台語話恐龍

博幼秉持教育脫貧，讓知識帶希望回家的願景，致力提升偏鄉弱勢孩子的學習，讓孩子未來有選擇職業和生活的能力。  博幼基金會策略主軸  -教育服務  -社工輔導  -畢業生追蹤  提供出身逆境的孩子完整陪伴，教育脫貧懇請大家一同支持❤️  捐款連結▶️ https://fstry.pse.is/8ya8tk —— 以上為 FMTaiwan 與 Firstory Podcast 廣告 —— 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

博幼秉持教育脫貧，讓知識帶希望回家的願景，致力提升偏鄉弱勢孩子的學習，讓孩子未來有選擇職業和生活的能力。  博幼基金會策略主軸  -教育服務  -社工輔導  -畢業生追蹤  提供出身逆境的孩子完整陪伴，教育脫貧懇請大家一同支持❤️  捐款連結▶️ https://fstry.pse.is/8ya8tk —— 以上為 FMTaiwan 與 Firstory Podcast 廣告 —— 58-梁龍(Diplodocus)     Niû-liông，華語號做「梁龍」，in有長長的頷仔頸佮尾溜，若横梁咧，所擺就共號做「梁龍」。這種恐龍是1877年佇美國發現的，in應該是生存佇1億5200萬年前侏羅紀尾期的北美洲。     梁龍誠大隻，身長上長到35米，頷仔頸就佔6米，體重12噸到25噸攏有。In的前跤略仔比後跤較短，四肢跤干焦前跤的第一指有跤爪，這个跤爪有啥物作用，目前猶毋知影。In身軀看起來是水平形的，較早認為梁龍的頭攑袂懸，毋過這陣的研究認為in原仔會使共頭攑懸。In的尾溜誠長，有80節骨頭，強欲是蜀龍的兩倍，這條尾溜可能會使用來捽敵人，抑是發出較大的聲共敵人嚇驚予走，嘛會使平衡in長長的頷仔頸。當當in共重重的尾牚佇塗跤的時，尾溜内底閣有雙叉型的人字骨會當保護血管莫硩歹去。科學家佇1990年發現梁龍一寡皮膚的印痕，顯示in的皮膚凡勢有刺，佮現此時的青杜定差不多，有的閣有鱗，鱗的形體佮大細嘛有誠濟款。     梁龍可能規工攏咧活動，免啥歇睏。較早的科學家認為in蹛佇水裡，因為in的鼻空懸過in的目睭。毋過假使in規身軀攏浸佇水内底，按呢胸坎受著的水壓會傷重，凡勢無法度用鼻空來喘氣。1970年開始，龍跤類恐龍是生活佇陸地的這个理論，已經成做科學家普遍的共識。梁龍主要是食樹皮、較矮的灌木佮羊齒類植物。     梁龍身軀足大，in生活的模樣到底是按怎？一直是科學家推測佮研究的主題，早期有學者認為in是像杜定按呢爬，毋過按呢in的腹肚會佇塗跤䠡出一條溝，這个看法佇發現跤印了後予人推翻矣。In的頭會當攑偌懸嘛有無仝的看法，有學者認為in的頭無法度懸過肩胛頭，毋過2009年的研究，認為in咧警戒的時，會使共頷仔頸攑懸到強欲90度喔。In的頷仔頸遐長，至少需要1噸6的心臟，才有法度共血拍到頭殼頂，凡勢in的頷仔頸遐閣有特殊的結構，幫贊in共血拍起去。梁龍身軀的重心佇較後壁，所擺用兩肢後跤就會當徛起來，甚至in的尾嘛會使鬥牚，按呢in就會當食著11米懸的物件喔。     今仔日的梁龍就講到遮，感謝逐家的收聽。 ------------------------ 攑 gia̍h 硩 teh 歇 hioh ------------------------ 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

博幼秉持教育脫貧，讓知識帶希望回家的願景，致力提升偏鄉弱勢孩子的學習，讓孩子未來有選擇職業和生活的能力。  博幼基金會策略主軸  -教育服務  -社工輔導  -畢業生追蹤  提供出身逆境的孩子完整陪伴，教育脫貧懇請大家一同支持❤️  捐款連結▶️ https://fstry.pse.is/8ya8tk —— 以上為 FMTaiwan 與 Firstory Podcast 廣告 —— 57-迷惑龍（Apatosaurus)     Bê-hi̍k-liông，華語號做「迷惑龍」，號名的意思是「共人欺騙的杜定」，是按怎講共人欺騙咧，因為早期in的尾椎定定予人認做是滄龍類，迷惑龍是佇1877年號名發表的，in應該是生存佇1億5100萬年前侏羅紀尾期的北美洲。     1879年發表一種新的恐龍，號做雷龍，猶毋過佇1903年的時，有科學家認為雷龍佮迷惑龍是仝一種恐龍，先號名的是迷惑龍，所擺雷龍這个名tsua̋n佇科學界消失去，猶毋過佇電影抑是bàng-gà內底，有當時仔原仔會出現雷龍這个名。     迷惑龍的身長26米，體重24~32噸。佮in的身軀比起來，in的頭足細粒的，前跤略仔比後跤較短，猶未大到在的迷惑龍可能會用兩肢後跤來行。In的頷仔頸比馬門溪龍較短較粗，尾溜瘦瘦長長，早期認為in會伸長頷仔頸，去食較懸的樹葉仔，猶毋過這陣的科家認為in的頷仔頸無法度攑遐懸，而且in的心臓凡勢嘛無夠力通共血送去到遐懸的腦內底，所擺in應該干焦食較低的植物。     迷惑龍體型誠大，早期的學者認為in足歹佇陸地共家己的身軀牚起來，所擺認為in凡勢是生活佇有水的所在，一部分的身軀會浸佇水底，尾仔的研究無認同這个看法，認為in應該是佇陸地生活，水壓顛倒會妨害in喘氣。In用啥物方法咧喘氣？科學家猶無定論。假使講in的呼吸系統佮爬蟲類仝款，in毋但無法度共垃儳的空氣排出來，閣會共垃圾的空氣欶入去；假使是佮食乳動物仝款的呼吸系統，按呢每一擺喘氣干焦欶會著41公升的空氣，無夠維持in活落去，所擺in的呼吸系統可能是像鳥仔的呼吸系統，抑是現此時動物界當中攏無的系統。     目前猶無清楚in一工會食偌濟物件，毋過一隻3噸重的大象，一工愛食100公斤以上的食物，按呢一隻30噸的迷惑龍凡勢就愛規工食無停的，才有才調維持性命。     In會靠大龐的體格佮規群做伙行動來保護家已，予敵人毋敢對in下手，嘛會使用in瘦瘦長長、袂輸一條捽仔的尾溜來共敵人趕走，科學家估算in捽尾的時發出來的聲音可能有200分貝，佮大炮發射的聲差不多大聲。     今仔日的「迷惑龍」就講到遮，感謝逐家的收聽。 ------------------------------捽仔sut-á垃儳lâ-sâm欶suh------------------------------ 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

KUMON Podcast《從學會到會學》💙解鎖自學力：化被動為主動💛教養不煩惱：掌握教養關鍵💜超越滿分：榜樣啟發可能❤️教育未來式：AI時代能力趨勢5/18-5/30 免費體驗招生中，立即預約 https://fstry.pse.is/8ynbv8 —— 以上為 FMTaiwan 與 Firstory Podcast 廣告 —— 56-馬門溪龍（Mamenchisaurus）     Má-bûn-khe-liông，華語號做「馬門溪龍」，這種恐龍是1952年佇四川遐咧修公路的時發現的。彼咧所在叫做馬鳴溪，毋過號名的彼个古生物學家講話有腔口差，尾仔tsua̋n記做「馬門溪龍」。In是生活佇1億6000萬年前到1億4500萬年前的侏羅紀尾期。     馬門溪龍有誠濟品種，上大的體長20米，體重45噸，頷仔頸的長度8米到11米左右，上長的有到15米，比遊覽車閣較長，是麒麟鹿的6倍，干焦頷仔頸就佔體長的一半較加，毋過in的頭煞比馬仔的頭較細，假使頭殼佮身軀的比例代表智商的懸低，按呢馬門溪龍凡勢是上戇的動物。     馬門溪龍的頷仔頸總共有19節細塊骨頭接做伙，比其他龍跤類恐龍攏較濟，毋過頷仔頸無扭掠，干焦頭佮頷仔頸相接的所在會當拗彎，主要是靠頭佮肩胛頭的關節來活動。頷仔頸遮爾長，身軀敢接載會牢？科學家透過電腦斷層掃描，發現in的骨頭大部分是空心的，77%是空氣，予身軀袂因為傷重無法度徙位，佮現此時的鳥仔相siâng；另外，為著避免頷仔頸傷荏，兩爿閣有生4米長的骨頭，袂輸架仔按呢來鬥牚。     有科學家推測in一工凡勢需要食300公斤的食物，長長的頷仔頸予in食物件閣較有效率，會使徛咧就食著真濟植物，而且頷仔頸閣會使幫贊in排熱。科學家嘛推測in可能有誠複雜的呼吸系統，凡勢有誠濟氣囊，幫贊in共空氣送迵過長長的頷仔頸入去到肺部。     今仔日的「馬門溪龍」就講到遮，感謝逐家的收聽。 ---------------------- 戇 gōng 肩胛頭 king-kah-thâu 袂輸 bē-su ---------------------- 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

55-蜀龍(shunosaurus)     Sio̍k-liông，華語號做「蜀龍」，是1977年佇四川自貢市發現的，就用四川的古地名「蜀」來共號名。彼个所在是目前誠重要的化石寶地，當初是天然氣公司的工人，發現一副保存誠完整的骨骼化石，坦敧䖙佇塗跤，可能是拄好死無偌久，就予塗沙崁牢咧，是生理結構誠完整的恐龍化石之一，目前化石會當組出94%的蜀龍骨骼。這種恐龍是生存佇1億5900萬年前的侏羅紀尾期。     頭起先科學家推測這種恐龍的身長欲倚11米，毋過佇愈來愈濟化石予人發現了後，蜀龍身長的估算tsua̋n愈短，目前估算的數字是身長9米半，體重3噸彼跤兜。In的頷仔頸短短，顯示in主要是食較低的植物，照in喙的形體來看，in應該適合食大量較粗的植物。     蜀龍的四肢跤差不多平長，因為in的身軀誠重，所擺in干焦會使用四肢跤沓沓仔行，in佮意規群做伙蹛，in的尾溜有一个槌仔，槌仔頂懸有2支5公分長的刺，拄著危險的時，in就會hiù in的尾溜共敵人趕走，保護家已。     四川自貢市遐發現的恐龍化石，有90%是蜀龍，表示in是彼个所在足佔赢的食植物恐龍。佇遐有起一間博物館，保存考古咧挖化石的現場，這區的範圍有1500平方公尺，比9間教室閣較闊喔！是目前全世界上大區有埋化石閣會當予民眾參觀的所在，這个博物館佮美國的恐龍公園、加拿大的恐龍公園，予人呵咾做世界三大恐龍博物館喔！     今仔日的蜀龍就講到遮，感謝逐家的收聽。 ----------------------- 坦敧 thán-khi  䖙 the 扌甩 hiù ----------------------- 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

54-枋龍(Plateosaurus)      Pang-liông，華語號做「板龍」，1834年佇德國發現的，1837年號名發表，號名的意思是「表面平坦的杜定」，就是講in的骨頭足平的。In生活佇2億年前的三疊紀尾期。     枋龍是三疊紀誠有名的恐龍，嘛是歐洲誠四常看會著的恐龍，目前已經發現100副較加的枋龍骨頭。科學家閣佇瑞士挖著一大片有恐龍化石的所在，範圍凡勢超過4公里闊，科學家估算這个所在可能每平方公尺就有一副恐龍化石。是按怎有遮濟化石做伙咧？有科學家認為三疊紀時期，遐的氣候環境若像沙漠，枋龍會規群做伙生活，佇焦燥的土地走揣食物；另外一種解釋是講in無蹛做伙，隨人蹛佇焦燥的懸地，尾仔這片土地做大水，共屍體沖到沙漠外圍較低的所在擠擠做一堆，所擺才會有遮濟恐龍化石積做伙。     成年的枋龍體型有大有細，體長對5米到10米攏有，體重可能超過30噸，猶毋過in的前跤比後跤較短，而且in前跤的跤盤無法度轉踅，嘛無法度鬥牚身軀的重量，所擺in應該是用後跤咧行路，嘛方便in食著較懸的物件。In的前跤有5支指頭仔，第四指、第五指足細，大頭拇的跤爪會使幫贊in共樹椏搝落來，嘛會使保護家己。In有足濟細細粒、葉仔形的喙齒，適合食植物。In凡勢有喙䫌kuai仔，食物件的時會當暫時貯一寡食物佇遐，閣袂影響in哺物件。     1997年佇北海遐咧挖石油的工人，佇海平面下跤2256米的所在挖著化石，經過鑑定，證明是枋龍跤頭趺的化石，所擺枋龍是頭一種佇北海予人發現的恐龍，嘛予人叫做「全世界上深的恐龍」喔！     今仔日的枋龍就講到遮，感謝逐家的收聽。 --------------------- 走揣 tsáu-tshuētsáu-tshē 喙䫌 tshuì-phué 跤頭趺 kha-thâu-u --------------------- 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

