི་གཞས་སྣ་འཁྲབ་སྟོན་གཟིགས་འབུལ་སོགས་ཀྱི་བརྒྱུད་༸རྒྱལ་བའི་འཁྲུངས་སྐར་སྲུང་བརྩི་རྒྱ་ཆེར་ཞུས་འདུག དེ་ཡང་འདི་ག་གསར་ཁང་ལ་འབྲེལ་ཡོད་ཀྱིས་གནས་ཚུལ་མཁོ་སྤྲོད་གནང་བ་གཞིར་བཟུང་ལྟར་ན།  ཉེ་ལམ་ལྷོ་སྤྱི་འཇིགས་མེད་ཚུལ་ཁྲིམས་ལགས་དང་འབྲས་སྤུངས་སྒོ་མང་གྲྭ་ཚང་གི་མཁན་རིན་པོ་ཆེ་འཇིགས་མེད་རྒྱ་མཚོ་ལགས་གཙོ་བོར་གྱུར་བའི་འབྲེལ་ཡོད་ལས་བྱེད་ཁག་གཅིག་བཅས་ནས་རྒྱ་གར་ལྷོ་ཕྱོགས་ཀར་ནཱ་ཊ་ཀ་མངའ་སྡེའི་སྲིད་སྐྱོང་སྐུ་ཞབས་ Thawar Chand Gehlot མཆོག་དང་མཇལ་འཕྲད་ཀྱིས།  ༸རྒྱལ་བའི་མཛད་འཕྲིན་དང་། ༸གང་ཉིད་མཆོག་གི་རླབས་ཆེན་གྱི་དགོངས་གཞི། ད་ལྟའི་བོད་ཀྱི་ཛ་དྲག་གནས་སྟངས་བཅས་ཀྱི་སྐོར་ངོ་སྤྲོད་གནང་ཡོད་པ།  དེ་བཞིན་རྒྱ་གར་གཞུང་དང་ལྷག་དོན་དུ་ཀར་ནཱ་ཊ་ཀ་མངའ་སྡེ་ནས་ད་བར་བོད་མིར་རྒྱབ་སྐྱོར་དང་རོགས་རམ་གནང་བར་དམིགས་བསལ་གྱིས་ཐུགས་རྗེ་ཆེ་ཞུས་གནང་འདུག་ལ།  སྐབས་དེར་མངའ་སྡེའི་སྲིད་སྐྱོང་མཆོག་གིས་ཀྱང་༸རྒྱལ་བའི་འཁྲུངས་སྐར་ལ་འཚམས་འདྲི་དང་འབྲེལ་སྙན་སེང་ཞུས་པའི་གནད་དོན་ཁག་གི་ཐད་ཐུགས་སྣང་ཆེན་པོས་བཀའ་མོལ་གནང་ཡོད་པ་རེད་འདུག  མ་ཟད་ཐེངས་འདིར་བོད་མིའི་སྒྲིག་འཛུགས་ཁྱབ་ཁོངས་ལྷོ་སྤྱི་ལས་ཁུངས་དང བྱེས་ཀྱི་གདན་ས་འབྲས་སྤུངས་སྒོ་མང་གྲྭ་ཚང་གཉིས་ཀྱིས་ཟུང་སྦྲེལ་ཐོག་རྒྱ་གར་ལྷོ་ཕྱོགས་བྷང་ལོར་གྲོང་ཁྱེར་ནང་དུ་ཟླ་འདིའི་ཕྱི་ཚེས་ ༨ ནས་བཟུང་ཉིན་གྲངས་གསུམ་ཙམ་གྱི་རིང་༸རྒྱལ་བའི་འཁྲུངས་སྐར་སྲུང་བརྩིའི་ཆ་ཤས་སུ་གོ་སྒྲིག་ཞུས་པའི་ལས་རིམ་ཁོངས་སུ་གཞན་ཡང་།  ཁུལ་དེར་རྟེན་གཞི་བྱས་པའི་རྒྱ་གར་གྱི་མཐོ་སློབ་ Jyoti Nivas College དང་། Mount Carmel College, St. Joseph’s University, Surana College, V.E.T First Grade College བཅས་སུ་སྒོ་མང་མཁན་རིན་པོ་ཆེ་འཇིགས་མེད་རྒྱ་མཚོ་ལགས་དང་ལྷོ་སྤྱི་འཇིགས་མེད་ཚུལ་ཁྲིམས་ལགས་གཉིས་ནས་༸རྒྱལ་བའི་ཐུགས་སྐྱེད་དམ་བཅའ་བཞིའི་སྐོར་གཙོས་པའི་ཆོས་ལུགས་ལ་མ་བརྟེན་པའི་བཟང་སྤྱོད་སྐོར་དང་།  ལྷག་པར་དུ་ཉེ་ལམ་རྒྱ་ནག་གིས་བཙན་དབང་ཐོག་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཡིག་ཟེར་བ་ལག་བསྟར་བྱས་པའི་སྐོར་དང་།  རྒྱལ་གཅེས་དཔའ་བོ་བློ་དགའ་རང་བཙན་ལགས་སོགས་བོད་ཕྱི་ནང་གཉིས་སུ་དབར་བོད་མི་ ༡༧༠ ཙམ་གྱིས་རྒྱ་ནག་ལ་ངོ་རྒོལ་མཚོན་བྱེད་དུ་རང་ལུས་མེར་བསྲེགས་བཏང་བ་བཅས་བོད་ཀྱི་ཛ་དྲག་གནས་སྟངས་ངོ་སྤྲོད་དང་།  དེ་འབྲེལ་དྲི་བ་དྲི་ལན་གནང་ཡོད་པ་མ་ཟད།  ཀ་ལོན་སྦུག་ནས་ཆེད་མངགས་ཕེབས་པའི་གངས་ལྗོངས་ཟློས་གར་ཚོགས་པའི་ངོས་ནས་བོད་ཀྱི་རིག་གཞུང་མཚོན་པའི་གཞས་སྣ་འཁྲབ་སྟོན་གཟིགས་འབུལ་ཡང་ཞུས་ཡོད་པ་རེད་འདུག དེའི་སྐོར་འདི་གའི་གསར་འགོད་པས་ལྷོ་སྤྱི་འཇིགས་མེད་ཚུལ་ཁྲིམས་ལགས་སུ་བཀའ་འདྲི་ཞུས་ཡོད།  The post རྒྱ་གར་ཀར་ནཱ་ཊ་ཀ་མངའ་སྡེའི་སྲིད་སྐྱོང་མཆོག་ལ་༸རྒྱལ་བའི་མཛད་འཕྲིན་དང་བོད་ནང་གི་ཛ་དྲག་གནས་སྟངས་ངོ་སྤྲོད། appeared first on vot.

དེ་རིང་སྤྲུལ་སྐུ་བསྟན་འཛིན་བདེ་ལེགས་མཆོག་རྒྱ་ནག་གཞུང་གིས་སྐུ་བཀྲོངས་ནས་ལོ་ ༡༡ འཁོར་བའི་ཉིན་མོ་དང་བསྟུན། བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་ No Tongue in Their Mouths: Allegations of Assault in Tenzin Delek Rinpoche’s Death ཞེས་སྤྲུལ་སྐུ་བསྟན་འཛིན་བདེ་ལེགས་དམ་པ་ཁོང་གི་ཚ་མོ་གྲོང་རྟ་ཚང་ཉི་མ་ལྷ་མོ་ལགས་ཀྱིས་བརྩམས་གནང་བའི་བདེ་དོན་གླེང་བའི་གཏམ་ཞེས་པའི་ཕྱག་དེབ་དབྱིན་སྒྱུར་ཞུས་པ་དེ་དབུ་འབྱེད་གནང་སོང་། དེ་ཡང་དེ་རིང་སྔ་དྲོ་ཕྱག་ཚོད་ ༡༡།༣༠ ཐོག་བཞུགས་སྒར་དུ་རྟེན་གཞི་བྱས་པའི་ནོར་བུ་གསོལ་མགྲོན་ཁང་གི་ཚོགས་ཁང་ནང་དུ། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་གོ་སྒྲིག་དང་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གི་ཞབས་ཞུ་ཚོགས་པའི་མཐུན་འགྱུར་འོག བོད་མི་མང་སྤྱི་འཐུས་ཚོགས་གཙོ་སྒྲོལ་མ་ཚེ་རིང་མཆོག་གདན་ཞུས་ཐོག་ནས་དབྱིན་སྒྱུར་ ཕྱག་དེབ་དེ་དབུ་འབྱེད་ཀྱི་མཛད་སྒོ་ཞིག་འཚོགས་སོང་། ཚོགས་གཙོ་སྒྲོལ་མ་ཚེ་རིང་མཆོག་གིས་དེ་རིང་ཉི་མ་ལྷ་མོ་ལགས་ཀྱིས་དབྱིན་སྒྱུར་ཕྱག་དེབ་དེ་དབུ་འབྱེད་དང་འབྲེལ་ནས་གསུང་བཤད་གནང་བའི་ཁྲོད། སྤྲུལ་སྐུ་བསྟན་འཛིན་བདེ་ལེགས་མཆོག་གི་སྐུ་ཚའི་ལོ་རྒྱུས་ཀྱི་གནད་འགག་ཅན་གྱི་གནད་དོན་རྣམས་གསལ་སྟོན་དང་སྦྲགས། ཁོང་ནི་བོད་ནང་གི་བོད་མི་ཚོའི་མནར་གཅོད་ཇི་ཙམ་མྱངས་ཡོད་མིིན་དང་བོད་ཀྱི་ཆོས་དང་རིག་གཞུང་། སྐད་ཡིག་གི་ཆེད་དུ་བློས་གཏོང་ཇི་ཙམ་གནང་ཡོད་མིན་གྱི་བདེན་དཔང་ར་སྤྲོད་གནང་མཁན་ཞིག་ཡིན་པ་ལྟར་ཁོང་ནི་སྙིང་སྟོབས་ཀྱི་དཔའ་བོ་ཞིག་ཡིན་པ་དང་། ང་ཚོས་ཁོང་གི་སྙིང་སྟོབས་དཔེར་བླངས་ཏེ་དོན་མེད་ཀྱི་ཆོལ་ཁ་ཆོས་ལུགས་དབྱེ་འབྱེད་ཀྱི་གནད་དོན་ལ་མགོ་འཁོར་ནས་བསྡད་རྒྱུ་མེད་པར་བོད་མི་རིགས་དང་བོད་ཀྱི་རྩ་དོན་ཆེད་དུ་ཞབས་འདེགས་སྒྲུབ་ཕྱོགས་ཐད་བསམ་བློ་གཏོང་དགོས་གལ་ཡིན་པ་གསུངས་སོང་།   ཁོང་གིས་ད་དུང་དེང་སྐབས་འཛམ་གླིང་གང་སར་རྒྱ་ནག་གི་འཁྱོག་བཤད་དྲིལ་བསྒྲགས་ཤུགས་ཆེ་འགྲོ་བཞིན་པའི་དུས་སྐབས་འདིར། ང་ཚོས་འདི་ལྟ་བུའི་བདེན་དཔང་ར་སྤྲོད་ཀྱི་ཕྱག་དེབ་དེ་དག་གང་མང་འགྲེམས་སྤེལ་གནང་དགོས་པའི་སྐུལ་མ་གནང་སོང་། སྐབས་དེར་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་བསྟན་འཛིན་ཟླ་བ་ལགས་ཀྱིས། ཕྱག་དེབ་འདི་པར་བསྐྲུན་ཞུས་པའི་དགོས་པ་དང་གནད་འགག་སྐོར་ལ་གཏམ་བཤད་སྤེལ་བའི་ཁྲོད། ཉི་མ་ལྷ་མོ་ལགས་ནི་བོད་ནང་རྒྱ་ནག་གཞུང་གིས་བོད་མིའི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གྱི་སྡུག་རྩུབ་ཇི་ཙམ་གཏོང་གི་ཡོད་མིན་གྱི་དཔང་པོ་གལ་ཆེ་ཞིག་ཡིན་པ་དང་འབྲེལ་ནས་ཁོང་གི་བརྩམས་གནང་བའི་ཕྱག་དེབ་དེ་བདན་དཔང་ར་སྤྲོད་ཀྱི་ཐད་ནས་ཧ་ཅང་གལ་ཆེན་པོ་ཆགས་ཀྱི་ཡོད་པ་དང་། ལྟེ་གནས་ཁང་གི་ངོས་ནས་བོད་པའི་མི་རབས་གཞོན་པ་ཚོར་བོད་ནང་གི་དངོས་ཡོད་གནས་སྟངས་དང་བོད་མིའི་དཀའ་སྡུག་དང་བློས་གཏོང་གི་སྐོར་ལ་གོ་རྟོགས་མང་ཙམ་འཕེལ་རྒྱུར་དམིགས་ཏེ་ད་རེས་ཕྱག་དེབ་དེ་པར་བསྐྲུན་ཞུས་ཡོད་པ་གསུངས་སོང་། སྐབས་དེར་མཛད་སྒོའི་ཐོག་ཕེབས་པའི་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གི་ཞབས་ཞུ་ཚོགས་པའི་ཚོགས་གཙོ་དང་ཆབ་སྲིད་བཙོན་ཟུར་དགེ་བཤེས་ཚེ་རིང་རྡོ་རྗེ་ལགས་ཀྱིས། ཁོང་ཐོག་མར་བོད་ནས་རྒྱ་གར་ལ་ཕེབས་པའི་སྐབས་སུ་རང་གི་བླ་མ་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གིས་བཙན་བྱོལ་ནང་དུ་བོད་ཀྱི་རྩ་དོན་ཆེད་དུ་ཕྱག་ལས་གནང་དགོས་པ་དང་། ཆོལ་ཁ་ཆོས་ལུགས་འཐེན་འཁྱེར་གྱི་ལས་དོན་རིགས་སྤེལ་རྒྱུ་མེད་པའི་ཞལ་ཆེམས་སློབ་གསོ་བསྐྱོན་ཡོད་པ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་འབྲེལ་བཀའ་སློབ་རིམ་པ་ཕེབས་ཡོད་པ་ལུང་འདྲེན་དང་སྦྲགས། བོད་མི་ཚང་མས་ཡིད་གཟབ་གནང་དགོས་པའི་སྐུལ་མ་གནང་བ་མ་ཟད། དེ་རིང་གི་མཛད་སྒོའི་ཐོག་བོད་ནང་གི་བོད་མི་ཁག་གཅིག་གིས་དྲྭ་ལམ་བརྒྱུད་བརྡ་ལན་གནང་བ་སྒྲོག་སྦྱང་གནང་སོང་བའི་ནང་དུ། བོད་ནང་གི་བོད་མི་རྣམས་ལ་ངོ་རྒོལ་ཁྲོམ་སྐོར་བྱེད་རྒྱུའི་རང་དབང་མེད་པ་དང་། ལྷག་པར་དུ་སྨྲ་བརྗོད་རང་དབང་རིགས་རྩ་བ་ནས་མེད་པ་དང་། རྒྱ་གཞུང་གིས་མཐའ་ན་བོད་ཀྱི་ས་ཁུལ་གྱི་མིང་ཡང་བརྗེ་པོ་རྒྱག་སྟེ་ངོ་མ་ཤེས་པ་བཟོ་བཞིན་པའི་ཛ་དྲག་གནས་སྟངས་ཡོད་པ་མ་ཟད། བོད་ནང་གི་བོད་མི་ཚོས་བཙན་བྱོལ་བོད་མི་རྣམས་ཀྱི་བོད་དོན་དྲིལ་བསྒྲགས་དང་ལས་འགུལ་སྤེལ་རྒྱུའི་རེ་བ་བློ་གཏད་བཅོལ་བཞིན་ཡོད་པ་དྲན་སྐུལ་གྱིས། བཙན་བྱོལ་བོད་མི་རྣམས་ནས་བོད་པའི་འདུ་ཤེས་ཤེས་པའི་ཐོག་ནས་ཤུགས་རྒྱག་དགོས་པའི་སྐུལ་འདེབས་ཞུས་གནང་འདུག དེ་བཞིན་དེ་རིང་གི་མཛད་སྒོའི་ཐོག་ཧི་མཱ་ལ་ཡའི་ཆོས་རིག་ཉམས་ཞིབ་པ་དང་དགེ་རྒན་རྡོ་རྗེ་རིན་ཆེན་ལགས་ཀྱང་ཆེད་ཕེབས་གནང་ཡོད་པ་ལྟར། ཁོང་ནས་སྤྲུལ་སྐུ་བསྟན་འཛིན་འཛིན་བདེ་ལེགས་རིན་པོ་ཆེའི་སྐོར་སྤེལ་བའི་ཕྱག་དེབ་རིམ་པའི་སྐོར་དང་དེ་དག་གི་གལ་གནད་སྐོར་གསུངས་བཤད་ནན་པོ་གནང་སོང་། The post སྤྲུལ་སྐུ་བསྟན་འཛིན་བདེ་ལེགས་མཆོག་གི་ཚ་མོ་ཉི་མ་ལྷ་མོའི་བདེ་དོན་གླེང་བའི་གཏམ་ཞེས་པའི་དབྱིན་སྒྱུར་ཕྱག་དེབ་དབུ་འབྱེད། appeared first on vot.

དེ་ཡང་ཟླ་འདིའི་ཕྱི་ཚེས་ ༢ ཉིན་ཨ་རི་གྲོང་ཁྱེར་ནིའུ་ཡོག་ཏུ་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ཀྱི་མདུན་དུ་རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱིས་བོད་བསྟན་སྲིད་མི་རིགས་ཀྱི་ཆེད་དུ་སྐུ་ལུས་མེར་བསྲེགས་ཕུལ་བ་དང་བསྟུན། ནིའུ་ཡོག་གཙོས་པའི་ཁེ་ན་ཌ་དང་རྒྱ་གར། ཡོ་རོབ་སོགས་ཀྱི་ནང་ལས་འགུལ་རྣམ་པ་འདྲ་མིན་གྱི་ཐོག་ནས་སྤེལ་དང་སྤེལ་མུས་ཁྲོད། ཨ་རིའི་ནིའུ་ཡོག་དང་ནིའུ་ཇར་སིའི་བོད་རིགས་སྤྱི་མཐུན་ཚོགས་པའི་འགན་འཁུར་འོག་ནིའུ་ཡོག་གི་མཉམ་འབྲེལ་རྒྱལ་ཚོགས་ཀྱི་མདུན་དུ་དཔའ་བོ་དམ་པ་བློ་དགའ་རང་བཙན་ལགས་དང་འབྲེལ་བའི་དྲན་རྟེན་གྱི་འདྲ་སྐུ་ཞིག་བཞེངས་རྒྱུའི་ལས་འགུལ་སྤེལ་མུས་ཡིན་པ་རེད་འདུག དྲན་རྟེན་གྱི་འདྲ་སྐུ་དང་འབྲེལ་བའི་ལས་འགུལ་ནང་ actionnetwork.org ཞེས་པའི་དྲྭ་གནས་ཐོག་མཚན་རྟགས་བསྡུ་རུབ་གནང་བཞིན་འདུག་པས་ད་བར་མི་གྲངས་ ༡༠༥༧༩ ཡི་མཚན་རྟགས་བཀོད་འདུག་པ་དང་། འཆར་གཞི་ལ་གཞིགས་ན་ནིའུ་ཡོག་མཉམ་འབྲེལ་རྒྱལ་ཚོགས་ཀྱི་མདུན་དུ་དཔའ་བོ་བློ་དགའ་རང་བཙན་ལགས་ཀྱི་འདྲ་སྐུ་ཞིག་བཞེངས་རྒྱུ་དང་བོད་ཀྱི་རྒྱལ་དར་ཞིག་སྒྲེང་འཛུགས་གནང་རྒྱུ་ཡིན་པ་མ་ཟད། དཔའ་བོ་དམ་པ་ཁོང་གི་མཐའ་མའི་ཞལ་ཆེམས་དེ་བཞིན་ཚིག་ཐོ་ཐོག་བཀོད་རྒྱུ་ཡིན་པ་རེད་འདུག གནས་ཚུལ་དེ་འབྲེལ་འདི་ག་རླུང་འཕྲིན་ཁང་ལ་ཨ་རིའི་ནིའུ་ཡོག་དང་ནིའུ་ཇར་སིའི་ས་གནས་གཞོན་ནུ་ལྷན་ཚོགས་ཀྱི་ཚོགས་ཟུར་བློ་བཟང་ཚེ་རིང་ལགས་ཀྱིས་བརྗོད་དོན་ལྟར་ན། རེས་གཟའ་ཕུར་བུའམ་བདུན་ཚིགས་རེ་ལ་ས་གནས་གཞོན་ནུ་ལྷན་ཚོགས་ཀྱི་གོ་སྒྲིག་འོག་མཉམ་འབྲེལ་རྒྱལ་ཚོགས་ཀྱི་མདུན་དུ་ལས་འགུལ་འདྲ་མིན་སྤེལ་རྒྱུ་ཡིན་པ་འགྲེལ་བརྗོད་དང་སྦྲགས། བོད་ཀྱི་བུད་མེད་ལྷན་ཚོགས་ནས་ཀྱང་ཟས་བཅད་ངོ་རྒོལ་གྱི་ལས་འགུལ་སྤེལ་རྒྱུ་ཡིན་པ་དང་སྒེར་སོ་སོ་ནས་ཆོས་ཕྱོགས་ཀྱི་ལས་འགུལ་སོགས་སྤེལ་དང་སྤེལ་མུས་ཡིན་པ་མ་ཟད། དཔའ་བོ་དམ་པ་བློ་དགའ་རང་བཙན་ལགས་དང་འབྲེལ་བའི་དྲན་རྟེན་གྱི་འདྲ་སྐུ་ཞིག་བཞེངས་རྒྱུའི་འཆར་གཞི་ཡོད་པ་དང་དེའི་ལས་འགུལ་སྤེལ་མུས་ཡིན་པ་འགྲེལ་བརྗོད་གནང་སོང་། ཕྱོགས་མཚུངས་དཔའ་བོ་བློ་དགའ་རང་བཙན་ལགས་དང་འབྲེལ་བའི་འཛམ་གླིང་ས་ཕྱོགས་གང་སར་ངོ་རྒོལ་གྱི་ལས་འགུལ་སྤེལ་མུས་ཁྲོད། དེ་རིང་རྒྱ་གར་ཀོལ་ཀ་ཊ་རྒྱ་ནག་གཞུང་ཚབ་ཁང་གི་མདུན་དུ་གཞུང་ཁོངས་མ་ཡིན་པའི་ཚོགས་པ་ཁག་གཅིག་མཉམ་སྦྲེལ་ཐོག་ངོ་རྒོལ་གྱི་ལས་འགུལ་སྤེལ་འདུག་པ་དང་། ཡོ་རོབ་དང་ཁེ་ན་ཌ་གཙོས་པའི་ས་ཕྱོགས་གང་སར་དཔའ་བོ་དམ་པ་ཁོང་དང་འབྲེལ་བའི་མཆོས་འབུལ་སྨོན་ལམ་དང་མར་མེ་ཁྲོམ་སྐོར་སོགས་ཀྱི་བརྒྱུད་ནས་ཁོང་ཉིད་རྗེས་དྲན་གནང་བཞིན་པ་རེད་འདུག སྤྱིར་རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱིས་རྒྱལ་ཚོགས་མདུན་དུ་རང་ལུས་མེར་བསྲེགས་བརྒྱུད་རང་ཉིད་ཀྱི་གཅེས་པའི་ལུས་སྲོག་བློས་བཏང་གི་ལས་འགུལ་དེ་བཞིན་རྒྱ་ནག་གིས་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཡིག་ཟེར་བ་དངོས་སུ་ལག་བསྟར་བྱེད་འགོ་ཚུགས་ནས་ཉིན་གཅིག་གི་རྗེས་སུ་སྤེལ་བ་ཞིག་ཆགས་ཡོད། ཨ་རིར་རྟེན་གཞི་བྱས་པའི་རྒྱལ་སྤྱི་བོད་དོན་ལས་འགུལ་ཁང་གིས་རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱིས་བློས་བཏང་ལ་མྱ་ངན་གུས་འདུད་དང་འབྲེལ། མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཟེར་བ་དེའི་བརྒྱུད་ནས་བོད་ཀྱི་ཆོས་དང་རིག་གཞུང་སོགས་རྩ་མེད་དུ་གཏོང་རྒྱུའི་ཉེན་ཁ་ཡོད་པ་འགྲེལ་བརྗོད་ཀྱིས། མཚན་རྟགས་བསྡུ་རུབ་ཀྱི་ལས་འགུལ་བརྒྱུད་ནས་ཨ་རིའི་གྲོས་ཚོགས་འཐུས་མི་རྣམས་ལ་ཞུ་གཏུགས་ཀྱི་ལས་འགུལ་དབུ་འཛུགས་གནང་འདུག དེིའི་ཁྲོད་བོད་དོན་ལས་འགུལ་ལྟེ་གནས་ཁང་གི་ངེས་སྟོན་པ་བཀྲས་མཐོང་ལྷ་སྒྲོན་ལགས་ཀྱིས་ངོ་དེབ་བརྒྱུད་བསྒྲགས་གཏམ་ཞིག་སྤེལ་བའི་ནང་། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གཙོ་འཛིན་ Volker Turk ལགས་ཀྱིས་ད་བར་བོད་ནང་གི་འགྲོ་བ་མིའི་ཐོབ་ཐང་དང་ལྷག་པར་དུ་རྒྱ་ནག་གིས་བཙན་དབང་ཐོག་ལག་བསྟར་བྱེད་བཞིན་པའི་བཅའ་སྡོད་སློབ་གྲྭའི་སྐོར་ཚིག་གཅིག་ཀྱང་བཤད་མེད་པ་ནན་བརྗོད་དང་སྦྲགས། བོད་རིགས་གཙོ་བོར་འགྱུར་བའི་འགྲོ་བ་མིའི་ཐོབ་ཐང་རྩོད་ལེན་པ་རྣམས་ཀྱི་མཚན་རྟགས་བསྡུ་རུབ་ཀྱི་ལས་འགུལ་ཞིག་སྤེལ་འདུག་པ་དང་། ད་བར་མི་གྲངས་ ༡༦༦༠ ཡི་མཚན་རྟགས་བཀོད་ཟིན་པ་རེད་འདུག The post རྒྱལ་ཚོགས་ཀྱི་མདུན་དུ་དཔའ་བོ་བློ་དགའ་རང་བཙན་ལགས་ཀྱི་དྲན་རྟེན་འདྲ་སྐུ་བཞེངས་རྒྱུའི་ལས་འགུལ་སྤེལ་བཞིན་པ། appeared first on vot.

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ལ་དྭགས་བྱང་ཐང་ཁུལ་དུ་འཚམས་གཟིགས་ཀྱིས་མང་ཚོགས་ལ་གསུང་བཤད་གནང་བའི་ཁྲོད།   ཁུལ་དེར་འཛུགས་སྐྲུན་གྱི་ལས་གཞི་གང་དང་གང་ཡིན་རུང་མ་འོངས་ཕུགས་རྒྱང་རིང་པོར་དམིགས་ཏེ་འཆར་གཞི་ལྡན་པའི་འོག་ནས་སྤེལ་དགོས་པ་དང་།  ལ་དྭགས་གླེ་བྱང་ཚུད་པའི་བོད་མིའི་རུབ་སྡོད་ས་ཁུལ་ཆ་ཚང་ཚགས་ཚུད་དགོས་གལ་ཡིན་པ་མ་ཟད།  སྤྱི་ནོར་༸གོང་༸སྐྱབས་མགོན་ཆེན་པོ་མཆོག་གི་མཛད་འཕྲིན་ལ་ངེས་པར་དུ་བཀའ་དྲིན་རྗེས་དྲན་ཞུ་དགོས་པའི་སྐུལ་མ་གནང་འདུག  རྩ་བའི་ཉེ་ལམ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༩༡ བདག་གིར་བཞེས་པའི་༸སྐུའི་འཁྲུངས་སྐར་ལ་དྭགས་སུ་སྲུང་བརྩི་གཟབ་རྒྱས་དང་བསྟུན།  བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ནས་གསར་དུ་འདེམས་ཐོན་བྱུང་བའི་བཀའ་ཤག་སྐབས་བཅུ་བདུན་པའི་ཚབ་བྱས་ཏེ་ཁུལ་དེར་ཆེད་ཕེབས་ཀྱིས། ལ་དྭགས་བསོད་ནམས་གླིང་བོད་མིའི་གཞིས་ཆགས་དང་། བོད་ཕྲུག་ཁྱིམ་སྡེ། རྒས་གསོ་ཁང་བཅས་སུ་འཚམས་གཟིགས་གནང་ཡོད་པ་དང་།  ཕྱི་ཚེས་ ༩ ཉིན་སྲིད་སྐྱོང་མཆོག་ནས་ལ་དྭགས་བྱང་ཐང་ཉོ་མར་འཚམས་གཟིགས་ཀྱིས་མི་མང་ལ་གསུང་བཤད་གནང་ཡོད་པ་མ་ཟད།  ཕྱི་ཚེས་ ༡༠ ཉིན་ལ་བྱང་བཀག་གཞུང་དང་། རྒོད་ཡུལ། ཧན་ལེ་བཅས་སུ་འཚམས་གཟིགས་དང་འབྲེལ་མང་ཚོགས་ལ་གསུང་བཤད་གནང་ཡོད་པ།  ལྷག་པར་དུ་ཐེངས་འདིའི་ལ་བྱང་ཁུལ་དུ་འཚམས་གཟིགས་དེ་བཞིན་སླར་ཡང་སྲིད་སྐྱོང་དུ་འདེམས་ཐོན་བྱུང་བའི་སྤེན་པ་ཚེ་རིང་མཆོག་གིས་འཚམས་གཟིགས་གནང་བ་ཐེངས་གསུམ་པ་དེ་ཆགས་ཀྱི་ཡོད་པ་རེད།  སྲིད་སྐྱོང་སྤེན་པ་ཚེ་རིང་མཆོག་གིས་ལ་དྭགས་བྱང་ཐང་གི་མང་ཚོགས་ལ་གནད་དོན་མང་དག་ཅིག་གི་ཐོག་གསུང་བཤད་གནང་བའི་ཁོངས་སུ་གཙོ་བོ།  སྲིད་སྐྱོང་མཆོག་གིས་ཐེངས་འདིར་གླེ་བྱང་ཁུལ་དུ་རྟོག་ཞིབ་ཁྲོད་ས་གནས་དེར་ཡར་རྒྱས་གང་ལ་གང་ཙམ་ཕྱིན་ཡོད་པ་མངོན་རྒྱུ་འདུག་སྐོར་དང་འབྲེལ།  བོད་མིའི་སྒྲིག་འཛུགས་ཀྱི་ཕྱག་ལས་ནང་ནས་གལ་ཆེ་བ་གཅིག་ནི་གཞུང་དང་མི་མང་བར་འབྲེལ་བ་ཡག་པོ་ཉར་ཚགས་བྱ་རྒྱུ་དེ་ཡིན་པས།  བཀའ་ཤག་སྐབས་བཅུ་བདུན་པའི་ངོས་ནས་བོད་མིའི་འདུ་སྡོད་ས་གནས་ཁག་ཏུ་དེ་སྔོན་ལྟར་ཐེངས་གཉིས་རེ་འཚམས་གཟིགས་གནང་རྒྱུ་གལ་ཆེན་དོན་ཆེན་དུ་བརྩི་ཡི་ཡོད་པ་དང་།  བཙན་བྱོལ་སྤྱི་ཚོགས་ཀྱི་རྨང་གཞི་དེ་བཞིན་བོད་མིའི་གཞིས་ཆགས་དང་རུབ་སྡོད་ས་ཁུལ་རེ་རེ་ཡན་ཆད་ཀྱིས་མཚོན་གྱི་ཡོད་པ་མ་ཟད།  དེས་སྤྱི་ཡོངས་ཀྱི་བོད་མིའི་སྒྲིག་འཛུགས་ཀྱང་རང་བཞིན་གྱི་ཡག་པོ་ཞིག་ཆགས་རྒྱུ་ཡིན་དུས།  གླེ་བྱང་ཚུད་པའི་བོད་མིའི་རུབ་སྡོད་ས་ཁུལ་ཁག་ཚགས་ཚུད་དགོས་གལ་དང་།  གང་ལྟར་ཁུལ་འདིར་འཛུགས་སྐྲུན་གྱི་ལས་གཞི་གང་ཞིག་སྤེལ་གྱི་ཡོད་པ་དེ་དག་མ་འོངས་ལོ་མང་པོར་དམིགས་ཏེ་འཆར་གཞི་ལྡན་པའི་ཐོག་ནས་གནང་དགོས་པ་གསུངས་འདུག  ལྷག་པར་དུ་རྒྱལ་སྤྱིའི་སྤྱི་ཚོགས་ནས་ད་བར་བོད་མིའི་སྒྲིག་འཛུགས་ལ་དཔལ་འབྱོར་གྱི་རོགས་རམ་མཚོན་པའི་སྲིད་སྐྱོང་ལ་གུས་ཞབས་སྣེ་ལེན་གང་ཐོབ་ཀྱི་ཡོད་པ་དེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་ཉག་ཅིག་ལ་བརྟེན་ནས་ཡོང་གི་ཡོད་པ་དང་།  ༸མགོན་པོ་མཆོག་གིས་བཀའ་དགོངས་དབུ་མའི་ལམ་གྱི་གནད་འགག་སྐོར་ངོ་སྤྲོད་གནང་བ་མ་ཟད།  ༸གང་ཉིད་མཆོག་གི་ཐུགས་སྐྱེད་དམ་བཅའ་བཞི་སྟེ་དུས་ཀྱི་དགོས་མཁོ་དང་མཐུན་པའི་བཀའ་སློབ་ལམ་སྟོན་ཤ་སྟག་ཡིན་པ་དང་།  ༸གོང་ས་མཆོག་གིས་བོད་བརྒྱུད་ནང་བསྟན་ཏེ་བྱམས་སྙིང་རྗེ་དང་འཚེ་བ་མེད་པའི་རྩ་བ་ཚུགས་པའི་བསམ་བློའི་འཁྱེར་སོ་ཞིག་ཡིན་དུས་དེས་འཛམ་གླིང་ཡོངས་ལ་ཕན་ཐོགས་སྒྲུབ་ཐུབ་ཀྱི་ཡོད་པ་སོགས་བཀའ་སྩལ་མཛད་ཀྱི་ཡོད་པ་དག་ལ་དོ་སྣང་གནང་དགོས་པའི་དྲན་སྐུལ་གྱིས།  ༸གོང་ས་མཆོག་དགུང་གྲངས་ ༡༣༠ ལྷག་སྐུ་འཚོ་བཞུགས་མཛད་རྒྱུའི་ཞལ་བཞེས་ཡོད་ཀྱང་དེར་བླ་སློབ་ཀྱི་དམ་ཚིག་ཡག་པོ་དགོས་གལ་ཡིན་པ་དང་།  ༸མགོན་པོ་མཆོག་གིས་མུ་མཐུད་མཛད་པ་འཕྲིན་ལས་སྐྱོང་བཞིན་པ་ཁག་ལ་མི་མང་ཚོས་བཀའ་དྲིན་རྗེས་དྲན་ཞུ་དགོས་གལ། དེ་བཞིན་ང་རང་ཚོའི་བཙན་བྱོལ་སྤྱི་ཚོགས་ནང་གི་གནས་ཚུལ་ཆུང་ཆུང་རིགས་ཀྱིས་༸སྐུ་མདུན་ཐུགས་སུན་པོ་བཟོ་མི་དགོས་པ་ཞིག་ངེས་པར་དུ་གནང་དགོས་པ་གསུངས་འདུག་ལ།  ༸གང་ཉིད་སྐུ་འཚོ་བཞུགས་མེད་པའི་དུས་སུ་བོད་མིའི་སྒྲིག་འཛུགས་ལ་ད་ལྟ་བཞིན་ཆེ་མཐོང་མུ་མཐུད་ཐོབ་པའི་རེ་བ་དང་ང་ཚོའི་ངོས་ནས་ཀྱང་༸གོང་ས་མཆོག་གིས་སོན་བཏབ་གནང་མཛད་པའི་མང་གཙོའི་ལམ་ལུགས་མུ་མཐུད་རྒྱུན་སྐྱོང་ཐུབ་པ་གནང་དགོས་གལ་ཡིན་པ་གསུངས་འདུག  ལྷག་པར་དུ་སྲིད་སྐྱོང་མཆོག་གིས་མང་ཚོགས་ལ་བོད་ཀྱི་སྣོད་ཀྱི་བྱུང་རབས་ལོ་རྒྱུས་དང་དེང་དུས་རྒྱལ་སྤྱིའི་ས་ཁམས་ཆབ་སྲིད་སྐོར་ངོ་སྤྲོད་དང་འབྲེལ།  ད་ལྟའི་རྒྱ་ནག་རྒྱལ་ཁབ་སྟེ་ཕྱི་ཕྱོགས་ནས་བལྟས་ན་སྟོབས་ཤུགས་ཆེན་པོ་ཞིག་ཏུ་སྣང་གི་ཡོད་ཀྱང་སྲིད་གཞུང་ནང་ལོག་ལ་དཔོན་རིགས་ཕན་ཚུན་དོགས་པ་རྣམ་རྟོག་གི་ཁེངས་ཡོད་པ་མ་ཟད།  ཆབ་སྲིད་སོགས་གང་སྤྱིའི་ཐད་ནས་ཕྱི་གསལ་ནང་གསལ་མེད་པ་སོགས་ཐེར་འདོན་གྱིས།  ཉེ་ལམ་རྒྱ་ནག་གིས་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཡིག་ལག་བསྟར་བྱས་པའི་སྐོར་གསུངས་ཏེ།  ད་ལྟའི་རྒྱ་ནག་གིས་བྱེད་བབ་ལ་བལྟས་ན་སྐད་ཆ་བཤད་སའི་ལམ་ཁ་མེད་པ་དེ་ལྟར་ཡང་སྒོ་རྒྱབ་ཀྱི་འབྲེལ་བ་མུ་མཐུད་རྒྱུན་སྐྱོང་གནང་བཞིན་ཡོད་པ་གསུངས་འདུག མ་ཟད་སྲིད་སྐྱོང་མཆོག་གིས་ད་ལྟ་བྱང་ཐང་ཉོ་མར་ཁྱིམ་ཚང་ ༣༡ དང་། རྒོད་ཡུལ་དུ་ ༢༥། ཧན་ལེར་ཁྱིམ་ཚང་ ༨༦ བཅས་བྱང་ཐང་ཁུལ་གྱི་ས་ཁུལ་བཞིའི་ནང་གྲོང་པ་ ༢༠༠ ཙམ་ཡོད་པའི་གནས་སྟངས་གསལ་འདོན་དང་འབྲེལ།  ཁུལ་དེར་ཡུལ་སྐོར་སྤྲོ་འཆམ་པ་མང་དུ་འགྲོ་ཡི་ཡོད་པ་དང་།  བོད་མི་གནས་སྤོས་གནང་མཁན་ཡང་ཕྲན་བུ་འབྱུང་གི་ཡོད་དུས།  […] The post སྲིད་སྐྱོང་མཆོག་གིས་ལ་དྭགས་བྱང་ཐང་ཁུལ་དུ་འཚམས་གཟིགས་ཁྲོད་བོད་མིའི་རུབ་སྡོད་ས་ཁུལ་ཁག་ཚགས་ཚུད་དགོས་གལ་ཡིན་པ་གསུངས་འདུག appeared first on vot.

བོད་དོན་ལ་ཡུན་རིང་རྒྱབ་སྐྱོར་གནང་མཁན་ཨ་རིའི་གྲོས་ཚོགས་འཐུས་མི་ Lindsey Graham ལིནྜ་སི་གྷ་ར་ཧམ་ལགས་འདི་ཚེས་ ༡༡ ཉིན་སྙུང་གཞི་རྐྱེན་པས་དགུང་ལོ་ ༧༡ ཐོག་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་ཐོན་འདུག དེ་ཡང་དམ་པ་ཁོང་གིས། དེ་སྔོན་ཕྱི་ལོ་ ༢༠༢༠ ལོར་བོད་དོན་རྒྱབ་སྐྱོར་གྱི་ཁྲིམས་ཡིག་ Tibet Policy and Support Act 2020 དང་། ༢༠༢༤ ལོར་བོད་རྒྱའི་རྩོད་རྙོག་སེལ་ཐབས་ཀྱི་ཁྲིམས་ཡིག Resolve Tibet Act བཅས་ལ་རྒྱབ་སྐྱོར་གནང་ཡོད་པ་དང་། ཉེ་ལམ་ཕྱི་ཟླ་ ༦ ཚེས་ ༢༥ ཉིན་ཨ་རིར་རྟེན་གཞིས་བྱས་པའི་རྒྱ་ནག་གཞུང་ཚབ་ལ་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཡིག་ཟེར་བ་དེས་བོད་མི་སོགས་ཀྱི་སྐད་ཡིག་དང་རིག་གཞུང་ཐད་ཉེན་འཚབ་ཆེ་བས་ཕྱིར་བསྡུ་དགོས་པའི་དགོས་འདུན་བཏོན་མཁན་ཁོངས་སུ་ཡོད་པ་རེད། མ་ཟད་ཕྱི་ལོ་ ༢༠༡༨ ལོའི་སྲིད་འཛིན་ Trump ཊོམཔ་ཀྱིས་འཆར་འབུལ་ཞུས་པའི་ཨ་རིའི་སྔོན་རྩིས་ཁྲོད་བོད་མི་ཚོར་རོགས་དངུལ་སྤྲོད་རྒྱུ་མཚམས་འཇོག་གནང་འཆར་ལ་གྲོས་ཚོགས་ནས་རྒྱབ་སྐྱོར་གནང་རྒྱུ་མེད་པའི་ཞུ་སྙན་བསྡུ་རུབ་ཀྱི་ལས་འགུལ་ཞིག་སྤེལ་བའི་སྐབས། དམ་པ་ཁོང་ཨ་རིའི་གྲོས་ཚོགས་འཐུས་མི་དང་གྲོས་ཚོགས་ཀྱི་སྔོན་རྩིས་བསྐྱར་ཞིབ་ཚོགས་ཆུང་གི་ཚོགས་མི་ཡིན་པ་སོགས་བོད་དོན་ལ་ཡུན་རིང་ནས་རྒྱབ་སྐྱོར་གནང་མཁན་ཞིག་ཡིན་པ་རེད་འདུག རྩ་བའི་དམ་པ་ཁོང་ནི་ཕྱི་ལོ་ ༡༩༥༥ ལོར་སྐྱེས་ཤིང་། ཕྱི་ལོ་ ༢༠༠༣ ནས་བཟུང་འདས་གྲོངས་སུ་མ་གྱུར་བར་ South Carolina ལྷོ་ཀེ་རོ་ལི་ནཱའི་ཁུལ་གྱི་གྲོས་ཚོགས་འཐུས་མི་ཞིག་ཡིན་པ་རེད་འདུག ཕྱོགས་མཚུངས་ཕྱི་ཚེས་ ༡༡ ཉིན་བོད་ཀྱི་ཟློས་གར་ཚོགས་པའི་སྒྱུ་རྩལ་སློབ་ཁྲིད་འགན་འཛིན་ཟུར་པ་རྒན་བློ་བཟང་བསམ་གཏན་ལགས་དགུང་ལོ་ ༦༩ སྟེང་ཀེ་ལི་ཕོར་ནི་ཡའི་སྨན་ཁང་ཞིག་གི་ནང་དུ་སྐུ་ཚེའི་མ་ཟིན་པའི་ཡིད་སྐྱོའི་གནས་ཚུལ་ཐོན་འདུག་པ་དང་། དེ་རིང་བོད་ཀྱི་ཟློས་གར་ཚོགས་པའི་གཞུང་འབྲེལ་དྲ་ཚིགས་ཐོག་སྤེལ་བའི་གནས་ཚུལ་ནང་གསལ་ལྟར་ན། བོད་ཀྱི་ཟློས་གར་ཚོགས་པའི་དབུ་ལས་ཚོགས་མི་ཡོངས་ནས་བསྔོ་སྨོན་གསོལ་འདེབས་དང་གདུང་སེམས་མཉམ་སྐྱེད་ཞུས་འདུག རྩ་བའི་རྒན་བློ་བཟང་བསམ་གཏན་དམ་པ་དེ་ཉིད་ཕྱི་ལོ་ ༡༩༥༧ ལོར་གཙང་གྲུམ་པ་གླིང་དཀྱིལ་ཞེས་པའི་ཁྱིམ་ཚང་དུ་ཕ་སངས་རྒྱས་རྡོ་རྗེ་དང་། […] The post བོད་དོན་རྒྱབ་སྐྱོར་བ་ཨ་རིའི་གྲོས་ཚོགས་འཐུས་མི་ཞིག་དང་བོད་ཀྱི་ཟློས་གར་ཚོགས་པའི་སྒྱུ་རྩལ་སློབ་ཁྲིད་འགན་འཛིན་ཟུར་པ་གཉིས་སྐུ་ཚེ་མ་ཟིན་པའི་ཡིད་སྐྱོའི་གནས་ཚུལ་ཐོན་འདུག appeared first on vot.

ཕྱི་ལོ་ ༢༠༢༦ ཟླ་བ་ ༧ ཚེས་ ༦ ནས་ ༨ བར་ཉིན་གྲངས་གསུམ་རིང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་རྗེས་དྲན་དང་། འཛམ་གླིང་ཞི་བདེ་ལ་དམིགས་པའི་ཡུ་རོབ་ཆོ་འཕྲུལ་སྨོན་ལམ་ཆེན་མོ་ཐེངས་དང་པོ་དེ་ཧྥ་རན་སིའི་རྒྱལ་ས་པེ་རི་སིར་འཚོགས་འདུག ལོ་རྒྱུས་རང་བཞིན་ལྡན་པའི་ཆོ་འཕྲུལ་སྨོན་ལམ་ཆེན་མོ་དེར་༸སྐྱབས་རྗེ་དགའ་ལྡན་ཁྲི་རིན་པོ་ཆེ་མཆོག་དང་། མཚུངས་མེད་ཤར་བྱང་ཆོས་རྗེ་རྣམ་པ་གཉིས་གཙོས་པའི་རིས་མེད་ཀྱི་སྐྱེས་ཆེན་དམ་པ་ཁག་གཅིག་དབུ་བཞུགས་གནང་འདུག་ལ། ཡུ་རོབ་ཁུལ་དུ་ཆོ་འཕྲུལ་སྨོན་ལམ་ཆེན་མོ་གོ་སྒྲིག་ཞུ་དགོས་པའི་དམིགས་ཡུལ་གཙོ་བོ་དེ། ནང་པ་སངས་རྒྱས་པའི་བསྟན་པ་དར་ཞིང་རྒྱས་པ་དང་། ལྷག་པར་ཡུ་རོབ་ཁུལ་དུ་འཛམ་གླིང་དམག་ཆེན་གཉིས་ཀྱི་སྐབས་སུ་རྐྱེན་འདས་སུ་ཕྱིན་པ་དང་། ནད་ཡམས་དབང་གིས་ཚེ་ལས་འདས་པ་ཡོངས་ལ་བསྔོ་སྨོན་དང་། འཛམ་གླིང་ཞི་བདེ་ཡོང་བའི་ཆེད་དུ་ཡིན་པ་གོ་སྒྲིག་ཚོགས་ཆུང་ནས་འགྲེལ་བརྗོད་གནང་གི་འདུག The post ཧྥ་རན་སིའི་རྒྱལ་ས་པེ་རི་སིར་ཡུ་རོབ་ཆོ་འཕྲུལ་སྨོན་ལམ་ཆེན་མོ་ཐེངས་དང་པོ་སྐོང་འཚོགས། appeared first on vot.

