Caput 28: De 'Phaedro'

In Phaedro autem, quem Plato multo postea senior scripsit, aliter de rhetorica iudicat. Ibi enim Socrates orationem aliquam a Lysia scriptam sic enarrat ut eius uitia illustret. Cum enim Lysias demonstrare uelit pueros magis obsequi debere eis amicis qui se non ament quam eis qui ament - quod est contra exspectationem -, neque a definitione amoris orditur neque dispositionem certam sequitur. Huic opponit Socrates rhetoricam quae uera ars esse possit. Eam debere uti dialectica: est autem ars singulas notiones per species diuidendi (ut amoris tamquam insaniae duae sunt species, altera quae noceat, altera quae prosit). Hac autem arte rhetoricam adiuauri: (1) quod etiam is orator, qui fallere uelit, similitudinem rerum cognoscere debeat, ut aliud pro alio uendere possit; (2) quod optimus orator, qui affectus commouere conetur, scire debeat quod genus sermonum cui hominum generi aptum sit.