Arī dzeivojūt Kiprā var runuot latgaliski

Ruodīs, kas tī lels, ka septeņgadeigs bārns runoj latgaliski. Tikai ir vīns bet, mozais Edvars dzeivoj Kiprā, i tikai vosorā nūbrauc iz Latgolu pi babys. Itys byus Laurys Sondoris sagatavetais stuosts par kaidu saimi. Par tū, kai saglobuot sovu latgaliskumu i kasdīnā rast īspieju īsaderēt vītā, kur esi dzims. Iveta Broka-Kazāka dzeivoj Preiļu nūvoda Seiļukolnā, bet juos dāls Ingars Broks jau vairuokus godus kūpā ar sīvu, kiprīti  Mariju dzeivoj Kiprā. Saimē aug diveji bārni – Edvards i Amēlija. Ingars pīzeist, ka jam ir cīš svareigai, kab juo bārni Kiprā runuotu latgaliski. “Kur jī cytur īsavuiceis latgalīšu volūdu, juosuok jau nu mozu dīnu. Kas jim cyts īvuiceis latgalīšu volūdu? Abrauks iz laukim, kai jī ar babu voi dzedu parunuos? Tys ir lykums numur vīns. Kaidā volūdā tu pats runoj, taidā i bārnim juorunoj. Cikom asu apsamets iz dzeivi tī, bet ir plani koč kod atsagrīzt Latgolā.” Ari Ingara mama, seiļukaļnīte Iveta Broka-Kazāka cer, ka Ingars ar saimi atsagrīzs Latgolā. “Mamai juopījam i juorespektej vysi bārna lāmumi, ka jis ir izavieliejs i atrads sev taidu vītu, kur apsamest ar vysu saimi tī, kur jam pateik i labi īt, lai dzeivoj, bet maņ vystik ir klusa cereiba, ka jī atsagrīzs Latgolā… Es asu lapna, ka Ingars ari svešumā runoj ar bārnim latgaliski. Volūda jau īlykta šyupelī paaudžu pāaudzēs i es ceru, ka mozbārnu bārni ari runuos latgaliski.”