53 Lī-óo-hā-liông(Riojasaurus)     Lī-óo-hā-liông，華語號做「里奧哈龍」。這種恐龍是佇阿根廷里奧哈這个所在發現的，所擺就共號做Lī-óo-hā-liông，這个所在發現的Lī-óo-hā-liông化石有20外副喔！In是生活佇2億2千500萬年前三疊紀尾期的南美洲。     In是上早的大型食植物恐龍之一，in凡勢是所有上大型食植物恐龍的祖先。是按怎講是食植物的恐龍，毋是講食草的恐龍咧？因為彼當陣的地球猶未發草，草仔佇地球出現，應該是白堊紀尾期的代誌。彼時的恐龍並無草仔通食，所擺咱就講食植物的恐龍，in主要是食羊齒類植物，就是華語講的「蕨類植物」。     Lī-óo-hā-liông身長6米，體重1噸，頷仔頸佮尾攏瘦瘦長長，前跤佮後跤的長度精差無濟，所擺in應該是用四支跤咧行路較舒適。身軀身足大閣足重，佳哉in龍骨是空心的，會使減輕四支跤的負擔。Lī-óo-hā-liông有誠濟體型較細隻的親情，攏會使用兩支後跤徛起來，去食著較懸的植物，猶毋過Lī-óo-hā-liông傷重，干焦兩支後跤徛袂在。In的尾胴骨嘛誠特别，大部份龍跤類恐龍的尾胴骨是3節，毋過Lī-óo-hā-liông的尾胴骨有4節喔！     頭起先發見Lī-óo-hā-liông化石的時陣，並無發見頭骨，尾仔挖著頭骨了後才確認in喙齒的形體，in的喙齒是葉仔形，邊仔略仔有鋸齒。頂槽頭前干焦5齒，另外有24齒佇後壁，所擺in真有可能直接共食物吞落去，到腹肚内底才沓沓仔消化。In無固定佇啥物時陣會出來活動，毋管是揣食物、搬徒攏無一定是佇日時抑是暗瞑，歇睏的時間干焦一下仔爾爾，規工攏是伊會活動的時間喔！     今仔日的Lī-óo-hā-liông就講到遮，感謝逐家的收聽。 -------------------- 羊齒類 徛袂在 尾胴骨 -------------------- 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

52-科學家拄著諞仙仔——古盜鳥事件     欲研究已經滅絕的物種演化細節，干焦會使透過化石，所擺化石就誠有科學價值。中國政府誠早就共化石定做國家資源，袂當出口。猶毋過中國一寡看會著化石的地層，是佇散赤人的農地，遐的人發現共化石賣去黑市，比艱苦作穡加真好賺，所擺原仔有人會共化石挖去賣。     1997年，中國遼寧省有一个作穡人發現著化石，毋過伊咧挖的過程，無張持共有化石的石枋用碎去，伊紮轉去厝了後，就共幾若塊破碎的化石，黏做一塊敢若誠完整的骨骼化石。1999年，買賣化石的生理人用假的許可證，共彼塊鬥出來的化石，用八萬美金賣去美國。     買彼塊化石的是一間博物館的館長，伊發見化石頂面的生物，佮進前知影的攏無仝，伊頂半身有羽毛，前跤足成原始的鳥仔，尾溜顛倒佮獸跤類恐龍誠相siâng，伊揣幾若个科學家朋友做伙研究，in共這塊化石頂懸的生物，號名做「遼寧古盜鳥」，佇「國家地理雜誌」發表。     毋過這塊化石是對中國違法走私來的，館長的朋友攏勸伊愛還予中國，伊答應欲還轉去，毋過伊希望中國先派專家來參伊做伙研究這塊化石，雖罔這个新物種已經佇雜誌發表矣，不而過伊感覺這塊化石的後跤佮尾溜，若像鬥袂合，心內愈想愈憢疑，想欲揣中國的專家閣進一步確認。     中國的科學家來研究了後，發見這塊化石身軀佮尾溜的敆逝誠明顯，而且方向無對同，化石閣是用足濟塊無仝的石枋，黏佇一塊頁岩頂面，予伊看起來若一塊完整的化石。經過誠濟的研究，確認這是對兩種無仝的生物化石鬥出來的。這件代誌予「國家地理雜誌」感覺足卸世眾的，佇2000年發表對這件代誌的調查報告，共這場騙局做一个結束。     這馬這塊鬥出來的化石原仔囥佇中國展覽，這个騙局嘛提醒逐家毋管做啥物研究，攏著愛誠頂真，才袂脫箠，予人看笑話。     今仔日的「科學家拄著諞仙仔——古盜鳥事件」就講到遮，感謝逐家的收聽。 -------------------------- 散赤 sàn-tshiah 敆逝kap-tsuā 脫箠thut-tshuêthut-tshê -------------------------- 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

51 Ián-tsú-liông(Anzu)      Ián-tsú-liông，華語號做「安祖龍」，Anzu這个詞是美索不達米亞神話内底，一種鳥仔形的惡魔。這種化石是佇美國發現的，2014年號名發表。因為發現這種化石的所在叫「地獄溪」，所擺有人共叫做「對地獄來的雞」。In生活佇66600萬年前的白堊紀尾期。     In是偷卵龍類的恐龍，身長3米到3米半，尻川的懸度1米8，體重200〜300公斤，有長長的頷仔頸佮一米長的尾，前跤跤爪尖尖長長，身軀有羽毛，頭殼頂佮偷卵龍仝款攏有髻。Ián-tsú-liông的髻是這類恐龍當中上大的，若葵扇的形，毋過薄甲若紙咧，所擺袂堪得大力挵著，這个髻上有可能是用來展威佮唌伴侣的。     Ián-tsú-liông生活的所在是佇澹溼閣溫暖的平洋，科學家認為in凡勢真gâu走。In無喙齒，根據in下頦結構推測，in食食的選擇可能誠濟，包括植物、細隻動物佮卵逐項攏食。     科學家咧研究Ián-tsú-liông化石的時，發現其中一隻的箅仔骨有折去閣收束的記號，後跤的跤指頭仔關節有受傷過，遮的傷有可能是相拍造成的，毋過無法度判斷是仝類相爭，抑是為著閃避別種物種的攻擊所留落來的傷痕。     今仔日的Ián-tsú-liông就講到遮，感謝逐家的收聽。 ------------------------------- 地獄 tē-ga̍ktuē-ga̍k 挵 lòng 收束 siu-sok ------------------------------- FB迷眾頁：https://reurl.cc/lNR8x9 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

50-傷齒龍( Troodon)      Siong-khí-liông，華語號做「傷齒龍」、「鋸齒龍」，是1855年佇北美洲發現的，號名的意思是「會共人傷害的喙齒」。In是生存佇7500萬年到6500萬年前的白堊紀尾期。     傷齒龍是一種小型的恐龍，身長2米彼跤兜，懸度1米，體重60公斤。傷齒龍的跤瘦瘦躼躼，應該走誠緊。In的前跤會使像鳥仔的翼仔按呢勼對後壁，跤指頭仔會當共物件扲牢咧。In的頭殼佔身軀的比例，佇恐龍内底算是上大的，所擺傷齒龍予人認為是上巧的恐龍。毋過根據化石年歲判斷，傷齒龍的平均歲數干焦3歲到5歲。      科學家捌佇美國發現傷齒龍的卵岫，内底有10外粒排甲誠整齊的卵，卵岫的直徑欲倚1米，卵較尖的彼片會插入去塗裡。科學家認為傷齒龍可能佮鱷魚仝款有兩个產道，每一擺生兩粒卵，卵的重量差不多半公斤。科學家有發現一隻共5粒以上的卵mooh牢咧的傷齒龍化石，推測伊可能當咧孵卵，研究人員對照這馬鳥仔的慣勢，推測傷齒龍凡勢是公的負責咧孵卵。佇岫內底無幼囝活動的痕跡，所擺傷齒龍可能拄孵出來就會離開 in的岫。     傷齒龍食啥？頭起先科學家認為in會去掠細隻動物來食，毋過看in的下頦佮喙齒的形，佮食植物的恐龍足仝款，有科學家認為傷齒龍前跤的活動度扭掠，閣有遐大的頭腦，遮的特徵佮洗手熊足仝的，凡勢傷齒龍嘛佮洗手熊仝款是啥物攏食的喔！     今仔日的傷齒龍就講到遮，感謝逐家的收聽。 -------------------- 勼 kiu 扲 gîm 扌冒 mooh -------------------- 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

49-伶盜龍(Velociraptor)      Líng-tō-liông，華語號做「伶盜龍」「速龍」、「迅猛龍」，1922年美國的科學家佇蒙古的戈壁沙漠發現這種化石，號名的意思是「伶俐的盜賊」。In生活佇7500萬年到7100萬年前的白堊紀尾期。      伶盜龍的體型倚近火雞，成年的體長2米，尻川的懸度半米，體重15〜20公斤彼跤兜，身軀有羽毛，頭骨25公分，喙齒26齒到28齒，喙齒縫較闊，後齻有鋸齒，大腦的大細佮體重的比例，佇恐龍内底算是誠大的，所擺in應該是真巧的恐龍。      伶盜龍前跤的結構佮現代的鳥仔誠仝形，有三支彎彎利利的跤爪，第二指上長，第一指上短，前跤跤目誠健丢，會當彎向内底共物件掠起來，毋是干焦會使向下跤爾爾。後跤有4指，干焦靠第三指、第四指咧行路，第二指會當向頂懸抑是後壁收起來，袂接觸著塗跤，這指閣有彎彎大大，像鐮歷仔形的跤爪，長度6.5公分，是厲害的武器。      1971年發現一組化石，科學家共in號作「當咧相拍的恐龍」，有保存伶盜龍佮原角龍相拍的狀況，這證明伶盜龍是會去掠其他恐龍的。拄發現這組化石的時，科學家認為in凡勢是予水淹死的，毋過目前的看法in是去予塗沙埋佇内底，毋是沙崙崩去，就是去予沙塵暴崁著的！2011年的研究，認為伶盜龍是佇暗時咧行動的動物，原角龍無固定日時抑是暗時活動，所擺這場7000萬年前的相拍，可能是佇欲暗仔、暗時抑是天拍殕仔光的時陣發生。化石當中，伶盜龍是用伊後跤的大跤爪，揬起去原角龍的嚨喉，科學家認為彼支跤爪可能無法度共獵物的腹肚揬予破，所擺in應該是攻擊獵物的血管抑是肺管這種較薄的所在。      今仔日的伶盜龍就講到遮，感謝逐家的收聽。 FB迷眾頁：https://reurl.cc/oVzeXl 留言告訴我你對這一集的想法： Powered by Firstory Hosting

48-偷螺龍(Conchoraptor)      Thau-lê-liông，華語號做「竊螺龍」，是偷卵龍科的一種，1971年佇蒙古發現的，號名的意思是「海螺仔的竊盜者」。In生存佇6700萬年到7000萬年前的白堊紀尾期。      偷螺龍的體型無大，體長1米到2米，懸度無到1米，體重10公斤到20公斤。In無頭髻，拄發現這種化石的時，科學家當做伊是猶未大到在的偷卵龍，認為in若大隻了後，頭殼頂的髻就會發出來，尾仔發見in前跤的結構佮偷卵龍有誠大的精差，才認定in是一種全新的恐龍。      偷螺龍的喙進化做𠕇𠕇閣金滑的尖喙，咬物件的力頭真飽，會使輕輕鬆鬆就共螺仔的𠕇殼咬予碎。目睭大大蕊，耳空誠利，頷仔頸長長，身體勇壯，雖罔in的尾有比偷卵龍較長一寡，毋過嘛無講加蓋長。In身軀可能有羽毛，前跤短短，後跤較長，應該誠gâu走。      偷螺龍的化石是佇蒙古發現的，彼个時陣遐的氣候較澹，可能有週期性的落雨。陸地上閣有溪流佮湖。偷螺龍凡勢蹛佇倚水的所在，會食水内底的軟體動物，毋過in的食食可能無這呢單純，科學家認為in可能是啥物攏食的恐龍。      科學家佇in蹛的所在彼附近發現足濟化石，有粗殘的食肉恐龍，有温馴的食植物恐龍，偷螺龍會當佇這个所在徛起，穩當有in家己的生存方式，科學家捌佇一个所在，發見超過20隻的偷螺龍化石，證明in是規群做伙生活的喔！      今仔日的「偷螺龍」就講到遮，感謝逐家的收聽。 --------------------- 澹 tâm 單純 tan-sûn 穩當 ún-tàng -------------------- FB迷眾頁：https://reurl.cc/lym5Yq 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

