Umhlobo Wenene FM Indaba / news bulletins

Bazakufumana isitofu sokomeleza amajoni omzimba abasebenzi bempilo ebebeyinxalenye yokulingwa kwamachiza okugonyel' iCOVID19.

Igxothiwe emsebenzini inqununu yesikolo esiseMpuma Koloni eyanyanzela umfundi ukuba angene kumngxuma wendlu yangasese ukuze akhuphe umnxeba wayo ophathwayo (CELLPHONE) nowatshona kwilindle.

Zohlukile iimbono zeengcali mayela nokuba kufanel' ukuba kumiselwe imiqathango engqingqwa kusini na kwiphondo iGauteng ukunqanda ukunwenwa kwentsholongwane icorona.

Sixhalabile isixeko saseTshwane ngenxa yokuntingela phezulu kwamanani abantu abosulelwa yintsholongwane icorona.

Bazakuvela enkundleni namhlanje abarhanelwa abane ngokunxulumene nokufunyanwa kwabo beneziyobisi ezixabisa i400 million yeerandi.

Umphathiswa wamashishini karhulumente uPravin Gordhan uthi kutyikitywe isivumelwano phakathi kukarhulumente nehlakani elitsha lika SAA iTakatso. UGordhan uthi kuzakutyikitywa isivumelwano sentengo ngaphambi kokuba kusekwe ngokusesikweni uSAA omtsha. ITakatso izakulawula u51 percent wezabelo kweli qumrhu lezophapho lihlengahlengisiweyo, ngelixa urhulumente ezakulawula u49 percrnt wezabelo. ITakatso izakutyal' imali engaphezulu kwe-3 billion yeerandi kwaSAA.

Iqumrhu loosomashishini iTakatso Consortiun ibhengezwe njengehlakani lenkampani yezophapho kweli iSAA.Olu qhogwano lukarhulumente nenkampani yabucala lubeka amashumi amahlanu nanye ekhulwini (51 pesent) yezabelo kule nkampani ezandleni zale ndibanisela yoosomashishini babucala.

Umphathiswa wezobulungisa neenkonzo zoluleko uRonald Lamola uthi i-United Arab Emirates ayisebenzisani noMzantsi Afrika, njengoko kwakuvunyelwene ngala mazwe mabini. U-Lamola ebethetha neentatheli ngale ntsasa, emva kokuba igunyabantu lezotshutshiso kuzwelonke licele uncedo kwi Interpol ukuze usapho lakwa Gupta lubuyiselwe kweli loMzantsi Afrika, lujongane namatyala orhwaphilizo, ubuqhophololo, nokugudis'imali eze ngondlela-mnyama.

Iziko lezifo ezosulelayo i-NICD ngamafutshane lithi sithetha nje ngabantu abayi seven-thousand-300 abanyangelwa icovid19 kwizibhedlele zeli lizwe, kwaye kuthwa izolo bayi 844 abantu abangeniswe kumaziko empilo. Abantu abasondele ku 5-thousand kwabo bafumana unyango abakwii ward zabagula kakhulu, bakwizibhedlele zabucala.

Ujaji Piet Koen ucele amagqwetha obesakuba ngumongameli weli uJacob Zuma ukuba athobele imiqathango yenkundla phambi kokuphula-phulwa ngokusemthethweni kwesicelo esikhethekileyo ngomhla we-19 kuJuly.

Igunya bantu lotshutshiso iNPA lithi alikafaki maxwebhu aphendula kwisicelo esikhethekileyo seqela lamagqwetha lobesakuba ngumongameli weli esifuna athi gu bucala umtshutshisi u-advocate Billy Downer.

Umphathiswa wesebe lezempilo kuzwelonke uGqirha Zweli Mkhize uthi uphando kwizityholo zokukhutshwa ngokungafanelekanga kwesiniki maxabiso sezigidi ngezigidi zerandi lufumanise ukuba yayingahambisani nomthetho intsebenziswano yelisebe kunye nenkampani yonxibelelwano iDigital Vibes.

Usekela sosiba jikelele weANC uJessie Duarte uthi zange kwenzeka ngaphambili ukuba ilungu eliphezulu lombutho elifana nososiba jikelele uAce Magashule lingafuni ukuthobela imithetho yombutho.

