精神罔開講 Cheng-sîn bóng khai-káng

Chiap-sio̍k téng hôe teh kóng chêng-sū chiòng-gāi ê hoat-chok, chit hôe beh iau-chhiáⁿ ta̍k-ke lâi se̍k-sāi “ut-chèng”. Ut-chèng-hoat-chok m̄-sī kan-na tan-sûn sim-chêng ut-chut niā-niā. Ut-chèng sū-si̍t-siōng sī seng-lí in-sò͘ chiâⁿ tāng ê pēⁿ-chèng. Hoān-chiá ê ho͘-lú-bóng, bián-e̍k, kap náu-sîn-keng hē-thóng kî-si̍t lóng ū piàn-hòa. Tī-liâu mā ū chin chē mê-kak. Siōng iàu-kín sī lán ài iōng siáⁿ-mih thāi-tō͘ lâi kā hoān-chiá chi-chhî. Ǹg-bāng thiaⁿ-chiòng ē-sái tùi chit hôe chiat-bo̍k ke-kiám-á liáu-kái ut-chèng ê pún-chit. ================= 【ut-chèng 鬱症】 “major depressive disorder” Hoān-chiá kan-na ū keng-giām kòe chì-chió chi̍t-pái ê ut-chèng hoat-chok, bô keng-giām kòe sò-kông a̍h-sī kheng-sò hoat-chok. Chín-toàn chhut ut-chèng, piáu-sī hoān-chiá m̄ sī tan-sûn sim-chêng bái niā-niā. Hiān-tāi i-ha̍k í-keng ū chin chē chèng-kù chi-chhî ut-chèng sī tōa-náu seng-lí hong-bīn ê pēⁿ-chèng. 【kè-sio̍k-sèng ut-chèng 繼續性鬱症】 “persistent depressive disorder” Hoān-chiá ê ut-chut piáu-hiān sī liân-sòa î-chhî siong-tùi tn̂g ê sî-kan, ū ê hoān-chiá mā ē keng-giām ut-chèng hoat-chok. Kòe-khì ū “kheng-ut-chèng” ê kóng-hoat, m̄ koh sū-si̍t-siōng hoān-chiá khùn-liáu ê thêng-tō͘ bô-it-tēng pí ut-chèng khah kheng, chí-sī ū khùn-liáu ê sî-kan khah tn̂g. ================= E-mail: [email protected] 漢字版說明請到面冊： https://www.facebook.com/profile.php?id=61568080851449&mibextid=LQQJ4d 音樂製作：農村武裝青年-俐君 -- Hosting provided by SoundOn

Lán ê podcast chóng-sǹg koh khí-kiâⁿ—lo͘h. Si̍t-chāi sī chit chām-á sin-thé bô kài hó-sè, sim-chêng tòe leh bô sóng-khoài. Soah hioh-khùn pí pún-lâi phah-sǹg—ê khah kú. Lán lâng ê sim-chêng chū-liân sûi-tio̍h lán ê keng-giām ū khí-lo̍h piàn-hòa, m̄ koh nā chhiau-kòe it-tēng ê hoān-ûi, hêng-ûi kap su-khó khó-lêng ē ū chin tōa ê piàn-hòa, hō͘ lâng kám-kak piàn chi̍t-ē lâng, sīm-chì éng-hióng tio̍h ji̍t-siông seng-oa̍h. Chit hôe lán chò-hóe lâi liáu-kái tàu-té chêng-sū piàn-hòa kàu siáⁿ-mih thêng-tō͘ ē sǹg sī pēⁿ-thài ê chiòng-gāi. ================= 【chêng-sū 情緒】“mood” Cheng-sîn i-ha̍k thong-siông iōng lâi biâu-su̍t chi̍t-ê lâng siū khoân-kéng kap keng-giām éng-hióng chi-hā siong-tùi tn̂g-kî ê sim-chêng piàn-hòa chhu-sè. 【chêng-kám 情感】“affect” Cheng-sîn i-ha̍k thong-siông iōng-lâi biâu-su̍t chi̍t-ê lâng sim-chêng piàn-hòa piáu-hiān—chhut-lâi hō͘ lâng ē-tàng koan-chhat ê pō͘-hūn. 