47-偷卵龍(Oviraptor)      thau-nn̄g-liông，華語號做「偷蛋龍」、「竊蛋龍」。化石是佇蒙古發現的，1924年號名發表。In予人號做偷卵龍，因為頭起先是佇一岫恐龍卵的頂懸發現這種恐龍化石，科學家認為遐是原角龍的卵，所擺就認為伊是欲去偷食原角龍的卵，就共號做「偷卵龍」。猶毋過佇1993年考古的時陣發見，當初遐的卵應該是偷卵龍的，伊當咧孵伊家己的卵，毋是欲去偷食別人的卵。雖罔美國古生物學家有佇期刊發表，欲洗清in的冤屈，毋過根據國際動物號名的法規，生物號名了後就無法度閣改矣。      偷卵龍生活佇1億2千500萬年到7000萬年前白堊紀尾期的亞洲佮北美洲。In的體形無大，身長1米8到2米半，體重30〜40公斤，生做佮鴕鳥足仝形，頭細細，頭殼頂噗一个硬掙的髻。In無喙齒，喙佮下頦足有力，佮這馬鸚哥的喙足相仝。      既然in毋是欲偷別人的卵來食，若按呢in是食啥物咧？有科學家認為in下頦有力，會當共𠕇殼咬予碎，所擺凡勢會食有𠕇殼的軟體動物，親像螺仔抑是蚶仔，上新的研究認為in的身軀無法度去鑽水沫，無啥可能去水底食螺仔。In主要的食物應該是植物，毋過嘛捌佇in化石的腹肚內底，發現杜定的骨頭。所擺推測in原仔會食小型動物。      偷卵龍是規群做伙生活，欲生卵的偷卵龍會用塗做一个尖款筍的岫，共卵生佇岫内底，in的的卵形是長株圓的，一个岫内底目前發現上濟的有22粒卵喔！毋過in毋是一擺生足濟粒，in一擺干焦生兩粒，生真濟擺，而且閣會那生那照順序共卵排做一个圓箍仔，誠趣味喔！      今仔日的偷卵龍就講到遮，感謝逐家的收聽。 -------------------- 孵卵 pū-nn̄g 藏水沬 tshàng-tsuí-bī 長株圓 tn̂g-tu-înn ------------------ FB迷眾頁：https://reurl.cc/7dxdRN 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

46-趖爪龍 ( Nothronychus)      Sô-jiáu-liông，華語號做「懶爪龍」，是鐮歷仔龍科的恐龍，這種化石是佇美國西南爿發現的，2001年號名發表，號這个名的意思是「佮樹趖足仝形的跤爪」。In生存佇9000萬年前的白堊紀尾期。      雖罔趖爪龍是獸跤類的恐龍，毋過無像暴龍彼種食肉的恐龍，趖爪龍佮in的近親演化做食植物的恐龍，in是用兩支跤咧行，而且用比in食肉的祖先閣較騰的姿勢咧行。趖爪龍身長4米半到6米，懸度3米到3米6，體重1噸。      趖爪龍的頭細細粒，有足濟齒葉仔形的喙齒，適合共植物切予幼。頷仔頸瘦瘦，前跤長長，足猛掠的，彎彎長長的跤爪有10公分長，腹肚大大，後跤結實，尾溜誠短。      In是佇北美洲頭一種予人發現的鐮歷仔龍科的恐龍，進前的鐮歷仔龍科攏是佇中國佮蒙古發現的。雖罔趖爪龍的化石頂懸無發現羽毛的痕跡，毋過in遐的佇亞洲的近親攏有鳥仔的特徴，而且化石内底有保存羽毛的痕跡，所擺科學家認為趖爪龍凡勢嘛有羽毛，只是in的化石拄好佇無法度保存羽毛的環境造成的。      趖爪龍生存佇有湳仔地的樹林，彼个時代地球的氣候誠溫暖，而且海平面比這馬懸欲200米，焦燥的所在明顯較少，目前發現的恐龍化石罕得是彼个年代的，尤其是佇北美洲，所擺趖爪龍佮相關的發現就變甲誠重要囉！      今仔日的趖爪龍就講到遮，感謝逐家的收聽。 ------------------- 徛予騰 khiā-hōo-thîng 切予幼 tshiat-hōo-iù 焦燥 ta-sò ------------------- FB迷眾頁：https://reurl.cc/4de6oY 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

45-鐮歷仔龍(Therizinosaurus)      Liâm-li̍k-á-liông，華語號做「鐮刀龍」，這種化石是1948年佇蒙古發現的，因為in前跤的跤爪長長彎彎，若鐮歷仔的形，所擺就共號做鐮歷仔龍。In生存佇7000萬年前的白堊紀尾期。      鐮歷仔龍上長有9米6，體重3噸到6噸。拄挖著這種化石的時，發現幾若支長長的跤爪，有75公分長，比大人的手閣較長，毋過彼陣科學家認為in是一種親像龜的大型爬蟲類，身長倚12米，長長的跤爪是欲用來掠魚的，尾仔挖著愈濟化石了後，才認為in是龍盤目獸跤類的恐龍。      雖罔鐮歷仔龍的化石猶未完整，毋過科學家有參考仝科的恐龍來重建in的特徴。In的頭細細粒仔，喙尖尖，頷仔頸長長，尻川斗闊闊，前跤長度2米半，甚至有到3米半。鐮歷仔龍上明顯的特徵是前跤有三支長長的跤爪，中央彼支上長，是目前所知影的動物内底，前跤跤爪上長的一種。      目前猶未發現鐮歷仔龍的頭骨化石，所擺in到底是食啥，猶有足濟討論。有的認為in會用in長長的跤爪，共白蟻的岫挖開來食白蟻；有的認為in體型遮爾大，若欲靠食蟲豸食甲飽，需要誠大的量，所擺無啥可能，而且in的喙齒平平，適合哺植物，凡勢會用in長長的跤爪勾樹葉仔來食。      In的跤爪可能閣有其他的功能，譬論講抵抗欲掠in的動物，抑是仝種的咧爭地盤佮揣伴的時，相拍咧用的。猶毋過2023年有一項研究，認為鐮歷仔龍的跤爪干焦是看媠爾爾，無其他的作用。      今仔日的鐮歷仔龍就講到遮，感謝逐家的收聽。 - - - - - - - - - -  跤爪 kha-jiáu 尻川斗 kha-tshng-táu 媠 suí - - - - - - - - - - FB迷眾頁：https://reurl.cc/Mjo6Wn 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

44-霸王龍(Tyrannosaurus rex)      Pà-ông-liông，華語號做「霸王龍」、「雷克斯暴龍」，英文簡稱T-Rex，號名的意思是「暴君杜定」，in是足有代表性的大型獸跤類恐龍，1892年佇美國中西部發現的兩節龍骨，是第一件出塗的霸王龍化石。In生活佇6500萬年前的白堊紀尾期，是上落尾滅絕的恐龍之一。      幼茈的霸王龍體長4米到5米，體重900公斤，佮一隻細隻象差不多重。成年的霸王龍身長倚13米，體重較加6噸，徛咧的懸度6米，欲到2層樓懸。In大約仔有60齒左右的喙齒，假使喙齒佇拍獵的過程中落去，閣會發一齒新的出來。In的目睭利甲若鴟鴞，鼻仔是好鼻獅，方便in追蹤獵物。      過去有科學家認為霸王龍的前跤傷短，萬不一咧走的時跋倒，凡勢會摔甲足食力閣peh袂起來，所擺主張講霸王龍干焦會用行的，袂主動掠獵物，是食漚肉的恐龍。猶毋過有研究人員佇鴨喙龍化石尾溜的所在，發現有霸王龍的喙齒牢佇遐，推測是彼隻鴨喙龍予霸王龍咬著了後，出力滾躘，共霸王龍的喙齒掣落來，好運無去予霸王龍食去。按呢看起來，霸王龍是會主動掠活咧的獵物。      霸王龍的前跤哪會遮爾短？有學者認為霸王龍會規群去拍獵，前跤較短咧，才袂佇拍獵的時，無細膩去予其他的霸王龍咬著。霸王龍喙齒遐利，下頦遐有力，若予咬著穩當是流血流滴啦！      目前保存上大隻、上完整的霸王龍化石，號名叫「Sue」，伊佇2007年捌來咱台東史前博物館展覽喔！目前保存佇美國芝加哥的博物館。科學家研究伊的化石，推測伊行路的速度差不多一點鐘行15公里，伊死去的時28歳，而且閣判斷伊應該有疼風喔！      今仔日的「霸王龍」就講到遮，感謝逐家的收聽。 - - - - - - - - - - - -  （足百） peh  掣 tshuah 細膩 sè-jī - - - - - - - - - - - - FB迷眾頁：https://reurl.cc/xv4M21 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

43-懼龍(Daspletosaurus)      Khū-liông，華語號做「懼龍」、「惡霸龍」，號名的意思是「驚懼的杜定」，1921年就佇加拿大發現一寡化石，到1970年才號名發表，in生活佇7700萬年到7400萬年前白堊紀尾期的北美洲。      成年的懼龍身長8米到9米，平均體重佇2噸半彼跤兜。頭骨有一米長，成年的懼龍喙齒有60幾齒，每一齒攏足長。佮其他暴龍科的恐龍仝款，in有略仔S型的頷仔頸，共重khuâinn-khuâinn的頭牚咧，前跤短短，干焦兩指，毋過懼龍前跤的長度佮身軀的比例，佇暴龍科當中是上長的。In的後跤粗勇，有4指，第一指無接觸著塗跤。In的尾溜長長重重，會使平衡頭佮胸坎，予in的重心囥佇尻川。      暴龍科的恐龍，差不多佇少年的時，有4年的時間會快速成長，成年以後生長的速度就閣慢落來，一隻1噸8的懼龍，上緊的成長速度差不多一年會當增加180公斤喔！      科學家發現有一寡懼龍化石，有予暴龍科咬過閣好去的號，雖罔有可能是别種物種共攻擊，毋過科學家認為嘛有可能是仝種的為著佔地盤抑是搶食物相拍所造成的。科學家捌佇一个所在發現三隻懼龍化石，其中一隻是成年的，一隻中型的佮一隻幼茈的，遐附近有五隻四散的鴨喙龍化石，而且頂面有暴龍科喙齒的號，所擺有科學家認為懼龍會規群去拍獵。猶毋過嘛有科學家認為懼龍咧爭食物的時，凡勢會出現食仝類的狀況喔！      今仔日的懼龍就講到遮，感謝逐家的收聽。 - - - - - - - - - - -  重khuâinn-khuâinn 牚 thènn 囥 khǹg - - - - - - - - - - -  FB迷眾頁：https://reurl.cc/4d81kX 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

42-戈魯貢龍(Gorgosaurus)      Ko-lóo-kòng-liông，華語號做「蛇髪女怪龍」、「魔龍」佮「戈魯貢龍」，是暴龍科的恐龍，化石是佇加拿大發現的，1914年號名發表，Gorgos這个詞本底是希臘神話內底一種女妖怪的名，這種妖怪有三隻，喙齒尖尖，頭殼頂全是蛇，假使有人看著這種妖怪的目睭，彼个人就會予妖怪變做石頭，誠恐怖，尾仔Gorgos這个詞 tsua̋nn有「恐怖」的意思。科學家共這種恐龍號做戈魯貢龍，意思就是「恐怖的杜定」，in生存佇7650萬年到7500萬年前的白堊紀尾期。      成年的戈魯貢龍長度有8米到9米，體重2噸4，目前發現上大粒的頭骨有99公分。In佮in的近親亞保達龍誠仝形，所擺嘛有科學家共in兩種當作是仝一種。戈魯貢龍生存佇北美洲西爿的平洋，彼个所在閣有另外一種暴龍類的懼龍佇遐生活。這兩種暴龍類敢會相爭食物咧？有的學者認為懼龍較大隻，會去食較gâu防備的角龍，戈魯貢龍較細隻，會食鴨喙龍；嘛有學者認為雖罔in生活的範圍有重疊著，猶毋過懼龍佇較南爿的所在，戈魯貢龍較倚北爿。      科學家捌佇一隻猶未大到在的戈魯貢龍化石的腹肚内底，發現2支食植物恐龍的跤腿，這是恐龍研究當中重要的發現，因為這是頭一擺發見包括胃内底食物的暴龍類化石。彼2支跤腿閣是無仝頓食落去的，顯示伊可能袂共獵物規隻食掉，干焦食某一个部位爾爾。科學家推測in食食慣勢會綴年歲改變：成年的戈魯貢龍下頦佮頷仔頸足勇欸，會使共獵物拆開，甚至共獵物幌起去空中才食掉，少年的戈魯貢龍咬物件的力頭無到成年的十分之一，所擺是食某一个部位爾爾，避免相爭食物。毋過這个講法閣須要較濟化石來證明才有夠力，凡勢這隻戈魯貢龍拄好是一隻會揀食的囡仔疕。      今仔日的「戈魯貢龍」就講到遮，感謝逐家的收聽。 - - - - - - - - - - - -  幌 hàinn 揀食 kíng-tsia̍h 囡仔疕 gín-á-phí - - - - - - - - - - - - FB迷眾頁：https://reurl.cc/vvEWXy 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