Kubhubhe abantu abane konzakala ngokumasikizi abahlanu emva kwesiganeko apho abahlali bethathele umthetho ezandleni zabo eHoneydew kwintshona yeRhawuti. Kuthiwa ngabantu abangama-200 bommandla woogobityholo base-Zandspruit abahlasele amakhwenkwana ali-9 abarhanelwa ngokuphanga abantu kula mandla.

Ilungu lekomiti ejongene namachiza ogonyo kumbutho wempilo kwihlabathi unjingalwazi Salim Abdul Karim liphefumle kwingxoxo eshushu emayela nokuba ingaba licebo elilungileyo na ukuba kuvulwe umsantsa ngaphambi kokuba abantu abagonyelwe iCOVID 19 okokuqala, bafumane ugonyo okwesibini.

Ziyasikhaba isinikezelo sikaEskom sochatha kwimivuzo iimanyano zabasebenzi.

Imanyano yabasenzi i-DEMAWUSA ilumkise ngelithi uzakuhlala ukungasonjululwanga umba wokunyuswa kwemivuzo yabasebenzi ukuba abaqeshi basaqhuba nokubethisa ngoyaba isiphakamiso sayo.

Inkulubaphathiswa yephondo iGauteng uDavid Makhura ithi ela phondo lichwechwelwa ngumsinga wesithathu wentsholongwane iCorona.

Kungenzeka ukuba bajikiswe abanye abasebenzi bempilo abaqale ukuma emigceni kwiziko lokugonya eMilpark kwisixeko sase Rhawutini ukususela ngentseni yanamhlanje nanjengoko eli ziko linenani eliqingqiweyo lokugonywa kwabantu ngosuku.

Kuyabonakala ukuba usosiba jikelele weANC onqunyanyisiweyo uAce Magashule akazukungxengxeza esidlangalaleni ngokuthumela incwadi enqumamisa umongameli weli qela uCyril Ramaphosa.

Unobhala jikelele we- ANC onqunyanyisiweyo uAce Magashule unike iLuthuli House amaphepha enkundla apho acel' umngeni isindululo salo mbutho esithi mawashenxe ezikhundleni zawo amalungu ajongene namatyala.

Kuvakala ukuba unobhalala jikelele weANC onqunyanyisiweyo uAce Magashule uzakubhenela enkundleni ayokucel' umngeni inkqubo yokuba ashenxe kwizikhundla zawo amalungu alo mbutho ajongene namatyala.

Inkulubaphathiswa yephondo iNtshona Koloni uAllan Winde ithi ukunyuka kwamanani abantu abosulelwa yintsholongwane icorona kutshanje kubangelwa yindlela abaziphethe ngayo abantu.

I- ofisi yomkhuseli woluNtu iyaphanda emva kokufumana izikhalazo ezimayela nokuhanjiswa kweenkonzo nokungaziphathi ngendlela eyiyo koomaspala abalishumi eGauteng.

Ngale ntsasa ikomishoni ephanda ukubanjwa ngobhongwana kukarhulumente ngamaqumrhu abucala izakuphulaphula ubungqina obumayela noEskom nokufadalala kwe project yobisi yefama iEstina eFreytata.

USekela-mongameli weli uDavid Mabuza uthi uMzantsi Afrika uyaqhuba nezicwangciso zawo zokuzivelisela ngokwawo isigonyo sesifo iCovid-19.

I- SIU ithi inethemba lokuba kuzakuthi kuphela uAugust ibe iluqukumbele uphando lwayo kwizityholo zorhwaphilizo ezimayela nentengo yempahla yokuzikhusela ngakwi COVID 19.

I- DA ithi iyidlulisele kwikomishoni yezomthetho imiba emibini yamalungu ayo emayela nokunganyaniseki ngeziqinisekiso zawo zemfundo ukuze iphandwe.

I-DA imangalele amalungu ayo amabini atyholwa ngokuxoka ngamabakala emfundo.

Ikomiti ejongene nendlela eziziphethe ngayo iijaji izakudibana kwinyanga ezayo emva kokufakwa kwesikhalazo ngakwiijaji ezimbini ezazichongelwe ukuba zikhokhele ikomishoni eyayiphanda intengo yezixhobo.

I- ANC ithi izakumisela eminye imiqathango yokohlwaya unobhala jikelele walo mbutho onqunyanyisiweyo uAce Magashule, ukuba akaxolisi ngokubhala isibhilivana esithi unqumamisa inkokheli yalo mbutho uCyril Ramaphosa.

