"చంద్రవంక ". రచయిత డాక్టర్ పోరంకి దక్షిణామూర్తి

కధాభిమానులకు నమస్కారం 💐ఈ వారం (25.5.2019) మనం వినబోయే కధ "చంద్రవంక ". రచయిత డాక్టర్ పోరంకి దక్షిణామూర్తి గారు. తెలుగు కథ , ప్రత్యేకించి తెలుగు భాష మీద , మాండలికాల మీద గొప్ప పట్టు సాధించిన వ్యక్తి డాక్టర్ దక్షిణామూర్తి. వారు ఈ కథలో ఒకానొక విపత్తుని , ప్రళయాన్ని , కృష్ణానది వరదతో తన పరీవాహక ప్రాంతంలోని ఒక ప్రదేశాన్ని ముంచెత్తి తుడిచిపెట్టివేసిన విషాద దృశ్యం నేపథ్యంగా ఈ కథ రాశారు. ఒక ప్రళయం ఎందుకు సంభవిస్తుంది ? జీవన విలువలు నశించినప్పుడా ? సంప్రదాయాలు , ఆచారాలు మంటకలిసినప్పుడా ? అనే ఒక ప్రశ్నను తన కుటుంబ పరంగా సంధించి ఆలోచించి , ప్రళయ ప్రవాహ వేగంతో సాగే ఆలోచన ప్రవాహంలో అద్భుతమైన భావధారలో పాఠకుల్ని ముంచెత్తి....అంతిమంగా రేపటి యుగపు ప్రతినిధిగా మనుమడిని బుట్టలో ఉంచి అనంత జలరాశిలోకి ఉపనిషత్తులు, యోగశాస్త్రం,భగవత్గీత ,బ్రహ్మసూత్రాలు , వైద్యశాస్త్ర గ్రంధం వంటి వాటితో యజ్ఞోపవీతంతో బంధించి వదులుతాడు.మనిషి మనిషిగా విలువలు నశించకుండా బ్రతికెట్టు చెయ్యమని దైవాన్ని ప్రార్ధిస్తాడు . వంశాంకురమైన ఆ పసిపాపడిని వరదప్రవాహంలోకి వదిలి ఆయన "ఆత్మ సన్యాసం "స్వీకరిస్తాడు. గుండెను పిండేసే విషాదం అది. 1964, సెప్టెంబర్ 30 వ తేదీ యదార్ధంగా చంద్రవంక వాగు పొంగి మాచర్ల పట్టణాన్ని ముంచెత్తింది.కథలో రచయిత మానవీయ విలువల్ని ప్రతిపాదించిన తీరు , సమయం , సందర్భం ఈ కథ మీకు వినిపించాలి అనుకోడానికి ప్రధాన కారణం. వినండి డాక్టర్ పోరంకి దక్షిణామూర్తి గారి కథ "చంద్రవంక " 🙏మీ కొప్పర్తి రాంబాబు , ఇండియన్ బ్యాంక్ , విశాఖసాగరతీరం.