Dzīsmineica Laura Bicāne – muzyku maņ ir vīgluok saraksteit kai tekstu

Daugovpiļs pusis dzīsmineica Laura Bicāne ar saimi dzeivoj Vuocejā, kur jei vys tik rodūši dorbojās ari muzykys lauceņā, tymā vydā i latgaliski. Napaseņ Laurai izguoja jauna dzisme – “Ceļā uz Emmausu” –, kuru var atrast i nūsaklauseit škārsteiklā. Niu Laura mienesi sabyus Latvejā, sovā dzymtaja pusē – Latgolā, kur kūpā ar vītejim muzikim gaidomi vairuoki koncerti. Vīna nu vareibu dzierdēt Lauru byus 17. majā Daugovpiļs Kulturys pilī paradzātajā grupys “Dabasu Durovys” koncertā. Raidejumā izvaicojam dzīsmineicu Lauru Bicāni par juos rodūšū dorbuošonuos, beibeli kai muzykys olūtu i dzīšmu tekstu svareigumu. "Poša ilgi dūmuoju, kas es asu. Kod es tyku Vyslatvejis dzīsminīku saītā, saprotu, kas ir muna publika, muns klauseituojs, kas ir itys akustiskais žanrys. Bardi – tai ari var saceit. Tī taišni lels izsvors ir iz viestejumu, iz tekstu. Varbyut pat tys teksts ir svareiguoks par myzyku i gitarspēli."