【sò-kông 躁狂】 “mania” Mā ē-sái kóng “sò-chèng”. Khah óa Tâi-oân-ōe chāi-lâi kóng “lia̍h-kông” “thô-hoe-tian”. Hoān-chiá in-ūi sim-chêng kap lêng-liōng chhèng koân, ū kòe-tō͘ chū-sìn, kòe-tō͘ hoaⁿ-hí, bô su-iàu khùn, kāu-ōe, su-khó kòe chē, oa̍h-tōng kòe chē, chhiong-tōng, bô kò͘ hong-hiám téng-téng piáu-hiān. Chèng-thâu nā liân-sòa chi̍t lé-pài í-siōng ia̍h-sī giâm-tiōng kàu su-iàu tòa-īⁿ lóng chún-sǹg. 【kheng-sò 輕躁】 “hypomania” Lūi-sū sò-kóng ê piáu-hiān, m̄ koh sî-kan siōng sī liân-sòa 4 kang í-siōng tiō chún-sǹg, thêng-tō͘ mā siong-tùi khah kheng. 【siang-kek-chèng 雙極症】 “bipolar disorder” Mā ē-sái kóng “sò-ut-chèng”. Hoān-chiá ê chêng-sū khí-lo̍h bô ún-tēng. Ē keng-giām tio̍h sò-chèng kap ut-chéng kau-thè hoat-chok. I-chiàu piáu-hiān ē pun chò chin chē bô kâng lūi-hêng. ================= E-mail: [email protected] 漢字版說明請到面冊： https://www.facebook.com/profile.php?id=61568080851449&mibextid=LQQJ4d 音樂製作：農村武裝青年-俐君 -- Hosting provided by SoundOn

Kòe-nî chêng siōng bóe chi̍t hôe, lán sió hioh-chhoán chi̍t-ē. Kā ta̍k-ke hun-hióng chiat-bo̍k pháng kàu taⁿ siu-tio̍h—ê thiaⁿ-iú ì-kiàn. Sūn-sòa hun-hióng góa tùi choan-iú-sû hoan-e̍k ê khòaⁿ-hoat. (Iú-koan thiaⁿ-iú kiàn-gī “grandiose delusion” ê kóng-hoat, ta̍k-ke nā ū hèng-chhù ē-sái chham-khó bīn-chheh tē 7 hôe tah-bûn ê lâu-ōe.) ================= E-mail: [email protected] 欲看漢字請到面冊： https://www.facebook.com/profile.php?id=61568080851449&mibextid=LQQJ4d 音樂製作：農村武裝青年-俐君 -- Hosting provided by SoundOn

Chit hôe lán lâi pó͘-chhiong su-kak-sit-tiâu-chèng ê pēⁿ-in, pí-lû seng-bu̍t-ha̍k siong-koan ê chèng-kù. Sian-thian kap hō͘-thian ê in-sò͘ lóng kài tiōng-iàu. Mā ē kán-tan kái-soeh su-kak-sit-tiâu-chèng tī-liâu kòe-têng ê chi̍t-kóa mê-kak. ================= 【hái-má-kau 海馬勾】 “hippocampus” Tī tōa-náu nn̄g pêng ná-chhiūⁿ hái-má ê sîn-keng kò͘-chō, chú-iàu kong-lêng sī kì-tî, pí-lû kā té-kî kì-tî kò͘-hòa chò tn̂g-kî kì-tî. 【hēng-lîn-hu̍t 杏仁核】 “amygdala” Kah hái-má-kau sio-óa ná-chhiūⁿ hēng-lîn ê sîn-keng kò͘-chō, chú-iàu kong-lêng sī kah kiaⁿ-hiâⁿ iú-koan ê hoán-èng kap kì-tî. 【chêng-gia̍h-tōa-náu-phôe-chit 前額大腦皮質】 “prefrontal cortex” Tī tōa-náu gia̍h-hio̍h thâu-chêng pō͘-hūn ê phôe-chit, chú-iàu teh koán lâng ê chip-hêng kong-lêng, chhiūⁿ kè-ōe, chò koat-tēng, siā-hōe hêng-ûi, chêng-sū tiâu-chiat téng-téng. 【sī-khu 視丘】 “thalamus” Tī tōa-náu kah tiong-náu sio-liân ê só͘-chāi, ē chiap-siu sin-khu lâi ê chhì-khek chéng-ha̍p koh thoân khì tōa-náu-phôe-chit, chú-iàu kong-lêng pau-koat lâng ê ti-kak chéng-ha̍p, ì-sek, khùn-chhéⁿ téng-téng. 