Samoan Devotional

OPEN HEAVENSMATALA LE LAGI MO LE ASO LULU 19 AOKUSO 2026(tusia e Pastor EA Adeboye) Manatu Autu: O le feagaiga a le Atua mo le puipuiga (God’s covenant of protection) Tauloto Tusi Paia: Sakaria 2:5 “O a‘u fo‘i, ‘ua fetalai mai le ALI‘I, e fai a‘u ma pā afi e si‘osi‘o a‘i, e fai fo‘i a‘u ma pupula i totonu ‘iā te ia.”Faitauga - Tusi Paia: Salamo 91:1-16E maileia e le tiapolo tagata e faia feagaiga leaga ma le folafolaga e maua le puipuiga, peitai e na o le Atua e iai le puipuiga atoatoa. Fai mai le Roma 8:31 “Āfai ‘ua ‘au ma i tatou le Atua, o ai sē fa‘asaga tau mai ‘iā i tatou?”  O loo faaopoopo mai le Roma 8:37 ua tatou manumālō a‘ia‘i i nei mea uma lava, ‘ona o ia ‘ua alofa mai ‘iā te i tatou. O lona uiga, afai o loo e osi feagaiga ma le Atua, e te lē tauina ni taua, aua o le a ia tauina mo oe. O le tele o taimi, e te manumalo i le taua faatoa e iloa ane, sa taumafai se tagata e osofai ia te oe. Na ou sola ese mai lo’u nuu ina ua faafefe au e ni tagata mai fai mai o le a latou fasioti ia te a’u. Mo le 13 tausaga, sa le mafai ona ou toe alu i lou nuu. Peitai ina ua ou feiloai ma lo’u Alii o Iesu Keriso, na mafai loa ona ou toe alu i lo matou nuu, na oo i se faaipoipoga na ou alu iai, ma na ou vaai ai i tagata ia na faapea mai o le a latou faia ni vai faataulaitu e fasioti ai a’u. Sa ou laitiiti i le faatuatua i lea taimi, sa tele lou ta’uamiotonuina, ae laitiiti le poto. Na talosaga mai ou te faia le lauga i le faaipoipoga, ma sa matautia la’u lauga na matua taia malosi ai i latou i le Upu a le Atua. I nai masina mulimuli ane, na ō le au faataulaitu ia i le tina o le teine faaipoipo ma fai iai ua ou faaaogaina le faaipoipoga e faaleaga ai iai latou. Na latou fai i le tina, ua leva ona latou faatali i se avanoa e taui ma sui ai ma o lea ua maitaga lana tama, ua latou faapea mai, ‘ia sei vaai pe oo ona fanau lau tama, e faatoa taunuu pe afai e uma la matou pule i le lalolagi nei’. Na fefe le tinā o le teine faaipoipo ma ua sau ia te a’u. Na ou fai iai e aua le popole, o le aso e fanau ai lana tama, o i latou uma o loo tau faafefe ia te ia, o le a momoe uma. O le pepe na latou tauto e le fanau mai, o loo avea nei ma se fomai. Le au pele e, na fetalai le Atua i le tauloto mai le Tusi Paia o le asō, e avea o ia ma se pā afi e siosio ai oe ma o soo se tasi e filifili e faasagatau mai i le Afi Maamaai, e lē ola e faamatala se tala. Aua e te fefe i soo se malosiaga, poo se tagata, poo soo se tulaga e taufaafefe mai, pe fasi foi ia te oe. Ole ma tagi atu i le Atua mo tulaga faapena, aua e afio mai o ia e puipui ia te oe ma avatu ia te oe le manumalo. O le Atua o se pa afi e siomia i latou ua osi feagaiga ma ia, i le suafa o Iesu, Amene.

