03 Maart 2024 || Oor Stof en Lig || Pieter Roeloffse

Ons betree daardie tyd van die jaar wat die son op ’n laer trajek deur die stof-verwaaide Boland sy gang gaan. Dit is in hierdie stowwerige, verlang-na-reën tyd, dat die lig meer gereeld teen ’n laer, sagter trajek ons lewens inskyn en jy aan die eenkant die stof se fladder in die lig kan sien en aan die anderkant, juis op die weerspieëling van die stof en ons stoflikheid, die lig self kan sien. Dit is vroegherfs-tyd — lydenstyd. Die tyd van bewus raak van stof en lig en ons volg die dalende lig oppad na die kruis, die donker en die nuwe dag.