Dekšuorīte Jolanta Smane par svātku sajiutom i iedīnim

Itūreiz sasateikam ar Rēzeknis nūvoda Dekšuoru pogosta dzeivuotuoju Jolantu Smani. Pyrma sešu godu, kod vacuokajam dālam beja juosuoc īt iz školu, Jolanta kūpā ar saimi nu kasdīnys i dorbu Reigā atsagrīze dzymtajā pusē Viļānu nūvodā. Jolanta vysod ir bejuse sabīdriski aktiva, taipat jei ir četru bārnu muote, breineiga saimineica, latgalīšu tīšsaistis raidejuma Facebook platformā „Latgalīšu kukne” dalineica. Ar Jolantu svātku prīškvokorā ruonojam par dzeivi Latgolys laukūs, Zīmysssvātku sajitom i tūs svieteišonys tradicejom jūs saimē, svātku iedīnim, seņču turiešonu gūdā i daudzi kū cytu. „Izavuiceju gon Rēzeknē, gon Reigā. Pa Reigu nūdzeivuoju vaira nakai desmit godu i pyrmuo dorba pīredze tī dabuota. Tod, ka bārnim beja juosuoc īt skūlā, mes īzlēmem īt dzeivuot iz Dekšuorem, iz laukim, kur ir moza skūla, kur bārnam var veļteit pīteikami daudzi uzmaneibys i taipat nav juoorganizej, kas tev tūs bārnus atvess i aizvess, autobuss brauc gar sātu, nu reita pajem i vokorā atvad atpakaļ. Mozs kolektivs, bet ir taidys pošys īspiejis  kai piļsātā, teik pīduovuoti vysaidi puļceni, tik ja pošam ir gribiešona pīsadaleit.”