OPEN HEAVENSMATALA LE LAGI MO LE ASO LUA 18  AOKUSO 2026(tusia e Pastor EA Adeboye) Manatu Autu: O le feagaiga a le Atua mo le faaeaina (God’s covenant of promotion) Tauloto Tusi Paia: Salamo 92:10 “Ae fa‘amaualugaina e oe lo‘u nifo e pei o le rema; e fa‘au‘uina a‘u i le suāu‘u fou.”Faitauga - Tusi Paia: Salamo 75:6-7E masani ona faaaoga e le tiapolo folafolaga mo le faaeaina e faatosina atu ai tagata e faia ni feagaiga ma ia. Mo se faataitaiga, ua ou faalogo i iai latou i tulaga mautofi ua fai i se tagata ua lata ona faaeaina e faia se feagaiga lē lelei, e pei o le faaofi atu e avea ma sui o faapotopotoga faalilolilo, ona faatoa tuuina atu lea iai o le tulaga e siitia ai. Le au pele e, afai e te oo i se tulaga faapea, ou te lapatai ia te oe, aua e te osia se feagaiga faapea. O le faitauga mai le Tusi Paia o le asō e ta’u mai ai iai tatou o le faaeaina e mai le Atua. A finagalo le Atua ‘ioe’, e leai seisi e fai mai leai. A finagalo le Atua e faaeaina oe, e lē afaina poo a mea a se tagata e faia, auā e te ausia lena tulaga faaeaina o loo finagalo iai le Atua. E na te pulea loto o tupu, o lona uiga a taufaafefe atu oe e se tagata mautofi e iai le pule e faapea mai, ‘e lē faaeaina oe sei vagana ua e auai mai ma latou’, ia e tulai pea i le tu o se atalii poo se afafine o le Atua, aua e te gauai iai. Ia e uu mau pea i le Atua, aua e oo atu lava i le iuga, e te tulai mai i le manumalo. I se taimi ua tuanai, na sau se tasi o ou atalii faaleagaga ma faapea mai, ‘Tamā, ua ou lelava tumau i le tulaga e tasi mo se taimi umi, ou te fia agai i luma. O taeao o se faatalatalanoaga o se tasi o avanoa, faamolemole tatalo mo a’u’. Na ou tali atu, ia o le a ta tatalo, ae toe fai mai, ‘Leai, tau lava o sau upu’. Na ou tali atu, e manuia lau mataupu. Na foi mai ma le olioli ma faapea mai, ‘Tamā, sa ou matua sauni i le faatalatalanoaga mo le avanoa, ae na o le tolu lava latou fesili, O ai lou igoa? O le a le avanoa na e tusi talosaga iai? O a fea e te fia amata ai?’ Na ou faamalo iai ae fai mai, ‘Tamā, toe aumai seisi au upu’. Na ou toe tali atu, ‘e vave ona oo mai lou faaeaina’. O le aso na sosoo ai, na toe foi mai ua siva i le fiafia. Ua fai mai, ‘ina ua ou amata ananei i le taeao, na faatonu au ou te alu i le potu a le komiti faatonu. O tagata na faia le faatalatalanoaga ananafi o loo i totonu ma ua faapea mai, ‘na faamavae ananafi le pule, ua e sauni e te tauaveina lea tulaga?’ Na ou tali atu, o se faaeaina vave lena. Na ia fai mai e toe avatu seisi upu mo ia, ona ou faapea atu lea ia faamautuina e le Atua le galuega lelei ua ia amataina ia te ia. O le aso na sosoo ai, na toe sau ia te a’u ua le maugagana aua ua faaluaina lona totogi. Na fai mai e toe avatu seisi upu ona ou ata lea ma faapea atu, ‘ua e manao e te aveina le kamupani mai ē umia?’. Le au pele e, ou te tatalo ia faateia oe e lou Tamā i le lagi i le vave ona e faaeaina, i le suafa o Iesu. E leai se mea poo se tagata e mafai ona taofia se tagata ua finagalo le Atua e faaeaina, i le suafa o Iesu, Amene. 

OPEN HEAVENSMATALA LE LAGI MO LE ASO GAFUA 17  AOKUSO 2026(tusia e Pastor EA Adeboye) Manatu Autu: O Taui O Feagaiga A Le Atua 2 (The Gains Of God’s Covenant 2) Tauloto Tusi Paia: Teuteronome 7:12 “Āfai fo‘i tou te fa‘alogo i ia fa‘amasinoga ma tausi i ai ia faia, ‘ona tausi lea e le ALI‘I lou Atua o le feagaiga ma le alofa ‘iā te oe na ia tautō ai i ou tamā;”Faitauga - Tusi Paia: Kenese 20:1-18I le tele o tausaga ua mavae, o se tagata e taitai ma maualuga lona tulaga i se atunuu Isalama, e faasāina ona faatūina ai se lotu, ua ia valaaulia se tasi o matou misionare e faatū se lotu i lona fanua. Ina ua amata le lotu, na fai iai le avā a lea taitai, ‘I lou tulaga tauoloa i le malo ma lenei atunuu, ua e faatagaina se lotu e faatu i totonu o lou fanua?’. Na tilotilo atu i lana avā ma fai iai, ‘ia e faaeteete ma aua lava nei faia sau tala i tagata nei’. Ou te talitonu na faigofie i le lotu RCCG ona faatu le lotu i lea atunuu, e aofia ai ma le tele o atunuu i le lalolagi i le asō, ona o le feagaiga a le Atua ma lē na faavaeina le lotu, o Pa Akindayomi. O se taui lelei o se feagaiga ma le Atua, e faasolo pea ona siitia faamanuiaga lelei e te maua nai lo e o tou galulue faatasi pe afai e faaauau pea ona e faatinoina lau pitolaau o le feagaiga. E foai atu pea e le Atua taui ia te oe e sili atu i au taumafaiga. O mea e matua faigata ona oo pe maua e tagata, o le a faigofie mo oe, ona o le feagaiga i le lua va ma le Atua. I le Esoto 19:5, na fetalai le Atua, “O lenei fo‘i ‘āfai tou te matuā fa‘alogo mai i lo‘u leo ma tausiusi i la‘u feagaiga, ‘ona fai lea ‘outou ma ‘oloa tāua mo‘u, e sili i nu‘u uma; auā o lo‘u lava le lalolagi uma.”O lona uiga, o le a vaai atu tagata ia te oe ma manatu pe faapefea ona alofa tele le Atua ia te oe. E tele taimi pe a ou ala ane i le po ma manatu i mea lelei uma ua faia e le Atua i le RCCG, e masani ona ou faapea, ‘Le Alii e, e faapefea ona e alofa tele ia te a’u?’ O nisi tagata e faapea mai ona matou te anapogi ma tatalo, peitai, talitonu mai, e iai tagata e anapogi e sili atu iai matou. Ou te tau manatua ina ua avea au ma taitai aoao, sa ma iai ma se tasi o au uo i le tatalo mo le 36 itula. Sa matou manatu e matautia le mea ua matou faia seia oo ina ua matou faalogo i se tagata na tatalo e sili atu. Ou te lei ono tatalo i se umi e pei o lea tagata, peitai o mea ua faia e le Atua i le RCCG e matautia ma matua ofoofogia. E moni e tele naua taui pe a faia ma osia se feagaiga ma le Atua matautia. O seisi taui i se feagaiga ma le Atua, o le puipuiga. Ina ua ave e se tupu le toalua o Aperaamo, na afio mai le Atua i se miti a le tupu. Na faia e le Atua se ala e sili atu e puipui ia te ia ma ia faatonuina le tupu e ole atu ia Aperaamo e tatalo mo ia, e pei ona tatou iloa i le faitauga mai le Tusi Paia o le asō. Le au pele e, e lē mafaitaulia le anoano o taui ma faamanuiaga e tafe mai i se feagaiga ma le Atua, e na te faafaigofieina foi mea faigata mo oe, i le suafa o Iesu, Amene. 

OPEN HEAVENSMATALA LE LAGI MO LE ASO SA 16 AOKUSO 2026(tusia e Pastor EA Adeboye) Manatu Autu: O Taui O Feagaiga A Le Atua 1 (The Gains Of God’s Covenant 1) Tauloto Tusi Paia: Teuteronome 29:9 “O lenei, ‘ia ‘outou tausi i ‘upu o lenei feagaiga ma ‘ia ‘outou faia, ‘ina ‘ia manuia ai ‘outou i mea uma lava tou te faia.”Faitauga - Tusi Paia: Teuteronome 28:1-14I le Faataoto 31:1-9 o lo o tau mai ai o se tasi o mea na a’oa’oina ai e le tinā o le tupu o Lemuelu lana tama, o nisi o tulaga patino e lē tatau e tupu ona fai. Fai mai le tinā i lana tama o tupu, e le tatau ona avatua lo latou malosi i ni fafine/tamaitai, pe tatau fo’i ona mulimuli i latou i ala e faaumatia ai tupu, pe inu i latou i uaina po o mea inu malolosi. Afai e faia e se uso mea ua tapu i se tupu ona fai, e ono lē o’o lea tagata i le nofoalii, po o le faoa o lona nofoa pe afai ua maea tofia o ia e avea ma tupu. Ina ia atoatoa le fiafia i manuia o soose feagaiga ma le Atua, e tatau ona e sauni e faataunuu aiaiga ma tuutuuga e ala i le gaua’i atu ia te ia ma usiusita’i i ana faatonuga uma. E te filifili loa e auauna ma tautua i le Atua i lou olaga atoa ma fai soosemea e fetalai mai ai, e lē pine ae omai tagata ia te oe ma faapea atu, “Tau mai ia i matou lau mea lilo; pe faafefea ona e maua manuia i so’ose vaega uma o lou soifua? O le toatele o tagata ua fai mai o le pogai o le tulaga ese o le alualu i luma o le RCCG o lo’u tulaga aoaoina lelei; peita’i latou te lē o iloa ua o matou selesele manuia o le feagaiga a le Atua ma le na amataina le ekalesia. Na valaauina e le Atua le na faatuina le lotu, Pa Akindayomi, o se tagata e lei ulufale i se aoga ma fai ia te ia, afai na te tausisia ni aiaiga faapitoa o le a Ia faatuina se ekalesia e ala ia te ia, o le a tupu e soo ai le lalolagi atoa. Na fesoasoani le Atua iā Pa Akindayomi ma a’o le’i maliu le tamā ua uma ona ia faataunuuina aiaiga faapitoa uma na ave i ai e le Atua. O le asō ua o’o le RCCG i le sili atu ma le 195 atunuu o le lalolagi. Ua taunuu le ekalesia i le tulaga ua i ai i le taimi nei ona o le feagaiga na faia e le Atua ma lo’u tamā faaleagaga. E le mafai ona ulagia le Atua. So’ose tasi e usitai i aiaiga o lana feagaiga o le a ia selesele i ona taui. I le upu tauloto mai le Tusi Paia o le asō na fai Mose i le fanauga a Isaraelu afai latou te tausiusi i poloaiga a le Atua o le a manuia mea uma latou te fai. O le tamāoaiga o se taui autu, o le a ola fiafia ai i latou e tausi i le feagaiga ma le Atua. O Aperaamo, Isaako ma Iakopo na fiafia uma i latou i tamāoaiga faulai ma soloia o se tali o le feagaiga a le Atua ma Aperaamo. O Aperaamo tamā o lo o fa’amatalaina o se tagata na manuia i mea uma lava (Kenese 24:1). O Isaako sa faaigoa o se tagata uluola (Kenese 26:13) ma Iakopo na fa’amatalaina o se tagata mauoa (Kenese 30:43). Le au pele e, ua uma ona aumaia e le Atua i lana fanau mea uma e faafiafia ai (1 Timoteo 6:17). Peita’i e tatau ona e tausisia atoatoa aiaiga ma tuutuuga o le feagaiga a le Atua ma lana fanau ia atoa ai lo outou fiafia i le mauoa i vaega uma o lou olaga. Ia avea lou olaga e fa’asusulu mai ai manuia sautualasi o le feagaiga a le Atua. I le suafa o Iesu, Amene.