41-亞保達龍(Albertosaurus)      A-pó-ta̍t-liông，華語號做「亞伯達龍」、「阿爾伯托龍」，是1884年佇加拿大 Alberta 發現的，就用地名來共這種恐龍號名。In是生活佇7000萬年前的白堊紀尾期。      亞保達龍是暴龍科的一種，比霸王龍早八百萬年就橫霸天下。成年的亞保達龍有9米長，體重佇1噸3到1噸7之間，前跤短短，干焦2指，後跤較長，有4指，其中3指有接觸著塗跤，中央彼支上長。行路的速度量其約一點鐘14〜21公里，幼茈的亞保達龍可能會行閣較緊，凡勢是暴龍類當中走上緊的品種，有科學家認為少年的亞保達龍會去共獵物趕來予成年的食。      In的頭大大，有一米長，頷仔頸較短，喙裡超過58齒喙齒，無仝位置的喙齒有無仝的形體佮作用。下頦足有力，會使咬300外斤的物件，頂槽的喙齒會使幫助in應付獵物的滾躘。根據in喙齒損蕩的狀況，科學家推測in咧食物件的時，毋是用喙齒共肉切斷，是用幌頭的方式共獵物拆開。      亞保達龍凡勢是規群做伙生活，因為科學家捌佇一个所在發現22隻亞保達龍，其中有一隻28歲，17歲到23歲有8隻，12歲到16歲有7隻，2歲到11歲有6隻。2歳彼隻干焦2米長，體重50公斤爾爾，科學家認為in佇14歳到18歲上gâu大，一冬會使增加122公斤喔！      今仔日的亞保達龍就講到遮，感謝逐家的收聽。 - - - - - - - - - - - -  橫霸 huâinn-pà 滾躘 kún-liòng 損蕩 sńg-tn̄g - - - - - - - - - - - - FB迷眾頁：https://reurl.cc/2jKG5v 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

40. Thí-mū-lū-liông(Timurlengia)      Thí-mū-lū-liông，華語號做「帖木兒龍」，是2016年號名發表的恐龍，化石是佇烏茲別克發現的，所擺就用14世紀佇遐創建強大帝國的Timur來共號名。這種恐龍是生存佇9000萬年前白堊紀尾期的中亞地區。現此時的中亞是沙漠，毋過9000萬年前，遐有一片淺海，是生態真豐富的所在喔！      In是暴龍家族的一分子，毋過體型佮馬仔差不多爾爾，身長3米到4米，體重170到270公斤，雖罔體型無蓋大隻，原仔誠有戰鬥力。In彼陣就有尾期暴龍類的外形特徴：頷仔頸彎彎，身軀瘦抽，尾溜無蓋長，前跤短短、干焦兩指，後跤長閣有力，頭殼大閣長，兩排利利的喙齒彎向後壁，會使共肉割開，主要的獵物是食植物的恐龍，親像鴨喙龍。In嘛有尾期暴龍類複雜的大腦和耳仔特徵，目調真尖，耳空足利，凡勢會使用低頻的叫聲來佮仝種的交流。      暴龍類對1億7000萬年前就出現，到8000萬年前才演化變大隻，9000萬年前的Thí-mū-lū-liông猶算細隻，表示暴龍類是先發展智力，才閣發展體型的喔！      今仔日的Thí-mū-lū-liông就講到遮，感謝逐家的收聽。 - - - - - - - - - -  尖 tsiam 利 lāi 原仔 uân-á - - - - - - - - - - FB迷眾頁：https://reurl.cc/E668NK 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

39-似雞龍（Gallimimus)      Sū-ke-liông，華語號做「似雞龍」，號名的意思是「雞仔的模仿者」，in是20世紀70年代佇蒙古戈壁沙漠發現的，是生活佇700萬年前的白堊紀尾期。      雖罔in號做似雞龍，煞是似鳥龍科當中，上大隻的一種，體長上長到6米，體重440公斤，無成雞，顛倒較成鴕鳥，身軀頂明顯有佮現代鳥仔相siāng的特徴，譬論講in有長閣健丢的頷仔頸，頭細細粒，目睭生佇倚頭殼頂兩爿的所在，雖罔無足好的立體視覺，不而過會使共四箍輾轉的物件看甲誠清楚，通好智覺著身軀邊的危險，in的骨頭是空心的，喙內無喙齒。In無翼仔嘛無羽毛，前跤佮後跤比起來加足短欸！跤爪利利，猶毋過無法度共肉拆開，干焦會使幫贊in掠杜定，抑是對塗跤挖動物的卵出來食。      In跤手扭掠，跤骨誠長，跤胴骨比大腿骨較長，大腿的筋肉結實，足適合加速來走，in一伐就足大伐，予大部分的敵人逐in袂著，閣有長長的尾，予in咧走的時陣閣較平穩。      目前發現的似雞龍化石，數量雖罔毋是蓋濟，佳哉有保留 袂少完整的骨骼，包含尻川懸度干焦半米的幼囝，佮2米懸的成年似雞龍，予似雞龍嘛算是予科學家研究誠齊透的一種恐龍。      今仔日的「似雞龍」就講到遮，感謝逐家的收聽。 - - - - - - - - - -  四箍輾轉 sì-khoo-liàn-tńg 一伐 tsi̍t-hua̍h 佳哉 ka-tsài - - - - - - - - - - FB迷眾頁：https://reurl.cc/oy55Rq 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

38-似鴕龍(Struthiomimus)      Sū-tô-liông，華語號做「似鴕龍」，號名的意思是「模仿鴕鳥的恐龍」。1901年，科學家發現一寡仔無完整的化石，1914年，佇加拿大發現較完整的化石，尾仔佇彼附近閣發現這種恐龍的化石，in凡勢是佇加拿大上四常看著的恐龍，in生存的年代是佇7000萬年到7600萬年前的白堊紀尾期。      似鴕龍略仔欲成現代的鴕鳥，in的身長差不多4米3，尻川懸度1米4，體重150公斤，頭細細粒仔，頷仔頸長長長，占規个身長的40%，in有一條長長、硬掙的尾溜，長度有3米半，佔in身長的一半較加，佇in欲走過坎坷的山坪時，彼條尾溜會使幫贊in保持身軀的平棒。      In的前跤誠長，有三支指頭仔，長度攏差不多，跤爪略仔彎彎，有科學家認為in可能佮樹趖的前跤跤爪足仝形。後跤的跤爪較平，佮釘仔鞋的作用差不多，予in咧逐獵物的時袂滑倒。In走著足緊的，時速可能有50到80公里，一伐的距離會當到3米，予in通好閃避會掠in的大型恐龍。      In生活佇海岸邊的平洋，有大河流過，佇遐生活的生物蓋濟種。似鴕龍的食食是啥？科學家有無仝的看法，有的認為in是獸跤類恐龍，所擺應該攏是食肉的；有的認為in蹛佇水邊，凡勢是食毛蟹、蝦仔、蟲豸，抑是其他恐龍的卵；有的認為in會用前跤共樹椏搝咧，才靠in長長的頷仔頸，伸起去食樹仔頂的葉仔。      今仔日的「似鴕龍」就講到遮，感謝逐家的收聽。 - - - - - - - - - - - - - - - - 四常 sù-siông 硬掙 ngē-tsiānnngī-tsiānn 樹趖 tshiū-sô - - - - - - - - - - - - - - - - FB迷眾頁：https://reurl.cc/6dLMaM 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

37-古似鳥龍(Archaeornithomimus)      Kóo-sū-tsiáu-liông，華語叫做「古似鳥龍」，號名的意思是「古早的鳥仔趁樣者」，意思是講in是似鳥龍的祖先。1923年，美國自然史博物館的團隊，佇內蒙古發現的，1933年有對in做一寡描述，1972年正式號名發表。In是生存佇9600萬年前的白堊紀尾期。      古似鳥龍身長3米4，體重佇45到91公斤之間，伊身軀的羽毛佮喙，參這馬的鴕鳥足仝形。頭細細粒、目睭大大蕊，生佇頭的兩爿，會使像現代鳥仔按呢觀察四箍輾轉的環境。無喙齒，頷仔頸誠幼，尾足長，真gâu走。      In分佈的範圍佇北美洲佮亞洲，彼陣遐的環境應該是有足濟彎彎斡斡的河，倚海的所在閣有闊莽莽的平洋，佇遐生存的生物有誠濟種，所擺古似鳥龍食食的選擇蓋濟，除了食細隻動物、蟲豸以外，嘛會食卵佮果子。      古似鳥龍佮鳥仔足仝形，若按呢古生物學者發現跤印的時，欲按怎斷定是鳥仔抑是恐龍咧？有一種講法是看跤指頭仔縫的角度，超過120度是鳥仔，無夠120度是恐龍。古似鳥龍的跤胴骨比大腿骨較長，骨骼親像鴕鳥，科學家認為古似鳥龍凡勢嘛像鴕鳥按呢走敢若飛例，是短途走標的冠軍喔！      今仔日的「古似鳥龍」就講到遮，感謝逐家的收聽。 - - - - - - - - - - - - - - -  趁樣 thàn-iūnn 闊莽莽 khuah-bóng-bóng 平洋 pênn-iûnnpînn-iûnn - - - - - - - - - - - - - - - FB迷眾頁：https://reurl.cc/adkoAl 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

36. Si-á-tsū-liông（Siats)      Si-á-tsū-liông，華語叫做「西雅茨龍」，是2008年到2010年，佇美國猶他州發現的，2013年號名發表，Siats這个詞是當地人傳說講會食人的妖怪，所擺嘛有人共號做「食人妖怪龍」，是北美洲上大隻的食肉恐龍之一。伊生存佇9900萬年前的白堊紀尾期。      這種恐龍目前干焦發現一隻，而且伊猶未大到在，估計伊的體長佇9米彼跤兜，體重欲倚4噸，推算成年的Si-á-tsū-liông體長可能有11米7，尻川的懸度接近4米，頭的懸度有4米半，這種躼跤的身材，方便in去咬大型食植物恐龍的頭抑是頷仔頸，嘛會使佇掠中型恐龍的時，發揮身懸的優勢，長閣勇壯的跤予in有法度走閣較緊，去掠遐的獵物。伊發達的前跤佮跤爪的大細攏明顯比暴龍較勇。      這種恐龍是異特龍超科的一種，是目前所知影北美洲異特龍類上尾仔才出現的一種。Si-á-tsū-liông的發現，佇科學上誠有意義，進前科學家認為異特龍類的恐龍滅絕了後，暴龍類的恐龍才開始大隻，毋過彼當陣所知影上落尾滅絶的異特龍超科是懸棘龍，懸棘龍滅絕到暴龍類開始大隻，中央閣有一段閬縫的時間，尾仔發現的Si-á-tsū-liông拄好生存佇這段時間，更加證明科學家的推測無毋著，而且發現Si-á-tsū-liông的地層嘛捌發現小型暴龍類恐龍的化石，顯示暴龍類是佇大型異特龍類滅絕了後，才開始大隻，沓沓仔peh起去食物鍊上頂懸的寶座。      今仔日的「Si-á-tsū-liông」就講到遮，感謝逐家的收聽。 - - - - - - - - - - - - - -  尻川 kha-tshng 躼跤 lò-kha 閬縫 làng-phāng - - - - - - - - - - - - - - FB迷眾頁：https://reurl.cc/Llb45x 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

35-馬phú龍Mapusaurus      Má-phú-liông，華語號做「馬普龍」、「地龍」，Mapu佇當地語言的意思是「大地」，號名的意思是「大地的杜定」，這是加拿大佮阿根廷的科學家，對1997年到2001年，佇阿根廷挖著的，in生存的年代是9300萬年前的白堊紀尾期。      發現馬phú龍化石的所在較焦燥，有季節性的溪流出現，仝佇彼个範圍生活的，閣有足大隻的阿根廷龍，有一搭發現的馬phú龍化石超過7隻，而且大細隻攏有。有科學家認為in 會規群做伙生活、做伙去拍獵，嘛有一寡學者認為in毋是有組織的規群去拍獵，是臨時拄著，就做伙合作，畢竟規群做伙拍獵，成功的機會較大，因為成年的阿根廷龍有40米長，孤一隻馬phú龍欲面對這種大型獵物是足危險欸！      馬phú龍的體型佮in的近親南方大隻龍差不多，長度11米半，體重3噸到5噸。In的骨架目前鬥出來的差不多有70%，一部分的箅仔骨、後擴佮幾節仔尾溜猶未揣著，in的頭骨較厚，有皺痕，喙齒狹狹利利，會使幫贊in共獵物的肉咬落來，前跤誠短、身軀瘦瘦矣！      2011年有一齣紀錄片《恐龍星球》内底有馬phú龍出現，影片内底是演in會規群去掠阿根廷龍，而且in無一定愛共阿根廷龍完全刣死，干焦共咬幾塊仔肉落來，就聽好食甲飽嘟嘟。      今仔日的「馬phú龍」就講到遮，感謝逐家的收聽。 - - - - - - - - - - - - - - -  箅仔骨 pín-á-kut 後擴 āu-khok 皺痕 jiâu-hûnliâu-hûn - - - - - - - - - - - - - - - FB迷眾頁：https://reurl.cc/A2qmjj 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

