A batalla pola auga limpa no Limia/Lima - Galiportus (actualidade) T2 X 45

O Tribunal Superior de Xustiza de Galiza vén de ditar unha sentenza histórica, pola cal se declaran vulnerados os dereitos humanos dos residentes d'As Conchas (Ourense-Gz), no entorno do río Limia/Lima (apenas a 15km da Raia do Lindoso) O resultado? A Xunta e a Confederación Hidrográfica non xestionaron a contaminación xerada polas macrogranxas porcinas da comarca Limiá e que leva 2 décadas danando os acuíferos da zona. Perante a problemática que afectaba á calidade da auga, enchéndoa de nitratos e bacterias (con niveis superiores a 1000 veces o permitido); con cheiros insalubres e cun encoro das Conchas a ser xa considerado como un dos máis poluídos de Europa, uns poucos valentes uníronse e botáronse a denunciar a situación. Logo do inmenso traballo da xente de "Auga Limpa Xa", a Asociación de veciños das Conchas, con 9 demandantes e o apoio de varias ONGs, lanzouse a loitar polos dereitos elementais da súa xente. Recibimos no estudio aos protagonistas, os demandantes Merche Álvarez e Pablo Álvarez, que xa nos comentan que "non van parar" até que a auga e o entorno estea como ten que estar. Así pois, non é final de nada, senón o inicio de todo. Escoitamos atentamente o que eles nos contan. E agora que? A música final, como non podería ser outra, "´Água Limpa", do brasileiro Fernandes Lima.