Caput 57: 'Orator'

Etiam diligentior est in Oratoris libro. Ibi quoque (ut in libris De oratore) disputat de oratore perfecto. Sed nunc in illo non tam uniuersa illa doctrina requiritur quam facultas adhibendi tria genera dicendi. Esse enim genus tenue, medium, uehemens. Quod non fuit nouum, sed antiquitus traditum. Cicero autem audacter haec tria genera coniungit cum tribus modis persuadendi, quos Aristoteles inuenerat, scilicet: rem (siue rationem) ipsam, mores dicentis, perturbationem animorum (siue affectus). Quas Cicero uocat rationes docendi, delectandi (olim rectius: conciliandi), permouendi. Ad docendum aptissimum esse genus tenue, ad delectandum medium, ad permouendum uehemens, quo Demosthenes maxime eminuerit. Peccare igitur Atticos illos contra ipsa officia oratoris, si tenue genus nimium amplectantur. - Ac mirifica sunt quae hic de numero oratorio dicit, quamquam interdum errat.