OPEN HEAVENSMATALA LE LAGI MO LE ASO TOONAI 15 AOKUSO 2026(tusia e Pastor EA Adeboye) Manatu Autu: O Le Mamafa o Feagaiga 2 (The Weight Of Covenants 2)  Tauloto Tusi Paia: Esoto 19:5 “O lenei fo‘i ‘āfai tou te matuā fa‘alogo mai i lo‘u leo ma tausiusi i la‘u feagaiga, ‘ona fai lea ‘outou ma ‘oloa tāua mo‘u, e sili i nu‘u uma; auā o lo‘u lava le lalolagi uma.”Faitauga - Tusi Paia: Mataio 11:28-30O le ola faapaiaina o le ola lea i se soifuaga e atagia ai amioga fa’ale Atua ma o le tulaga aupito sili lea ona taua i se feagaiga ma le Atua. So’ose tasi ua osi feagaiga ma le Atua e tatau ona pei o le Atua (1 Peteru 1:16), ma e manaomia ona e faia mea uma e finagalo ai o Ia. O le taui, o le a maua e le uso le tele o faamanuiaga mai le Alii (Teuterenome 28:1-14). O nisi tagata ua manatu ifo lava i latou o le a na o mea lelei lava e tumu ai le olaga pe a avea ma kerisiano; peita’i e leai ma se folafolaga faapea a Iesu. I le faitauga mai le Tusi Paia o le asō na Ia fetalai, so’ose tasi e sau ia te Ia e ao ona amoina lana amo. O lona uiga e lē faapea a avea oe ma atalii poo le afafine o le Atua ona e lē amoina lea o se mamafa o le feagaiga ma le Atua, o le eseesega o le avega o le a māmā ma faigofie ona tauave i le fesoasoani a Agaga Paia. Fai mai le tusi o Filipi 2:13; “auā o le Atua o loo galue i totonu ia te outou ina ia outou loto i mea e finagalo malie ai o ia ma ia outou galulue ai.” O loo finagalo le Atua e faataunuu aiaiga o le lua feagaiga pe afai e te faataga ia te Ia. A fai se lua feagaiga ma le Atua, o le a lē toe faatagaina ona e faia le tele o mea o loo fai e tagata lē faaolaina. Ia i latou, atonu e sa’o ia mea ae lē sa’o mo oe. Fai mai Paulo e ui ua tataga mea uma, e lē o mea uma e talafeagai (1 Korinito 10:23). O nisi tagata e finau mai e le o se agasala le faalogologo i pese fa’asalemausau; peita’i mo se tagata ua osi feagaiga ma le Atua e lē tatau, e sesē. O nisi e oofu faatosina peita’i e lē faatagaina e le Atua lou laei i lavalava faapea. O le a faasolo ina e maua fa’atonuga e sili atu le mamafa ona o le lua feagaiga ma le Atua peita’i na te fa’amalosia pea oe e lē aunoa e usiusita’i atu ia te Ia. O le tala fiafia afai e te tauaveina lelei le amo o le feagaiga a le Atua o le a e fiafia I Ona taui e faavavau. Na fai feagaiga le Atua ma lou tamā i le Alii, Pa Akindayomi ma avatu e le Atua ia te ia ni aiaiga faapitoa, ma o le taui, na fetalai le Atua ia te ia o le a ia amatalia se ekalesia e ala i lana auauna e tupu ma so’o ai le lalolagi. Faafetai i le Atua na ausia e Pa Akindayomi ia aiaiga ma ina ua maliu le tamā, na fa’aauau e le Atua ona faataunuu lana vaega o le feagaiga. Le au pele e, fai punoua’i lau vaega o le feagaiga; tauave le amo māmā o le feagaiga o le faaolataga a le Atua ona e vaai lea i le galue mai o le Atua e faataunuu lana pitolaau o le feagaiga e ala i lona sasa’a mai o faamanuiaga ia te oe. Ou te tatalo ia faatumulia lou olaga e faamanuiaga mamalu a le Atua i le suafa o Iesu, Amene. Tatalo Tamā faamolemole fesoasoani mai ia te a’u e tauave le amo māmā o lau feagaiga ma le lotomalie ma le olioli. Fesoasoani mai ia te a’u e ola faapaiaina pei ona Paia oe, i le suafa o Iesu, Amene.