34-鯊齒龍（Carcharodontosaurus）      Sua-khí-liông，華語號做望齒龍、卡查齒龍、鯊齒龍，號名的意思是「有鯊魚喙齒的杜定」，因為in 的喙齒有足利的鋸齒，佮這馬的鯊魚足仝形的，in應該是生活佇9300萬年前的白堊紀尾期，活動的範圍佇非洲北爿。      鯊齒龍的研究過程佮棘龍仝款坎坷。上早發現鯊齒龍化石是1924年佇阿爾及利亞發現兩齒喙齒，彼當陣研究的水準有限，一開始當作in嘛是巨龍，尾仔才佮另外發現的一寡化石建立新的鯊齒龍，毋過遮的化石嘛是佇1944年二戰期間，予炸彈彈歹去矣。一直到1995年才閣佇摩洛哥發現一个較完整的鯊齒龍頭骨。      In的體長12到13米左右，體重佇6噸至15噸之間，頭骨1米半，毋過腦的空間無偌大，所擺鯊齒龍可能無偌巧，in的頭骨較狹，喙齒長長扁扁，邊仔像鋸仔的形，長度有20公分，in的力頭不止仔大，會使用喙共400外公斤的獵物攑起來，而且in的喙會使拍足開欸，誠適合共獵物拆食落腹。      鯊齒龍生活佇非洲北爿，遐是一大片的湳仔地，水產豐富，遐閣有另外一種大型食肉恐龍，就是咱頂禮拜紹介的棘龍，棘龍跤較短，佇陸地徙位的速度較慢，身軀的結構嘛無適合相拍，所擺棘龍凡勢嘛是鯊齒龍的獵物喔！      今仔日的鯊齒龍就講到遮，感謝逐家的收聽。 - - - - - - - - - - - - - - - - - - - - - -  巧 khiáu/khá 攑 gia̍h 湳仔地 làm-á-tē - - - - - - - - - - - - - - - - - - - - - - FB迷眾頁：https://reurl.cc/bY4XDE 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

33-棘龍(Spinosaurus)      Kik-liông，華語號做「棘龍」、「棘背龍」，是1912年德國古生物學者佇埃及發現的，1915年正式號名發表。號名的意思是「有棘的社定」，這个化石本囥佇德國柏林的博物館，毋過佇第二擺世界大戰的時，去予炸彈彈著，毁去矣！      In體長14米到15米，體重6噸到9噸，懸度2米1到4米8，是目前所知影上大隻的食肉的恐龍，長度嘛是上長的，毋過in是用四支跤咧行，所擺尻川的懸度會比其他體型差不多的恐龍較低，體重嘛比暴龍較輕。      In尻脊骿的棘，比懸棘龍的棘閣較懸，懸度較加一米，長度超過兩米。科學家推測這个棘可能有顯目的色水，會使用來展風神，抑是唌母的來拍種，嘛有可能會使用來示威，共敵人嚇驚予走，閣有可能會使用來調節體溫。      In佮重爪龍有足倚近的親緣關係，in的頭有175公分，是食肉恐龍內底上長的，狹狹的喙、尖款筍的喙齒，足適合掠魚仔的。In生活佇非洲北海岸，遐有紅樹林佮其他大型的食肉的動物。In的鼻空較懸，佮現此時的鱷魚足仝形，尾扁扁平平，這攏有可能是為著欲佇水裡生存演化出來的特徵。除了可能會食魚仔以外，科學家捌佇一个飛龍化石頂面，發現棘龍的喙齒，顯示in有當時仔嘛會掠飛行的動物來食。研究人員發覺棘龍喙齒的元表，佮遐附近的龜、鱷魚較仝形，顛倒佮獸跤類較無相𫝛，所擺推測棘龍應該是半水半陸地的生活方式，避免佮陸地的大型恐龍閣有水裡的大型鱷魚競爭。      電影侏羅紀公園3內底，有暴龍佮棘龍相拍的場面，最後棘龍共暴龍的頷仔頸拗斷去。不而過，這兩種因恐龍毋但生存佇無仝一塊陸地，生存的年代嘛差咧數千萬年，所擺這兩種恐龍是無可能相拍的！      今仔日的「棘龍」就講到遮，感謝逐家的收聽。 - - - - - - - - - - - - - - - 彈 tuânn/tuānn 相𫝛 sio-siāng 拗斷 áu-tn̄g  - - - - - - - - - - - - - - - FB迷眾頁：https://reurl.cc/3XGz8V 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

32-奧卡龍（Aucasaurus)      Ò-kha̍h-liông，華語號做「奧卡龍」，意思是「對奧卡來的杜定」，是1999年3月佇阿根廷奧卡這个所在發現的。In大約是生活佇8000萬年前的白堊紀尾期。      In的體長佇5米半到6米彼跤兜，尻川的懸度1米7，體重大概 700公斤，佮食肉的牛龍有足倚近的親緣關係。佮牛龍比起來，奧卡龍較細隻，前跤的比例無牛龍遐短，毋過有愈明顯的退化，強欲看無指頭仔，喙較長較低，目睭頂懸雖罔無像牛龍按呢有角，毋過原仔是有略仔噗噗，古生物學家暫時猶無發現這搭噗噗的作用，可能干焦是妝娗爾爾。頭骨誠厚，毋過有空，會使減輕頭骨重量。      有一副奧卡龍的化石是佇龍跤類（就是大型食植物的恐龍）的岫邊發現的，所擺科學家推測in可能會食遐的卵抑是拄孵出來的幼囝。彼副化石的頭骨受著足嚴重的損蕩，可能是佮其他的恐龍相拍，拍甲足雄，受傷傷嚴重tsua̋n死去。      In的後跤誠結實，有3支有作用的指頭仔，走真緊，咧走的時，彼兩支短短仔、予人認為無啥作用的前跤會貼佇身軀兩爿。Discovery Channel佇2003年播出的恐龍影片內底，有出現奧卡龍，in是用群體行動的方式，佇樹林內掠其他食植物的恐龍，主要的改擊方法是用喙咬，in的頷仔頸無長，筋肉結實，才有法度咧拍獵的時陣，大力晃頭咬獵物。      今仔日的「奧卡龍」就講到遮，感謝逐家的收聽。 - - - - - - - - - - - - - - - - - - - -  妝娗 tsng-thānn 岫 siū 雄 hiông - - - - - - - - - - - - - - - - - - - - FB迷眾頁：https://reurl.cc/gGOW9X 留言告訴我你對這一集的想法： Powered by Firstory Hosting

31-恐龍紹介(食肉牛龍)Carnotauras      Tsia̍h-bah ê gû-liông，華語號做「食肉牛龍」，簡稱做「牛龍」，號名的意思是「食肉的牛」，是1985年佇阿根廷發現的。In大約是生活佇7000 萬年前，白堊紀尾期的南美洲。      In的頭骨佮進前予人發現的恐龍攏無啥仝，佮其他獸跤類恐 龍比起來，牛龍的頭骨較短較厚，足成牛頭，目睭細細蕊，向頭前，看著的物件會略仔立體，龍骨頂懸噗噗，前跤足短，尻脊骿兩爿有幾排仔噗噗的鱗，上特別的特徵是in目睭頂懸有一對角。      彼對角的作用，有的科學家認為in佇欲搶地盤、領導權、拍種的時，會用角佮對手相鬥，抑是會使做a-sóo-bih，保護目睭莫去受傷；嘛有學者認為彼對角無蓋大嘛無夠𠕇，凡勢是牛龍成年的記號，當當角發到一个程度，就表示伊已經成年矣！      牛龍的身軀有密密密的鱗，遐的鱗細細圓圓，尻脊骿兩爿的鱗是半圓錐形，這種結構的作用，凡誓是佇相拍的時，會使保護家己。      伊的身長8米，頭的懸度3米半，尻川的懸度3米，體長2噸半，佮一台發財仔車差不多重。後跤足長足勇的，會使走足緊，一百公尺免6秒就走了！前跤佮後跤長度的比例是14%，抑就是講假使一隻後跤長度300公分的牛龍，伊的前跤干焦42公分，比我的手閣較短。而且大部分獸跤類恐龍，前跤的手面是會使雙手合掌的，不而過牛龍的手面是略仔向後壁，目前猶毋知按呢有啥物作用。      科學家認為in咬物件的力頭無特別大，毋過合喙的速度足緊的，拍獵的方式可能是趁獵物猶未反應過來的時，用in扭掠的跤手，共獵物固定，紲咧共咬幾若下。     今仔日「食肉ê牛龍」就講到遮，感謝逐家的收聽。 - - - - - - - - - - - - - -  a-sóo-bih （緩衝空間） 尻脊骿 kha-tsiah-phiann 手面 tshiú-bīn - - - - - - - - - - - - - -  FB迷眾頁：https://reurl.cc/r970gb 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

30-科學家欲按怎共恐龍磅重?      恐龍體重的估算，會影響科學家對in生活狀況的研究，包括in的食食、生湠佮運動，科學家會倚靠體重的評估技術，重建恐龍生活的模樣。      以暴龍做例，伊的體重估算對3噸到18噸攏有，科學家到底是按怎推測出恐龍的重量？主要的方法有2種： 第一種:比例法      先測量現此時的大型動物的骨骼，譬如手股、大腿骨的周長，來佮恐龍做比較，按照比例推算恐龍的體重，毋過這種算法，拄著跤骨特別大支的恐龍，可能就愈袂準。 第二種：重建法      科學家會根據恐龍的骨骼，做一个全身復原的模型，紲落去共切塊，算出每一个部位的體積，才用現此時的動物肌肉密度，譬如鱷魚的筋肉，去推算出恐龍的體重。猶毋過，這馬愈來愈濟證據顯示龍盤目恐龍真有可能佮鳥仔仝款有氣囊，in的密度可能較倚近鳥仔。所擺嘛有研究人員認為恐龍的體重可能無過去估算的遐爾重。重建法愛考慮著恐龍規个模樣，毋過恐龍已經是滅絕的動物，伊的外型大部分攏是人類主觀的看法，凡勢嘛會綴時代有精差。      佗一種方法較好咧？兩種方法攏有伊的優勢佮限制，所擺這兩種方法應該是會當相楗的。了解這兩種方法的限制佮無確定性，透濫做伙用，才有法度閣較完整去復原恐龍的生活。      今仔日的「科學家欲按怎共恐龍磅重」就講到遮，感謝逐家的收聽。 - - - - - - - - - - - - - -  磅 pōng 相楗 sio-kīng 透濫 thàu-lām - - - - - - - - - - - - - -  FB迷眾頁：https://reurl.cc/Ej0lnn 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

29-恐龍紹介（振元龍)Zhenyuanlong      Tsín-guân-liông，華語叫做「振元龍」，是中國遼寧的一位作穡人發現的，尾仔共交予古生物博物館研究，佇2015年發表，號名叫振元龍，是欲紀念彼个博物館館長孫振元先生。振元龍應該是生活佇1億1300萬年前的白堊紀早期。      In身長欲倚2米，身軀頂足濟所在攏有羽毛，可能佮這馬的í-miuh鳥（鴯鶓）足仝形。目前發現的後跤化石頂懸，無保留羽毛的痕跡，猶毋過彼塊石枋嘛無保存身軀的羽毛，所擺凡勢是化石保存過程中，後跤羽毛的痕跡無保留著，科學家猶未排除in後跤有羽毛的可能。振元龍前跤足短，猶毋過翼仔的羽毛誠長，翼仔佮現此時的鴟鴞足仝形。不而過振元龍的體重有20公斤，是鴟鴞的兩倍，所擺就算in的翼仔看起來誠現代，受著體重的限制，in應該是飛袂起來。若按呢，in的翼仔可能是用來展威弄颺、威脅對手、抑是是欲唌母的ê振元龍，佮孔雀開屏的作用仝款，抑者是保暖、孵卵咧用。      雖罔科學家進前就捌發現閣較大隻的有羽毛的恐龍，毋過攏毋是像振元龍這種佮現代鳥仔足仝形的羽毛，這个發現顯示大型有現代化羽毛結構的恐龍，可能比科學家本底所想的閣較濟。科學家認為in可能佮小盜龍有相siāng的祖先，但是佇演化的過程中，愈用著的會愈發達，愈無用著的就會愈退化，in tsua̋n沓沓仔變做袂飛的恐龍矣！      今仔日的「振元龍」就講到遮，感謝逐家的收聽。 - - - - - - - - - - - - - - -  展威 tián-ui 弄颺 lāng-iānn 燒烙 sio-lō - - - - - - - - - - - - - - - FB迷眾頁：https://reurl.cc/70A5mQ 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

