Diktats latgalīšu rokstu volūdā 2025. Klausīs ite!

Svietejūt Vaļsts volūdys dīnu oktobra vydā, i turpynojūt tradiceju, ari itūgod kotrys gribātuojs diktatā ir aicynuots puorbaudeit sovys zynuošonys i prasšonu latgalīšu rokstu volūdā. Deveitais diktats latgaliski skanēs Latvejis Radejis 1 eterā latgaliskajā raidejumā “Kolnasāta” sastdīnis, 18. oktobra, vokorā 18.15 stuņdēs, kai i video formatā byus nūsaverams Latvejis Sabīdryskuo medeja portalā LSM.lv i latgalīšu kulturys ziņu portalā lakuga.lv. Ituo gods diktatā Daugovpiļs teatra aktrise Kristīne Veinšteina skaiteis speciali diktatam topušū Evijis Piebalgys miniaturu par maizi. Teksts latgalīšu rokstu volūdā radeits, īvārojūt 2007. godā apstyprynuotūs nūsacejumus. Kod diktats byus izskaniejs, tekstu varēs puorbaudeit portalūs lakuga.lv i LSM.lv. Latgalīšu volūdys diktata raksteit grybātuoji tekstu var raksteit tīšsaistis formā, ka ir gribiešona, var īsnēgt jū klaidu puorbaudeišonai. Tū var izdareit ite: http://ej.uz/LTGdiktats2025     Diktatu latgalīšu rokstu volūdā organizej latgalīšu kulturys kusteiba “Volūda”, latgalīšu kulturys ziņu portals lakuga.lv i Latvejis Radejis Latgolys multimedeju studeja, bet atbolsta Sabīdreibys integracejis fonds nu Latvejis Republikys Kulturys ministrejis daškiertūs Latvejis vaļsts budžeta leidzekļu i Vaļsts kulturkapitala fonds. Vaira dazynuošonai: https://www.lakuga.lv/2025/10/14/deveitaja-diktata-latgaliski-aicynuos-izgarsuot-latgolys-maizis-stuostu/