Kolnasāta

Septembris skaņ latgaliski – tai jaunū sezonu aizsuokuse Latgolys viestnīceiba GORS, eipaši izceļūt latgalīšu volūdu, Latgolys kulturu i cylvākus. Pavysam dreiži – 18. septembrī tī pyrmatskaņuojumu pīdzeivuos ari muzikalais stuosts „Poema par O. R.”, kas īzeimēs latgalīšu rakstnīka, pedagoga, dirigenta, komponista i sabiedriskuo darbinīka Ontona Rupaiņa 120. jubileju, reizē atkluojūt ari 14. Starptautiskū teatra festivalu „Soli pa solim”. Ontona Rupaiņa personeiba ītekmiejusi daudzus procesus latgaliskajā kultūrā, koru kusteibā i muzykys atteiteibā Latgolā. Muzykalais uzvadums nu jauna dasadurs temom, kas aizviņ aktualys – par identitati, atbiļdību, kūpeibys spāku i cylvāka vītu sovā zemē. Pi muzykaluos poemys par Ontonu Rupaini struodoj divys pedagogis – Latgolys viestnīceibys GORS vadeituoja, komponiste Ilona Rupaine i dirigente Lāsma Zunda. Rodūšais process veicynoj jaunīšu izaugsmi, „kūpumā komanda ir apmāram pīcdesmit cylvāki, kas aktivi pīsadola izruodē. Caur itū izruodi Latgolys jaunīšim pošim ir īspieja ari apsazynuot i īpazeit sovus prīkštečus muzykā i Latgolys kulturys veiduošonā,” izsver Lāsma, koč i vuiceibu vide ir cīši svareiga, tok „teiši praktiskuo koncertdarbeiba i seviški sadarbeibā ar komponistim, ar režisori, tys vyss atteista vēļ vairuok, nakai vuiceibu process.” Izruodē akteri ir jaunīši i dzīd jaunīšu kors, deļ tam ka izruodis mierkis ir paruodeit jaunekleigu, dzeiveigu Ontonu Rupaini, stuosteit „par jaunu cylvāku, kas ar sovu divritini brauc pa Latgolys cīmim, organizej korus, dūmoj par itū cylvāku atteisteibu, muzykalū atteisteibu, roksta sovus romānus,” muzykalajā poemā īsaver Ilona Rupaine.  „Muzikaluo poema nav gara, i eistineibā ituos poemys laikā mes varam tikai tai īsavērt caur durovu aili Ontona Rupaiņa dzeivē, i taidus golvonūs pīturpunktus īraudzeit,” secynoj Lāsma Zunda.

Rubrikā „Itai lobuok” profesore Lideja Leikuma turpynoj stuosteit par tū, kaidus latgaliskūs vuordus, jūs salykumus ci formys lobuok lītuot. Itūreiz, kai vēļ var pasaceit vuordu „kert”, itai var – giut, kert, čert. Giut ir taida iz prīšku vierzeiba, lai koč kū dabuotu. Giun zivs Latgolā. Inetai Atpilei-Juganei gruomota beja „Otkon giunu sapynus”. Navar saceit, ka kert Latgolā nikur nalītoj, cyti soka ari čert – kert voi čert. Apčert vīnam ūtru. Vīns ūtru apčer. Cyti saceis – apker. Par teirumu, kur daudzi zuolis vysaidys dasakēre. Dasakert voi dasačert, tys ir vysleidza, jī obeji mums ir. Ka myusu daudzi paliks, ka mes naītu mozumā, tod mes pi daudz kuo vēļ dasagiutu, i dasakartu, i dasačartu.

Rubrikā „Muzykys žvyrs” muzikis Ingars Gusāns, ari Solvvaļnīks i muzykys entuziasts Silvestrs Solovjevs stuosta par latgalīšu muzykys īrokstim, kaidi albumi latgalīšu muzykā ir izdūti i kam ir vārts dagrīzt viereibys. Apsavieršonā vysaidi muzykys žanri, grupys i solo muokslinīki. Itūreiz par Ūgys albumu „LG ir HH” (Latgolā ir hiphops), kas izdūts 2020. godā. Tys ir vīns nu spylgtuokūs pagrīzīņa punktu myusdīnu Latvejis hiphopā. Tys apvīnoj klasiskuo underground repa energeju ar myusdīneigim bītim. Caur osim i teišim tekstim albums stuosta par kasdīnys ceiņom, uzticeibu sovom saknem i lapnumu par sovu nūvodu, taidā veidā palīkūt par unikalu i autentisku daļu nu pošu sātys hiphop skotivis. Albuma augstū muokslinīciskū kvalitati i nūzeimi nūzarē aplīcynuoja juo uzvara Latvejis muzykys īrokstu goda bolvā „Zelta Mikrofons 2021” kategorejā „Lobuokais hiphopa muzykys albums”. Tys kai nūstyprynuoja Ūgys vītu pošu sātys repa elitē, tai ari pīruodeja, ka latgalīšu volūdā radeita muzyka var sasnēgt vysuaugstuokū nūviertiejumu vaļsts mārūgā.   Žvyrs ir grants, i Sovvaļnīks skaita, ka „latgalīšu muzykys ceļš nikod nav bejs leidzons, tys vysod ir bejs kai pa granta ceļu, ari idejiski „Muzykys žvyrs” ir vysā pamatuoti – vysu laiku ceinomēs, īmam, sovpateigs ceļš.”

Rudiņam pīstuov dzeja, rudums i sarunys. Vallija Platace ir literate, školuotuoja i muokslineica. Daugovpiļs pusē jei ir labi zynoma fotografe, niu vysu septembri juos ceļojūšuo izstuode „Rudiņam pīstuov rudums” apsaverama Kruoslovys bibliotekā. Pārnejuo gods septembrī jei pyrmū raizi dasadaleja „Rogovkys dzejis vogā” i dzejis slamā uzvarēje. Pavysam dreiži, 12. septembrī, Rogovkys dzejis slams nūtiks pīktū reizi, itūgod Vallijas raksteitī vuordi atsagrīzs iz skotuvis jau muzykā grupys „Kei-Rei” pyrmatskaņuojumā, dūdūt tim jaunus ritmus i emocejis. Vallijai Platacei raksteišona i fotografiešona papyldynoj vīna ūtru, „ir taida līta, ka fotografeju es dūmuos daudz bīžuok, nikai rokstu. Maņ ir miļzeiga sumka, kurā maņ vysod ir juonosoj leidza fotoaparats. Ir cīši ratys reizis, kod es nanosoju, i tod vysod ir tai, ka es nūfotografeju dūmuos. Ar vuordim tys tai nastruodoj, partū ka es zynu, ka vuordi tai napazyud kai mirkli, kurus tu īraugi.”

Rudiņam pīstuov dzeja, rudums i sarunys. Valija Platace ir literate, školuotuoja i muokslineica. Daugovpiļs pusē jei ir labi zynoma fotografe, niu vysu septembri juos ceļojūšuo izstuode „Rudiņam pīstuov rudums” apsaverama Kruoslovys bibliotekā. Pārnejuo gods septembrī jei pyrmū reizi dasadaleja „Rogovkys dzejis vogā” i dzejis slamā uzvarēja. Pavysam dreiži, 12. septembrī, „Rogovkys dzejis slams” nūtiks pīktū reizi, itūgod Valijis raksteitī vuordi atsagrīzs iz skotivis jau muzykā grupys „Kei-Rei” pyrmatskaņuojumā, dūdūt tim jaunus ritmus i emocejis. Valijai Platacei raksteišona i fotografiešona papyldynoj vīna ūtru, „ir taida līta, ka fotografeju es dūmuos daudz bīžuok, nikai rokstu. Maņ ir miļzeiga sumka, kurā maņ vysod ir juonosoj leidza fotoaparats. Ir cīši ratys reizis, kod es nanosoju, i tod vysod ir tai, ka es viņ nūfotografeju dūmuos. Ar vuordim tys tai nastruodoj, partū ka es zynu, ka vuordi tai napagaist kai mirkli, kurus tu īraugi.”

„Kolnasātā” suprātku aba vakariešonys laiks. Otkon gastejam kaidā nu Latgolys pogostu, kab kluotīnē sasatyktu ar vītejim cylvākim i pasarunuotu par dzeivi, tradicejom i volūdys sovpateibom. Itūreiz aicynojam īpazeit Rēzeknis nūvoda leluokū pogostu Gaigalovu. Vīta Lubuona leidzonuma vydā, kur plotumi, iudini, meži i ļauds veidoj Gaigalovys eipašū stuostu. Kūpā ar vītejim runojam par Gaigalovys viesturi, vītvuordim, kulturu i dzeivi ite šudiņ. Gaigalova nazkod saukta ari par Bykovu, ļauds ite struodoj, dzīd dzīsmis, spielej teatri, svietej svātkus i kūp sovys kulturys vierteibys.  Suprātkuos Gaigalovā pīsadola: kulturys pasuokumu organizatore Valentīna Deksne, vītejuo uzjiemieja Sanita Babre, Latgolys Kulturviesturis muzeja Muokslys nūdalis vadeituoja Inese Dundure, pogosta bibliotekys vadeituoja Rita Matisone, Gaigalovys īdzeivuotuoju padūmis vadeituoja i uzjiemieja Liene Drule, teatra „Bykovīši” daleibneica Gunta Spīča, jaunīte Ieva Spīča, vītejūs teatru akters Juris Bikse, pensionars i ari vītejūs teatru akters Roberts Voits, Gaigalovys pamatškolys direktore Ināra Ūsite, i muziki, školuotuoji i Muzykys instrumentu muzeja saiminīki Gunārs i Rasma Igauni. Sarunys turpynuojums ar gaigalavīšim gaidoms cytā raidejumā.

„Kolnasātā” suprātku aba vakariešonys laiks. Otkon gastejam kaidā nu Latgolys pogostu, kab kluotīnē sasatyktu ar vītejim cylvākim i pasarunuotu par dzeivi, tradicejom i volūdys sovpateibom. Itūreiz aicynojam īpazeit Rēzeknis nūvoda leluokū pogostu Gaigalovu. Vīta Lubuona leidzonuma vydā, kur plotumi, iudini, meži i ļauds veidoj Gaigalovys eipašū stuostu. Kūpā ar vītejim runojam par Gaigalovys viesturi, vītvuordim, kulturu i dzeivi ite šudiņ. Gaigalova nazkod saukta ari par Bykovu, ļauds ite struodoj, dzīd dzīsmis, spielej teatri, svietej svātkus i kūp sovys kulturys vierteibys.  Suprātkuos Gaigalovā pīsadola: kulturys pasuokumu organizatore Valentīna Deksne, vītejuo uzjiemieja Sanita Babre, Latgolys Kulturviesturis muzeja Muokslys nūdalis vadeituoja Inese Dundure, pogosta bibliotekys vadeituoja Rita Matisone, Gaigalovys īdzeivuotuoju padūmis vadeituoja i uzjiemieja Liene Drule, teatra „Bykovīši” daleibneica Gunta Spīča, jaunīte Ieva Spīča, vītejūs teatru akters Juris Bikse, pensionars i ari vītejūs teatru akters Roberts Voits, Gaigalovys pamatškolys direktore Ināra Ūsite, i muziki, školuotuoji i Muzykys instrumentu muzeja saiminīki Gunārs i Rasma Igauni.  