OPEN HEAVENSMATALA LE LAGI MO LE ASO FARAILE 14 AOKUSO 2026(tusia e Pastor EA Adeboye) Manatu Autu: O Le Mamafa o Feagaiga 1 (The Weight Of Covenants 1)  Tauloto Tusi Paia: Salamo 89:34 “Ou te lē tu‘umavaega la‘u feagaiga, ‘ou te lē liliu lava le ‘upu ‘ua pa‘ū atu i o‘u laugutu.”Faitauga - Tusi Paia: Kenese 17:1-8I le faitauga mai le Tusi Paia o le asō, na osia le feagaiga i le va o le Atua ma Aperamo ma folafola e faia o ia ma tamā o nuu e tele, ma sui lona igoa ia Aperaamo. E lē pepelo le Atua, ma o folafolaga uma na ia faia ia Aperaamo na faataunuuina. Fai mai le Numera 23:19 “E lē se tagata le Atua e tala pepelo ai o ia, po o se atali‘i o se tagata e salamō ai o ia; ‘ua fetalai mai o ia, na te lē faia ‘ea? ‘ua fetalai mai fo‘i o ia na te lē fa‘ataunu‘uina ‘ea?”A fai e le Atua se feagaiga ma se tagata, e mautinoa na te faia, e tuu atu ai avanoa i lea tagata i mea uma e na te manaomia i lenei lalolagi. E aofia ai le soifua faafualoa, mauoa, alofaina, faamanuiaga, olioli, filemu, soifua maloloina lelei ma soo se mea lelei. O le tiapolo i leisi itu, e lē mafai ona ia tausisi i se feagaiga na te faia. E lē savali ini ana folafolaga aua o ia o le pepelo o le tamā o le pepelo (Ioane 8:44). E masani ona osi feagaiga tagata ina ia latou maua mai ai se mea ma leisi itu, e faapea foi ona latou foai atu ni mea. O le mamafa moni o se feagaiga, e faatoa ilo pea a lē mafai ona faatino e se vaega la latou folafolaga o le mea e faia. I le tele o ia feagaiga, o le avega mamafa o le oti le iuga o le talepeina o lea feagaiga. A auai atu tagata i faalapotopotoga faalilolilo, e latou te osia ai ni feagaiga. Afai latou te lē faia mea ua faatonuina e faia i totonu o lea faapotopotoga, o le iuga o le oti e masani ai. E te ono fesili ia te oe lava, ‘aisea e ono manao ai se tagata e fai ma sui o ia faapotopotoga faalilolilo ae e iloa e iu lava i le oti?’ O nisi tagata e faapea mai o le mafuaaga e auai ai i ia faapotopotoga ona e manaomia lo latou puipuiga, ao isi e fai mai e maua ai le oa ma isi faamanuiaga. E taua le maitau mai, e faatosina atu le tiapolo iai latou e auai ma le folafolaga o le tele o mea matagofie, ae o le taui, e na te aveina o latou agaga e faaumatia ai. Auā se a le aogā i le tagata pe ‘āfai na te maua le lalolagi uma, ‘ae māumau ai lona ola? ( Mataio 16:26). E mamafa le avega o le agaga o le tagata ma e lē tatau ona lafoai i le tiapolo. Le au pele e, aua e te faatagaina le tiapolo e faaosooso ia te oe e faia se feagaiga leaga ma ni folafolaga e lē taunuu, ma afai ua e osia se feagaiga ma seoli, saini feagaiga ma satani, e mafai e Iesu ona faasaoloto ia te oe pe afai e te tamoe atu ia te ia. E na te lē tuulafoai i soo se tagata e alu atu ia te ia ( Ioane 6:37). Ou te tatalo ia faia e le Alii lana feagaiga o le filemu ma oe, ma lou aiga, i le suafa o Iesu. O soo se feagaiga e faia ma le tiapolo e faavae i pepelo, i le suafa o Iesu, Amene. 

