Daugovpiļs teatra aktrise Kristīne Veinšteina: Nasam volūdu pasaulī

Svietejūt Vaļsts volūdys dīnu oktobra vydā, ari itūgod „Kolnasātā” izskaņ jau deveitais diktats latgaliski, kur kotrys var puorbaudeit sovys zynuošonys i prasšonu latgalīšu rokstu volūdā. Ituo gods latgalīšu diktata bolss ir Daugovpiļs teatra aktrise Kristīne Veinšteina, kura piec diktata stuosta par latgalīšu volūdys kluotyn byušonu juos kasdīnā. „Maņ ir svareigi, kab byutu, kab napagaistu tei volūda i vyss.” Kristīne ir naviņ Daugovpiļs teatra aktrise, bet ari teatra pedagoge divejuos Daugovpiļs školuos, tulkuotuoja, vairuoku libretu, dzīšmu tekstu i muzykys autore, ir struoduojuse ari kai školuotuoja. Jai pošai, rokstūt diktatu latgaliski, byutu juopadūmoj, kai pareizi vīns ūtrys vuords juoroksta, tok jei rauga uzlobuot kai sovys latgalīšu volūdys prasmis, tai ari paleidz kolegim teatrī i bārnim školuos. „Lauku bārni Latgolā saprūt vaira nakai piļsātys bārni, i nu tuo var saprast, ka sātā runoj latgalīšu volūdā, bet piļsātā mozuok ir tei sapratne, eipaši Daugovpilī, kur drūši viņ vairuok izmontoj cytu volūdu saimis sarunuos, i latgalīšu volūda jim ir pavysam kai svešvolūda. I leidz ar tū, mes tū redzim, ka taišni Latgolys laukūs ir tī bārni, kas zyna, partū ka jī skrīn i soka: „Oi, es itū vuordu zynu, kas tys ira, es varu paleidzēt!” Breineigi, tai mes kūpā ar bārnim pietejam latgalīšu volūdu, kaida jei ir.” Daugovpiļs teatrī godā vysmoz divys izruodis īstudej latgaliski – vīnu bārnim, vīnu pīaugušajim, leluokais akteru pulks ir nu Latgolys, i latgalīšu volūda teatrī skaņ vysā daudz. „Niu es pabeidžu tulkuojumu Eiripida „Hekubei”, tai ka izmontojam dīzgon. I maņ prīca, ka teatrī kolegi runoj latgalīšu volūdā. Daugovpiļs teatrī mes runojam, i tī, kas namuok, tī vuicās, kai soka: nasam tū volūdu pasaulī.”