Amamaren paperak

Gomutan hartu ditut gure amama Anparo Etxabururen paperak. Gordeak zituen Gernikako bonbardaketa zela eta Franco-zaleek zabaldutako berri-paper batzuk. Horietan Gernikako bonbardaketako irudiak agertzen ziren, etxeak lurrarekin berdinduak, gerraren suntsipena, hildakoak. Paperetan salatu egiten zen gertatutakoa, gogorki salatu. Baina esaten zen errudunak euskal nazionalistak eta errepublikazaleak izan zirela. "Hau da Jose Antonio Agirreren triskantza". Hain izan zen latza Gernikakoa, ezen Francoren aldeko propagandak errua gainetik kendu eta ardura beste aldekoena zela zabaldu zuen, erasoa jasan zuten horiena, hain justu. Hainbeste amorratu zuen honek Amama Anparo ezen betiko gorde zituen paperok.