Itūgod paīt 90 godu nu režisora Juoņa Streiča dzimšonys. Martā, piec juo nūīšonys myužeibā, eipašu nūzeimi dabuojs vaicuojums par režisora pamastuo kulturys i goreiguo montuojuma saglobuošonu. Deļtuo dybynuots Juoņa Streiča kulturys fonds, kura prīšksādātuoja ir režisora meita, režisore Viktorija Streiča. Raidejumā “Kolnasāta” jei izsvēre, ka tāva pamastais montuojums ir daudz plotuoks par kinom, gleznom i gruomotom. Taišni tikpat svareigys ir juo idejis, dzeivis prīca, ciļvieceiba i interese par cylvāku. Fonda moto ir: “Nu montuojuma iz jaunradi”, i juo mierkis nav viņ saglobuot jau radeitū, bet dareit, kab Juoņa Streiča pamastais nas īdviesmi ari jaunom paaudzem. Itūšaļt fonda viereibys centrā ir režisora jubilejis goda nūtikšonys. Vīns nu svareiguokūs aizdavumu ir koncertizvaduma “Mans draugs Jānis Streičs” sagataveišona, kas septembrī byus Preiļūs i Reigā. Koncerti nav dūmuoti kai siereigys nūtikšonys, bet kai svātki Juoņa Streiča gorā. Režisors pats asūt gribiejs, lai juo jubileju svietej vysa Latveja. Taipat fonds plānoj eistynuot Juoņa Streiča ideju par pīminis pīminekli Preiļu nūvodā. Viktorija Streiča sarunā atguodynuoja tāva bīži atkuortuotū atziņu: “Ka struodoj, tod navar nasaīt.” Jei skaita, ka taišni dorbs, dzeivis prīca i lobuos viests nesšona cytim ir vierteibys, kas iz vysa lobuok raksturoj Juoņa Streiča dzeivis filozofeju i kurys fonds grib nest tuoļuok.

“Kolnasātys” rubrikā “Itai lobuok” izvaicuosim profesori Lideju Leikumu par tū, kaidus latgalisks vuordus, salykumus ci formys lobuok lītuot. Itū reizi vuords “spaits”.

“Kolnasātys” rubrikā “Vuordineica” literaturzynuotnīks Valentins Lukaševičs i viesturis doktorants i muzikis Arņs Slobožanins runuos par vuordu “strupuļs”.

Viesturis doktorants i muzikis Arņs Slobožanins stuosta par latgalīti Aloizu Lauri Trūpu, kurs savu eipašeibu i liktineigu sakriteibu deļ tics Krīvejis imperejis cara galmā, palykdams par kambarsulaini i Romanovu saimis izaticiešonys personu. Boļševiku nūsauts kūpā ar cara saimi. Piec nuovis pareizticeigūs bazneica pīzynuse par svātūs mūcekli.

Rubrikā „Itai lobuok” profesore Lideja Leikuma turpynoj stuosteit par tū, kaidus latgaliskūs vuordus, jūs salykumus ci formys lobuok lītuot. Itūreiz vaira par vuordu „ryss” i „rysa”, kam jū lītoj divejaidi – vīnā Latgolys pusē vaira soka sīvīšu dzymtē „rysa”, cytur – veirīšu dzymtē „ryss”.  Izzynuosit ari, kai lobuok saceit cytu putru nūsaukumus: prosa i dryči ci griči.

Ar Preiļu pili kotrai vītejūs paaudzei saistuos sovi stuosti: vīni pīmiņ školu, cyti – kai ite sajāmuši motocykla tīseibys, vēļ cyti – pīdzeivuojumus i dzeivi piļs parkā.  Pyrma desmit godu tyka aizsuokti dorbi pi Preiļu piļs atjaunuošonys. Tūlaik redzīni dalejuos, natryuka ari skeptiku, kuri izsvēre, ka tys ir nareali i piļsātai ir cytys prioritatis. Īkonservēt, nui, bet atjaunuot izaklausa kai sapyns. Vystik tys ir nūtics i deļtuo saruna par piļs i juos kompleksa dzevi iz prīšku. Pa itū laiku ir pasamejuse naviņ piļs, bet ari vyss muižys komplekss i parks, kas cyta storpā ir leluokais piļsātvidis parks Latvejā – 48 ha. Kaida ir Preiļu pils šudiņ? Par leidzsvoru storp viesturyskuo montuojuma saglobuošonu i īkļaušonu myusdīnu kulturys i turysma kartē runuojam ar Preiļu muižys kompleksa un parka vadeituoju Madaru Pastari.

Rubrikā „Itai lobuok” profesore Lideja Leikuma turpynoj stuosteit par tū, kaidus latgaliskūs vuordus, jūs salykumus ci formys lobuok lītuot. Itūreiz, kai vēļ var pasaceit vuordu „striebt”, itai var – švūrbt, švūrkstēt, švūrpstēt. Švūrbt tys ir ar skaņu tu īveļc, tys parosti par pīna putru, par škeistumu kaidu, valk tū škeistū i skaņa pavodūši. Tys ir tys, kū puorejī latvīši soka „strēbt”. Latgalīši jau ari soka itū „striebt”. Marija Andžāne bierneibys atmiņu kruojumā raksteja švūrkstēt. Kaidu vyrumeņu sataisa, i tod švūrkst viņ, ka valk jū mutē. Švūrbt, švūrkstēt, švūrpstēt – var byut tī vysaidi fonetiskī varianti.  

Literaturzynuotnīka Valentina Lukaševiča i viesturis doktoranta, muzika Arņa Slobožanina sagataveitejā „Vuordineicā” itūreiz par vuordu „pastateišona”. Vuords, kuru atrūnam vacūs tekstūs: „Jo kaids padarejs kaidu lobu pastateišonu, un jo grib daīt da tuos pastateišonys ar lobim un gūdeigim sposobim, runojam ap jū tai – gudrais cylvāks gudri dora.” Pastateišona – cīši interesants i daudznūzeimeigs. Nu vīna ituo teikuma var izsprīst, ka pastateišona ir koč kaids lobs īstuodejums, loba kuorteiba, koč kaidu lobu sistemu ītaiseit saimē. Ūtra nūzeime – pastateit sātu. Vysod saceja – izcēle, sataiseja, pastateja sātu. Obys lītys ir cīši saisteitys – voi nu tu pastateji kaidu lobu sātu, voi pastateji koč kaidus lobus īrodumus, lobu kuorteibu. Tys varātu byut kaids dorbs – pastateit buļbys, pastateit komandu, pastateit filmiešonys grupu, teatra pastateišona. Varam itū atteisteit – paraudzeisim pastateišonys vuordu pamaineit ar vuordu „ideja”. Ka kaids padarejs kaidu lobu ideju i jau grib daīt da ituos idejis ar lobim i gūdeigim dorbim, tod – gudrais cylvāks, gudri dorbi. Pastateišona varātu byut īcere, ideja, i tū ideju panuok ar lobim i gūdeigim dorbim. Agruokūs laikūs varbyut vuorda ideja analogs beja vuords pastatejums.

Mežs, orkestris, Sarkaņkolns, latgaliskais, humors, pasuokumi, škola, bārni, pedagogeja – ir cylvāki, kurus navar raksturot vīnā voi pat vairuokūs vuordūs. Arņs Krancāns ir muzikis, pedagogs, pasuokumu vadeituojs, kulturys cylvāks i latgaliskū tradiceju kūpiejs, par jū var saceit cylvāks-orkestris. Pamatdorbā Arņs ir „Latvijas Finiera fonda ilgtspējīgais attīstībai” vaļdis lūceklis i „Latvijas Finiera” komercsabīdreibys „Verems” ražuošonys efektivitatis specialists, taipat jis ir profesionaluo pyušamūs instrumentu orkestra „Rēzekne” daleibnīks, muzykys školys orkestra muzikis i koncertmeistars.  Dorbojūtīs tik dažaiduos jūmuos, Arņs stuosta, kai vīnā cylvākā sadzeivoj rodūšums, precizitate, pacīteiba i latgalīša sirds: „Dzeivoju Latgolā, struodoju Latgolā, es asu dareituojs daudzuos nūzarēs. Tys maņ paleidz nadzeivuot koč kaidā vīnā burbulī, redzēt biški leluoku biļdeiti.” „Ite ir taids mīrs, maņ ruodīs, i tū mes nanūviertejam, ka Latgola ir taida mīra ūsta,” sprīž Arņs, tok dzeivot laukūs ir gona izaicynūši, tys prosa daudz vairuok planavuošonys. Par pīmāru, reikojūt pasuokumus Rēzeknis nūvoda Sarkaņkolnā, Arņam juodūmoj, kai cylvāki tiks iz tīni, sabīdryskais transports tī naīt. Deļ tam dzeive laukūs tys ir „ekskluzivs dzeivisveids. Ir daudz vairuok juodūmoj, nikai piļsietnīkam voi pīpiļsātys īdzeivuotuojam. Tei ir tikai iluzeja, ka laukūs dzeivuot ir lātai. Tys ir rikteigs luksuss.”  Geopolitiskuo i drūšeibys situaceja Latgolā ir kasdīnys fona sajiutuos, tok Arņs nagaida kaidus rysynuojumus nu molys, ji vaira pasauļaun iz sevi, „latgalīši ir optimisti, mes jau niu dzeivojam ar skorbuokim spēlis nūsacejumim nikai Pīreigā voi Reigā, deļ tam es ceru, ka byus labi.” Runojūt par latgaliskū ideņtitati, pīdareibys sajiutu i latgalīšu volūdu, Arņs izsver – „volūda kai taida dzeivuos, cikom byus cylvāki”, bet latgalīšu mentalitate ir atpazeistama ari uorpus regiona rūbežu, „tys ir cīši pamonoms koč kaidā dūmuošonys stylā. Latgalīts ir vīnkuoršs, speiteigs, struodeigs.” Arņs skaita, ka myusdīnu tehnologeju laikā vysusvareiguokais ir saglobuot ciļvieceibu, „juosabolsta iz cylvākim. Mums pagaist ciļviecyskums caur tehnologejom, taipat kai sapuļcis vysod kluotīnē byus foršuokys, nakai caur ekranu, vajadzeigs sajust cylvāka energeju.”    

