Caput 19: De amore Platonico (Symposion)
from De Graecorum Romanorumque poesi amatoria Hosted by Valahfridus Stroh
Amor Platonicus de eo dicitur qui a Veneriis uacet – quae tamen non uerissima sententia philosophi est. Legendum est Symposion, in quo nobiles uiri Attici Socrate praesente certamen orationum De laudibus Amoris dei instituunt. Ac (1) Phaedrus Amorem laudat, qui eo ad uirtutem perducat quod amator ne a puero in flagitio deprehendatur timet. Tum (2) Pausanias ut inter duas Veneres ita inter duo Amores distinguit: uulgarem, qui ad corpus, caelestem, qui ad animum aut mores pertineat: obsequi autem puerum in illo caelesti amore ut melior sapientiorque fiat. Obscurior est (3) Eryximachus medicus, qui Amoris uim in omnem mundum omnesque disciplinas extendit. (4) Aristophanes comicus, qui sequitur, fabulam narrat: homines olim quasi globos (aut cylindros) fuisse sic ut quaterna quisque bracchia et crura, bina ora, item bina genitalia haberet, alius bina mascula, alius bina feminea, alius et mascula et feminea. Iouem autem eos dissecuisse; unde singulis desiderium uenisse amissae partis. Amorem autem esse restitutorem priscae naturae. Honestissime autem fieri, si mares maribus aeterno foedere iungantur. Tum (5) Agatho tragicus magna pompa uerborum Amorem celebrat ut deorum uenustissimum, optimum, magistrum omnium disciplinarum.
Embed this episode
No transcript yet.