ཁ་སང་ཨ་རིའི་ནང་གི་ཕྱི་ཚེས་ ༩ ཉིན་རྒྱབ་ནིའུ་ཡོག་ཏུ་ཡོད་པའི་རྒྱལ་ཚོགས་ལས་ཁུངས་ཀྱི་རྒྱལ་སྒོའི་མདུན་དུ་བོད་མི་ལས་འགུལ་བ་གསུམ་ནས་རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱི་བློས་བཏང་ལ་དྲང་བདེན་དགོས་པའི་དགོས་འདུན་ཐོག་ངོ་རྒོལ་ལས་འགུལ་སྤེལ་འདུག དེ་ཡང་ཁ་སང་རྒྱལ་གཅེས་དཔའ་བོ་བློ་དགའ་རང་བཙན་ལགས་དམ་པའི་བདུན་ཚིགས་དང་པོར་རྗེས་དྲན་ཞུ་ཕྱིར་ཉིན་རྒྱབ་ཕྱག་ཚོད་ ༣.༢༥ ཙམ་ལ་ཨ་རི་བོད་རང་བཙན་སློབ་ཕྲུག་ཚོགས་པ་ནས་ཚེ་ལྷ་ རྫོགས་སངས་ལགས་དང་། བསྟན་འཛིན་དཀོན་མཆོག་ལགས། བསྟན་འཛིན་ཚེ་བརྟན་ལགས་བཅས་གསུམ་གྱིས་ཕྱག་ཏུ་རྒྱལ་གཅེས་པ་བློ་དགའ་ལགས་ཀྱིས་བོད་རང་བཅན་ཆེད་སྐུ་ལུས་མེར་བསྲེགས་གནང་བ་དང་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་ནས་བོད་ཐོག་ཁ་ཁུ་སིམ་པོར་སྡོད་རྒྱུ་མཚམས་འཇོག་དགོས་པ་སོགས་ཀྱི་དགོས་འདུན་སྦྱར་ཡིག་རྣམས་འཕྱར་བཞིན་རྒྱལ་ཚོགས་ཀྱི་ལས་ཁུངས་ལྕགས་ཁྲའི་རྒྱལ་སྒོར་རང་ཉིད་ལྕགས་ཐག་གིས་བཅིངས་ནས་རྒྱལ་སྒོའི་འགྲོ་ལམ་བཀག་འགོག་གིས་ངོ་རྒོལ་སྐད་འབོད་གནང་སྐབས་ཉེན་རྟོག་པས་ལས་འགུལ་བ་གསུམ་པོ་འཛིན་བཟུང་གིས་ཆུ་ཚོད་ ༤ བཀར་ཉར་རྗེས་གློད་བཀྲོལ་བཏང་འདུག  དེའི་སྐོར་ཨ་རི་བོད་རང་བཙན་སློབ་ཕྲུག་ཚོགས་པའི་འགན་འཛིན་བསྟན་འཛིན་སྨིན་ལེགས་ལགས་སུ་དེ་རིང་སྔ་དྲོ་ཞལ་པར་བརྒྱུད་བཀའ་འདྲི་ཞུས་ཡོད། ཐེངས་འདིའི་ངོ་རྒོལ་ལས་འགུལ་དང་འབྲེལ་ཨ་རི་བོད་རང་བཙན་སློབ་ཕྲུག་ཚོགས་པས་གསར་འགོད་བསྒྲགས་གསལ་བསྒྲགས་ཤིག་འདོན་སྤེལ་གནང་བའི་བརྒྱུད། བོད་མི་གཞོན་སྐྱེས་ཚོས་འཛམ་གླིང་མཉམ་འབྲེལ་རྒྱལ་ཚོགས་དང་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་གཙོ་འཛིན་སྐུ་ཞབས་ Volker Türk ལགས་སུ་བོད་ཀྱི་གནད་དོན་ཐོག་ཁ་ཁུ་སིམ་པོར་སྡོད་རྒྱུ་མེད་པ་དང་རྒྱལ་ཚོགས་ཀྱིས་གནད་འགག་ཆེ་བའི་དུས་སྐབས་འདིར་རྒྱལ་གཅེས་དཔའ་བོ་བློ་དགའ་རང་བཙན་ལ་དྲང་བདེན་གྱི་རྒྱབ་སྐྱོར་མཚོན་པའི་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐད་ཡ་ལན་གང་ཡང་མ་བྱས་སྟབས། གོ་ལ་ཡོངས་ལ་བོད་དོན་ཐོག་ལས་འགུལ་སྤེལ་དགོས་པའི་སྐུལ་མ་གནང་བཞིན་ཡོད་ལ། ལྷག་པར་དུ་རྒྱལ་གཅེས་པ་བློ་དགའ་རང་བཙན་ལགས་དམ་པའི་སྙིང་སྟོབས་ཀྱིས་འཛམ་གླིང་ཡོངས་ཀྱི་བོད་མི་ཚོར་སེམས་ཤུགས་སྤོར་བཞིན་ཡོད་པས་ཁོང་ཚོས་ཀྱང་བོད་ཀྱི་གནད་དོན་ཐད་རང་ཉིད་ཀྱི་ལས་དོན་སྒྲུབ་རྒྱུ་ཡིན་ཞེས་ནན་བཤད་གནང་འདུག ཁ་སང་རྒྱལ་ཚོགས་ཀྱི་རྒྱལ་སྒོའི་མདུན་དུ་ལྕགས་ཐག་གིས་བཅིངས་ནས་ངོ་རྒོལ་གནང་མཁན་ཁོངས་སུ་ཡོད་པ་ཨ་རི་བོད་རང་བཙན་སློབ་ཕྲུག་ཚོགས་པའི་ལས་འགུལ་བ་ཚེ་ལྷ་རྫོགས་སངས་ལགས་ཀྱིས་གསར་འགོད་པའི་དྲི་བར་ལན་འདེབས་ཁྲོད། རྒྱ་ནག་གིས་ལོ་ངོ་བཅུ་ཕྲག་མང་པོའི་རིང་བོད་ལ་དམ་དྲག་ཤུགས་ཆེ་བྱས་ཡོད་ལ། བོད་མི་ ༡༧༠ ལྷག་གིས་རྒྱ་གཞུང་ལ་ངོ་རྒོལ་གྱིས་སྐུ་ལུས་མེར་བསྲེགས་གནང་སྟེ་ཉིན་ཞིག་རང་དབང་ལྡན་པའི་བོད་ཅིག་མཐོང་ཐུབ་པའི་རེ་འདུན་བཅངས་ཡོད་སྐོར་གསུངས་པ་མ་ཟད། ཟླ་བ་འདིའི་ཕྱི་ཚེས་ ༡ ནས་གཞུང་འབྲེལ་གྱིས་ལག་བསྟར་བྱེད་འགོ་བཙུགས་པའི་རྒྱ་ནག་གི་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཟེར་བ་དེ་མི་རིགས་བཙན་སྒྱུར་གྱི་སྲིད་བྱུས་ཤིག་ཡིན་པས་བོད་མིའི་ངོ་བོར་ཉེན་ཁ་ཆེན་པོ་བཟོ་བཞིན་ཡོད་པར་སྐྱོན་བརྗོད་གནང་འདུག སྐབས་དེར་ལས་འགུལ་ནང་མཉམ་ཞུགས་གནང་མཁན་ཁེ་ན་ཌར་གནས་བཞུགས་བོད་མི་ལས་འགུལ་བ་འཆི་མེད་ལྷ་མོ་ལགས་ཀྱིས་མཉམ་འབྲེལ་རྒྱལ་ཚོགས་ཀྱིས་ཡང་ནས་ཡང་དུ་བོད་དང་བོད་ནང་གི་གནས་སྟངས་ཇི་བྱུང་ཐད་བརྗེད་པ་དང་སྣང་མེད་གཏོང་བཞིན་པར་འགྱུར་བ་འདོད་ཀྱི་ཡོད་པ་ནན་བརྗོད་དང་སྦྲགས། རྒྱལ་ཚོགས་ལ་བོད་ནང་བཀམ་སྡོམ་མེད་པའི་འགྲོ་འོང་དང་ཞིབ་འཇུག་བྱེད་ཆོག་པའི་རང་དབང་སྤྲོད་དགོས་པའི་རེ་སྐུལ་ཞུས་པ་མ་ཟད། རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་གཙོ་འཛིན་ལ་བོད་ནི་རྒྱལ་ཁབ་ཅིག་ཡིན་པས་གྲངས་ཉུང་མི་རིགས་ཤིག་མིན་པས་ངེས་པར་དུ་བོད་སྐོར་གླེང་དགོས་པ་བརྗོད་འདུག རྩ་བའི་ཁ་སང་ནིའུ་ཡོག་བོད་མི་ལས་འགུལ་བ་གསུམ་གྱིས་རྒྱལ་ཚོགས་ཀྱི་ལས་ཁུངས་མདུན་དུ་ངོ་རྒོལ་གནང་བཞིན་པའི་དུས་ཡུན་སྐར་མ་འགའ་ཤས་རྗེས་ནིའུ་ཡོག་དང་ནིའུ་ཇར་སི་ས་གནས་བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲོག་འོག་ས་གནས་བོད་མི་མང་ཚོགས་ནས་ས་ཚིགས་དེ་རང་དུ་དགོང་དྲོ་ཆུ་ཚོད་ ༤ ནས་ ༧ པའི་བར་ངོ་རྒོལ་སྐད་འབོད་ཀྱི་ལས་འགུལ་ཤུགས་ཆེ་སྤེལ་བའི་བརྒྱུད་རྒྱལ་གཅེས་པ་བློ་དགའ་རང་བཙན་ལགས་དམ་པའི་བདུན་ཚིགས་དང་པོར་རྗེས་དྲན་ཞུས་འདུག  The post ནིའུ་ཡོག་བོད་མི་ལས་འགུལ་བ་གསུམ་གྱིས་རྒྱལ་ཚོགས་ཀྱི་ལས་ཁུངས་མདུན་དུ་ལྕགས་ཐག་བཅིངས་ནས་ངོ་རྒོལ་གནང་བ། appeared first on vot.

ཨ་རིའི་རྒྱལ་ས་ཝ་ཤིང་ཊོན་ཌི་སི་ནང་དུ་ཡུལ་དེའི་ཕྱི་སྲིད་ལས་ཁུངས་ཁྱབ་ཁོངས་བོད་དོན་དམིགས་བསལ་འབྲེལ་མཐུད་པ་མཆོག་དབུ་བཞུགས་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༩༡ ལ་ཕེབས་པའི་༸སྐུའི་འཁྲུངས་སྐར་སྲུང་བརྩི་ཞུས་འདུག དེ་ཡང་རྒྱལ་སྤྱིའི་བོད་དོན་ལས་འགུལ་ཁང་གིས་གནས་ཚུལ་སྤེལ་བར་གཞིགས་ན། ཁ་སང་ཕྱི་ཚེས་ ༩ ཉིན་བྱང་ཨ་རིའི་སྐུ་ཚབ་དོན་ཁང་དུ་གོ་སྒྲིག་ཞུས་པའི་མཛད་སྒོ་དེའི་ཐོག་སྐུ་མགྲོན་དུ་ཨ་རིའི་བོད་དོན་དམིགས་བསལ་འབྲེལ་འཐུད་པ་སྐུ་ཞབས་ Riley Barnes མཆོག་དང་། བྱང་ཨ་རིའི་སྐུ་ཚབ་དོན་གཅོད་རྣམ་རྒྱལ་ཆོས་འགྲུབ་ལགས། དེ་བཞིན་རྒྱལ་སྤྱིའི་བོད་དོན་ལས་འགུལ་ཁང་གི་ཚོགས་གཙོ་བསྟན་ཆོས་རྒྱ་མཚོ་ལགས་ཀྱི་གཙོས་གཞུང་དང་གཞུང་ཁོངས་མིན་པའི་ཚོགས་པ་ཁག་གི་སྐུ་ཚབ་རྣམ་པ། ས་གནས་ཀྱི་མི་མང་སོགས་མཉམ་ཞུགས་གནང་འདུག མཛད་སྒོའི་ཐོག་ཨ་རིའི་བོད་དོན་དམིགས་བསལ་འབྲེལ་འཐུད་པ་སྐུ་ཞབས་ Riley Barnes མཆོག་གིས། ད་ལན་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཁུངས་སྐར་སྲུང་བརྩི་ཞུ་རྒྱུའི་གོ་སྐབས་ཐོབ་པ་དེར་དགའ་སྤོབས་པ་དང་སྦྲགས། ད་དུང་ཡང་མ་འོངས་པར་མུ་མཐུད་ནས་ད་ལན་གྱི་འཁྲུངས་སྐར་གྱི་མཛད་སྒོ་དེ་བཞིན་མང་པོ་འཚོགས་རྒྱུ་བྱུང་བའི་རེ་བ་ཡོད་ཅེས་གསུངས་པ་དང་འབྲེལ། ༸གོང་ས་༸སྐྱབས་མགོན་ཆེན་པོ་མཆོག་གི་འཁྲུངས་སྐར་ལ་འཚམས་འདྲི་ཞུས་པ་མ་ཟད། ༸གང་ཉིད་མཆོག་གི་སྙིང་རྗེ་དང་གཏོང་ཕོད། བརྩེ་བ་ལྡན་པའི་ཐུགས་ཀྱི་ཡོན་ཏན་སྐོར་ལ་བཀའ་སློབ་གནང་འདུག དེ་བཞིན་བྱང་ཨ་རིའི་སྐུ་ཚབ་དོན་གཅོད་རྣམ་རྒྱལ་ཆོས་འགྲུབ་ལགས་ཀྱིས་མཛད་རིམ་འདི་ལྟ་བུ་ནི་༸གོང་ས་མཆོག་གི་འཁྲུངས་སྐར་གྱི་དུས་ཚིགས་ཁོ་ན་སྲུང་བརྩི་ཞུ་རྒྱུ་ཙམ་མ་ཡིན་པར། གཙོ་བོ་༸གང་ཉིད་མཆོག་གི་འཚེ་མེད་ཞི་བ་དང་ཆོས་ལུགས་མཐུན་སྒྲིལ། དེ་བཞིན་མིའི་བཟང་སྤྱོད་ཀྱི་རིན་ཐང་གོང་མཐོར་སོགས་དང་འབྲེལ་བའི་ཐུགས་ཀྱི་དགོངས་པ་གོང་འཕེལ་སླད་དམིགས་བསལ་གྱི་གནད་འགག་ཆེན་པོ་ཆགས་ཡོད་སྐོར་གསུངས་པ་མ་ཟད། ༸གང་ཉིད་ཀྱི་དགོངས་པ་དེ་དག་ནི་དེང་གི་དུས་སྐབས་སུ་ཧ་ཅང་དགོས་མཁོ་ཆེན་པོ་ཡིན་པ་ནན་བརྗོད་གནང་འདུག ཕྱོགས་མཚུངས་རྒྱལ་སྤྱི་བོད་དོན་ལས་འགུལ་ཁང་གི་ཚོགས་གཙོ་བསྟན་ཆོས་རྒྱ་མཚོ་ལགས་ཀྱིས་ད་ལན་འཛམ་གླིང་ས་ཕྱོགས་གང་སར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཁྲུངས་སྐར་གཟབ་རྒྱས་ངང་སྲུང་བརྩི་ཞུ་བཞིན་པ་ཡིན་ཡང་། ཉེ་ཆར་རྒྱལ་ཚོགས་ཀྱི་མདུན་དུ་རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱིས་སྐུ་ལུས་མེར་བསྲེགས་བཏང་བའི་གནས་ཚུལ་དེས་བོད་པའི་སྤྱི་ཚོགས་ཡོངས་ལ་སེམས་སྡུག་ཆེན་པོ་ཞིག་བཟོས་ཡོད་པ་འགྲེལ་བརྗོད་དང་སྦྲགས། ཁོང་གི་བློས་བཏང་དེའི་བརྒྱུད་ནས་བོད་མི་ཡོངས་ཀྱིས་རེ་བ་མ་བརླག་པར་བྱམས་བརྩེའི་ཐོག་ནས་བོད་ཀྱི་བདེན་མཐའ་གསལ་ཆེད་མུ་མཐུད་ནས་འཐབ་རྩོད་གནང་རྒྱུ་ནན་སྐུལ་ཞུས་ཡོད་པ་མ་ཟད། ད་ལན་བོད་མི་ཡོངས་ཀྱིས་མྱ་ངན་ཞུ་བཞིན་པའི་ཐོག་༸གོང་ས་༸སྐྱབས་མགོན་ཆེན་པོ་མཆོག་གི་འཚེ་མེད་ཞི་བའི་ལམ་ལ་བཞུགས་རྒྱུའི་སེམས་ཤུགས་གསར་པ་ཞིག་བསྐྲུན་ཡོད་པ་གསུངས་འདུག རྩ་བའི་ཟླ་འདིའི་ཕྱི་ཚེས་ ༦ ཉིན་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༩༡ བདག་གིར་བཞེས་པའི་༸སྐུའི་འཁྲུངས་སྐར་དེ་བཞིན་འཛམ་གླིང་ཡོངས་ལ་སྲུང་བརྩི་གཟབ་རྒྱས་ངང་ཞུས་ཡོད་པ་མ་ཟད། སྐབས་དེར་རྒྱལ་སྤྱིའི་དབུ་ཁྲིད་སོགས་ནས་མགོན་པོ་༸གང་ཉིད་མཆོག་ལ་འཚམས་འདྲི་ཞུས་ཡོད་པའི་ཁྲོད།  ཨ་རིའི་བོད་དོན་དམིགས་བསལ་འབྲེལ་འཐུད་པ་སྐུ་ཞབས་ Riley Barnes མཆོག་ནས་ཀྱང་ X སྤྱི་ཚོགས་དྲྭ་ལམ་བརྒྱུད་༸གོང་ས་༸སྐྱབས་མགོན་ཆེན་པོ་མཆོག་གི་འཁྲུངས་སྐར་ལ་འཚམས་འདྲི་དང་སྦྲགས། ཁོང་ཉིད་ཀྱིས་མུ་མཐུད་ནས་བོད་ཀྱི་ཆོས་དང་རིག་གཞུང་། སྐད་ཡིག་བཅས་ཉམས་པ་སོར་ཆུད་དང་མི་ཉམས་རྒྱུན་འཛིན་གྱི་ཐད་མུ་མཐུད་རྒྱབ་སྐྱོར་དང་ཤུགས་སྣོན་གནང་རྒྱུ་ཡིན་པ་གསུངས་ཡོད་པ་རེད། The post ཨ་རིའི་བོད་དོན་དམིགས་བསལ་འབྲེལ་འཐུད་པ་མཉམ་ཞུགས་ཐོག་༸སྐུའི་འཁྲུངས་སྐར་སྲུང་བརྩི། appeared first on vot.

སྲིད་སྐྱོང་སྤེན་པ་ཚེ་རིང་མཆོག་གིས་ཁ་སང་ལ་དྭགས་བསོད་ནམས་གླིང་གཞིས་མི་རྣམས་ལ་གསུང་བཤད་ཁྲོད། ཉེ་ལམ་ཨ་རིའི་རོགས་དངུལ་ཆད་པའི་རྐྱེན་གྱིས་བོད་མིའི་སྒྲིག་འཛུགས་ལ་དཀའ་ངལ་ཏོག་ཙམ་ཕྲད་ཀྱང་། ད་ཆ་དངུལ་སྐོར་ལ་ཁྱེད་ཚོས་སེམས་ཁྲལ་བྱེད་མི་དགོས་ཅེས་གསུངས་པ་དེ་ལྟར་ཡང་།  བོད་མི་རྣམས་ཀྱིས་སྒྲིག་འཛུགས་ནས་རོགས་རམ་སོགས་ཞུ་སྐབས་དངོས་ཡོད་དགོས་ངེས་ཅན་ཡིན་ན་མ་གཏོགས་གཞན་གྱི་གོ་སྐབས་འཕྲོག་རྒྱུ་མེད་པའི་སྐུལ་མ་གནང་འདུག དེའང་སྲིད་སྐྱོང་སྤེན་པ་ཚེ་རིང་མཆོག་ད་སྐབས་ལ་དྭགས་ཀྱི་རྒྱལ་ས་གླེ་ནང་གཞུང་འབྲེལ་ཕྱོགས་སྐྱོད་གནང་བཞིན་པ་ལྟར། ཁ་སང་ཕྱི་ཚེས་ ༧ གྱི་སྔ་དྲོ་ལ་དྭགས་བསོད་ནམས་གླིང་ཚོགས་ཁང་དུ་ཆེད་ཕེབས་ཀྱིས་མི་མང་ལ་ཆུ་ཚོད་གཅིག་ལྷག་ཙམ་གསུང་བཤད་གནང་འདུག སྐབས་དེར་སྲིད་སྐྱོང་མཆོག་གིས་ད་སྐབས་རྒྱ་ནག་དེ་ཉིད་དཔལ་འབྱོར་གྱི་ཆ་ནས་འཛམ་གླིང་གི་རྒྱལ་ཁབ་སྟོབས་ཆེ་ཤོས་གྲས་ཤིག་ཆགས་ཡོད་པ་མ་ཟད། འཛམ་གླིང་ཐོག་ཤུགས་རྐྱེན་ཉིན་རེ་བཞིན་ཇེ་ཆེར་འགྲོ་བཞིན་པ་ལྟར། ཆབ་སྲིད་ཀྱི་བ་རླབས་འདི་ལྟ་བུའི་ནང་བོད་ཀྱི་གནད་དོན་དེ་ཉིད་གསོན་པོར་གནས་ཐུབ་པ་བྱ་རྒྱུ་དང་གོ་སྐབས་ཤར་སྐབས་དམ་འཛིན་བྱ་རྒྱུ་གལ་ཆེ་ཡིན་པ་ལྟར། དེ་འབྲེལ་བཀའ་ཤག་ངོས་ནས་རྒྱལ་སྤྱིའི་དབུ་ཁྲིད་རྣམ་པའི་ཁྲོད་བོད་དོན་ཞུ་གཏུགས་སོགས་ཀྱི་བརྒྱུད་ནས་འབད་བརྩོན་གང་ཐུབ་གནང་བཞིན་ཡོད་སྐོར་གསུངས་པ་དེ་ལྟར་ཡང་། ཕྱོགས་གཞན་ནས་རྒྱ་ནག་གི་སྲིད་འཛིན་ཞི་ཅིན་ཕིང་གིས་སྣེ་འཁྲིད་པའི་རྒྱ་དམར་གཞུང་དེ་ཉིད། Autocratic Capitalist Under the Garb of Communism ཞེས་དམར་ཤོག་གི་འབག་གྱོན་པའི་དབང་ཆ་གཅིག་བསྡུས་ཀྱིས་མ་རྩའི་རིང་ལུགས་པ་ཞིག་ལ་འགྲེལ་བརྗོད་གནང་བ་མ་ཟད། དེའང་ཞེད་སྣང་གི་ཁོར་ཡུག་ལྡན་ཞིང་དམངས་གཞི་བརྟན་པོ་མེད་པའི་གནས་སྟངས་ཤིག་གི་འོག་ལུས་ཡོད་པའང་འགྲེལ་བརྗོད་གནང་འདུག སྲིད་སྐྱོང་མཆོག་གི་ད་དུང་ལ་དྭགས་ཀྱི་ས་གནས་མང་ཚོགས་ལ་བོད་མིའི་སྒྲིག་འཛུགས་ཀྱི་དཔལ་འབྱོར་གནས་སྟངས་སྐོར་ལ་འགྲེལ་བརྗོད་དང་འབྲེལ། དེ་སྔ་དཀའ་ངལ་བྱུང་ཡང་ད་ཆ་དངུལ་ཐོག་ཁྱེད་ཚོས་སེམས་ཁྲལ་བྱེད་མི་དགོས་ཅེས་གསུངས་འདུག ཕྱོགས་མཚུངས་བོད་མིའི་སྒྲིག་འཛུགས་ངོས་ནས་ཡོང་རྒྱུའི་ལོ་ཤས་ནང་སྤྱི་བའི་འཛུགས་བསྐྲུན་གྱི་ལས་དོན་ལ་དོ་སྣང་ཆེ་ཙམ་གནང་རྒྱུའི་འཆར་གཞི་ཡོད་པ་འགྲེལ་བརྗོད་དང་འབྲེལ། ལ་དྭགས་ནང་མཚོན་ན་སྐྱབས་རྗེ་ཁྲིག་སེ་རིན་པོ་ཆེ་མཆོག་གིས་བོད་མིའི་སྡོད་ཁང་ཆེད་ས་ཁྱོན་གང་ཙམ་གསོལ་སྩལ་གནང་བ་ལུང་འདྲེན་གྱིས། བཙན་བྱོལ་བོད་མིའི་མི་འབོར་ནང་བརྒྱ་ཆ་བཅུ་ཙམ་ད་ལྟའང་སྡོད་ཁང་མེད་མཁན་ཆགས་ཡོད་སྟབས། བོད་མི་ཚོས་དགོས་ངེས་ཅན་ཡིན་ན་མ་གཏོགས་སྒྲིག་འཛུགས་ནས་རོགས་རམ་སོགས་ཞུ་སྐབས་གཞན་གྱི་གོ་སྐབས་འཕྲོག་རྒྱུ་མེད་པའི་སྐུལ་མ་གནང་འདུག མ་ཟད་སྲིད་སྐྱོང་སྤེན་པ་ཚེ་རིང་མཆོག་གིས་ད་སྐབས་ལ་དྭགས་གཙོས་བཙན་བྱོལ་བོད་མི་ཁག་གཅིག་གིས་རྒྱ་གར་ཡུལ་མིའི་ཁེ་དབང་བཞེས་ཏེ་འོས་འཕེན་ལག་འཁྱེར་བཟོ་བཞིན་པའི་གནད་དོན་གླེང་སློང་དང་འབྲེལ། གནད་དོན་དེའི་ཐོག་ངེས་པར་དུ་བསམ་ཞིབ་བྱ་དགོས་པ་དང་། ལྷག་པར་ཡུལ་མིའི་ཆབ་སྲིད་ཀྱི་གནད་དོན་ནང་ཐེ་གཏོགས་མ་བྱེད་པར་རང་སར་གནས་དགོས་པའི་ལམ་སྟོན་གནང་འདུག སྲིད་སྐྱོང་མཆོག་གིས་གཞན་ཡང་གསུང་བཤད་དེའི་ཁྲོད་དབུ་མའི་ལམ་གྱི་འཕེལ་རིམ་དང་གལ་ཆེའི་རང་བཞིན། བོད་རྒྱའི་དཀའ་རྙོག་དེ་ཞི་བའི་ལམ་ནས་སེལ་དགོས་པ། བཀའ་ཤག་གི་ཕུགས་དམིགས་ཡིག་ཆ་དང་ལས་གཞི་ཁག་སོགས་ངོ་སྤྲོད་གནང་བ་མ་ཟད། རྒྱ་ནག་གིས་མི་རིགས་མཐུན་སྒྲིལ་ཡར་ཐོན་སྐུལ་སྤེལ་ཁྲིམས་ཡིག་ཐད་ཕྱི་ཟླ་ ༩ པའི་ནང་ལས་འཆར་ཁག་བང་སྒྲིག་བཞིན་པ་ལྟར། སྲིད་སྐྱོང་མཆོག་བཞུགས་སྒར་དུ་ཕྱིར་ལོག་གནང་མ་ཐག་བཀའ་ཤག་ལྷན་རྒྱས་རིམ་པ་སྐོང་འཚོག་གིས་བོད་མི་རིགས་ཀྱི་ངོ་བོ་སྲུང་སྐྱོབ་དང་འབྲེལ་བའི་གནད་དོན་ཐད་གོ་བསྡུར་གནང་རྒྱུ་ཡིན་པ་གསུངས་འདུག The post བོད་མིའི་སྒྲིག་འཛུགས་ཀྱི་དཔལ་འབྱོར་གནས་སྟངས་ཐད་ཁྱེད་ཚོས་སེམས་ཁྲལ་བྱེད་མི་དགོས་གསུངས་འདུག appeared first on vot.

ཉེ་ཆར་ཨ་རིའི་ནིའུ་ཡོག་གྲོང་ཁྱེར་དུ་གནས་བཞུགས་བོད་རང་བཙན་འཐབ་རྩོད་པ་བློ་དགའ་རང་བཙན་ལགས་ཀྱིས་རྒྱ་གཞུང་ལ་ངོ་རྒོལ་གྱིས་རང་ལུས་མེར་བསྲེགས་གནང་ནས་དགོངས་པ་རྫོགས་པའི་ཡིད་སྐྱོའི་གནས་ཚུལ་ཐོན་པར་བོད་ཕྱི་ནང་གཉིས་ནས་ཚོར་ཤུགས་ཆེན་པོས་རྒྱ་གཞུང་ལ་སྐྱོན་བརྗོད་དང་སྐྱོ་གདུང་སོགས་ཀྱི་རྣམ་པ་འདྲ་མིན་གསལ་འདོན་གནང་བཞིན་པའི་དུས་མཚམས་འདིར། དེ་རིང་ཉིབ་རྒྱབ་མོན་རྟ་དབང་སེར་སྐྱ་མང་ཚོགས་རྣམས་ཀྱིས་ཆར་ཤུགས་དྲག་པོ་ལ་ལྟོས་མེད་རྒྱལ་གཅེས་པ་བློ་དགའ་རང་བཙན་ལགས་དམ་པ་དེ་ཉིད་ཀྱི་བློས་གཏོང་ལ་རྗེས་དྲན་གྱིས་གདུང་སེམས་མཉམ་སྐྱེད་ཞུ་ཕྱིར་ཁུལ་དེའི་ནང་གཞི་རྒྱ་ཆེ་བའི་མར་མེ་ཁྲོམ་སྐོར་གནང་འདུག དེ་རིང་ཉིན་རྒྱབ་ཆུ་ཚོད་ ༢.༣༠ ཙམ་ལ་མོན་རྟ་དབང་ནང་ཡོད་པའི་ཧིན་བོད་མཛའ་འབྲེལ་ཚོགས་པ་དང་རྟ་དབང་རྫོང་ཁྱོན་ཡོངས་ཀྱི་གཞོན་སྐྱེས་ཚོགས་པ། བོད་ཁྱིམ་སློབ་ཟུར་ཚོགས་པ་དང་། མོན་ Darti ཤེས་ཡོན་དང་རིག་གཞུང་ཚོགས་པ། སློབ་ཕྲུག་མཐུན་ཚོགས་དང་མོན་རྟ་དབང་ལྷ་དཀར་སྒོར་གཞས་ཚོགས་པ་བཅས་གཞུང་འབྲེལ་མ་ཡིན་པའི་ཚོགས་པ་དྲུག་ཐུན་མོང་གིས་གོ་སྒྲིག་གནང་བའི་ཐོག་ས་གནས་མང་ཚོགས་ཀྱིས་ཁུལ་དེར་རྟེན་གཞི་བྱས་པའི་ Buddha Park སྐྱེད་མོས་ཚལ་ནས་༸རྒྱལ་བའི་ཕོ་བྲང་བར་མར་མེ་ཁྲོམ་སྐོར་གནང་ཡོད་པ་དང་། ལས་འགུལ་དེའི་ཐོག་མོན་རྟ་དབང་ནང་གི་གཞུང་འབྲེལ་མིན་པའི་ཚོགས་པ་ཁག་གི་འཐུས་མི་དང་།  སློབ་ཕྲུག  ཡུལ་མི།  གཞན་ཡང་དགོན་སྡེ་ཁག་གི་གྲྭ་བཙུན་བཅས་མཉམ་ཞུགས་ཐོག་རྒྱལ་གཅེས་པ་དམ་པ་དེ་ཉིད་ཀྱིས་བོད་བསྟན་སྲིད་ཆེད་བློས་གཏོང་གནང་བར་རྗེས་དྲན་དང་གུས་འདུད་ཞུས་འདུག དེའི་སྐོར་ལས་འགུལ་སྣེ་ཁྲིད་གནང་མཁན་ཁོངས་སུ་ཡོད་པ་རྟ་དབང་རྫོང་ཁྱོན་ཡོངས་ཀྱི་གཞོན་སྐྱེས་ཚོགས་པའི་ཚོགས་གཙོ་བློ་བཟང་ཆོས་གྲུབ་ལགས་དང་ཚོགས་པའི་ཤེས་རིག་དྲུང་ཆེ་ཕུན་ཚོགས་བཀྲ་ཤིས་ལགས་གཉིས་སུ་བཀའ་འདྲི་ཞུས་ཡོད།  སྐབས་དེར་མར་མེ་ཁྲོམ་སྐོར་གྱི་ལས་འགུལ་འགོ་མ་བཙུགས་གོང་ Buddha Park སྐྱེད་མོས་ཚལ་དུ་ཚང་འཛོམས་ཀྱིས་སྐར་མ་ཁ་ཤས་རིང་མྱ་ངན་གུས་འདུད་ཀྱི་ངག་བཅད་གནང་བ་དང་སྦྲགས།   མོན་རྟ་དབང་བོད་རང་བཙན་སློབ་ཕྲུག་ཚོགས་པའི་འབྲེལ་མཐུད་པ་ཡོན་ཏན་བཟོད་པ་ལགས་དང་རྟ་དབང་གཞོན་སྐྱེས་ཚོགས་པའི་ཚོགས་གཙོ་བློ་བཟང་ཆོས་གྲུབ་ལགས་རྣམ་གཉིས་ནས་རྒྱལ་གཅེས་དཔའ་བོ་བློ་དགའ་རང་བཙན་ལགས་དམ་པ་དེ་ཉིད་ད་བར་བོད་བསྟན་སྲིད་མི་རིགས་དང་བཅས་པའི་སླད་དུ་སྐུ་ལས་བསྐྱོན་པའི་བློས་བཏང་ལ་ཆེ་བསྟོད་ཀྱིས་གསུང་བཤད་གནང་འདུག ཕྱོགས་མཚུངས་ཁ་སང་ལ་དྭགས་ཟངས་དཀར་དུ་ཟངས་དཀར་བོད་ཁྱིམ་སློབ་ཟུར་ཚོགས་པ་དང་ནང་ཚོགས་ཐུན་མོང་གི་གོ་སྒྲིག་འོག་མང་ཚོགས་བརྒྱ་ཕྲག་བརྒལ་བ་ལྷན་འཛོམས་ཀྱིས་རྒྱལ་གཅེས་པ་བློ་དགའ་རང་བཙན་ལགས་དམ་པའི་ཆེད་དུ་གདུང་སེམས་མཉམ་སྐྱེད་ཀྱིས་མར་མེ་ཁྲོམ་སྐོར་གནང་འདུག དེ་ཡང་ཁ་སང་ཕྱི་ཚེས་ ༧ གྱི་ཉིན་རྒྱབ་ཕྱག་ཚོད་ ༡.༣༠ སྟེང་ཟངས་དཀར་དུ་རྟེན་གཞི་བྱས་པའི་༸རྒྱལ་བའི་གྲུ་འཛིན་ཕོ་བྲང་ཕྱི་ཕྱོགས་སུ་དུ་ས་གནས་མང་ཚོགས་སྟོང་ཕྲག་བརྒལ་བ་འདུ་འཛོམས་ཀྱིས་རྒྱལ་གཅེས་དཔའ་བོ་བློ་དགའ་རང་བཙན་ལགས་དམ་པ་དེ་ཉིད་ཀྱིས་བོད་བསྟན་སྲིད་ཆེད་བློས་གཏོང་གནང་བར་རྗེས་དྲན་དང་གུས་འདུད་ཞུ་ཕྱིར་ཉིན་རྒྱབ་ཕྱག་ཚོད་ ༣ བར་༸རྒྱལ་བའི་ཕོ་བྲང་གི་མཐའ་སྐོར་ལ་མར་མེ་ཁྲོམ་སྐོར་གནང་རྗེས་བསྔོ་སྨོན་གསུང་འདོན་གནང་འདུག  ལས་འགུལ་དེའི་བརྒྱུད་ཁོང་རྣམས་ཀྱིས་རྒྱལ་གཅེས་པ་བློ་དགའ་རང་བཙན་ལགས་གང་མགྱོགས་མི་ལུས་རིན་པོ་ཆེ་ཐོབ་པ་དང་བོད་ལ་སྐྱིད་པའི་ཉི་མ་ཤར་བ། ལྷག་དོན་༸གོང་ས་མཆོག་བོད་ལ་གང་མགྱོགས་ཆིབས་བསྒྱུར་བསྐྱང་རྒྱུའི་རེ་འདུན་ཞུས་པ་དང་སྦྲགས། ཟངས་དཀར་མི་མང་ངོས་ནས་བོད་ལ་དཀའ་ངལ་གང་ཞིག་འཕྲད་ཀྱང་དུས་རྟག་ཏུ་བོད་མི་ཚོ་དང་མཉམ་དུ་ཡོད་ཅེས་ནན་བཤད་གནང་འདུག འདི་ག་རླུང་འཕྲིན་ཁང་ནས་ལས་འགུལ་དེ་སྣེ་ཁྲིད་གནང་མཁན་ཁོངས་སུ་ཡོད་པ་ཟངས་དཀར་ནང་ཚོགས་ཀྱི་ཚོགས་གཞོན་གཞས་པ་བསྟན་འཛིན་ཤེན་ལགས་སུ་བཀའ་འདྲི་ཞུས་ཡོད། གཞི་རྩའི་རྒྱལ་གཅེས་པ་བློ་དགའ་རང་བཙན་ལགས་ཀྱིས་ཟླ་བ་འདིའི་ཕྱི་ཚེས་ ༣ ཉིན་རྒྱ་གཞུང་ལ་ངོ་རྒོལ་གྱིས་ཨ་རིའི་ནིའུ་ཡོག་དུ་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ཀྱི་ལས་ཁུངས་མདུན་དུ་རང་ལུས་མེར་བསྲེགས་གནང་ནས་ཆུ་ཚོད་ ༧ ཡོལ་ཙམ་ལ་དགོངས་པ་རྫོགས་པའི་ཡིད་སྐྱོའི་གནས་ཚུལ་ཐོན་རྗེས། ཁ་ཉིན་ཕྱི་ཚེས་ ༦ ཉིན་གྱི་སྔ་དྲོར་དམ་པ་དེ་ཉིད་ཀྱི་སྐུ་ཕུང་གཟི་བརྗིད་ལྡན་པའི་ངང་ནིའུ་ཡོག་དང་ནིའུ་ཇར་སི་ཕུན་ཚོགས་བདེ་ཞི་ཚོགས་ཁང་ནང་གདན་ཞུས་ཀྱིས་བསྔོ་སྨོན་དང་མཇལ་དར་སྒྲོན་ཏེ་དམ་པ་ཁོང་ལ་མཐའ་མའི་ཞལ་གྱེས་ཞུས་རྗེས་སྐུ་ཕུང་དེ་ཉིད་མཉམ་འབྲེལ་རྒྱལ་ཚོགས་ཀྱི་ལས་ཁུངས་མདུན་དུ་དྲང་བདེན་དགོས་པའི་ངོ་རྒོལ་སྐད་འབོད་ཀྱི་ལས་འགུལ་བརྒྱུད་ཉིན་རྒྱབ་ཆུ་ཚོད་ ༡༢།༡༠ ཙམ་ལ་ Brooklyn དུར་ཁྲོད་དུ་གདན་ཞུས་ཀྱིས་ཞུགས་འབུལ་གནང་ཡོད་པ་རེད། The post མོན་རྟ་དབང་དང་ལ་དྭགས་ཟངས་དཀར་ཁུལ་དུ་རྒྱལ་གཅེས་པ་བློ་དགའ་རང་བཙན་ལགས་སུ་གདུང་སེམས་མཉམ་སྐྱེད་ཀྱི་གཞི་རྒྱ་ཆེ་བའི་མར་མེ་ཁྲོམ་སྐོར། appeared first on vot.

ཉེ་ལམ་ཨ་རིའི་ནིའུ་ཡོག་གྲོང་ཁྱེར་དུ་གནས་བཞུགས་བོད་རང་བཙན་འཐབ་རྩོད་པ་བློ་དགའ་རང་བཙན་ལགས་ཀྱིས་ཁུལ་དེ་གའི་མཉམ་འབྲེལ་རྒྱལ་ཚོགས་ཀྱི་མདུན་དུ་བོད་རང་བཙན་དང་ཆོལ་གསུམ་མཐུན་སྒྲིལ་ཆེད་རང་ལུས་མེར་བསྲེགས་བཏང་གནང་བར་བརྟེན། བོད་མིའི་འདུ་སྡོད་ས་གནས་གང་སར་ཁོང་ལ་མྱ་ངན་གུས་འདུད་དང་འབྲེལ་རྒྱ་ནག་ལ་ངོ་རྒོལ་ལས་འགུལ་འདྲ་མིན་སྤེལ་བཞིན་པའི་ཁྲོད། དེ་རིང་ཨོ་གླིང་ནང་ཞིང་བཤེགས་དམ་པ་ཁོང་གི་སླད་ཟས་བཅད་ངོ་རྒོལ་དང་། ཞི་བའི་སྐད་འབོད་སོགས་ཀྱི་ལས་འགུལ་སྤེལ་བཞིན་པ་རེད་འདུག དེ་ཡང་འདི་ཚེས་ ༣ ཉིན་རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱིས་བོད་བསྟན་སྲིད་མི་རིགས་དང་བཅས་པའི་དོན་དུ་སྐུ་ལུས་མེར་བསྲེགས་བཏང་པར། དམ་པ་ཁོང་གིས་བློས་བཏང་དང་སྙིང་སྟོབས་ལ་གུད་འདུད་དང་། གདུང་སེམས་མཉམ་སྐྱེད་མཚོན་ཆེད་ཨོ་གླིང་ལྦིག་ཊོ་རི་ཡ་བོད་རིགས་མཐུན་ཚོགས་ཀྱི་གོ་སྒྲིག་འོག་དེ་རིང་ཕྱི་ཚེས་ ༨ ཉིན་མལ་སྦོན་རྒྱ་ནག་གཞུང་ཚབ་ཁང་གི་མདུན་དུ་སྔ་དྲོ་ཕྱག་ཚོད་ ༡༠ པ་ནས་སང་ཕྱག་ཚོད་ ༡༠ བར་ཁྱོན་ཕྱག་ཚོད་ ༢༤ རིང་ཟས་བཅད་ངོ་རྒོལ་དང་། ཕྱི་ཚེས་ ༩ ཉིན་གྱི་ཕྱག་ཚོད་ ༡༠།༠༠ ནས་ ༡༢།༠༠ བར་ཞི་བའི་ངོ་རྒོལ་གྱི་ལས་འགུལ། དེ་བཞིན་ངོ་རྒོལ་ལས་འགུལ་གྲུབ་མཚམས་ཞི་བའི་གོམ་བགྲོད་ཀྱིས་ཁུལ་དེའི་མངའ་སྡེའི་དཔེ་མཛོད་ཁང་མདུན་ཐང་དུ་ལྷན་འཛོམས་གནང་ནས་ཕྱི་དྲོ་ཕྱག་ཚོད་ ༥།༠༠ པའི་བར་སྨོན་ལམ་གསུང་འདོན་དང་། བསྒྲགས་གཏམ་སྤེལ་འཆར་ཡོད་པ་རེད་འདུག སྤྱིར་ཐེངས་འདིའི་ཟས་བཅད་ངོ་རྒོལ་གྱི་ལས་འགུལ་ཁྲོད་ས་གནས་བོད་མི་ ༡༣ མཉམ་ཞུགས་གནང་འདུག་ཅིང་། ད་ཐེངས་ཀྱི་ལས་འགུལ་བརྒྱུད་ཨོ་སྟྲེ་ལི་ཡའི་གཞུང་དང་། མཉམ་འབྲེལ་རྒྱལ་ཚོགས། རྒྱལ་སྤྱིའི་དབུ་ཁྲིད་རྣམས་ལ་བོད་དོན་གླེང་སློང་གནང་རོགས་ཞེས་རེ་སྐུལ་དང་། དེ་བཞིན་བཙན་དབང་གིས་རྒྱ་བསྒྱུར་སྲིད་བྱུས་ལ་མཐའ་གཅིག་ཏུ་ངོ་རྒོལ། བོད་ཕྲུག་ཚོའི་ཐོབ་ཐང་སྲུང་སྐྱོབ། བོད་ཀྱི་སྐད་ཡིག་དང་། ཆོས་དད། རིག་གཞུང་། ངོ་བོ་བཅས་ལ་སྲུང་སྐྱོབ་དང་རྒྱབ་སྐྱོར་དགོས་པའི་འབོད་སྐུལ་ཞུ་བཞིན་ཡོད་པ་རེད། དེ་བཞིན་ལྦིག་ཊོ་རི་ཡ་བོད་རིགས་མཐུན་ཚོགས་ཀྱིས་འདི་ཚེས་ ༡༦ ཉིན་གྱི་ཕྱི་དྲོ་ཕྱག་ཚོད་ ༦།༠༠ ཙམ་ལ་ Light One Candle for Lobga Rangzen འམ་བློ་དགའ་རང་བཙན་ཆེད་དུ་མར་མེ་གཅིག་སྒྲོན་ཞེས་པའི་དྲྭ་ཐོག་ལས་འགུལ་ཞིག་ཀྱང་སྤེལ་འཆར་ཡོད་པ་རེད་འདུག འདི་གའི་གསར་འགོད་པས་གནད་དོན་དེ་འབྲེལ་ཨོ་གླིང་བོད་དོན་ལྷན་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོ་དང་ལས་འགུལ་གོ་སྒྲིག་ཞུ་མཁན་ཁོངས་སུ་ཡོད་པ་བསྟན་འཛིན་བློ་བཟང་ལགས་སུ་བཀའ་འདྲི་ཞུས་ཡོད། ཕྱོགས་མཚུངས་ཁུལ་དེའི་གྲོང་ཁྱེར་ Sydney […] The post ཨོ་གླིང་ནང་རྒྱལ་གཅེས་དཔའ་བོ་བློ་དགའ་རང་བཙན་ལགས་ལ་གདུང་སེམས་མཉམ་སྐྱེད་མཚོན་ཆེད་ཟས་བཅད་ངོ་རྒོལ་གྱི་ལས་འགུལ་སྤེལ་བཞིན་པ། appeared first on vot.