Rubrikā „Muzykys žvyrs” muzikis Ingars Gusāns, ari Solvvaļnīks i muzykys entuziasts Silvestrs Solovjevs stuosta par latgalīšu muzykys īrokstim, kaidi albumi latgalīšu muzykā ir izdūti i kam ir vārts dagrīzt viereibys. Apsavieršonā vysaidi muzykys žanri, grupys i solo muokslinīki. Itūreiz par dzīsminīka Aņša Ataola Bierzeņa autordzīšmu albumu “Dabasu trikmīņs” (2026). Anša Ataola Bērziņa jaunais dubultalbums “Dabasu trikmīņs” izguojs ekskluzivi CD formatā. Taida pīeja myusu dīnuos ir reša, partū ka leluokuo daļa jaunūs albumu vīnlaiceigi teik lykti ari digitaluos muzykys straumiešonys vītuos. Autors izsver, ka eista publikaceja ir tod, kod albumu var pajimt rūkā i īlikt plauktā. Albumā apkūpuotys 24 autordzīsmis pīcuos dažaiduos volūduos, kas īraksteitys nu 2016. da 2025. goda. Atškireigu gaisūtni roda plotais dzīšmu vuordūs lītuotais mozuok zynomūs latgalīšu vuordu lūks, aicynojūt klauseituojus nu jauna atkluot latgalīšu volūdys boguoteibu.   Žvyrs ir grants, i Sovvaļnīks skaita, ka „latgalīšu muzykys ceļš nikod nav bejs leidzons, tys vysod ir bejs kai pa granta ceļu, ari idejiski „Muzykys žvyrs” ir vysā pamatuoti – vysu laiku ceinomēs, īmam, sovpateigs ceļš.”

Rubrikā „Itai lobuok” profesore Lideja Leikuma turpynoj stuosteit par tū, kaidus latgaliskūs vuordus, jūs salykumus ci formys lobuok lītuot. Itūreiz par izteicīni „a ka bejs, a ka byutu”. Latvīšu literarajā volūdā mes saceitu – lai nūteik, lai iet. Latgaliski ir lobs vuordu salykums – a ka bejs, a ka byutu. Var dažaidus variantus lītuot. Tei nav taida normātuo leksika, tys ir jau individualuoks volūdys leimiņs, kur vīnā sātā lītoj tai, ūtrā sātā cytaižuok, vīnā apvydā tai, ūtrā sovaiduok. Tys nav vyspuorlītojamais izteicīņs, itaida veida izasacejumi ir breivī.

Latgalīšu muzikis Sovvaļnīks, eistajā vuordā Ingars Gusāns, desmit godu piec īprīškejuo albuma ir atsagrīzs ar jaunu albumu „Cārtumi”, kas ir daīmams kai digitalā, tai ari fiziskā formatā. Itūreiz, atsakuopūt nu smoguo roka muzykys lauceņa, Sovvaļnīks pīduovoj akustiskuoku skaniejumu, tymā pošā laikā saglobojūt sovu jam rakstureigū dziļū i puordūmuotū viestejumu, izmontojūt latgalīšu rakstnīku tekstus: „Varbyut tys nagaideitais moments, ka tys nav metals, kū, īspiejams, gaideja cyti voi leluokuo daļa, dūmuodami, ka es varu koč kū vēļ trokuoku saraksteit, sacerēt, bet saīt, ka tei beja vajadzeiba.” Ronojūt par albuma tapšonu, Ingars Gusāns dasadur naviņ sovom rodūšajom puormaiņom, bet ari latgalīšu volūdys i dzejis nūzeimei juo muzykā, i cārtumim aba rātom i jūs sekom. Albuma nūsaukums „Cārtumi” ir ar smoguma pīgaršu, „tuos ir rātys. Pošam jau pa itim godim vysaidi cārtumi ir sasakruojuši, i deļ tam itys ari ir absoluti taids mīreigs izapausšonys veids, lai jūs voi nu sadzīdātu, voi pīsagtu,” atkluoj Sovvaļnīks. Sovvaļnīks ir ari raidiejuma rubrikys „Muzykys žvyrs” vīns nu autoru, i ka cytom reizem jis kūpā ar Silvestru analizej cytu muziķu veikumu, tod itamā reizē īsaveram poša Sovvaļnīka muzykys albumā „Cārtumi”. Dzīsmis saraksteitys ar latgalīšu dzejnīku Annys Rancānis, Oskara Seiksta, Valentina Lukaševiča, Ontona Kūkuoja, Marijis Dzeislys, Pītera Jurciņa i Valentina Lukaševiča puorlyktuo Arva Vigula vuordim, tok Sovvaļnīks izsver, ka muzykā var meklēt vaira i dziļuok: „Grybu, lai nūviertej naviņ dzeju, kas tam vysam puori īt, bet ari breižam interesantuos gitarys partejis. Ir tei nūskaņa, kū var pajimt. Klasiskais variants, lai cik jums ir gryuši dzeivē, tei ir īspieja vysod pasaklauseit, ka vīnam cylvākam ir vēļ gryušuok, nakai jums. Ūtrom kuortom, tū sajiutu, ka ir forši, ka mes dzeivē veramīs, raugam saskateit tikai jautrū, pozitīvu, bet ir ari koč kaidys problemlītys, par kurom, seviški intelektualim cylvākim, vajadzātu padūmuot, voi tys ir sova veida atguodynuojums, voi otkon taids paaicynuojums koč kam pīvērst uzmaneibu.”

„Kolnasātā” suprātku aba vakariešonys laiks. Otkon gastejam kaidā nu Latgolys pogostu, kab kluotīnē sasatyktu ar vītejim cylvākim i pasarunuotu par dzeivi, tradicejom i volūdys sovpateibom. Itūreiz aicynojam īpazeit Ludzys nūvoda Pasīni. Kai pīrūbežā, kur sasajauc vysaidys kulturys, volūdys i dzeivis pīredzis, kur niu dzeivoj ap 200 cylvāku, Pasīnis vītys stuosti ir daudz leluoki par pošu cīmu.  Vīns nu pazeistamuokūs i apmeklātuokūs objektu ir baroka arhitekturys pērle Pasīnis Svātuo Dominika Romys katuoļu bazneica. Tū reizem sauc ari par Aglyunys bazilikys muoti, deļtam ka Pasīnis bazneica ir vacuoka par Aglyunys baziliku. Taipat Pasīnis bazneica ir īkļauta Latvejis ainovu duorgumu sarokstā. Vītejī sevi sauc par posīnīšim. Jī pyrmī nu reita sagaida sauli Latvejis austrumu tuoluokajā apdzeivuotajā vītā, kur da rūbeža ir viņ 2 km, i tū, kai Latvejis zalī meži puorīt Krīvejis zylajūs nu Bazneicys kalneņa var labi redzēt. Suprātkuos Pasīnē pīsadola: kulturys pasuokumu organizatore Jekaterina Sovāne, vītejuo īdzeivuotuoja Olga Kazaka, prīsters Vitālijs Filipenoks, zemnīku saimisteibys „Purvmaļi” saimineica Skaidrīte Marčenoka, dobys saimisteibys „Bites” saimineica i dobys turysma gide Ilga Ivanova i pensionare, kaidreizejuo školys direktore Ilga Ērika Brice. Posīnīši stuosta, kai jī ite dzeivoj šudiņ, kū dora, par kū jī sapynoj, cik aizsorguoti i saprosti jiutās vaļsts leiminī. Vītejī skaita, ka ļauds ite ir patstuoveiguoki, cytaiž nimoz navar izdzeivuot, i jī turpynoj veiduot Pasīni kai sovu vyslobuokū vītu pasaulī.          

„Kolnasātā” suprātku aba vakariešonys laiks. Otkon gastejam kaidā nu Latgolys pogostu, kab kluotīnē sasatyktu ar vītejim cylvākim i pasarunuotu par dzeivi, tradicejom i volūdys sovpateibom. Itūreiz aicynojam īpazeit Ludzys nūvoda Pasīni. Kai pīrūbežā, kur sasajauc vysaidys kulturys, volūdys i dzeivis pīredzis, kur niu dzeivoj ap 200 cylvāku, Pasīnis vītys stuosti ir daudz leluoki par pošu cīmu.  Vīns nu pazeistamuokūs i apmeklātuokūs objektu ir baroka arhitekturys pērle Pasīnis Svātuo Dominika Romys katuoļu bazneica. Tū reizem sauc ari par Aglyunys bazilikys muoti, deļtam ka Pasīnis bazneica ir vacuoka par Aglyunys baziliku. Taipat Pasīnis bazneica ir īkļauta Latvejis ainovu duorgumu sarokstā. Vītejī sevi sauc par posīnīšim. Jī pyrmī nu reita sagaida sauli Latvejis austrumu tuoluokajā apdzeivuotajā vītā, kur da rūbeža ir viņ 2 km, i tū, kai Latvejis zalī meži puorīt Krīvejis zylajūs nu Bazneicys kalneņa var labi redzēt. Suprātkuos Pasīnē pīsadola: kulturys pasuokumu organizatore Jekaterina Sovāne, vītejuo īdzeivuotuoja Olga Kazaka, prīsters Vitālijs Filipenoks, zemnīku saimisteibys „Purvmaļi” saimineica Skaidrīte Marčenoka, dobys saimisteibys „Bites” saimineica i dobys turysma gide Ilga Ivanova i pensionare, kaidreizejuo školys direktore Ilga Ērika Brice.   Sarunys turpynuojums ar posīnīšim gaidoms cytā raidejumā.        

Latgalīšu rokstu volūda ir daļa nu Latvejis kulturviesturyskuo montuojuma. Šudiņ jū sorgoj lykums. Jei skaņ radejā, televizorā, skaitama rokstūšajā presē i socialajūs medejūs, dzieržama vysaidūs pasuokumūs. Tok oficiālajā saziņā ar vaļsts i pošvaļdeibu īstuodem komunikaceja nūteik latvīšu literarajā volūdā. Kur beidzās tradiceja i suocās volūdys praktiskuo puse, cik lelā mārā latgalīšu rokstu volūda publiskajā telpā ir tikai kulturys, cik vaļsts volūdys politikys vaicuojums, diskutej Vaļsts volūdys centra direktore Inese Muhka i diveji aktivi latgalīšu volūdys lītuotuoji runā, rokstūs i juridiskā saziņā ar īstuodem – „Kolnasātys” rubriku autors, muzikis i viesturnīks Arņs Slobožanins (Arnis Slobožaņins) i dzīsminīks Aņss Ataols Bierzeņš (Ansis Ataols Bērziņš). Piec pādejūs godu statistikys datu var sprīst, ka latgalīšu volūdā kasdīnā runoj gondreiž 100 tyukstūšys Latvejis īdzeivuotuoju, kas ir ap 8 %, Latgolā – vaira nakai trešuo daļa. „Daže, ka jūs byutu symts, kai lībīšu nazcik desmišu, vysleidza vajag tū volūdu paturēt i raudzeit jū vaira īdzeivynuot,” izsver Aņss Ataols Bierzeņš. Vaļsts volūdys centrā ir latgalīšu volūdys apakškomiseja i latgalīšu rokstu volūdys konsultants, i, pasateicūt obejim kungim, kuri aktivi volūdu lītoj oficiālajā saziņā ar īstuodem, tys ir pamaneits plotuokā sabīdreibā, stuosta Inese Muhka, i „myusu latgalīšu volūdys apjūms kai konsultaceju ziņā, tai dažaidu puorlykumu dokumentu ziņā ir cīši pīaudzs. Itei funkceja ir pareiza, tys vīnkuorši ir juodora i juoatteista.” Svareigi, ka īstuodēs, sajamūt oficialus dokumentus latgaliski, izatur ar cīnu pret latgalīšu volūdu, par sovu pīredzi stuosta Arņs Slobožanins: „Laika gaitā es saprotu, ka mes tai kai vīnā laivā eistyn siežam niu kūpā ar vaļsti. Ka maņ beja sajiuta pyrma desmit godu, ka vaļsts ir pret mani, kod es grybu kū ta latgaliski dareit, tod niu maņ ir sajiuta, ka tai kai suoc īsaklauseit tevī.”

