Caput 37: De Gallo et Propertio
from De Graecorum Romanorumque poesi amatoria Hosted by Valahfridus Stroh
Elegiam amatoriam Romanorum, quae sui similem in Graecis litteris non habuit, a Catullo conditam esse multi putant; Ouidius autem Cornelium Gallum in successione elegiacorum primum dicit (trist. 4,10, 53 sq.; cf. Quint. inst. 10,1,93). Qui nobis e multis testimoniis, e Vergili eclogis (6;10), denique e papyro reperta (1979) notus est. Iam tempore Caesaris amauit Cytheridem mimam, quam sub nomine Lycoridis IV libris Amorum celebrauit. In quibus ut elegiaci posteri puellam condicione minorem (sc. libertam) quasi dominam uenerabatur eique obsequi ac seruire paratus erat. Qui amor tamen, si uitam Galli spectamus, non duraturus erat. Militauit enim sub Caesare Octauiano et Alexandria capta (30) praefectus Aegypti factus est. Item Tibullus nonnumquam queritur quod Messallam patronum ad bella sequi cogatur. Propertius contra iam in primo libro rebus publicis et militaribus renuntiare se dicit, ut uni amori (i.e. desidiae et nequitiae) uacet. Quae tamen uita minime laeta, sed dolorum plena est. Quamquam enim dominae suae, quam Cynthiam uocat, fideliter adhaeret, ut tamquam Milanion Atalantae (1,1) ad omne obsequium paratus sit, illa eum crudeliter uix respicit. Furere ergo ipse sibi uidetur. Tamen Cynthiae soli suas Musas dedicat (quibus ea interdum ad mitius flectitur; 1,7-9); neque ad mortem solum, sed etiam ultra eam amare uult (1,19). In libris II et III haec amatoris humilitas aliquantum minuitur, donec puellae ualedicit seque Bonae Menti restituit (3,24/25). Liber quartus pauca amatoria habet.
Embed this episode
No transcript yet.