Akters Juoņs Krūņs: Pyrmuo volūda, kū īsavuiceju, beja latgalīšu

Šudiņ, 15. oktobrī, kod Latvejā atzeimoj Vaļsts volūdys dīnu rādā ar Pasauļa diktatu latvīšu volūdā, jau sastū reizi byus vareiba raksteit diktatu arī latgalīšu rokstu volūdā. Diktata tekstam izvālāts fragments nu rakstnīka i literaturzynuotnīka Valentina Lukaševiča esejis. Aiz tam, pīduovojom Jums nūsaklauseit sarunu ar diktata skaiteituoju, akteri Jāni Kroni, kura dzymtys saknis vaicojamys Latgolā. Ar teatra trupys “KVADRIFRONS”, cytu naatkareigūs teātru i  projektu, kā arī Latvejis Nacionaluo teatra uorštata akteri Jāni Kroni  runuosim par juo latgaliskuom saknem, latgalīšu volūdu, dzeivi i teatri. Kai pīzeist pats Juoņs, tod jis asūt par trejom catūrtdaļom latgalīts, kuram pyrmuo īsavuiceituo volūda asūt taišni latgalīšu. „Pyrmuo volūda, kuru es īsavuiceju, beja latgalīšu. Es pi Gaigalovys tī Pekšūs dzeivovu i tod jau ap sešim godim mes nūbraucem dzeivuot iz Reigu.” Juoņs stuosta, ka niu, dzeivojūt Reigā, kasdīnā latgalīšu volūdu saīt izmontuot rešai, koč ari saprast saprūt vysu, vystik ar laseišonu i raksteišonu īt pagryušuok. Tys apsastyprynuoja, ari skaitūt sastū pasauļa diktatu latgaliski. „Byušu gūdeigs – vīglai nabeja, jo maņ jau latgalīšu volūda ir taida runuotuoja latgalīšu volūda, vēļ i sajaukta ar Gaigalovys i Kolupa pusis izlūksni, partū losūt gribīs izrunuot tai kai īrosts, bet ir juoizlosa tai, kai pīraksteits, i ite jau suocās problemys. Koč kur gribīs dalikt v burteņu, koč kur otkon nasagrib. Taidys niansātys. Gryutai guoja, ari izlaseit nabeja vīglai. Raksteit vyspuor byutu auzys, jo raksteit latgaliski naprūtu. Laseit prūtu, bet raksteišona ir iz izjiutu i tī es dūmoju byus gryuši.”