Rubrikā „Itai lobuok” profesore Lideja Leikuma turpynoj stuosteit par tū, kaidus latgaliskūs vuordus, jūs salykumus ci formys lobuok lītuot. Itūreiz par vuordim buort, lomuot, sveņtēt. Lobuok byutu lītuot vuordu buort. Buorīņs, sabuore, nasabuorēs, buore mani, nasabar tu! Cīši skaists tautys teicīņs pārkiuņa laikā – Kas tī taids, mozam bārnam baile. Dīveņš barās, baba soka. Dīveņš barās – tys ir par pārkiuņa graušonu. Buort ir taids vīnkuoršs kasdīnys vuords, sadzeivis situacejuos lītojams, i jis byutu iz vysa lobuokais. Sasabuore buobys, buobys pi okys sasatyka vokorā i barās, pasabar i puorīt. Lomuot ir jau taids rupuoks. Jau grybādams tū ūtru aizvainuot, jau koč kū nagativu par jū pasaceit. Lomuot ir rupuoks nakai buort. Sveņtēt ir tys pats lomuot, vēļ rupuok var lomuot. Sveņtēt ir slavismys. Braneit – nav švaks vuords pats par sevi, bet jis jau ir nūveciejs, vacais vuords. Ka puorkuopums ir mozuoks, tod buort, var dabuot buorīni, tevi var sabuort. Ka jau vaira aizvainojūšuok, tod lomoj. A ka cīši aizasyrda, tod jau sveņtej.    

Byut sovys vītys patriotim i pasauļa pīredzi atvest iz sātu – ar itaidu redzīni vītejī muziki – Kristaps Višs, Ralfs Arbidāns, Imants Spīčs i Emīls Bauga – Rēzeknē reikoj muzykys, muokslys i sarunu festivalu „Spaits” Kovšu azara krostā. Kab Latgolā veicynuotu cylvāku īsasaisteišonu vysaidūs procesūs, jaunīši apsavīnuojuši SIA „Studeja” i rauga festivalā savest kūpā vysaidu žanru izpildeituojus i baudeituojus – rodūšūs talantus nu muzykys i muokslys školom, entuziastus nu navalstiskajom kūpīnom. „Ideja par festivalu „Spaits” roduos pavysam najauši. Ir eistais laiks i eistuo vīta, kur varātu sasatikt muzyka, muoksla, kultura, sports, tei beja myusu draugu lūkā. Ir paleigi nu „Nazinamuos Rēzeknis”, kuri ari sovys idejis gryb prezentēt, i ari reikuos diskuseju par tū, kai sovu piļsātu drusku lobuoku varātu vysi kūpā padariet. I paraleli ari aktivitātis, kur kotrs varēs daīt i ari sovu pierstu, i sovu dūmu dalikt tymā vysā. I mes tai kūpā saguojom, ka varātu vysu apvīnuot i iztaiseit navys vairuokus mozus svātkus, a taidus vīnus kuorteigus leluokus svātkus,” stuosta jaunīši. Ka sasavuocās loba kompaneja, „mes kotrs asam, grybātu byut sova omota speciālisti,” tod var realizēt lelys lītys, puorlīcynuoti jaunīši: „Mes asam Rēzeknis i Latgolys patrioti, i mes gribam sovys zynuošonys i prasmis pylnveiduot, i paruodeit cytim, i likt cytim prīcuotīs. Nu ko ari ir myusu mozais sauklis „Prīcojīs kulturā!”.

Rubrikā „Itai lobuok” profesore Lideja Leikuma turpynoj stuosteit par tū, kaidus latgaliskūs vuordus, jūs salykumus ci formys lobuok lītuot. Itūreiz par tū, kai latgaliski lobuok pasaceit „pēc manām domām, manuprāt”. Itai lobuok – pa munam, pa manim. Var saceit pa munam i pa tovam, i var saceit ari pa manim, pa tevim. Pa manim itai nav pareizi dareits, a kai pa tevim? Piec munom dūmom – tys jau ir otkon puorlykums nu latvīšu literaruos volūdys. Nav juosakauna nu latgaliskuos runys, bet vysleidza, kod esi publiski koč kur, tev vairuok juopadūmoj, kaidim vuordim tu izasoki. I tod cylvākam nazkaidys barjerys suocās, tod jam suoc ruodeitīs, ka tys, kai es sātā runoju, nav pareizi, tod maņ vajaga runuot gruomotu volūdā. A tei gruomotu volūda parosti saīt tys tulkuojums nu latvīšu volūdys. Tod tei ir, tai saucamuo, trešuo izlūksne, kas atsaškir tikai fonetiski. I taida latgalīšu volūda nivīna nainteresātu, nivīns rītumu profesors koč kaidā augstškolā napieteitu taidys volūdys, ka jei byutu tikai fonetiski puorlykumi nu latvīšu literaruos volūdys. Mums ir divejis sistemys, i mums obejis sistemys byutu juokūp. I latgaliskuo seviški partū, ka tei latgaliskuo ir nūturiejuse vairuok arhaismu, vairuok senejuo, nakai latvīšu literaruo volūda – tradiceja, kura jau ir apcierptuoka, kura, prūtams, ir vajadzeiga, par kuru mes ari stuovim sardzē. Bet ari tei ūtra – latgalīšu literaruo ci rokstu volūda, kai myusu volūdys boguoteibu ruodeituoja, juotur.

Rubrikā „Muzykys žvyrs” muzikis Ingars Gusāns, ari Solvvaļnīks i muzykys entuziasts Silvestrs Solovjevs stuosta par latgalīšu muzykys īrokstim, kaidi albumi latgalīšu muzykā ir izdūti i kam ir vārts dagrīzt viereibys. Apsavieršonā vysaidi muzykys žanri, grupys i solo muokslinīki. Itūreiz par grupys „Patrioti.LG” albumu „Latgaleite” (2012), kas ir spūdrys pīmārs latgaliskuos ideņtitatis kluotyn byušonai muzykā – jimā apvīnuota kai latgalīšu volūda, tai nūvoda patriotismys i ari cylvākim tyvs i saprūtams stuostejums. Albuma skaniejumā dominej šlagermuzykai rakstureiguos īzeimis i vīglai saprūtama nūskaņa, kas daudzuos vītuos baļsteita iz pazeistamom vierteibom i pīdareibys sajiutu. Tok kluotyn īrostajam skaniejumam klauseituoju sagaida ari puors nagaideiti muzykali pagrīzīni i puorsteigumi, kas ļaun iz albumu pasavērt plotuok i īt tuoļuok par stereotipiskajim žanra prīškstotim.   Žvyrs ir grants, i Sovvaļnīks skaita, ka „latgalīšu muzykys ceļš nikod nav bejs leidzons, tys vysod ir bejs kai pa granta ceļu, ari idejiski „Muzykys žvyrs” ir vysā pamatuoti – vysu laiku ceinomēs, īmam, sovpateigs ceļš.”

Katuoļu prīsters Lauris Kārklis ir vikars Ludzys, Raipolis i Rundānu draudzēs. Vosorā Latgolā aizviņ dzeiva ir kopusvātku tradiceja, kas vīnoj lyugšonu par aizguojiejim, dzymtys sasatikšonu i ari pīdareibu sovai vītai. Prīsteram Laurim Kārklim itūvosor pīrūbežā juobyun 28 kopusvātkūs, kur reizem sabrauc vaira cylvāku nakai apleicīnē dzeivoj iz vītys, „kur ruodīs, ka ir tikai kopsāta, tok cīši leli kopusvātki, cīši plotai apmaklāti. Tys nūzeimej, ka tī kuodreiz cīši daudz ir dzeivuojuši cylvāki i jim ir sasaglobuojuse vēļ tei saikne ar vītu, ar saimis saiknem, i jī dūdās tī i lyudzās.” Tyvuoki i tuoluoki radinīki meklej sovu dzymtys sakņu i goreigū spāku, i caur kopusvātkim var īraudzeit saimis attīceibu stuostus i ticeibys dziļumu, stuosta vikars Kārklis: „Atbrauce saime nu Luksemburgys. Cylvāks dzeivuoja Ludzā, i jis jau izveiduojs saimi Luksemburgā. Jis tī dzeivoj i struodoj, bet jis vad sovu bārnu kristeit iz Latgolu. Jis soka: „Tei ir muna bazneica, tei ir muna bierneiba, tuos ir munys atminis, es grybu, lai muns bārns tyktu nūkristeits ite, munā dzimtinē.” I tei saikne daudzim ir sasaglobuojuse, i taišni caur goreigū daudzi cylvāki meklej sovys saknis, i taidu goreigū smāku smeļ.” Ludzys pusē ir stypra draudze, tok vīns nu myusdīnu izaicynuojumu ir sabīdreibys vīntuleiba i dzeivuošona tikai sev, izsver prīsters: „Cīši vylynojūši, tok daudz kur tī poši skaitli ruoda koč kū pretejū – par cylvāku vīntuleibu. Niu cīši izteikti, ka jaunīši jiutās vīntuli. Deļ tuo Latvejā, par nūžālu, ir vīns nu augstuokūs pusaudžu pašnuoveibu skaitu. Tei sovys vītys naatrasšona, taida bezcereiba. Kai ba dzeivoj kai gribi, dori kū gribi, bet tys ir ar sekom. Tu navari dzeivuot vīns, tu navari byut vīns. Ari kristīts – tei ir kūpīna, kristīteiba suocās saimē, tei ir taida mozuo bazneica. Niu izpalīk saimis lyugšona. Patīseibā kūpīnu vajag i daudzi jū meklej.” Dzeivojūt pīrūbežā, satraukumu cylvākūs jiut, tok „vairuokums vystik sagloboj īškejū mīru, taidu vasalū sapruotu.” Ticeigajim itamā geopolitiskajā situacejā ir vīgļuok panest puorbaudejumus, skaita prīsters: „Tragedeja ir kod mes pazaudejam sovu dvēseli. Styprajam nikod naizbryuk. Izbryuk tim, kuri ir vuoji – kod vuoja sabīdreiba, vuoja tauta, vuoja ticeiba. Breiveiba īt kūpā ar atbiļdeibu i ar atbiļdeibys uzajimšonu.”    