OPEN HEAVENSMATALA LE LAGI MO LE ASO TOFI 13 AOKUSO 2026(tusia e Pastor EA Adeboye) Manatu Autu: Malamalama i feagaiga (Understanding covenant) Tauloto Tusi Paia: Teuterononome 7:9 “Ia e iloa fo‘i o le ALI‘I lou Atua o le Atua lava ia, o le Atua fa‘amaoni, o lē na te tausi i le feagaiga ‘atoa ma le alofa i ē alolofa atu ‘iā te ia ma tausiusi i ana poloa‘iga, e o‘o lava i le afe, o tupulaga;”Faitauga - Tusi Paia: 1 Korinito 6:18-20O le malamalama i feagaiga, e fesoasoani i le malamalamala lea i se maliega tusitusia, aua e tutusa o la uiga. O se konekarate, o se maliega tusitusia i le va o ni tagata, ma e faamaoti mai ai galuega faatino a tagata o loo saini lima. O le taimi e sainia ai lea maliega, o tagata uma e aafia ai, ua saisaitia ai i latou, ma e masani ona tusia ai aafiaga mautu pe afai e lē savavali tagata na saini lima i aiaiga o lea maliega. O le aafiaga e aofia ai tupe totogi o faasalaga, taui tau tupe ma isi tupe totogi faapea. O le feagaiga o se maliega tusitusia foi, peitai e sainia pe faamautu i suavai mai le tino, e masani lava ona faaaoga ai le toto. O lona uiga e faaaoga suavai mai le tino aemaise lava le toto e sainia pe faamautū ai se maliega, ma osia ai loa se feagaiga. Mo se faaataitaiga, i le Kenese 17:1-14, na osia se feagaiga i le va o Aperaamo ma le Atua, ma i le sainia ma le faamautuina o lea feagaiga, o alii uma na fananau i le aiga o Aperaamo na peritomeina, e amata mai ia Aperaamo, e ui ua 100 ona tausaga i lea taimi. O se feagaiga o se maliega e lē ula iai se tagata, aua foi o le taui poo le faasalaga pe a lē tausisia aiaiga, o le oti. O le mafuaaga lea e taua tele ai le aoaoga o le asō. .A faatasi ma momoe se tane ma le fafine e feusuai ai suavai o le tino (tulou), ua la osia se feagaiga. E la te lē ono iloa, peitai ua la osia se feagaiga. O le mafuaaga taua lea e tatau ai i le tane ma le avā ona faamaoni i lo la va faale ulugalii aua foi e mafai ona faaaoga e le tiapolo le mulilua e faasolo ma tufa solo ai temoni iai latou o loo faia. I le tele o tausaga ua leva, sa iai se tamaitiiti na aumai ia te au mo le faasaolotoga ona e ou pei se taifau. Ina ua ou suesueina le mataupu, na ou iloa ai sa momoe a ma lana maile i totonu o lona fale. I seisi faaupuga, ua ia osia se feagaiga ma lana maile, ma ua faaaoga e le tiapolo e osofaia ai o ia. I le manatu lava e tasi, a momoe se tagata ma seisi e lē o lona toalua, e iai lava vaega ua faasolo atu mai leisi i le isi, ma e mautinoa e lē o ni mea lelei aua foi o le tulaga na faatino ai, e tetee i ala ma le finagalo o le Atua. Le au pele e, aua e te faatalalē i faatonuga a le Atua matautia e faatatau i le ola mama ma le faapaiaina. Aua e te faatagaina le tiapolo e ulu i lou olaga e ala i le faitaaga ma le mulilua. Ou te tatalo ia faaauau pea ona faamalosi atu le Alii ia te oe ina ia  e manumalo i soo se faaosoosoga i le faitaaga ma le mulilua, i le suafa o Iesu, Amene. 

