Ana Cano, Presidenta de L'ALla: 'Nun ye almisible lo que se fai cola llingua' / Seiciones 'Deprendi l'asturianu' y 'TV'

Nel programa d'esta selmana ufiertamos un garrapiellu conteníos. Entamamos cola entrevista que fiximos n'Alderiques d'Asturies TV a la Presidenta de L'ALla (Academia de la Llingua Asturiana) Ana Cano cola que falemos de la llaceriante situación que vive l'asignatura d'asturianu nes escueles del país. Darréu podremos sentir les valoraciones de Penélope Miranda del SNL del Conceyu L.lena y de Xune Elipe, productor musical y cantante del grupu Dixebra alrodiu'l futuru del nuesu idioma propiu. Nesti programa ufiertaremos dos seiciones habituales nel nuesu espaciu radiofónicu: Entamaremos pola de "Deprendi l'asturianu" cola nuesa mayestra Ana María Suárez que nos falará de les pallabres ganadores nel Concursu "La pallabra más prestosa". La otra seición ye la de "La TV na radio" col periodista Damián Barreiro que nos cuntará la hestoria d'una serie mítica "Dragon Ball" o "Bola del Cuélebre" si tuviere versión n'asturianu. Música: Trasmerana del Discu Lliendes (2006) del grupu asturianu Xera TOLES SELMANES INICIATIVA TA NES ONDES Sienti’l programa radio de l’Asociación “Iniciativa pol Asturianu” áu falaremos toles selmanes na nuesa llingua y de la nuesa llingua asturiana. El programa radio d'Iniciativa pol Asturianu, dirixíu por Samuel Gradín, ye selmanal col envís de tar más apegáu al día tres día de les custiones que cinquen al nuesu idioma. Asina ufre a los oyentes de les emisores que collaboren cola organización y los siguiores de les nueses redes sociales, un programa selmanal de trenta minutos onde puen sentise entrevistes, noticies, anuncies, etc que surden alrodiu l'asturianu. Tate sollerte.....Iniciativa pol Asturianu nes Ondes...... www.alderiquesdasturies.com