Episode 215 as on 18th July 2023

from Guru Shishya Sukhsamwad · host Saurabh Kapoor

Guru Shishya Sukhsamwad as on 18th July 2023तृषार्त जीवांची तृष्णा शमविण्यासाठी पावसाच्या रुपाने देव धावतो. पण केवळ तहानलेल्याला पाणी मिळावे एवढाच त्याचा मर्यादित उद्देश नसतो. तर त्याला सर्व सृष्टीच जलमय करायची असते. देव भरभरून देत असतो पण घेणारा जीव प्यायला पाणी मिळाले म्हणून खुश असतो. त्याच्या या अल्पसंतुष्टपणाची देवाला काळजी वाटत असते. वर्षावामुळे निर्माण झालेल्या जलधारेने सरितेला मिळून सागरापर्यंत यावे व सागराच्या व्यापकतेचा अनुभव घ्यावा ही देवाची तळमळ असते. त्यासाठी सर्वधर्मांचा त्याग करून सद्गुरुंना शिष्यभावाने शरण जावे किंवा जीवाला चिकटलेल्या वासनांचा समूळ नाश करून प्रेमभावाने देवाशी सख्यत्व साधावे असे संतसत्पुरुष सांगत असतात. इदं न मम म्हणता म्हणता ममम् एक आणि एकमेव देवम् असा तुझा भाव व्हायला हव. त्वमेव सर्वम् मम देव देव .अर्थात शरणागती किंवा सख्यत्व साधणे सोपे नाही हे ते जाणून असतात. म्हणून ते कार्यरुपाने नितनाविन्याने प्रकट होत असतात. खरं तर जीवाच्या कल्याणाकरता कार्य करत रहाणे ही त्यांची वृत्ती व प्रवृत्तीच असते. नित्य हे मुलभूत सत्य आहे तर नाविन्य हे त्या नित्याचा अंगभूत आविष्कार आहे. या आविष्काराचे जीवाला आकर्षण असते. पण या नवनवीन आविष्कारांत अडकून न पडता जीवाला नित्याचा ध्यास लागावा म्हणून ते प्रयत्नशील असतात. आधी माझ्याठायी असलेल्या तुला तू बघ .तू मला कसा हवा आहेस हे तुझ्या लक्षात येईल. त्यांना संपूर्ण जीवन समर्पित केलेस तर त्यांना हवा तसा तू घडत जाशील आणि मग तू तुझ्याठायीच्या माझा शोध घे. तुझ्याठायीचा माझा शोध हाच त्या मुलभूत सत्याचा शोध आहे. माझ्या देवत्वाचा शोध आहे. आणि देवत्व म्हणजेच आनंदाचा अनुभव जो मी नित्य घेत आहे आणि तुलाही तो घेता येणे शक्य आहे . तेव्हा लगे रहो .हरी ॐ तत्सत् परमानंद.

NOW PLAYING