ཧྥ་རན་སིར་གནས་སྡོད་བོད་མི་བསོད་ནམས་དོན་གྲུབ་ལགས་ནས་འདི་ལོའི་ཕྱི་ཟླ་ ༤ ཚེས་ ༡ ནས་འགོ་འཛུགས་ཀྱིས་ཉིན་གྲངས་བརྒྱ་མ་ཟིན་ཙམ་གྱི་རིང་ཧྥ་རན་སིའི་ས་གནས་ ༣༢ ལྷག་གི་ནང་རྐང་འཁོར་སྐོར་སྐྱོད་ཀྱིས་ཁུལ་དེའི་ས་གནས་སྲིད་གཞུང་གི་འགན་འཛིན་དང་། གྲོས་ཚོགས་འཐུས་མི། གསར་འགོད་པ།  ཕྱི་རྒྱལ་གྱི་གནད་ཡོད་མི་སྣ་དང་བོད་དོན་རྒྱབ་སྐྱོར་བ་མ་ཟད། བོད་སྐོར་གོ་རྟོགས་མེད་མཁན་བཅས་ལ་དགོས་འདུན་དོན་ཚན་བཅུའི་འོག་ནས་བོད་དོན་དྲིལ་བསྒྲགས་ཀྱི་ཡིག་ཆ་འགྲེམས་སྤེལ་སོགས་གནང་སྟེ་ལས་འགུལ་དེ་བཞིན་ཁ་སང་ཕྱི་ཚེས་ ༧ ཉིན་མཇུག་སྒྲིལ་གནང་ཡོད་པ་རེད། སྤྱིར་བསོད་ནམས་དོན་གྲུབ་ལགས་ཀྱི་ཐེངས་འདིའི་བོད་དོན་རྐང་འཁོར་སྐོར་སྐྱོད་ཀྱི་ལས་འགུལ་ཁྲོད་བོད་ནང་གི་ཛ་དྲག་གནས་སྟངས་དོན་ཚན་བཅུ་ཅན་ཞིག་གི་ཐོག་དྲིལ་བསྒྲགས་གནང་ཡོད་པ་དང་།  དེའི་ནང་གཙོ་བོ་རྒྱ་ནག་གཞུང་གིས་གཞིས་ལུས་བོད་མི་བྱིས་པ་རྣམས་རང་གི་ཕ་མ་དང་ཁ་བྲལ་ཏུ་བཏང་སྟེ་བཅའ་སྡོད་སློབ་གྲྭ་ཟེར་བར་བཙན་ཁྲིད་བྱེད་ཀྱི་ཡོད་པ།  དེ་བཞིན་རྒྱ་གཞུང་གིས་བོད་ནང་གི་བོད་མི་རྣམས་ཀྱི་རིག་རྫས་བཙན་དབང་གིས་བསྡུ་ལེན་བྱེད་བཞིན་ཡོད་པ་ཐེར་འདོན་ཙམ་མ་ཟད།  ཀུན་གཟིགས་༸པཎ་ཆེན་རིན་པོ་གཙོ་བོར་གྱུར་བའི་བོད་ཀྱི་ཆབ་སྲིད་བཙོན་པ་རྣམས་འཕྲལ་དུ་གློད་བཀྲོལ་དགོས་པ་དང་།  བོད་ནང་ཁྲིམས་མཐུན་མིན་པའི་ཆུ་རགས་གསར་རྒྱག་གི་ལས་གཞི་ཡོངས་རྫོགས་མཚམས་འཇོག་དགོས་པ་སོགས་འཁོད་ཡོད་པ་རེད།  འདི་གའི་གསར་འགོད་པས་བོད་དོན་ལས་འགུལ་བ་བསོད་ནམས་དོན་གྲུབ་ལགས་སུ་དྲྭ་ཐོག་བརྒྱུད་ཁོང་གི་ཧྥ་རན་སི་ནང་གི་བོད་དོན་རྐང་འཁོར་སྐོར་སྐྱོད་ཀྱི་ལས་འགུལ་མཇུག་སྒྲིལ་དང་འབྲེལ་ཏེ་གནད་དོན་ཁག་གཅིག་སྐོར་བཀའ་འདྲི་ཞུ་སྐབས་ཁོང་གིས།  ཧྥ་རན་སི་ཁུལ་དུ་བོད་དོན་རྐང་འཁོར་སྐོར་སྐྱོད་ཀྱི་ལས་འགུལ་དེ་ཐོག་མའི་ཆར་ཁོང་གིས་ཇི་ལྟར་འཆར་གཞི་བཀོད་པ་གཞིར་བཟུང་ལེགས་གྲུབ་བྱུང་ཡོད་པར་འདོད་བློ་ཁེངས་སོང་ཅེས་དང་།  སྐོར་སྐྱོད་ཁྲོད་ཕྱི་རྒྱལ་བོད་དོན་རྒྱབ་སྐྱོར་བ་ཚོས་བོད་མི་རྣམས་ནས་ལས་འགུལ་གང་མང་སྤེལ་དགོས་པའི་རེ་འདུན་བཏོན་གྱི་ཡོད་པ་འགྲེལ་བརྗོད་དང་འབྲེལ།  ལྷག་པར་དུ་ལས་འགུལ་འདི་ཉེ་ལམ་འདས་གྲོངས་སུ་ཕྱིན་པའི་བོད་རང་བཙན་འཐབ་རྩོད་པ་ལྷ་བཟང་ཚེ་རིང་ལགས་དང་སྐུ་ལུས་མེར་མཆོད་ཕུལ་མཁན་རྒྱལ་གཅེས་དཔའ་བོ་བློ་དགའ་རང་བཙན་ལགས་དམ་པ་ཁོང་གཉིས་ཀྱི་ཆེད་དུ་ལེགས་སྐྱེས་ཚུལ་དུ་ཡིན་པ་འགྲེལ་བརྗོད་ཙམ་མ་ཟད།  དམ་པ་ཁོང་གཉིས་ཀྱིས་བོད་དོན་ལས་འགུལ་སྤེལ་དགོས་པའི་ཞལ་འཆེམས་ལྟར་ལོ་རྗེས་མ་བསྐྱར་དུ་ཡུ་རོབ་ནང་གི་ས་གནས་གཞན་ཁག་ཏུ་དེ་མཚུངས་ཀྱི་ལས་འགུལ་སྤེལ་རྒྱུའི་འཆར་གཞི་ཡོད་སྐོར་གསུངས་སོང་ལ།  ང་ཚོ་བོད་པ་ཚང་མས་རང་རྒྱལ་ཁབ་དེ་ཨང་དང་པོར་རྩིས་པའི་ཐོག་བོད་དོན་འཐབ་རྩོད་གནང་དགོས་པའི་རེ་སྐུལ་ཞུས་གནང་སོང་།  ་ The post བསོད་ནམས་དོན་གྲུབ་ལགས་ཀྱི་ཧྥ་རན་སི་ཁུལ་དུ་བོད་དོན་རྐང་འཁོར་སྐོར་སྐྱོད་ཀྱི་ལས་འགུལ་མཇུག་སྒྲིལ། appeared first on vot.

རྒྱ་གར་གྱི་རྒྱལ་ས་ལྡི་ལིར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ཀྱི་དགུང་གྲངས་ ༩༡ ལ་ཕེབས་པའི་༸སྐུའི་འཁྲུངས་སྐར་གྱི་གཞུང་འབྲེལ་མཛད་སྒོ་དེ་ལྡི་ལི་བསམ་ཡས་གླིང་དུ་འཚོགས་ཡོད་པ་མ་ཟད།   ཕྱི་དྲོ་ད་དུང་ལྡི་ལི་སྐུ་ཚབ་དོན་གཅོད་ཀྱི་ངོས་ནས་ཕྱི་རྒྱལ་གཞུང་ཚབ་ཁག་གི་མི་སྣ་དང་།  རྒྱ་གར་གནད་ཡོད་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་ཁག་ལ་ཕྱི་དྲོའི་གསོལ་སྟོན་ཞིག་ཀྱང་འདེགས་འབུལ་ཞུས་ཡོད་པ་རེད། དེ་ཡང་བོད་སྒར་བསམ་ཡས་གླིང་དུ་འཚོགས་པའི་གཞུང་འབྲེལ་འཁྲུངས་སྐར་གྱི་མཛད་སྒོ་དེའི་ཐོག་སྐུ་མགྲོན་གཙོ་བོར་རྒྱ་གར་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་གཞོན་པ་སྐུ་ཞབས་ Tapir Gao མཆོག་གིས་དབུས་པའི་རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པའི་སྡེ་ཚན་ནང་མའི་འབྲེལ་མཐུད་པ་སྐུ་ཞབས་ R K Khirmey མཆོག   བདེ་སྲུང་བཀའ་བློན་ཟུར་པ་རྒྱ་རི་སྒྲོལ་མ་མཆོག་དང་།   ཚོགས་གཞོན་ཟུར་པ་ཨ་ཅརྱ་ཤེས་ཕུན་ཚོགས་ལགས།  ལྡི་ལི་སྐུ་ཚབ་དོན་གཅོད་འཇིགས་མེད་འབྱུང་གནས་ལགས་ཀྱི་དབུས་གཞན་ཡང་རྒྱ་གར་གྱི་གནད་ཡོད་མི་སྣ་ཁག་གཅིག་དབུ་བཞུགས་ཐོག་མི་མང་ལྷན་འཛོམས་ཀྱིས་༸སྐུའི་འཁྲུངས་སྐར་དགའ་སྐྱོ་ཟུང་འབྲེལ་ཐོག་ནས་སྲུང་བརྩི་ཞུས་ཡོད་པ་དང་།    མཛད་སྒོའི་ཐོག་སྐུ་མགྲོན་གཙོ་བོ་མཆོག་ནས་ཉེ་ཆར་ཨ་རིའི་གྲོང་ཁྱེར་ནིའུ་ཡོག་ཏུ་བོད་བསྟན་སྲིད་མི་རིགས་ཀྱི་ཆེད་དུ་རང་ལུས་མེར་བསྲེགས་བཏང་བའི་དཔའ་བོ་བློ་དགའ་རང་བཙན་ལགས་དྲན་སྐུལ་དང་སྦྲགས།  བོད་རིགས་ནི་ལོ་རྒྱུས་ནས་དཔའ་མཛངས་སྙིང་སྟོབས་ལྡན་པའི་མི་རིགས་ཤིག་ཡིན་སྟབས།   མི་རིགས་དེའི་འཐབ་རྩོད་ཀྱི་ཆེད་དུ་མི་གཅིག་གི་སྲོག་ཀྱང་ཧ་ཅང་རྩ་ཆེན་པོ་ཡིན་སྐོར་གསུངས་ཏེ།   བོད་མི་ཚོས་དྲག་པོའི་ཐབས་ལམ་ལ་མ་བརྟེན་པར་དུས་རབས་དང་མཐུན་པའི་སྤྱི་ཚོགས་དྲྭ་རྒྱ་སོགས་ཀྱི་མཐུན་རྐྱེན་བེད་སྤྱོད་ཀྱིས་དགྲ་བོར་ཁ་གཏད་གཅོག་དགོས་པ་དང་།  རྒྱ་གར་གཞུང་མང་གཉིས་ཀྱི་ངོས་ནས་ད་བར་བོད་དོན་ཐོག་རྒྱབ་སྐྱོར་གནང་བ་ལྟར་ད་དུང་ཡང་མུ་མཐུད་གནང་རྒྱུ་ཡིན་སྐོར་སོགས་གསུངས་ཡོད།   སྐབས་དེར་བདེ་སྲུང་བཀའ་བློན་ཟུར་པ་རྒྱ་རི་སྒྲོལ་མ་མཆོག་ནས་ཀྱང་།  ང་ཚོས་ཆིག་སྒྲིལ་ཁ་ནས་བཤད་པ་ཙམ་མིན་པར།  དོན་དངོས་ཀྱི་མི་རེ་ངོ་རེ་ནས་སོ་སོའི་ལྟ་གྲུབ་གང་ཡིན་ལ་མ་ལྟོས་པར་རྡོག་རྩ་ཆིག་སྒྲིལ་ཐོག་འགན་འཁུར་དགོས་པའི་ལམ་སྟོན་གནང་ཡོད།   མཛད་སྒོ་དེའི་ཐོག་སྐུ་ཚབ་དོན་གཅོད་འཇིགས་མེད་འབྱུང་གནས་ལགས་ནས་ཀྱང་རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱི་བློས་གཏོང་ལ་ཆེ་བསྟོད་དང་སྦྲགས།  ཁོ་པའི་ཞལ་འཆེམས་ལྟར་བོད་མི་ཚང་མས་དེ་རིང་ནས་ཟུང་དམ་ཚིག་རྡོག་རྩ་ཆིག་སྒྲིལ་ཐོག་བོད་མིའི་རང་དབང་འཐབ་རྩོད་ཆེད་མདུན་སྐྱོད་བྱེད་རྒྱུའི་མི་རེ་ངོ་རེ་ནས་དམ་བཅའ་བཞག་ཐུབ་ཐབས་ཡོང་བའི་འབོད་སྐུལ་ཡང་གནང་ཡོད། བོད་སྒར་བསམ་ཡས་གླིང་གི་གཞུང་འབྲེལ་འཁྲུངས་སྐར་གྱི་མཛད་སྒོ་དེ་གྲུབ་པ་དང་བསྟུན་ཕྱི་དྲོའི་ཆུ་ཚོད་ལྔ་པའི་ཐོག་རྒྱ་འཐུས་ཡིག་ཚང་གི་གོ་སྒྲིག་ཞུས་པའི་རྐང་སྤོལ་རྩེད་འགྲན་ཞིག་ཀྱང་གནང་ཡོད་པ་མ་ཟད།   ཆུ་ཚོད་ ༨  པའི་ཐོག་ India Habitat ལྟེ་གནས་ཁང་དུ་ལྡི་ལི་སྐུ་ཚབ་དོན་གཅོད་ཀྱིས་གོ་སྒྲིག་ཞུས་པའི་གསོལ་སྟོན་ཐོག   ལྡི་ལིར་ཡོད་པའི་ཕྱི་རྒྱལ་གཞུང་ཚབ་ཁག་གི་སྐུ་ཚབ་དང་།   རྒྱ་གར་གྱི་གནད་ཡོད་མི་སྣ་བཅས་སྐུ་མགྲོན་མི་གྲངས་ ༡༠༠ སྐོར་ཞིག་འདུ་འཛོམས་བྱུང་ཡོད་པ་དང་།   སྐབས་དེར་སྐུ་མགྲོན་རྣམས་ནས་བློ་དགའ་རང་བཙན་ལགས་སུ་མྱ་ངན་ཆེ་བསྟོད་དང་སྦྲགས། སྐུ་མགྲོན་གཙོ་བོ་རྒྱ་གར་གྱི་ཕྱི་སྲིད་དྲུང་ཆེ་ཟུར་པ་སྐུ་ཞབས་ Shyam Saran མཆོག་གིས་ཁོང་རང་ཉིད་དང་༸གོང་ས་༸སྐྱབས་མགོན་ཆེན་པོ་མཆོག་གི་དབར་ཐུགས་འབྲེལ་བྱུང་སྟངས་དང་།   ༸གོང་ས་༸སྐྱབས་མགོན་ཆེན་པོའི་ཐུགས་རྒྱ་ཡངས་པའི་དགོངས་གཞི་ཁག་ལ་ཡིད་རངས་ཆེ་བསྟོད་སོགས་ཞུས་པ་དང་སྦྲགས།  མགོན་པོ་༸གང་ཉིད་མཆོག་རྒྱ་གར་བཙན་བྱོལ་དུ་ཕེབས་པ་དེ་ནི་རྒྱ་གར་མི་མང་གི་བསོད་ནམས་དང་སྤོབས་པ་བྱེད་དགོས་པ་ཞིག་ཡིན་པ་མ་ཟད།  ༸སྐུའི་འཁྲུངས་སྐར་ལ་མཚམས་འདྲི་དང་སྐུ་ཚེ་ཡུན་རིང་བརྟན་པའི་སྨོན་མདུན་བཅས་ཀྱང་གནང་ཡོད།  The post རྒྱ་གར་རྒྱལ་ས་ལྡི་ལིར་དགའ་སྐྱོ་ཟུང་འབྲེལ་གྱི་ཐོག་ནས་༸སྐུའི་འཁྲུངས་སྐར་སྲུང་བརྩི། appeared first on vot.

ཁ་སང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༩༡ བདག་གིར་བཞེས་པའི་༸སྐུའི་འཁྲུངས་སྐར་ཉིན་འབྲས་ལྗོངས་མངའ་སྡེའི་སྤྱི་ཁྱབ་བློན་ཆེན་མཆོག་གིས་ཁུལ་དེར་གསར་དུ་བཞེངས་པའི་བོད་མིའི་སྤྱི་ཁང་གསར་པ་དབུ་འབྱེད་གནང་འདུག དེ་ཡང་ཁ་སང་ཕྱི་ཟླ་ ༧ ཚེས་ ༦ ༸རྒྱལ་བའི་འཁྲུངས་སྐར་ཉིན་འབྲས་ལྗོངས་མངའ་སྡེའི་གཞུང་གིས་འགྲོ་གྲོན་འོག་གསར་རྒྱག་གནང་བའི་བོད་མིའི་སྤྱི་ཁང་གསར་པ་དབུ་འབྱེད་ཀྱི་མཛད་སྒོའི་ཐོག་འབྲས་ལྗོངས་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ Prem Sigh Tamang མཆོག་དང་འབྲས་ལྗོངས་མངའ་སྡེའི་ཆོས་དོན་བློན་ཆེན་བསོད་ནམས་བླ་མ་ལགས་དང་རིག་གཞུང་དང་འཕྲོད་བསྟེན་བློན་ཆེན་གཙོས་བོད་མིའི་སྒྲིག་འཛུགས་ཀྱི་ནང་སྲིད་བཀའ་བློན་དཔལ་ལྡན་དོན་གྲུབ་མཆོག་དང་སྒང་ཏོག་ས་གནས་འགོ་འཛིན། དེ་བཞིན་སེར་སྐྱ་མང་ཚོགས་བཅས་ལྷན་ཞུགས་གནང་ཡོད་པ་དང་། སྐབས་དེར་འབྲས་ལྗོངས་མངའ་སྡེའི་སྤྱི་ཁྱབ་བློན་ཆེན་མཆོག་གིས་ད་རེས་༸རྒྱལ་བའི་སྐུའི་འཁྲུངས་སྐར་གྱི་དུས་བཟང་དང་བསྟུན་འབྲས་ལྗོངས་མངའ་སྡེ་གཞུང་གིས་འགྲོ་གྲོན་འོག་བོད་མིའི་སྤྱི་ཁང་གསར་པ་ལེགས་གྲུབ་ཀྱིས་དབུ་འབྱེད་གནང་ཐུབ་པར་དགའ་ཚོར་ཆེན་པོ་བྱུང་ཞེས་དང་སྤྱི་ཁང་གསར་པ་དེའི་ནང་ལས་དོན་གལ་ཆེན་གཉིས་བསྒྲུབ་རྒྱུའི་ཁོངས་ནས་གཅིག་ནི་༸སྐུའི་འཁྲུངས་སྐར་སྲུང་བརྩི་ཞུ་རྒྱུ་དང་གཉིས་པ་གསར་རྒྱག་གནང་བའི་བོད་མིའི་སྤྱི་ཁང་གསར་པ་དེ་དབུ་འབྱེད་གནང་རྒྱུ་དེ་རེད་ཅེས་གསུངས་ཏེ་འདི་ནི་འབྲས་ལྗོངས་ནང་གི་བོད་མི་ཚོར་སོ་སོའི་ཆོས་དང་རིག་གཞུང་སྲུང་སྐྱོབ་བྱ་རྒྱུའི་ཆེད་དུ་འདི་ལོའི་༸སྐུའི་འཁྲུངས་སྐར་ཉིན་ནས་རྩིས་སྤྲོད་བྱ་རྒྱུ་ཡིན་པ་གསུངས་འདུག ཁོང་གིས་ད་དུང་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གི་ཐུགས་བསྐྱེད་དམ་བཅའ་བཞིའི་གལ་གནད་སྐོར་མང་ཚོགས་ལ་ངོ་སྤྲོད་དང་ཚང་མའི་དེའི་ཐོག་ཐུགས་སྣང་དང་མི་ཚེའི་ནང་གང་ཡོང་ལག་བསྟར་གནང་པ་ཡིན་ན་མི་ཚེ་བདེ་སྐྱིད་ལྡན་པ་ཞིག་ཡོང་ངེས་ཡིན་པ་གསུངས་འདུག མ་ཟད་མཛད་སྒོའི་ཐོག་ཕེབས་པའི་འབྲས་ལྗོངས་མངའ་སྡེའི་རིག་གཞུང་དང་འཕྲོད་བསྟེན་བློན་ཆེན་མཆོག་གིས་༸རྒྱལ་བའི་འཁྲུངས་སྐར་ཉིན་འབྲས་ལྗོངས་གཞུང་མང་གཉིས་ཀྱི་ཚབ་ཞུས་ཏེ་མགོན་པོ་༸གང་ཉིད་མཆོག་ལ་དགའ་བསུའི་འཚམས་འདྲི་ཞུས་པ་དང་ཆབས་ཅིག ༸སྐུ་ཁམས་གསལ་ཐང་དང་འཛམ་གླིང་ཁྱོན་དུ་༸གང་ཉིད་མཆོག་གི་མཛད་འཕྲིན་རྒྱས་པའི་སྨོན་འདུན་ཞུ་བཞིན་ཡོད་ཅེས་གསུངས་འདུག ཕྱོངས་མཚུངས་༸རྒྱལ་བའི་འཁྲུངས་སྐར་གྱི་ཉིན་གཉིས་སྔོན་གོང་དུ་བྱམས་བརྩེའི་ལོ་མཇུག་སྒྲིལ་བའི་སྐབས་དང་བསྟུན། པེ་རི་སི་གྲོང་ཁྱེར་དུ་བོད་ཀྱི་སྲང་ལམ་དབུ་འབྱེད་དང་ France གི་སྤྱི་པའི་ས་ཆ་ཞིག་ཏུ་བོད་བརྒྱུད་ནང་བསྟན་གྱི་མཆོད་རྟེན་ཐོག་མ་གསར་རྒྱག་གི་རྨང་རྡོ་འཛུགས་རྒྱུའི་དུས་དྲན་གཉིས་འཛོམས་ཀྱིས་དམིགས་བསལ་མཛད་སྒོ་ཞིག་སྐོང་འཚོགས་གནང་ཡོད་པ་དང་དེ་ནི་མགོན་པོ་༸གང་ཉིད་མཆོག་གི་༸སྐུ་ཚེ་ཧྲིལ་པོར་བྱམས་བརྩེ་དང་། འཚེ་མེད་ཞི་བ། གྲོས་མོལ། འགྲོ་བ་མིའི་རིན་ཐང་སྤྱི་ཡོངས་ལ་བཅངས་པའི་ཆོད་སེམས་ལ་ཆེ་བསྟོད་ཞུ་ཆེད་དང་བྱེད་སྒོ་འདིས་རིག་གཞུང་སྣ་མང་སྲུང་སྐྱོབ་བྱེད་པ་དང་སྤྱི་ཚོགས་ཡོངས་ལ་ཞི་བདེ་གོང་འཕེལ་གཏོང་བའི་གལ་ཆེན་རང་བཞིན་ཡང་གསལ་སྟོན་གནང་འདུག སྐབས་དེའི་མཛད་སྒོ་ཐོག་ Levallois-Perre གྲོང་ཁྱེར་གྱི་སྤྱི་ཁྱབ་པ་དང་སྤྱི་ཁྱབ་པ་གཞོན་པ་རྣམ་གཉིས། གྲོས་ཚོགས་ཀྱི་འཐུས་མི་རྣམ་པ། དེ་བཞིན་སྦར་སིལ་བོད་ཀྱི་སྐུ་ཚབ་དོན་གཅོད་དང་རིག་པ་བའི་སྐུ་ཚབ། གཞན་ཡང་བོད་མི་དང་གཞོན་སྐྱེས་དང་བླངས་ཞུ་གཏུག་ཚོགས་པའི་སྐུ་ཚབ་དང་མགྲོན་འབོད་ཞུས་པའི་སྐུ་ཚབ་མང་དག་ཅིག་ཕེབས་ཡོད་པའི་སར། གྲོང་ཁྱེར་སྤྱི་ཁྱབ་པ་ལྕམ་ Agnès Pottier-Dumas ལགས་ཀྱིས་ལས་གཞི་འདི་དག་གིས་ས་གནས་སྲིད་གཞུང་ནས་བོད་མི་རྣམས་ཀྱི་ཞི་བ་དང་དྲག་པོ་མ་ཡིན་པའི་ཐབས་ལམ་བརྒྱུད་རང་གི་ཐུན་མོང་མ་ཡིན་པའི་རིག་གཞུང་སྲུང་སྐྱོབ་དང་དར་སྤེལ་གཏོང་བར་རྒྱབ་སྐྱོར་བྱེད་ཀྱི་ཡོད་པ་མཚོན་གྱི་ཡོད་ཅེས་དང་འདི་དག་གིས་༸གོང་ས་ཏཱ་ལའི་བླ་མ་མཆོག་གིས་བོད་དང་འགྲོ་བ་མིའི་རིགས་སྤྱི་ཡོངས་ལ་དམིགས་པའི་དགོངས་གཞི་མངོན་གྱི་ཡོད་པ་མ་ཟད། མགོན་པོ་༸གང་ཉིད་མཆོག་གི་བཟང་སྤྱོད་རིན་ཐང་རྣམས་ད་དུང་འཛམ་གླིང་ཡོངས་ཀྱི་མི་མང་ལ་སེམས་ཤུགས་འཕར་མ་སྦྱིན་བཞིན་ཡོད་ཅེས་གསུངས་འདུག གཞན་ཡང་ཟླ་བ་འདིའི་ཚེས་ ༥ རེས་གཟའ་ཉིན་མ་དང་སྟབས་བསྟུན་ལྷོ་ཨ་རི་སྐུ་ཚབ་དོན་ཁང་གི་གོ་སྒྲིག་འོག་བོད་ཁང་དུ་༸རྒྱལ་བའི་འཁྲུངས་སྐར་གྱི་མཛད་སྒོ་ཞིག་འཚོགས་པའི་ཐོག་དམིགས་བསལ་སྐུ་མགྲོན་ཁག་གཅིག་དང་བོད་ཁང་ཚོགས་གཙོ་བླ་མ་རིན་ཆེན་གཙོས་འགན་འཛིན་ལྷན་ཚོགས་ཀྱི་ཚོགས་མི་དང་བོད་དོན་རྒྱབ་སྐྱོར་བ་བཅས་ནས་མཉམ་ཞུགས་གནང་འདུག་པ་དང་། སྐབས་དེར་སྐུ་ཚབ་དོན་གཅོད་ཐུབ་བསྟན་དབང་ཆེན་ལགས་ནས་༸གོང་ས་མཆོག་གི་མཛད་རྣམ་དང་འབྲེལ་ཐུགས་བསྐྱེད་དམ་བཅའ་བཞིའི་སྐོར་ངོ་སྤྲོད་དང་། རྒྱ་ནག་གི་ཁྲིམས་ཡིག་གསར་པས་གྲངས་ཉུང་མི་རིགས་ཀྱི་ཐོབ་ཐང་དང་རང་དབང་ལ་ཉེན་ཁ་བཟོ་བཞིན་ཡོད་པ་དང་། ལྷག་པར་ནིའུ་ཡོག་མཉམ་འབྲེལ་རྒྱལ་ཚོགས་ཀྱི་ལས་ཁུངས་མདུན་དུ་རང་བཙན་བློ་དགའ་ལགས་ཀྱིས་རང་ལུས་མེར་བསྲེགས་གནང་བ་འདི་འགྲོ་བ་མིའི་ཐོབ་ཐང་གི་ལས་ཁུངས་དང་། སྲིད་གཞུང་ཁག་ནས་བོད་ནང་གི་ཛ་དྲག་གནས་སྟངས་ངོས་འཛིན་གྱིས་བོད་དོན་ཐོག་རྒྱབ་སྐྱོར་གནང་དགོས་པའི་འབོད་སྐུལ་ཞུས་པ་དང་ཆབས་ཅིག རྒྱལ་གཅེས་པ་རང་བཙན་བློ་དགའ་ལགས་ཀྱི་འདས་མཆོད་སྨོན་ལམ་གསུང་འདོན་ཡང་གནང་འདུག མ་ཟད་འདི་ཚེས་ ༤ ཉིན་ཇི་ནི་ཝ་ས་གནས་བོད་རིགས་ཚོགས་པའི་གོ་སྒྲིག་འོག་ཁུལ་དེར་༸སྐུའི་འཁྲུངས་སྐར་དུས་ཆེན་སྲུང་བརྩི་ཞུས་པ་དང་དུས་མཉམ་རྒྱལ་གཅེས་པ་བློ་དགའ་རང་བཙན་ལགས་དམ་པའི་ཆེད་མཆོད་འབུལ་སྨོན་ལམ་འཚོགས་འདུག མཛད་སྒོར་སུད་སི་བོད་ཀྱི་སྐུ་ཚབ་དོན་གཅོད་ཀྱིས་ལོ་ལྟར་རྒྱལ་སྤྱིའི་ཁྲོད་བོད་མི་གནས་སྡོད་ས་གནས་གང་ས་ནས་༸གོང་ས་མཆོག་ལ་འཁྲུངས་སྐར་གྱི་འཚམས་འདྲི་དང་འབྲེལ་གཞས་སྣ་འཁྲབ་སྟོན་གནང་རྒྱུའི་ལམ་སྲོལ་ཡོད་ཀྱང་ད་རེས་རྒྱལ་གཅེས་པ་བློ་དགའ་རང་བཙན་ལགས་ནས་རང་ལུས་མེར་བསྲེགས་ཀྱི་མཆོད་འབུལ་གནང་ཡོད་པར་བརྟེན་ཐེངས་འདིའི་མཛད་སྒོར་སྔར་དང་མི་འདྲ་བའི་འགྱུར་བ་ཕྲན་ཙམ་བྱུང་སྟེ་ཐོག་མར་དམ་པ་དེ་ཉིད་ཀྱི་སླད་མཆོད་འབུལ་སྨོན་ལམ་དང་དེ་རྗེས་འཁྲུངས་སྐར་གྱི་སྤྲི་གོར་བཏུབ་ནས་རྟེན་འབྲེལ་མཚོན་ཆེད་སློབ་ཕྲུག་ཚོས་གཞས་སྣ་གཅིག་གཉིས་ཙམ་གཟིགས་འབུལ་ཞུས་པ་ལས་གཞན་རྣམས་ཕྱིར་འཐེན་གནང་ཡོད་འདུག དེ་བཞིན་སྦེལ་ཇམ་སྐུ་ཚབ་དོན་ཁང་གི་ངོས་ནས་༸རྒྱལ་བའི་འཁྲུངས་སྐར་དང་བསྟུན་སྦར་སིལ་དུ་རྟེན་གཞི་བྱས་པའི་སོ་བེ་ (Sovay) དཔེ་མཛོད་ཁང་དུ་གཞུང་ཚབ་པ་དང་། ཡུ་རོབ་དང་རྒྱལ་ཡོངས་གྲོས་ཚོགས་འཐུས་མི། ཡུ་རོབ་མཐུན་ཚོགས་ཀྱི་གནད་ཡོད་གཞུང་འབྲེལ་མི་སྣ། གྲོང་སྡེའི་སྤྱི་ཁྱབ་པ་དང་ནང་པའི་མཐུན་ཚོགས་ཀྱི་ཚོགས་གཙོ། གསར་འགོད་པ། གྲོས་ཚོགས་ཀྱི་ཕྱག་རོགས། […] The post འཛམ་གླིང་ས་ཕྱོགས་གང་སར་ལས་རིམ་འདྲ་མིན་བརྒྱུད་༸རྒྱལ་བའི་འཁྲུངས་སྐར་སྲུང་བརྩི། appeared first on vot.

དེ་རིང་ཕྱི་ཟླ་ ༧ ཚེས་ ༦ ཉིན་མོ་དེ་ནི་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༩༡ ཕེབས་པའི་༸སྐུའི་འཁྲུངས་སྐར་ཉིན་མོ་ཡིན་པ་ལྟར། དེ་རིང་ལ་དྭགས་ཀྱི་རྒྱལ་ས་གླེ་ནང་ཆགས་པའི་ཞི་བའི་ཚལ་ཕོ་བྲང་གི་ཐང་ཆེན་ཐོག་ཕྱི་ནང་མང་ཚོགས་སྟོང་ཕྲག་ཁ་ཤས་འདུ་འཛོམས་ཀྱིས་དགའ་དད་སྤྲོ་གསུམ་ངང་༸རྒྱལ་བའི་འཁྲུངས་སྐར་སྲུང་བརྩི་གཟབ་རྒྱས་ཞུས་པ་མ་ཟད། ༸གོང་ས་མཆོག་གིས་སྐབས་དེར་ས་གནས་འདི་ལྟ་བུར་དད་པ་དམ་ཚིག་གཡོ་བ་མེད་པའི་ཐོག་༸གང་ཉིད་སྐུ་ཚེ་ཡུན་རིང་བརྟན་རྒྱུའི་གསོལ་འདེབས་ཞུ་བཞིན་པ་བཞིན། མགོན་པོ་༸གང་ཉིད་མཆོག་ནས་ཀྱང་འཛམ་གླིང་ཡོངས་ལ་མིག་ལྟོས་བཟང་པོ་ཞིག་ཡོང་རྒྱུ་ཐུགས་སྨོན་དང་འབྲེལ། དགུང་ལོ་ ༡༣༠ ལྷག་སྐུ་བཞུགས་མཛད་རྒྱུའི་བཀའ་བཞེས་བཟང་པོ་སྨིན་སྩལ་གནང་སོང་། དེའང་༸གོང་ས་མཆོག་དེ་རང་སྔ་དྲོ་ཆུ་ཚོད་ ༨།༤༠ ཙམ་གྱི་ཐོག་ལ་དྭགས་ཡུལ་མི་སོགས་དད་ལྡན་སྟོང་ཕྲག་མང་པོས་རུ་སྒྲིག་གིས་དཀར་གཙང་མཇལ་དར་དང་མེ་ཏོག བདུག་སྤོས་ཐོག་ནས་ཕེབས་བསུ་གཟབ་རྒྱས་དང་བཅས་མཛད་སྒོའི་ཚོམས་ཆེན་དུ་ཞབས་སོར་འཁོད་རྗེས། ལ་དྭགས་ནང་ཚོགས་དང་དགོན་ཚོགས་ཀྱི་དབུ་ཁྲིད་དང་། བོད་མིའི་སྒྲིག་འཛུགས་ཀྱི་སྲིད་སྐྱོང་དང་ཆེས་མཐོའི་ཁྲིམས་ཞིབ་པ་མཆོག དེ་བཞིན་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཆོག གཞན་ཡང་སྐྱབས་རྗེ་ཁྲིག་སེ་རིན་པོ་ཆེ་མཆོག་དང་། ཐུགས་སྲས་རིན་པོ་མཆོག་བཅས་ཀྱིས་མཎྜལ་རྟེན་གསུམ་འདེགས་འབུལ་དང་འབྲེལ་མཛད་སྒོ་དབུ་འཛུགས་གནང་སོང་། དེ་རྗེས་ལ་དྭགས་ནང་ཚོགས་ཀྱི་ཚོགས་གཙོ་སྐུ་ཞབས་ཚེ་རིང་རྡོ་རྗེ་ལགས་ཀྱིས་ལ་དྭགས་མང་ཚོགས་ཡོངས་ཀྱི་ཚབ་ཞུས་ཏེ་མགོན་པོ་༸གང་ཉིད་མཆོག་ལ་འཁྲུངས་སྐར་འཚམས་འདྲི་དང་། ༸གོང་ས་མཆོག་ཉེ་ལམ་ཞབས་པུས་སྨན་བཅོས་མཛད་ནས་ཉིན་རེ་བཞིན་༸སྐུའི་འཕྲོད་བཞེས་ཡར་རྒྱས་བྱུང་བར་དགའ་སྤྲོ་དང་། སྔར་ལམ་བཞིན་གསུང་ཆོས་རྭ་བ་དེའི་ནང་༸གོང་ས་མཆོག་གི་དྲུང་ནས་བཀའ་སློབ་དང་བཀའ་ཆོས་ཡང་བསྐྱར་ཐོབ་པའི་རེ་བ་ཡོད་སྐོར་གསུངས་སོང་། ལྷག་པར་དེ་རིང་གི་མཛད་སྒོ་དེའི་སླད་བོད་མིའི་སྒྲིག་འཛུགས་ཀྱི་མང་གཙོའི་མཛད་གཙོ་རྣམ་པ་ཆེད་མངགས་ལ་དྭགས་སུ་ཆེད་ཕེབས་གནང་བ་ལྟར། སྲིད་སྐྱོང་སྤེན་པ་ཚེ་རིང་མཆོག་གིས་དབྱིན་སྐད་ཐོག་བཀའ་ཤག་གི་གསུང་འཕྲིན་ནང་གཙོ་བོ་འདས་པའི་ལོ་གཅིག་རིང་བཀའ་ཤག་ངོས་ནས་རྒྱལ་སྤྱིའི་ཡུལ་གྲུ་གང་སར་༸རྒྱལ་བའི་གོ་སྟོན་གྱི་ལོ་དེ་བྱམས་བརྩེའི་ལོར་སྲུང་བརྩི་གཟབ་རྒྱས་ཞུས་པའི་ལས་གཞི་ཆེ་གྲས་ཁག་སྙན་སེང་ཞུས་པ་དང་འབྲེལ།  བོད་མི་རྣམས་ཀྱིས་བྱམས་བརྩེའི་ལོ་འཁོར་འདི་ལོ་ཡུན་གཅིག་ནང་རྫོགས་འགྲོ་བ་ཞིག་ལ་ངོས་འཛིན་མི་བྱེད་པར། སོ་སོའི་ཁྱིམ་ཚང་ནས་འགོ་བཙུགས་ཏེ མི་རེ་ངོ་རེས་ཉིན་ཟླ་ལོ་བརྩེགས་ཀྱིས་མི་ཚེ་ཧྲིལ་པོར་ཉམས་ལེན་ལ་འབད་འབུངས་ཡོང་བའི་རེ་སྐུལ་ཞུས་གནང་སོང་། སྤྱིར་སྲིད་སྐྱོང་མཆོག་གིས་དེ་རིང་གི་དུས་ཚིགས་དེའི་ཐོག་དབྱིན་སྐད་ནང་འཁྲུངས་སྐར་གྱི་འཚམས་འདྲི་དང་༸སྐུའི་མཛད་རྗེས་ཁག དེ་བཞིན་བྱམས་བརྩེ་ལོའི་ལས་གཞི་སྐོར་མ་གཏོགས་ཆབ་སྲིད་སྐོར་གང་ཡང་གསུངས་མེད་ཀྱང་། དེ་རིང་གི་དུས་ཚིགས་དང་འབྲེལ་བའི་བཀའ་ཤག་གི་གསུང་འཕྲིན་ནང་ཉེ་ལམ་རྒྱལ་ཚོགས་ཀྱི་མདུན་དུ་རང་གི་སྐུ་ལུས་མེར་བསྲེགས་གནང་མཁན་རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱི་དབུས་ད་བར་བོད་ནང་བོད་མི་ ༡༥༧ ཙམ་གྱི་དེ་ལྟ་བུའི་ལས་འགུལ་སྤེལ་བ་ལུང་འདྲེན་དང་འབྲེལ། བཀའ་ཤག་ངོས་ནས་རྒྱ་གཞུང་གིས་ཟླ་བ་འདིའི་ཕྱི་ཚེས་ ༡ ཉིན་ནས་ལག་བསྟར་འགོ་འཛུགས་བྱས་པའི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་ཁྲིམས་ཡིག་ཟེར་བར་དམིགས་པའི་ཐབས་ཇུས་འཆར་སྒྲིག་བྱེད་འགོ་ཚུགས་པ་དང་། གཞིས་བྱེས་བོད་མི་ཡོངས་ནས་དེར་བསྟུན་གྱི་གདོང་ལེན་བྱེད་དགོས་པའི་སྐུལ་མ་གནང་བ་མ་ཟད། རྒྱ་ནག་གི་དཔོན་རིགས་ཚོས་མི་རིགས་ཕན་ཚུན་འདྲ་མཉམ་དང་མཐུན་སྒྲིལ་གྱི་སྒོ་ནས་སྤྱི་ཚོགས་བརྟན་ལྷིང་ཡོང་སླད་ཁྲིམས་ཡིག་དེ་འཕྲལ་དུ་ཕྱིར་བསྡུ་དང་། ལག་བསྟར་མཚམས་འཇོག་དགོས་པའི་དགོས་འདུན་སོགས་འཁོད་འདུག མ་ཟད་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་སྒྲོལ་མ་ཚེ་རིང་མཆོག་ནས་ཀྱང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཁྲུངས་སྐར་ལ་དམིགས་བསལ་འཚམས་འདྲི་དང་འབྲེལ་༸རྒྱལ་བའི་སྐུ་ཚེ་ཧྲིལ་པའི་མཛད་རྗེས་ལ་ཆེ་བསྟོད་དང་་བཀའ་དྲིན་རྗེས་དྲན་ཞུས་པ་མ་ཟད། བོད་མི་ཡོངས་ནས་༸སྐུའི་ཐུགས་སྐྱེས་བཞི་པོར་སློབ་སྦྱོང་དང་། ལག་ལེན་དོན་འཁྱོལ་ཡོང་ཐབས་བྱེད་དགོས་པའི་ལམ་སྟོན་གནང་བ་མ་ཟད། རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱི་ཞལ་འཆེམས་ངོ་སྤྲོད་གནང་སྟེ། རྒྱ་གཞུང་ལ་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཡིག་ལ་བསྐྱར་བཅོས་ཀྱིས་བོད་ནང་དྲག་གནོན་མཚམས་འཇོག་དང་། བོད་རྒྱ་འབྲེལ་མོལ་འཕྲལ་དུ་སླར་གསོ་དགོས་པའི་ཞུ་སྐུལ་གནང་སོང་། གཞི་རྩའི་དེ་རིང་གི་༸རྒྱལ་བའི་འཁྲུངས་སྐར་གྱི་མཛད་སྒོ་འདི་བཞིན་ལ་དྭགས་ནང་ཚོགས་དང་དགོན་ཚོགས་དེ་བཞིན་བོད་མིའི་སྒྲིག་འཛུགས་ཀྱི་མཉམ་འབྲེལ་ཐོག་གོ་སྒྲིག་ཞུས་པ་ཞིག་ཡིན་པ་དང་། མཛད་སྒོའི་ཐོག་གཞན་ཡང་ལ་དྭགས་ཁ་ཆེ་མང་ཚོགས་ཀྱི་སྐུ་ཚབ་སྐུ་ཞབས་ Ashraf Ali Barcha མཆོག་ནས་༸སྐུའི་འཁྲུངས་སྐར་ལ་འཚམས་འདྲི་དང་༸གོང་ས་མཆོག་གི་སྐུ་ཚེ་ཧྲིལ་པོའི་མཛད་རྗེས་ལ་ཆེ་བསྟོད་ཞུས་པ་མ་ཟད། ལ་དྭགས་ཟློས་གར་ཚོགས་པའི་དབུ་འཛིན་མི་ཕམ་འོད་ཚལ་ལགས་ཀྱི་སྣེ་ཁྲིད་འོག་གཏམ་བརྗོད་དང་ལ་དྭགས་ཆུ་ཤོད་སྒྲོང་སྡེ་ནས་ལོ་གསར་ཀྱི་བརྟེན་འབྲེལ་ཞེས་གཟིགས་འབུལ། […] The post ལ་དྭགས་སུ་༸གོང་ས་མཆོག་དབུ་བཞུགས་ཐོག་༸སྐུའི་འཁྲུངས་སྐར་སྲུང་བརྩི་དང་འབྲེལ་༸གང་ཉིད་མཆོག་དགུང་ལོ་ ༡༣༠ ལྷག་སྐུ་བཞུགས་མཛད་རྒྱུའི་བཀའ་བཞེས་བཟང་པོ་སྨིན་སྩལ། appeared first on vot.