Rubrikā „Itai lobuok” profesore Lideja Leikuma turpynoj stuosteit par tū, kaidus latgaliskūs vuordus, tūs salykumus ci formys lobuok lītuot. Itūreiz par tū, kai latgaliski lobuok pasaceit „breids, breižim”. Itai lobuok – olps, olpom. Olpom – Baltu ciļmis cīši skaists, lobs vuords. Breižim, šaļtim, reizem, vysaiži var izsaceit, bet myusim ir olps, olpom, olpim. Vīnā olpā – vīnu breidi. Vīnā olpā maņ ruodejuos, ka es varātu tū dareit, a cytā olpā jau atsasaceju. Itymā olpā, itys olps – itys breids.  

Literaturzynuotnīka Valentina Lukaševiča i viesturis doktoranta, muzika Arņa Slobožanina sagataveitejā „Vuordineicā” itūreiz par vuordu „pūsts, pūstumi”. Vīna nūzeime: pūstumi – dabasu zīmeļu puse. „Jei beja guojuse nu austrumu da rītumu, nu dīnvydu da pūstumu,” tai ir rakstejuse Ilze Sperga. Cyta nūzeime – pūsteit, izpūsteit, iznycynuot. Juoņs Cybuļskis „Latgolys vuordā” roksta: „Radeituojs ir devs cylvāku izmontuošonai, leidzeigi kai šī ļaunumi pūsta cylvāku dzeivi, taipat apzineigi cylvāki meklej dažaidus ceinis leidzekļus šū ļaunumu apkaruošonai.” Vēļ cyta nūzeime: pūsts – tukšs. Pūsts cylvāks. Pūsta runa. Pūsta gluoze. Vēļ var saceit dīks, dīka runa, dīka buteleite. Pūsts – ļaunums. 1939. goda „Katuoļu Dzeivē” raksteits: „Bezdīveibys propaganda izplyust nu vysom pusem, i komunistiskuo literatura dažaiduokūs veidūs puorpludynoj vysu pasauli, nūdorūt lelu pūstu cylvāku goreigai i laiceigai dzeivei.”  

Zyrgu sātys „Klajumi” saimineica Ilze Stabulniece Kruoslovys nūvoda Kaplovā ar saimi audzej Latvejis škirnis zyrgus, organizej zyrgu izjuodis pa Daugovys lūkim i saimis restoranā ļaudim pīduovoj kulinaruo montuojuma lobumus, kod iedīņam ir stuosts: „Iz sadarbeibys daudz kas bolstās vysā pasaulī, partū ka mes ari asam pasauļs, myusu Latgola, myusu Kruoslova.”  Latgolys pīrūbežā turysmys nav tikai pakolpuojums, bet gon dzeivisveids, dzymtys stuosts i atsatīkšona pret pasauli. Iz „Klajumim” cylvāki brauc naviņ iz zyrgu izjuodem, bet ari piec mīra i dobys spāka. Iz Latgolu vajag atbraukt „vysa pyrma deļ tuos leluos vierteibys – deļ myusu cylvāku – dzierdēt myusu bolsus, redzēt myusu patīsuos acs, saprast, kai mes dzeivojam, redzēt myusu lūpus, naviņ zyrgus, myusu dobu,” izsver Ilze Stabulniece.  

Rubrikā „Muzykys žvyrs” muzikis Ingars Gusāns, ari Solvvaļnīks i muzykys entuziasts Silvestrs Solovjevs stuosta par latgalīšu muzykys īrokstim, kaidi albumi latgalīšu muzykā ir izdūti, i kam ir vārts dagrīzt viereibys. Apsavieršonā vysaidi muzykys žanri, grupys i solo muokslinīki. Itūreiz par grupys „Bez PVN” debejis albumu „Pyrms vuorda” (2006), kas ituo gods beiguos svieteis sovu 20 godu jubileju. Īspiejams, pyrmais pylnmetražys rokalbums latgalīšu muzykys viesturē, kas izaceļ ar daudzpuseigū materialu, kas izvad klauseituoju cauri plotam jiutu spektram – smeļdzeigi, patīsi, sirsneigi, tautyski i naiztikt bez mozys humora devys.   Žvyrs ir grants, i Sovvaļnīks skaita, ka „latgalīšu muzykys ceļš nikod nav bejs leidzons, tys vysod ir bejs kai pa granta ceļu, ari idejiski „Muzykys žvyrs” ir vysā pamatuoti – vysu laiku ceinomēs, īmam, sovpateigs ceļš.”  

Rubrikā „Itai lobuok” profesore Lideja Leikuma turpynoj stuosteit par tū, kaidus latgaliskūs vuordus, tūs salykumus ci formys lobuok lītuot. Itūreiz par vuordu „sapyns, sepinēt”. Sepinēt vīnai daļai latgalīšu ir tys pats, kas vyds dialekta sapņuot.  Dīnavydlatgolā nasoka sepinēt. Dīnavydlatgolā soka sapyns i sapynuot. Cyti jū lītoj ari ar ūtru nūzeimi – sepinēt nūzeimej jau taidus kai mūrgi, koč kas nareals, ka tu stuosti damaluodams varbyut, voi tī dalykdams, īsadūmuodams, ka tai varātu byut, bet tai patīseibā nav. Na vysai lobi sapyni palīk par mūrgim. Sapyns ari ir ar lelu fantazejis procentu – tu īsadūmoj, kai tys varātu byut, voi kai tev grybātūs, kab tai byutu. Tovys īdūmys, tova īsadūmuošona. Var byut ari leli sapyni – grybu tikt olimpiskajā komandā. Vysaidi sapyni var byut.

Lienīte i Juoņs Litavnīki (Lienīte i Jānis Litavnieki) ir Rēzeknis nūvoda uzjiemieji, kuri lauku vidē ražoj Latvejis tiergā unikalus produktus sovā uzjāmumā „Safīra L”. Dzeive pīrūbežā i ticeiba sovai vītai dūd spāku struoduot i veidot sovu kasdīnu, nasaverūt iz turisma nūzaris ituo gods izaicynuojumim Latgolā. Drūšai braucit iz Latgolu, cylvāki ite iz vītys aicynoj naiznīcynuot turisma nūzari regionā ar naapdūmeigim vuordim. „Mes vysi asim vīnā laivā.”

Viļānīte Vija Piziča ir Atzineibys krysta viersineica, juriste, Latvejis Zvārynuotu notaru padūmis reikuotuojdirektora vītineica, sabīdryskuo darbineica i aktiva latgaliskuos kulturys atbaļsteituoja. 4. majā Vija Piziča sajēme augstuokū Latvejis vaļsts apbolvuojumu par nūzeimeigu īguļdejumu tīsyskys vaļsts styprynuošonā i sabīdryskajā dorbā. Sajamūt Atzineibys krystu, kura devize ir „Godaprāta ļaudīm”, Vija ir pagūdynuota: „Kod tu apsazynoj, saprūti, kas tys ir par mārūgu, i paraugi īlikt sevi tymā mārūgā, cīši pagūdynojūši tys ir, i taišni tys, ka tevi īlīk gūdapruota ļaužu kategorejā, mani cīši aizkustynuoja.” Notariatā Vija Piziča suoce struoduot laikā, kod „beja objektiva vajadzeiba piec puormaiņu notariatā. Cylvāki beja naapmīrynuoti, ka navarēja datikt notarim, deļ pakalpuojumu kvalitatis,” i struodoj tī jau catūrtdaļu godu symta, kod „daudzys puormainis tyka veiktys. Vīna nu jūs, ka Latvejis notari beja pyrmī naviņ Eiropā, bet pasauļa 80 vaļstu grupā, kurā ir latiņu tipa notariats, kuri suoce snīgt sovus pagolpuojumus virtuali. Mes bejom taidi vīneigī kaidus treis godus.” Taidu pakolpuojumu sagatavuošonai beja vajadzeigs vysā gars laiks, i sasnīgtais ir juonūviertej, stuosta Vija: „Lapnumu par sevis dareitū mums juoapsazynoj, mugurai ir juobyut taisnai. Pīticeibai, pazemeibai, pateiceibai juobyut, bet ari objektivi nūvērtēt tū, kū tu esi izdarejs, kū vaļsts ir izdarejuse, tū maņ grybātūs nūvēlēt sev i ari cytim.” Vijis spāka i bolsta punkts ir Dīvs: „Provideņcis darbeibai nav ni rūkys, ni kuojis, tī vysur vajadzeigi cylvāki, leidz ar tū skaidrys – ka mes asom labvieliegi vīns pret ūtru, mes cīši daudz varim izdareit.” Viļānūs Vija voda īdzeivuotuoju padūmi i iz sabīdreibys īsasaisteišonu procesūs verās cereigi, cylvāki aizviņ vaira īsasaista, „mes redzēsim, kai sabīdreiba atsaveseļoj,” bet svareigi pošam struoduot ar sevi: „Patīseibā asu treniejuse sevi iz taidu neitralu attīksmi iz sevkuru nūtykumu, kai iz pozitivu, tai iz nagativu, lai es saglobuotu vasalū sapruotu i vāsu pruotu, i varātu analizēt, pījimt lāmumus, i natikt kaidā manipulacejā. Ka tu nadūmoj, tod tevi kaids izmontuos.” Latgolā Vija jiutās drūsai, tok tys „nanūzeimej, ka es nadareišu lītys, lai es i leidzcylvāki justūs vēļ drūsuok, bet sapruoteigi, bez puorspeiliejumu.” Latgalīšu volūda Vijai ir saimis volūda, latgaliskuo ideņtitate Vijai nūzeimej „byut. Vysa pyrma, es asu Dīva bārns, i tī ir cīši daudz latgaliskuo. Svareigi byut pošam. Vīnkuorši esi pats, saprūti sovu aicynuojumu, sovus aizdavumus, saprūti, ka tu naesi najauši itymā pasaulī, tev ir nūteikti mierki. Maņ ir cīši svareigs taisneigums kai cylvākam.” Itūgod rudinī byus Saeimys vieliešonys, „nivīns nadreikst palikt molā, naizsacejs sovu izvēli. Kotram myusu lāmumam ir sekys,” skaita Vija. Demokratiska vaļsts ir „cīši trauslys instruments. Ka mes jū nalītojam, tod mes, tod tys nazs palīk naoss, i jis vaira maizis nagrīž. Īsasaisteit jebkaidā veidā, kai tu vari, sabīdreibys kūpejuo lobuma vairuošonā. Ka tu pats nasuoc, bet redzi, ka cyts aizsuoc, atbolsti jū. Ka ituos vīnkuoršuos lītys mes suoksim dareit, poši byusim puorsteigti, cik daudz mes puorveidojam i uzlobojam sovu dzeivi apleik. I kai tys kūpejais lobums tai pili pa pilei augs i augs.” Ari tod, ka rezultats nav taids, kaidu gaidi, tys juospiej pījimt i juoturpynoj īt i dareit, puorlīcynuota Vija: „Ka es gribu byut sadzierdāta taipat kai sātā, maņ juorunoj tik ilgi, cikom mani dzierd. Kū vairuok mes apsavīnuosim ap nūteiktu mierki, tū precizuok i dreižuok myus ari dzierdēs.”