28恐龍紹介――猶他盜龍（Utahraptor）      Iû-tha-tō-liông ，華語叫做「猶他盜龍」，號名的意思是「猶他的盜賊」，伊是1975年佇美國猶他發現的，毋過彼陣無啥物人注意，一直到1991年閣發現大型跤爪化石了後，去開採的人就增加，到1993年才正式發表。這種恐龍是生活佇1億3000萬年前的白堊紀早期。      In身長5米半，體重300公斤，目前發現上大隻的有7米長，體重欲倚500公斤，佮北極熊差不多。In是用後跤咧行，後跤的第二指有長長彎彎的大跤爪。目前揣著的有22公分遮爾長。學者認為in的後跤足有力的，會使那踢獵物那保持平棒，予前跤有閒去處理獵物。In的頭有75公分，頭骨足懸足大，咬物件的力頭有15000牛頓，拍獵的時陣定定著倚靠in勇壯的下頦。In喙裡有2排若剃頭刀的喙齒，尖尖利利，每一齒差不多有5公分。走的速度大約仔一點鐘50公里，跳起來的時閣使佇空中轉踅，大腦結構應該袂䆀，智力凡勢比大部分的恐龍閣較懸，目睭足利的，佮這馬的鴟鴞差不多，反應速度嘛足緊的，會使佇一秒鐘內底對幾若種物件做出反應。      科學家捌佇一个所在發現7隻以上的猶他盜龍化石，其中有成年的，嘛有猶未大到載的，閣有一隻食植物的禽龍嘛佇遐，科學家推測這應該是規群的猶他盜龍欲食跋入去流沙內底的禽龍，煞連家已嘛規群摔入去。這个發現予一寡科學家認為猶他盜龍是會規群去拍獵的。      今仔日的「猶他盜龍」就講到遮，感謝逐家的收聽。 - - - - - - - - - - - - - - -  力頭 la̍t-thâu 鴟鴞 bā-hio̍h 大到載 tuā-kàu-tsāi - - - - - - - - - - - - - - -  FB迷眾頁：https://reurl.cc/RqmZN9 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

27-恐龍紹介(恐爪龍)Deinonychus      Kióng-jiáu-liong5，華語叫做「恐爪龍」，是1964年佇美國發現的，伊應該是生活佇1億1500萬年前的白堊紀早期，伊的學名是對古希臘文的「恐怖」佮「跤爪」來的，因為伊後跤第二指的跤爪足長的，有13公分，形體若鐮歷仔。咧行路的時陣，這支指頭仔會勼起來，干焦用第三指、第四指來行，進前的科學家認為in會用彼支像鐮歷仔的跤爪來割獵物，毋過這幾年研究，顯示這支跤爪是用揬的來攻擊獵物，伊會先固定獵物，用跤爪共揬落去，才割予開，共獵物拆食落腹。      In的體長，上大隻的欲倚4米，體重120公斤，尻川的懸度欲倚1米，頭骨超過40公分，下頦誠勇，有60齒彎彎利利，像刀仔的喙齒，咬物件的力頭足大的，科學家認為可能佇4100到8200牛頓之間，這个數字接近現代鱷魚咬物件的力頭。伊的尾會使佇伊快速轉踅的時，保持身軀的平棒。      進前恐爪龍予人講做是一種跤手扭掠、走足緊的恐龍，毋過科學家研究的結果，認為in可能無咱想的遐爾緊。In的跤胴骨有較短一屑仔，凡勢無法度走足緊欸！估計in的速度是一點鐘會使走10公里彼跤兜。      恐爪龍的化石已經發視袂少，雖罔目前猶未發現in的箅仔骨，骨架的重建猶未足完整，毋過科學家有佇in腹肚的附近，發見卵殼化石，彼隻恐爪龍可能當咧用伊的體溫來孵卵，佮這馬的鳥仔仝款，顯示in應該是溫血的動物。In蹛的所在佇樹林三角洲佮內海的附近，佇遐生活的閣有食植物的腱龍。科學家捌佇腱龍化石的附近發現足濟恐爪龍的喙齒，推測恐爪龍可能會食腱龍，毋過in體型精差誠大，成年的腱龍差不多有1噸到4噸，所擺恐爪龍可能是規群去拍獵。      雖罔目前猶未發現恐爪龍可能有羽毛的證據，毋過佮in仝科的其他恐龍大部分攏發現有羽毛，所擺科學家推測in應該嘛有羽毛。      今仔日的「恐爪龍」就講到遮，感謝逐家的收聽。 - - - - - - - - - - - - - - - - - - - - - - -  鐮歷仔 liâm-li̍k-á 揬 tu̍h 轉踅 tńg-se̍h - - - - - - - - - - - - - - - - - - - - - - -  FB迷眾頁：https://reurl.cc/Vzq5NA 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

26一恐龍紹介(南方大隻龍)Giganotosaurus      Lâm-hong-tuā-tsiah-liông，華語叫做「南方巨獸龍」、「南巨龍」，是1993年一位修理自動車的師傅佇阿根廷的沙漠發現的。伊號名的意思就是「南方足大隻的杜定」，體長13米到14米，體重超過10噸，懸度有4米以上，生存佇9千8百萬年前的白堊紀中期。      In的頭大大，喙齒長度有20公分，後跤無蓋長，按呢身軀重心會較低，佇逐獵物的時陣才袂跋倒。In的前跤閣較短，而且活動的範圍嘛足細欸！干焦會使向頭前徙25度爾爾，連家已狹狹長長的喙管嘛摸袂著，所擺科學家認為in的前跤無法度幫助in拍獵，干焦是用來平衡in大大頭佮頷仔頸。      南方大隻龍孤一隻就足恐怖矣，規群就閣較免講，古生物學者認為in可能會規群搬徙，嘛會像這馬的獅群按呢，規家伙仔做伙拍獵，一群腹肚枵的南方大隻龍行做伙，對彼咧時代的其他動物來講，是誠大的威脅，連足大隻的阿根廷龍，嘛有可能予in拆食落腹。      電影侏羅紀第3集内底，有南方大隻龍佮暴龍相拍，是南方大隻龍拍贏矣！毋過實際上這兩種恐龍無機會相拍，因為in生活佇無仝的時代，根本就無可能相拄，閣再講南方大隻龍雖罔體長比暴龍長一米半，體重嘛比暴龍較重2噸，猶毋過咬物件的力頭較輸暴龍，正經拍起來，南方大隻龍嘛無較贏面喔！      今仔日的「南方大隻龍」就講到遮，感謝逐家的收聽。 - - - - - - - - - - - - - - -  搬徙 puann-suá 拆食落腹 thiah-tsia̍h-lo̍h-pak 贏面 iânn-bīn - - - - - - - - - - - - - - - FB迷眾頁：https://reurl.cc/nNpQVv 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

25-恐龍紹介（小盜龍）Microraptor      Sió-tō-liông，華語叫做「小盜龍」，號名的意思是「小型的賊仔」，表示這種恐龍的體型普遍攏足細隻。這種恐龍是佇中國遼寧省發現的，到今已經發表出來的欲倚10件，聽講猶未發表的有300外件。In應該是 生存佇1億2千萬年前的白堊紀早期。      小盜龍的發現，證明恐龍佮鳥仔之間有足密切的演化關係，in的體型足細隻的，身長干焦42到83公分，體重1公斤爾爾。In有一个足特別的所在，就是in有兩對翼仔喔！毋但前跤有會使幫助in飛行的飛羽，後跤嘛有喔！除了跤有長長的飛羽，in的尾閣有一个璇石形的尾羽，規身軀攏有羽毛。科學家研究in羽毛痕跡當中的的烏色素，推測in身軀的色水應該是會反金的紺色。      科學家捌對小盜龍化石胃的部位，發覺有保存一寡小型食乳動物的化石，嘛有鳥仔的骨頭，閣有魚鱗佮細隻杜定，對遮會當看出這小盜龍食的物件足濟種，in是袂放遐比in較細隻的動物煞欸！      有的科學家認為in的翼仔就算規个拗彎起來，飛羽嘛會䠡塗，所擺in應該是蹛佇樹仔頂，嘛有學者共in跤爪拗彎的程度佮這馬的鳥仔做比較，認為in毋是百分之百蹛佇塗跤抑是樹仔頂，應該是一半一半。In應該無法度用前跤拍獵，因為in的前跤干焦佇攑懸懸佮向對後壁的時，羽毛才袂䠡塗，所擺in可能是用in的翼仔對樹仔頂降落來，去攻擊佇塗跤的細隻動物。雖罔in有兩對翼仔，猶毋過翼仔較狹，翼股頭的關節嘛無適合飛，致使in無法度對塗跤起飛，大部分是對這欉樹仔pha過另外一欉樹仔，這種兩對翼仔的結構對飛行無幫贊，所擺就佇生物的演化當中予人淘汰矣！      今仔日的「小盜龍」咱就講到遮，感謝逐家的收聽。 - - - - - - - - - - - - - - - 璇石 suān-tsio̍h 䠡塗 tshê thôo 淘汰 tô-thài - - - - - - - - - - - - - - -  FB迷眾頁：https://reurl.cc/p3aGGZ 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

24-恐龍紹介(重爪龍)BARYONYX      Tāng-jiáu-liông，華語叫做「重爪龍」、「堅爪龍」，是1983年佇英國發現的，號名的意思是「沉重的跤爪」。In應該是生活佇1億3千萬年前的白堊紀早期。      In的體長佇7米半到10米之間，懸度3米半，體重欲倚2噸，In的喙長長、扁扁、狹狹，佮這馬的鱷魚誠仝形，頷仔頸是S形，尻脊骿對頭前向後壁愈來愈懸，可能有像駱駝馬駝峰形體的結構，in的前跤誠勇，有三支足有力的指頭仔佮大跤爪，尤其是大頭拇的跤爪，長度差不多有31公分，這嘛是in予人號重爪龍這个名的原因。In的大跤爪雖然有可能會使刣死大型的食植物的恐龍，喙裡嘛有96齒喙齒，毋過in的喙齒是尖款筍的形體，無適合共肉切斷，所擺in應該是揣漚肉來食。In的胃内底除了發現有禽龍的破枝骨以外，嘛有發現魚鳞，是第一種予人確認會食魚仔的獸跤類恐龍。In應該會用後跤跔佇河邊，用前跤的大跤爪當作魚鑿仔來掠魚，閣用in尖款筍形的喙齒共滑溜的魚咬予絚，紲落才規尾吞落去，佮這馬殕色的熊仝款的拍獵方式，所擺in應該是蹛佇倚水的所在，凡勢in閣會曉泅水喔！      今仔日的「重爪龍」就講到遮，感謝逐家的收聽。 - - - - - - - - - - - - - - - - - - - - 刣 thâi 尖款筍 tsiam-khuán-sún 破枝骨 phuà-ki-kut - - - - - - - - - - - - - - - - - - - - FB迷眾頁：https://reurl.cc/YEE5zO 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

23-恐龍紹介(懸棘龍)   Acrocanthosaurus      Kuân-kik-liông，華語叫做「高棘龍」、「多脊龍」閣有「阿克羅肯龍」，這種恐龍化石是佇美國發現的，1950年正式號名公布，號名的意思是講伊有足懸的神經棘，神經棘是生佇動物的尻脊骿，對龍骨遐噗起來一个大大扁扁的結構，足濟已經斷種的兩棲動物攏有這種結構。懸棘龍大約是生活佇1億2千100萬年前的白堊紀早期。       懸棘龍是一種大型的獸跤類食肉的恐龍，身長欲倚12米半，體重6噸到7噸，頭骨的長度有1米3，佮一个國小2年的囡仔差不多。伊上明顯的特徵是懸大的神經棘，對頷仔頸經過尻脊骿、尻川到尾溜，長度差不多是龍骨長度的2倍半。雖罔伊叫做「懸棘龍」，但是伊的棘顛倒比白堊紀尾期的「棘龍」閣較低。毋過懸棘龍的棘有筋肉包佇外口，像這馬美洲野牛的尻脊骿按呢懸懸噗噗。       懸棘龍的尾長長重重，會使平衡伊頭殼佮身軀的重量，予in的重心保持佇尻川。佮異特龍比起來，懸棘龍的前跤較短、較粗勇，其他所在足仝形的，前跤攏是三支指頭仔，有跤爪，懸棘龍的後跤ua̋nn誠粗勇，猶毋過大腿骨比跤胴骨較長，無法度走足緊欸！粗大的尾嘛予in較歹轉斡，猶毋過in猶原有本事掠彼當時彼咧所在任何一種食植物的恐龍，包括體長30米，足大隻的蜥海神龍，是走袂緊的殺手恐龍喔！       今仔日的「懸棘龍」就講到遮，感謝逐家的收聽。 - - - - - - - - - - - - - - - - - - 顛倒 tian-tò 噗噗 phok-phok 跤胴骨 kha-tâng-kut - - - - - - - - - - - - - - - - - - FB迷眾頁：https://reurl.cc/8vjAky 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