【ki-té-hu̍t 基底核】 “basal gaglia” Tī tōa-náu chhim-pō͘ ê sîn-keng sè-pau, kah tōa-náu-phôe-chit ū chin chē sio-liân soaⁿ-lō͘, kong-lêng pau-koat tiâu-chiat tōng-chok, līn-ti, chêng-sū téng-téng. 【sió-náu 小腦】 “cerebellum” Tī tōa-náu āu-bīn ē-kha, chú-iàu teh koán lâng ê iù-tōng-chok, chu-sè î-chhî, pêng-hêng-kám téng-téng. 【tō͘-phak-bín】 “dopamine” Chi̍t chióng sîn-keng-thoân-ta̍t-bu̍t-chit, tī náu-sîn-keng ū kúi-ā tiâu bô kâng ê tō͘-phak-bín soaⁿ-lō͘, kah lâng ê tōng-ki, ti-kak, tōng-chok ū koan-liân. 【 tn̂g-hāu-siā 長效射】 “long-acting injection” Io̍h-hāu ē-sái tòng kúi-ā lé-pài, hō͘ hoān-chiá m̄-bián ta̍k-kang chia̍h io̍h-á ê khòng-cheng-sîn-pēⁿ-che. ================= E-mail: [email protected] 欲看漢字請到面冊： https://www.facebook.com/profile.php?id=61568080851449&mibextid=LQQJ4d 音樂製作：農村武裝青年-俐君 -- Hosting provided by SoundOn

Chiap-sio̍k lán téng chi̍t hôe thó-lūn ê cheng-sîn-pēⁿ, lán chit hôe beh lâi chò-hóe liáu-kái su-kak-sit-tiâu-chèng, tiō sī í-chá kiò-chò cheng-sîn-hun-lia̍t-chèng ê ki-chhó͘ tì-sek. Chit ê pēⁿ ē ū siáⁿ-mih piáu-hiān, hoat-pēⁿ liáu khó-lêng ê piàn-hòa, koh ū tn̂g-kî tī-liâu ê tiōng-iàu. ================= 【su-kak-sit-tiâu-chèng 思覺失調症】“schizophrenia” Chi̍t-khoán goân-hoat-sèng cheng-sîn-kho pēⁿ-chèng. Hoān-chiá piáu-hiān chú-iàu sī tn̂g-kî ê cheng-sîn-pēⁿ éng-hióng—tio̍h siā-hōe kong-lêng. Mā ū khó-lêng ē sán-seng chêng-sū chèng-thâu kap līn-ti kong-lêng chiòng-gāi. Thong-siông ài tn̂g-kî tī-liâu. Kòe-khì hō-chò cheng-sîn-hun-lia̍t-chèng, Tâi-oân tī 2014 nî kái miâ. 【kiong-ti̍t-chèng 僵直症】 “catatonia” Chi̍t chióng cheng-sîn tōng-chok kái-piàn ê chèng-thâu. Piáu-hiān khó-lêng ū: hoān-chiá tùi gōa-chāi khoân-kéng ê chhì-khek bô hoán-èng, pó-chhî kò͘-tēng kî-koài ê chu-sè, bô lí-iû ê kek-tōng, chú-tōng chhut-la̍t té-khòng gōa-lâi ê le̍k-liōng, bô͘-hóng pa̍t-lâng ê ōe ia̍h-sī tōng-chok téng-téng. Tû-liáu su-kak-sit-tiâu-chèng í-gōa, giâm-tiōng ê chêng-sū chiòng-gāi ia̍h-sī sin-thé pēⁿ-chèng mā ū khó-lêng sán-seng chit khoán piáu-hiān. Mā ū lâng hoan-e̍k chò 【kín-tiuⁿ-chèng 緊張症】. 【im-sèng chèng-thâu 陰性症頭】 “negative symptom” Chi̍t khoán su-kak-sit-tiâu-chèng ê chèng-thâu. Piáu-sī hoān-chiá khiàm-khoat it-poaⁿ lâng èng-tong ū ê sim-lí ki-lêng, pí-lû khiàm tōng-ki, khiàm siā-kau, khiàm kóng-ōe, khiàm chêng-sū piáu-ta̍t téng-téng. Siong-tùi-sû 【iông-sèng chèng-thâu 陽性症頭】piáu-sī hoān-chiá ū it-poaⁿ lâng bô keng-giām—tio̍h ê chèng-thâu, chhiūⁿ hoàn-kak kap bōng-sióng. 