Helēnys i Jura Viļumu saimē aug diveji dāli – Vitolds i Teodors, i latgalīšu volūda jim ir naviņ sazinis veids, jei ir vide, kurā aug bārni, veidojās attīceibys i teik saglobuota pīdareibys sajiuta. Helēna, Jurs, Vitolds i Teodors Viļumi runoj par sovys saimis pīredzi, kaida ir latgalīšu volūdys vīta myusdīnu Latvejā, kod apliek dominej cytys sazinis telpys, kai bārni pījam i turpynoj vacuoku dzymtū volūdu, i kū cylvākam nūzeimej dūmuot, runuot i dzeivuot sovā volūdā uorpus Latgolys. Viļumu saime izaveiduoja pyrma divpadsmit godu 17. majā, Vitolds vuicās Rēzeknis suokumškolys 5. klasē, Teodors īt bārnuduorzā, Jurs saimē ar bārnim runoj latgaliski, Helēna – latvyski. Latgalīšu volūda ir jūs saimis ideņtitate, stuosta Jurs: „Tei ir daļa nu manis, i ka es tū daļu naīdūdu sovim bārnim, nu tod koč kū mes zaudejam vysi. Saimē mes runojam kai latgaliski, tai baļtiski. Piec byuteibys tys ir taids mozais Latvejis idealais modeļs, ka runojam par volūdom. Var runuot latgaliski, var runuot baļtiski, vīns ūtra saprūt. I latvīšu volūdys ituos obejis divejis boguoteibys koč kaidā veidā, es ceru, ka juos sasaglobuos i atsateisteis.” Teodors latgaliski ronoj kai ar bārnim, tai škuoluotuojom bārnuduorzā. Vitolds soka, ka jam gruomotys skaiteit latgaliski ir tikpat vīglai kai latvīšu literārajā volūdā: „Maņ apmāram vīnaidi.” Vitolds vuicās ari latgalīšu volūdys pareizraksteibu, stuosta juo mama Helēna: „Jis roksta eiszinis papam, kod paps brauc nu Reigys, paruoda maņ, voi pareizi pīraksteja. Jam ir svareigi, lai ir pareizi latgaliski.” Viļumu saimē vysaidys gruomotys skaita, i nav jau tai, ka tikai latgalīšu gruomotys var skaiteit latgaliski, stuosta Jurs: „Vysys gruomotys nu suokuma, kod skaiteju bārnim prīškā, es skaiteju ar reizi latgaliski. Respektivi, gruomota ir saraksteita latvīšu literarajā volūdā, bet es jū automatiski, cik maņ labi saguoja, puorlyku latgaliski. Vysys gruomotys var skaitiet latgaliski.” „Naradzu nivīnu problemu, kas varātu rastīs bārnim nu tuo, ka jī sātā ir runuojuši latgaliski ar vacuokim, nav nikaida pamatuojuma tam,” puorlīcynuota Helēna. Školuos, kur nūvodvuiceibā ir latgalīšu volūdu, situaceja grupuos ir cīši atškireiga. „Es gaideju, ka mes parunuosim par latgalīšu volūdys viesturi,” soka Vitolds. Jurs papyldynoj: „Tī leimini latgalīšu volūdā bārnim ir cīši dažaidi. Juodūmoj, kai latgaliskū īdzeivynuot, suocūt nu bārnuduorzu. Byutu breineigi, ka tom saimem, kuramuos jau runoj latgaliski, varātu byut laiku pa laikam koč kaidi pasuokumi, kur nūstyprynuot latgalīšu volūdys zynuošonys i prasmis, lai bārni redz, ka ir cyti bārni, kas runoj latgaliski, i ka saimē runoj latgaliski, ka tys nav trokais paps, kas vīns pats papa volūdā runoj.” Kaida byus latgalīšu volūda iz prīšku tuoļuokuos paaudzēs, atkareigs nu pošu volūdys runuotuoju. Vitolds grybātu, „ka palīk latgalīšu volūda.” Jurs skaita, ka tehnologejis atsateista i tys var „paleidzēt volūdys īdzeivynuošonai, bet tei švakuo puse, ka babeņu i dzedeņu vaira napalīk. Demografeja kreit iz leju, laukūs, kur latgalīšu volūda beja daudz stypruoka nakai piļsātvidē, ir mozuok cylvāku, leidz ar tū ir sovi riski, partū ka volūda jau ir stypra nu tuo, cik daudz cylvāki jū lītoj.” Volūda kai muols puorsameica, cikom palīk skaista, skaita Jurs: „Kai muola svečturi – kab jū sataisietu, vajag daudz muola sameiceit. Tai ite, kab byutu skaista volūda, ar dzejūlim, ar literaturu, ar vēļ koč kū, vajag daudz tuo muola! Ka jis koč kur meicejās, maļās, tod volūda ari atsateista, koč kaidi jauni vuordi atīt.” Helēna papyldynoj: „Ka cylvāks jiut, ka jam nasagrib pazaudēt latgalīskū sajiutu, vīnkuorši nasabeit i raudzeit atrast veidus, kur praktizēt. Golvonais ir justīs breivi, kod tu runoj latgaliski, lai nav sajiuta, kū padūmuos, ka taids nu dzeraunis ci tamleidzeigi, bet ka tei ir taida poša volūda, kai vysys volūdys. I tev jei ir, laid vīnkuorši, palaid, lai jei dzeivoj. Tys, ka īsamaisa vuordi nu angļu volūdys, nu krīvu volūdys, tys ir bejs vysūs laikūs. Vysys volūdys kai muoli puorsameica, bet taipat turpynoj sovu gaitu. Ari latgalīšu volūda taidā pošā veidā eksistēs. Kai jei eksistēs, nivīns navar paradzēt, bet jei byus.”

Rubrikā „Itai lobuok” profesore Lideja Leikuma turpynoj stuosteit par tū, kaidus latgaliskūs vuordus, tūs salykumus ci formys lobuok lītuot. Itūreiz par tū, kai latgaliski lobuok lūceit darbeibys vuordus vieliejuma izteiksmē. Itai lobuok – mes grybātumem, mes runuotumem, mes doncuotumem. Vieliejuma izteiksmē – mes grybātumem. Lideja Leikuma skaidroj: „Tys ir koč kas breineigs, kas myusu volūdā ir. Patīseibā tei ir myusu vacvacuo forma darbeibys vuorda sistemā. Dīnavydlatgolā juos ir dzeivys pa šudiņdīnai, puorejim latgalīšim jau mozuok. Vydsdialekta latvīši itū sovpateibu seņ jau pagaisynuojuši, jim nav tuo formu škeiruma, šur tur, pa kaidai koč kur nūskaņ vēļ Kūrzemis kaiduos izlūksnēs, bet jim nav pylnā sistemā nikur vairs itūs formu, a latgalīšim vēļ ir kotrai personai, i pa šudiņdīnai juos vēļ ir dzeivys. „Mes runuotu” jau ir jaunuoka forma. „Mes runuotumem” ir vacuo forma. Jei ir breineiga, juos vajaga turēt. Tys ir tys, par kū myusu volūdai pīvierš viereibu ari tī zynuotnīki Rītumeiropys vaļstīs, kas suoc iņteresētīs par latvīšu volūdu, jī tiuleņ ituos formys aproksta kai lelu duorgumu. A mes poši sova monta namuokam nūviertēt. Tys ir tys, ar kū mes asam interesanti pasauļam.” Vieliejuma izteiksmē itai lobuok: Es grybātum, tu gribietim, jis, jei grybātu, mes grybātumem, jius grybātumet. Ka maņ byutu īspieja, es doncuotum nu reita da vokora. Mes doncuotumem obejis, ka mums tei īspieja byutu. Mes runuotumem nu reita da vokora. Jius runuotumet nu reita da vokora.    

Literaturzynuotnīka Valentina Lukaševiča i viesturis doktoranta, muzika Arņa Slobožanina sagataveitejā „Vuordineicā” itūreiz par vuordu „drons”. Verūtīs iz ituos nedelis nūtikšonom Rēzeknis pusē, pādejūs dīnu apsprīstuokais vuords Latgolā varātu byut „droni” drūšeibys kontekstā. Sovpus rubrikā „Vuordineica” apsaveram itū vuordu nu volūdys redzīņa, i voi vuordam „drons” vajadzātu izdūmuot kaidu cytu latgaliskū verseju.

Rubrikā „Itai lobuok” profesore Lideja Leikuma turpynoj stuosteit par tū, kaidus latgaliskūs vuordus, tūs salykumus ci formys lobuok lītuot. Itūreiz par tū, kai latgaliski lobuok pasaceit „paļauties”. Itai lobuok – atsadūt. Lideja Leikuma skaidroj: „Vuords „pasaļaut” caur latvīšu literarū volūdu īguojs. Var saceit – atsadūt, nūticēt. Aprokstūšuos konstrukcejis var byut vairuokys, i navajag raudzeit vysod atrast vuords pret vuordu – es tev nūtycu, es tev pylnā mārā nūtycu, tycu tikai sev. „Davīrēt” byus atrūnams vacajuos gruomotuos, tys ir vacs slavismys myusu volūdā, i taidi vaci slavismi vīns aiz ūtra palānai atmierst.”