Lizakuthathisa ngale ntsasa kwinkundla kamantyi yaseMonti eMpuma Koloni ityala lorhwaphilizo nobuqhophololo ngakulowo ebesakuba ngumphathiswa wempilo eMpuma Koloni uSindiswa Gomba, ilungu lendlu yowiso mthetho uZukiswa Ncita, usihlalo wengingqi kwi ANC uPhumlani Mkolo nowayesakuba ngusomlomo kumaspala iBuffalo City uSimon Ndzele.

Inkulubaphathiswa yephondo iGauteng ithi malomelele usapho lwasebukhosini kwisizwe samaZulu ngeli xesha linzima.

Ziyakhula izimemelelo zokuba athi gu bucala kwizikhundla zawo amalungu eANC ajongene namatyala anobuzaza.

I- ANC izakukhupha iincwadi ezixela ukunqunyanyiswa kwamalungu ayo ajongene namatyala orhwaphilizo namanye amatyala anobuzaza.

IOfisi yomphicothi-ncwadi jikelele ivakalise ukuba kulahleke imali yabarhafi efikelela kwi 6 point 9 billion yeerandi, kumasebe nakumanye amaqumrhu karhulumente.

Kuqhutywa uphando mayela nomlilo oqhambuke kwisibhedlele saseModemole eLimpopo.

Kukho iinkxalabo emva kokuba kukho umntu obesuka eIndia ofunyaniswe eMzantsi Afrika ukuba unentsholongwane icorona.

Ibhunga lophando ngezonyango eMzantsi Afrika lithi urhulumente wenza iinzame zokuba amachiza okugonyel' iCOVID 19 afikelele kubasebenzi bempilo ezilalini.

Inkampani ephantsi kukarhulumente evelisa izixhobo iDENEL ithumelele abasebenzi bayo imbalelwano ibazisa ukuba izakubahlawula kuphela inxenye yemivuzo yabo kule nyanga.

Izakuqhuba nokuphula-phula ubungqina bobesakuba ngusomaqhuzu kwi-arhente yoololiwe babakhweli iPRASA uLucky Montana.

Kuvakala iingxelo ezithi lurhoxisiwe uqhankqalazo lwabasebenzi bakwa Rand Water.

Kulindeleke ukuba baqalise uqhankqalazo namhlanje abasebenzi abakwimanyano iSAMWU kwinkampani ebonelela ngamanzi iRand Water.

Umbutho wabafundi iSASCO uthi ziyaqhuba iingxoxo neenkokheli eziphezulu ezintandathu ze-ANC ukuza ukufumana inkxaso-mali yabafundi kumaziko-mfundo aphakamileyo.

Igqinile ikomishoni ephanda ifuthe lamashishini abucala kuRhulumente ukuba umongameli Cyril Ramaphosa uzakuvela phambi kwale komishoni kwinyanga ezayo.

Umphathiswa wamaqumrhu karhulumente uPravin Gordhan uzithethelele kwikomishoni ephanda izityholo zokubanjwa ngobhongwana kukarhulumente ngamaqumrhu abucala ngakumabango abekwe kuye ligqwetha lowayesakuba ngumkomishinala kwa SARS uTom Moyane .

Ingqonyela yeziko iAurum Institute uGavin Churchyard ithi ixhalabile kukuba lihle ngamandla inani labantu abavavanyela isifo sephepha kuba urhulumente ethathe iziseko wazisa kwinkqubo yokulwa ukunwenwa kwe ntsholongwane iCorona.

Kuthunyelwe inqwaba yamapolisa kwi University i-Wits kwi campus eseBraamfontein apho kusweleke umntu omnye ngethuba amapolisa edubula imbumbulu ze rubber kubafundi abaqhankqalazayo.

Uzakuqhuba nokunika ubungqina kwi komishoni ephanda ukuthiwa nqo ngempumlo kukaRhulumente ngamaqumrhu abucala , owayesakuba yingqonqela kwaTransnet uBrian Molefe namhlanje.

Iziko-mfundo iWits University lithi lizibophelele ekubeni lincedisane nabafundi abajongene nemingeni yemali, kodwa lisithi alinako ukubabonelela bonke abafundi ngemfundo yamahala.