بودكاست كنباية ح 6 - وصمة أن تكون مثقف في الدوائر المهمشة

بهاي الحلقة رح يستضيفنا الكاتب رائد وحش لنحكي سوا عن القراءة والكتابة بالبيئات المهمشة اللي كبرنا فيها سواء كان المخيم أو مناطق فقيرة أو بيئات بخلفيات عرقية مختلفة في بلد مقموع بالعموم. كنباية هو بودكاست ثقافي بيقدمه أحمد قطليش ودلير يوسف. طلعنا بكنباية كردّة فعل على حالة الانغلاق عن بعضنا وضياعنا بنقاشات السياسة اليومية. مع إنه السياسة بتضل جزء من حياتنا ومن رؤيتنا، بس مع الوقت سرقت منّا النقاشات اللي بتعنيلنا: الثقافية والفنية، وحتى المعرفية. من هون إجا البودكاست كمساحة لنتنفس، نعيد توازننا، ونفتح مجال لحوارات أفقها أوسع من السياسة لحالها. كل حلقة منسجّلها على "كنباية" جديدة: مرّة ببيت أحمد، مرّة ببيت دلير، ومرات ببيوت أصدقائنا. وبهالبيوت منفتح قصص جديدة ومنحكي عن قضايا ثقافية واجتماعية بتهمنا. أحياناً منستضيف أصدقاء عاملين بالمجال الثقافي، وأحياناً هني بيستضيفونا ع كنباياتن. يعني بكل الأحوال، "الكنباية" بتصير مساحة للحديث، للسرد، وللمشاركة. بعيدًا عن التحرير والقصقصة. كنباية هو حكي ثقافي بعيد عن هموم الحياة اليومية، مع إنه هموم هالحياة هي صلب هاد الحكي. جرافيك: يسر أفغاني لوغو البرنامج: نورا السوما