"చంద్రహారం ". రచయిత్రి శ్రీమతి పొత్తూరి విజయలక్ష్మి.

కధాభిమానులకు నమస్కారం.🙏ఈ వారం మనం వినబోయే కథ "చంద్రహారం ". రచయిత్రి శ్రీమతి పొత్తూరి విజయలక్ష్మి.కొందరు రచయితలకు ఒకటి రెండు రచనల వల్ల కొన్ని ముద్రలు పడిపోతాయి. అట్లా హాస్య రచయిత్రిగా ముద్ర పడిన రచయిత్రి పొత్తూరి విజయలక్ష్మి గారు.దాదాపు పదిహేనేళ్ల క్రితం రాసిన ఈ కథ "చంద్రహారం " ఈ మధ్యనే చదివాను.ఈ కథతో పాటు ఆమె మరికొన్ని కథలు చదివాను. ఆమె కధల్లోని ఆర్ద్రత నన్ను కదిలించింది. ఆడవాళ్లు బంగారం పట్ల మితిమీరిన ఇష్టాన్ని కలిగి ఉంటారని , "ఏడు వారాల నగలతో " కూడా సంతృప్తి చెందరనీ అంటూ....వింటూ ఉంటాము. కానీ అది తప్పు అని ఒక నగ.... ఆభరణం మాత్రమే కాదు , కుటుంబాన్ని కష్టంలో ఆదుకునే వనరు అనీ "చంద్రహారం "కథలో ఆమె ప్రతిపాదించిన తీరు అద్భుతం. కథలోని మామ్మ భావాలకు వారసుడు ఆమె మనుమడు , ఆమె భర్త పేరు పెట్టుకున్న "చిన్న రామచంద్రయ్య ". చంద్రహారం మామ్మకు ప్రతిరూపం గా భావించి , రూపు చెడకుండా , ఆమె తరువాతి తరానికి అందేలా చేసిన మెత్తటి మనసున్న మనుమడు.వృత్తి రీత్యా బాంక్ ఉద్యోగిని కాబట్టి....గోల్డ్ లోన్స్ కి వచ్చే "స్త్రీ ధనం "....బాలతొడుగులు.... ఎన్ని కుటుంబాల్ని ఆర్ధిక అవసరాలకి సరైన సమయంలో , సరైన రీతిలో ఆదుకుంటున్నాయో, భార్య ఒంటిమీద నగలు కేవలం భర్త సంపాదనకు చిహ్నాలు కావు అవి కుటుంబ అవసరాల్ని తీర్చే కామ ధేనువులు, కల్పవృక్షాలు అని కూడా గమనించాలి అని తెలిపేందుకు ఈ కథ వినిపిస్తున్నాను.🙏మీ రాంబాబు కొప్పర్తి , ఇండియన్ బాంక్ , విశాఖ సాగరతీరం.