【bōng-sióng-chèng 妄想症】 “delusional disorder” 【té-kî cheng-sîn pēⁿ-chèng 短期精神病症】 “brief psychotic disorder” 【lūi-su-kak-sit-tiâu-chèng 類思覺失調症】 “schizophreniform disorder” 【chêng-kám su-kak-sit-tiâu-chèng 情感思覺失調症】 “schizoaffective disorder” ================= E-mail: [email protected] 欲看漢字請到面冊： https://www.facebook.com/profile.php?id=61568080851449&mibextid=LQQJ4d 音樂製作：農村武裝青年-俐君 -- Hosting provided by SoundOn

Bêng-khak ê chèng-thâu biâu-su̍t ē-sái kóng sī cheng-sîn i-ha̍k ê ki-chhó͘ Liáu-kái lîn-lūi ê cheng-sîn ū khó-lêng sán-seng siáⁿ-mih khoán ê piàn-hòa, ē-sái hō͘ lán sióng-siōng hoān-chiá ê keng-giām. Chit hôe lán beh lâi kóng it-poaⁿ lâng hán-tit ū keng-giām kòe ê chèng-thâu, tiō sī pau-koat hoàn-kak, bōng-sióng, su-khó hêng-sek chiòng-gāi ê cheng-sîn-pēⁿ. ================= 【cheng-sîn-pēⁿ 精神病】“psychosis” Cheng-sîn i-ha̍k teh khí-pō͘ sî sú-iōng ê hun-lūi miâ-sû, biâu-su̍t ē éng-hióng hoān-chiá hiān-si̍t phòaⁿ-toàn ê pēⁿ-chèng. Hiān-tāi ê hē-thóng hán-tit kā cheng-sîn-pēⁿ tòng-chò chèng-sek chín-toàn, tiāⁿ iōng lâi piáu-sī hoān-chiá ū siong-koan chèng-thâu, siong-tùi-sû sī “neurosis”【sîn-keng-pēⁿ 神經病】. 【hoàn-kak 幻覺】 “hallucination” Ti-kak hong-bīn ê chèng-thâu. Khoân-kéng bô tùi-èng ê chhì-khek, lâng soah sán-seng kám-kak. Pí-lû thiaⁿ—tio̍h gōa-chāi khoân-kéng bô chûn-chāi ê siaⁿ-im kiò-chò thèng-hoàn-kak; khòaⁿ—tio̍h kiò-chò sī-hoàn-kak; phīⁿ—tio̍h kiò-chò hiù-hoàn-kak; bong—tio̍h kiò-chò chhiok-hoàn-kak. Tùi hoān-chiá ê keng-giām lâi kóng, hoàn-kak kap it-poaⁿ ê ti-kak kâng-khoán chin, só͘-í hoān-chiá ē līn-ûi gōa-chāi khoân-kéng chin-chiàⁿ ū chhì-khek lâi-goân. 【bōng-sióng 妄想】 “delusion” Su-khó lāi-iông hong-bīn ê chèng-thâu. Keng-giām lâi bô ha̍p-lí ê khí-in kap chhui-lūn kòe-têng, lâng soah sán-seng kian-tēng nā sìn-liām ê siūⁿ-hoat. Pa̍t-lâng nā thê-kiong hoán-chèng, hoān-chiá iu-goân sī siong-sìn bōng-sióng ê lāi-iông. Jî-chhiáⁿhoān-chiá ē kā gōa-lâi keng-giām kap lōe-chāi ê bōng-sióng kat-chò-hóe. Kin-kù lāi-iông ē-sái kiò-chò koan-hē bōng-sióng, pī-hāi bōng-sióng, tio̍h-chha̍t-thau bōng-sióng, put-tiong bōng-sióng (chiat-bo̍k lāi tha̍k chia̍h-chhò͘, chit-tò͘), chêng-ài bōng-sióng, chong-kàu bōng-sióng, khoa-tāi bōng-sióng, bô-bāng bōng-sióng, chhò-līn bōng-sióng, pī-khòng-chè bōng-sióng téng-téng. 