Ratinsku saime nu Rēzeknis – Ilona, Mareks i Dominiks apzynuoti veidoj i dzeivoj latgaliskā vidē. Latgalīšu volūda Ratinsku saimē ir muotis volūda, pošsaprūtams sazinis pamats i pylnviertiegi kluotyn asūša vysuos dzeivis jūmuos – školā, dorbā, draugu vydā. Mareks Ratinskis vuicās Rēzeknis Vaļsts 1. gimnazejis 8. klasē, spielej futbolu i basketbolu, Dominiks Ratinskis vuicās Rēzeknis suokumškolys 6. klasē i spielej futbolu, jūs mama Ilona Ratinska struodoj foto veikalā. Ilona ari poša izauguse latgaliskā vidē: „Es dzeivuoju taidā latgalīšu vidē, mes pogolmā bejom voi nu latgalīši, voi nu krīvi, latvīši beja daži bārni, kas atbrauce pi babu vosorā. Nikū eipašu es nadūmoju, ka runoju latgalīšu volūdā, tys beja pats par sevi saprūtams, deļ tuo ka tai runuoja vysi. Školā mes sovā storpā runuojom, školuotuoji runuoja latgalīšu volūdā, stuņdis beja latvīšu volūdā, bet uorpus mums vide beja latgalīšu.” Latgalisku vidi Ilona turpynoj veiduot ari sovim bārnim: „Es mieginuoju izveiduot taidu vidi, lai jī nasajustu kai aborgeni, ka mama ir vīneiguo, kas ar jim runoj latgalīšu volūdā. Deļtuo saimis doktere jim ir latgalīte, zūbu higieniste, speciali meklieju, ir latgalīte. Puišim ir sovi draugi, ar kū jī runoj latgalīšu volūdā, sasaroksta ar eisziņom jī sovā storpā latgaliski.” Mareks aplīcynoj: „Ar daudzim draugim runoju latgaliski. Školā ari ir daži klasisbīdri, ar kurim latgaliski runoju, i školuotuoji ari latgaliski runoj, deļtam vyss ir labi.”  Dominiks pīkreit: „Školuotuoji latgaliski runoj, ir draugi futbolā, kuri latgalīšu volūdā runoj, ar školys draugim gondreiž vysim runoju latgaliski.”  Ratinsku saime ir bilingvala, tok volūda ar bārnim gon ir latgalīšu, stuosta Ilona: „Pat navaru nikod dzeivē īsadūmuot, ka ar sovim bārnim runuotu kaidā cytā volūdā. Tys beja nu vīnkuorši pats par sevi saprūtams. Nui, veirs ir krīvs, mes ar jū runojam krīvu volūdā, bet ar bārnim mes vysi runojam latgalīšu volūdā.” Ka dzierdi apliek sovu latgalīšu volūdu, jei navar byut sveša, ka runoj tāvs, muote, dzeds, baba, tod ari bārnim, aizīmūt iz bārnudruorzu i školu, latgalīšu volūda sasaglobuos, sprīž Ilona: „Mani tys puorsteidz, kod roksta, ka Rēzekne ir cīši krīvyska. Es nazynu, es laikam koč kaidā sovā burbulī dzeivoju, maņ vyss ir latgalīšu volūdā, es naradzu problemu. Vysi kontakti ar školuotuojim ir latgalīšu volūdā. Vysusmīkleiguokais vysod beja tys, ka maņ juopīroksta, ka muns bārns ir latvietis, voi ka dzymtuo volūda ir latvīšu volūda. Es izreizi soku – nu, jam nav dzymtuo volūda latvīšu, jam dzymtuo volūda ir latgalīšu. Dominiks vyspuor latvīšu volūdā suoka runuot trejūs godūs. Jis īsavuiceis latvīšu volūdu, i par tū es pat naīspryngu.” Ilona stuosta par sovu gramatikys pīredzi, cik svareigi byutu, ka školā vuiceitu latgalīšu volūdys gramatiku: „Maņ latvīšu volūdā beja problemys ar konjugacejom. Es vysu suoku saprast tikai tod, kod es suoku saprast latgalīšu gramatiku. Es beidzūt saprotu – ā, tai tuos konjugacejis, redz, kur tys suņs beja aprokts tymā latvīšu volūdā. Ka bārni zynuotu gramatiku latgaliski, jim byutu vīgļuok vuiceitīs latvīšu volūdu.” Sovs latgalīša lapnums i mugurkauļs juonūtur ari breižūs, kod nu molys kaids grib apsmīt ci izviļkt kaidu stereotipu, puorlīcynuota Ilona: „Mes asam tī, kas poši sovu volūdu nasam. Poši cylvāki sev izlīk koč kaidu klišeju, ka ar bārnu navar runuot latgalīšu volūdā.” Ilonys vieliejums latgalīšu mamom ir vīnkuoršs i teišs: „Muot, naapzūdz sova bārna, īdūd jam sovu dzymtū volūdu leidza! Tys byutu muns nūvieliejums. Es jau smejūs – latgalīšim tei volūda ir tik cīši slapana, ka vacuoki bīži viņ izdūmoj – nā, sovam bārnam es nanūdūšu tū volūdu tuoļuok. Es skaitu — tei ir klaja bārna apzogšona. Tu pats runoj latgaliski, a bārnam tu pieški izdūmoj – es ar jū narunuošu latgalīšu volūdā. Nu, kū tys bierneņš tev ir taidu izdarejs, ka tu nūliemi ar jū narunuot latgalīšu volūdā? Nav problema, vide ir tys, kū tu pats izveidoj. Vyss nu teve ir atkareigs, ka tu pats runuosi latgalīšu volūdā, tev ari pretim runuos latgaliski.” „Nasakaunēt runuot latgaliski, tys ir normali, ka tu esi latgalīts i vari runuot sovā dzymtajā volūdā,” dasoka Mareks.

Rubrikā „Itai lobuok” profesore Lideja Leikuma turpynoj stuosteit par tū, kaidus latgaliskūs vuordus, tūs salykumus ci formys lobuok lītuot. Itūreiz par tū, kai latgaliski lobuok saceit „zupa”, itai lobuok – virīņs, vyrumeņš.

Literaturzynuotnīka Valentina Lukaševiča i viesturis doktoranta, muzika Arņa Slobožanina sagataveitejā „Vuordineicā” itūreiz par vuordu „okuots”. Voi tev ir okuots īt iz dorbu, pi tuo – na vīnkuorši īt, bet dareit tū ar lelu prīcu, ar lelu dedzeibu. Leidzeigi kai „dareit ar lelu entuziasmu”. Vuords vysa tycamuok guojs nu slavu volūdu, varātu byut saisteits ar meideibom: ar lelu okuotu, ar lelu dedzeibu īt medeibuos, īt da meža.  

Niu eistynuots muzeju digitalizacejis projekts, kurymā deveni Latgolys regiona muzeji, jūs vydā ari Latgolys Kulturviesturis muzejs, ir suokuši pīduovuot daļu sovu izstuožu eksponatu apsavieršonai digitalā vidē, tymā skaitā ar virtualuos realitatis okulerim. Kū nūzeimoj muzejs digitalajā laikmatā, voi virtualuo pīredze var aizstuot kluotīnis apmekliejumu, voi ari tys ir kai impuļss kluotīnis apmekliejumam, par itū i na tikai saruna ar Latgolys Kulturviesturis muzeja direktori Anastasiju Strautu.

Par myuža īguļdejumu latgalīšu kulturys atteisteibā itūgod Latgalīšu kulturys goda bolvys “Boņuks 2025” ceremonejā gūdynuos kulturys darbineicu, Zīmeļlatgolys tradicionaluos kulturys sorguotuoju, projektu vadeituoju, kulturviesturis pietneicu Rutu Cibuli. Ruta Cibule jau vaira nakai 40 godu dorbojās kulturys i biblioteku jūmā, naatkareigi nu ījamamuo omota vysod augši viertiejuse i turpynoj styprynuot Zīmeļlatgolys namaterialū kulturys montuojumu, latgalīšu volūdu i vītejūs cylvākus. „Dzeivojūt mozuos vītuos, nadreikst dareit mozys lītys, vajag dareit lelys lītys, i tai dūmoj, kū tu gribi izdareit, vajag byut leluokai par tovu kasdīnu. Tu nadreiksti dūmuot mozys dūmys, tod tu ari mozus darbeņus tikai izdareisi. Ka tova īcere ir tuoda, kuru tu eisti navari sasnēgt, tod tei ir normala īcere. Ka tu izdareisi 80–90 procentu nu cīši lelys dūmys, tys byus labi. Izadreikstēt vajag, vajag sapņuot lelus sapynus, i tod ari izadūs.” Ruta Cibule auguse Baļtinovys pusē, tys laiks jai īdevs „tuodu mīreigu styprumu”, studiešona LU Filologejis fakultatē bibliografejis apakšnūzarē īdavuse „laukuma sajiutu. Skatejumu, ka pasauļs voi informativuo telpa nasastuov nu vīna gabaleņa, bet ka tei ir puzle, kas sastuov nu cīši daudzu gabaleņu. Tev vysu laiku vajag vērtīs iz tū laukumu, iz tū biļdi koč kaidā kūpumā i kūpsakareibuos.” Bolvu pusē Ruta Cibule vaira nakai 20 godu dorbuojusēs biblioteku jūmā, i vaira nakai 20 godu struoduojuse kulturys jūmā – „tī beja ari fiziski spieceiguokī i taidi ciļvieciskuos izaugsmis godi”. Vadejuse biblioteku, kulturys nūdaļu, bejuse vaļsts inspektore, tok „tam nav nikuodys nūzeimis eistineibā, kuo tī omoti saucās, vysmoz deļ mane,” soka Ruta Cibule. „Kultura jau nav tikai tys, kas nūteik kulturys ci tautys nomā. Varbyut pat svareiguok tys, kas nūteik uorpus tautys nomim. Tautys kultura, tautys tradiceja, kas ir uorkuorteigi spieceiga – vīnys lauku sīvys goreigais montuojums cytureiz ir tik apbreinys vārts, ka tev vīnkuorši gribīs paklusēt i apbreinā pasaklauseit tū boguotū pasauli, kas ir vīnā cylvākā.” Zīmeļlatgolys identitati izceļ divys spieceigys īzeimis, skaita Ruta Cibule: „Vīna ir patriotismys cīši augstā leiminī. Tū varim vērtīs jau nu Latvejis vaļsts dybynuošonys laiku, juo Latgolys partizanu pulks patīseibā ir vīneigais militarais formiejums, kas ir radīs nu tautys inicativys. Nu mozu puļceņu izaudzs par lelu i nūzeimeigu spāku Latvejis vaļsts naatkareibys nūsorguošonā šamā pusē. Ūtra līta – ite ir sasaglobuojušys cīši styprys tautys tradicejis – tradicionaluo dzīduošona, kas ir spylgtuokuo nu Zīmeļlatgolys īzeimu, tradicionalī daņči, tradicionaluo muziciešona. Varim runuot par saļmem, maja dzīduojumim, eipaši dzīduošonu ar pusbaļsi. Divys golvonuos lītys, kur es radzu Zīmeļlatgolys atškireibu i Zīmeļlatgolys spāku.”

Rubrikā „Itai lobuok” profesore Lideja Leikuma turpynoj stuosteit par tū, kaidus latgaliskūs vuordus, tūs salykumus ci formys lobuok lītuot. Itūreiz par tū, kai latgaliski lobuok pasaceit škeivs, apakštaseite, gluozeite. Itai lobuok – telierdzs (talerka), spodkeņa, kiliškeņa. Ite saimisteibys prīškmati, kas mums atguojuši caur poļakim. Latgalīšu meitinis guoja kolpuotu iz poļaku muižom, tī juos vuicejuos vysaidus smolkūs vuordus i atnese iz sātu. Ir vysaidys polinismu variacejis – talerka, teļvierdzs, telierdzs, telierdžs. Škeivs ir adaptāts vuocu ciļmis vuords, germanismys. Vysod pyrmū rūku dūtu tam, kas nu pošu tautys guojs, ar vysu tū, ka jis svešu kungu atnastais. I škeivs ir svešu kungu atnastais. Lobuok – telierdzs, talerka. Telierdžus salīk prīškā. Mozeņais telierdzeits kopejis kruškai (apakštaseite) byus spodka, spodkeņa, tū par telierdzi nasauks. I vēļ par golda kulturu runojūt – ir taida moza gluozeite – gluozeite ir germanismys, bet latgaliski ir kiliškeņa.