OPEN HEAVENSMATALA LE LAGI MO LE ASO LULU 12 AOKUSO 2026(tusia e Pastor EA Adeboye) Manatu Autu: O mea e tuu iai e fausia mea e maua mai ai 2 (Inputs determine outputs 2) Tauloto Tusi Paia: Luka 12:48 “A o lē ‘ua lē iloa, ‘ua faia fo‘i e ia mea e tatau ‘ina sasaina ai, e māmā ‘ona sasaina o ia. Auā o lē ‘ua foa‘iina atu i ai o mea e tele, e su‘eina atu fo‘i ‘iā te ia o mea e tele; o lē fo‘i ‘ua tu‘uina atu i ai o mea e tele latou te fai atu ‘iā te ia, e ‘aumai mea e sili ‘ona tele.”Faitauga - Tusi Paia: Mataio 25:14-30A avatu e le Atua ia te oe se galuega, e na te foai atu mea uma e manaomia e faataunuuina ai. O nisi o punaoa manaomia o loo i lou siomaga ao isi, o loo i totonu ia te oe. E pei ona faaalia i le tauloto mai le Tusi Paia o le asō, o le tele o mea e avatu ia te oe, o le tele foi lea o mea e sueina ma aumai ia te oe. O tagata e manatu e lē lava punaoa ma mea o loo i o latou lima, e tatau ona faaeteete ia aua nei faapei o le auauna na inoino i le taleni na foai iai e lona matai, e pei ona faaalia i le faitauga o le Tusi Paia o le asō. O nisi tagata e manatu o mea ua latou maua e lē lava, ona taumafai lava lea e faatali i le Atua e foai atu nisi mea e sili atu, ona faatoa mafai lea ona faamaoni i sina mea o loo i o latou lima. Le au pele e, e sese lea ituaiga mafaufau lea. O se tagata e lē mafai ona faamaoni i sina mea itiiti ua ia maua, e lē tatau ona manatu e sili atu seisi mea na te maua. E foai e le Atua na o i latou ua faamaonia lo latou faamaoni i mea itiiti. Ou te sau mai se nuu laitiiti lava i luga o le faafanua. O le mativa ia o lou tamā e oo i tagata matitiva e latou te lauina lona mativa. E ui na matitiva ou matua ma e lē tele se punaoa na ou maua ao ou tuputupu ae, na foai mai e le Atua se taleni e tasi ia te a’u, o lo’u faiai. Na ou faaaogaina tatau le taleni na foai mai e le Atua e ala i lou toaga i le aoga ma suesue ma le punouai, ona amata lemu lava lea ona maua punaoa mai lea taleni. Na foai mai e le Atua ia te a’u le faaolataga i le 1973, e amata mai lea taimi, na avea au o se ipu e aoga i ona aao. A ou manatunatu i mea tetele ua faia e le Atua mo a’u ma faataga ou te ausia e ui e itiiti punaoa na ou maua i le amataga, ou te vivii faifaipea i le Alii i lona faamaoni. E moni, a faamaoni se tagata i mea itiiti, e faaopoopo mea ia te ia. Atalii poo le afafine o le Atua, tilotilo i lou siomaga ma vaavaai i totonu ia te oe, e te vaai atu ai i meaalofa e tele ua foai atu e le Atua ia te oe. Aua e te toilalo, faamolemole faaaoga meaalofa na, e manumalo ai agaga mo le malo o le Atua. Faaaoga lelei e siitia lou tulaga ma le pule, a oo ina e tautala, e faalogo tagata uma ma auauna i le Atua e tasi o loo e auauna iai. Ou te tatalo ia faaaoga e le Atua matautia lou tagata e faia mea tetele i lona malo ao e auauna ia te ia ma le faamaoni e faaaoga ai meaalofa ua ia foai atu ia te oe, i le suafa o Iesu, Amene. 

OPEN HEAVENSMATALA LE LAGI MO LE ASO LUA 11 AOKUSO 2026(tusia e Pastor EA Adeboye) Manatu Autu: O mea e tuu iai e fausia mea e maua mai ai 1 (Inputs determine outputs 1) Tauloto Tusi Paia: 1 Korinito 9:24 “Tou te lē iloa ‘ea, o ē tausiniō i le ala tanu, e tausiniō uma i latou, ‘ae maua le taui e le to‘atasi? ‘Ia fa‘apea ‘ona ‘outou tausiniō, ‘ina ‘ia ‘outou maua.”Faitauga - Tusi Paia: Faataoto 31:1-9O le mamao e te fia ausia i lau faigamalaga i le olaga nei, o le tele foi lena o le manaomia ona e galueaina lelei lou tagata. Mo se faataitaiga, afai e te fia malaga i se mea mamao ao loo tumu lelei le pinisini o le taavale, e te ono tu i se pamu i le ala e toe utu ina ia e ausia le nofoaga mamao o loo e malaga iai. Peitai, afai e latalata le nofoaga o loo e malaga atu iai, e te lē manaomia le tu i se pamu e toe utu le taavale. O soo se tagata e naunau e mamao le tulaga e ausia i le olaga nei, e tatau ona galueaina punaoa mo ia, e aofia ai le ola faapaiaina, galue punouai, aoaoga, lelei fesootaiga ma tagata i lona olaga, alo ese mai amio lē lelei o le ai ai soo, matamata tifaga, faaalu vale taimi i luga o upega tafailagi, pati faasoloatoa ma mea faapena. E manaomia le pulea lelei o lau amio ma lou tagata pe afai e mamao le tulaga e te fia ausia. Ou te manatua ao ou laitiiti, e faanofo lava a’u e lou tina i totonu o le fale e fai meaaoga ao taaalo soka au uo i fafo. E masani ona