【su-khó hêng-sek chiòng-gāi 思考形式障礙】 “formal thought disorder” Su-khó kòe-têng hong-bīn ê chèng-thâu. Lâng ê kám-kak ka-tī su-khó bē sūn ū khì piàn-hòa, pau-koat su-khó kóng-pò, su-khó thiu-chhut, su-khó tiong-toān, su-khó chhah-li̍p téng-téng. Hoān-chiá ū khó-lêng ē līn-ûi sī ū gōa-le̍k teh éng-hióng ka-tī ê su-khó. ================= E-mail: [email protected] 面冊： https://www.facebook.com/profile.php?id=61568080851449&mibextid=LQQJ4d 音樂製作：農村武裝青年-俐君 -- Hosting provided by SoundOn

Chòe-kīn ū chi̍t-kóa pêng-iú hòⁿ-kî lán ūi-siáⁿ-mih ài iōng Tâi-gí lâi kóng cheng-sîn-i-ha̍k ê tāi-chì. Só͘-pái chit-hôe beh lâi kóng pún chiat-bo̍k chè-chok pōe-āu ê chi̍t-kóa siūⁿ-hoat. Pau-koat góa kò-lîn o̍h Tâi-gí-bûn ê keng-giām, koh ū tùi tong-chiân Tâi-gí khoân-kéng ê khòaⁿ-hoat. Góa m̄ sī chia̍h-pá siūⁿ êng, sī līn-ûi lán Tâi-oân-lâng chiâⁿ su-iàu khah chē choân Tâi-gí ê mûi-thé kap ha̍k-su̍t chu-goân. Hi-bāng ta̍k-ke nā-ū tông-ì góa ê khòaⁿ-hoat, chò-hóe lâi iōng Tâi-gí-bûn līn-bat chit-ê sè-kài. ================= E-mail: [email protected] 面冊： https://www.facebook.com/profile.php?id=61568080851449&mibextid=LQQJ4d 音樂製作：農村武裝青年-俐君 -- Hosting provided by SoundOn

Thiaⁿ kóng cheng-sîn-kho hō͘-sū chi̍t kang chò tiám-pòaⁿ-cheng tio̍h hó？Kám ū-iáⁿ hia khin-sang？Cheng-sîn-kho ê choan-gia̍p beh án-chóaⁿ kap hoān-chiá poa̍h kám-chêng？Kî-si̍t hó ê tī-liâu koan-hē m̄-nā hō͘ hoān-chiá khah phòe-ha̍p, choan-gia̍p khah khin-sang, i pún-sin mā ū tī-liâu ê hāu-kó o͘h！ ================= 【tī-liâu koan-hē 治療關係】 “therapeutic relationship” Tī-liâu-chiá ia̍h-sī i-ha̍k choan-gia̍p lîn-sū kap hoān-chiá chi-kan, tī tī-liâu kòe-thêng hêng-sêng ê te̍k-pia̍t koan-hē. Hó ê tī-liâu koan-hē mā ū lâng kiò-chò “rapport”. 【gūi-io̍h-hāu-èng 偽藥效應】 “placebo effect” Lâng nā sim-lāi liāu-sióng ū chiap-siū tio̍h tī-liâu, sin-thé chèng-thâu chū-liân ē kái-siān ê hiān-siōng. Chhiūⁿ lîm-chhn̂g chhì-giām tiong iōng chò tùi-chiàu-cho͘ ê gūi-io̍h, bô tī-liâu sêng-hūn soah ē sán-seng tī-liâu hāu-kó. 【tâng-sim 同心】 “empathy” Chi̍t-ē lâng ē-sái thàu-kòe tùi lēng-gōa chi̍t-lâng ê kak-tō͘ lâi sióng-siōng, khì liáu-kái kap hun-hióng tùi-hong ê keng-giām kap kám-siū. Sǹg sī chi̍t-khoán sim-lí kong-lêng, mā sǹg sī chi̍t-khoán lîm-chhn̂g ki-su̍t. ================= E-mail: [email protected] 面冊： https://www.facebook.com/profile.php?id=61568080851449&mibextid=LQQJ4d 音樂製作：農村武裝青年-俐君 -- Hosting provided by SoundOn