22-科學家欲按怎知影恐龍是食植物抑是食肉?      科學家無法度親目睭看著恐龍猶閣活咧的時陣的模樣，猶毋過in會使用一寡方法去判斷恐龍的食食慣勢，今付日咱就來講幾種科學家較捷用的方法。 第一種：根據喙齒的結構      恐龍喙齒的形體佮結構提供誠重要的線索，食肉的恐龍in的喙齒較大嘛較尖，有的有鋸齒，喙齒生著較密，會使幫助in 共肉咬予斷。抑若食植物的恐龍喙齒較平較直，適合哺植物纖維，喙齒的數量嘛加較濟，幫助in共植物磨予碎。這是早期恐龍研究當中真依賴的判斷根據，猶毋過，佇愈來愈濟的化石予人發現了後，科學家智覺著喙齒形體無的確會使直接反映出in食食的選擇，所擺科學家嘛會用其他的方法判斷。 第二種：利用科學儀器      科學家會利用電腦分析恐龍頭骨佮下頦的骨頭，重現in的筋肉狀況，食肉的恐龍下頦的筋肉比食植物的恐龍較發達，頭嘛較大，才有法度容納大型的喙齒佮勇壯的下頦筋肉。嘛有透過斷層掃描，顯示胃佮腸仔的所在，遮的影像資料會使幫贊科學家重建恐龍消化系統。 第三種：其他生痕化石      生痕化石是保存古生物佇生活中留落來的痕跡，包括跤印化石、卵化石、糞化石佮胃石。其中糞化石可能會有包括食物幼仔，會使了解in的食食慣勢；胃石是佇古生物消化系統中的礦物化的物質，是用來幫助消化食物，而且會使提供in食物選擇的信息。 第四種：胃容物化石      科學家捌佇恐龍化石內底，發現in胃裡保存的最後兩頓，是另外一種動物的腿，這種足罕得看的化石，會使幫助科學家更加閣較進一步了解恐龍的食食。      總講一句，科學家會透過足濟方法來了解恐龍的食食慣勢。      今仔日的主題就講到遮，感謝逐家的收聽。 - - - - - - - - - - - - - - 屎桮 sái-pue 胡蠅舞屎桮。 Hôo-sîn bú sái-pue. 哺 pōo 無的確 bô-tik-khak 罕得 hán-tit - - - - - - - - - - - - - - FB迷眾頁：https://reurl.cc/oRQozq 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

21一恐龍紹介（peh樹鳥龍） Scansoriopteryx     Peh-tshiū-tsiáu-liông，華語叫做「擅攀鳥龍」，伊號名的意思是「會peh樹的翼仔」，目前猶無清楚這種恐龍是佇啥物所在發現的，因為伊是對無記錄正確地質數字的私人化石經銷商遐得著的。是中國的科學家佇2002年發表出來的，這種恐龍大概是生活佇1億6千萬年前的侏羅紀尾期。      這種恐龍目前干焦發現一隻，體重100公克，體長包括伊的尾，干焦18公分，差不多大人手的一掠闊，就是手展開的時，大頭拇到尾指的長度按呢爾，伊尾溜的長度大約是身軀的三倍，所擺身軀的部分干焦4公分彼跤兜，若像厝鳥仔遮大隻。毋閣這是一隻猶未大到在的幼囝，成年的peh樹鳥龍應該會較大隻。伊的頭大大粒，目睭大大蕊，下槽的喙齒超過12齒，尖尖利利的喙齒，足適合食肉欸！伊的前跤足長足勇欸！第一指上短，第三指上長，是第二指的兩倍，跤爪嘛足發達的。後跤明顯無前跤勇，毋過嘛是會使共身軀牚起來行，伊長長的尾毋但會使予伊佇運動的時保持身軀平棒，嘛會使佇peh樹仔的時陣鬥牚身軀，遮的特徵攏顯示伊是足gâu peh 樹仔欸！伊嘛會像啄樹仔鳥仝款，食樹皮內底的蟲豸，毋過伊毋是用喙啄，是用伊長長的跤爪，共肥軟的蟲豸撓出來食。      是按怎伊欲佇樹仔頂生活咧？因為伊足細隻欸，樹仔頂會使予伊閃避大型動物，而且樹仔頂有蟲豸通好食。雖罔伊的身軀頂有羽毛，毋過佮這馬鳥仔的羽毛無仝，伊的羽毛袂使幫助伊飛起來，干焦會使保持溫暖，伊勇健的跤予伊會使像猴山仔按呢，佇樹仔頂跳來跳去。科學家認為peh樹鳥龍佮鳥仔類有足倚的親緣關係，凡勢peh樹鳥龍會是拍開鳥仔飛行源頭謎題的鎖匙。      今仔日的「peh樹鳥龍」就講到遮，感謝逐家的收聽。 - - - - - - - - - - - - - - -  一掠闊 tsi̍t lia̍h khuah 彼跤兜 hit kha-tau 撓 ngiáu - - - - - - - - - - - - - - - FB迷眾頁：https://reurl.cc/z1W300 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

20-恐龍紹介(原初鳥)ARCHAEOPTERYX      Guân-tshoo-tsiáu， 華語叫做「始祖鳥」，是1861年佇德國發現的。In的骨骼佮羽毛的痕跡攏齊保存佇一塊石頭頂懸，體型佮這馬的野雞仔差不多大。In德文名的意思就是「上蓋代先的鳥仔」，對19世紀尾期到21世紀初期，原初鳥攏予人認為是上早、上原始的鳥仔，因為in身軀有羽毛，而且是佮現代鳥仔足仝形的羽毛，猶毋閣in喙裡有喙齒、尾椎有21節骨頭，前跤有三支有作用的指頭仔，遮的特徵，煞是佮爬蟲類仝款，in閣有佮細隻食肉恐龍足仝形的後跤，所擺原初鳥的發現嘛予科學家當作是鳥仔對恐龍演化來的證據。      原初鳥身軀的結構，無適合用現代鳥仔的動作來飛，致使in飛行的能力猶無足四序。若按呢本底佇路裡咧行的動物，是按怎變做佇天頂飛咧？科學家有兩種看法：第一種是講in原本佇陸地足gâu走矣！咧走的時陣會用in有羽毛的前跤拍空氣來加速，尾仔前跤發展變做翼仔，in就撇翼仔開始離開塗跤。另外一種看法是講in本底是蹛佇樹仔頂，會使靠in有羽毛的前跤，對一叢樹pha過另外一叢，尾仔沓沓仔發展出飛行的能力。      過去百外年的時間，科學家當作in是恐龍佮鳥仔之間唯一的過渡，猶毋過這幾年閣有發現其他閣較早、閣較原始的有羽毛生物化石，原初鳥佇鳥仔類演化頂懸的地位嘛受著影響矣！      今仔日的「原初鳥」就講到遮，感謝逐家的收聽！ - - - - - - - - - - - - - - - - - - - - - - - - 齊 tsiâu；tsê/tsuê 代先 tāi-sing 四序 sù-sī - - - - - - - - - - - - - - - - - - - - - - - - FB迷眾頁：https://reurl.cc/MOde94 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

19-中國盜龍Sinraptor      Tiong-kok-tō-liông，華語叫做「中國盜龍」，是中國佮加拿大的科學家做伙合作，佇1987年到1988年，用兩年的時間，對中國西北的沙漠內底發現的。伊號名的意思是「對中國來的盜賊」。這種恐龍是生活佇1億6千萬年前的侏羅紀尾期，in佮進前紹介的永川龍有倚近的親緣關係。      現此時有兩種中國盜龍，體型大細精差誠濟，一種體長7米半，頭骨85公分，體重1噸8，另外一種較大隻，體長9米，頭骨104公分，體重3噸半，懸度欲倚3米，伊主要的特徵是頭骨粗，佮永川龍比起來，中國盜龍的頭較長嘛較低。伊的喙䫌骨，就是華語講的顴骨，發展做大的氣囊，前跤誠勇，後跤較長，佇仝體長的恐龍內底，伊算是躼跤ê，身軀嘛足粗勇。      In生活佇懸地樹林倚水的所在，走的速度不止仔緊，較gâu長途逐獵物，猶閣有咬物件的力頭足大ê，古生物學家捌佇其他恐龍的身軀頂，發現中國盜龍留落來的喙齒號，毋但會咬細隻的食植物的恐龍，進前紹介的食肉的一髻龍，嘛有予in咬過的號。In嘛會去掠足大隻的馬門溪龍，不而過馬門溪龍嘛無好惹，有中國盜龍的化石顯示伊有去予馬門溪龍的尾溜捽著的號喔！     今仔日的「中國盜龍」就講到遮，感謝逐家的收聽。 - - - - - - - - - - - - - - - 盜賊 tō-tsha̍t 精差 tsing-tsha 不止仔 put-tsí-á - - - - - - - - - - - - - - - FB迷眾頁：https://reurl.cc/6vV8oO 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

18-恐龍紹介(一髻龍) Monolophosaurus      Tsi̍t-kuè-liông，華語叫做單冠龍」，這種恐龍化石佇1984年的中國新疆發現的，雖然干焦發現一隻，毋過保存甲誠完整。一開始因為是佇將軍廟發現的，共號做將軍廟龍，尾仔決定號做「一髻龍」，學名的意思是「有一个頭髻的杜定」，因為佇伊頭骨的中線有一个髻。伊大約是生活佇1億6千6百萬年前侏羅紀中期的中國。     伊的體長量其約仔有5米。體重450公斤，懸度1米7，頭骨的長度80公分，頭髻的位置佇鼻頭到目睭的所在，欲倚規粒頭長度的4分之3，這个頭髻不是用來相拍欸，顛倒是欲用來唌仝類的目。伊的頭骨結構顯示伊有足發達的鼻仔，真有可能是虎鼻師。      發現一髻龍化石的所在有水痕，所以一髻龍大概生活佇湖邊抑是海岸邊，伊主要應該是食魚仔抑是細隻恐龍，因為伊狹狹的喙、整齊的喙齒、扭掠的頷仔頸，足適合掠魚仔來食，猛醒但是無結實的身軀，干焦會使掠細隻動物來食，無法度掠著中、大型食植物的恐龍。仝彼咧時代佇遐生活的恐龍，有食植物的馬門溪龍，佮比一髻龍閣較大隻食肉的「中國盜龍」，一髻龍凡勢嘛是中國盜龍的獵物喔！     今仔日的「一髻龍」就講到遮，感謝逐家的收聽。 - - - - - - - - - - - - - - -  將軍 tsiong-kun 量其約 liōng-kî-iok 虎鼻師 hóo-phīnn-sai 好鼻獅 hó-phīnn-sai - - - - - - - - - - - - - - - FB迷眾頁連結：https://reurl.cc/RWaOq6 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

17—恐龍紹介（美頦龍) COMPSOGNATHUS    Bí-hâi-liông，華語叫做「美頜龍」抑是「細顎龍」，是1850年佇德國發現的。In的下頦瘦抽，所以就共號做「美頦龍」，in是生存佇1億4千5百萬年前侏羅紀尾期的歐洲海岸邊。In足細隻 的，佮火雞差不多大，身長大約一米長，體重干焦3公斤，尾溜的長度有身軀一半較加的長。    In長長的頷仔領誠溜掠，頭骨足輕的，目睭誠大蕊，喙齒有68齒，雖然足細齒，毋過攏足利ê，適合食細隻動物。前跤比後跤較短，前跤有三支指頭仔，攏有跤爪，猶毋過干焦2指有法度拗彎，第三指若像彎袂起來。美頦龍是用後跤咧行，長長的尾溜會使佇in走的時陣保持身軀平棒，in走的速度足緊的，科學家推算in 100公尺可能免6秒就走了矣！    In可能會食蟲豸佮杜定，古生物學家捌佇in化石胸坎的所在，發現一副完整的杜定化石，所擺美頦龍可能會共獵物規隻吞落去。    過去有誠長的一段時間，科學家攏當作美頦龍是上細隻的一種恐龍，猶毋過這幾年閣有發現足濟種比美頦龍較細隻的恐龍，一寡故事册内底講in會規群做伙活動 ，猶毋過科學家認為目前猶無科學證據通證明這件代誌。   今仔日的「美頦龍」就講到遮，感謝逐家收聽。 - - - - - - - - - - - - - - -  瘦抽 sán-thiu 扭掠 liú-lia̍h 平棒 pênn-pāng/pînn-pāng - - - - - - - - - - - - - - -  FB迷眾頁：https://reurl.cc/OGlabX 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