རྒྱ་གར་ནང་གི་དེ་རིང་ཉིན་རྒྱབ་དང་ཨ་རིའི་ནང་གི་ཕྱི་ཚེས་ ༦ ཉིན་གྱི་སྔ་དྲོར་རྒྱལ་གཅེས་དཔའ་བོ་བློ་དགའ་རང་བཙན་ལགས་དམ་པ་དེ་ཉིད་ཀྱི་སྐུ་ཕུང་གཟི་བརྗིད་ལྡན་པའི་ངང་ནིའུ་ཡོག་དང་ནིའུ་ཇར་སི་ཕུན་ཚོགས་བདེ་ཞི་ཚོགས་ཁང་ནང་གདན་ཞུས་ཀྱིས་བསྔོ་སྨོན་གསུང་འདོན་གནང་རྗེས་ཞུགས་འབུལ་གནང་རྒྱུ་རེད་འདུག དེ་ཡང་ཡོངས་གྲགས་སུ་བློ་དགའ་རང་བཙན་དང་དངོས་མིང་བློ་བཟང་དཔལ་ལྡན་ལགས་ཀྱིས་ཟླ་བ་འདིའི་ཕྱི་ཚེས་ ༣ ཉིན་གྱི་ཐོ་རེངས་དང་ཨ་རིའི་ནང་ཕྱི་ཚེས་ ༢ ཉིན་གྱི་ཕྱི་དྲོ་ཆུ་ཚོད་ ༤.༤༩ ཙམ་ལ་ངོ་དེབ་ཐོག་ཐད་གཏོང་བརྒྱུད་རྒྱལ་ཚོགས་ཀྱི་ལས་ཁུངས་མདུན་དུ་རང་ལུས་མེར་བསྲེགས་གནང་ནས་འདས་གྲོངས་སུ་ཕྱིན་ཡོད་པའི་ཡིད་སྐྱོའི་གནས་ཚུལ་ཐོན་ཡོད་པ་ལྟར།  དེ་རིང་ཨ་རིའི་ནིའུ་ཡོག་གྲོང་ཁྱེར་དུ་བོད་མི་སྟོང་ཕྲག་བརྒལ་བ་ལྷན་འཛོམས་ཀྱིས་རྒྱལ་གཅེས་དཔའ་བོ་བློ་དགའ་རང་བཙན་ལགས་དམ་པ་དེ་ཉིད་ཀྱིས་བོད་བསྟན་སྲིད་ཆེད་བློས་གཏོང་གནང་བར་རྗེས་དྲན་དང་གུས་འདུད་ཞུ་ཕྱིར་རྒྱ་གར་ནང་གི་ཉིན་རྒྱབ་དང་ཨ་རིའི་ནང་གི་ཕྱི་ཚེས་ ༦ ཉིན་གྱི་སྔ་དྲོ་ཆུ་ཚོད་ ༥ ཙམ་ལ་དམ་པ་ཁོང་གི་སྐུ་ཕུང་གཟི་བརྗིད་ལྡན་པའི་ངང་ Bellevue སྨན་ཁང་ནས་ནིའུ་ཡོག་དང་ནིའུ་ཇར་སི་ཕུན་ཚོགས་བདེ་ཞི་ཚོགས་ཁང་ནང་གདན་ཞུས་ཀྱིས་ཉིན་རྒྱབ་ཆུ་ཚོད་ ༡༢ བར་བསྔོ་སྨོན་གསུང་འདོན་གནང་རྗེས་སྐུ་ཕུང་ Brooklyn དུར་འཇུག་ཁང་དུ་ཞུགས་འབུལ་གནང་རྒྱུ་རེད་འདུག  སྨོན་ལམ་གསུང་འདོན་ཐོག་༸སྐྱབས་རྗེ་ཆོས་འཁོར་རིན་པོ་ཆེ་མཆོག་དང་རྣམ་རྒྱལ་གྲྭ་ཚང་གི་མཁན་རིན་པོ་ཆེ་དབུས་པའི་དགེ་འདུན་པ་རྣམ་པ་གཙོ་བཞུགས་ཐོག་ཨ་རིའི་སྐུ་ཚབ་དོན་གཅོད་དང་ལྷོ་བྱང་ཨ་རིའི་བོད་མི་མང་སྤྱི་འཐུས་རྣམ་པ་གཉིས། བྱང་ཨ་རིའི་བོད་རིགས་སྤྱི་མཐུན་ཚོགས་པ་ཁག་གི་སྐུ་ཚབ་དང་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན། དེ་བཞིན་སྲིད་ཟུར་བློ་བཟང་སེང་གེ་ལགས་དང་གཞན་ཡང་སེར་སྐྱ་མང་ཚོགས་སོགས་ལྷན་འཛོམས་ཀྱིས་བསྔོ་སྨོན་གསུང་འདོན་གནང་ཡོད་པ་རེད། སྐབས་དེར་རྒྱལ་གཅེས་དཔའ་བོ་བློ་དགའ་རང་བཙན་ལགས་དམ་པའི་སྤུན་མཆེད་བློ་བཟང་བསམ་གྲུབ་ལགས་ཀྱིས་ཁོང་གི་ནང་མིར་མཚོན་ན་རྒྱུན་དུ་རྒྱ་གཞུང་ལ་ཁ་གཏད་བཅག་ནས་བྱུང་བའི་མི་རིགས་ཤིག་ཡིན་པར་ངོས་འཛིན་གནང་གི་ཡོད་ཅེས་ངོ་སྤྲོད་དང་འབྲེལ་དམ་པ་དེ་ཉིད་ཀྱི་ནང་མིའི་རེ་བར་འཛམ་གླིང་ས་ཕྱོགས་སར་བོད་མི་འདུ་སྡོད་ས་གནས་ཁག་ཏུ་ཕྱི་ཟླ་ ༨ ཚེས་ ༢ ཉིན་གཞི་རྒྱ་ཆེ་བའི་ལས་འགུལ་སྤེལ་གནང་ཡོང་བ་དང་ལྷག་པར་དམ་པ་དེ་ཉིད་དགོངས་པ་རྫོགས་པའི་ཉིན་མོ་སྟེ་ཕྱི་ཟླ་ ༧ ཚེས་ ༢ དེ་བཞིན་རྒྱལ་གཅེས་དཔའ་བོ་བློ་དགའ་ལགས་ཀྱི་ཉིན་མོ་ཞེས་སྲུང་བརྩི་ཞུ་རྒྱུ་སླད་ནང་མིའི་ངོས་ནས་ཧུར་བརྩོན་གནང་རྒྱུ་ཡིན་པ་གསུངས་འདུག དེ་བཞིན་རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱི་གྲོགས་འདྲིས་ཆེན་པོ་ཡིན་པ་བོད་རང་བཙན་ལས་འགུལ་བ་འཇིགས་མེད་དབུ་རྒྱན་ལགས་གཙོས་ཨ་རིའི་བོད་ཀྱི་སྐུ་ཚབ་དོན་གཅོད་དང་ལྷོ་བྱང་ཨ་རིའི་སྤྱི་འཐུས། དེ་བཞིན་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་བཅས་ནས་རྒྱལ་གཅེས་དཔའ་བོ་བློ་དགའ་རང་བཙན་ལགས་དམ་པ་དེ་ཉིད་ད་བར་བོད་བསྟན་སྲིད་མི་རིགས་དང་བཅས་པའི་སླད་དུ་སྐུ་ལས་བསྐྱོན་པའི་བློས་བཏང་ལ་ཆེ་བསྟོད་ཀྱིས་གསུང་བཤད་གནང་བ་མ་ཟད། དེ་བཞིན་སེར་སྐྱ་མང་ཚོགས་ནས་རིམ་པས་བོད་ཀྱི་རྒྱལ་ཁབ་ཆེན་པོའི་རྒྱལ་དར་འཐུམ་པའི་རྒྱལ་གཅེས་པ་དམ་པ་དེ་ཉིད་ཀྱི་སྐུ་ཕུང་ཐོག་མྱ་ངན་གུས་འདུད་ཀྱི་མཇལ་དར་སྒྲོན་ཏེ་དམ་པ་ཁོང་ལ་མཐའ་མའི་ཞལ་གྱེས་ཞུས་རྗེས་སྐུ་ཕུང་དེ་ཉིད་མཉམ་འབྲེལ་རྒྱལ་ཚོགས་ཀྱི་ལས་ཁུངས་བརྒྱུད་ Brooklyn དུར་ཁྲོད་དུ་གདན་ཞུས་ཀྱིས་ཞུགས་འབུལ་གནང་རྒྱུ་རེད་འདུག  རྩ་བའི་འདས་པའི་ཉིན་ཤས་ནས་བོད་མི་མང་པོ་མཉམ་འབྲེལ་རྒྱལ་ཚོགས་ཀྱི་ལས་ཁུངས་མདུན་དུ་མུ་མཐུད་འཛོམས་ཏེ་རྒྱལ་གཅེས་དཔའ་བོ་བློ་དགའ་རང་བཙན་ལགས་དམ་པའི་བློས་གཏོང་གནང་བར་གདུང་ཤུགས་དྲག་པོའི་ཚོར་བ་བཏོན་བཞིན་པའི་ཁྲོད་འདིར། ཁ་ཉིན་ཕྱི་ཚེས་ ༤ ཉིན་བོད་མི་ལས་འགུལ་བ་ཁག་གཅིག་ནས་རྒྱ་ནག་གིས་བཙན་འཛུལ་ལ་ངོ་རྒོལ་བྱས་ཏེ་རང་ལུས་མེར་བསྲེགས་གནང་མཁན་རྒྱ་གཅེས་དཔའ་བོ་བློ་དགའ་རང་བཙན་ལགས་དམ་པ་དེ་ཉིད་ཀྱི་མཐའ་མའི་ཞལ་འཆེམས་ཀྱི་ཚིག་རྣམས་ནིའུ་ཡོག་ཏུ་ཡོད་པའི་མཉམ་འབྲེལ་རྒྱལ་ཚོགས་ཀྱི་དབུས་ལས་ཁུངས་ཀྱི་གྱང་ངོས་སུ་གསལ་བཏོན་གནང་བ་མ་ཟད། དགོང་མོར་ནིའུ་ཡོག་དང་ནིའི་ཇར་སིའི་བོད་ཀྱི་གཞོན་ནུ་ལྷན་ཚོགས་ཀྱི་མར་མེའི་འོད་སྣང་འོག་ཏུ་རྒྱལ་གཅེས་པ་བློ་དགའ་རང་བཙན་ལགས་དམ་པའི་བློས་གཏོང་དཔའ་ངར་ལ་རྗེས་དྲན་ཞུ་ཆེད་འདུ་འཛོམས་གནང་སྟེ་དམ་པ་དེ་ཉིད་ཀྱིས་བོད་ལ་བཅངས་པའི་བརྩེ་སེམས་དང་སྙིང་སྟོབས། རང་དབང་གི་ཕ་ཡུལ་ཞིག་གི་རྨི་ལམ་བཅས་ནམ་ཡང་བརྗེད་མི་སྲིད་ཅེས་གསུངས་འདུག ལྷག་པར་དུ་ཁ་སང་ནིའུ་ཡོག་དུ་རྟེན་གཞི་བྱས་པའི་རྒྱ་ནག་གཞུང་ཚབ་ལས་ཁུངས་མདུན་དུ་ས་གནས་བོད་ཀྱི་གཞོན་ནུ་ལྷན་ཚོགས་ཀྱིས་སྣེ་ཁྲིད་འོག་ཞི་ཅིང་ཕིང་ལ་གཞི་རྒྱ་ཆེ་བའི་ངོ་རྒོལ་སྐད་འབོད་ཀྱི་ལས་འགུལ་སྤེལ་བ་མ་ཟད། བྱང་ཨ་རི་ས་གནས་བོད་ཀྱི་གཞོན་ནུ་ལྷན་ཚོགས་ཐུན་མོང་ནས་རྒྱལ་གཅེས་པ་བློ་དགའ་རང་བཙན་ལགས་དམ་པས་བོད་དོན་ཆེད་རང་གི་གཅེས་པའི་ལུས་སྲོག་བློས་གཏོང་གནང་བར་གདུང་སེམས་མཉམ་བསྐྱེད་ཞུ་ཕྱིར་ཨ་རིའི་ནང་གི་ཕྱི་ཚེས་ ༦ ཉིན་རྒྱབ་ཆུ་ཚོད་ ༤ ནས་ ༧ བར་འཛམ་གླིང་མཉམ་འབྲེལ་རྒྱལ་ཚོགས་མདུན་དུ་ངོ་རྒོལ་སྐད་འབོད་ཀྱི་ལས་འགུལ་ཞིག་ཀྱང་སྤེལ་རྒྱུ་རེད་འདུག ཕྱོགས་མཚུངས་ཟླ་བ་འདིའི་ཚེས་ ༣ ཉིན་གྱི་དགོང་མོར་ལོན་ཌོན་དུ་རྟེན་གཞི་བྱས་པའི་རྒྱ་ནག་གཞུང་ཚབ་ཁང་གི་མདུན་དུ་བོད་མི་ཚོས་ཞི་བའི་ངོ་རྒོལ་ལས་འགུལ་ཞིག་སྤེལ་བའི་སྐབས། […] The post ནིའུ་ཡོག་ཏུ་རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱི་སྐུ་ཕུང་གཟི་བརྗིད་ལྡན་པའི་ངང་གདན་ཞུས་ཀྱི་ཞུགས་འབུལ་གནང་རྒྱུ། appeared first on vot.

རྒྱལ་སྤྱིའི་བོད་ཀྱི་གཞོན་སྐྱེས་ཚོགས་ཆེན་ཐེངས་བཞི་པའི་ཉིན་མཐའ་མར་རྒྱ་ནག་གི་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་ཟེར་བ་མཚོན་པའི་བོད་ཐོག་འཛིན་པའི་སྲིད་བྱུས་ལ་སྐྱོན་བརྗོད་དང་བོད་ཀྱི་གཞོན་སྐྱེས་རྣམས་བློ་རྩེ་གཅིག་མཐུན་གྱིས་བོད་དོན་འཐབ་རྩོད་བྱ་རྒྱུ་དམ་བཅའ་བརྟན་པོ་ཡོད་པ་མ་ཟད། ༸རྒྱལ་བའི་ཡང་སྲིད་ཀྱི་སྐུ་དབང་ཡོངས་རྫོགས་དགའ་ལྡན་ཕོ་བྲང་ཡིད་ཆེས་དགེ་རྩ་ཚོགས་པ་ཁོ་ན་ལ་ཡོད་པ་ལས། གལ་ཏེ་རྒྱ་ནག་གིས་ཐེ་གཏོགས་བྱེད་ཚེ་ངོས་ལེན་གཏན་ནས་མེད་ཅེས་བསྒྲགས་གཏམ་འདོན་སྤེལ་གནང་སོང་། དེ་ཡང་ཟླ་བ་འདིའི་ཕྱི་ཚེས་ ༣ ནས་ ༥ བར་ཉིན་གྲངས་གསུམ་རིང་རྡ་ས་འཛིན་སྐྱོང་སྦྱོང་བརྡར་ཁང་དུ་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་གོ་སྒྲིག་འོག་རྒྱལ་སྤྱིའི་བོད་ཀྱི་གཞོན་སྐྱེས་ཚོགས་ཆེན་ཐེངས་བཞི་པ་སྐོང་འཚོགས་གནང་ཡོད་ཅིང་། ཚོགས་ཆེན་གྱི་ཉིན་མཐའ་མར་ཚོགས་བཅར་བ་རྣམས་ནས་ཡོངས་ཁྱབ་བསྒྲགས་གཏམ་ཞིག་འདོན་སྤེལ་གནང་ཡོད་པ་དང་། བསྒྲགས་གཏམ་དེའི་ནང་། ཕྱི་ཟླ་ ༧ ཚེས་ ༡ ནས་རྒྱ་ནག་གཞུང་གིས་མི་རིགས་མཐུན་སྒྲིལ་ཡར་ཐོན་སྐུལ་འདེད་གཏོང་བའི་ཁྲིམས་ཡིག་ཟེར་བ་ལག་བསྟར་བྱེད་འགོ་ཚུགས་པ་དང་འབྲེལ། བོད་རྒྱལ་ཁབ་ནི་རྒྱ་ནག་གི་དབང་སྒྱུར་འོག་ཉེན་ཚབས་ཆེ་བའི་གནས་སུ་ལྷུང་ཡོད་ཅིང་། ཁྲིམས་ཡིག་དེ་ནི་བོད་ཀྱི་ཐུན་མོང་མ་ཡིན་པའི་སྐད་དང་ཡི་གེ་ཆོས་དང་རིག་གཞུང་བཅས་པ་རྩ་མེད་གཏོང་ཐབས་དང་བོད་མི་རིགས་བཙན་དབང་གིས་རྒྱ་ནག་ཅན་དུ་བསྒྱུར་རྒྱའི་ཁྲིམས་ལུགས་ཀྱི་སྒྲོམ་གཞི་ཞིག་ཆགས་ཀྱི་ཡོད་པར་སྐྱོན་བརྗོད་ཐོག བོད་ཡོངས་ནས་ལྷོད་གཡེང་མེད་པར་མཉམ་རུབ་ཀྱི་འཐབ་རྩོད་བྱ་དགོས་གལ་དང་། རྒྱལ་སྤྱིའི་སྤྱི་ཚོགས་ཀྱི་ངོས་ནས་ཁ་ཚ་དགོས་གཏུགས་ཀྱི་བར་འཚང་བྱ་དགོས་པའི་དུས་ལ་བསླེབས་ཡོད་པའི་འབོད་སྐུལ་ཞུས་འདུག ཁྲིམས་ལུགས་དེ་ཇི་ཙམ་གྱི་ཛ་དྲག་ཡིན་མིན་ནི། ལག་བསྟར་བྱས་པའི་ཉིན་རྗེས་མར་རྒྱལ་གཅེས་དཔའ་བོ་བློ་དགའ་རང་བཙན་དམ་པ་ཁོང་གིས་ནིའུ་ཡོག་ཏུ་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ཀྱི་ལས་ཁུངས་མདུན་དུ་སྐུ་ལུས་མཆོད་མེར་ཕུལ་པ་དེ་ལས་གསལ་པོར་ཤེས་ཐུབ་པ་དང་། ཕྱི་ལོ་ ༡༩༩༨ ལོ་ནས་བཟུང་ད་བར་བོད་མིས་སྐུ་ལུས་མེར་མཆོད་ཕུལ་མཁན་རྒྱལ་གཅེས་དཔའ་བོ་ ༡༦༠ ལྷག་བྱུང་ཡོད་པར་ལས་འགུལ་དེ་དག་ནི། རྒྱ་གཞུང་གིས་བོད་རྒྱ་སྒྱུར་གྱི་སྲིད་བྱུས་ལག་བསྟར་བརྒྱུད་བོད་མི་རིགས་རྩ་མེད་གཏོང་རྒྱུའི་བྱ་སྤྱོད་ལ་རྒྱལ་སྤྱིའི་སྤྱི་ཚོགས་ཀྱི་དོ་སྣང་སླེབས་ཆེད་དང་། བོད་མིས་རང་རྒྱལ་ཁབ་ཆེད་དུ་ཡོད་ཚད་བློས་གཏོང་བྱེད་བཞིན་པའི་དྲན་སྐུལ་ཡང་གཏོང་གི་ཡོད་ཅེས་ནན་བརྗོད་གནང་འདུག  ལྷག་པར་རྒྱལ་གཅེས་དཔའ་བོ་རྣམས་ཀྱི་བློས་བཏང་ལ་རྗེས་དྲན་དང་། ལས་འཕྲོ་མཇུག་སྐྱོང་གཡོལ་ཐབས་མེད་པ་མ་ཟད། བོད་མི་རྣམས་མཐུན་སྒྲིལ་གྱི་སྟོབས་ཤུགས་རྒྱ་སྐྱེད་གཏོང་རྒྱུ། རང་དབང་སླར་གསོ་བྱ་རྒྱུ་བཅས་ནི་གཞོན་སྐྱེས་མི་རབས་འདིའི་མཐར་ཐུག་གི་ལས་འགན་ཡིན་པར་དགའ་སྤོབས་ཆེན་པོས་ཕྲག་པའི་སྟེང་དུ་བླང་རྒྱུའི་དམ་བཅའ་བརྟན་པོ་ཡོད་ཅེས་གསལ་སྟོན་གནང་འདུག དེ་བཞིན་རྒྱ་གཞུང་གིས་བོད་ཕྲུག་ས་ཡ་གཅིག་ལྷག་ཕ་མེས་ཀྱི་རིག་གཞུང་དང་ཁ་བྲལ་གཏོང་སླད་ཆེད་འཛུགས་བྱས་པའི་མི་སེར་སྤེལ་ཡུལ་བཅའ་སྡོད་སློབ་གྲྭའི་སྲིད་བྱུས་ལ་མཐའ་གཅིག་ཏུ་ངོས་ལེན་མེད་པ་དང་། གཞིས་ལུས་སྤུན་ཟླའི་སྙིང་སྟོབས་ལས་རྒྱལ་སྤྱིའི་སྤྱི་ཚོགས་ཁྲོད་བོད་དོན་འཐབ་རྩོད་དང་ལས་འགུལ་ལ་ནུས་པ་ཁྱད་པར་ཅན་ཞིག་སྦྱིན་གྱི་ཡོད་ཅིང་། ལྷག་པར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་ཀྱི་སྐུ་དབང་ཡོངས་རྫོགས་དགའ་ལྡན་ཕོ་བྲང་ཡིད་ཆེས་དགེ་རྩ་ཚོགས་པ་གཅིག་པུ་ལ་ཡོད་པ་ལས་རྒྱ་གཞུང་གིས་དེར་ཐེ་བྱུས་བྱས་ཚེ་ངོས་ལེན་རྩ་བ་ནས་མེད་ཅེས་ནན་བརྗོད་གནང་འདུག མཇུག་སྡོམ་མཛད་སྒོའི་ཐོག་སྐུ་མགྲོན་གཙོ་བོར་བོད་མི་མང་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་གིས། བོད་པའི་གཞོན་སྐྱེས་རྣམས་ལ་རང་མི་རིགས་ཀྱི་ཐུན་མོང་མ་ཡིན་པའི་སྐད་དང་ཡི་གེ རིག་གཞུང་སོགས་སྦྱང་བརྩོན་བྱ་དགོས་གལ་ཡིན་པ་དང་ཆབས་ཅིག ཤེས་ཡོན་དང་བསམ་པའི་ནུས་པ་གོང་མཐོར་གཏོང་དགོས་པ། ནང་ཁུལ་རྡོག་རྩ་ཆིག་སྒྲིལ། དྲང་བདེན་དང་ཞི་བའི་ལམ་ནས་རང་གི་ཐོབ་ཐང་དང་རང་དབང་ཆེད་འཐབ་རྩོད་བྱ་དགོས་པ། རང་མི་རིགས་ཀྱི་ལོ་རྒྱུས་ཤེས་རྟོགས་ཐོག་ནས་རང་གི་བདག་དབང་རྩོད་ལེན་བྱ་དགོས་པ། ཕ་ཡུལ་ནང་དུ་འབྱུང་བཞིན་པའི་གནས་ཚུལ་རྣམས་ཕྱི་གསལ་ནང་གསལ་གྱིས་རྒྱལ་སྤྱིའི་སྤྱི་ཚོགས་དང་གསར་འགྱུར་བརྒྱུད་ལམ་ཁག་ལ་བརྒྱུད་བསྒྲགས་དང་རྒྱལ་སྤྱིའི་རྒྱབ་སྐྱོར་འཚོལ་ཐབས་བྱ་དགོས་པའི་ལམ་སྟོན་གནང་སོང་བ་མ་ཟད། རྒྱལ་སྤྱིའི་དང་གནས་ཡུལ་རྒྱལ་ཁབ་ཀྱི་ཁྲིམས་ལུགས་དང་མཐུན་པའི་ཐོག་ནས་རང་མི་རིགས་ཀྱི་ཐོབ་ཐང་དང་རང་དབང་སྲུང་སྐྱོབ་ཡོང་ཐབས་ཀྱི་ལས་དོན་བསྒྲུབ་དགོས་པ་སོགས་གསུངས་སོང་། རྩ་བའི་མཇུག་སྡོམ་མཛད་སྒོའི་ཐོག་གཞན་སྐུ་མགྲོན་དུ་རྒྱ་གར་ Konrad-Adenauer-Stiftung འགན་འཛིན་ལས་རོགས་ཨན་ཇ་ལི་ར་ཝཌ་ Anjali Rawat ལགས། འཇར་མན་གྲོས་ཚོགས་འཐུས་མིའི་ལས་ཁུངས་ཀྱི་འཇར་མན་དང་པཱོ་ལེནྜ་འབྲེལ་ལམ་ཐོག་མཁས་པ་ཇོ་ནཱསི་ཀོ་ལེ་ཀི་ Jonas Kolecki ལགས། ཟབ་ཁྲིད་པ་ཨོ་གླིང་དུ་རྟེན་གཞི་བྱས་པའི་ཁྱེད་ཀྱི་ཐོན་རྫས་འདེམས་ཞེས་པའི་ཚོང་ལས་ཁང་གི་འགན་འཛིན་ཚེ་བརྟན་སྒྲོལ་མ་ལགས། […] The post རྒྱ་ནག་གིས་བོད་ཐོག་འཛིན་པའི་སྲིད་བྱུས་ལ་སྐྱོན་བརྗོད་དང་བློ་རྩེ་གཅིག་མཐུན་གྱིས་བོད་དོན་འཐབ་རྩོད་བྱ་རྒྱུ་དམ་བཅའ་བརྟན་པོའི་ཐོག་རྒྱལ་སྤྱིའི་བོད་ཀྱི་གཞོན་སྐྱེས་ཚོགས་ཆེན་ཐེངས་བཞི་པ་མཇུག་སྒྲིལ། appeared first on vot.

རྒྱ་ནག་གིས་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཡིག་ཟེར་བ་དངོས་སུ་ལག་བསྟར་དང་འབྲེལ་རྒྱལ་སྤྱིའི་ས་ཕྱོགས་གང་སར་བོད་མི་དང་བོད་དོན་རྒྱབ་སྐྱོར་བས་རྣམ་པ་འདྲ་མིན་སྒོ་ནས་ལས་འགུལ་ཤུགས་ཆེ་སྤེལ་དང་སྤེལ་མུས་ཁྲོད། ཨ་རིའི་ནིའུ་ཡོག་གྲོང་ཁྱེར་དུ་གནས་བཞུགས་བོད་རང་བཙན་འཐབ་རྩོད་པ་བློ་དགའ་རང་བཙན་ལགས་ཀྱིས་ལུས་ལ་བོད་ཆས་སྤྲས་པ་དང་ཕྱག་ཏུ་བོད་ཀྱི་རྒྱལ་དར་བསྣམས་ཏེ་མཉམ་འབྲེལ་རྒྱལ་ཚོགས་ཀྱི་མདུན་དུ་རང་ལུས་མེར་བསྲེགས་བཏང་འདུག དེའང་ཡོང་གྲགས་སུ་བློ་དགའ་རང་བཙན་དང་དངོས་མིང་བློ་བཟང་དཔལ་ལྡན་ལགས་ཀྱིས་ངོ་དེབ་ཐོག་ཚོར་ཤུགས་ཆེན་པོའི་སྒོ་ནས་རྒྱ་ནག་གིས་བོད་ཐོག་འཛིན་པའི་དྲག་གནོན་གྱི་སྲིད་བྱུས་ལ་སྐྱོན་བརྗོད་ཤུགས་ཆེ་དང་།  བཙན་བྱོལ་བོད་མི་ཚོར་ཆོལ་གསུམ་ཆིག་སྒྲིལ་དང་། བོད་རང་བཙན་འཐབ་རྩོད་སླད་མཉམ་ལས་དགོས་པའི་སྐུལ་མ་འཁོད་པའི་བརྙན་ཐུང་ཞིག་འདོན་སྤེལ་གནང་བ་མ་ཟད། རྒྱ་གར་ནང་གི་དེ་རིང་སྔ་དྲོ་ཐོ་རེངས་དང་ཨ་རིའི་ནང་ཕྱི་ཚེས་ ༢ ཉིན་གྱི་ཕྱི་དྲོ་ཆུ་ཚོད་ ༥:༤༩ ཙམ་ལ་རྒྱལ་ཚོགས་ཀྱི་ལས་ཁུངས་མདུན་དུ་བོད་ཀྱི་རྒྱལ་དར་སྒྲེངས་འཛུགས་བྱས་པའི་ཐོག་རང་ཉིད་ཀྱི་སྐུ་ལུས་མེར་བསྲེགས་ཀྱིས་སྐར་ཆ་ ༤༠ ཙམ་གཡོ་འགུལ་མེད་པར་འགྲེང་ངེར་བཞེངས་བསྡད་རྗེས་ས་ལ་འགྱེལ་མ་ཐག་ཉེན་རྟོག་པས་མེ་གསོད་པ་ཐད་གཏོང་བརྒྱུད་མཇལ་རྒྱུ་འདུག་ཅིང་། ཉེན་རྟོག་པས་ཁོང་ Bellevue སྨན་ཁང་ལ་འཁྲིད་ཀྱང་ཆུ་ཚོད་ ༧ ཡོལ་ཙམ་ལ་དགོངས་པ་རྫོགས་འདུག ཨ་རིའི་ Philadelphia ནས་ཡིན་པའི་སྐུ་ཞབས་ཐུབ་བསྟན་ཆོས་ཉིད་ལགས་ནི་རྒྱུན་དུ་དམ་པ་དེ་ཉིད་དང་འབྲེལ་བ་ཟབ་མོ་ཡོད་མཁན་ཞིག་ཡིན་པ་དང་རང་ལུས་མེར་མཆོད་མ་ཕུལ་བའི་སྐར་མ་ལྔ་བཅུ་ཙམ་གྱི་གོང་དུ་དམ་པ་ཁོང་དང་ལྷན་དྲྭ་ལམ་བརྒྱུད་བཀའ་མོལ་གནང་འདུག འདི་ག་རླུང་འཕྲིན་ཁང་ནས་ཁོང་ལ་འབྲེལ་བ་ཞུ་སྐབས། ཁོང་གཙོས་པའི་ཕྱག་རོགས་དྲུག་སྐུ་ལུས་མེ་མཆོད་ཕུལ་ས་རྒྱལ་ཚོགས་མདུན་གྱི་ས་ཚིགས་དེ་རང་ཐོག་བཞུགས་ཏེ་མྱ་ངན་ཞུ་བཞིན་པ་རེད་འདུག བློ་དགའ་རང་བཙན་ལགས་ནི་བོད་ཁམས་དཀར་མཛེས་ཁུལ་གྱི་གྲོང་ཚོ་ཆུང་ཆུང་ཞིག་ནས་ཡིན་པ་དང་། ཆུང་དུ་རབ་ཏུ་བྱུང་རྗེས་ ༡༩༩༠ གོ་གྲངས་ནས་རྒྱ་གར་དུ་བཙན་བྱོལ་ལ་ཕེབས་ཏེ་ལྷོ་ཕྱོགས་དགའ་ལྡན་དགོན་པའི་ནང་ཆོས་བཞུགས་ཀྱིས། ཕྱི་ལོ་ ༢༠༠༦། ༢༠༠༧ ཙམ་ལ་ཨ་རིར་གནས་སྤོས་ཀྱིས་རྒྱུན་ལྡན་བོད་རང་བཙན་སླད་ལས་དོན་རིམ་པ་གཉེར་མཁན་ཞིག་ཡིན་པ་མ་ཟད། དགོངས་པ་མ་རྫོགས་གོང་དུ་བོད་རྒྱལ་ཡོངས་རང་བཙན་ལྷན་ཚོགས་ཀྱི་ཚོགས་གཙོའི་ཐུགས་འགན་བཞེས་བཞིན་པ་རེད་འདུག སྤྱིར་བློ་དགའ་རང་བཙན་ལགས་དམ་པ་དེ་ཉིད་ཀྱིས་སྐུ་ལུས་མེར་མཆོད་མ་ཕུལ་གོང་བརྙན་ཐུང་བརྒྱུད་ཞལ་འཆེམས་བཞག་པའི་ནང་བོད་ནང་གི་བོད་མི་ཚོར་གང་ཡང་ཞུ་རྒྱུ་མེད་པར་གཙོ་བོ་བཙན་བྱོལ་བོད་མི་རྣམས་ལ་ཆོལ་གསུམ་ཆིག་སྒྲིལ་སྒོ་ནས་བོད་རང་བཙན་སླད་མཉམ་ལས་དགོས་པའི་སྐུལ་མ་དང་། ལྷག་པར་རྒྱ་ནག་གཞུང་གིས་བོད་མི་རིགས་ཡོངས་སུ་རྫོགས་པར་ཆོལ་གསུམ་དབྱེར་མེད་ཀྱིས་དྲག་གནོན་བྱས་པ་དང་། ད་ལྟའི་ཆར་བོད་ནང་དཀའ་ངལ་མང་དག་ཅིག་འཕྲད་བཞིན་པ་ཆ་ཚང་བོད་རང་བཙན་ཤོར་བའི་རྒྱུ་མཚན་རྐྱེན་གྱིས་ཡིན་པ་ནན་སྐུལ་གནང་འདུག རྒྱལ་གཅེས་པ་དམ་པ་དེ་ཉིད་ཀྱིས་ད་དུང་རང་ལུས་མེར་བསྲེགས་ཀྱི་ལས་འགུལ་སྤེལ་བ་དེ་ཁོང་ལ་ཟ་རྒྱུ་འཐུང་རྒྱུ་མེད་པར་མ་ཡིན་པར་བོད་རྒྱལ་ཁབ་དོན་དུ་སྤེལ་གྱི་ཡོད་སྟབས། བོད་མི་རྣམས་ཀྱིས་ཁོང་གི་ལས་འགུལ་དེའི་རྐྱེན་པས་སླེབས་ལ་ཉེ་བའི་༸རྒྱལ་བའི་འཁྲུངས་སྐར་གྱི་དགའ་བསུ་དང་སྒོར་གཞས་སོགས་མཚམས་འཇོག་མ་བྱེད་པར་གཙོ་བོ་ཁོང་གི་བོད་རྒྱལ་ཁབ་དོན་དུ་བཅངས་བའི་རེ་སྐུལ་དེ་གྲུབ་སླད་མཉམ་ལས་དགོས་པའི་ཞུ་སྐུལ་གནང་འདུག སྤྱིར་ཕྱི་ལོ་ ༡༩༩༨ ལོར་རྒྱ་གར་གྱི་རྒྱལ་ས་ལྡི་ལིར་རྒྱལ་གཅེས་དཔའ་བོ་ཐུབ་བསྟན་དངོས་གྲུབ་ལགས་ཀྱིས་གཞོན་ནུའི་ཟས་བཅད་ངོ་རྒོལ་གྱི་ལས་འགུལ་ཁྲོད་རང་ལུས་མེར་བསྲེགས་ཀྱི་ལས་འགུལ་སྤེལ་རྗེས། ད་བར་བོད་ཕྱི་ནང་གཉིས་སུ་བོད་མི་ཁྱོན་ ༡༧༠ ལྷག་གིས་འ་ཆད་འུ་ཐུག་འོག་རང་ལུས་མེར་བསྲེགས་བརྒྱུད་བོད་དོན་ཆེད་རང་གིས་གཅེས་པའི་ལུས་སྲོག་བློས་གཏོང་གི་གནས་ཚུལ་རིམ་པ་ཐོན་པ་མ་ཟད། བོད་ནང་རང་ལུས་མེར་བསྲེགས་ཁྱོན་ ༡༥༦ ཙམ་བྱུང་བའི་ཁོངས་ནས་ ༡༣༦ ཙམ་འདས་གྲོངས་སོང་བ་དེ་ལྟར་ཡང་། ད་རེས་བློ་དགའ་རང་བཙན་ལགས་དམ་པ་དེ་ཉིད་ཀྱིས་ཨ་རིའི་ནིའུ་ཡོག་གྲོང་ཁྱེར་ནང་གི་རྒྱལ་ཚོགས་ཀྱི་ལས་ཁུངས་མདུན་དུ་རང་ལུས་མེར་བསྲེགས་གནང་བ་དེ་ནི་ཨ་རིའི་དེ་འབྲེལ་གནས་ཚུལ་ཐོག་མ་དེ་ཆགས་ཡོད། དེ་རིང་བཞུགས་སྒར་དུ་རྒྱལ་སྤྱིའི་བོད་ཀྱི་གཞོན་སྐྱེས་ཚོགས་ཆེན་ཐེངས་བཞི་པའི་དབུ་འབྱེད་མཛད་སྒོའི་ཐོག་སྲིད་སྐྱོང་སྤེན་པ་ཚེ་རིང་མཆོག་དབུ་བཞུགས་ཀྱིས་བློ་དགའ་རང་བཙན་ལགས་དམ་དེ་ཉིད་ལ་མྱ་ངན་གུས་འདུད་དང་གདུང་སེམས་མཉམ་སྐྱེད་ཞུས་པ་མ་ཟད། སྲིད་སྐྱོང་མཆོག་གིས་གསར་འགོད་པར་རྒྱ་ནག་གིས་ཉེ་ལམ་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཡིག་ཟེར་བ་ལག་བསྟར་བྱས་པ་དེས་དམ་པ་དེ་ཉིད་དབུས་པའི་བོད་མི་མང་པོའི་སེམས་ལ་རྨ་ཁ་བཟོས་ཡོད་པ་འགྲེལ་བརྗོད་དང་འབྲེལ། ཁོང་གིས་རང་གིས་གཅེས་པའི་ལུས་སྲོག་བློས་གཏོང་གནང་བ་དེ་ཕངས་པོ་ཡིན་པ་དེ་ལྟར་ཡང་ཀུན་སློང་རྒྱ་ཆེ་བཞེས་པའི་ཐོག་བོད་སྤྱི་བའི་དོན་དུ་ལས་འགུལ་དེ་ལྟར་སྤེལ་བ་དེ་ཧ་ཅང་རྩ་ཆེན་པོ་ཡིན་པ་དང་། དེའི་ནུས་པ་དང་གྲུབ་འབྲས་དུས་ཚོད་འགོར་མིན་ལ་མ་ལྟོས་པར་ངེས་པར་དུ་སྨིན་རྒྱུ་ཡིན་པའི་སྨོན་འདུན་ཞུས་གནང་སོང་། དམ་པ་ཁོང་ Bellevue སྨན་ཁང་དུ་དགོངས་པ་རྫོགས་པའི་གནས་ཚུལ་དྲྭ་ལམ་ཁག་ཏུ་ཐོན་མ་ཐག […] The post བློ་དགའ་རང་བཙན་ལགས་ཀྱིས་རྒྱལ་ཚོགས་ཀྱི་མདུན་དུ་བོད་རང་བཙན་དང་ཆོལ་གསུམ་མཐུན་སྒྲིལ་ཆེད་རང་ལུས་མེར་བསྲེགས་བཏང་འདུག appeared first on vot.

རྒྱལ་སྤྱིའི་བོད་ཀྱི་གཞོན་སྐྱེས་ཚོགས་ཆེན་ཐེངས་བཞི་པ་འགོ་འཛུགས་གནང་སོང་བ་དང་། ཚོགས་ཆེན་དབུ་འབྱེད་ཀྱི་མཛད་སྒོའི་ཐོག་༸རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱིས་རང་ལུས་མེར་བསྲེགས་གནང་བར་མྱ་ངན་གུས་འདུད་དང་འབྲེལ། བོད་པའི་གཞོན་སྐྱེས་རྣམས་ཀྱིས་བོད་སྤྱི་པའི་རྩ་དོན་ཐོག་འབད་སྤུངས་གནང་དགོས་ཤིང་། སོ་སོའི་མི་རིགས་ཀྱི་སྐད་དང་རིག་གཞུང་རྒྱུན་འཛིན་ཐོག་ཡུལ་ལུང་སོ་སོའི་ནང་གི་ཆབ་སྲིད་དང་སྤྱི་ཚོགས་ཀྱི་ལས་དོན་ནང་མཉམ་ཞུགས་གནང་དགོས་རྒྱུའི་གལ་ཆེན་པོ་ཡིན་པ་ནན་བརྗོད་གནང་སོང་། དེ་ཡང་ཚོགས་ཆེན་འདི་བཞིན་དེ་རིང་ཕྱི་ཟླ་ ༧ ཚེས་ ༣ ནས་ ༥ བར་ཉིན་གྲངས་གསུམ་རིང་བཞུགས་སྒར་དུ་རྟེན་གཞི་བྱས་པའི་རྡ་ས་འཛིན་སྐྱོང་སྦྱོང་བརྡར་ཁང་དུ་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་གོ་སྒྲིག་འོག་འཚོག་བཞིན་ཡོད་ཅིང་། དབུ་འབྱེད་མཛད་སྒོའི་ཐོག་སྐུ་མགྲོན་གཙོ་བོར་འཇར་མ་ནཱི་གྲོས་ཚོགས་འཐུས་མི་ལས་ཁུངས་ཀྱི་འཇར་མ་ནཱི་དང་པཱོ་ལེནྜ་འབྲེལ་ལམ་གྱི་མཁས་པ་ Jonas Kolecki ཇོ་ནཱས་ཀོ་ལེག་ཀི་མཆོག་གིས་དབུས་པའི་སྲིད་སྐྱོང་དང་ཕྱི་དྲིལ་བཀའ་བློན་གཅིག་ལྕོགས་སྤེན་པ་ཚེ་རིང་མཆོག ཕྱི་དྲིལ་དྲུང་ཆེ་ཀརྨ་རིན་ཆེན་ལགས། དེ་བཞིན་གསུང་བཤད་པ་དང་ཟབ་ཁྲིད་པ། ཕྱི་དྲིལ་ལས་ཁུངས་ཀྱི་འབྲེལ་ཡོད་ལས་བྱེད། རྒྱལ་ཁབ་ཁག་ ༡༣ ནས་བོད་ཀྱི་གཞོན་སྐྱེས་ཚོགས་བཅར་བ་ ༩༨ མཉམ་ཞུགས་གནང་སོང་། དབུ་འབྱེད་མཛད་སྒོའི་ཐོག་ཁ་སང་ཨ་རིའི་ནིའུ་ཡོག་ནང་དུ་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ལས་ཁུངས་ཀྱི་མདུན་དུ་རྒྱལ་གཅེས་དཔའ་བོ་དམ་པ་བློ་དགའ་ལགས་ཀྱི་རང་ལུས་མེར་བསྲེགས་གནང་སྟེ། སྐུ་ཚེ་མ་ཟིན་པའི་གནས་ཚུལ་ཐོན་པར་སྐུ་མགྲོན་གཙོས་པའི་ཚོགས་བཅར་བ་ཡོངས་ནས་མྱ་ངན་གུས་འདུད་ཞུས་སོང་། སྐབས་དེར་སྲིད་སྐྱོང་མཆོག་གིས་དམ་པ་ཁོང་ལ་མྱ་ངན་གུས་འདུད་དང་འབྲེལ། ཚོགས་བཅར་བ་བོད་པའི་གཞོན་སྐྱེས་རྣམས་ལ་མ་འོངས་བོད་ཀྱི་འཐབ་རྩོད་མུ་མཐུད་གནས་ཐུབ་དང་མི་ཐུབ་ཅེས་པ་དེ་བོད་པའི་གཞོན་སྐྱེས་རྣམས་ལ་རག་ལུས་ཡོད་པ་ལས་གཞན་སུ་ལའང་རག་ལུས་ཀྱི་མེད་པ་དང་། བོད་མིའི་སྒྲིག་འཛུགས་བཀའ་ཤག་སྐབས་སོ་སོའི་བོད་པའི་གཞོན་སྐྱེས་རྣམས་ལ་དམིགས་ནས་ལས་དོན་རིམ་པ་གནང་བའི་ཁྲོད། བཀའ་ཤག་སྐབས་ ༡༦ སྔོན་ལ་ལྔ་དང་ལྔ་བཅུ་ཚོགས་ཆེན་གོ་སྒྲིག་གནང་ཡོད་པར་ཕན་ཐོགས་བྱུང་ཡོད་པ་གསུངས་སོང་། དེ་བཞིན་འགོ་ཁྲིད་ཆགས་པ་ལ་གནས་ཚུལ་ཤེས་རྟོགས་དགོས་རྒྱུ་གལ་ཆེན་པོ་ཡིན་ཞིང་། དེའི་ཁྲོད་ནས་སོ་སོ་རང་ཉིད་ཀྱི་གནས་སྟངས་དང་རྒྱབ་ལྗོངས་ཤེས་དགོས་པ་མ་ཟད། ཚོགས་ཆེན་འདི་གྲུབ་རྗེས་སོ་སོའི་ས་གནས་སུ་ཡོད་པའི་གྲོས་ཚོགས་འཐུས་མི་དང་གསར་འགོད་པ་སོགས་དང་འབྲེལ་བ་བཟོས་ནས་ནུས་པ་མཉམ་སྤུངས་ཐོག་བོད་དོན་ཞུ་གཏུག་གནང་རྒྱུའི་དམིགས་ཚད་བཟུང་དགོས་པའི་ལམ་སྟོན་གནང་སོང་།  དེ་བཞིན་སྐུ་མགྲོན་གཙོ་བོ་འཇར་མ་ནཱི་གྲོས་ཚོགས་འཐུས་མི་ལས་ཁུངས་ཀྱི་འཇར་མ་ནཱི་དང་པཱོ་ལེནྜ་འབྲེལ་ལམ་གྱི་མཁས་པ་ Jonas Kolecki ཇོ་ནཱས་ཀོ་ལེག་ཀི་མཆོག་གིས་གསུང་བཤད་གནང་བའི་ཁྲོད། བོད་པའི་གཞོན་སྐྱེས་རྣམས་ནས་ཡུལ་ལུང་སོ་སོའི་ཆབ་སྲིད་ཚོགས་པ་དང་སྒྲིག་འཛུགས་ཁག་ལ་ཞུ་གཏུགས་ཀྱིས་ལས་འགན་འཁུར་དགོས་པའི་འབོད་སྐུལ་དང་འབྲེལ། ས་གནས་གཞུང་གི་སྒྲོམ་གཞི་བཅས་ཀྱི་ནང་ཆ་ཤས་བླངས་ཏེ། འཇམ་པོའི་ནུས་སྟོབས་རྒྱ་སྐྱེད་གནང་དགོས་ཤིང་། ཁོང་རང་ཉིད་ German Polish འཇར་མཱན་པཱོ་ལིཤ་ཡིན་པའི་སྒེར་གྱི་རྒྱབ་ལྗོངས་ཐོག་ནས་གཞིགས་ན། པཱོ་ལེནྜ་རྒྱལ་ཁབ་ཀྱི་གཞོན་སྐྱེས་རྣམས་ནས་སོ་སོའི་མི་རིགས་ཀྱི་ལ་རྒྱ་དང་རིག་གཞུང་རྒྱུན་འཛིན་བྱས་ཏེ་མཐར་ཕྱི་ལོ་ ༡༩༡༨ ལོར་མི་ལོ་ ༡༢༣ རྗེས་ལ་རང་བཙན་ཐོབ་སྟེ་ཡོ་རོབ་ནང་རྒྱལ་ཁབ་སླར་གསོ་ཐུབ་པ་བྱུང་ཡོད་ཅེས་དྲན་སྐུལ་དང་འབྲེལ། གནས་སྟངས་དེ་ནི་བོད་པའི་འཐབ་རྩོད་དང་འབྲེལ་བ་ཡོད་སྟབས། བོད་མི་གཞོན་སྐྱེས་མི་རེ་ངོ་རེ་ནས་སོ་སོའི་སྐད་ཡིག་དང་རིག་གཞུང་རྒྱུན་འཛིན་དང་བརྒྱུད་སྤེལ་གནང་དགོས་རྒྱུ་གལ་ཆེན་པོ་ཡིན་པར། དེའི་བརྒྱུད་ནས་བོད་མི་རིགས་ཀྱི་ངོ་བོ་དང་འཐབ་རྩོད་རྒྱུན་གནས་ཐུབ་རྒྱུ་ཡིན་པ་སོགས་གསུངས་སོང་། གསར་འགོད་པ་དང་རྩོམ་པ་པོ། བོད་དོན་ཆེད་མཁས་པ་ […] The post རྒྱལ་སྤྱིའི་བོད་ཀྱི་གཞོན་སྐྱེས་ཚོགས་ཆེན་ཐེངས་བཞི་པ་འགོ་འཛུགས། appeared first on vot.

རྒྱ་ནག་གཞུང་གིས་འདི་ལོའི་ཕྱི་ཟླ་ ༣ པའི་ཚོགས་ཆེན་ཐོག་རྒྱལ་ཡོངས་མི་རིགས་མཐུན་སྒྲིལ་ཡར་ཐོན་སྐུལ་སྤེལ་ཞེས་པའི་བཙན་དབང་གི་མི་རིགས་མཉམ་འདྲེས་ལ་དམིགས་པའི་ཁྲིམས་གསར་པ་ཞིག་གཏན་འབེབས་བྱས་ཡོད་པ་ལྟར། དེ་རིང་ཕྱི་ཟླ་ ༧ པའི་ཚེས་ ༡ སྟེ་རྒྱ་ནག་དམར་ཤོག་ཚོགས་པ་འགོ་བཙུགས་ནས་ལོ་ ༡༠༥ འཁོར་བའི་ཉིན་མོ་དང་བསྟུན་ཁྲིམས་དེ་ལག་བསྟར་བྱེད་འགོ་འཛུགས་ཀྱི་ཡོད་པ་ལྟར། རྒྱལ་སྤྱི་ཁྱོན་གྱི་བོད་མི་གནས་སྡོད་གང་སར་དེ་རིང་ Global Day of Action ཞེས་རྒྱ་ནག་གི་ཁྲིམས་གསར་པ་དེའི་སྐོར་གོ་རྟོགས་དང་ངོ་རྒོལ་སྐད་འབོད་ཀྱི་ལས་འགུལ་སྤེལ་གྱི་ཡོད་པའི་ཁྲོད། བཞུགས་སྒར་རྡ་རམ་ས་ལར་བོད་མིའི་གཞུང་འབྲེལ་མིན་པའི་ཚོགས་པ་བཞིའི་གོ་སྒྲིག་འོག སྐད་འབོད་དང་གོམ་བགྲོད་སོགས་ཀྱི་ལམ་ནས་རྒྱ་ནག་གི་ཁྲིམས་གསར་པ་དེར་ངོ་རྒོལ་མཐའ་གཅིག་ཏུ་ཡོད་པའི་རྣམ་འགྱུར་གསལ་སྟོན་གནང་སོང་། དེ་ཡང་དེ་རང་སྔ་དྲོ་ཕྱག་ཚོད་ ༡༡ ཡོལ་ཙམ་ལ་བཞུགས་སྒར་དུ་རྟེན་གཞི་བྱས་པའི་བོད་རང་བཙན་སློབ་ཕྲུག་ཚོགས་པ་དང་། བོད་ཀྱི་དགུ་བཅུ་གསུམ་ལས་འགུལ་ཚོགས་པ། བོད་ཀྱི་བུད་མེད་ལྷན་ཚོགས་། བོད་རྒྱལ་ཡོངས་མང་གཙོ་ཚོགས་པ་བཅས་བོད་པའི་གཞུང་འབྲེལ་མིན་པའི་ཚོགས་པ་བཞིས་གོ་སྒྲིག་འོག མེག་གྷན་ཁྲོམ་གཞུང་ནས་ཐེག་ཆེན་ཆོས་གླིང་གཙུག་ལག་ཁང་གི་ཉེ་འགྲམ་དཔའ་བོའི་རྡོ་རིང་བར་བོད་ཀྱི་རྒྱལ་དར་དང་རྒྱ་ནག་གི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་གསར་པ་དེར་ངོས་ལེན་མེད་པ་དང་། དེ་ནི་མི་རིགས་མཐུན་སྒྲིལ་གྱི་མིང་བྱང་འོག་རྒྱ་ནག་གིས་སྡུག་རྩུབ་ཀྱི་སྲིད་བྱུས་ཁྲིམས་མཐུན་བཟོ་བཞིན་པ་སོགས་ཀྱི་འཕྲེད་དར་བསྣམས་ཏེ་ངོ་རྒོལ་སྐད་འབོད་ཀྱི་ལས་འགུལ་སྤེལ་གནང་སོང་བ་དང་། གཙུག་ལག་ཁང་གི་དཔའ་བོའི་རྡོ་རིང་གི་མདུན་དུ་རྒྱ་ནག་གི་མི་རིགས་མཉམ་འདྲེས་ཀྱི་ཁྲིམས་གསར་པ་དེར་ངོ་རྒོལ་གྱི་ཚིག་བརྗོད་འཁོད་པའི་འཕྲེད་དར་དང་། ཞི་ཅིན་ཕིང་གི་འདྲ་གཟུགས་སྤྲས་པའི་མི་ཞིག་གིས་སྟ་རེ་འཁུར་ནས་བོད་ཀྱི་སྐད་ཡིག་རྩ་མེད་གཏོང་བཞིན་པའི་རྣམ་པ་མངོན་གསལ་གནང་བའི་ཐོག དེ་རིང་གི་ལས་འགུལ་དང་འབྲེལ་ནས་ཚོགས་པ་བཞིའི་བསྒྲགས་གཏམ་ཨིན་བོད་སྐད་ཡིག་གཉིས་ཀྱི་ཐོག་སྒྲོག་སྦྱངས་གནང་སོང་བའི་ནང་དུ། དེ་རིང་རྒྱ་ནག་གི་ཁྲིམས་གསར་པ་དེ་ལག་བསྟར་དང་འབྲེལ་ནས་བོད་མི་རིགས་ཀྱི་སྐད་དང་ཡི་གེ ངོ་བོ་དང་བཅས་པ་རྩ་མེད་གཏོང་ཐབས་ཀྱི་སྲིད་བྱུས་རྣམས་ཁྲིམས་མཐུན་བཟོས་པ་དང་། བོད་མི་གཙོས་པའི་གྲངས་ཉུང་མི་རིགས་རྣམས་ཀྱི་རང་མི་རིགས་ཀྱི་རིག་གཞུང་དང་སྐད་ཡིག་སྲུང་སྐྱོབ་ཀྱི་བྱ་འགུལ་རྣམས་ཉེས་དོན་དུ་རྩིས་ཏེ། མི་རིགས་གཅིག་འགྱུར་དང་སྤྱི་སྐད་གོང་འཕེལ་གྱི་མིང་བྱང་འོག་མི་རིགས་ཀྱི་ངོ་བོ་རྩ་མེད་གཏོང་རྒྱུའི་ལས་དོན་ཇེ་མགྱོགས་སུ་བཏང་ཡོད་པ་སོགས་མངོན་གསལ་དང་སྦྲགས། བོད་མིའི་ངོས་ནས་རྒྱ་ནག་གི་ཁྲིམས་གསར་པ་ལག་བསྟར་ལ་ངོ་རྒོལ་མཐའ་གཅིག་ཏུ་ཡོད་པ་དང་ངོས་ལེན་མེད་པ་མ་ཟད། ཁྲིམས་དེ་ནི་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་ལས་འགལ་བ་ཡིན་པ་དང་འབྲེལ་ནས་འཕྲལ་དུ་ཕྱིར་འཐེན་བྱེད་དགོས་པ། བྱིས་པ་རྣམས་ཕ་མ་ནས་ཁ་བྲལ་བཏང་བའི་བཅའ་སྡོད་སློབ་གྲྭའི་ལས་གཞི་མཚམས་འཇོག་དགོས་པ། རྒྱལ་ཚོགས་གཙོས་པའི་རྒྱལ་སྤྱིའི་སྒྲིག་འཛུགས་ཁག་ནས་རྒྱ་ནག་གི་ཁྲིམས་གསར་པ་དེར་ཞིབ་བཤེར་སྐོར་སྐྱོད་བྱ་དགོས་པ་སོགས་ཀྱི་དགོས་འདུན་ཁག་གསུམ་སྟོན་གནང་སོང་། རྒྱ་ནག་གཞུང་གིས་ངོས་ནས་མི་རིགས་མཐུན་སྒྲིལ་ཡར་ཐོན་སྐུལ་སྤེལ་ཞེས་པའི་ཁྲིམས་སྒྲིག་དེར་མིང་གྲ་ཆགས་པོ་ཇི་ཙམ་བཏགས་མིན་དང་ཁྲིམས་མཐུན་ཡིན་པའི་འགྲེལ་བཤད་ཇི་ཙམ་རྒྱག་མིན་ལ་མ་ལྟོས་པར། ཁ་སང་ཨ་རི་དང་ཡུ་རོབ་སོགས་རྒྱལ་སྤྱིའི་རྒྱལ་ཁབ་འདྲ་མིན་གྱི་གྲོས་ཚོགས་འཐུས་མི་མང་དག་ཅིག་ནས་རྒྱ་ནག་གི་ཁྲིམས་གསར་པ་དེར་ངོ་རྒོལ་སྐྱོན་བརྗོད་ཀྱི་བསྒྲགས་གཏམ་སྤེལ་བ་མ་ཟད། ཉེ་སྔོན་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གཙོ་འཛིན་མཆོག་ནས་ཀྱང་རྒྱ་ནག་གི་ཁྲིམས་དེས་བོད་མི་དང་ཡུ་གུར། ནང་སོག་གཙོས་པའི་གྲངས་ཉུང་མི་རིགས་ཀྱི་ངོ་བོ་རྩ་མེད་གཏང་ཉེན་ཡོད་སྐོར་དང་འབྲེལ་ནས་ཁྲིམས་དེ་འཕྲལ་མར་ཕྱིར་འཐེན་བྱ་དགོས་པ་གསུངས་ཡོད་པ་རེད། The post བཞུགས་སྒར་དུ་སྐད་འབོད་དང་གོ་རྟོགས་ཀྱི་ལས་འགུལ་བརྒྱུད་ནས་རྒྱ་ནག་གི་ཁྲིམས་གསར་པར་ངོ་རྒོལ་གྱི་རྣམ་འགྱུར་ཤུགས་ཆེ་སྟོན་སོང་། appeared first on vot.

སང་ཕྱི་ཟླ་ ༧ པའི་ ༡ ཉིན་རྒྱ་ནག་གི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཡིག་ཟེར་བའི་གྲངས་ཉུང་མི་རིགས་ཀྱི་ཆོས་དང་རིག་གཞུང་། སྐད་ཡིག་དང་བཅས་པ་རྩ་མེད་ཀྱི་ལས་གཞི་ཁྲིམས་མཐུན་བཟོས་པའི་ཁྲིམས་གསར་པ་འདི་ལག་ལེན་བསྟར་གཏན་ཁེལ་བ་དང་བསྟུན། ཨ་རིའི་གྲོས་ཚོགས་གོང་མའི་ནང་དུ་ཆབ་སྲིད་ཚོགས་པ་དབྱེར་མེད་ཀྱི་གྲོས་ཚོགས་འཐུས་མི་བཞི་ཡིས་རྒྱ་ནག་གཞུང་གིས་ཁྲིམས་གསར་པ་དེར་སྐྱོན་བརྗོད་ཀྱི་གྲོས་ཆོད་ཅིག་ཆེད་འདོན་གནང་བ་མ་ཟད། གྲོས་ཚོགས་འོག་མའི་རྒྱ་ནག་ལས་དོན་ཚོགས་ཆུང་དང་གྲོས་ཚོགས་འཐུས་མི་སྒེར། དེ་བཞིན་ཡུ་རོབ་ Baltic རྒྱལ་ཁབ་གསུམ་དང་ Italy དེ་བཞིན་ Czech སྤྱི་མཐུན་རྒྱལ་ཁབ་ཀྱི་གྲོས་ཚོགས་འཐུས་མི་ཁག་གཅིག་ནས་གསར་འགོད་བསྒྲགས་གཏམ་དང་སྒེར་གྱི་བརྙན་ཐུང་བརྡ་ལན་བཅས་ཀྱི་བརྒྱུད་ནས་རྒྱ་ནག་གིས་མི་རིགས་མཐུན་སྒྲིལ་དང་འབྲེལ་ནས་ཁྲིམས་གསར་པ་དེར་སྐྱོན་བརྗོད་ནན་པོ་གནང་འདུག དེ་ཡང་ཕྱི་ཚེས་ ༢༤ ཉིན་ཨ་རིའི་གྲོས་ཚོགས་གོང་མའི་གུ་ཡངས་གཞུང་འཛིན་ཚོགས་པའི་གྲོས་ཚོགས་འཐུས་མི་ Jim Banks ལགས་དང་ John Curtis ལགས་གཉིས་དང་། དམངས་གཙོ་ཚོགས་པའི་གྲོས་ཚོགས་འཐུས་མི་ Jeff Merkley ལགས་དང་ Jacky Rosen ལགས་བཅས་ཆབ་སྲིད་ཚོགས་པ་དབྱེར་མེད་ཀྱི་གྲོས་ཚོགས་འཐུས་མི་བཞི་པོས། རྒྱ་ནག་གཞུང་གིས་མི་རིགས་མཐུན་སྒྲིལ་གྱི་ཁྲིམས་གསར་པ་དེར་སྐྱོན་བརྗོད་ཀྱི་གྲོས་འཆར་ཞིག་ཆེད་འདོན་གནང་བའི་ནང་དུ། རྒྱ་ནག་གཞུང་གིས་ཁྲིམས་གསར་པ་དེ་བཞིན་བཙན་དབང་གིས་མི་རིགས་མཉམ་བསྲེས་གཏོང་རྒྱུའི་ལག་ཆ་ཞིག་ཡིན་སྐོར་དང་། ཁྲིམས་འདིས་བོད་མི་དང་ཡུ་གུར། དེ་བཞིན་ནང་སོག་གཙོས་པའི་གྲངས་ཉུང་མི་རིགས་རྣམས་ཀྱི་ཆོས་དང་རིག་གཞུང་། སྐད་ཡིག དེ་བཞིན་ལོ་རྒྱུས་ཀྱི་ངོ་བོར་བརྩི་མེད་ཀྱིས། གྲངས་ཉུང་མི་རིགས་ཀྱི་ཤེས་ཡོན་དང་ཆོས་དད། སྐད་ཡིག་བཀོལ་སྤྱོད་དང་རིག་གཞུང་གིས་རྣམ་འགྱུར་སྤྱི་རིགས་ཐོག་རྒྱ་ནག་དམར་ཤོག་གཞུང་གིས་སྟངས་འཛིན་ཤུགས་ཆེ་རུ་གཏོང་བཞིན་པར་སེམས་འཚབ། ལྷག་པར་དུ་ཁྲིམས་འདིའི་འོག་ནས་རྒྱ་ནག་གིས་རྒྱལ་མཚམས་ལས་བརྒལ་བའི་བྱ་འགུལ་ཤུགས་ཆེ་རུ་སྤེལ་ངེས་ཡིན་པ་ལྟར་ཁྲིམས་འདིའི་རྒྱ་ནག་ནང་ལོག་ཙམ་མ་ཟད། རྒྱལ་ཁབ་གཞན་གྱི་མང་ཚོགས་ཀྱིས་གནས་བབ་ལ་ཡང་དོ་ཕོག་གཏང་རྒྱུ་ཡིན་པའི་སྐྱོན་བརྗོད་ཤུགས་ཆེ་གནང་སྟེ། རྒྱ་ནག་གཞུང་ལ་ཁྲིམས་གསར་པ་དེ་དང་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་སྒྲིག་ལས་འགལ་བའི་ཁྲིམས་མཐའ་དག་ཕྱིར་འཐེན་བྱེད་དགོས་པ་གསུངས་འདུག གྲོས་ཆོད་ཆེད་འདོན་གནང་མཁན་གྲོས་ཚོགས་འཐུས་མི་ Jacky Rosen ལགས་དང་ John Curtis, Jim Banks, Jeff Merkley ལགས་བཅས་ཀྱི་སྐབས་དེར་རྒྱ་ནག་གཞུང་གིས་དུས་རྒྱུན་ནས་བོད་མི་དང་ཡུ་གུར། ནང་སོག་གཙོས་པའི་གྲངས་ཉུང་མི་རིགས་ཀྱིས་ཆོས་དང་རིག་གཞུང་རྩ་མེད་གཏོང་ཐབས་ཀྱི་བསམ་ཡུལ་ལས་འདས་པའི་བྱ་འགུལ་སྤེལ་བཞིན་པའི་ཐོག་ཁྲིམས་གསར་པ་དེས་རྒྱ་ནག་ཙམ་མ་ཟད། རྒྱ་ནག་ཕྱི་ཕྱོགས་ཀྱིས་མང་ཚོགས་ཐོག་ལ་ཡང་ཉེན་ཁ་བཟོ་ཡི་ཡོད་སྐོར་དང་འབྲེལ། […] The post ཨ་རི་གཙོ་བོར་གྱུར་བའི་རྒྱལ་སྤྱིའི་གྲོས་ཚོགས་འཐུས་མི་རྣམས་ནས་རྒྱ་ནག་གི་མི་རིགས་མཐུན་སྒྲིལ་གྱི་ཁྲིམས་གསར་པར་སྐྱོན་བརྗོད་ནན་པོ་གནང་འདུག appeared first on vot.

རྒྱ་ནག་གི་མི་རིགས་མཐུན་སྒྲིལ་གྱི་ཁྲིམས་ཡིག་ལ་ངོ་རྒོལ་མཚོན་བྱེད་དུ་ཉེ་ལམ་རེས་གཟའ་སྤེན་པའི་ཉིན་བཞུགས་སྒར་མེག་ལོཊ་གྷན་ཇིའི་བ་ར་ཀོ་ཇ་ཁང་དུ་<ང་ཚོས་ག་རེ་བྱེད་དགོས་སམ། རྒྱ་ནག་གི་སྐད་ཡིག་སྲིད་བྱུས་ལ་རྒོལ་བ་>ཞེས་པའི་བརྗོད་གཞི་ཐོག་གླེང་མོལ་ལས་རིམ་ཞིག་འཚོགས་སོང་བ་དང་། སྐབས་དེར་གསུང་བཤད་པ་རྣམས་མགྲིན་དབྱངས་གཅིག་གྱུར་གྱིས་བོད་མི་མི་རེ་ངོ་རེ་ཁྲོད་རང་མི་རིགས་ཀྱི་འདུ་ཤེས་སྤེལ་དགོས་གལ་ཆེ་བ་ཡིན་སྐོར་དགོངས་ཚུལ་ཆེད་འདོན་གནང་སོང་།  གླེང་མོལ་གྱི་ལས་རིམ་དེ་བཞིན་བོད་སྨྱུག་དཔེ་སྐྲུན་ཁང་དང་། ཝ་ཟུར་སྐད་ཡིག་ཚོགས་པ། སྐར་ཆུང་བྱིས་པའི་དཔེ་མཛོད་ཁང་བཅས་ཚོགས་པ་གསུམ་གྱིས་གོ་སྒྲིག་ཞུས་པ་ཞིག་དང་ཨ་རིའི་བོད་ཀྱི་ཐེབས་རྩའི་ངོས་ནས་མཐུན་འགྱུར་གནང་བ་ཞིག་རེད་འདུག  ལས་རིམ་དེ་ཡང་ཨ་རིའི་བོད་ཀྱི་རླུང་འཕྲིན་ཁང་གི་གསར་འགོད་པ་ཟུར་པ་བསྟན་འཛིན་བཟང་མོ་ལགས་ཀྱི་གཙོ་སྐྱོང་འོག་ས་རཱ་བོད་ཀྱི་མཐོ་རིམ་སློབ་གཉེར་ཁང་གི་ལོ་རྒྱུས་སློབ་དཔོན་འབུམ་རམས་པ་གཙང་ཕྲུག་སྟོབས་ལགས་དང་།  བོད་ཀྱི་དཔེ་མཛོད་ཁང་གི་རྩོམ་སྒྲིག་འགན་འཛིན་འབུམ་རམས་པ་ལྷ་མོ་མཚོ་ལགས།  བོད་ཀྱི་སྒྱུ་རྩལ་བ་དང་ཝ་ཟུར་སྐད་ཡིག་ཚོགས་པ་གསར་འཛུགས་གནང་མཁན་འཇམ་དབྱངས་ཕུན་ཚོགས་ལགས།  དེ་བཞིན་ཚོགས་སྡེ་ཁག་གཅིག་གི་སྐུ་ཚབ་དང་དོན་གཉེར་བ་མི་ཉུང་བ་བཅས་ཁྱོན་མི་གྲངས་གསུམ་བཅུ་ཙམ་ནས་མཉམ་ཞུགས་གནང་སོང་།  ལས་རིམ་ཐོག་གསུང་བཤད་པ་རྣམས་ནས་མགྲིན་དབྱངས་གཅིག་གྱུར་གྱིས་ཕྱི་ཟླ་ ༧ ཚེས་ ༡ ནས་བཟུང་ལག་བསྟར་བྱ་རྒྱུའི་རྒྱ་ནག་གི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཡིག་ཟེར་བ་དེར་གདོང་ལེན་ཆེད་དུ་བོད་མིའི་སྒྲིག་འཛུགས་དང་ཚོགས་སྡེ་ཁག་ནས་སྐྱོན་བརྗོད་ཀྱི་བསྒྲགས་གཏམ་སྤེལ་བ་ཙམ་མ་ཡིན་པར་རང་ནུས་གང་ཐུབ་དང་ཁ་ཡོད་ལག་ཡོད་ཀྱིས་ལས་འགུལ་རིགས་སྣ་མང་སྤེལ་དགོས་པ་དང་།  རྒྱ་ནག་གིས་འདི་ལྟ་བུའི་བོད་ཀྱི་སྐད་ཡིག་ངོ་བོ་དང་བཅས་པ་རྩ་མེད་གཏོང་རྒྱུའི་སྲིད་བྱུས་ལག་བསྟར་བྱ་རྒྱུ་ཡིན་དུས་ང་ཚོའི་ངོས་ནས་དེར་དངངས་འཚབ་ཐོག་བོད་ཀྱི་སྐད་ཡིག་སྲུང་སྐྱོབ་ཐད་འབྲེལ་ཡོད་ཤེས་ཡོན་གྱི་ལྟེ་གནས་ཁག་ལ་སྒྲིག་འཛུགས་དང་ལྷན་ཁང་ངོས་ནས་དཔལ་འབྱོར་གྱི་འགྲོ་གྲོན་སྔར་ལྷག་གཏོང་དགོས་གལ་ཆེ་བ་ཡིན་པ་མ་ཟད།  མི་མང་ངོས་ནས་སྡིངས་ཆ་ཆེ་ཆུང་ཚང་མའི་ཐོག་བོད་ཀྱི་སྐད་ཡིག་ངེས་པར་དུ་བཀོལ་སྤྱོད་མཚོན་པའི་བོད་ཡིག་དཔེ་ཀློག་གི་གོམས་གཤིས་སྤེལ་དགོས་གལ་ཆེ་བ་ཡིན་པ།  དེ་བཞིན་བོད་མི་བྱིས་པ་གཙོ་བོར་གྱུར་བའི་གཞོན་སྐྱེས་ཁྲོད་རང་མི་རིགས་ཀྱི་འདུ་ཤེས་དང་ལ་རྒྱ་གོང་མཐོར་གཏོང་དགོས་པ་དང་།  བོད་ཀྱི་ཆོས་དང་རིག་གཞུང་སྐད་ཡིག་དང་བཅས་པར་དགའ་མོས་བསྐྲུན་དགོས་གལ་གནད་འགག་ཆེན་པོར་གྱུར་ཡོད་པ་སོགས་གསུངས་སོང་།  འདི་གའི་གསར་འགོད་པས་གླེང་མོལ་གྱི་ལས་རིམ་དེ་ཉིད་གོ་སྒྲིག་གནང་མཁན་ཁོངས་སུ་ཡོད་པ་བོད་མྱུག་དཔེ་སྐྲུན་ཁང་གི་རྩོམ་སྒྲིག་པ་བུ་ཆུང་ལྡུམ་ར་བསོད་ནམས་ལགས་སུ་ཐེངས་འདིའི་གླེང་མོལ་ཁྲོད་ཀྱི་སྙིང་དོན་སྐོར་བཀའ་འདྲི་ཞུ་སྐབས་ཁོང་གིས།  བཙན་བྱོལ་བོད་མིའི་སྤྱི་ཚོགས་རྒྱལ་ཁབ་གསུམ་བཅུ་ལྷག་ནང་རིག་གཞུང་དང་ཆབ་སྲིད་ཀྱི་གནས་སྟངས་འདྲ་མིན་འོག་གནས་ཡོད་ཀྱང་།  རང་མི་རིགས་ཀྱི་འདུ་ཤེས་དང་ང་བོད་པ་ཡིན་ཞེས་པའི་བསམ་བློ་དེ་སྙིང་ཁོང་རུས་པའི་གཏིང་ནང་ཡོད་པ་ནི་ཁ་གསལ་ཡིན་པ་མ་ཟད་བོད་ནང་དུའང་དེ་དེ་བཞིན་གྱི་མི་རིགས་འདུ་ཤེས་གནས་ཡོད་སྟབས།  རྒྱ་ནག་ངོས་ནས་ཇི་ཙམ་གྱི་བོད་མི་ཚོར་སྡུག་སྦྱོང་གཏོང་བ་དེ་ཙམ་གྱིས་བོད་མི་ངོས་ནས་རང་མི་རིགས་ཀྱི་འདུ་ཤེས་སྲ་བརྟན་དུ་གནས་ངེས་ཡིན་པ་གསུངས་སོང་ལ།  ད་ལྟའི་རྒྱ་ནག་གིས་སྲིད་བྱུས་གསར་པ་དེའི་ཐོག་སྒྲིག་འཛུགས་དང་ཚོགས་སྡེ་ཚང་མས་གང་ཐུབ་ཅི་ཐུབ་ཀྱིས་གདོང་ལེན་གནང་གལ་ཆེ་བ་ཡིན་པ་གསུངས་སོང་།  The post རྒྱ་ནག་གི་མི་རིགས་མཐུན་སྒྲིལ་གྱི་ཁྲིམས་ཡིག་ལ་བོད་མིས་ག་རེ་བྱེད་དགོས་སམ། appeared first on vot.

ཨོ་གླིང་གི་ས་གནས་འདྲ་མིན་ནས་ཕེབས་པའི་བོད་མི་གྲངས་ ༡༥ ལྷག་འདུ་འཛོམས་ཐོག་བོད་དོན་ཞུ་གཏུག་ལས་འགུལ་ཐེངས་ ༡༥ པ་སྤེལ་འདུག་པ་དང་། ཐེངས་འདིའི་ཞུ་གཏུགས་ཁྲོད་གཙོ་བོ་རྒྱ་ནག་གི་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་གཙོས་༸སྐུའི་ཡང་སྲིད་ཀྱི་བདག་དབང་སྐོར་དང་། བོད་རྒྱ་ཞི་མོལ་བསྐྱར་གསོ་དགོས་པ་སོགས་ཀྱི་དགོས་འདུན་ཆེད་འདོན་གནང་འདུག དེ་ཡང་ཨོ་གླིང་ནང་ལོ་ལྟར་ཨོསྟྲེ་ལི་ཡ་བོད་དོན་ལྷན་ཁང་ ATC དང་ས་གནས་བོད་རིགས་སྤྱི་མཐུན་ཚོགས་པ་ཁག་ཟུང་སྦྲེལ་ཐོག་བོད་དོན་ཞུ་གཏུག་ཉིན་མོ་ཞེས་གོ་སྒྲིག་གནང་གི་ཡོད་པ་ལྟར། ཐེངས་འདིའི་བོད་དོན་ཞུ་གཏུག་ཉིན་མོར་རྒྱལ་ས་ Canberra དང་སིཌ་ཎི། Melbourne དེ་བཞིན་ Campbelltown བཅས་ཀྱི་བོད་རིགས་སྤྱི་མཐུན་ཚོགས་པ་ནས་བོད་མི་གྲངས་ ༡༥  ཙམ་ Canberra ལ་ཚང་འཛོམས་ཀྱིས་ཡུལ་དེའི་ཕྱི་སྲིད་བློན་ཆེན་ལྕམ་སྐུ་ Penny Wong ལགས་ཀྱི་དབུས་པའི་གཞན་སྲིད་དོན་ཚོགས་པ་འདྲ་མིན་གྱི་གྲོས་ཚོགས་གོང་འོག་གི་འཐུས་མི་ ༢༥ ལྷག་མཇལ་འཕྲད་གནང་སྟེ། གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་སྲིད་ངོས་འཛིན་གནང་ཕྱོགས་ལ་རྒྱ་ནག་གཞུང་གི་ཐེ་བྱུས་མི་ཡོང་སླད་ཨོ་གླིང་གཞུང་ནས་བཞེངས་ཕྱོགས་བརྟན་པོ་འཛིན་དགོས་པ་དང་། སང་ཉིན་ནས་རྒྱ་ནག་གཞུང་གིས་ལག་བསྟར་བྱེད་རྒྱུའི་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་ལ་སྐྱོན་བརྗོད་ཀྱིས་ཁྲིམས་ཡིག་དེ་ཉིད་འཕྲལ་དུ་ཕྱིར་འཐེན་ཡོང་སླད་འབད་བརྩོན་གནང་དགོས་གལ། དེ་བཞིན་ཕྱི་ལོ་ ༢༠༡༠ ལོ་ནས་བཟུང་ད་བར་བོད་རྒྱའི་དཀའ་རྙོག་དང་འབྲེལ་བའི་གྲོས་མོལ་སླར་གསོ་ཡོང་ཐབས་སུ་རྒྱ་གཞུང་ལ་སྐུལ་མ་གནང་དགོས་པ་བཅས་དོན་ཚན་གལ་ཆེ་ཁག་གཅིག་གི་ཐོག་འབོད་སྐུལ་གནང་འདུག   དེའི་སྐོར་ཨོསྟྲེ་ལི་ཡ་བོད་དོན་ལྷན་ཁང་གི་འགན་འཛིན་ལྷན་ཚོགས་ཀྱི་ཚོགས་མི་ཟུར་པ་ད་ཆ་ལམ་སྟོན་པའི་ཁོངས་སུ་ཡོད་པ་རྒྱ་བལ་འབྲུག་གསུམ་ཕུད་པའི་ཨེ་ཤི་ཡ་དང་ཨོསྟྲེ་ལི་ཡའི་བོད་མི་མང་སྤྱི་འཐུས་སྐལ་བཟང་ཚེ་རིང་ལགས་སུ་བཀའ་འདྲི་ཞུས་ཡོད། ཁ་སང་དང་དེ་རིང་བཅས་ཉིན་གྲངས་གཉིས་རིང་བོད་མི་རྣམས་ཚོགས་ཆུང་འདྲ་མིན་ནང་ཆ་བགོས་ཀྱིས་བོད་དོན་ཞུ་གཏུག་གནང་བའི་ཁྲོད། རང་ལོ་ ༡༧ སོན་པ་བུ་མོ་ཕུན་ཚོགས་སྒྲོལ་མ་བསྟན་མཚོ་ལགས་ཀྱིས་ཡུལ་དེའི་ཕྱི་སྲིད་བློན་ཆེན་ལྕམ་ Penny Wong ལགས་སུ་རྒྱ་གཞུང་གིས་བོད་ནང་བོད་མིའི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་པའི་ཛ་དྲག་གི་གནས་སྟངས་སྤྱི་དང་སྒོས་སུ་ཁོ་མོའི་པོ་ལགས་རྒྱ་ཡི་བཙོན་ཁང་ནང་མནར་གཅོད་ཚད་མེད་འོག་འདས་གྲོངས་སུ་ཕྱིན་པའི་གནས་ཚུལ་སོགས་སྙན་སེང་ཞུས་ཐུབ་ཡོད་པ་དང་ལྕམ་ Wong ལགས་ནས་ཀྱང་དེར་ཐུགས་སྣང་ཆེན་པོས་གསན་འཇོག་གིས་ཁོང་ནས་ཨོ་སྟྲེ་ལི་ཡའི་སྲིད་བློན་མཆོག་ལ་རིང་མིན་འཚོག་ལ་ཉེ་བའི་འགྲོ་བ་མིའི་ཐོབ་ཐང་གི་ཚོགས་འདུའི་ཐོག་བོད་དོན་ངེས་པར་གླེང་དགོས་པའི་འབོད་སྐུལ་ཞུ་རྒྱུ་ཡིན་པའི་ཁས་ལེན་གནང་ཡོད་པ་གསུངས་སོང་། ལྷག་པར་དུ་ཁ་སང་ཞུ་གཏུག་ལས་འགུལ་དངོས་སུ་དབུ་འཛུགས་མ་གནང་གོང་བོད་མི་རྣམས་ནས་ཨོ་གླིང་གི་གྲོས་ཚོགས་ཚོགས་ཁང་ཞིག་གི་ནང་༸སྐྱབས་རྗེ་ཀུན་བདེ་གླིང་རིན་པོ་ཆེ་མཆོག་དབུ་བཞུགས་ཐོག་གསར་འགོད་གསལ་བསྒྲགས་ཤིག་གནང་ཡོད་པ་དང་དེའི་ཐོག་ཨོ་གླིང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་གཞོན་པའི་གྲས་སུ་ཡོད་པ་ལྕམ་སྐུ་ Susan Templeman སུ་སན་ཊེམ་པལ་མེན་ལགས་དང་། གྲོས་ཚོགས་གོང་མའི་འཐུས་མི་སྐུ་ཞབས་ Dean Smith  ཌིན་སི་མིཏ་ལགས། གྲོས་ཚོགས་གོང་མའི་འཐུས་མི་ལྕམ་སྐུ་ Barbara Pocock སྦར་བ་ར་པོ་ཀོག་ལགས་བཅས་ཀྱི་གཙོས་འབྲེལ་ཡོད་ཁག་གཅིག དེ་བཞིན་ཨོ་གླིང་བོད་ཀྱི་སྐུ་ཚབ་དོན་གཅོད་སོགས་ནས་མཉམ་ཞུགས་གནང་ཡོད་པ་མ་ཟད། […] The post ཨོསྟྲེ་ལི་ཡ་གཞུང་ནས་༸རྒྱལ་བའི་ཡང་སྲིད་ངོས་འཛིན་ཐད་རྒྱབ་སྐྱོར་གྱིས་བཞེངས་ཕྱོགས་བརྟན་པོ་འཛིན་དགོས་པའི་ཞུ་སྐུལ། appeared first on vot.

རྒྱ་གར་ཧི་མ་ཅཱལ་མངའ་སྡེའི་སྤོན་ཊ་ཆོལ་གསུམ་བོད་མིའི་གཞིས་ཆགས་སུ་ཁ་སང་ཕྱི་ཟླ་ ༦ ཚེས་ ༢༩ ཉིན་བོད་ཀྱི་གཞོན་ནུ་ལྷན་ཚོགས་ཀྱི་འགན་འཛིན་ལྷན་ཚོགས་ཐེངས་ ༥༥ པ་འགོ་འཛུགས་གནང་འདུག དེ་ཡང་འགན་འཛིན་ལྷན་ཚོགས་དེ་བཞིན་ཕྱི་ཟླ་ ༧ ཚེས་ ༤ བར་འཚོག་གི་ཡོད་པ་དང་། ཐེངས་འདིའི་འགན་འཛིན་ལྷན་ཚོགས་ཐོག་རྒྱ་བལ་འབྲུག་གསུམ་ནས་ས་གནས་ཁྱོན་ ༤༠ ཙམ་དང་ཚོགས་མི་ཁྱོན་ ༡༠༠ ལྷག་མཉམ་ཞུགས་གནང་འདུག་པ་མ་ཟད། ལྷན་ཚོགས་དེའི་ཐོག་གཙོ་བོ་དབུས་ས་གཉིས་ཀྱི་འདས་པའི་ལོ་གཅིག་གི་ལས་དོན་དང་། རྩིས་ཁྲར་བསྐྱར་ཞིབ། དེ་བཞིན་དེ་སྔའི་ལྷན་ཚོགས་ཐོག་གཏན་འབེབས་གནང་བའི་གྲོས་ཆོད་ཁག་ལ་བསྐྱར་ཞིབ། དེ་བཞིན་༸གོང་ས་མཆོག་གི་༸སྐུ་ཕྱྭ་དང་འབྲེལ་བའི་ཞབས་ཞུའི་ལས་དོན་ཇི་དགེ་ཞུ་ཐབས། བོད་རང་བཙན་འཐབ་རྩོད་དང་འབྲེལ་བའི་ལས་འགུལ་སྤེལ་ཕྱོགས་སོགས་གྲོས་གཞི་ཁྱོན་  ༡༠ ཐོག་གྲོས་བསྡུར་གནང་གི་ཡོད་པ་རེད། འདི་ག་གསར་འགོད་པས་ལྷན་ཚོགས་དང་འབྲེལ་བོད་ཀྱི་གཞོན་ནུ་ལྷན་ཚོགས་ཀྱི་སྤྱི་ཁྱབ་ཚོགས་གཙོ་ཚེ་རིང་ཆོས་འཕེལ་ལགས་སུ་བཀའ་འདྲི་ཞུས་ཡོད་པས་གོང་གི་སྒྲ་སྒམ་ནས་གསན་ཐུབ། The post བོད་ཀྱི་གཞོན་ནུ་ལྷན་ཚོགས་ཀྱི་འགན་འཛིན་ལྷན་ཚོགས་ཐེངས་ ༥༥ པ་འགོ་འཛུགས། appeared first on vot.

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༩༠ ཕེབས་པ་དང་བསྟུན་བོད་མིའི་སྒྲིག་འཛུགས་ཀྱི་ངོས་ནས་༸སྐུའི་གོ་སྟོན་དེ་བཞིན་བྱམས་བརྩེའི་ལོར་སྲུང་བརྩི་གཏན་འབེབས་དང་འབྲེལ། བོད་མི་འདུ་སྡོད་ས་གནས་གང་སར་༸རྒྱལ་བའི་མཛད་པ་དང་འབྲེལ་བའི་གསུང་བཤད་དང་འགྲེམས་སྟོན། ཤེས་ཡོན། ཁོར་ཡུག་གཙང་བཟོ་སོགས་ལས་རིམ་སྣ་མང་བརྒྱུད་ནས་སྲུང་བརྩི་ཞུས་དང་ཞུ་བཞིན་ཡོད་པའི་ཁྲོད། དེ་རིང་ཕྱི་ཟླ་ ༦ ཚེས་ ༣༠ ཉིན་ཨོ་རི་ས་ཕུན་ཚོགས་གླིང་གོ་སྟོན་གོ་སྒྲིག་ཚོགས་ཆུང་ངོས་ནས་ Bhubneswar ནང་དུ་རྟེན་གཞིས་བྱས་པའི་ Bakul དཔེ་མཛོད་ཁང་དུ་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚེའི་མཛད་པ་ཁག་གི་སྐོར་ལ་འགྲེམས་སྟོན་ཞིག་ཚོགས་འདུག སྐབས་དེར་སྐུ་མགྲོན་དུ་ཨོ་རི་ས་མངའ་སྡེ་ནས་ཡིན་པའི་རྒྱ་གར་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་གྲོས་ཚོགས་གོང་མའི་འཐུས་མི་ Sujeet Kumar སུ་ཇིཏ་ཀུ་མཱར་ལགས་དང་རྒྱ་གར་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་གྲོས་ཚོགས་འོག་མའི་འཐུས་མི་ Rabindra Narayan Behera ར་བིན་དྲ་ནཱ་ར་ཡཱན་བེ་ཧེ་ར་ལགས་གདན་འདྲེན་ཞུས་འདུག སྐབས་དེར་རྒྱ་གར་གྲོས་ཚོགས་གོང་མའི་འཐུས་མི་ Sujeet Kumar སུ་ཇིཏ་ཀུ་མཱར་ལགས་ཀྱིས། བོད་མི་རྣམས་བྱམས་སྙིང་རྗེ་ལ་དགའ་མོས་བྱེད་མཁན་ཞིག་ཡིན་པ་དང་། ལྷག་པར་ཁོང་སྒེར་གྱི་ངོས་ནས་བོད་དང་རྒྱ་གར་གྱི་ས་མཚམས་ཁས་ལེན་བྱེད་ཀྱི་ཡོད་པ་ལས་རྒྱ་དཀར་ནག་གཉིས་བར་ས་མཚམས་ཡོད་པ་ངོས་ལེན་བྱེད་ཀྱི་མེད་ཅེས་གསུངས་འདུག མ་ཟད་རྒྱ་གར་ནི་མི་ལོ་ ༢༠༠ ལྷག་གི་རྗེས་ལ་རང་བཙན་ཐོབ་ཡོད་སྟབས། ད་ཆ་བོད་ཀྱི་འཐབ་རྩོད་དེ་ལོ་ངོ་  ༧༠ ལྷག་འགྲོ་བཞིན་ཡོད་པར་སེམས་ཤུགས་མ་ཆགས་ཅེས་དང་། འདས་པའི་ལོ་རྒྱུས་ཁྲོད་དབང་སྒྱུར་བེད་མཁན་རྣམས་ལམ་ལྷོང་བྱུང་མེད་པ་བཞིན་རྒྱ་ནག་ཀྱང་ཉིན་གཅིག་དེ་ལྟར་གྱུར་རྒྱུ་ཡིན་པ་མ་ཟད། སེམས་སྐྱོ་བ་ཞིག་ལ་ད་ལྟའི་ཆར་བོད་ནང་བོད་ཕྲུག་བྱིས་པ་རྣམས་རང་ཁྱིམ་དང་ཁ་བྲལ་བཏང་སྟེ། རྒྱ་ནག་མི་སེར་སྤེལ་ཡུལ་གྱི་བཅའ་སྡོད་སློབ་གྲྭར་བཅུག་གི་ཡོད་པར་དོན་དངོས་ཐོག་དེ་ནི་ Concentration Camp འམ་གཅིག་སྡུད་ཀྱི་བཙོན་སྒར་ཞིག་རེད་ཅེས་ནན་བརྗོད་གནང་འདུག གྲོས་ཚོགས་འོག་མའི་འཐུས་མི་ Rabindra Narayan Behera ར་བིན་དྲ་ནཱ་ར་ཡཱན་བེ་ཧེ་ར་ལགས་ཀྱིས། ཁོང་རང་ཉིད་ནང་དོན་རིག་པར་དོ་སྣང་ཆེན་པོ་ཡོད་ཅིང་། ལྷག་པར་སློབ་དཔོན་པདྨ་འབྱུང་དང་འབྲེལ་བའི་སྐོར་ལ་གསུང་བཤད་གནང་འདུག དེ་བཞིན་ཉིན་རྒྱབ་ཁཱུལ་དེར་རྟེན་གཞིས་བྱས་པའི་ Kalinga Institute of Industrial Technology གཙུག་ལག་སློབ་གཉེར་ཁང་དང་། […] The post ཨོ་རི་ས་དང་མོན་གྷོ་ནང་༸རྒྱལ་བའི་གོ་སྟོན་སྲུང་བརྩི། appeared first on vot.

དེ་རིང་འདི་ག་རྒྱལ་ས་ལྡི་ལིའི་ IIC རྒྱ་གར་དང་རྒྱལ་སྤྱིའི་ལྟེ་གནས་ཁང་དུ་བོད་ཀྱི་སྲིད་བྱུས་ཉམས་ཞིབ་ཁང་གི་གོ་སྒྲིག་འོག་མི་རིགས་མཐུན་སྒྲིལ་ཡར་ཐོན་སྐུལ་སྤེལ་ཟེར་བའི་ཁྲིམས་ཡིག་སྐོར་མཁས་པའི་བགྲོ་གླིང་ཞིག་འཚོགས་ཡོད་པ་དང་།   བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གི་དབུ་བཞུགས་གནང་པའི་བགྲོ་གླེང་དེའི་ཐོག  རྒྱ་གར་དམག་གི་སྒྲིག་འཛུགས་ཀྱི་ཐབས་བྱུས་ཉམས་ཞིབ་པ་དང་།  རྒྱ་དཀར་ནག་གི་ཐབས་བྱུས་ཉམས་ཞིབ་པ།  རྒྱལ་སྤྱིའི་ཆབ་སྲིད་ཉམས་ཞིབ་པ་བཅས་ཀྱིས།  རིང་མིན་ནས་ལག་བསྟར་བྱེད་རྒྱུའི་རྒྱ་ནག་གི་ཁྲིམས་གཞི་དེའི་འོག་རྒྱལ་ནང་ཙམ་མ་ཟད་རྒྱལ་སྤྱའི་ཁྱོན་དུ་ཤུགས་རྐྱེན་ངན་པ་ཡོང་རྒྱུའི་གནད་དོན་གླེང་ཡོད། དེ་ཡང་བཞུགས་སྒར་རྡ་རམ་ས་ལར་རྟེན་གཞི་བྱས་པའི་བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་བགྲེས་པ་བསྟན་འཛིན་བདེ་གསལ་ལགས་ཀྱི་གསུང་དོན་བྱས་པ་ཡིན་ན།   ཕྱི་ཟླ་ ༧ པའི་ཚེས་ ༡ ནས་རྒྱ་ནག་གཞུང་གིས་ལག་བསྟར་བྱེད་རྒྱུའི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་ཟེར་བའི་ཁྲིམས་གཞི་དེ་དངོས་སུ་ལག་བསྟར་བྱས་པ་ཡིན་ན།   བོད་མི་ཙམ་གྱི་མ་ཟད་རྒྱ་ནག་གི་དབང་བསྒྱུར་འོག་ཡོད་པའི་གྲངས་ཉུང་མི་རིགས་རྣམས་ལ་སྔར་ལྷག་དམ་དྲག་ཆེ་རུ་འགྲོ་རྒྱུ་ཙམ་མ་ཟད།  མི་རིགས་དེ་དག་གི་ཆོས་དང་རིག་གཞུང་དང་སྐད་ཡིག་བཅས་པ་མདོར་ན་མི་རིགས་རང་གི་ངོ་བོ་རྩ་མེད་འགྲོ་ཉེན་དང་།  ལྷག་པར་ཁྲིམས་ཡིག་དེའི་བརྒྱུད་རྒྱ་ནག་རྒྱལ་ནང་ཙམ་དུ་མ་ཟད།   རྒྱལ་སྤྱིའི་ནང་རྒྱ་ནག་གཞུང་གི་ངོས་ནས་ཁྲིམས་མཐུན་ངོ་བོའི་ཐོག ཕྱི་ཕྱོགས་གནས་སྡོད་རྒྱ་རིགས་དང་བོད་མི་བཅས་ལ་ཡང་མི་རིགས་མཐུན་སྒྲིལ་ལ་གནོད་སྐྱོན་གཏོང་བ་སོགས་ཀྱི་མིང་ཐོག་ནས་ཁྲིམས་ཐོག་ཉེས་ཆད་སོགས་ཕྱོགས་གང་སའི་གནོན་ཤུགས་སྤྲོད་རྒྱུའི་འཆར་གཞི་ཡོད་པ་སོགས་གནས་སྟངས་ཤིན་ཏུ་ནས་ཛ་དྲག་ཡིན་སྐོར་གསུངས་ཀྱི་འདུག   བགྲོ་གླེང་དེའི་ཐོག་སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་ནག་གི་ཁྲིམས་གཞི་དེའི་འོག་ནས་བོད་མིའི་ངོ་བོ་རྩ་བརླག་གི་གནས་སྟངས་སྔར་ལྷག་ཛ་དྲག་ཆེ་རུ་འགྲོ་རྒྱུ་དང་།  རྒྱ་ནག་གི་ཁྲིམས་གཞི་དེའི་བརྒྱུད།  དངུལ་དངོས་དང་།  འཁྲུལ་རིག  སྤྱི་ཚོགས་ཙམ་མ་ཟད།   ནང་མི་ནང་ཁུལ་གྱི་མཐུན་སྒྲིལ་བཅས་སུ་འགོག་རྐྱེན་བཟོས་ཏེ།   གང་ལྟར་ཐབས་བྱུས་འདྲ་མིན་ཐོག་གྲངས་ཉུང་མི་རིགས་ཀྱི་ངོ་བོ་རྩ་མེད་བཟོ་ཐབས་བྱེད་རྒྱུ་ཡིན་ཡང་།  རྒྱ་ནག་གི་གནོན་ཤུགས་དེ་དག་ལ་ལྟོས་མེད།  བོད་ནང་བོད་མི་ཚོས་སྤྱི་ཚོགས་དྲྭ་ལམ་སོགས་ཐབས་ལམ་སྣ་ཚོགས་ཀྱི་ཐོག་ནས་སོ་སོའི་མི་རིགས་ཀྱི་ངོ་བོ་སྲུང་སྐྱོབ་ཡོང་ཐབས་གནང་བཞིན་པ་མ་ཟད།   བཙན་བྱོལ་ནང་གི་བོད་མི་ཚོས་ཀྱང་རྒྱལ་སྤྱིའི་མང་གཙོའི་རྒྱལ་ཁབ་ཀྱི་གཞུང་མང་བརྒྱུད་དཀའ་ངལ་ལ་གདོང་ལེན་གང་ཡོང་གནང་རྒྱུ་སོགས་ཀྱི་སྐོར་གསུངས་ཡོད།  རྒྱ་ནག་གི་མི་རིགས་མཐུན་སྒྲིལ་ཟེར་བའི་མཁས་པའི་བགྲོ་གླེང་དེའི་ཐོག་ད་དུང་།  རྒྱ་གར་གྱི་དམག་དཔོན་ཟུར་པ་དང་།  རྒྱལ་སྤྱིའི་དམག་དོན་ཐབས་བྱུས་དཔྱད་བརྗོད་པ།  Major General GD Bakshi མཆོག་དང་།   རྒྱ་ནག་དབྱེ་ཞིབ་པ་དང་ཐབས་ཇུས་ལྟེ་གནས་ཁང་གི་ཚོགས་གཙོ་མཁས་དབང་ Jayadeva Ranade མཆོག  བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་བགྲེས་པ་བསྟན་འཛིན་བདེ་གསལ་ལགས།  JNU གཙུག་ལག་སློབ་གྲྭ་ཆེན་མོའི་རྒྱ་ནག་ཞིབ་འཇུག་པ་སློབ་དཔོན་ Srikanth Kundapalli བཅས་ནས་ཀྱང་རྒྱ་ནག་གི་ལག་བསྟར་བྱེད་རྒྱུའི་ཁྲིམས་གཞིའི་དེའི་འོག་རྒྱལ་ནང་གི་གྲངས་ཉུང་མི་རིགས་ཙམ་མ་ཟད།   རྒྱལ་སྤྱིའི་ཁྱོན་དུའང་ཤུགས་རྐྱེན་ངན་པ་ཞིག་ཡོང་རྒྱུའི་སྐོར་སོགས་དགོངས་ཚུལ་གསུངས་ཡོད།   The post རྒྱ་ནག་གཞུང་གི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་ཟེར་བའི་ཁྲིམས་ཡིག་སྐོར་མཁས་པའི་བགྲོ་གླེང་། appeared first on vot.

བལ་ཡུལ་མཆོད་འབྱོར་མང་ཚོགས་ཀྱི་འོས་བསྡུའི་ཐོབ་ཐང་བཀག་སྐྱིལ་དང་འབྲེལ་བའི་ཁ་མཆུའི་ཁྲོད་ཉེ་ལམ་དབུས་འོས་བསྡུ་ལས་ཁང་ནས་ཞུ་སྦྱོར་བའི་ཁྲིམས་རྩོད་པ་བོད་ཀྱི་ཁྲིམས་ལུགས་རིག་པ་བའི་ཚོགས་པར་དོན་ཚན་དྲུག་ཅན་གྱི་ Counter Claim འམ་གཏུག་ཁ་མཆུ་གཏུག་རྗེས། ཚོགས་པའི་ངོས་ནས་དེ་འབྲེལ་རྒྱ་གར་གཞུང་གི་ཁྲིམས་ཁང་ལ་གཏུག་བཤེར་གྱིས་ཁྲིམས་མཐུན་གྱི་ཉེན་བརྡ་བཏང་ཡོད་སྟབས།  ད་ཆ་གྱོད་གཞི་དེ་བཞིན་རྒྱ་གར་གྱི་ཁྲིམས་འོག་སླེབས་པར་བརྟེན་ཆེས་མཐོའི་ཁྲིམས་ཞིབ་ཁང་ལ་ཁྲིམས་ཁོངས་ཁྱབ་ཚད་མེད་སྐོར་རྒྱུ་མཚན་དུ་གཞིགས་ནས་་གཏུག་ཁ་མཆུ་དེ་རང་བཞིན་གྱིས་ནུས་མེད་དུ་གྱུར་ཡོད་འདུག དེ་ཡང་འདི་ཚེས་ ༡༦ ཉིན་དབུས་འོས་བསྡུ་ལས་ཁང་གིས་ཁ་མཆུ་ཨང་ ༢༢ དང་འབྲེལ་ཞུ་སྦྱོར་བ་དང་ཞུ་སྦྱོར་བའི་ཁྲིམས་རྩོད་པ་ནས་མཆོད་འཇོར་གྱི་འོས་བསྡུའི་གནད་དོན་དང་འབྲེལ་བའི་དཔང་རྟགས་མང་པོ་ཞིག་སྟོན་རྒྱུ་ཡོད་ལུགས་སྐོར་གྱི་སྤྱི་འཐུས་རྣམ་པའི་དམ་འབུལ་མཛད་སྒོར་འགོག་རྐྱེན་བཟོས་ཐབས་བྱས་པ་དང་། ཁྲིམས་ཁང་དུ་ཁ་མཆུ་འགྲོ་བཞིན་པའི་སྐབས་བལ་ཡུལ་མཆོད་འཇོར་དོན་གཅོད་ལས་ཁུངས་ཀྱི་མདུན་དུ་མི་གྲངས་ ༣༥༠ ཙམ་འདུ་འཛོམས་ཀྱིས་བཙན་བྱོལ་བོད་མིའི་སྒྲིག་འཛུགས་ཀྱི་དབུས་འོས་བསྡུ་ལས་ཁང་ལ་ངོ་རྒོལ་བྱས་པ་མ་ཟད། བོད་མིའི་སྒྲིག་འཛུགས་ལ་མཚན་ཤས་བཟོས་པ་སོགས་དོན་ཚན་དྲུག་ལུང་འདྲེན་ཐོག་ལྡོག་གཏུག་ཁ་མཆུ་གཏུགས་ཡོད་པ་རེད་འདུག དེ་དོན་དེ་རིང་ཕྱི་ཟླ་ ༦ པའི་ཚེས་ ༢༦ ཉིན་གྱི་ཕྱི་དྲོ་ཆུ་ཚོད་ ༢།༣༠ ཐོག་བཞུགས་སྒར་དུ་རྟེན་གཞི་བྱས་པའི་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་དུ་ཁ་མཆུ་དེབ་འགོད་ཨང་ ༢༢ གྱོད་ཡ་ཕྱོགས་གཉིས་ལ་ལྡོག་གཏུག་གི་ཞུ་རྩ་དང་། ཞུ་ལན་ཐོག་ངེས་བརྟན་བཟོ་རྒྱུའི་ཆེད་ཐོག་མའི་ཉན་ཞིབ་འཚོགས་སོང་བ་དང་།  དེའི་ཐོག་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་ཡེ་ཤེས་དབང་མོ་མཆོག་ནས་ཁ་མཆུ་ཨང་ ༢༢ པའི་གྱོད་ཡ་ཞུ་སྦྱོར་བའི་ངོ་ཚབ་ཁྲིམས་རྩོད་པ་ནས་ཟླ་བ་འདིའི་ཕྱི་ཚེས་ ༡༦ ཉིན་དབུས་འོས་བསྡུ་ལས་ཁང་ནས་ཞུ་སྦྱོར་བ་དང་། ཞུ་སྦྱོར་བའི་ཁྲིམས་རྩོད་པ་བཅས་ནས་ཁྲིམས་མཐུན་མིན་པའི་བྱ་སྤྱོད་སྤེལ་བའི་ངོས་འཛིན་འོག་སྤྱི་མང་གཏུག་བཤེར་འགྲོ་ལུགས་རྩ་འཛིན་ཁྲིམས་ཡིག་གི་ལེའུ་ ༥ དོན་ཚན་ ༣༠ དགོངས་དོན་དོན་ཚན་དྲུག་ཅན་གྱི་ལྡོག་གཏུག་ཁ་མཆུ་གཏུགས་རྗེས།  ཞུ་སྦྱོར་བའི་ཁྲིམས་རྩོད་པས་དེ་འབྲེལ་རྒྱ་གར་གཞུང་གིས་ཁྲིམས་ཁང་ལ་གཏུག་བཤེར་གྱིས་དབུས་འོས་བསྡུ་ལས་ཁང་ལ་ཁྲིམས་མཐུན་གྱི་ཉེན་བརྡ་བཏང་ཡོད་སྟབས།  གྱོད་གཞི་དེ་བཞིན་ད་ཆ་རྒྱ་གར་གྱི་ཁྲིམས་འོག་སླེབས་པར་བརྟེན་ཆེས་མཐོའི་ཁྲིམས་ཞིབ་ཁང་ལ་ཁྲིམས་ཁོངས་ཁྱབ་ཚད་མེད་སྐོར་རྒྱུ་མཚན་དུ་གཞིགས་ནས་ལྡོག་གཏུག་ཁ་མཆུ་དེ་རང་བཞིན་གྱིས་ནུས་མེད་འགྱུར་གྱི་ཡོད་པ་གསུངས་སོང་། མ་ཟད། གྱོད་ཡ་ཞུ་སྦྱོར་བའི་ངོ་ཚབ་ཁྲིམས་རྩོད་པ་ནས་ཁ་མཆུ་ཨང་ ༢༢ དང་འབྲེལ་ཁ་མཆུ་ཞུ་གཏུག་སྐབས་ཁྲིམས་ལུགས་གཏན་འབེབས་གཞིར་བཟུང་ཉམས་ལེན་བྱེད་སྒོའི་ཁས་ལེན་དམ་འབུལ་གྱི་ཡིག་ཆར་མོས་མཐུན་གྱིས་ཁྱིམས་ཞིབ་པའི་མདུན་སར་མིང་རྟགས་བཀོད་དེ་ཁྲིམས་ཞིབ་ཁང་ལ་ཕུལ་ཡོད་པའི་དམ་ཡིག་དེའང་རང་བཞིན་གྱི་ནུས་མེད་ཆགས་ཡོད་པ་གསུངས་སོང་ལ།  ཆེས་མཐོའི་ཁྲིམས་ཞིབ་ཁང་ནས་དབུས་འོས་བསྡུ་ལས་ཁང་གིས་བཏང་གནང་བའི་ལྡོག་གཏུག་གི་ཞུ་རྩ་དེར་ངོས་བཞེས་གནང་མེད་སྐོར་གསུངས་སོང་། དེ་འབྲེལ་འདི་ག་རླུང་འཕྲིན་ཁང་གིས་ཞུ་སྦྱོར་བའི་ཁྲིམས་རྩོད་པ་རིན་ཆེན་དབང་རྒྱལ་ལགས་སུ་བཀའ་འདྲི་ཞུ་སྐབས་ཁོང་གིས།  འདི་ཚེས་ ༡༦ ཉིན་དབུས་འོས་བསྡུ་ལས་ཁང་གིས་ཁ་མཆུ་ཨང་ ༢༢ དང་འབྲེལ་ཞུ་སྦྱོར་བ་དང་ཞུ་སྦྱོར་བའི་ཁྲིམས་རྩོད་པ་ནས་བོད་མིའི་སྒྲིག་འཛུགས་ལ་མཚན་ཤས་བཟོས་པ་སོགས་དོན་ཚན་དྲུག་ལུང་འདྲེན་ཐོག་ལྡོག་གཏུག་ཁ་མཆུ་གཏུགས་ཡོད་པར་འགྲེལ་བརྗོད་དང་འབྲེལ།  ཉེས་མེད་ཉེས་འཛུགས་གྱི་དོན་རྐྱེན་དེ་ནི་ Criminal Defamation འམ་ནག་ཉེས་མཚན་ཤས་འོག་སླེབས་ཀྱི་ཡོད་པའི་རྐྱེན་དེ་འབྲེལ་ཆེས་མཐོའི་ཁྲིམས་ཞིབ་ཁང་ལ་ཁྲིམས་ཁོངས་ཁྱབ་ཚད་མེད་སྟབས།  གནས་ཡུལ་རྒྱ་གར་གཞུང་གི་ཁྲིམས་ཐོག་བསྐྱོད་ཡོད་པ་གསུངས་སོང་། མ་ཟད། ད་ལྟའི་ཆར་ཆེས་མཐོའི་ཁྲིམས་ཞིབ་ཁང་ནས་ལྡོག་གཏུག་གི་ཁ་མཆུ་དེ་ནུས་མེད་ཆགས་ཡོད་པ་མ་གཏོགས་ཁ་མཆུ་ཨང་ […] The post རྒྱ་གར་ཁྲིམས་ལ་བསྐྱོད་པའི་དབང་གིས་བལ་ཡུལ་མཆོད་འཇོར་དང་འབྲེལ་བའི་ལྡོག་གཏུག་ཁ་མཆུ་ཞིག་ནུས་མེད་གྱུར་འདུག appeared first on vot.

རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་གི་གོ་སྒྲིག་འོག་བོད་རྒྱ་འབྲེལ་བའི་རྒྱལ་སྤྱིའི་ཚོགས་འདུ་ཞིག་འགོ་འཛུགས་གནང་སོང་བ་དང་འབྲེལ། བོད་མི་མང་སྤྱི་འཐུས་ཚོགས་གཙོ་མཆོག་གིས་བོད་རྒྱ་འབྲེལ་བའི་ལོ་རྒྱུས་ཀྱི་གལ་གནད་དང་། རྒྱ་གཞུང་གིས་མི་རིགས་མཐུན་སྒྲིལ་ཡར་ཐོན་སྐུལ་སྤེལ་ཟེར་བའི་ཁྲིམས་དེ་རྒྱལ་སྤྱིའི་ཁྲིམས་སྒྲིག་དང་འགལ་བ་མ་ཟད། ད་བར་བོད་རྒྱ་གྲོས་མོལ་མ་བྱུང་བ་དེ་ནི་རྒྱ་ནག་གི་བྱེད་བབ་ལ་ཐུག་ཡོད་པ་ནན་བརྗོད་གནང་སོང་། དེ་ཡང་ཚོགས་འདུ་དེ་དེ་རིང་ནས་འགོ་འཛུགས་ཀྱིས་འདི་ཚེས་ ༢༩ བར་ཉིན་གྲངས་བཞིའི་རིང་རྡ་ས་དབུས་སྣེ་ལེན་ཁང་དུ་ཡོད་པའི་འཛིན་སྐྱོང་སྦྱོང་བརྡར་ཁང་དུ་འཚོག་བཞིན་ཡོད་པ་དང་། སྐུ་མགྲོན་གཙོ་བོར་བོད་མི་མང་སྤྱི་འཐུས་ཚོགས་གཙོ་བཀྲས་ཁང་སྒྲོལ་མ་ཚེ་རིང་མཆོག་དང་དམིགས་བསལ་སྐུ་མགྲོན་ཐའེ་ཝན་དོན་གཅོད་ཟུར་པ་དང་སྤྱི་འཐུས་ལས་ཐོག་བ་རི་ཟླ་བ་ཚེ་རིང་ལགས། དེ་བཞིན་ལྡི་ལི་ཤཱིབ་ན་དྷར་སློབ་གྲྭ་ཆེན་མོའི་གཙུག་ལག་སློབ་དཔོན་ཀ་ཝེ་རི་གྷིལ་ལགས། བོད་དང་ཐའེ་ཝན་གྱི་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་སྤྱི་ཁྱབ་དྲུང་ཆེ་བཀྲ་ཤིས་ཚེ་རིང་ལགས། དེ་བཞིན་རྒྱ་གར་དང་ཐའེ་ཝན། བྱང་ཨ་རི་བཅས་ནས་སྲིད་བྱུས་ཉམས་ཞིབ་པ་དང་འགོ་ཁྲིད། ཆེད་ལས་མི་སྣ། མཁས་པ། ཕྱོགས་མཐའ་ཁག་ནས་ཕེབས་པའི་ཚོགས་བཅར་བ་སོགས་ཁྱོན་མི་གྲངས་ ༧༠ ལྷག་ནས་མཉམ་ཞུགས་གནང་སོང་། སྐབས་དེར་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཙོ་བཀྲས་ཁང་སྒྲོལ་མ་ཚེ་རིང་མཆོག་གིས་བོད་རྒྱ་འབྲེལ་བའི་ལོ་རྒྱུས་ཀྱི་གལ་གནད་སྐོར་གསུང་བཤད་གནང་བའི་ཁྲོད། ད་ལྟའི་ཆར་རྒྱ་ནག་གཅིག་གི་སྲིད་བྱུས་ཞེས་པ་དེ་རྒྱ་ནག་གི་ཐའེ་ཝན་ཐོག་འཛིན་པའི་ལངས་ཕྱོགས་དང་འབྲེལ་བ་ཡོད་པ་ལས་བོད་ཀྱི་གནད་དོན་དང་འབྲེལ་བ་རྩ་བ་ནས་མེད་པ་དེ་ལྟར་ཡང་། བདག་དབང་མེད་བཞིན་དུ་བོད་རྒྱ་ཁོངས་སུ་བསྡུས་ཐབས་ལ་རྒྱབ་སྐྱོར་ཐོབ་ཆེད་རྒྱལ་སྤྱིའི་རྒྱལ་ཁབ་ཁག་ལ་དེ་འབྲེལ་གནོན་ཤུགས་སྤྲད་དང་སྤྲོད་བཞིན་ཡོད་པ་གསལ་སྟོན་གནང་སོང་། གནད་དོན་དེ་དང་འབྲེལ་བོད་མི་རྣམས་ནས་བོད་ཀྱི་དངོས་ཡོད་ལོ་རྒྱུས་དག་ཐེར་དང་བརྒྱུད་སྤེལ་གནང་དགོས་གལ་ཡིན་ཞིང་། བོད་པའི་གཞོན་སྐྱེས་ཁྲོད་ནས་ཞིབ་འཇུག་དང་ཁྲིམས་ཐོག་ཆེད་སྦྱོང་གནང་མཁན་དགོས་ངེས་ཡིན་པ་དང་། དེ་འབྲེལ་སྙན་ཐོ་འདོན་སྤེལ་གྱིས་རྒྱལ་སྤྱིའི་བརྒྱུད་ལམ་ཁག་ཏུ་བོད་ཀྱི་གནད་དོན་གསལ་སྟོན་བྱ་དགོས་རྒྱུ་ནི་བོད་མིའི་ལས་འགན་ཡིན་པ་གསུངས་སོང་། མ་ཟད་རྒྱ་ནག་གི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་ཟེར་བའི་ཁྲིམས་དེ་ནི་རྒྱ་ནག་གི་ཁྲིམས་སྒྲིག་ཙམ་མ་ཟད་རྒྱལ་སྤྱིའི་ཁྲིམས་སྒྲིག་དང་འགལ་བ་ཞིག་དང་། བོད་མི་ནི་གྲངས་ཉུང་མི་རིགས་མ་ཡིན་པ། ལྷག་དོན་ད་བར་བོད་རྒྱ་གྲོས་མོལ་མ་བྱུང་བ་དེ་ནི་རྒྱ་ནག་གི་སྲིད་འཛིན་ཞི་ཅིན་ཕིང་ལ་འགན་ཡོད་པ་ལས་བོད་མིའི་ངོས་ནས་བོད་རྒྱའི་དཀའ་རྙོག་སེལ་རྒྱུར་དབུ་མའི་ལམ་གྱི་སྲིད་བྱུས་ཀྱི་ཐོག་ནས་དགོས་འདུན་བཏོན་ཡོད་པར་གལ་ཏེ་མ་འོངས་པ་འགྱུར་བ་དགོས་གལ་གཟིགས་ཚེ་འགྲོ་ལུགས་གཞིར་བཟུང་མཐུན་པ་ཞིག་གནང་དོགས་པ་ནན་བརྗོད་གནང་སོང་། དེ་བཞིན་དམིགས་བསལ་སྐུ་མགྲོན་ཐའེ་ཝན་དོན་གཅོད་ཟུར་པ་དང་སྤྱི་འཐུས་ལས་ཐོག་བ་རི་ཟླ་བ་ཚེ་རིང་ལགས་ཀྱིས། བོད་རྒྱ་འབྲེལ་བ་དང་། ད་ཡོད་རྒྱ་ནག་སྲིད་གཞུང་འོག་ཏུ་བོད་ཀྱི་གནས་སྟངས་ཞེས་པའི་བརྗོད་གཞིའི་ཐོག་གསུང་བཤད་གནང་བའི་ཁྲོད། ད་ལྟའི་མི་རིགས་མཐུན་སྒྲིལ་ཟེར་བའི་ཁྲིམས་ཡིག་དེའི་ཐོག་གཙོ་འདོན་གནང་སོང་བ་དང་། འཛམ་གླིང་རྒྱལ་ཁབ་སོ་སོའི་ནང་གི་གཞུང་འབྲེལ་གྱི་སྐད་ཡིག་སོགས་ཀྱི་གནད་དོན་གླེང་སློང་གིས། ད་ཆ་རྒྱ་ནག་གི་གཏན་འབེབས་བྱས་པའི་ཁྲིམས་ཟེར་བ་དེ་ནི་ཁྲིམས་ཞིག་མིན་པར་ཞི་ཅིན་ཕིང་སྒེར་གྱི་བསམ་བློ་དང་ལྟ་བར་ཐུག་ཡོད་པ་གསུངས་སོང་། ལྷག་པར་ད་ལྟའི་མི་རིགས་མཐུན་སྒྲིལ་ཁྲིམས་ཟེར་བ་ཙམ་ལས་ལས་འགུལ་ནི་དེ་སྔོན་ནས་སྤེལ་བཞིན་ཡོད་པ་དང་། ཕྱི་ལོ་ ༢༠༢༣ ལོར་མཐོ་སློབ་ནང་དུ་བོད་ཀྱི་སྐད་ཡིག་གི་ཡིག་རྒྱུགས་མེད་པ་བཟོས་པ་དང་། དེ་ནི་ཀན་སུ་དང་མཚོ་སྔོན། ཟི་ཁྲིན་བཅས་སུ་ལག་བསྟར་བྱས་ཡོད་པ་མ་ཟད། ད་ལྟའི་ཆར་བོད་རང་སྐྱོང་ལྗོངས་ཟེར་བའི་ནང་དུ་ལག་བསྟར་བྱས་དང་བྱེད་བཞིན་པ་ཞིག་ཆགས་ཀྱི་ཡོད་པ་སོགས་གསུངས་སོང་། མ་ཟད་བོད་ནང་ཁང་པ་རྒྱག་སྟངས་དང་། དཔལ་འབྱོར་ལམ་ལུགས། སློབ་གྲྭ་སོགས་ཅི་རིགས་ནས་རྒྱ་ནག་གི་ངོ་བོར་བསྒྱུར་ཐབས་བྱེད་པ་དེ་ནི་ཛ་དྲག་གི་རང་བཞིན་ཡིན་པ་དྲན་སྐུལ་གནང་སོང་། རྩ་བའི་ཉིན་བཞིའི་ལས་རིམ་ཁྲོད་དབུ་མའི་ལམ་གྱི་ངོ་བོ་དང་ལྟ་གྲུབ་བྱུང་ཚུལ། མདུན་ལམ། རང་སྲིད་རང་སྐྱོང་གི་དཔེ་མཚོན་ཁག་གི་སྐོར། གནམ་འོག་རིང་ལུགས། མང་གཙོ་བཅོས་བསྒྱུར་དང་བོད་རྒྱ་འབྲེལ་བ། རྒྱ་ནག་གི་མང་གཙོ་འཐབ་རྩོད། བོད་ཀྱི་གནམ་གཤིས་དང་དེས་ལྷོ་ཨེ་ཤི་ཡར་ཤུགས་རྐྱེན་གང་ཡིན་སྐོར། རྒྱ་རིགས་གཞོན་སྐྱེས་ཀྱིས་བོད་དོན་ལ་ལྟ་ཚུལ། རྒྱལ་སྤྱིའི་དཔེ་མཚོན་ནས་རྩོད་རྙོག་སེལ་ཐབས་ཀྱི་སྒྲོམ་གཞི་སློབ་སྦྱོང་དང་བསམ་ཚུལ་བརྗེ་ལེན། ལྷོ་ཨེ་ཤི་ཡའི་ཁུལ་དུ་བོད་རྒྱ་འབྲེལ་བའི་ཐོག་ན་གཞོན་གྱི་ལྟ་ཚུལ་སྐོར་གསུང་བཤད་དང་བགྲོ་གླེང་གནང་རྒྱུ་ཡིན་པ་མ་ཟད། མཉམ་ཞུགས་པ་རྣམས་ནས་མཉམ་ལས་ཀྱི་སྲིད་བྱུས་གྲོས་མོལ་བཅས་གནང་རྒྱུ་ཡིན་པ་རེད་འདུག གཞི་རྩའི་ལས་གཞི་དེ་ནི་དབུས་རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་གི་ཚོགས་ཆེན་ཐེངས་དྲུག་པའི་ཐོག་སྤྱི་མོས་གྲོས་ཆོད་བྱུང་བ་གཞིར་བཟུང་འདི་ལོ་༸སྐུའི་གོ་སྟོན་སྲུང་བརྩི་དང་བསྟུན་ནས་གོ་སྒྲིག་གནང་བ་ཞིག་ཡིན་པ་རེད་འདུག The post བོད་རྒྱ་འབྲེལ་བའི་རྒྱལ་སྤྱིའི་ཚོགས་འདུ་འགོ་འཛུགས་དང་འབྲེལ་ད་བར་བོད་རྒྱའི་གྲོས་མོལ་མ་བྱུང་བའི་འགན་འདི་རྒྱ་ནག་ལ་ཡོད་པ་ནན་བརྗོད། appeared first on vot.

ཨ་རིའི་མི་ནི་སོ་ཊ་མངའ་སྡེའི་ Saint Paul སེན་ཊི་པོལ་དང་། Minneapolis མི་ནི་ཡ་པོ་ལི་སི་གྲོང་ཁྱེར་ལྷན་ཚོགས། དེ་བཞིན་ཝི་སི་ཁོན་སིན་མངའ་སྡེའི་ Madison མེ་ཌི་སོན་གྲོང་ཁྱེར་ལྷན་ཚོགས་བཅས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚེ་ཧྲིལ་པོའི་རླབས་ཆེན་གྱི་མཛད་འཕྲིན་ལ་ཆེ་བསྟོད་ཀྱིས།  ༸སྐུའི་འཁྲུངས་སྐར་གྱི་ཉིན་མོ་ཕྱི་ཟླ་ ༧ ཚེས་ ༦ སྟེ་བྱམས་བརྩེའི་ཉིན་མོར་སྲུང་བརྩི་ཞུ་རྒྱུའི་གྲོས་ཆོད་གཏན་འབེབས་གནང་འདུག རྩ་བའི་ཐེངས་འདིར་ཨ་རིའི་གྲོང་ཁྱེར་གསུམ་ནང་གཏན་འབེབས་བྱུང་བའི་གྲོས་ཆོད་དེ་དག་ནང་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནི་བོད་བརྒྱུད་ནང་བསྟན་གྱི་རྗེས་འབྲངས་པ་ཚོས་འཕགས་པ་སྤྱན་རས་གཟིགས་ཀྱི་རྣམ་སྤྲུལ་སྙིང་རྗེའི་རང་གཟུགས་ཤིག་དང་བོད་མིའི་བླ་ན་མེད་པའི་དབུ་ཁྲིད་དུ་ཡིད་ཆེས་གནང་གི་ཡོད་པ་ལ་ངོས་འཛིན་དང་།  མགོན་པོ་༸གང་ཉིད་མཆོག་གིས་སྐུ་ན་ཆུང་དུས་ནས་བོད་བསྟན་སྲིད་མི་རིགས་ཆེད་དུ་རླབས་ཆེན་གྱི་མཛད་རྗེས་འཇོག་གནང་མཛད་ཡོད་པ་མ་ཟད།  རྒྱལ་སྤྱིའི་ཁྲོད་མི་རིགས་དང་ཆོས་དད་རྒྱབ་ལྗོངས་འདྲ་མིན་གྱི་གང་ཟག་ཕན་ཚུན་བར་བསམ་ཤེས་དང་། བཟོད་བསྲན། མཐུན་སྒྲིལ། བྱམས་སྙིང་རྗེ་གོང་འཕེལ་ཐད་ལམ་སྟོན་སྩལ་གནང་མཛད་ཡོད་པ་དག་གསལ་འདོན་དང་འབྲེལ།  ཕྱི་ལོ་ ༡༩༥༠ ལོར་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་བོད་ས་བཙན་འཛུལ་འགོ་འཛུགས་ཀྱིས། ཕྱི་ལོ་ ༡༩༥༩ ལོར་བོད་མིའི་སྒེར་ལངས་བྱུང་རྗེས་༸མགོན་པོ་མཆོག་བཙན་བྱོལ་དུ་བྲོལ་བྱོལ་ལ་ཆིབས་བསྒྱུར་བསྐྱངས་དགོས་ཁེལ་ཡོད་ཀྱང་། ༸གོང་ས་མཆོག་ནས་འཚེ་མེད་ཞི་བ་དང་། བྱམས་སྙིང་རྗེ། ཕན་ཚུན་གྲོས་མོལ་བཅས་ཀྱི་བརྒྱུད་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞི་འོག་གཉིས་ཕན་དབུ་མའི་ལམ་གྱི་སྲིད་བྱུས་ལས་ཕྱོགས་གཉིས་ཀྱི་དཀའ་རྙོག་སེལ་ཐབས་ལ་འབད་ཡོད་པར་ཆེ་མཐོང་ཞུས་ཡོད་པ་དང་།   ༸གང་ཉིད་མཆོག་གི་ཆོས་ལུགས་ལ་མ་བརྟེན་པའི་བཟང་སྤྱོད་དང་།  བྱམས་སྙིང་རྗེ།  སེམས་ཁམས་རྣམ་དཔྱོད་བཅས་ཀྱི་བཀའ་སློབ་ལམ་སྟོན་གྱིས་གོ་ལ་སྤྱི་ཡོངས་ཀྱི་ཤེས་ཡོན་མི་སྣ་དང་ཆོས་སྲིད་ཀྱི་དབུ་ཁྲིད་ཚོར་སེམས་འགུལ་ཐེབས་ཡོད་པ་བཅས།  སླེབས་ལ་ཉེ་བའི་ཕྱི་ཟླ་ ༧ ཚེས་ ༦ སྟེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༩༡ བདག་གིར་བཞེས་ཀྱི་ཡོད་པ་དང་བསྟུན། གྲོང་ཁྱེར་ལྷན་ཚོགས་དེ་དག་ངོས་ནས་༸གོང་ས་མཆོག་གིས་སྐུ་ཚེ་ཧྲིལ་པོར་ཞི་བདེ་དང་། བྱམས་བརྩེ། འཚེ་བ་མེད་པའི་རིན་ཐང་ཐོག་མཛད་འཕྲིན་རླབས་ཆེན་བསྐྱངས་གནང་མཛད་ཡོད་པར་ངོས་འཛིན་དང་ཆེ་བསྟོད་ཞུ་ཆེད་དུ་ཁུལ་དེ་དག་ནང་༸སྐུའི་འཁྲུངས་སྐར་གྱི་ཉིན་མོ་ཕྱི་ཟླ་ ༧ ཚེས་ ༦ དེ་བཞིན་ Day of Compassion འམ་བྱམས་བརྩེའི་ཉིན་མོ་ཞེས་སྲུང་བརྩི་ཞུ་རྒྱུའི་གྲོས་ཆོད་གཏན་འབེབས་ཡིན་པ་གསུངས་འདུག དེ་ཡང་འདི་ག་རླུང་འཕྲིན་ཁང་གིས་ཨ་རི་ཁུལ་གྱི་དང་བླངས་བོད་དོན་ཞུ་གཏུག་ལས་འགུལ་གྱི་འབྲེལ་མཐུད་པ་བསྟན་འཛིན་ཆོས་བཟང་ལགས་སུ་བཀའ་འདྲི་ཞུས་པར་ཁོང་གིས།  ཐེངས་འདིར་ཨ་རི་ནང་༸སྐུའི་འཁྲུངས་སྐར་གྱི་ཉིན་མོ་ཕྱི་ཟླ་ ༧ ཚེས་ ༦ […] The post ཨ་རིའི་ཁུལ་གྱི་གྲོང་ཁྱེར་གསུམ་ནང་༸སྐུའི་འཁྲུངས་སྐར་གྱི་ཉིན་མོ་སྟེ་བྱམས་བརྩེའི་ཉིན་མོར་སྲུང་བརྩི་ཞུ་རྒྱུའི་གྲོས་ཆོད་གཏན་འབེབས། appeared first on vot.

ཨ་རིའི་མི་ནི་སོ་ཊ་མངའ་སྡེའི་སེན་ཊི་པོལ་གྲོང་ཁྱེར་གྱིས་ཁ་ཉིན་ཕྱི་ཆེས་ ༢༣ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚེ་ཧྲིལ་པོའི་རླབས་ཆེན་གྱི་མཛད་འཕྲིན ལ་ཆེ་བསྟོད་ཀྱིས།  ༸སྐུའི་འཁྲུངས་སྐར་གྱི་ཉིན་མོ་ཕྱི་ཟླ་ ༧ ཚེས་ ༦ སྟེ་བྱམས་བརྩེའི་ཉིན་མོར་སྲུང་བརྩི་ཞུ་རྒྱུའི་གྲོས་ཆོད་གཏན་འབེབས་གནང་འདུག དེ་ཡང་ Tibetan American Foundation of Minnesota མི་ནི་སོ་ཊ་ཨ་རི་བོད་མིའི་སྤྱི་མཐུན་ཚོགས་པས་སྤེལ་བའི་གནས་ཚུལ་ནང་གསལ་ལྟར་ན།  ཨ་རིའི་མི་ནི་སོ་ཊ་མངའ་སྡེའི་ Saint Paul City Council སེན་ཊི་པོལ་གྲོང་ཁྱེར་ལྷན་ཚོགས་ཀྱིས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྐུ་ཚེ་ཧྲིལ་པོར་ཞི་བདེ་དང་། བྱམས་བརྩེ། འཚེ་བ་མེད་པའི་རིན་ཐང་ཐོག་མཛད་འཕྲིན་རླབས་ཆེན་བསྐྱངས་གནང་མཛད་ཡོད་པར་ངོས་འཛིན་དང་ཆེ་བསྟོད་ཞུ་ཆེད་དུ་འདི་ལོར་༸གང་ཉིད་མཆོག་དགུང་གྲངས་ ༩༡ བདག་གིར་བཞེས་ཀྱི་ཡོད་པ་དང་བསྟུན་ནས་༸སྐུའི་འཁྲུངས་སྐར་གྱི་ཉིན་མོ་ཕྱི་ཟླ་ ༧ ཚེས་ ༦ སྟེ་བྱམས་བརྩེའི་ཉིན་མོར་སྲུང་བརྩི་ཞུ་རྒྱུའི་གྲོས་ཆོད་གཏན་འབེབས་གནང་འདུག ཨ་རིའི་སེན་ཊི་པོལ་གྲོང་ཁྱེར་ལྷན་ཚོགས་ཀྱིས་གཏན་འབེབས་གནང་བའི་གྲོས་ཆོད་དེའི་ནང་།  སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནི་བོད་བརྒྱུད་ནང་བསྟན་གྱི་རྗེས་འབྲངས་པ་ཚོས་འཕགས་པ་སྤྱན་རས་གཟིགས་ཀྱི་རྣམ་སྤྲུལ་སྙིང་རྗེའི་རང་གཟུགས་ཤིག་དང་བོད་མིའི་བླ་ན་མེད་པའི་དབུ་ཁྲིད་དུ་ཡིད་ཆེས་ངོས་འཛིན་གནང་གི་ཡོད་པ་དང་།  ༸གོང་ས་སྐུ་ཕྲེང་བཅུ་བཞི་པ་ཆེན་པོ་བསྟན་འཛིན་རྒྱ་མཚོ་མཆོག་གི་ཞི་བདེ་དང་། བྱམས་བརྩེ། འཚེ་བ་མེད་པའི་བཀའ་སློབ་ལམ་སྟོན་ནི་འཛམ་གླིང་རྒྱ་ཁབ་ཏུ་ཆེ་མཐོང་ཆེན་པོ་འཇོག་གི་ཡོད་པ།  ལྷག་པར་དུ་མགོན་པོ་༸གང་ཉིད་མཆོག་སྐུ་ན་ཆུང་དུས་ནས་༸ཏཱ་ལའི་བླ་མ་སྐུ་ཕྲེང་བཅུ་གསུམ་པའི་ཡང་སྲིད་དུ་ངོས་འཛིན་བྱུང་རྗེས་སྐུ་ཚེ་ཧྲིལ་པོར་ནང་པ་སངས་རྒྱས་པའི་ལྟ་གྲུབ་ལ་སྦྱང་བརྩོན་དང་ཉམས་ལེན་མཛད་གནང་ཡོད་པ་མ་ཟད།  བྱམས་སྙིང་རྗེ་དང་། ཆོས་ལུགས་མཐུན་སྒྲིལ། ཕན་ཚུན་བརྩི་མཐོང་གི་འདུ་ཤེས་གོང་འཕེལ་ཐད་རླབས་ཆེན་གྱི་མཛད་རྗེས་འཇོག་བཞིན་ཡོད་པ་གསུངས་འདུག  དེ་བཞིན་ཕྱི་ལོ་ ༡༩༥༠ ལོར་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་བོད་ས་བཙན་འཛུལ་འགོ་འཛུགས་ཀྱིས། ཕྱི་ལོ་ ༡༩༥༩ ལོར་བོད་མིའི་སྒེར་ལངས་བྱུང་རྗེས་༸མགོན་པོ་མཆོག་བཙན་བྱོལ་དུ་བྲོལ་བྱོལ་ལ་ཆིབས་བསྒྱུར་བསྐྱངས་དགོས་ཁེལ་ཡོད་ཀྱང་། དུས་དེ་ནས་བཟུང་༸གོང་ས་མཆོག་གིས་བོད་ཀྱི་ཆོས་དང་རིག་གཞུང་སྐད་ཡིག་དང་བཅས་པ་སྲུང་སྐྱོབ་སླད་སྐུ་ལས་འཛད་མེད་བསྐྱོན་གནང་མཛད་ཡོད་པ་མ་ཟད།  ཨ་རིའི་མི་ནི་སོ་ཊ་ཚུད་པའི་འཛམ་གླིང་ཡུལ་གྲུ་གང་སར་ཆིབས་སྒྱུར་གྱིས་མི་རིགས་དང་ཆོས་དད་རྒྱབ་ལྗོངས་འདྲ་མིན་གྱི་གང་ཟག་ཕན་ཚུན་བར་བསམ་ཤེས་དང་། བཟོད་བསྲན། མཐུན་སྒྲིལ། བྱམས་སྙིང་རྗེ་གོང་འཕེལ་ཐད་ལམ་སྟོན་སྩལ་གནང་མཛད་ཡོད་པ་གསུངས་འདུག གྲོས་ཆོད་དེའི་ནང་ད་དུང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གནད་དོན་ཆེ་ཆུང་གང་འདྲ་ཞིག་ཡིན་རུང་དེ་དག་བཟོད་བསྲན་དང་ཕན་ཚུན་བསམ་ཤེས་ཀྱི་སྒོ་ནས་ཞི་བདེའི་ཐབས་ལམ་བརྒྱུད་སེལ་དགོས་གལ་ཡིན་པའི་ཐུགས་དགོངས་ལ་ཆེ་བསྟོད་ཀྱིས་རྒྱལ་སྤྱིའི་ཁྲོད་ཤིན་ཏུ་གྲགས་ཆེ་བའི་ནོ་སྦེལ་ཞི་བདེའི་གཟེངས་རྟགས་ཀྱང་བཞེས་གནང་ཡོད་པ་དང་།  ༸གང་ཉིད་མཆོག་གི་ཆོས་ལུགས་ལ་མ་བརྟེན་པའི་བཟང་སྤྱོད་དང་།  བྱམས་སྙིང་རྗེ།  སེམས་ཁམས་རྣམ་དཔྱོད་བཅས་ཀྱི་བཀའ་སློབ་ལམ་སྟོན་གྱིས་གོ་ལ་སྤྱི་ཡོངས་ཀྱི་ཤེས་ཡོན་མི་སྣ་དང་ཆོས་སྲིད་ཀྱི་དབུ་ཁྲིད་ཚོར་སེམས་འགུལ་ཐེབས་ཡོད་པ་མ་ཟད།  […] The post ཨ་རིའི་སེན་ཊི་པོལ་གྲོང་ཁྱེར་ནང་༸སྐུའི་འཁྲུངས་སྐར་གྱི་ཉིན་མོ་སྟེ་བྱམས་བརྩེའི་ཉིན་མོར་སྲུང་བརྩི་ཞུ་རྒྱུའི་གྲོས་ཆོད་གཏན་འབེབས་གནང་འདུག appeared first on vot.

སྐབས་ ༡༨ པའི་བོད་མི་མང་སྤྱི་འཐུས་རྣམ་པས་ལས་འཁུར་བཞེས་ཟིན་པའི་རྗེས། ཐོག་མར་མང་ཚོགས་ལ་གཞུང་འབྲེལ་འཚམས་གཟིགས་སུ་ཕེབས་རྒྱུའི་ལས་རིམ་ཡོད་པ་ལྟར། སྤྱི་འཐུས་ཆོས་གྲགས་རྒྱ་མཚོ་ལགས་དང་། སྤྱི་འཐུས་མགོན་པོ་དོན་གྲུབ་ལགས་རྣམ་གཉིས་ནས་ཕྱི་ལོ་ ༢༠༢༦ ཟླ་ ༦ པའི་ཚེས་ ༢༢ ནས་ཕྱི་ཟླ་ ༧ ཚེས་ ༦ བར་ཤྲི་ན་སྒར་དང་། དཀའ་འཁྱིལ། ལ་དྭགས་སླེ་བྱང་ཁུལ་དུ་གཞུང་འབྲེལ་མཚམས་གཟིགས་གནང་དང་གནང་བཞིན་པ་དང་བསྟུན། ཁ་སང་ཕྱི་ཚེས་ ༢༣ ཉིན་ཇ་མུ་ཀཤ་མིར་སྤྱི་ཁྱབ་བློན་ཆེན་ Omar Abdullah ཨོ་མཱར་ཨབ་དྷུ་ལ་མཆོག་དང་མཇལ་འཕྲད་གནང་བ་མ་ཟད། མངའ་སྡེའི་སྤྱི་ཁྱབ་བློན་ཆེན་མཆོག་གི་ལས་ཁུངས་ཀྱི་དྲུང་ཆེ་དང་དྲུང་ཆེ་གཞོན་པ་རྣམ་གཉིས། མངའ་སྡེའི་སྤྱི་ཁྱབ་བློན་ཆེན་མཆོག་གི་སྒེར་དྲུང་བཅས་དང་ལྷན་མཇལ་འཕྲད་གནང་འདུག འདི་ག་རླུང་འཕྲིན་ནང་བོད་མི་མང་སྤྱི་འཐུས་མགོན་པོ་དོན་གྲུབ་ལགས་སུ་སྤྱི་ཁྱབ་བློན་ཆེན་མཆོག་དང་མཇལ་འཕྲད་བྱུང་སྐབས་གནད་དོན་གླེང་སློང་ཇི་བྱུང་དང་། དེ་བཞིན་ཡོང་གྱུར་གྱི་མཛད་འཆར་ཁག་གཅིག ལྷག་པར་འདི་ཚེས་ ༢༨ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དྭགས་ཁུལ་དུ་ཆིབས་བསྒྱུར་མཛད་འཆར་སོགས་དང་འབྲེལ་ནས་བཅར་འདྲི་ཞུས་ཡོད་པས་གོང་གི་སྒྲ་སྒམ་ནས་གསན་ཐུབ། རྩ་བའི་སྤྱི་འཐུས་རྣམ་པ་གཉིས་ཀྱི་མཛད་འཆར་ལྟར་ན། འདི་ཚེས་ ༢༢ ནས་ ༢༣ བར་ཤྲི་ན་སྒར་ཁུལ་དུ་ལས་རིམ་བསྐྱངས་ཡོད་པ་དང་། ཕྱི་ཚེས་ ༢༤ ནས་ ༢༥ བར་དཀར་འཁྱིལ་ཁུལ་ལ་ལས་རིམ་ཡོད་པ། དེ་བཞིན་ཕྱི་ཚེས་ ༢༦ ནས་ ༢༨ བར་ལ་དྭགས་སླེ་ཁུལ་ལ་ལས་རིམ་ཡོད་པ། ཕྱི་ཚེས་ ༢༩ ནས་ཕྱི་ཟླ་ ༧ པའི་ཚེས་ ༤ བར་ལ་དྭགས་བྱང་ཐང་ས་ཁག་དགུ་ལ་ལས་རིམ་ཡོད་པ་མ་ཟད། ཕྱི་ཟླ་ […] The post གཞུང་འབྲེལ་འཚམས་གཟིགས་ཁྲོད་ཇ་མུ་ཀ་ཤི་མིར་སྤྱི་ཁྱབ་བློན་ཆེན་མཆོག་དང་མཇལ་འཕྲད། appeared first on vot.

ཁ་ཉིན་ཕྱི་ཚེས་ ༢༢ ནས་འགོ་འཛུགས་ཀྱིས་བཞུགས་སྒར་དུ་རྟེན་གཞི་བྱས་པའི་འགྲོ་ཕན་བོད་ཀྱི་སྨན་རྩིས་ཁང་གི་ཚོགས་ཁང་དུ།  ཨ་རིའི་ཨེ་མོ་རིའི་སྨན་གྱི་མཐོ་སློབ་དང་འགྲོ་ཕན་བོད་ཀྱི་སྨན་རྩིས་མཐོ་སློབ་ཁང་གི་དབར་ཤེས་ཡོན་བརྗེ་ལེན་གྱི་ཟབ་སྦྱོང་ཐེངས་བཅུ་པ་འཚོག་བཞིན་པ་དང་།  ཐེངས་འདིའི་ཟབ་སྦྱོང་ཐོག་གཙོ་བོ་སྨན་གྱི་ཆེད་སྦྱོང་དང་འབྲེལ་བའི་ཉམས་ཞིབ་གནང་སྟངས་དང་། སེམས་ནད་བཅོས་ཐབས།  མ་ཟད་ནད་ཡམས་དཔྱད་རིགས་སོགས་ཀྱི་སྐོར་ཤེས་ཡོན་བརྗེ་ལེན་གནང་རྒྱུ་དང་།  ཟབ་སྦྱོང་དེ་བཞིན་གནངས་ཕྱི་ཚེས་ ༢༦ བར་འཚོག་གི་ཡོད་པ་རེད་འདུག དེ་ཡང་འདི་གའི་གསར་འགོད་པས་འགྲོ་ཕན་བོད་ཀྱི་སྨན་རྩིས་ཁང་གི་སློབ་སྤྱི་གཞོན་པ་དང་ཤེས་ཡོན་བརྗེ་ལེན་གྱི་ལས་གཞི་འདིའི་འབྲེལ་མཐུད་པ་རྣམ་གྲོལ་ལྷ་མོ་ལགས་སུ་བཀའ་འདྲི་ཞུས་པར་ཁོང་གིས།  ཐེངས་འདིའི་ཟབ་སྦྱོང་ཐོག་ཨེ་མོ་རིའི་སྨན་གྱི་མཐོ་སློབ་ནས་རྒྱབ་ལྗོངས་མི་འདྲ་བའི་ཆེད་ལས་པ་ ༣ དང་སློབ་མ་ ༢ ཕེབས་ཡོད་པ་དང་།  ཆེད་ལས་པ་རྣམས་ནས་རང་སོ་སོའི་ཤེས་ཡོན་གྱི་རྒྱབ་ལྗོངས་དང་འབྲེལ་ཏེ་འགྲོ་ཕན་བོད་ཀྱི་སྨན་རྩིས་མཐོ་སློབ་ཁང་གི་སློབ་མ་ཚོར་སྨན་རྩིས་དང་བཅོས་ཐབས་ཀྱི་བརྗོད་གཞི་འདྲ་མིན་ཐོག་གླེང་སློང་གིས་སློབ་ཁྲིད་གནང་བཞིན་ཡོད་པ་མ་ཟད།  ད་རེས་ཀྱི་ཤེས་ཡོན་བརྗེ་ལེན་འདིའི་ནང་འགྲོ་ཕན་བོད་ཀྱི་སྨན་རྩིས་མཐོ་སློབ་ཁང་གི་དགེ་རྒན་ ༡༠ གྲངས་ཤིག་དང་ཆེད་སྦྱོང་ལོ་རིམ་འདྲ་མིན་གྱི་སློབ་མ་ཁྱོན་བསྡོམས་པའི་ ༤༥ ནས་མཉམ་ཞུགས་གནང་བཞིན་ཡོད་པ་གསུངས་སོང་ལ།  ད་བར་ལས་གཞིའི་འདིའི་ནང་མཉམ་ཞུགས་གནང་མཁན་གྱི་ཨེ་མོ་རིའི་སྨན་གྱི་མཐོ་སློབ་ཀྱི་དགེ་རྒན་དང་སློབ་མ་ཚང་མས་ཉམས་མྱོང་གསར་པ་ཞིག་དང་ཤེས་རྒྱུ་མང་པོ་ཡོད་པ་འགྲེལ་བརྗོད་གནང་གི་འདུག་ཅེས་གསུངས་སོང་།  ཐེངས་འདིའི་ཤེས་ཡོན་བརྗེ་ལེན་གྱི་ཟབ་སྦྱོང་གི་ལས་རིམ་ལ་གཞིགས་ན།  སེམས་ནད་སོགས་ཀྱི་བརྗོད་གཞིའི་ཐོག་ནུབ་ཕྱོགས་པ་དང་བོད་ཀྱི་གསོ་བ་རིག་པའི་ངོས་ནས་ལྟ་སྟངས་དང་བཅོས་ཐབས་བཅས་ཀྱི་སྐོར་མཁས་པའི་གཏམ་བཤད་དང་།  ཕན་ཚུན་གྲོས་བསྡུར།  ནད་པའི་གནས་ཚུལ་སྙན་སེང་།  དེ་བཞིན་རྩོམ་ཡིག་ཀློག་རྒྱུ་དང་དཔྱད་ཞིབ།  བཅོས་ཐབས་བྱ་སྟངས།  སྨན་བཅོས་ཀྱི་གཞི་རྩའི་ཚན་རིག་སོགས་ཡོད་པ་རེད་འདུག རྩ་བའི་ཨ་རིའི་ཨེ་མོ་རི་གཙུག་ལག་སློབ་ཆེན་གྱི་ཁྱབ་ཁོངས་སུ་ཡོད་པའི་ཨེ་མོ་རིའི་སྨན་གྱི་མཐོ་སློབ་དང་འགྲོ་ཕན་བོད་ཀྱི་སྨན་རྩིས་མཐོ་སློབ་ཁང་གི་དབར་མཉམ་འབྲེལ་གྱི་ཤེས་ཡོན་བརྗེ་ལེན་གྱི་ལས་གཞི་དེ་ཉིད་ཕྱི་ལོ་ ༢༠༡༣ ལོར་འགོ་འཛུགས་གནང་བ་ཞིག་ཡིན་པ་དང་།  ད་བར་ལས་གཞི་འདིའི་ནང་ཨེ་མོ་རིའི་སྨན་གྱི་མཐོ་སློབ་ནས་དང་བླངས་ཐོག་རྒྱབ་ལྗོངས་མི་འདྲ་བའི་དགེ་རྒན་ཆེད་ལས་པ་ ༢༤ ཙམ་དང་སློབ་མ་ ༢༠ ལྷག་བཞུགས་སྒར་དུ་ཆེད་ཕེབས་ཀྱིས་འགྲོ་ཕན་བོད་ཀྱི་སྨན་རྩིས་མཐོ་སློབ་ཁང་གི་སློབ་མ་དང་དགེ་རྒན་དབར་འབྲེལ་ཡོད་བརྗོད་གཞི་ཁག་གཅིག་གི་ཐོག་ཕན་ཚུན་སློབ་ཁྲིད་དང་ཤེས་ཡོན་བརྗེ་ལེན་གནང་ཡོད་པ་གསུངས་སོང་།  The post ཨེ་མོ་རིའི་སྨན་གྱི་མཐོ་སློབ་དང་འགྲོ་ཕན་བོད་ཀྱི་སྨན་རྩིས་མཐོ་སློབ་ཁང་དབར་ཤེས་ཡོན་བརྗེ་ལེན་གྱི་ཟབ་སྦྱོང་ཐེངས་བཅུ་པ་འཚོག་བཞིན་པ། appeared first on vot.