Chiap-sòa téng-hôe kóng—tio̍h cheng-sîn-kho ê tī-liâu, sim-lí-tī-liâu mā sī hui-siông tiōng-iàu ê goân-sò͘. Sim-lí-tī-liâu kám lóng ài chhiūⁿ tiān-iáⁿ toh tī phòng-í bīn-téng kóng-ōe？Kám kóng khai-káng pēⁿ tiō ē hó？Chit hôe lâi thiaⁿ sim-lí-tī-liâu tàu-té sī lōa sîn-bi̍t. ================= 【sim-lí-tī-liâu 心理治療】 “psychotherapy” kin-kù sim-lí-ha̍k ê goân-lí, sú-iōng sim-lí-ha̍k ê ki-su̍t, thàu-kòe lâng kap lâng chi-kan ê kau-thong, ta̍t-sêng tī-liâu ê hāu-kó （kái-siān chèng-thâu, kái-piàn hêng-ûi, cheng-ka boán-chiok-kám） 【līn-ti-hêng-ûi tī-liâu 認知行為治療】 “cognitive behavioral therapy” Thàu-kòe tiâu-chéng hoān-chiá ê līn-ti niú-khiok kap siong-koan hêng-ûi, kiông-hòa hoān-chiá ê chêng-sū tiâu-chiat lêng-le̍k kap būn-tê kái-koat lêng-le̍k ê chi̍t-khoán sim-lí-tī-liâu ki-su̍t. 【cheng-sîn-tōng-le̍k tī-liâu 精神動力治療】 “psychodynamic therapy” Kin-kù cheng-sîn-hun-sek lí-lūn hoat-tián ê chi̍t-khoán sim-lí-tī-liâu ki-su̍t. Ē thàu-kòe tī-liâu-su kap hoān-chiá chi-kan ê koan-hē, lâi thàm-thó hoān-chiá sim-tì tiong lōe-chāi chhiong-tu̍t kap bô-ì-sek ê pō͘-hūn. 【chiâm-ì-sek 潛意識】 “subconscious” Sim-lí-ha̍k miâ-sû, chí chi̍t-ê lâng ê sim-tì tiong chū-kí bô-hoat-tō͘ hoat-kak ê pō͘-hūn. M̄ koh Hok-i-tek āu-lâi khah bô iōng chit-ê sû, khah tiāⁿ iōng bô-ì-sek “unconscious”. 【hông-ūi-ki-chè 防衛機制】 “defense mechanism” Sim-lí-ha̍k miâ-sû, chí lâng ē bô-ì-sek ūn-chok ê sim-lí chok-iōng, tiō sī lâng tī lōe-chāi chhiong-tu̍t ia̍h-sī gōa-chāi ap-le̍k éng-hióng chi-hā, sim-tì ē iōng bô-kâng hong-sek lâi pī-bián lâng sán-seng bô sóng-khoài ê su-khó kap kám-kak. Cheng-sîn-hun-sek ha̍k-chiá lâng-miâ Sigmund Freud ／ Hok-i-tek Carl Jung ／ Kha-ióng Alfred Adler ／ A̍t-lò ================= E-mail: [email protected] 面冊： https://www.facebook.com/profile.php?id=61568080851449&mibextid=LQQJ4d 音樂製作：農村武裝青年-俐君 -- Hosting provided by SoundOn

Phòa-pēⁿ tong-liân tiō ài chhōe hong-hoat lâi i, m̄ koh cheng-sîn ê būn-tê beh án-chóaⁿ chhú-lí? Chia̍h io̍h-á kám m̄ sī tùi sin-thé bô hó? Tû-liáu chia̍h io̍h-á í-gōa koh ū siáⁿ-mi̍h hong-sek thang i? Chit hôe lâi kán-tan siāu-kài tī pēⁿ-īⁿ ê cheng-sîn-kho ū hoat-tō͘ chò ê tī-liâu, koh ū io̍h-bu̍t ê ki-pún tō-lí. ================= 【hō͘-lí-su 護理師】 “nurse” 【lîm-chhn̂g sim-lí-su 心理師】 “clinical psychologist” 【siā-hōe-kang-chok-su 社會工作師】 “social worker” 【chit-lêng tī-liâu-su 職能治療師】 “occupational therapist” 【hù-chok-iōng 副作用】 “side effect” 【tìn-chēng-che 鎮靜劑】 “sedative” 【khòng-cheng-sîn-pēⁿ-che 抗精神病劑】 “antipsychotic” 【khòng-ut-che 抗鬱劑】 “antidepressant” 【chêng-sū-ún-tēng-che 情緒穩定劑】 “mood stabilizer” 【tiông-ho̍k keng-lô͘ chû-chhì-kek 重複經顱磁刺激】 “repetitive transcranial magnetic stimulation, rTMS” 【tiān-keng-loân liâu-hoat 電痙攣療法】 “electro-convulsive therapy, ECT” ================= E-mail: [email protected] 面冊： https://www.facebook.com/profile.php?id=61568080851449&mibextid=LQQJ4d 音樂製作：農村武裝青年-俐君 -- Hosting provided by SoundOn

