E lē lava na o le malosi 1 (Strength is not enough 1)

OPEN HEAVENSMATALA LE LAGI MO LE ASO GAFUA 25 ME 2026(tusia e Pastor EA Adeboye) Manatu Autu: E lē lava na o le malosi 1 (Strength is not enough 1) Tauloto Tusi Paia: Ieremia 17:5 “O lo‘o fa‘apea ‘ona fetalai mai o le ALI‘I: ‘Ia malaia le tagata e fa‘atuatua i tagata ma ‘ua fai tagata mōna lima a ‘ua liliu ‘ese lona loto i le ALI‘I.”Faitauga - Tusi Paia: Mataio 26:31-35, 74-75 I le Luka 5:1-10, e lei toilalo Peteru ona faapea e lei filigā, pe lei galue malosi pe lē o iai le agavaa. Na ia te ia uma agavaa, ae na toilalo lava. Peitai, ina ua auina mai le fesoasoani mai le Atua, na manumalo o ia. O lou malosi, tagata e te fesootai iai, galue filigā, e lelei uma, peitai a lē iai le Alii ma lana lagolago, e lē mafai ona e manuia ai. Fai mai le Salamo 127:1“A fai e lē atiina a‘e e le ALI‘I le fale, e galulue fua i latou o ē atiina a‘e; ‘āfai e lē leoleo e le ALI‘I le ‘a‘ai, e mataala fua o lē na te leoleoina.”A lē faasino ma taitai e le Alii se tagata pe a faia ana faaiuga, e galue fua o ia. A aunoa ma le lagolago a le Atua e foliga mai e valea lea tagata ua le iloa le ala i le aai (Failauga 10:15). O nisi talavou e latou te faia le anoanoai o galuega ma le manatu o loo iai lo latou malosi e faia ai. Peitai o le Tusi Paia e tatou te malamalama ai, e ui o le matagofie o taulelea o lo latou malosi lea (Faataoto 20:29), e oo lava ina vaivai, tigaina ma pauū (Isaia 40:30). O lona uiga, e ui o lo latou malosi i le talavou e fesoasoani latou te ausia ai nisi o mea, e lē lava. E ono lē aoga iai latou i se taimi, peitai a latou faatalitali i le Atua malosi, e mafai ona latou si’i ae apaau e pei o aeto. I le faitauga mai le Tusi Paia o le asō, na manatu Peteru ua lava lona malosi e gafatia faaosoosoga, peitai na toilalo lava. E le’i lava lona malosi e gafatia ai i le aso o le luitau. O lona manatu maualuga i lona malosi na o’o ai ina moe i le taimi sa tatau ona tatalo ai (Mataio 26:40-43). O tagata faatuatua e faalagolago i lo latou malosi i le taimi o faaosoosoga e oo lava i le toilalo. O nisi ua pauū ona ua manatu ua malosi i le tatalo e lē mafai ona agasala. Na manatu ua lava le poto ma le malosi e gafatia ai le faaosoosoga, peitai na oo ina pauū ai. O loo lapatai mai le 1 Korinito 10:12, o lē manatu o lo‘o o tu ia, ‘inā fa‘aeteete ia ne‘i pa‘ū e aunoa ma le fesoasoani a le Atua. O tagata e manatu faapea e oo lava ina pauū. Fai mai le tauloto o le asō, o le tagata e tuu lona faatuatua i le tagata e malaia. E lei paū Samasoni i le aso na valaau ai Talila i tagata e ‘oti lona ulu, peitai na paū i le taimi na amata ai ona ia faatuatua i lona malosi. O le aso e gata ai ona faatuatua le tagata i le Atua o le aso lea e amata ai ona agai i lalo seia o’o ina paū. Ou te tatalo ia ‘aua lava nei e oo i le tulaga e te manatu ai ua lava lou malosi, e aunoa ma le Atua, i le suafa o Iesu. Tuu uma lou faatuatua na o le Atua, i le suafa o Iesu, Amene.