Caput 38: De Tibullo
from De Graecorum Romanorumque poesi amatoria Hosted by Valahfridus Stroh
Albius Tibullus, tersus atque elegans maxime auctor (Quint. inst. 10,1,93), duo libros elegorum scripsit, quibus idem propositum dicit ac Properti carminibus, sc.: Ad dominam faciles aditus per carmina quaero: / ite procul, Musae, si nihil ista ualent (2,4,19-20). Nouum tamen est quod non uni puellae seruitio tristi (2,4,3) deditus est. Nam in primo libro Deliam ueneratur, in secundo Nemesin; accedit in primo etiam Marathus puer amatus, quem tam delicatis uerbis ornat quam puellas, dissimilis Catullo. Vni puero, ut eum sibi conciliet, immortalitatem promittit (1,4) imitatus poetas quosdam Graecos. Vbique pecuniae male dicit, quae amorem corrumpat, item bello et armis. Adiunctus est amori Deliae etiam ruris amor. Nil magis se, qui dominus praediorum est, optare dicit, quam ut una cum Delia rura colere liceat, adsit etiam Messalla (1,5,31-34), quem patronum habet quemque in bella sequi saepe cogitur. Nemo mollius amoris sensus expressit, longioribus carminibus quam ceteri, Graecis fabulis raro admixtis. – Fertur etiam tertius liber, qui Sulpiciae cuiusdam et aliorum carmina continet.
Embed this episode
No transcript yet.