Kì-liân cheng-sîn ē phòa-pēⁿ, án-ne pēⁿ-in sī siáⁿ？Ū lâng kóng sī siū lâng éng-hióng, ū lâng kóng sī in-ūi ap-le̍k tōa, ū lâng kóng sī kha̍h-tio̍h-im. Chóng ū pah-pah-khoán ê khó-lêng, m̄ koh kám lóng ū iáⁿ？ Chit chi̍p lâi káng i-ha̍k siōng ū khó-lêng ín-khí cheng-sîn chèng-thâu ê in-sò͘. ================= 【pēⁿ-in-ha̍k 病因學】 “etiology” Miâ-sû, ē-sái piáu-sī teh gián-kiù pēⁿ-chèng khí-in siong-koan ê ha̍k-būn, eng-gí ê “etiology” mā ti̍t-chiap ū pēⁿ-in ê ì-sù. 【sio̍k-hoat-sèng 續發性】 “secondary” Hêng-iông-sû, piáu-sī chit-ê pēⁿ-chèng sī ū lēng-gōa chit-ê in-sò͘ ti̍t-chiap chō-sêng. 【goân-hoat-sèng 原發性】 “primary” Hêng-iông-sû, piáu-sī chit-ê pēⁿ-chèng bô-hoat-tō͘ chhōe—tio̍h pa̍t-ê goân-in. 【kah-chōng-sòaⁿ khòng-chìn 甲狀腺亢進】 “hyperthyroidism” Pēⁿ-miâ. Lâng ê kah-chōng-sòaⁿ ki-lêng kòe koân, tāi-siā ē kòe kiông, khó-lêng ē ín-khí tōa-ām-kui, thé-tāng kiám-khin, sim-thiàu kòe kín, làu-sái, sit-bîn, kín-tiuⁿ téng-téng piáu-hiān. 【chiam-bōng 譫妄】“delirium” Pēⁿ-miâ, piáu-sī lâng ê ì-sek kap sim-tì siū-tio̍h sin-thé pēⁿ-thiàⁿ kiáu-liáu, chō-sêng kip-sèng chiòng-gāi. 【lūi-kò͘-sûn 類固醇】 “steroid” Chit lūi io̍h-á, sio̍k-chheng “bí-kok sian-tan”. Kiat-kò͘ sêng e̍k-oân-sò͘-tông (testosterone), chú-iàu ū khòng-hoat-iām, chhiok-chìn sêng-tióng ê hāu-kó. Khó-lêng ē ín-khí sit-bîn, chêng-sū bô ún-tēng ê hù-chok-iōng. Ná bô pit-iàu bē-sái tn̂g-kî chia̍h. 【seng-bu̍t sim-lí siā-hōe bô͘-hêng 生物心理社會模型】 “biopsychosocial model” Chit chióng kái-sek pēⁿ-chèng khí-in ê lí-lūn. Tùi seng-bu̍t-ha̍k, sim-lí-ha̍k, siā-hōe-ha̍k saⁿ hong-bīn, thàm-thó bô kâng in-sò͘ án-nóa hō͘-siong éng-hióng chō-sêng pēⁿ-chèng. ================= Ná tùi lōe-iông a̍h-sī tâi-gí ū būn-tê, ē-sái kià tiān-chú phoe lâi chham góa thó-lūn. E-mail: [email protected] 音樂製作：農村武裝青年-俐君 -- Hosting provided by SoundOn

