“Boņuka” bolvu par myuža īguļdejumu sajem kordirigents Juoņs Gruduls

Jau šudiņ Latgalīšu kulturys goda bolvys “Boņuks 2021” apbolvuošonys ceremonejā tiks gūdynuoti desmit pārnejuo goda svareiguokī i spylgtuokī nūtykumi, aktivitatis i cylvāki latgaliskajā kulturā, kai ari bolvu par myuža īguļdejumu latgalīšu kulturys atteisteibā sajims kordirigents Juoņs Gruduls. Jis ir vīns nu Latgolys veiru koru kusteibys radzamuokūs puorstuovu, kordirigents, pedagogs. Itūreiz pīduovojom nūsaklauseit sarunys fragmentu nu Latgalīšu kulturys goda bolvys “Boņuks 2021” organizatoru puorstuovis, Latgolys viestnīceibys GORS Muokslinīciskuos i pasuokumu nūdalis vadeituojis, komponistis i ari juo audzieknis Ilonys Rupainis gasteišonys pi Juoņa Grudula, gatavejūtīs bolvys padūšonys ceremonejai. Juoņs Gruduls īt nu Stiernīnis pusis, deļtuo  pyrma tam varēsit dzierdēt ari Stiernīnis kulturys dzeivis organizatoris, varganistis Īvys Zepys  i Stiernīnis draudzis vadeituojis Rutys Erenis komentarus. Paraleli pedagoga dorbam Gruduls ir bejs dirigents vairuokim korim Latgolā, bejs viersdirigents Latgolys nūvoda školu jaunuotnis Dzīšmu svātkūs, Latgolys nūvoda Dzīšmu svātkūs, ari Latgolys nūvoda i Latvejis zānu koru VI saliduojumā. Vīna nu spylgtuokūs šaļšu dirigenta karjerā ir Juoņa Grudula veiduotuo i 20 godus vadeituo veiru kora “Olūts” uzvara XXII Vyspuorejūs latvīšu dzīšmu svātku koru karūs. Bolvys padūšonys ceremonejis translaceju nu Latgolys viestnīceibys GORS varēs vērtīs LTV1 21.05 vokorā.