Kūpīna „Nezināmā Rēzekne” (latgaliski „Nazynomuo Rēzekne”) ar vysaidom iniciativom jau ostoiņus godus aktivi dorbojās Rēzeknis i Latgolys kulturtelpā, puļcejūt kūpā vysaidu profeseju i paaudžu cylvākus i veicynojūt piļsūniskū leidzdaleibu. Kūpīnā dorbojās ļauds, kuri pietej interesantus faktus par piļsātu, izdūta ari gruomota „Eisa Rēzeknis viesture”, reikoj lekcejis, ekspedicejis, tolkys, putnu vāruošonys pasuokumus i īdrūsynoj sabīdreibu paust sovu redzīni. Aktivitatis ir pamaneitys i nūvārtātys, i itūgod bīdreiba „Nezināmā Rēzekne” nomināta Latgalīšu kulturys goda bolvai „Boņuks 2025”. Par bīdreibys padareitū, par planim iz prīšku, kai nu mozys kūpīnys augt par lelu i par latgaliskū Latgolā stuosta bīdreibys „Nezināmā Rēzekne” puorstuovis Regita Zeiļa i Laura Spundere. Kūpīna „Nezināmā Rēzekne” dorbojās nu 2018. gods, kas roduos kai naformala iniciativa, „kab vairuok izzynuotu Rēzeknis viesturi, taišni tū nazynomū, kam mes paskrīnam garum i kū mes ari napamonom,” stuosta Regita Zeiļa, kura kūpīnā dorbojās nu poša suokuma. „Ite ir juopīmiņ Andris Uškāns, kurs kai viesturnīks ari suoce pieteit Rēzekni i gribēja vairuok par tū runuot i vairuok ari publicēt vysaidus stuostus, i vyss saguoja vīnā mozā izzinis bukletā 2020. godā, kas tai i saucēs „Nazynomuo Rēzekne — ceļveds ziņkuoreigajim”. I es saceitu, ka „Nazynomuo Rēzekne” eistineibā apvīnoj taidus ziņkuoreigus cylvākus, kuri grib naviņ izzynuot vaira, bet ari kūpā radeit pateikamu vidi, kūpīnu, kur var saīt i dareit.” „Nezināmā Rēzekne” apvīnoj kai viesturnīkus, tai dobys pietnīkus i cytu jūmu interesentus, „niu asam ari cīši plotai aizguojuši par dobu, par kūpīnys īsaisti. Itūgod vairuok dūmuosim par apkaimem Rēzeknē, kai sevkurs var uzajimt atbiļdeibu par vidi, kurā dzeivoj,” pastreipoj Regita. Laura Spundere bīdreibā „Nezināmā Rēzeknē” suokuse dorbuotīs vāluok, tok saprotuse, ka tys jū iņteresej: „Myusu kūpīna niu ir vysā stabila, kaidi 10–15 cylvāki, kuri aktivi īsasaista. Prūtams, mes grybātum, kab cylvāki nasabeist i vairuok īt da myusu.” „Nezināmā Rēzekne” jau ir palykuse par zeimynu i dorbojās uorpus piļsātys rūbežim, īsasaistūt kai Latgolys, tai vysys Latvejis vaicuojumūs. Pārnejā godā izdūta ari Andra Uškāna gruomota „Eisa Rēzeknis viesture”, i Laura skaita, ka taišni par tū bīdreiba ir tykuse „Boņuka” nominantūs, „jei fokusejās pamatā iz Rēzeknis viesturi, bet ir gona daudz aspektu, kas ir saisteiti ar vysys Latgolys viesturi”. Regita vys byušonu „Boņuka” nominantūs vaira redz par tū, „ka myusu pīmārs varātu ruodeit, ka latgaliskais var byut cīši vysaids, i ka Latgolys kulturtelpu boguotynoj daudzveideigi pasuokumi, kas ari var byut kūpīnys radeiti. Par vysaidu temu aktualiziešonu, kas ir kai saisteitys ar Latgolys cylvākim, ar Latgolys viesturi, ar Latgolys kulturu, kū mes gribim saglobuot, ar kū mes lepnojamīs, i sevkura aktivitate, kū mes dorim, patīseibā ir ar golvonū mierki, kab īdzeivuotuoji pasavārtu iz apleicīni sovaižuok. Otkon īmeiļuot tū vītu, nu kurīnis tu ej, kur tu dzeivoj, tys ir byutiski. Mes varim pylnvierteigi īguļdeit i atteisteit tū vītu.”   Voi bīdreiba par pārnejā godā padareitū sajims Latgalīšu kulturys goda bolvu „Boņuks”, zynuosim 14. martā, kod Latgolys viestnīceibā „Gors” nūtiks apbolvuošonys ceremoneja, tū varēs tīšraidē klauseitīs ari LR1 i vērtīs LSM.lv, kai i vokorā LTV1.

Rubrikā „Viesture latgalīša acim” viesturis doktorants i muzikis Arņs Slobožanins atsaver iz konfliktu par Suecys kanalu 20. g. s. vydā, i kai caur latgalīšu presi par itū konfliktu tyka veiduota latgalīšu sabīdriskuo dūma. Suecys krize beja 1956.–1957. godu konflikts storp Egipti i Lelbritaneju, Izraelu i Fraņceju. Streids beja par tū, kurs kontrolēs kuģu plyusmu pa Suecys kanalu. Suecys kanals škārsoj Egiptis teritoreju i savīnoj Sorkonū jiuru ar Vydsjiuru, tys ir nūzeimeigs i strategiskys objekts kai militari, tai ari ekonomiski i politiski.

Rubrikā „Itai lobuok” profesore Lideja Leikuma turpynoj stuosteit par tū, kaidus latgaliskūs vuordus, tūs salykumus ci formys lobuok lītuot. Itūreiz par tū, kai latgaliski lobuok saceit, kab apstyprynuotu tū, ka ir taisneiba. Itai lobuok – zynoms, prūtama līta, skaidrys, tai ir, pareizi, taisneiba, vyss tai, kai tu soki. Daudz variaceju, daudz īspieju, vysus var lītuot.  

Par volūdys daudzveideibu, jaudu i prestižu, kai veiduot pozitivu atsatīkšonu pret volūdu i cytam pret cytu – saruna ar volūdneicu, filologejis doktori i gruomotys „Valodu jauda: no ģimenes līdz sabiedrībai” autori Sanitu Martenu. Par gruomotu vīglajā volūdā Sanitai ideja beja, tik vajadzēja ļautīs impulsam i raksteit. „Es rokstu seņ, bet zynuotniskūs rokstus. Maņ ir bejuse vuiceibu gruomota 10. klasei i 9. klasei kai vīnai nu autoru kolektiva. Bet taida popularzynuotniska gruomota maņ beja pruotā jau seņ. Gribieju runuot par volūdys vaicuojumim ar jaunīšim, ar vacuokim cylvākim, ar tim, kam ir bārni, kam nav bārnu, par volūdu kūpumā, lai uzrunuotu sabīdreibu.” Sanita roksta par cylvāku, par volūdu caur cylvāka prizmu. „Ar volūdu, ar vuordim var izdareit cīši daudz, var cylvāku „iznycynuot” i ar volūdu var paceļt, var īdvasmuot, var pasaceit.” Sanita izsver, ka volūda nav tikai komunikaceja, volūda ir koč kas vairuok – caur volūdu mes veidojam sevkura veida attīceibys, sevkura veida sadarbeibu. „Tei jauda ir tymā, kai mes izavielejam vuordus, kū kuram pasaceit. Pat ka mes gribim kritiski saceit, tys vaicuojums ir — kai tu tū pasoki, kaidus vuordus tu izavielej, kaidā intonacejā tu pasoki. I nu tuo ir atkareigs, voi tys rezultats byus konflikts, voi jius kūpā meklēsit rysynuojumus.” Volūda cīši ītekmej cylvāka personeibys veiduošonūs, „tys ir pamats bārnam, pīdzymstūt saimē, veids, kai tāvs ar muoti runoj sovā vydā, kai tāvs ar muoti runoj ar sovim vacuokim. Voi tys ir cīna pylni, voi tys ir respektejūt, voi viņ dūdūt pavēlis, voi monologā. Na uzvedeibys kultura, bet volūdys uzvedeiba – tī modeli, kai cylvāks izaver komunicejūt vīns ar ūtru, tū bārns cīši dreiži sagiun saimē.”

Rubrikā „Itai lobuok” profesore Lideja Leikuma turpynoj stuosteit par tū, kaidus latgaliskūs vuordus, tūs salykumus ci formys lobuok lītuot. Itūreiz par tū, kai latgaliski lobuok saceit uzjāmums, uzjiemiejs, uzjiemiejdarbeiba. Pasaruoda kaida jauna realeja, i tod vajag sprīst, cik tys īdereigi voi nav īdereigi. Nu volūdys pusis verūtīs, nav lobs tys „uz” par tū, ka latgalīšim „uz” vītā ir vīns vīneigais prīdieklis „iz”. Itaidūs, koč kaidūs jaunūs darynuojumūs skaidrys, ka mes lītuosim ar „uz”, kas ir latvīšu literarajā volūdā. I labi byutu, ka mes nūturātu koč voi „uzjiemiejdarbeiba", a na „uzniemiejdarbeiba", partū ka vīna daļa latgalīšu soka: „nimt”. Nu, lai byutu ar tū napareizū prīdiekli, bet vysmoz tuoluokais ir gramatiski pareizi pīraksteits ar „j” i ar „ie”, lobuok – jimt, uzjāmums, uzjiemiejs, uzjiemiejdarbeiba.

Literaturzynuotnīka Valentina Lukaševiča i viesturis doktoranta, muzika Arņa Slobožanina sagataveitejā „Vuordineicā” itūreiz par vuordu „koldre”. Ir taidi vuordi, kuri latgalīšu volūdā īguojuši nu pūļu volūdys. Niu Latgolā varim dzierdēt vysus treis vuordus: saga, dečs i koldre. Kotram varbyut ir drupeit cytaiduoka izpratne, ar kū tys kotrys vuords saistīs. Ir tai, ka ar kaidu vuorda lītuojuma nūzeimi var gadeitīs, ka taids vuords ir tik vīnā saimē, vīnā solā voi vīnā pogostā. Valentins Lukaševičs stuosta, ka bierneibā sātā beja sagys, deči i koldris: „Pi myusu Garančūs i Ratinīkūs beja tai, ka tys, kas beja taids pluonuoks, beja puorkluojs. Kod beja cīši solts, tod saceja dabuosim navys sagu, deči, bet dabuosim koldri. Tys beja pats syltuokais, ar kuru varēja segtīs – koldre.” Arņs Slobožanins dasoka: „Šmuks vuords „koldre”, varātu mes atpakaļ jū īvīst – padūd koldri, apsasegsim, lai syltuoks!”