ཨེ་མོ་རིའི་སྨན་གྱི་མཐོ་སློབ་དང་འགྲོ་ཕན་བོད་ཀྱི་སྨན་རྩིས་མཐོ་སློབ་ཁང་དབར་ཤེས་ཡོན་བརྗེ་ལེན་གྱི་ཟབ་སྦྱོང་ཐེངས་བཅུ་པ་འཚོག་བཞིན་པ།

ཁ་ཉིན་ཕྱི་ཚེས་ ༢༢ ནས་འགོ་འཛུགས་ཀྱིས་བཞུགས་སྒར་དུ་རྟེན་གཞི་བྱས་པའི་འགྲོ་ཕན་བོད་ཀྱི་སྨན་རྩིས་ཁང་གི་ཚོགས་ཁང་དུ།  ཨ་རིའི་ཨེ་མོ་རིའི་སྨན་གྱི་མཐོ་སློབ་དང་འགྲོ་ཕན་བོད་ཀྱི་སྨན་རྩིས་མཐོ་སློབ་ཁང་གི་དབར་ཤེས་ཡོན་བརྗེ་ལེན་གྱི་ཟབ་སྦྱོང་ཐེངས་བཅུ་པ་འཚོག་བཞིན་པ་དང་།  ཐེངས་འདིའི་ཟབ་སྦྱོང་ཐོག་གཙོ་བོ་སྨན་གྱི་ཆེད་སྦྱོང་དང་འབྲེལ་བའི་ཉམས་ཞིབ་གནང་སྟངས་དང་། སེམས་ནད་བཅོས་ཐབས།  མ་ཟད་ནད་ཡམས་དཔྱད་རིགས་སོགས་ཀྱི་སྐོར་ཤེས་ཡོན་བརྗེ་ལེན་གནང་རྒྱུ་དང་།  ཟབ་སྦྱོང་དེ་བཞིན་གནངས་ཕྱི་ཚེས་ ༢༦ བར་འཚོག་གི་ཡོད་པ་རེད་འདུག དེ་ཡང་འདི་གའི་གསར་འགོད་པས་འགྲོ་ཕན་བོད་ཀྱི་སྨན་རྩིས་ཁང་གི་སློབ་སྤྱི་གཞོན་པ་དང་ཤེས་ཡོན་བརྗེ་ལེན་གྱི་ལས་གཞི་འདིའི་འབྲེལ་མཐུད་པ་རྣམ་གྲོལ་ལྷ་མོ་ལགས་སུ་བཀའ་འདྲི་ཞུས་པར་ཁོང་གིས།  ཐེངས་འདིའི་ཟབ་སྦྱོང་ཐོག་ཨེ་མོ་རིའི་སྨན་གྱི་མཐོ་སློབ་ནས་རྒྱབ་ལྗོངས་མི་འདྲ་བའི་ཆེད་ལས་པ་ ༣ དང་སློབ་མ་ ༢ ཕེབས་ཡོད་པ་དང་།  ཆེད་ལས་པ་རྣམས་ནས་རང་སོ་སོའི་ཤེས་ཡོན་གྱི་རྒྱབ་ལྗོངས་དང་འབྲེལ་ཏེ་འགྲོ་ཕན་བོད་ཀྱི་སྨན་རྩིས་མཐོ་སློབ་ཁང་གི་སློབ་མ་ཚོར་སྨན་རྩིས་དང་བཅོས་ཐབས་ཀྱི་བརྗོད་གཞི་འདྲ་མིན་ཐོག་གླེང་སློང་གིས་སློབ་ཁྲིད་གནང་བཞིན་ཡོད་པ་མ་ཟད།  ད་རེས་ཀྱི་ཤེས་ཡོན་བརྗེ་ལེན་འདིའི་ནང་འགྲོ་ཕན་བོད་ཀྱི་སྨན་རྩིས་མཐོ་སློབ་ཁང་གི་དགེ་རྒན་ ༡༠ གྲངས་ཤིག་དང་ཆེད་སྦྱོང་ལོ་རིམ་འདྲ་མིན་གྱི་སློབ་མ་ཁྱོན་བསྡོམས་པའི་ ༤༥ ནས་མཉམ་ཞུགས་གནང་བཞིན་ཡོད་པ་གསུངས་སོང་ལ།  ད་བར་ལས་གཞིའི་འདིའི་ནང་མཉམ་ཞུགས་གནང་མཁན་གྱི་ཨེ་མོ་རིའི་སྨན་གྱི་མཐོ་སློབ་ཀྱི་དགེ་རྒན་དང་སློབ་མ་ཚང་མས་ཉམས་མྱོང་གསར་པ་ཞིག་དང་ཤེས་རྒྱུ་མང་པོ་ཡོད་པ་འགྲེལ་བརྗོད་གནང་གི་འདུག་ཅེས་གསུངས་སོང་།  ཐེངས་འདིའི་ཤེས་ཡོན་བརྗེ་ལེན་གྱི་ཟབ་སྦྱོང་གི་ལས་རིམ་ལ་གཞིགས་ན།  སེམས་ནད་སོགས་ཀྱི་བརྗོད་གཞིའི་ཐོག་ནུབ་ཕྱོགས་པ་དང་བོད་ཀྱི་གསོ་བ་རིག་པའི་ངོས་ནས་ལྟ་སྟངས་དང་བཅོས་ཐབས་བཅས་ཀྱི་སྐོར་མཁས་པའི་གཏམ་བཤད་དང་།  ཕན་ཚུན་གྲོས་བསྡུར།  ནད་པའི་གནས་ཚུལ་སྙན་སེང་།  དེ་བཞིན་རྩོམ་ཡིག་ཀློག་རྒྱུ་དང་དཔྱད་ཞིབ།  བཅོས་ཐབས་བྱ་སྟངས།  སྨན་བཅོས་ཀྱི་གཞི་རྩའི་ཚན་རིག་སོགས་ཡོད་པ་རེད་འདུག རྩ་བའི་ཨ་རིའི་ཨེ་མོ་རི་གཙུག་ལག་སློབ་ཆེན་གྱི་ཁྱབ་ཁོངས་སུ་ཡོད་པའི་ཨེ་མོ་རིའི་སྨན་གྱི་མཐོ་སློབ་དང་འགྲོ་ཕན་བོད་ཀྱི་སྨན་རྩིས་མཐོ་སློབ་ཁང་གི་དབར་མཉམ་འབྲེལ་གྱི་ཤེས་ཡོན་བརྗེ་ལེན་གྱི་ལས་གཞི་དེ་ཉིད་ཕྱི་ལོ་ ༢༠༡༣ ལོར་འགོ་འཛུགས་གནང་བ་ཞིག་ཡིན་པ་དང་།  ད་བར་ལས་གཞི་འདིའི་ནང་ཨེ་མོ་རིའི་སྨན་གྱི་མཐོ་སློབ་ནས་དང་བླངས་ཐོག་རྒྱབ་ལྗོངས་མི་འདྲ་བའི་དགེ་རྒན་ཆེད་ལས་པ་ ༢༤ ཙམ་དང་སློབ་མ་ ༢༠ ལྷག་བཞུགས་སྒར་དུ་ཆེད་ཕེབས་ཀྱིས་འགྲོ་ཕན་བོད་ཀྱི་སྨན་རྩིས་མཐོ་སློབ་ཁང་གི་སློབ་མ་དང་དགེ་རྒན་དབར་འབྲེལ་ཡོད་བརྗོད་གཞི་ཁག་གཅིག་གི་ཐོག་ཕན་ཚུན་སློབ་ཁྲིད་དང་ཤེས་ཡོན་བརྗེ་ལེན་གནང་ཡོད་པ་གསུངས་སོང་།  The post ཨེ་མོ་རིའི་སྨན་གྱི་མཐོ་སློབ་དང་འགྲོ་ཕན་བོད་ཀྱི་སྨན་རྩིས་མཐོ་སློབ་ཁང་དབར་ཤེས་ཡོན་བརྗེ་ལེན་གྱི་ཟབ་སྦྱོང་ཐེངས་བཅུ་པ་འཚོག་བཞིན་པ། appeared first on vot.