Lâi khòaⁿ cheng-sîn-kho ê hoān-chiá tiāⁿ-tiāⁿ ē giâu-gî, chit-má ê bô-sóng-khoài kám sǹg sī pēⁿ？Ná sī pēⁿ koh tàu-té sī siáⁿ-mih pēⁿ？Chit chi̍p lán kán-tan lâi kóng cheng-sîn-kho ê chín-toàn sī án-chóaⁿ lâi, hō͘ ta̍k-ke sió-khóa-á chai-iáⁿ i-su hia lo-so sī teh mn̄g siáⁿ…… =================== 【chín-toàn 診斷】 “diagnose”(v.) “diagnosis”(n.) I-ha̍k siōng thàu-kòe kiám-cha chèng-thâu khì liáu-kái pēⁿ-chèng pún-chit ê kòe-têng. Kiám-cha liáu-āu ê kiat-kó, chhiūⁿ pēⁿ-chèng ê chèng-sek miâ-chheng, mā kiò-chò chín-toàn. 【cheng-sîn chi̍t-pēⁿ chín-toàn kap thóng-kè chhiú-chheh 精神疾病診斷 kap 統計手冊】 “The Diagnostic and Statistical Manual of Mental Disorders (DSM)” Bí-kok cheng-sîn i-ha̍k-hōe chú 1952 nî khai-sí chhut-pán ê chín-toàn chhiú-chheh, 2022 nî chhut-pán tē-gō͘ pán ê kái-pán, kā cheng-sîn pēⁿ-chèng chò phiau-chún-hòa ê hun-lūi. Choân-sè-kài chiok chē só͘-chāi teh iōng, mā sī Tâi-oân siōng chú-iàu ê chín-toàn hē-thóng. 【ut-chèng 鬱症】 “major depressive disorder” Chêng-sū pēⁿ-chèng ê chi̍t chióng, chú-iàu ê piáu-hiān sī liân-sòa nn̄g lé-pài í-siōng ê ut-chut siong-koan chèng-thâu. Ū khó-lêng ē chō-sêng chiâⁿ tōa ê sún-hāi, hó-khí—lâi liáu-āu mā ū khó-lêng ho̍k-hoat, su-iàu hó-hó-á tī-liâu. =================== Ná tùi lōe-iông a̍h-sī tâi-gí ū būn-tê, ē-sái kià tiān-chú phoe lâi chham góa thó-lūn. E-mail: [email protected] 音樂製作：農村武裝青年-俐君 -- Hosting provided by SoundOn

Tùi tāi-pō͘-hūn Tâi-oân-lâng lâi kóng, “cheng-sîn i-ha̍k” sī khah chheⁿ-hūn ê kài-liām, jî-chhiáⁿ siong-koan ê chu-liāu lóng sī gōa-lâi gí. Ūi-tio̍h hō͘ lán Tâi-oân-lâng hó khip-siu, góa beh lâi iōng bú-gí kái-soeh cheng-sîn i-ha̍k siong-koan ê tì-sek. Tē-it chi̍p lán seng lâi liáu-kái “cheng-sîn i-ha̍k” ê tēng-gī, “cheng-sîn-kho” sī teh khòaⁿ siaⁿ, koh kap “sîn-keng-kho” ū siáⁿ-mih bô kâng. ============ 【cheng-sîn i-ha̍k 精神醫學；cheng-sîn-kho 精神科】 “psychiatry” hiān-tāi i-ha̍k ê chi̍t-ē hun-ki, chú-iàu gián-kiù lâng ê sim-tì, pau-koat ì-sek, chêng-sū, su-khó, kám-kak, līn-ti, hêng-ûi téng-téng pō͘-hūn, só͘ sán-seng pēⁿ-chèng ê chín-toàn, goân-in, ū-hō͘, kap tī-liâu téng-téng hong-bīn ê ha̍k-būn. 【cheng-sîn-kho i-su 精神科醫師】 “psychiatrist” 【sin-sim-kho 身心科】 “cheng-sîn kho” ê lēng-gōa chi̍t-khoán chheng-ho͘, mā ū lâng līn-ûi chi̍t khóaⁿ kóng-hoat khah óa【sim-sin i-ha̍k/心身醫學】tiō sī “psychosomatic medicine” ê kài-liām. 【sîn-keng-kho 神經科】 “neurology” hiān-tāi i-ha̍k ê chi̍t-ē hun-ki, chú-iàu gián-kiù lâng ê sîn-keng hē-thóng piàn-hòa ín-khí ê pēⁿ-chèng, pau-koat iûⁿ-hîn, náu kám-liām, náu hoeh-kin chi̍t-pēⁿ, tōng-chok chiòng-gāi, sîn-keng thè-hòa chi̍t-pēⁿ téng-téng. ============ Ná tùi lōe-iông a̍h-sī tâi-gí ū būn-tê, ē-sái kià tiān-chú phoe lâi chham góa thó-lūn. E-mail: [email protected] Im-ga̍k chè-chok: 農村武裝青年-俐君 -- Hosting provided by SoundOn