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ཨ་རིའི་ནང་དུ་གཞུང་འབྲེལ་ཕྱོགས་ཕེབས་ཁྲོད། ཨ་རིའི་རྒྱལ་ས་ Washington DC  ཝ་ཤིང་ཊོན་ཌི་སི་ཁུལ་གྱི་བོད་མི་རྣམས་ལ་གསུང་བཤད་དང་དྲི་བ་དྲིས་ལན་གྱི་ལས་རིམ་ཐོག་སྲིད་སྐྱོང་མཆོག་གིས། རྒྱ་ནག་གི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཡིག་དེ་ཁྲིམས་འགལ་ཡིན་པ་དང་། དབུ་མའི་ལམ་གྱི་སྲིད་བྱུས་མུ་མཐུད་རྒྱུན་སྐྱོང་གནང་བཞིན་ཡོད་པ་སོགས་གསུངས་ཏེ། བོད་ཕྲུག་རྣམས་ལ་བོད་མི་རིགས་ཀྱི་འདུ་ཤེས་སྐྲུན་རྒྱུར་སོ་སོའི་ནང་ནས་འགོ་འཛུགས་བྱ་དགོས་པ་ནན་བརྗོད་གནང་འདུག དེ་ཡང་སྐབས་དེར་སྲིད་སྐྱོང་མཆོག་གི་མང་ཚོགས་ལ་གསུང་བཤད་གྲུབ་མཚམས་དྲི་བ་དྲིས་ལན་གྱི་ལས་རིམ་ཁྲོད། མང་ཚོགས་ཁག་གཅིག་གིས་ཡོང་རྒྱུའི་ཕྱི་ཟླ་ ༧ ཚེས་ ༡ ཉིན་རྒྱ་གཞུང་གིས་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཡིག་ལག་བསྟར་བྱ་རྒྱུ་ཡིན་པ་དང་འབྲེལ་ནས། བོད་པའི་སྤྱི་ཚོགས་ཁྲོད་ཁྲིམས་ཡིག་དེས་དེ་སྔོན་བོད་མིའི་སྒྲིག་འཛུགས་ནས་རྒྱ་ནག་ལ་སྟོན་པའི་བོད་མི་ཡོངས་ལ་མིང་དོན་མཚུངས་པའི་རང་སྲིད་རང་སྐྱོང་གི་ཡིག་ཆའི་གཞི་རྩ་མེད་པ་བཟོས་སྐོར་བརྗོད་ཀྱི་ཡོད་པའི་ཐོག་ལ་དགོངས་བཞེས་གནང་ཕྱོགས་བཀའ་འདྲི་ཞུས་པར། སྲིད་སྐྱོང་མཆོག་གིས་འདི་ལོའི་ཕྱི་ཟླ་ ༣ པའི་རང་རེའི་གྲོས་ཚོགས་ནང་བཀའ་ཤག་གི་གྲོས་ཆོད་ཅིག་བསྣམས་ཡོད་པ་དེའི་ནང་། ཁྲིམས་ཡིག་དེ་ནི་བཟང་སྤྱོད་དང་འགལ་བ་མ་ཟད་ཁྲིམས་དང་འགལ་ཡོད་སྐོར་ཐེར་འདོན་གནང་ཡོད་པ་དང་། ད་ལྟའི་ཆར་རྒྱ་ནག་གི་ལག་བསྟར་བྱེད་བཞིན་པའི་རྩ་ཁྲིམས་དེ་ནི་ཕྱི་ལོ་ ༡༩༨༢ ལོར་གཏན་འབེབས་བྱས་པ་དེ་ཡིན་ཞིང་། ཁྲིམས་དེའི་ཆ་རྐྱེན་ཞིག་གི་འོག་ནས་ས་གནས་མི་རིགས་རང་སྐྱོང་གི་ཁྲིམས་ཞེས་པ་ཞིག་བཟོས་ཡོད་པ་དང་། ཁྲིམས་འདི་ད་ལྟའི་ཆར་རང་འཇག་གནས་ཡོད་པ། ལྷག་པར་མ་འོངས་པར་འབྲེལ་མོལ་སླར་གསོ་བྱུང་ཚེ་ཕྱི་ལོ་  ༢༠༠༨ ལོར་བསྟན་པའི་ཡིག་ཆར་གཞི་བཞག་བྱ་དགོས་མིན་ཐད་གཏན་འཇག་ཐབས་བྱུས་འཆར་འགོད་ཚོགས་ཆུང་དང་ལམ་སྟོན། གོ་བསྡུར་ཞུས་ཏེ་འགྲོ་ལུགས་གཞིར་བཟུང་ཐག་གཅོད་བྱེད་རྒྱུ་ཡིན་པ་གསུངས་འདུག དེ་བཞིན་རྒྱ་ནག་དང་ལྷན་དུ་སྒོ་རྒྱབ་ཀྱི་འབྲེལ་བ་དེ་༸གོང་ས་མཆོག་གདན་འདྲེན་ཞུ་རྒྱུ་དང་ཡང་ན་བོད་མིའི་སྒྲིག་འཛུགས་དང་ཐད་ཀར་བཀའ་མོལ་གནང་གི་ཡོད་པའི་གནད་དོན་སྐོར་བཀའ་འདྲི་ཞུས་པར་སྲིད་སྐྱོང་མཆོག་གིས། སྒོ་རྒྱབ་ཀྱི་འབྲེལ་བ་མུ་མཐུད་ཡོད་པ་དང་། དེའི་སྐོར་ད་བར་ཞུས་དགོས་འོས་རིགས་རྣམས་ཞུས་ཟིན་པ་དང་། རྒྱ་ནག་ཕྱོགས་ནས་སྒོ་རྒྱབ་ཀྱི་འབྲེལ་བའང་ཡོད་ཅེས་བཤད་ཆོག་གི་མེད་སྐོར་བརྗོད་ཀྱི་ཡོད་ཅིང་། དེ་འབྲེལ་ཞིབ་ཕྲ་ད་ལྟའི་ཆར་ཞུ་རྒྱུའི་དུས་ཚོད་མིན་པར་དེས་ཕན་ལས་གནོད་ཆེ་བ་ཡོང་རྒྱུ་ཡིན་པར་བརྟེན། དེ་སྔོན་ཞུས་པ་བཞིན་ད་ལྟའི་ཆར་ཐུགས་ཕན་གསོས་པ་དེ་འདྲ་གང་ཡང་མེད་ཅེས་པ་དེས་༸གོང་ས་མཆོག་བོད་དུ་གདན་འདྲེན་ཞུ་རྒྱུ་དང་བོད་རྒྱ་འབྲེལ་མོལ་ལ་ཐུགས་ཕན་གསོས་པ་མེད་ཅེས་པའི་གོ་དོན་ཡིན་པར། གང་ལྟར་འབྲེལ་བ་བཞག་དགོས་ཀྱི་ཡོད་པར་༸སྐུ་མདུན་གྱི་ལམ་སྟོན་གཞིར་བཟུང་བརྟན་པོ་དང་ལྷིང་པོའི་ཐོག་འགྲོ་བཞིན་ཡོད་པ་ནན་བརྗོད་གནང་འདུག ད་དུང་མང་ཚོགས་ཁྲོད་ཕྱི་རྒྱལ་ནང་དུ་གནས་འཁོད་བོད་མི་མང་པོ་ཡོད་ཅིང་། བོད་མིའི་སྒྲིག་འཛུགས་ལ་ཨ་རི་ནས་ཐོབ་པའི་རོགས་དངུལ་ཁག་གཅིག་ཨ་རིས་གཙོས་པའི་ཕྱི་རྒྱལ་ཡུལ་གྲུ་ཁག་གི་བོད་མི་ཐོག་རོགས་རམ་གནང་དགོས་པའི་གནད་དོན་ཐད་ཞུས་པར་སྲིད་སྐྱོང་མཆོག་གིས། ཨ་རི་གཞུང་གིས་རོགས་དངུལ་གནང་བའི་སྐབས་ཡིག་ཆར་ཚིག་གཞི་ཇི་འཁོད་ལྟར་འགྲོ་དགོས་ཀྱི་ཡོད་སྟབས། དེ་སྔོན་ཨ་རིའི་གྲོས་ཚོགས་ཀྱི་བཀའ་འཁྲོལ་ཡོད་པའི་ཚིག་གཞིའི་ནང་ལྷོ་ཨེ་ཤི་ཡ་ཞེས་གསལ་ཡོད་པར་ད་ལྟའི་ཕྱི་ལོ་ ༢༠༢༦ ལོའི་བཀའ་འཁྲོལ་ཚིག་གཞི་གསར་པ་ཡོད་པ་དང་། དེར་གཞིར་བཞག་སྟེ་རྒྱ་གར་དང་བལ་ཡུལ་ཙམ་མིན་པར་ས་ཁུལ་གཞན་ལ་ཁྱབ་ཐུབ་ཐབས་དང་། ཨ་རིའི་གྲོས་ཚོགས་ཀྱི་དགོངས་པ་ཡོད་པ་གཞིར་བཟུང་འཛིན་སྐྱོང་ནས་ལག་བསྟར་བྱས་ཚེ། ལམ་ཁ་མང་བ་སྒོ་ཕྱེ་ཡི་ཡོད་པ་དང་ཆབས་ཅིག རོགས་དངུལ་བེད་སྤྱོད་གཏོང་ཕྱོགས་ཐད་ཚིག་གཞི་གཞིར་བཟུང་འགྲོ་དགོས་པ་གསལ་བཤད་གནང་འདུག མ་ཟད་དབུ་མའི་ལམ་གྱི་སྲིད་བྱུས་ལས་གཞན་པའི་ཐོག་ནས་བོད་མིའི་འཐབ་རྩོད་གནང་བའི་དུས་ལ་སླེབས་མེད་དམ་ཞེས་བཀའ་འདྲི་ཞུས་པར་སྲིད་སྐྱོང་མཆོག་གིས། ད་ལྟའི་ཐབས་ལམ་དེ་ལས་ཡག་བ་དང་། མྱུར་བ། སྒྲུབ་ཐུབ་རྒྱུ་ཡོད་པ་ཞིག་ཡོད་ཚེ་ཡིན་དང་ཡིན་ཞེས་བསམ་བློ་གཏང་ཆོག་གི་ཡོད་པ་དང་གོ་བསྡུར་བྱེད་ཆོག་གི་ཡོད་ཅིང་། ད་ལྟའི་དབུ་མའི་ལམ་གྱི་སྲིད་བྱུས་དེ་ནི་རྒྱལ་སྤྱིའི་གནས་སྟངས་དང་རྒྱ་ནག་གི་གནས་སྟངས། ལྷག་པར་བོད་ནང་གི་གནས་སྟངས་ལ་གཞིགས་ནས་བཀའ་ཤག་གི་ཐབས་བྱུས་འཛིན་བཞིན་ཡོད་ཅེས་གསུངས་འདུག ཨ་རིས་བོད་མིའི་སྒྲིག་འཛུགས་ལ་བོད་གཞུང་ཞེས་ངོས་འཛིན་བྱ་རྒྱུའི་ཁྲིམས་འཆར་ལྟར་རྒྱ་གར་གཞུང་ནས་བོད་གཞུང་ངོས་འཛིན་གནང་ཐབས་ཀྱི་གནད་དོན་དང་འབྲེལ་ནས། ༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་ས་ཐོག་ཏུ་ཞབས་སོར་འཁོད་རྗེས། སྐབས་དེར་ང་དང་ངའི་བཀའ་ཤག་ག་བ་ཡོད་ན་བོད་གཞུང་དེར་ཡོད་ཅེས་བཀའ་སྩལ་ཡོད་པ་དང་། དེའི་རྗེས་རྒྱ་གར་གཞུང་ནས་བོད་གཞུང་ངོས་ལེན་བྱེད་ཐུབ་ཀྱི་མ་རེད་ཅེས་བརྗོད་ཡོད་པར་ད་ལྟའི་བཀའ་ཤག་གི་ངོས་ནས་དབུ་མའི་ལམ་གྱི་སྲིད་བྱུས་རྒྱུན་སྐྱོང་བའི་ཐོག་ལོ་རྒྱུས་ཀྱི་གནས་བབ་སྐོར་ཤུགས་གནོན་འཕར་མ་སྐྱོན་བཞིན་ཡོད་པ་མ་ཟད། […] The post མི་རིགས་མཐུན་སྒྲིལ་གྱི་ཁྲིམས་ཡིག་ཟེར་བ་དེ་བཟང་སྤྱོད་ཙམ་མ་ཟད་ཁྲིམས་དང་འགལ་བ་ཞིག་ཡིན་པར་སྐྱོན་བརྗོད། appeared first on vot.

Kinnaur Baudh Sewa Sangh འམ་ཁུ་ནུ་ཆོས་འཁོར་གླིང་དགོན་པ་དང་། ཨེ་མོ་རི་ཚན་རིག་དང་སྒོམ་སྒྲུབ་བསྟི་གནས་ཁང་། དེ་བཞིན་ Piramal Foundation པི་རཱ་མལ་ཐབས་རྩ་ཁང་། ཧི་མཱ་ཅལ་གཞུང་གི་ཤེས་རིག་ལས་ཁུངས་ Samagra Shiksha སམགྲ་ཤིཀྵཱ་བཅས་ཐུན་མོང་གི་གོ་སྒྲིག་འོག ཀི་ནོར་རྫོང་གི་རིཀོང་སྤེའུར་ Reckong Peo ནང་དུ་རྟེན་གཞིས་བྱས་པའི་བདག་ཉིད་ཆེན་པོ་གཱན་དྷིའི་སྤྱི་གླིང་དུ། དེ་རིང་ཕྱི་ལོ་ ༢༠༢༦ ཟླ་ ༦ ཚེས་ ༢༢ ཉིན་ཁུ་ནུ་དང་སྤི་ཏི་ཡོད་པའི་གཞུང་དང་སྒེར་གྱི་སློབ་གྲྭ་ཁག་དྲུག་ཅུའི་དབུ་འཛིན་དང་དགེ་རྒན་ཁག་ལ་དམིགས་ནས་སཱི་ཤེས་ཡོན་སློབ་གསོའི་ཟབ་སྦྱོང་འགོ་འཛུགས་གནང་འདུག ཟབ་སྦྱོང་དེ་བཞིན་འདི་ཚེས་ ༢༤ བར་ཉིན་གྲངས་གསུམ་རིང་འཚོགས་བཞིན་ཡོད་ཅིང་། དེ་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་རྗེས་དྲན་དང་། སྐུའི་གོ་སྟོན་བྱམས་བརྩེ་ལོའི་སྲུང་བརྩི་ཆ་ཤས་སུ་གོ་སྒྲིག་གནང་བ་ཞིག་ཡིན་པ་རེད་འདུག དེ་རིང་དབུ་འབྱེད་མཛད་སྒོའི་ཐོག་༸སྐྱབས་རྗེ་སློབ་དཔོན་ཟམ་གདོང་རིན་པོ་ཆེ་མཆོག་གིས་དབུས་པའི་༸སྐྱབས་རྗེ་རྒྱ་བུང་མཆོག་སྤྲུལ་རིན་པོ་ཆེ། ཨེ་མོ་རི་གཙུག་ལག་སློབ་གཉེར་ཁང་གི་ཚན་རིག་དང་སྒོམ་སྒྲུབ་བསྟི་གནས་ཁང་གི་འགན་འཛིན་དང་སཱི་ཤེས་ཡོན་སློབ་གསོའི་གསར་འཛུགས་འགན་འཛིན་འབུམ་རམས་པ་དགེ་བཤེས་བློ་བཟང་བསྟན་འཛིན་ནེ་གཱི་ལགས། སློབ་དཔོན་ཆེན་མོ་ཡུ་ཀི་ཨིམོཊོ་ལགས། ཧི་མཱ་ཅལ་གཙུག་ལག་སློབ་གཉེར་ཁང་གི་རིག་དྲུང་གྱཱན་སཱགར་ནེ་གི་ལགས། སཱི་ཤེས་ཡོན་སློབ་གསོ་བ་བརྩོན་འགྲུས་བསམ་འཕེལ་ལགས། དེ་བཞིན་མཁས་པ་དང་གནད་ཡོད་སྐུ་མགྲོན་གཞན་ཁག་གཅིག་སོགས་ཚོགས་བཅར་བ་བརྒྱ་ལྷག་ནས་མཉམ་ཞུགས་གནང་འདུག སྐབས་དེར་སྐུ་མགྲོན་གཙོ་བོ་༸སྐྱབས་རྗེ་སློབ་དཔོན་ཟམ་གདོང་རིན་པོ་ཆེ་མཆོག་གིས། གསུང་བཤད་གནང་བའི་ཁྲོད་ SEE སྤྱི་ཚོགས་དང་སེམས་མྱོང་། བཟང་སྤྱོད་བཅས་ཀྱི་ཤེས་ཡོན་དེ་ནི་མངའ་སྡེ་དང་རྒྱལ་ཁབ་ཙམ་མིན་པར། འགྲོ་བ་མིའི་རིགས་སྤྱི་ཡོངས་ཀྱི་མ་འོངས་གནས་བབ་དེ་ད་ལྟའི་མི་ཚེ་སྐྱེལ་སྟངས་ལ་རག་ལུས་ཀྱི་ཡོད་སྟབས། གལ་གནད་ཆེན་པོ་ཞིག་ཆགས་ཀྱི་ཡོད་ཅེས་གསུངས་བ་དང་འབྲེལ། ལེགས་གསོ་བསྔགས་བརྗོད་དང་། ཁྱད་པ་དུ་ཀི་ནོར་ས་ཁུལ་ནས་མཁས་པ་མང་པོ་བྱུང་ཡོད་པར་རེ་བ་ཆེན་པོ་ཡོད་ཅེས་གསུངས་འདུག འདི་ག་རླུང་འཕྲིན་ཁང་ནས་ཨེ་མོ་རི་གཙུག་ལག་སློབ་གཉེར་ཁང་གི་ཚན་རིག་དང་སྒོམ་སྒྲུབ་བསྟི་གནས་ཁང་གི་འགན་འཛིན་དགེ་བཤེས་བློ་བཟང་བསྟན་འཛིན་ནེ་གཱི་ལགས་སུ་བཀའ་འདྲི་ཞུས་པར། ད་རེས་ཟབ་སྦྱོང་དེ་ནི་༸རྒྱལ་བའི་གོ་སྟོན་དང་བསྟུན་ནས་གོ་སྒྲིག་ཞུས་པ་གནད་འགག་ཆེན་པོ་ཞིག་ཆགས་ཀྱི་ཡོད་པ་དང་། དེ་བཞིན་༸རྒྱལ་བའི་བཞུགས་གནས་ཧི་མཱ་ཅལ་མངའ་སྡེ་ཆགས་ཀྱི་ཡོད་པར་དེ་སྔོན་ཧི་མཱ་ཅལ་ཤེས་རིག་ལས་ཁུངས་ནས་སཱི་ཤེས་ཡོན་སློབ་གསོ་དེ་སློབ་གྲྭ་ཡོངས་རྫོགས་ནང་རིམ་པས་ལག་བསྟར་ཞུ་རྒྱུའི་ཞལ་བཞེས་གནང་ཡོད་ཅིང་། རིམ་པ་ཁུ་ནུ་ནང་དུ་དེ་འབྲེལ་ལག་བསྟར་བྱ་རྒྱུའི་འཆར་གཞི་ཡོད་པ་མ་ཟད། ཉིན་གསུམ་གྱི་ཟབ་སྦྱོང་དབུ་འབྱེད་མཛད་སྒོའི་ཚོགས་མགོན་དུ་༸སྐྱབས་རྗེ་སློབ་དཔོན་ཟམ་གདོང་རིན་པོ་ཆེ་མཆོག་དབུ་བཞུགས་གནང་བར་རྟེན་འབྲེལ་བཟང་པོ་དང་གལ་གནད་ཆེན་པོ་ཞིག་ཏུ་གྱུར་སོང་ཞེས་འགྲེལ་བརྗོད་གནང་སོང་། ཐེངས་འདིའི་ཟབ་སྦྱོང་ནང་མཁས་དབང་རྣམ་པའི་གསུང་བཤད་དང་། སེམས་མྱོང་སྟངས་འཛིན་དང་འགྲོ་བ་མིའི་བཟང་སྤྱོད་གོང་སྤེལ་གཏོང་ཐབས། སློབ་ཕྲུག་རྣམས་ཀྱི་བློ་རྩེ་གཅིག་སྒྲིམ་གྱི་ཐབས་ལམ། བྱམས་སྙིང་རྗེ་གོང་འཕེལ་གཏོང་ཐབས། འགྲོ་བ་མི་གཅིག་གྱུར་གྱི་འདུ་ཤེས་གོང་འཕེལ་གཏོང་ཐབས་སོགས་ཀྱི་ཐོག་ཟབ་ཁྲིད་གནང་གི་ཡོད་པ་རེད་འདུག […] The post ཁུ་ནུ་ནང་དུ་སློབ་གྲྭའི་དབུ་འཛིན་དང་དགེ་རྒན་རྣམས་ལ་སཱི་ཤེས་ཡོན་གྱི་ཟབ་སྦྱོང་འགོ་འཛུགས། appeared first on vot.

ཁ་ཉིན་ཕྱི་ཟླ་ ༦ ཚེས་ ༢༠ ཉིན་གྱི་ཕྱི་དྲོ་ཕྱག་ཚོད་ ༧ པའི་ཐོག་བཞུགས་སྒར་བོད་ཀྱི་ཟློས་གར་གྱི་ཚོགས་ཁང་དུ།  བོད་ཀྱི་སྲོལ་རྒྱུན་སྒྱུ་རྩལ་བ་ཁྱུང་བྱང་གཞུང་པ་བསོད་ནམས་བཀྲ་ཤིས་ཡོངས་གྲགས་སུ་ཨ་ཇོ་ཌེ་ནི་ལགས་ཀྱིས་བཟོ་བསྐྲུན་གནང་བའི་སྡེ་སྲིད་སངས་རྒྱས་རྒྱ་མཚོས་མཛད་པའི་མིག་ཡིད་རྣ་བའི་དགའ་སྟོན་ལས་མཆེད་པའི་མཆོད་སྤྲིན་གར་རོལ་གྱི་བྱུང་རབས་སྐོར་གྱི་དངོས་བྱུང་གློག་བརྙན་གཟིགས་འབུལ་གྱི་མཛད་སྒོ་འཚོགས་སོང་། དེ་ཡང་མཛད་སྒོའི་ཐོག་སྐུ་མགྲོན་གཙོ་བོར་བོད་མིའི་སྒྲིག་འཛུགས་ཀྱི་ནང་སྲིད་བཀའ་བློན་དཔལ་ལྡན་དོན་གྲུབ་ལགས་གཙོས་པའི་བཀའ་བློན་གཞན་དང་སྤྱི་འཐུས་ཁག་གཅིག་དང་།  ཁྲིམས་ཞིབ་པ་གཞན་མ་ཟད།  ༸སྐྱབས་་རྗེ་སླེ་ལུང་རིན་པོ་ཆེ་དང་།  གཞན་ཡང་བོད་ཀྱི་ཟློས་གར་ཚོགས་པའི་འབྲེལ་ཡོད་ཁག་གཅིག་དང་མི་མང་བཅས་ཁྱོན་མི་གྲངས་བརྒྱ་སྐོར་ཙམ་ནས་མཉམ་ཞུགས་གནང་སོང་། སྐབས་དེ་དུས་འདི་གའི་གསར་འགོད་པས་བོད་ཀྱི་སྲོལ་རྒྱུན་སྒྱུ་རྩལ་བ་བསོད་ནམས་བཀྲ་ཤིས་སམ་ཨ་ཇོ་ཌེ་ནི་ལགས་སུ་བོད་ཀྱི་གར་རོལ་གྱི་བྱུང་རབས་དང་འབྲེལ་བའི་དངོས་བྱུང་གློག་བརྙན་དེའི་སྐོར་བཀའ་འདྲི་ཞུ་སྐབས་ཁོང་གིས།  ལོ་རྒྱུས་རང་བཞིན་ཅན་གྱི་དངོས་བྱུང་གློག་བརྙན་དེས་བོད་ཀྱི་སྲོལ་རྒྱུན་གྱི་གར་དེ་བཞིན་དུས་རབས་ག་དུས་བྱུང་བ་དང་།  སྡེ་པ་གཙང་པ་དང་ཧོར་སྐབས་ཀྱི་བོད་ནང་ས་གནས་མང་པོར་འཁྲབ་སྲོལ་ཡོད་པ་མ་ཟད།  ༸གོང་ས་ལྔ་པ་ཆེན་པོ་སྐབས་ནས་བཟུང་གར་དེ་ཉིད་གཞུང་འབྲེལ་མཛད་སྒོ་ཁག་ཏུ་ཕོ་བྲང་པོ་ཏཱ་ལ་དང་དམིགས་བསལ་གྱི་སྐུ་མདུན་ཆིབས་བསྒྱུར་སྐབས་སུ་འཁྲབ་སྲོལ་ཡོད་པ་སོགས། བོད་ཀྱི་ལོ་རྒྱུས་ཁྲོད་གནད་འགག་ཅན་ཞིག་ཆགས་ཡོད་དུས།  དངོས་བྱུང་གློག་བརྙན་འདི་སྤྱི་ཡོངས་ནས་གར་གྱི་རིག་གནས་མི་ཉམས་རྒྱུན་འཛིན་དང་མ་འོངས་དུས་སུ་གར་སྐོར་ཉམས་ཞིབ་གནང་མཁན་ཚོར་དཔེ་བལྟ་ས་ཞིག་ཏུ་འགྱུར་བར་རེ་བ་དང་བཅས་ཏེ་བཟོ་བསྐྲུན་གནང་བ་ཞིག་ཡིན་པ་གསུངས་སོང་།  ཁ་ཉིན་རེས་གཟའ་སྤེན་པའི་ཉིན་གྱི་མཛད་སྒོའི་ཐོག་བོད་ཀྱི་ཟློས་གར་ཚོགས་པའི་འགན་འཛིན་དོན་གྲུབ་ཚེ་རིང་ལགས་ཀྱིས།  ལྕགས་ཟམ་པ་བོད་ཀྱི་ཟློས་གར་ཚོགས་པ་གསར་འཛུགས་གནང་མཁན་ཁོངས་སུ་ཡོད་པ་སྒྱུ་རྩལ་བ་བསོད་ནམས་བཀྲ་ཤིས་ལགས་ཀྱིས་ལོ་ངོ་བཞི་བཅུ་ལྷག་རིང་བོད་ཀྱི་ཟློས་གར་སྒྱུ་རྩལ་གྱི་རིག་གནས་མི་ཉམས་རྒྱུན་འཛིན་ཐོག་མུ་མཐུད་ཕྱག་ལས་གནང་བར་ཆེ་བསྟོད་ཀྱིས་ཐུགས་རྗེ་ཆེ་ཞུས་གནང་སོང་ལ།   སྐབས་དེ་དུས་སྒྱུ་རྩལ་བ་ཁྱུང་བྱང་གཞུང་པ་བསོད་ནམས་བཀྲ་ཤིས་ལགས་ཀྱིས།  བོད་ཀྱི་ཟློས་གར་ཚོགས་པ་དེ་ཉིད་༸གོང་ས་མཆོག་གིས་ཕུགས་རྒྱང་རིང་པོའི་དགོངས་གཞི་ལས་གལ་ཆེན་དོན་ཆེན་དུ་གཟིགས་ནས་གསར་འཛུགས་གནང་བ་ཞིག་ཡིན་དུས།  གཞུང་དང་མི་དམངས་གཉིས་ཀའི་ངོས་ནས་རིག་གཞུང་ཉར་ཚགས་གནང་མཁན་གྱི་གནད་ཡོད་མི་སྣ་ཇི་ཡོད་རྣམས་ལ་མ་འཆི་གོང་དུ་བརྩི་མཐོང་དང་བདག་པོ་རྒྱག་དགོས་གལ་ཡིན་པ་གསུངས་སོང་། ཁོང་གིས་ད་དུང་ཟླ་སྔོན་མའི་ཕྱི་ཚེས་ ༢༤ ཉིན་འཇར་མཱ་ནིའི་རྒྱལ་ས་སྦར་ལིན་ནང་དུ་སྣ་མང་རིག་གཞུང་འཁྲབ་སྟོན་ཐེངས་ ༣༠ པའི་ཐོག་༸རྒྱལ་བའི་གོ་སྟོན་བྱམས་བརྩེའི་ལོ་སྲུང་བརྩིའི་ཆེད་དུ། འཇར་མཱ་ནི་བོད་རིགས་ཚོགས་པ་མཉམ་ཞུགས་དང་། བོད་ཀྱི་ཟློས་གར་ཚོགས་པས་བོད་ཀྱི་ཐུན་མོང་མ་ཡིན་པའི་རིག་གཞུང་འཁྲབ་སྟོན་གཟིགས་འབུལ་ཞུས་པ་དང་སྦྲགས། ཨང་རིམ་དང་པོ་ཐོབ་ཡོད་པར་བསྔགས་བརྗོད་ཡི་རངས་ཀྱིས་སྐབས་དེའི་དུས་ཀྱི་འཁྲབ་སྟོན་གནང་མཁན་ཚོར་མཇལ་དར་བསྒྲོན་འབུལ་ཞུས་སོང་། ལྷག་པར་དུ་མཛད་སྒོའི་ཐོགས་སྐུ་མགྲོན་གཙོ་བོ་ནང་སྲིད་བཀའ་བློན་དཔལ་ལྡན་དོན་གྲུབ་ལགས་ཀྱིས།  ཟློས་གར་འདིའི་བརྒྱུད་ནས་ཚང་མས་གཞས་མཉམ་དུ་གཏོང་གི་ཡོད་དུས་བོད་པའི་སྐད་དེ་བཞིན་སྒྲ་དག་ཏུ་འགྲོ་ཡག་དང་སྐད་ཕྱུག་ཏུ་འགྲོ་ཡི་ཡོད་པ་བཅས་བོད་ཀྱི་སྐད་ཡིག་སྲུང་སྐྱོབ་ཀྱི་ནང་ནས་གལ་ཆེ་ཤོས་ཤིག་ཆགས་ཀྱི་ཡོད་པ་གསུངས་སོང་ལ།  བོད་ཀྱི་ཟློས་གར་ཚོགས་པ་འདི་ནས་ཐོན་པའི་ཨ་ཇོ་ཌེ་ནི་ལགས་ལྟ་བུ་སྒྱུ་རྩལ་བས་སྐུ་ཚེ་ཧྲིལ་པོར་རང་གི་རིག་གཞུང་དང་སྒྱུ་རྩལ་བློས་མ་བཏང་བར་ཉར་ཚགས་བྱེད་པར་ཆེ་བསྟོད་ཞུས་གནང་སོང་།   མ་ཟད་སྡེ་སྲིད་སངས་རྒྱས་རྒྱ་མཚོའི་མཆོད་སྤྲིན་གར་རོལ་གྱི་བྱུང་རབས་སྐོར་གྱི་དངོས་བྱུང་གློག་བརྙན་གཟིགས་འབུལ་གྲུབ་མཚམས།  བོད་ཀྱི་ཟློས་གར་ཚོགས་པ་དང་སྒྱུ་རྩལ་བ་བསོད་ནམས་བཀྲ་ཤིས་ལགས་ཟུང་འབྲེལ་གྱི་ཐོག་ནས་གཞས་སྣ་འཁྲབ་སྟོན་གྱི་ལས་རིམ་ཞིག་ཀྱང་གཟིགས་མོ་བ་རྣམས་ལ་སྤྱན་འབུལ་ཞུས་སོང་།  The post སྡེ་སྲིད་སངས་རྒྱས་རྒྱ་མཚོའི་མཆོད་སྤྲིན་གར་རོལ་གྱི་བྱུང་རབས་སྐོར་གྱི་དངོས་བྱུང་གློག་བརྙན་གཟིགས་འབུལ། appeared first on vot.

རྒྱ་ནག་གི་ཕྱི་སྲིད་བློན་ཆེན་ Wang Yi ཕྱི་ཚེས་ ༢༡ ཉིན་གྱི་མཚན་མོར་རྒྱ་གར་གྱི་རྒྱལ་ས་ལྡི་ལིར་ BRICS རྒྱལ་སྲུང་སློབ་སྟོན་པའི་ཚོགས་འདུར་མཉམ་ཞུགས་ཆེད་འབྱོར་གྱི་ཡོད་པ་དང་བསྟུན། བོད་ཀྱི་གཞོན་ནུ་ལྷན་ཚོགས་ཀྱི་དབུས་སྤྱི་ཁྱབ་རྒྱུན་ལས་ཁང་ནས་གསར་འགོད་གསལ་བསྒྲགས་ཤིག་སྤེལ་བའི་བརྒྱུད་ Wang གི་ཐེངས་འདིའི་རྒྱ་གར་ནང་གི་ཕྱོགས་བསྐྱོད་ལ་ངོ་རྒོལ་དང་། རྒྱ་གར་ངོས་ནས་བོད་ནང་གི་ཛ་དྲག་གནས་སྟངས་ཐད་རྒྱ་གཞུང་ལ་ངེས་པར་འདྲི་རྩད་གནང་དགོས་པའི་འབོད་སྐུལ་ཞུས་སོང་།  དེའང་རྒྱ་ནག་གི་ཕྱི་སྲིད་བློན་ཆེན་ Wang Yi ཟླ་བ་འདིའི་ཚེས་ ༢༢ དང་ ༢༣ བཅས་ཉིན་གྲངས་གཉིས་རིང་ལྡི་ལི་གསར་པའི་ནང་ BRICS རྒྱལ་ཁབ་རྣམས་ཀྱི་རྒྱལ་སྲུང་སློབ་སྟོན་པའི་ཚོགས་འདུར་མཉམ་ཞུགས་བྱེད་ཀྱི་ཡོད་པ་དང་ལྷག་པར་དུ་ཚོགས་འདུའི་ཁྲོད་རྒྱ་ནག་གི་ཕྱི་སྲིད་བློན་ཆེན་ནས་རྒྱ་གར་གི་སྐུ་ཚབ་ལྷན་བོད་དང་རྒྱ་གར་གྱི་ས་མཚམས་སྐོར་གྲོས་བསྡུར་བྱེད་རྒྱུ་ཡིན་འདུག་པའི་གནས་ཚུལ་ཐོན་གསལ་ལྟར། དབུས་བོད་ཀྱི་གཞོན་ནུ་ལྷན་ཚོགས་ཀྱི་ངོས་ནས་ལས་ཁུངས་ནང་གསར་འགོད་གསལ་བསྒྲགས་ཤིག་སྤེལ་བའི་བརྒྱུད་རྒྱ་གར་དབུས་སའི་གཞུང་ལ་ད་ལན་རྒྱ་གར་དུ་ BRICS ཚོགས་འདུ་སྐོང་ཚོགས་ཞུ་རྒྱུའི་གོ་སྐབས་བྱུང་བར་འཚམས་འདྲི་ཞུས་པ་དེ་ལྟར་ཡང་། དེའི་རྒྱལ་སྲུང་སློབ་སྟོན་པའི་ཚོགས་འདུར་རྒྱ་དམར་སྲིད་གཞུང་གི་ཕྱི་སྲིད་བློན་ཆེན་ཝང་ཡི་ཟེར་བ་ཚོགས་བཅར་བྱེད་ཀྱི་ཡོད་པར་ངོ་རྒོལ་སྐྱོན་བརྗོད་གནང་སོང་།  ལྷག་པར་དུ་བོད་ཀྱི་གཞོན་ནུ་ལྷན་ཚོགས་ནས་དམིགས་བསལ་དོ་སྣང་དང་བློ་འཚབ་བྱེད་དགོས་པ་ཞིག་ནི། དགྲ་བོ་རྒྱ་དམར་སྲིད་གཞུང་གི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་ཞེས་པའི་ཁྲིམས་ཡིག་དེའི་མགོ་སྐོར་འོག་རྒྱ་ནག་རང་གི་བཙན་འོག་ཏུ་གནས་པའི་མི་རིགས་ཁག་གི་མི་མང་རྣམས་ཚུད་ཉེན་ཡོད་ཅིང་། རྒྱ་དམར་སྲིད་གཞུང་གིས་མི་རིགས་མཉམ་བསྲེས་དང་སྐད་ཡིག་མཉམ་བསྲེས། མདོར་ན་མི་རིགས་ཀྱི་ངོ་བོ་རྩ་མེད་དུ་གཏོང་རྒྱུ་སོགས་ལ་བཙན་གྱིས་སྐུལ་འདེད་བྱས་ཏེ་ཡོད་ཚད་ཀྲུང་གོ་ཅན་དང་ཡང་ན་རྒྱ་ནག་ཅན་དུ་བསྒྱུར་རྒྱུར་ཁྲིམས་ཐོག་ནས་འཇིགས་སྐུལ་དང་བཙན་སྐུལ་བྱེད་བཞིན་ཡོད་ཅེས་ནན་བརྗོད་གནང་སོང་།  གསར་འགོད་ལྷན་ཚོགས་མཇུག་སྒྲིལ་མཚམས་གསར་འགོད་པས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་ཚེ་རིང་ཆོས་འཕེལ་ལགས་སུ་ཐེངས་འདིའི་ཚོགས་འདུ་བརྒྱུད་རྒྱ་དཀར་ནག་གཉིས་ལ་བརྡ་ལན་ཇི་ཡོད་བཀའ་འདྲི་ཞུས་པར། ཁོང་གིས་རྒྱ་གར་གཞུང་ངོས་ནས་ BRICS ཚོགས་འདུའི་ཐོག་བོད་ནང་གི་ཛ་དྲག་གནས་སྟངས་ཐད་རྒྱ་གཞུང་ལ་ངེས་པར་འདྲི་རྩད་བྱེད་དགོས་པའི་རེ་འདུན་དང་མཉམ་དུ་རྒྱ་གཞུང་ལ་བོད་མི་རྣམས་ཀྱིས་བོད་ཀྱི་བདེན་མཐའ་མ་གསལ་བར་དུ་ངོ་རྒོལ་སྐད་འབོད་དང་གསལ་འགོད་གསལ་བསྒྲགས་སོགས་པའི་ལས་འགུལ་སྣ་མང་མུ་མཐུད་སྤེལ་རྒྱུའི་ཆོད་སེམས་བརྟན་པོ་ཡོད་ཅེས་གསུངས་སོང་།  The post རྒྱ་ནག་གི་ཕྱི་སྲིད་བློན་ཆེན་གྱི་རྒྱ་གར་ནང་གི་ཕྱོགས་བསྐྱོད་ལ་ངོ་རྒོལ། appeared first on vot.

བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་ནས་བོད་མི་གཙོས་རྒྱ་ཡི་བཙན་འོག་ཏུ་ཡོད་པའི་རྒྱལ་ཁབ་ཁག་གི་མི་རིགས་རྣམས་ནས་རྒྱ་ནག་གི་མི་རིགས་མཐུན་སྒྲིལ་གྱི་ཁྲིམས་ཡིག་ལ་སྣང་མེད་དཀྱུར་འཇོག་མ་བྱས་པར་དེར་ངོས་ལེན་མེད་པ་དང་དགག་པ་མཐའ་གཅིག་ཏུ་ཡོད་པའི་རྣམ་འགྱུར་གསལ་སྟོན་གནང་དགོས་པ་གསུངས་འདུག དེ་ཡང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ད་ཆ་ཨ་རིའི་ཝ་ཤིང་ཌོན་ཌི་སི་རུ་གཞུང་འབྲེལ་འཚམས་གཟིགས་གནང་བཞིན་ཡོད་པ་ལྟར། ཁ་སང་ཨ་རིའི་བོད་ཀྱི་སྐུ་ཚབ་དོན་ཁང་དུ་སྲིད་སྐྱོང་སྤེན་པ་ཚེ་རིང་མཆོག་ནས་རྒྱལ་སྤྱིའི་བོད་ཀྱི་གསར་འགོད་སྒྲིག་འཛུགས་ཀྱི་ཚོགས་མི་དང་ལྷན་དུ་གསར་འགོད་ལྷན་ཚོགས་ཤིག་སྐོང་འཚོགས་གནང་ཡོད་པ་དང་། སྐབས་དེར་བོད་པའི་གསར་འགོད་པ་ཟུར་པ་ཞིག་ནས་ད་ལྟའི་ཆར་ཨ་རིའི་གྲོས་ཚོགས་སུ་བོད་དོན་སྐོར་གྲོས་འཆར་གསར་པ་གཉིས་ཆེད་འདོན་གནང་ཡོད་པ་འགྲེལ་བརྗོད་དང་འབྲེལ། ཁྲིམས་འཆར་འདི་ལྟ་བུ་ཨ་རིའི་གཞུང་གིས་བཙན་བྱོལ་བོད་མིའི་སྒྲིག་འཛུགས་ལ་ངོས་ལེན་གནང་རྒྱུ་ཐག་ཉེ་པོར་འགྲོ་བའི་ལམ་ཁ་ཞིག་ལ་གཟིགས་མིན་དང་དེར་རེ་བ་ཇི་ཡོད་བཅས་ཀྱི་སྐོར་བཀའ་འདྲི་ཞུས་པར། སྲིད་སྐྱོང་མཆོག་གིས་འཛམ་གླིང་རྒྱལ་ཁབ་མང་པོའི་ནང་ནས་བོད་ཐོག་ཁྲིམས་ཡོད་པ་འདི་ཨ་རི་གཅིག་པུ་ཆགས་ཀྱི་ཡོད་པ་དང་། འདི་ཡང་ ༢༠༠༢ ལོར་ཨ་རི་གཞུང་གིས་གཏན་འབེབས་གནང་བའི་བོད་དོན་རྒྱབ་སྐྱོར་གྱི་ཁྲིམས་འཆར་དེ་ཆགས་ཀྱི་ཡོད་པ་དང་དེ་ནས་རིམ་པའི་ཁྲིམས་འཆར་དེར་བསྐྱར་བཅོས་ཀྱིས་ཁྲིམས་འཆར་དང་བོད་རྒྱའི་རྩོད་རྙོག་སེལ་ཐབས་ཀྱི་ཁྲིམས་ཡིག་སོགས་གཏན་འབེབས་བྱུང་བ་མ་ཟད། ཨ་རི་གྲོས་ཚོགས་ཀྱིས་སྔོན་རྩིས་ཁྲིམས་འཆར་ནང་ཆེས་ཐོག་མར་བོད་མིའི་སྒྲིག་འཛུགས་དེ་བཞིན་བཙན་བྱོལ་བོད་གཞུང་ལ་ངོས་འཛིན་གནང་རྒྱུ་ཡིན་པའི་ཚིག་བརྗོད་འཁོད་ཡོད་པ་བཅས་ལུང་འདྲེན་གནང་བ་དང་སྦྲགས། ང་ཚོའི་ངོས་ནས་བོད་མིའི་སྒྲིག་འཛུགས་ལ་གཞུང་འབྲེལ་ངོས་འཛིན་ཐོབ་པར་ད་དུང་ལས་ཀ་བྱེད་རྒྱུ་མང་པོ་ཡོད་པའི་ཐོག་འབད་བརྩོན་གནང་མུས་ཡིན་པ་དང་ལྷག་པར་དུ་ཁྲིམས་འཆར་གསར་པ་དེ་གྲོས་ཚོགས་གོང་འོག་གཉིས་ནང་གཏན་འབེབས་ཐུབ་པར་ཚང་མས་ཧུར་བསྐྱེད་གནང་དགོས་གལ་ཡིན་པ་གསུངས་འདུག དེ་བཞིན་སྲིད་སྐྱོང་མཆོག་གིས་རྒྱ་གཞུང་གི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཡིག་གསར་པའི་མཇུག་འབྲས་ཚབས་ཆེན་སྐོར་དང་འབྲེལ། འདི་ནི་བོད་མི་རིགས་ཀྱི་ཐུན་མོང་མ་ཡིན་པའི་ཆོས་རིག་སྐད་ཡིག་བཅས་པའི་ངོ་བོ་ཡོངས་སུ་རྫོགས་པ་རྩ་མེད་གཏོང་ཐབས་ཀྱི་སྲིད་བྱུས་ངན་པ་ཞིག་ཆགས་ཀྱི་ཡོད་པ་དང་སྲིད་བྱུས་འདི་ཉིད་དངོས་སུ་ལག་བསྟར་ལོ་འགའ་ཤས་སྔོན་ནས་བོད་ནང་གི་བཅའ་སྡོད་སློབ་གྲྭ་སོགས་ཀྱི་ཆ་ཤས་འོག་ནས་བྱེད་བཞིན་ཡོད་པ་དང་། ད་རེས་བྱེད་ལས་དེ་དག་ལ་ཁྲིམས་ཐོག་ནས་ངོས་འཛིན་བྱས་པ་དང་།  ལྷག་པར་དུ་དེའི་ནང་དོན་ཚན་ ༦༣ པ་དེ་བཞིན་རྒྱལ་མཚམས་བརྒལ་བའི་གནས་སྟངས་ཆགས་ཀྱི་ཡོད་སྟབས།  ཉེ་ཆར་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་གི་གཙོ་འཛིན་གྱིས་དབུ་འབྱེད་གཏམ་བཤད་ནང་། རྒྱ་ནག་གཞུང་གིས་བོད་གཙོས་རྒྱ་ཡི་བཙན་འོག་ཏུ་ཡོད་པའི་རྒྱལ་ཁབ་ཁག་གི་ནང་མི་རིགས་དེ་དག་གི་རིག་གཞུང་དང་ངོ་བོ་རྩ་མེད་བཟོ་བའི་སྲིད་བྱུས་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་ཟེར་བ་དེ་མཉམ་འབྲེལ་རྒྱལ་ཚོགས་ཀྱི་ངོས་ནས་བློ་འཚབ་ཆེན་པོ་གནང་གི་ཡོད་པ་དང་སྦྲགས། རྒྱ་གཞུང་གིས་ཁྲིམས་ཡིག་དེ་ཉིད་འཕྲལ་དུ་ཕྱིར་བསྡུ་དང་མཚམས་འཇོག་དགོས་པའི་ནན་བརྗོད་གནང་ཡོད་པ་སོགས་ལུང་འདྲེན་གནང་སྟེ་བོད་མི་གཙོ་བོར་གྱུར་པའི་ཡུ་གུར་དང་སོག་པོ་སོགས་ནས་རྒྱལ་སྤྱིའི་ཐོག་རྒྱ་ནག་གི་མི་རིགས་མཐུན་སྒྲིལ་གྱི་ཁྲིམས་ཡིག་དེར་མོས་མཐུན་མེད་པ་དང་དགག་པ་མཐའ་གཅིག་ཡོད་པའི་རྣམ་འགྱུར་གསལ་སྟོན་གནང་དགོས་པ་གསུངས་འདུག གསར་འགོད་ལྷན་ཚོགས་དེའི་ཐོག་སྲིད་སྐྱོང་མཆོག་ལ་ད་ལྟའི་ཨ་རིའི་གྲོས་ཚོགས་ནང་གི་གཞོན་སྐྱེས་མི་རབས་གསར་པའི་གྲོས་ཚོགས་འཐུས་མི་ཚོ་དང་འབྲེལ་བ་ཇི་ཙམ་གནང་ཐུབ་མིན་སྐོར་བཀའ་འདྲི་གནང་བའི་བཀའ་ལན་དུ། དེ་སྔའི་བཀའ་ཤག་དང་ད་ལྟའི་བཀའ་ཤག་ངོས་ནས་ཨ་རིའི་གྲོས་ཚོགས་ནང་གི་བགྲེས་གཞོན་འཐུས་མི་རྣམས་དང་གང་མང་འབྲེལ་བ་གཏིང་ཟབ་བྱ་རྒྱུའི་འབད་བརྩོན་ཞུས་མུས་ཡིན་པ་དང་ལྷག་པར་བོད་དོན་རྒྱུན་གནས་ཐུབ་པར་གཞོན་སྐྱེས་འཐུས་མི་གསོ་སྐྱོང་གནང་རྒྱུ་དེ་གལ་འགངས་ཆེན་པོར་རྩིས་འཞིན་ཡོད་ཅེས་གསུངས་འདུག དེའི་ཁྲོད་བཙན་བྱོལ་བོད་མིའི་མི་འབོར་ལ་གཞིགས་པའི་ཁེ་ན་ཌར་སྤྱི་འཐུས་ཀྱི་ཞབས་ཀྱག་ལོགས་སུ་དགོས་གལ་གཟིགས་མིན་ཐད་ད་ལྟའི་བཀའ་ཤག་གི་དགོངས་ཚུལ་ཇི་ཡིན་སྐོར་བཀའ་འདྲི་ཞུས་པར། སྲིད་སྐྱོང་མཆོག་གིས་ད་ལྟའི་ཆར་སྐབས་ ༡༧ པའི་བཀའ་ཤག་དང་སྤྱི་འཐུས་སྐབས་ ༡༨ པ་གསར་པ་ཕེབས་གྲུབ་མ་ཐག་ཡིན་པ་སོང་ཙང་ལམ་སེང་སྤྱི་འཐུས་ཀྱི་གྲུབ་གཞི་སོགས་ཀྱི་ཐོག་ལ་བཀའ་མོལ་ཡོང་དཀའ་བ་ཞིག་ཡིན་ནའང་། བཀའ་ཤག་གི་མ་འོངས་བོད་ཀྱི་འགན་སྲུང་ཡིག་ཆ་གཞིར་བཟུང་ལྟར་ན་ང་ཚོས་དུས་དང་གནས་བབ་ལ་དཔག་པའི་མང་གཙོའི་སྒྲོམ་གཞི་དང་སྤྱི་འཐུས་ཀྱི་གྲུབ་ཆ་དག་དངོས་ཡོད་གནས་སྟངས་དང་མཐུན་པའི་འགྱུར་བ་གང་འདྲ་དགོས་མིན་ཐད་བགྲོ་གླེང་བརྒྱུད་ཕྱག་བསྟར་དགོས་པ་འཁོད་ཡོད་ཅེས་དང་བཀའ་ཤག་གི་གཙོ་བོ་འོས་ཀྱི་ཐོབ་ཐང་འདྲ་མཉམ་གྱི་ལམ་བུར་བསྐྱོད་ཐུབ་ཚེ་རྒྱལ་སྤྱིའི་ཐོག་ནས་མང་གཙོ་ཚད་ལྡན་ཇི་ལྟར་ཡོད་མེད་འགྲེལ་བརྗོད་བྱེད་སླ་བ་དང་དེས་བོད་མིའི་སྤྱི་ཚོགས་ནང་མཐུན་ལམ་ལ་ཕན་པ་སོགས་གསུངས་འདུག རྩ་བའི་བོད་མིའི་སྒྲིག་འཛུགས་ཀྱི་སྲིད་སྐྱིང་མཆོག་ད་རེས་ཨ་རིའི་ཝ་ཤིང་ཌོན་ཌི་སི་རུ་གཞུང་འབྲེལ་འཚམས་གཟིགས་གནང་དོན་གཙོ་བོ་ནི། ཨ་རིའི་རོགས་དངུལ་བཀའ་ཁྲོལ་གཏན་འབེབས་ཡོད་པ་རྣམས་ལས་གཞི་གང་དང་གང་ལ་ཐོབ་མིན་ཐོག་གསལ་ཆ་ཡོང་ཆེད་དུ་ཡིན་པ་དང་དེའི་སླད་སྲིད་སྐྱོང་མཆོག་ནས་ཨ་རིའི་གྲོས་ཚོགས་གོང་འོག་གཉིས་ཀྱི་སྔོན་རྩིས་ཚན་པའི་ལས་བྱེད་མཐོ་གྲས་ཁག་གཅིག་དང་ཕྱི་སྲིད་ལས་ཁུངས་ཀྱི་འབྲེལ་ཡོད་ལས་བྱེད་སོགས་དང་མཇལ་མོལ་གནང་འདུག ཤེས་རྟོགས་བྱུང་བར་གཞིགས་ན།  ཟླ་བ་འདིའི་ཚེས་ ༡༥ ཉིན་ཨ་རིའི་ཝ་ཤིང་ཌོན་ཌི་སི་རུ་གཞུང་འབྲེལ་འཚམས་གཟིགས་དབུ་འཛུགས་གནང་ཡོད་པའི་ཁྲོད། ཨ་རི་སྐུ་ཚབ་དོན་ཁང་དུ་ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་ Jim McGovern ལགས་ཀྱི་ལས་བྱེད་རྒན་པ་ཁག་གཅིག་དང་མཇལ་འཕྲད་གནང་སྟེ་བོད་ཀྱི་གནད་དོན་ཁག་སྲིད་བྱུས་དང་ཐག་གཅོད་བརྒྱུད་ནས་གོང་འཕེལ་གཏོང་ཐབས་སྐོར་གླེང་མོལ་གནང་འདུག དེ་རྗེས་སྲིད་སྐྱོང་སྤེན་པ་ཚེ་རིང་མཆོག་གིས་ཨ་རིའི་གྲོས་ཚོགས་ཀྱི་བསྟི་གནས་ཀེ་པི་ཊོལ་ཧིལ་དུ་ཡུལ་དེའི་གྲོས་ཚོགས་འོག་མའི་དགོས་དངུལ་ཆ་བགོས་ཚོགས་ཆུང་གི་ཕྱི་སྲིད་ལས་དོན་དང་། འབྲེལ་ཡོད་ལས་གཞི་བཅས་ཀྱི་ནང་གསེས་ཚོགས་ཆུང་གི་ཚོགས་གཙོ་སྐུ་ཞབས་ (Mario Diaz-Balart) ལགས་ཀྱི་ལས་བྱེད་ (Jamie McCormick) ལགས་དང་མཇལ་འཕྲད་ཀྱིས་བོད་དོན་དང་འབྲེལ་བའི་དངུལ་རྩིས་དང་། བློ་འཚབ་ཆེ་བའི་གནད་དོན། དེ་བཞིན་མ་དངུལ་གྱི་གནད་དོན་བཅས་ཀྱི་ཐོག་གྲོས་མོལ་གནང་ཡོད་པ་རེད། The post བོད་མི་གཙོས་ཡུ་གུར་དང་སོག་པོ་སོགས་ནས་རྒྱ་ནག་གི་མི་རིགས་མཐུན་སྒྲིལ་གྱི་ཁྲིམས་ཡིག་ལ་ངོས་ལེན་མེད་པའི་རྣམ་པ་དུས་དང་རྣམ་པ་ཀུན་ཏུ་བཏོན་དགོས། appeared first on vot.

ཁ་ཉིན་དབྱིན་ཡུལ་གྲོས་ཚོགས་འོག་མའི་ནང་ཡུལ་དེའི་ཕྱི་སྲིད་དྲུང་ཆེ་ལས་རོགས་མཆོག་ལ་བོད་དོན་དང་བོད་ཀྱི་ཁོར་ཡུག་གནད་དོན་ཐོག་འདྲི་རྩད་ནན་པོ་གནང་འདུག   དེ་ཡང་ཁ་ཉིན་ཕྱི་ཚེས་ ༡༦ ཉིན་རྒྱབ་དབྱིན་ཡུལ་གྲོས་ཚོགས་འཐུས་མི་གཉིས་ཀྱིས་ཡུལ་དེའི་ཕྱི་སྲིད་དྲུང་ཆེ་ལས་རོགས་མཆོག་ལ་བོད་དོན་དང་བོད་ཀྱི་ཁོར་ཡུག་གནས་སྟངས་སྤྱིའི་ཐོག་སེམས་འཚབ་དང་འབྲེལ་འདྲི་རྩད་རིམ་པ་གནང་ཡོད་པའི་ཁྲོད། དབྱིན་ཡུལ་གྱི་གྲོས་ཚོགས་འཐུས་མི་དང་བློན་ཆེན་ཟུར་པ་ Kerry McCarthy ལགས་ཀྱིས་བོད་ནང་རྒྱ་ནག་གི་གཏེར་ཁ་སྔོག་འདོན་དང་ཆུ་མཛོད་གསར་རྒྱག་གྱི་ལས་གཞི་ཁག་དང་གནམ་གཤིས་འགྱུར་ལྡོག་དབང་གིས་རྒྱལ་ཁབ་མང་པོར་ཤུགས་རྐྱེན་ཐེབས་སྲིད་པ་འགྲེལ་བརྗོད་ཀྱིས། དབྱིན་ཇི་རྒྱལ་ཁབ་ཀྱིས་རྒྱལ་སྤྱིའི་ཐོག་གནད་དོན་འདི་དག་གང་འདྲ་བྱས་ནས་གླེང་སློང་བྱེད་ཐུབ་མིན་དང་ལྷག་པར་དུ་ས་གནས་བོད་མི་རྣམས་འཛུགས་སྐྲུན་ལས་གཞིའི་གྲོས་མོལ་ནང་མཉམ་ཞུགས་བྱེད་དགོས་པར་ཕྱི་སྲིད་དྲུང་ཆེས་མོས་མཐུན་གནང་གི་ཡོད་མེད་སྐོར་འདྲི་རྩད་གནང་འདུག སྐབས་དེར་ཕྱི་སྲིད་དྲུང་ཆེས་དབྱིན་ཇི་རྒྱལ་ཁབ་ཀྱིས་རྒྱ་ནག་དང་མཉམ་དུ་གནམ་གཤིས་དང་ཁོར་ཡུག་གི་གནད་དོན་ཐད་མུ་མཐུད་གྲོས་བསྡུར་བྱེད་མུས་ཡིན་ཞེས་དང་། ཉེ་ཆར་རྒྱལ་ཁབ་གཉིས་ཀྱི་ཁོར་ཡུག་གྲོས་མོལ་སྐབས་རང་བྱུང་ཁོར་ཡུག་དང་སྐྱེ་དངོས་སྣ་མང་རང་བཞིན་སྲུང་སྐྱོབ་བྱེད་པར་མཉམ་ལས་བྱེད་རྒྱུའི་གྲོས་མཐུན་བྱུང་ཡོད་པའི་ལན་འདེབས་བསྐྱོན་འདུག མ་ཟད་འདྲི་རྩད་ཀྱི་ལས་རིམ་དེའི་ཐོག་དབྱིན་ཡུལ་གྲོས་ཚོགས་འཐུས་མི་དང་གྲོས་ཚོགས་འཐུས་མི་བོད་དོན་རྒྱབ་སྐྱོར་ཚོགས་པའི་ཚོགས་མི་ Ms. Wera Wobhouse ལགས་ཀྱིས་ཀྱང་ཁོང་གཙོས་དབྱིན་ཡུལ་གྲོས་ཚོགས་འཐུས་མི་ཁག་གཅིག་ཉེ་ཆར་བོད་མིའི་སྒྲིག་འཛུགས་ཀྱི་ལྟེ་གནས་བཞུགས་སྒར་རྡ་རམ་ས་ལར་གཞུང་འབྲེལ་གྱི་སྐུ་མགྲོན་ཐོག་ནས་བཅར་རྒྱུ་བྱུང་བའི་མྱོང་བ་འགྲེལ་བརྗོད་དང་འབྲེལ། སྒྲིག་འཛུགས་འདིའི་ངོས་ནས་བོད་ནི་ཕྱི་ཕྱོགས་ཀྱི་མི་སྣ་དང་གནས་ཚུལ་འགྲོ་འོང་ལ་ཕྱོགས་ཡོངས་ནས་བཀག་སྡོམ་བྱས་ཡོད་པར་བློ་འཚབ་གནང་གི་ཡོད་པ་དང་ཕྱི་གསལ་ནང་གསལ་མེད་པའི་གནས་སྟངས་འདིའི་རྐྱེན་གྱིས་བོད་ནང་ཁོར་ཡུག་གི་གནོད་འཚེ་ཚབས་ཆེ་ཐེབས་ཐུབ་པ་དང་དེས་འཛམ་གླིང་ཡོངས་ལའང་ཤུགས་རྐྱེན་ཐེབས་པའི་སྐོར་ལ་ཕྱི་སྲིད་དྲུང་ཆེ་མཆོག་ལ་དོ་སྣང་ཡོད་དམ་ཞེས་བཀའ་འདྲི་གནང་བར། ཁོང་གིས་ལྕམ་སྐུ་ཉིད་ཀྱིས་གནད་དོན་གལ་ཆེན་འདི་བཏོན་པར་ཐུགས་རྗེ་ཆེ་ཞུས་པ་དང་། བོད་ནང་ཁོར་ཡུག་གི་ལས་གཞི་ཆེན་པོ་དག་གི་རྐྱེན་པས་བོད་མི་རྣམས་བཙན་གྱིས་རང་གི་ཕ་མེས་ཀྱི་གྲོང་གསེབ་ནས་གཞན་དུ་གནས་སྤོ་བྱེད་དགོས་པའི་གནས་ཚུལ་ཐོན་པར་ཕྱི་སྲིད་ལས་ཁུངས་ངོས་ནས་བློ་འཚབ་བྱེད་བཞིན་ཡོད་ལ། བློ་འཚབ་ཀྱི་གནད་དོན་འདི་དག་ཐོག་ཁོང་ཚོས་མུ་མཐུད་དོ་སྣང་བྱེད་རྒྱུ་གལ་ཆེན་པོ་ཡིན་ཞེས་གསུངས་འདུག དེའི་ཁྲོད་ཁ་སང་དབྱིན་ཡུལ་གྲོས་ཚོགས་སུ་བོད་མི་དང་བོད་དོན་རྒྱབ་སྐྱོར་བ་མི་གྲངས་ ༢༦ ལས་གྲུབ་པའི་སྐུ་ཚབ་ཚོགས་ཆུང་ཞིག་གིས་གྲོས་ཚོགས་འཐུས་མི་དགུ་ལ་ངོ་བཅར་གྱིས་བོད་དོན་ཞུ་གཏུག་གི་ལས་འགུལ་སྤེལ་འདུག ཞུ་གཏུག་ལས་འགུལ་དེ་བཞིན་དབྱིན་ཡུལ་དང་བླངས་བོད་དོན་ཞུ་གཏུག་ཚོགས་པས་གོ་སྒྲིག་དང་དབྱིན་ཡུལ་རྒྱལ་ཡོངས་འབྲེལ་མཐུད་ལས་ཁང་གི་སྣེ་ཁྲིད་འོག་སྤེལ་འདུག་ཅིང་། དེར་དབྱིན་ཡུལ་སྐུ་ཚབ་དོན་ཁང་དང་རྒྱལ་སྤྱིའི་བོད་དོན་འབྲེལ་མཐུད་ལས་ཁང་། བོད་དོན་ལས་འགུལ་ལྟེ་གནས་ཁང་། དབྱིན་ཡུལ་བོད་དོན་རྒྱབ་སྐྱོར་དང་ས་གནས་ཀྱི་བོད་རང་བཙན་སློབ་ཕྲུག་ཚོགས་པ་གཙོས་དབྱིན་ཡུལ་གྱི་བོད་མི་ཚོགས་པ་བཅས་ཀྱིས་རྒྱབ་སྐྱོར་གནང་ཐོག་དབྱིན་ཡུལ་བོད་ཀྱི་སྐུ་ཚབ་དོན་གཅོད་ཚེ་རིང་དབྱངས་སྐྱིད་ལགས་ལྷན་ཞུགས་གནང་འདུག   དེའི་སྐོར་དབྱིན་ཡུལ་བོད་ཀྱི་སྐུ་ཚབ་དོན་གཅོད་ཚེ་རིང་དབྱངས་སྐྱིད་ལགས་སུ་ཞལ་པར་བརྒྱུད་བཀའ་འདྲི་ཞུས་ཡོད།  ཁ་སང་ལས་འགུལ་གྱི་ཆ་ཤས་སུ། མཉམ་ཞུགས་པ་རྣམས་ཀྱིས་དབྱིན་ཡུལ་གྲོས་ཚོགས་འཐུས་མི་ཁག་བདུན་ཙམ་དང་ཐུག་འཕྲད་གནང་སྟེ། རྒྱ་ནག་གཞུང་གིས་གསར་དུ་གཏན་འབེབས་བྱས་པའི་མི་རིགས་མཐུན་སྒྲིལ་ཡར་རྒྱས་ལ་སྐུལ་འདེད་གཏོང་བའི་ཁྲིམས་ཡིག་ལ་ངོ་རྒོལ་བྱས་ཏེ་དེས་བོད་མིའི་ངོ་བོ་དང་རིག་གཞུང་། སྐད་དང་ཆོས་དད་བཅས་ལ་གནོད་སྐྱོན་ཚབས་ཆེན་གཏོང་གི་ཡོད་པས་ཕྱིར་འཐེན་དགོས་པ་དང་། བོད་ནང་གི་བཅའ་སྡོད་སློབ་གྲྭ་ཁག་གིས་བོད་པའི་བྱིས་པ་རྣམས་རང་གི་རིག་གཞུང་དང་སྐད་ཡིག་ལས་ཁ་བྲལ་དུ་འཇུག་པ་དང་བྱིས་པའི་ཐོབ་ཐང་དང་འགལ་གྱི་ཡོད་པའི་གནས་ཚུལ་སྐོར་གྲོས་ཚོགས་ནང་དྲི་བ་འདོན་དགོས་པ། ལྷག་པར་དུ་༸གོང་ས་སྐུ་ཕྲེང་བཅུ་བཞི་པ་ཆེན་པོ་མཆོག་གིས་ཡང་སྲིད་ངོས་འཛིན་བྱེད་རྒྱུའི་ཐོབ་ཐང་ལ་རྒྱབ་སྐྱོར་གནང་བ་དང་། རྒྱ་ནག་གཞུང་གིས་བརྒྱུད་རིམ་འདིའི་ནང་ཐེ་བྱུས་བྱེད་རྒྱུར་ངོ་རྒོལ་བྱེད་དགོས་པའི་འབོད་སྐུལ་དོན་ཚན་གསུམ་ཆེད་འདོན་གནང་འདུག ཐེངས་འདིའི་བོད་དོན་ཞུ་གཏུག་ཁྲོད་མཉམ་ཞུགས་བ་ཚོས་གྲོས་ཚོགས་འཐུས་མི་ Vicky Foxcroft ལགས་དང་ Laura Kyrke-Smith  ལགས། James Cleverly ལགས། དེ་བཞིན་ Stella Creasy ལ་སོགས་གྲོས་ཚོགས་འཐུས་མི་ཁག་གཅིག་དང་ཐུག་འཕྲད་གནང་བ་མ་ཟད། བོད་ཀྱི་སྐོར་ལ་གྲོས་བསྡུར་གནང་ཐུབ་པ་བྱུང་འདུག དབྱིན་ཡུལ་གྲོས་ཚོགས་འཐུས་མི་རྣམས་དང་ཐུག་འཕྲད་གནང་རྗེས་མཉམ་ཞུགས་པ་རྣམས་ནས་ཡུལ་དེའི་གྲོས་ཚོགས་ཀྱི་ Portcullis House ཚོགས་ཁང་དུ་དབྱིན་ཡུལ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ […] The post དབྱིན་ཡུལ་གྲོས་ཚོགས་ནང་བོད་དོན་དང་བོད་ཀྱི་ཁོར་ཡུག་གནད་དོན་ཐོག་འདྲི་རྩད། appeared first on vot.

སྒྲུབ་བརྒྱུད་བསྟན་པའི་མངའ་བདག་༸དཔལ་རྒྱལ་བའི་དབང་པོ་སངས་རྒྱས་ཀརྨ་པ་ཨོ་རྒྱན་འགྲོ་འདུལ་ཕྲིན་ལ་དབང་གི་རྡོ་རྗེ་མཆོག་བོད་ལུགས་ལྟར་དགུང་གྲངས་ ༤༢ དང་ཕྱི་ལུགས་ལྟར་དགུང་གྲངས་ ༤༡ ལ་ཕེབས་པའི་སྐུའི་འཁྲུངས་སྐར་ཉིན་གང་ཉིད་ཀྱི་གདན་ས་རུམ་བཏེག་དང་བཞུགས་སྟོད་གྲྭ་ཚང་གཙོས་པའི་ཕྱི་ནང་གི་དད་ལྡན་རྣམ་པས་རིན་པོ་ཆེ་མཆོག་གི་འཁྲུངས་སྐར་སྲུང་བརྩི་གཟབ་རྒྱས་ཞུས་ཡོད་པ་རེད། དེ་ཡང་བོད་ཟླ་ ༥ ཚེས་ ༡ སྟེ། ཕྱི་ཟླ་ ༦ ཕྱི་ཚེས་ ༡༦ ཉིན་འབྲས་ལྗོངས་ནང་དུ་རྟེན་གཞིས་བྱས་པའི་༸དཔལ་རྒྱལ་དབང་ཀརྨ་པ་གང་ཉིད་ཀྱི་གདན་ས་རུམ་བཏེག་བཤད་སྒྲུབ་ཆོས་འཁོར་གླིང་དུ་༸སྐྱབས་རྗེ་རྒྱལ་བའི་རྒྱལ་ཚབ་དྲུང་གོོ་ཤྲི་རིན་པོ་ཆེ་མཆོག་དབུ་བཞུགས་ཐོག སྐུ་མགྲོན་གཙོ་བོར་འབྲས་ལྗོངས་མངའ་སྡེ་གཞུང་གི་སྤྱི་ཁྱབ་བློན་ཆེན་ Prem Singh Tamang པྲེམ་སིང་རྟ་མང་མཆོག་དང་དབུས་པའི་མངའ་སྡེ་གཞུང་གི་དགོན་གནས་བློན་ཆེན་བསོད་ནམས་བླ་མ་ལགས། མངའ་སྡེའི་གནད་ཡོད་སྐུ་མགྲོན་གཞན་ཁག་གཅིག་དང་སེར་སྐྱ་མང་ཚོགས་བཅས་ལྷན་ཞུགས་ཐོག་སྐུའི་འཁྲུངས་སྐར་སྲུང་བརྩི་ཞུས་འདུག མཛད་སྒོའི་ཐོག་༸སྐྱབས་རྗེ་རྒྱལ་བའི་རྒྱལ་ཚབ་དྲུང་གོོ་ཤྲི་རིན་པོ་ཆེ་མཆོག་དང་སྤྱི་ཁྱབ་བློན་ཆེན་མཆོག་ནས་༸རྒྱལ་དབང་མཆོག་གི་བཞུགས་ཁྲིར་མཎྜལ་རྟེན་གསུམ་འདེགས་འབུལ་ཞུས་ཡོད་པ་དང་འབྲེལ། ༸སྐྱབས་རྗེ་རྒྱལ་བའི་རྒྱལ་ཚབ་དྲུང་གོོ་ཤྲི་རིན་པོ་ཆེ་མཆོག་གིས་བཀའ་སློབ་གསུང་བཤད་ཁྲོད། ༸དཔལ་རྒྱལ་དབང་ཀརྨ་པ་རིན་པོ་ཆེ་མཆོག་ལ་སྐུའི་འཁྲུངས་སྐར་གྱི་འཚམས་འདྲི་ཞུས་པ་དང་འབྲེལ། སྐུ་ཚེ་ཞབས་པད་བརྟན་པ་དང་ཐུགས་བཞེད་ལྷུན་གྱིས་གྲུབ་པ་མ་ཟད། མྱུར་དུ་གདན་ས་རུམ་བཏེག་བཤད་སྒྲུབ་ཆོས་འཁོར་གླིང་དུ་ཞབས་སོར་འཁོད་ཐུབ་པའི་ཐུགས་སྨོན་ཞུས་འདུག མངའ་སྡེའི་སྤྱི་ཁྱབ་བློན་ཆེན་མཆོག་གིས་༸རྒྱལ་དབང་མཆོག་གི་འཁྲུངས་སྐར་དང་བསྟུན་ནས་དྲ་ཐོག་ཏུ། ད་རེས་འཁྲུངས་སྐར་ཉིན་གང་ཉིད་ཀྱི་གདན་ས་རུམ་བཏེག་ཏུ་༸སྐྱབས་རྗེ་རྒྱལ་ཚབ་དྲུང་གོོ་ཤྲི་སྐུ་ཕྲེང་ ༡༢ པ་དབུ་བཞུགས་ཐོག་བཅར་རྒྱུ་བྱུང་བ་དགའ་ཚོར་དང་བསོད་ནམས་ཆེན་པོ་བྱུང་ཞེས་གསུངས་བ་དང་འབྲེལ། སྐྱེས་འགྲོ་སྤྱིའི་བདེ་ཐབས་དང་འཛམ་གླིང་ཞི་བདེའི་ཆེད་དུ་༸རྒྱལ་དབང་མཆོག་སྐུ་ཚེ་ཞབས་པད་བརྟན་པ་དང་། སྐུའི་འཕྲོད་བཞེས་བཟང་པོ་ཡོང་བ། དེ་བཞིན་ཆོས་ཕྱོགས་ཀྱི་མཛད་པ་རྒྱུན་མཐུད་འགེགས་མེད་ཡོང་བའི་སྨོན་འདུན་ཞུས་འདུག མཛད་སྒོའི་ཐོག་གཞན་ཡང་འབྲས་ལྗོངས་མངའ་སྡེ་དགོས་གནས་དྲུང་ཆེ་ཟུར་པ་ཚེ་མཆོག་གླིང་རིན་པོ་ཆེ་མཆོག་དང་། མངའ་སྡེའི་ཆེས་མཐོའི་ཁྲིམས་དཔོན་ཟུར་པ་བསོད་ནམས་ཕུན་ཚོགས་ལགས་བཅས་ཀྱང་ཕེབས་ཡོད་ཅིང་། ཉིན་རྒྱབ་སྐུའི་འཁྲུངས་སྐར་གྱི་དུས་ཚིགས་ཁྱད་པར་ཅན་དང་འབྲེལ་ནས་དད་ལྡན་མང་ཚོགས་རྣམ་པས་རིག་གཞུང་འཁྲབ་སྟོན་སོགས་ཀྱི་མཛད་རིམ་ཁག་གཅིག་གཉེར་ཡོད་པ་རེད་འདུག ཕྱོགས་མཚུངས་ཁ་སང་བཞུགས་སྒར་གྱི་ཉེ་འདབས་སུ་རྟེན་གཞིས་བྱས་པའི་སྟོད་རྒྱུད་གྲྭ་ཚང་དུ་མཁན་བླ་འདུས་སྤྱི་ཡོངས་ནས་༸དཔལ་རྒྱལ་དབང་ཀརྨ་པ་ཨོ་རྒྱན་ཕྲིན་ལས་རྡོ་རྗེ་རིན་པོ་ཆེ་མཆོག་གིས་སྐུའི་འཁྲུངས་སྐར་སྲུང་བརྩི་གཟབ་རྒྱས་ཞུས་ཡོད་པ་མ་ཟད། དད་ལྡན་དང་དགོན་སྡེ་ཁག་འདྲ་མིན་ནང་གང་ཉིད་ཀྱི་འཁྲུངས་སྐར་སྲུང་བརྩི་ཞུས་ཡོད་པ་རེད། འབྲས་ལྗོངས་ནང་དུ་རྟེན་གཞིས་བྱས་པའི་གདན་ས་རུམ་བཏེག་དགོན་པའི་བཤད་གྲྭའི་མཁན་པོ་སྐལ་བཟང་ཉི་མ་ལགས་སུ་བཀའ་འདྲི་ཞུས་པར་ཁོང་གིས། འབྲས་ལྗོངས་དབུས་གཞུང་ནས་རྒྱ་གར་དབུས་གཞུང་དང་ལྷན་དུ་༸དཔལ་རྒྱལ་དབང་ཀརྨ་པ་རིན་པོ་ཆེ་མཆོག་རྒྱ་གར་ནང་དུ་གདན་འདྲེན་ཞུ་རྒྱུ་ཐད་བཀའ་མོལ་གནང་དང་གནང་བཞིན་ཡོད་པ་མ་ཟད། ས་གནས་མང་ཚོགས་དང་གང་ཉིད་ལ་དད་དམ་ཡོད་མཁན་རྣམ་པས་དེ་མཚུངས་ཀྱི་རེ་བ་ཆེན་པོ་གནང་བཞིན་ཡོད་སྟབས། མྱུར་དུ་རྒྱ་གར་དུ་ཞབས་སོར་འཁོད་པའི་རེ་བ་ཞུ་བཞིན་ཡོད་བཅས་འགྲེལ་བརྗོད་གནང་སོང་། གཞི་རྩའི་༸རྒྱལ་དབང་མཆོག་གི་སྐུའི་འཁྲུངས་སྐར་དང་འབྲེལ་ནས་དཔལ་ཀརྨ་པའི་སྤྱི་ལས་ཁང་ནས་ཕྱི་ལོ་ ༢༠༢༢ ཟླ་ ༥ ཚེས་ ༡༦ ཉིན་གསལ་བསྒྲགས་སྤེལ་དོན་ལྟར། ༸རྒྱལ་དབང་མཆོག་གི་གཞུང་འབྲེལ་འཁྲུངས་སྐར་དུས་ཆེན་བྱེས་སུ་དེ་སྔ་ཕན་ཆད་སྤྱི་ཟླ་ ༦ ཚེས་ ༢༦ ཉིན་སྲུང་བརྩི་ཞུ་སྲོལ་ཡོད་ཀྱང་། འཁྲུངས་ཚེས་འཁྲུལ་མེད་དེ་བོད་ཟླ་ […] The post ༸དཔལ་རྒྱལ་དབང་ཀརྨ་པ་ཨོ་རྒྱན་ཕྲིན་ལས་རྡོ་རྗེ་རིན་པོ་ཆེ་མཆོག་བོད་ལུགས་ལྟར་དགུང་གྲངས་ ༤༢ ལ་ཕེབས་པའི་༸སྐུའི་འཁྲུངས་སྐར་སྲུང་བརྩི། appeared first on vot.

སུད་སི་གྲོང་ཁྱེར་ཇི་ནི་ཝའི་ནང་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༦༢ པ་དབུ་འཛུགས་དང་བསྟུན། སུད་སི་དང་ལིག་ཏེན་སིཊཡན་བོད་རིགས་མི་མང་སྒྲིག་འཛུགས་ཀྱི་གོ་སྒྲོག་འོག་རྒྱལ་ཚོགས་ཀྱི་མདུན་དུ་བོད་མི་རྣམས་ནས་ཞི་བའི་སྐད་འབོད་དང་བོད་དོན་ཞུ་གཏུག་གི་ལས་འགུལ་སྤེལ་འདུག ཁ་སང་སུད་སིའི་གྲོང་ཁྱེར་ཇི་ནི་ཝའི་ནང་དུ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༦༢ པ་དབུ་འཛུགས་གནང་ཡོད་པ་དང་། སྐབས་དེར་སུད་སི་དང་ལིག་ཏེན་སིཊཡན་བོད་རིགས་མི་མང་སྒྲིག་འཛུགས་ཀྱི་ཚོགས་གཙོ་ངེས་སྟོན་རྒྱ་མཚོ་ལགས་ཀྱིས་གཙོས་འབྲེལ་ཡོད་ལས་བྱེད་དང་། ས་གནས་བུད་མེད་ལྷན་ཚོགས། སུད་བོད་མཛའ་འབྲེལ་ཚོགས་པ། ཡུ་རོབ་བོད་ཀྱི་གཞོན་ནུ་མཐུན་ཚོགས། དེ་བཞིན་གྲངས་ཉུང་མི་རིགས་ཁག་གི་སྐུ་ཚབ་དང་རྒྱ་རིགས་ཡེ་ཤུ་ཆོས་ལུགས་ཀྱི་ཚོགས་པ་དང་བོད་མི་སོགས་རྒྱལ་ཚོགས་ཀྱི་མདུན་ཐང་དུ་ལྷན་འཛོམས་གནང་ཐོག་གསར་འགོད་བསྒྲགས་གཏམ་དང་ཞུ་ཡིག་ཅིག་ཕུལ་བའི་བརྒྱུད་རྒྱལ་ཚོགས་ལ་བོད་ཀྱི་གནད་དོན་ཐོག་འགན་འཁུར་ཆེ་ཙམ་བཞེས་དགོས་པ་དང་། བོད་ནང་རྒྱ་ནག་དམར་གཞུང་གིས་འགྲོ་བ་མིའི་ཐོབ་ཐང་བརྡལ་བཤིག་གཏོང་བཞིན་པར་མཚམས་འཇོག་དགོས་པས་ངོ་རྒོལ་སྐད་འབོད་ཀྱི་ལས་འགུལ་སྤེལ་འདུག སྐབས་དེར་སུད་སི་དང་ལིག་ཏེན་སིཊཡན་བོད་རིགས་མི་མང་སྒྲིག་འཛུགས་ཀྱི་ཚོགས་གཙོས་རྒྱ་ནག་གཞུང་གིས་བོད་ནང་ལག་བསྟར་བྱེད་བཞིན་པའི་དྲག་པོའི་སྲིད་བྱུས་ཁག་ཅིག་ཐེར་འདོན་དང་སྦྲགས། ང་ཚོས་བཙན་བྱོལ་ནང་ལས་འགུལ་མུ་མཐུད་སྤེལ་ཏེ། རྒྱ་གཞུང་ལ་གདོང་ལེན་བྱ་རྒྱུ་གལ་ཆེན་པོ་ཡིན་པ་སོགས་གསུངས་པ་མ་ཟད། ད་རེས་ཀྱི་ལས་འགུལ་དང་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༦༢ པ་དབུ་འཛུགས་དང་བསྟུན། རྒྱལ་ཚོགས་ལ་ད་ལྟའི་བོད་ནང་གི་ཛ་དྲག་གནས་སྟངས་དང་འབྲེལ། ངེས་པར་དུ་དགོངས་པ་བཞེས་དགོས་པའི་དོན་ཚན་ཁག་ཅིག་འཁོད་པའི་ཞུ་གཏུག་ཡི་གེ་ཞིག་ཀྱང་ཕུལ་ཡོད་པ་སོགས་གསུངས་འདུག ཁ་སང་སུད་སིའི་གྲོང་ཁྱེར་ཇི་ནི་ཝའི་ནང་དུ་དབུ་འཛུགས་གནང་པའི་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༦༢ པ་འདི་བཞིན་ཟླ་བ་རྗེས་མའི་ཕྱི་ཚེས་ ༧ བར་འཚོག་གནང་གི་ཡོད་ཅིང་། ད་རེས་ཀྱི་ལྷན་ཚོགས་དེ་དང་བསྟུན་ནས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གཙོ་འཛིན་མཆོག་ལ་བོད་དོན་ཞུ་སྙན་ཞིག་ཕུལ་འདུག་པ་མ་ཟད།  གཞན་ཡང་སྐབས་དེར་ལས་འགུལ་ཐོག་ཕེབས་པའི་སུད་སི་ས་གནས་བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་དང་། སུད་བོད་མཛའ་འབྲེལ་ཚོགས་པའི་སྐུ་ཚབ་སོགས་ནས་ཀྱང་རྒྱ་ནག་གཞུང་གི་དམ་བསྒྲགས་སྲིད་བྱུས་འོག་བོད་ནང་གི་བོད་མི་ཚོར་གཞི་རྩའི་འགྲོ་བ་མིའི་ཐོབ་ཐང་མེད་པ་དང་། བོད་པའི་བྱིས་པ་རྣམས་བཙན་དབང་གིས་རང་ཉིད་ཕ་མ་ནང་མི་དང་ཁ་བྲལ་བཏང་སྟེ། རྒྱ་གཞུང་གིས་ཆེད་འཛུགས་བྱས་པའི་གཏན་འཇགས་བཅའ་སྡོད་སློབ་གྲྭར་གཏོང་བཞིན་པ་སོགས་གསལ་འདོན་གྱིས། རྒྱལ་ཚོགས་དང་རྒྱལ་སྤྱིའི་འགོ་ཁྲིད་རྣམས་ནས་བོད་ནང་གི་གནད་དོན་ཐོག་དགོངས་པ་བཞེས་ཏེ་རྒྱ་གཞུང་དེ་བཞིན་འགན་ཁུར་ལྡན་པ་ཞིག་བཟོ་དགོས་པ་གསུངས་འདུག ད་རེས་ཇི་ནི་ཝ་ནང་འཚོག་བཞིན་པའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༦༢ པའི་ཐོག་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་གི་གཙོ་འཛིན་སྐུ་ཞབས་ Volker Turk ལགས་ཀྱིས་གནང་བའི་དབུ་འབྱེད་ཀྱི་གཏམ་བཤད་ནང་། ཉེ་ཆར་རྒྱ་ནག་གཞུང་གིས་བོད་གཙོས་རྒྱ་ཡི་བཙན་འོག་ཏུ་ཡོད་པའི་རྒྱལ་ཁབ་ཁག་གི་ནང་མི་རིགས་དེ་དག་གི་རིག་གཞུང་དང་ངོ་བོ་རྩ་མེད་བཟོ་བའི་སྲིད་བྱུས་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་ཟེར་བ་དེ་མཉམ་འབྲེལ་རྒྱལ་ཚོགས་ཀྱི་ངོས་ནས་བློ་འཚབ་ཆེན་པོ་གནང་གི་ཡོད་པ་དང་སྦྲགས་རྒྱ་གཞུང་གིས་ཁྲིམས་ཡིག་དེ་ཉིད་འཕྲལ་དུ་ཕྱིར་བསྡུ་དང་མཚམས་འཇོག་དགོས་པའི་ནན་བརྗོད་གནང་ཡོད་པ་རེད།  The post རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་དབུ་འཛུགས་དང་བསྟུན་བོད་མིས་ཞི་བའི་སྐད་འབོད་གནང་བ། appeared first on vot.

དེ་རིང་ཕྱི་ལོ་ ༢༠༢༦ ཟླ་ ༦ ཚེས་ ༡༦ ཉིན་བོད་ཀྱི་བསྟན་སྲུང་དྭང་བླངས་དམག་གི་སྒྲིག་འཛུགས་དབུ་བརྙེས་ནས་མི་ལོ་ཧྲིལ་པོ་ ༦༨ འཁོར་བའི་དུས་དྲན་སྲུང་བརྩི་དང་བསྟུན། མི་རབས་གཞོན་པ་རྣམས་ལ་བོད་ཀྱི་ཆོས་དང་རིག་གཞུང་གི་གོ་རྟོགས་གོང་འཕེལ་ཡོང་ཐབས་དང་འབྲེལ། ས་གནས་སོ་སོ་ནས་བོད་ཀྱི་ཆབ་སྲིད་དང་འབྲེལ་བའི་ལས་འགུལ་གང་མང་སྤེལ་དགོས་པའི་འབོད་སྐུལ་ཞུས་སོང་། དེ་ཡང་དེ་རིང་སྔ་དྲོའི་ཆུ་ཚོད་ ༡༡ ཙམ་ལ་རྒྱ་གར་གྱི་རྒྱལ་ས་ལྡི་ལིའི་བོད་སྒར་བསམ་ཡས་གླིང་གི་ཆུ་བཞི་སྒང་དྲུག་དཔའ་བོའི་རྗེས་དྲན་གྱི་ཚོགས་ཁང་ནང་དུས་དྲན་དེ་ཉིད་སྲུང་བརྩི་འགོ་འཛུགས་གནང་སོང་བ་དང་། མཛད་སྒོའི་ཐོག་སྐུ་མགྲོན་གཙོ་བོར་རྒྱ་གར་གྱི་དམག་དཔོན་ཟུར་པ་ Lt Gen V K Chaturvedi མཆོག་གིས་དབུས་པའི་དམིགས་བསལ་སྐུ་མགྲོན་ལྡི་ལི་སྐུ་ཚབ་དོན་གཅོད་ཀྱི་དྲུང་ཆེ་བཀྲ་ཤིས་བདེ་སྐྱིད་ལགས། དེ་བཞིན་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་ཟུར་པ་ཨ་ཅརྱ་ཡེ་ཤེས་ཕུན་ཚོགས་ལགས།  སྤྱི་འཐུས་དཀོན་མཆོག་རིན་ཆེན་ལགས།   རྒྱ་གར་གསར་འགོད་པ་དང་བོད་རིག་པའི་མཁས་པ་ Vijay Kranti ལགས། བོད་སྒར་བསམ་ཡས་གླིང་གི་གཞུང་འབྲེལ་དང་།  གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ་སོགས་ཆེད་ཕེབས་གནང་འདུག དབུ་འབྱེད་ཀྱི་མཛད་སྒོའི་ཐོག་མདོ་ཁམས་ཆུ་བཞི་སྒང་དྲུག་གི་དབུས་སྤྱི་ཁྱབ་དྲུང་ཆེ་ཀརྨ་བསམ་གྲུབ་ལགས་ཀྱིས་དབུས་སྤྱི་ཁྱབ་ལས་ཁུངས་ཀྱི་ཡོངས་ཁྱབ་གསུང་འཕྲིན་སྒྲོགས་སྦྱང་གནང་བའི་ནང་། དེ་སྔོན་ཕྱི་ལོ་ ༡༩༥༨ ཟླ་ ༦ ཚེས་ ༡༦ ཉིན་བོད་ལྷོ་ཁ་ལྕགས་ཚ་གྲི་གུ་ཐང་དུ་རྒྱལ་གཅེས་དཔའ་བོ་ཛ་སག་ཨ་འབྲུག་མགོན་པོ་བཀྲ་ཤིས་མཆོག་གི་དབུ་ཁྲིད་འོག་སྒྲིག་འཛུགས་དེ་ཉིད་འགོ་འཛུགས་གནང་བའི་རྒྱབ་ལྗོངས་ལོ་རྒྱུས་ངོ་སྤྲོད་དང་འབྲེལ།   རྒྱ་དམར་གཞུང་གི་བོད་ས་ཡོངས་རྫོགས་བཙན་བཟུང་གིས་སྤྱི་ནོར་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་དུ་བཙན་བྱོལ་དུ་ཕེབས་དགོས་བྱུང་སྐབས་སྐུའི་ཉེན་སྲུང་གི་ཞབས་འདེགས་རླབས་ཆེན་བསྒྲུབས་པ་མ་ཟད།  སྒྲིག་འཛུགས་དེའི་མི་རབས་རྒན་པ་ཚོས་བོད་བསྟན་སྲིད་མི་རིགས་ཀྱི་ཆེད་དུ་སྙིང་སྟོབས་ལ་ཞུམ་པ་མེད་པར་རྒྱལ་ཁབ་སླར་གསོའི་ཆེད་རྒྱ་དམར་ལ་ཕར་རྒོལ་བྱས་པ་སོགས་ཀྱི་རྗེས་དྲན་ཞུས་སོང་། དེ་བཞིན་གཉན་འཕྲང་གི་ད་ལྟའི་དུས་སྐབས་འདིར་བོད་མི་ཡོངས་ནས་བོད་བསྟན་སྲིད་མི་རིགས་ཀྱི་ཆེད་དུ་ལུས་སྲོག་ལོངས་སྤྱོད་བློས་བཏང་གནང་མཁན་གྱི་དཔའ་བོ་དཔའ་མོ་རྣམས་སྙིང་དབུས་སུ་བཅངས་ཏེ།  ཆོལ་གསུམ་བོད་མི་སྐྱིད་ན་སྐྱིད་མཉམ་དང་སྡུག་ན་སྡུག་མཉམ་ལྟར་ནང་ཁུལ་རྡོག་རྩ་གཅིག་སྒྲིལ་གནང་དགོས་པ་གསུངས་སོང་། ལྷག་པར་མི་རབས་གཞོན་པ་རྣམས་ལ་བོད་ཀྱི་ཆོས་དང་རིག་གཞུང་གི་གོ་རྟོགས་གོང་འཕེལ་ཡོང་ཐབས་དང་། བོད་རྒྱལ་ཁབ་ཀྱི་བདག་དབང་སླར་གསོའི་ནུས་སྟོབས་དང་སེམས་ཤུགས་ཆེར་བསྐྱེད་ཡོང་བའི་སྤོབས་པ་བསྐྲུན་རྒྱུས་གཙོས་སྐབས་བསྟུན་གྱི་འགན་ཁུར་ལྷུར་ལེན་བྱ་རྒྱུ། དེ་བཞིན་ས་གནས་སོ་སོ་ནས་བོད་ཀྱི་ཆབ་སྲིད་དང་འབྲེལ་བའི་ལས་འགུལ་གང་མང་སྤེལ་གནང་ཡོང་བའི་འབོད་སྐུལ་སོགས་ཞུས་སོང་། སྐུ་མགྲོན་གཙོ་བོ་རྒྱ་གར་གྱི་དམག་དཔོན་ཟུར་པ་ Lt Gen V K Chaturvedi མཆོག་ནས་སྐབས་དེར།  བོད་དང་རྒྱ་གར་གཉིས་བར་ལོ་རྒྱུས་ཀྱི་ཐོག་ནས་འབྲེལ་ལམ་ཡོད་པའི་སྐོར་གསུངས་ཏེ།  བོད་དང་རྒྱ་གར་གཉིས་ལ་མི་རིགས་ཀྱི་ལོ་རྒྱུས་དང་།  གཞན་ལ་ངོམས་སུ་ཆོགས་པའི་ཆོས་དང་རིག་གཞུང་།  སྐད་ཡིག་བཅས་ཡོད་པའི་གདེང་སྤོབས་ངེས་པར་དུ་དགོས་པ་དང་།   […] The post མདོ་ཁམས་ཆུ་བཞི་སྒང་དྲུག་བསྟན་སྲུང་དྭང་བླངས་དམག་གི་སྒྲིག་འཛུགས་དབུ་བརྙེས་ཏེ་ལོ་ ༦༨ འཁོར་བའི་དུས་དྲན་སྲུང་བརྩི། appeared first on vot.