Aktrise Katrīna Griga par diktatim, volūdu, teatra antropologeju i pierti laukūs

Dailis teatra aktrisei Katrīnai Grigai itūgod uztycāta septeituo diktata latgaliski teksta skaiteišona. Katrīna poša īt nu Latgolys, Preiļu pusis, Rudzātu. Pamatškolā Preiļūs pi pasnīdziejis Vilhelmīnis Jakimovys teatra grupā “Kājām gaisā” ari aizasuoce juos pyrmuo saisteiba ar teatri. 2021. godā Katrīna absolvieja Latvejis Kulturys akademeju dramatiskuo teatra aktera specialitatē, kur vuicejuos pi Mihaila Gruzdova i Indrys Ruogys (Roga). I niu jū var redzēt režisora Džona Malkoviča saimis sāgā “Leopoldštate” Dailis teatrī. Tok navar napīminēt, ka Katrīnys bolss itūgod paleidzēja īdzeivynuot ari pyrmū radejis īstudiejumu latgaliski – Alda Bukša kriminalromanu “Bruoli” –, kurā Katrīna īsajuta igauņu izmaklātuojis Kersti lūmā. Poša sevi jei sauc par dobys bārnu. I juos sapyns ir sova pierteņa Latgolys laukūs.