16一恐龍紹介(蠻龍)Torvosaurus     Bân-liông，華語叫做「蠻龍」。第一擺發現這種恐龍應該大概是佇1899年的美國，毋過正式號名發表，是佇1979年，號名的意思是「野蠻的杜定」。In大概是生活佇1億6千5百萬年進前的侏羅紀尾期。除了美國，另外葡萄牙、德國嘛捌發現蠻龍的化石。     In的體長上長有到11米，體重4噸到5噸，懸度差不多有4米。In的頭骨誠長，古生物學家用高科技恢復蠻龍頭殼的形體，推測in的頭應該有1米2，佮一个7歲囡仔的身懸差不多。喙齒大大利利，咬物件足有力ê，會使共其他恐龍的骨咬予碎。In的後跤粗勇，走足緊的，前跤比起來是有較短，猶毋過足有力的，而且有尖尖的跤爪，會使真緊共獵物拍倒。猶毋過in長長的身軀較歹轉斡，較歹通過彎彎狹狹的所在。      蠻龍佮異特龍、角鼻龍佇仝一个地層予人發現。這三種食肉的恐龍欲按怎共同生活，嘛是科學家足想欲了解的問題。有ê人認為遮的大型食肉的恐龍，生活的空間有可能攏離較開。異特龍較愛佇焦燥的平地活動，蠻龍佮角鼻龍可能會較愛倚水的所在；嘛有學者認為這三種恐龍身體的結構無仝，喙齒、頭型、頷仔頸的活動程度，會影響著in食食的慣勢，異特龍gâu齧骨頭，角鼻龍食肉，蠻龍會共獵物拆開，所擺這三種食肉的恐龍，嘛有可能共同生活喔！     今仔日的「蠻龍」就講到遮，感謝逐家的收聽。 - - - - - - - - - - - - - - - 轉斡 tńg-uat 狹狹 e̍h-e̍h 慣勢 kuàn-sì - - - - - - - - - - - - - - - FB迷眾頁：https://reurl.cc/nr8K82 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

15-恐龍紹介(角鼻龍）Ceratosaurus      Kak-phīnn-liông，華語叫做「角鼻龍」，是1884年佇美國發現的，伊號名的意思是「有角的杜定」，因為in的鼻仔頂懸有一个短短仔的角。In大約是生活佇1億5千萬年前的侏羅紀尾期，活動的範圍可能包括這馬的北美洲、南美州、歐洲佮非洲。      In的體長5米到7米，體重欲倚1噸，前跤雖罔較短，毋過功能完整，有4支指頭仔，後跤較長，用後跤咧行。In的特徵除了鼻仔頂懸有角，目睭頂懸嘛有一對。對頷仔頸、尻脊骿到尾溜的中線，有一排phok-phok的皮甲。頭大大，下頦長長，喙内有形體若長刀的喙齒。腰粗粗，尾長長闊闊，略仔成鱷魚的尾，可能會使幫助in泅水。      鼻角的作用是啥?有科學家認為是攻擊抑是保護家已的武器，嘛有科學家認為in袂用鼻角去佮別種恐龍相拍，顛倒是咧爭母ê的角鼻龍的時，佮别隻公的角鼻龍相挵咧用的，閣有學者認為鼻角干焦是看媠爾爾，完全無法度用來相拍，所擺鼻角可能有顯目的色水，凡勢仝群內底會比啥人的角較大，啥人就來做王。      科學家閣捌佇一个角鼻龍跤骨的化石，發現伊的跤骨有折去閣好去的號，所以恐龍的骨頭嘛是會折去的喔！      角鼻龍佇19世紀就發表出來，長期以來發展做一種誠有代表性的食肉的恐龍，足濟文學作品佮電影內底攏有講著In。一直到20世紀初期暴龍的發現，tsua̋nn漸漸代替角鼻龍的地位矣！      今仔日的「角鼻龍」咱就講到遮，感謝逐家的收聽。 - - - - - - - - - - - - - - - - - - - - - - - - - - - - - - 泅水 siû-tsuí 色水 sik-tsuí 骨頭折去 kut-thâu-tsi̍h--khì - - - - - - - - - - - - - - - - - - - - - - - - - - - - - - 面冊迷眾頁：https://reurl.cc/L4OYd4 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

14-恐龍紹介(異特龍)ALLOSAURUS      Ī-ti̍k-liông，華語叫做「異特龍」，是1877年美國古生物學者發現的，號名的意思是「無仝款的杜定」，因為in凹(nah）落去的龍骨佮彼當時已經知影的恐龍攏無siāng，In生活佇1億5千萬年前的侏羅紀尾期，平均體長10米，體重2噸半，in咧走的速度可能一點鐘會使走30至55公里。      In上明顯的特徵是目睭頂懸有細的角髻，角髻的功能猶無確定，有可能會使替目睭遮光。In的跤目特別懸，跤的頂懸有鱗，前跤粗勇，有三支指頭仔，攏有跤爪，會使共獵物拆開，用後跤咧行。In有70齒邊仔有鋸齒的喙齒，攏足利的，假使有某一齒佇拍獵的過程中落去，真緊就會閣發一齒新的喙齒補彼个空。      異特龍的化石予人發現的量袂少，所擺in算是予古生物學家研究較齊透的一種恐龍。根據對in關節的研究，in的下頦有法度開足開，予in會使一喙共細隻恐龍吞落去腹肚，嘛會使對大型食植物的恐龍身軀頂咬一塊肉落來。異特龍蹛佇美國中西部，彼个所在佇仝彼个時代嘛有劍龍、迷惑龍佇遐生存，異特龍會共in當作食物，猶毋過in嘛袂乖乖予食，有一隻異特龍伊尾的化石看起來捌受傷過，骨頭頂懸有一个空，古生物學家認為彼應該是予劍龍尾溜頂懸的刺鑿著造成的空喙喔！      今仔日的「異特龍」咱就講到遮，感謝逐家的收聽。 - - - - - - - - - - - - - - - - - - - - - - - - 龍骨 liông-kut 齊透tsiâu-thàu 鑿tsha̍k - - - - - - - - - - - - - - - - - - - - - - - - 面冊迷眾頁：https://reurl.cc/N4m6A5 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

13–恐龍紹介(永川龍) YANGCHUANOSAURUS      Íng-tshuan-liông，華語叫做「永川龍」，是1977年佇中國永川這个所在，做水壩工程的時陣挖著的，所以就共號做「永川龍」。In應該是生活佇離這馬1億6千萬年前的侏羅紀尾期，是目前所知影佇彼當時、彼个所在上大隻的食肉的恐龍。古生物學家認為in的體長可能有11米，佮一台公車差不多長，徛咧的時陣有4米懸，超過一層樓的懸度，體重30噸，走的速度上緊會使到一點鐘50公里。      In的前跤短，毋閣足溜掠，有三支指頭仔，攏有跤爪，後跤粗勇，嘛有三趾，是用後跤咧行。頷仔頸較短，尾較長，徛咧的時陣尾會使鬥牚身軀，走的時陣，尾會翹懸，幫助身軀平棒。      In的頭殼欲倚一米長，小可仔三角形，頭殼骨兩爿有6對的空，會使減輕頭殼的重量。In的目睭應該袂䆀，in定定出現佇樹林抑是湖邊，可能會像這馬的虎、豹這類的動物仝款，較愛單獨活動，掠動物來食，靠in足利的跤爪佮喙齒，一下仔就會使拍倒較荏身的恐龍，是足粗殘的殺手,連足大隻的馬門溪龍，攏會變做in的食物喔！      今仔日「永川龍」就講到遮，感謝逐家的收聽。 - - - - - - - - - - - - - - - - - - - - 倚 uá 荏身 lám-sin 粗殘 tshoo-tshân - - - - - - - - - - - - - - - - - - - - 面冊迷眾頁：https://reurl.cc/G4vxvv 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

12一 恐龍紹介(奇翼龍) YI      Kî-si̍t-liông，華語叫做「奇翼龍」，是2007年中國的一个作穡人發現的，尾仔伊共賣予博物館，科學家共這種恐龍號作「奇翼龍」，就表示伊有足特别的翼仔，伊身軀有羽毛，毋過佮這馬鳥仔的羽毛無仝款，伊的翼仔較成夜婆，有薄薄仔的膜。      In應該是生存1億5千900萬年進前的侏羅紀，遐應該是樹仔懸大的樹林，in足細隻欸，翼股展開的寬度差不多60公分爾爾，體重360公克，體型佮客鳥仔差不多。In的頭短短，喙齒無濟，前跤較長，後跤較短，前跤第一指上短，第三指上長，皮膜對第三指佮身軀相連，變做足成夜婆的翼股。猶毋過in襟胸無夠發達，可能沒法度像鳥仔展翼對塗跤起飛，嘛無法度飛較懸咧，in可能足gâu peh樹仔，會使像飛鼠按呢，對較懸的所在pha去較低的所在，甚至嘛有科學家認為in的翼股凡勢毋是用來飛的，是用來表演欲賢唌母的奇翼龍。奇翼龍無法度飛，可能就是in佮鳥生存競爭輸去的原因，當當in拄著敵人的時，鳥仔會使飛去樹仔頂，奇翼龍干焦會使pha去較低的所在，走無路的結果就是予敵人食去矣！      今仔日的「奇翼龍」就講到遮，感謝逐家收聽。 - - - - - - - - - - - - - - - - - - - - - - - - 夜婆（iā-pô）、密婆（bi̍t-pô） 客鳥仔（kheh-tsiáu-á) 唌(siânn) - - - - - - - - - - - - - - - - - - - - - - - - FB迷眾頁：https://reurl.cc/G4lDbv 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

11一恐龍紹介(巨龍)   MEGALOSAURUS      Kī-liông，華語叫做「巨龍」、「巨齒龍」，抑是「斑龍」，是上早予人發現的恐龍，是1677年佇英國發現的，猶毋過彼陣猶毋知有恐龍這種動物，一个英國的牧師共這種化石講是古早時代巨人的骨頭，一直到1823年閣發現這種動物才共號名叫「巨龍」，伊號名的意思是「足大隻的杜定」。      In生存佇1億6千6百年前的中侏羅紀。In的頭大大，喙齒長長彎彎，差不多有10公分長，佮人類咧用的護身刀足仝形，體長超過6米，比兩隻犀牛閣較長，懸度是大人的兩倍懸，體重欲倚1噸，用粗勇的後跤咧行，古生物學者根據發現的巨龍跤跡當中兩个跤印中央的距離來算，巨龍的後跤長度應該欲倚2米，後跤有5趾，内爿第一趾短短，向後壁，第5趾退化，賰的三趾足發達的，有跤爪，前跤干焦後跤的一半長，但是誠勇，有三个利利的跤爪，按呢的武器，予in會使攻擊大型的食植物的恐龍。      按巨龍行路的距離判斷，in行路的速度大約一點鐘行7公里，但是當當in欲掠其他恐龍來食的時陣，就會改用走的，尾嘛會攑懸懸保持身軀平衡，猶毋過巨龍的體形無法度長時間用走的，所以除了掠食植物的恐龍來食以外，in嘛有可能四界揣漚肉來食。      今仔日的「巨龍」就講到遮，感謝逐家的收聽。 - - - - - - - - - - - - - - - - - - - - 犀牛 sai-gû 當當 tng-tong 漚肉 àu bah - - - - - - - - - - - - - - - - - - - - FB迷眾頁：https://reurl.cc/4jYqnV 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting

10—恐龍紹介(冰髻龍)       CRYOLOPHOSAURUS      Ping-kuè-liông，華語叫做「冰脊龍」、「冰冠龍」，這種恐龍的化石是1991年佇南極發現ê，因為in頭頂有髻，閣是佇南極生活，所以就共in號做「冰髻龍」。      In頭殼骨的長度差不多65公分，比拄出世的囡仔較長，頭殼頂的髻是横的，若葵扇展開的形體，而且閣彎向頭前，若像西洋歌手貓王的頭毛按呢懸懸彎彎，有學者講耍笑共叫做「貓王龍」，閣有人講in的髻足成國王的皇冠，所以共叫做「國王龍」，遮的稱呼是毋是蓋趣味neh！猶毋過這个髻沒法度做武器，應該是用來嚇驚敵人，哪無就是用來吸引母的冰髻龍。      冰髻龍應該是佇1億9千年前的早侏羅紀生活佇咧南極，毋過彼當陣的南極大陸較倚赤道，氣候較溫暖，毋是像這馬規年迵天攏結冰，所擺頂懸嘛有袂少植物。In的前跤有跤爪，後跤比前跤較長，一般是用後壁兩跤咧行路。In的喙内有足濟喙齒，體長6公尺，體重450公斤，可能是彼當時南極地區上大隻的食肉的恐龍。      咱今仔日的「冰髻龍」就講到遮，感謝逐家的收聽。 - - - - - - - - - - - - - - - - - - - -  葵扇 khuê-sìnn 嚇驚 heh-kiann 規年迵天 kui-nî-thàng-thinn - - - - - - - - - - - - - - - - - - - - FB迷眾頁：https://reurl.cc/97WRjO 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting