Anne Sullivan- ilocano version

Inspirational biographical account about Anne Sullivan - the ‘Miracle Worker’ in the Ilocano language.EXCERPT:Nalabit a pagpasig ken panagraem daydi panangpanagan ni Samuel L. Clemens (pagaammo a Mark Twain) ken ni Anne Sulivan ti ‘Miracle Worker’ (‘Mammartuat iti Milagro’). Ngem awan kadagiti adu makaammo iti naisang-sangayan a gapuanan ni Anne Sullivan ti sumupiat iti kinapudno ti anagna. Napagasatan ni Anne a naaddaan iti nagpaiduma a kabaelan a kas mannursuro. Babaen ti pannarabay ken kinaparaborna iti ayat, panunot ken panagpaayna, namagbalinna ti maysa nga ubing a bulsek, tuleng ken saanna nga ammo ti agsao a manggun-od iti di-nakappapati a kabaelan ken panagballigi. Daytoy a gappuanan ni Anne ti nagbalin nga inspirasyon dagiti mannursuro kadagiti awanan panagkita, awanan panagdengngeg ken di makasao. Iti sabali a bangir, ni Helen Keller a tinarabayna ken nagbalin a gayyem a kinatinnunaynayna aginggat’ tungpal biagna ti nagbalin a naindaklan nga inspirasyon ti siasinoman nga aggandat nga aggun-od iti biag.Idi maika tres (3 )ti Marso, 1887, MIL OTSO SIYENTOS WALOPULO KET PITO, agtawen idi ni Anne Sullivan iti duapulo. Katurturposna iti panagadalna idiay Perkins Institute a pagadalan dagiti bulsek idi simmangpet daytoy iti pagtaengan ti pamilya a Keller. Daytoy ket gapu ta kasakbayanna, immannugot ni Anne nga agakem a mangisuro iti innem ti tawenna nga anak ni Koronel Arthur Keller. Bulsek ken saan a makangngeg ni Helen, ti ubing nga suroanna. Napukaw ti panagkita ken panagdengngeg daytoy idi sangapulo ket siyam a bulanna a tagibi gapu iti saan a masinunuo a sakit. Daytoy nga aldaw nga iseserrekna iti biag ni Helen ti namagbaliw met iti biagna. Daytoy metten ti nagrugian ti nagnaynayon a panaggayyem ken panagkaduada agingga iti pannakatay ni Anne idi 1936 (MIL NUEBE SIYENTOS TALLOPULO KET INNEM).Nasirib ken adu ti kabaelan ni Anne. Idi 1890 (MIL OTSO SIYENTOS SIYAM A PULO) , naobserba ni John D. Wright, ti nangipatakder iti Wright Oral School, pagadalan ti panagsao dagiti saan a makangngeg idiay New York, ti kaadda ti abilidadna iti musika. Insurat pay ni Helen iti maysa kadagiti sur-suratna a nalaing ni Anne nga agiskultor. Nasiglat pay daytoy nga agsakay ken agpataray iti kabalyo a kas equestrian ken pagaayatna ti dandaniw. Ngem maibasar kadagiti panagsursuratna, napudno ti panagtalekna iti gasat. Kas naadaw ken naiyulog manipud kadagi insuratna, kinunana:“Diak pulos nakasarak iti naan-anay a ragsak iti panagitulokko ti kabukbukodak - diak makuna a kinalaing, ta awan kaniak ti awan patinggana a sagut dagiti diyosen – no di toy bukodko a pagesseman wenno kabaelan. Naiyabugak a mangiruknoy iti bagik iti espiritu ti sabali ken mapneken iti samiweng ti instrumento a diak tagikua ken ti kanayon a mangted ti saranay iti pannakapalaing dayta nga instrumento.Manon a daras a naimtuodak - ‘No maited kenka ti biagmo tapno i-biagmo manen, surotem kadi ti isu met laeng a dalan?’ Agbalinak kadi ngata a mannursuro? No adda biagko a maited manen nga ibiagko, pagarupek a kaskadi ti kabassit ti pagpiliak a propesyon a kas iti adda ita. Ti panagkunak ket ditay makapili iti gasattayo. Isu ti mangpili kadatayo.”...CONTINUE ON (LISTEN TO PODCAST)