ou faasea i lou tina peitai na faaauau ona ia faia seia oo ina matua ma avea ma masani ia te au le faia o meaaoga. E iai se taimi na ou alu i le fale o le tuagane a lou tinā, o fai se solo tele o faafiafiaga i le auala, na o uma ai tagata o le matou aiga sei vagana a’u. Na sau seisi ma fesili mai pe aisea ou te le alu ai i fafo e matamata i faafiafiaga, na ou tali atu, ‘o le tagata o le a matamata uma ai tagata i le lumanai e lē matamata i ni faafiafiaga’. I le tele o tausaga mulimuli ane, ina ua siitia a’u e le Atua, na ia faamanatu mai ia te a’u lea aso, ma faapea mai, ‘o le asō, o loo matamata uma mai le lalolagi ia te oe’. Le au pele e, faaalu au tupe ma punaoa e galueaina lou tagata i mea uma e manaomia i le mamao ma le maualuga o le olaga e te fia ausia. Ao agai isi tagata na ave i le tafeaga i Papelonia e aai i meaai matagofie i le maota o le tupu, na taulai le vaai a Tanielu ma ana uo ia vavaeseina i latou mo le Alii (Tanielu 1:3-12). Ou te talitonu e lē na o i latou tagata Iutaia na aoaoina i le maota o le tupu i lea taimi, peitai e na o i latou na faia mea tetele aua foi na faaalu tatau a punaoa e galueaina i latou. Atalii poo le afafine o le Atua, afai e tetele ni au miti o iai ma o loo e naunau ia tino mai, e tatau ona e totogiina le tau e galueaina lou tagata. E tatau foi ona e tuuesea ni avega mamafa e pei o le paiē, leai o se pulea o lou tagata, ma tulaga eleelea e pei o le agasala e taofia oe mai le ausia o faamoemoega a le Atua mo lou olaga. Ou te tatalo ia e ausia faamoemoega a le Atua mo lou olaga, i le suafa o Iesu. Tatalo, Tamā, faamolemole fesoasoani mai ia te au ina ia galueaina punaoa talafeagai mo lo’u olaga ina ia ou ausia faamoemoega ua e saunia mo au, i le suafa o Iesu, Amene. 

OPEN HEAVENSMATALA LE LAGI MO LE ASO GAFUA 10 AOKUSO 2026(tusia e Pastor EA Adeboye) Manatu Autu: O lou tofi e Le Faatauina (Your Legacy Is Not For Sale) Tauloto Tusi Paia: Faataoto 13:22 “O le tagata lelei na te tofia ana mea i le fānau a lana fānau; a o le ‘oloa o le tagata agasala, e teua lea mo lē amiotonu.”Faitauga - Tusi Paia: 2 Tupu 20:12-19E tatau lava ona e fesili ia te oe lava i lenei fesili aemaise pe a ua oo ina e matua: ‘O a faamatalaga a tagata ia te a’u pe a oo mai le taimi ou te alu ai’. O le tulaga moni, o le auala o loo e soifua ai i le lalolagi nei e fua iai faamatalaga a tagata e faia ia te oe. O le mafuaaga lea e tatau ai ona e faia galuega ma se tofiga lelei, ma puipui lelei iai. E lē tatau ona e faatau atua ma fesuiaia i se mea, tusa poo le a le matagofie.Le au pele e, o au galuega ma tofi, e aofia ai lou igoa, o le a tuua i le lalolagi nei pe a oo ina e alu. A’o avea le tupu o Esekia o se tupu e lelei, na ia tuua se tofi lē lelei mo lana fanau. I le 2 Tupu 20:1-11, na auina mai e le tupu o Papelonia ana tagata suesue e feiloai ma Esekia, e lei poto o ia, aua ua faaalia uma iai latou le oloa e tele i lona fale e oo i le oloa o le atunuu atoa. O lea mea na ia faia, ua lamatia ai lona malo e oo i lana fanau i o latou fili. Ina ua fai atu le perofeta o Isaia ia te ia i le taui o le mea faavalevalea ua na faia, e aofia ai le ave faatagataotaua o lana fanau ma ave uma le oa o le atunuu e le tupu o Papelonia, na ia tali mai e faapea,“Ua lelei le afioga a le ALI‘I ‘ua e fai mai ai na;” ‘ua fai atu fo‘i ia, “E lē i ai ‘ea le manuia ma le fa‘amaoni i lo‘u olaga?”O le tulaga e ofo ai, sa lelei ia te ia le ave faatagata o taua o lana fanau ae aua nei tupu ia te ia. O loo manino e leai se poto i le mea ua ia faia. Na faatauina e Esekia lona tofi i le manao e faalialia lona tamaoaiga tele. E manatua pea o ia e ona suli o se tagata na tatalaina le faitotoa i le tiapolo ma oo ai ina latou le toe maua le nofoaiga tupu. O le tauloto mai le Tusi Paia o le asō o loo faaali mai ai iai tatou, o le tagata lelei e na te tofia ana mea i le fanau a ana fanau. E na te lē taofia i latou mai le maua o le tofi mai matua pe tuua se igoa e faamāina ai i latou. Ou te tatalo ia aua lava nei e tatalaina le faitotoa i le tiapolo e faapologa, faasauā pe saisaitia ai ou suli ma fanau, i le suafa o Iesu. O soo se aiga o loo pologa i faafitauli tuufaasolo mai augatupulaga ona na tatala e se tagata o le aiga le faitotoa i se taimi ua sola, aua e te faapei o lea tagata. Afai ua e faia ni mea e te lē o fiafia ai, ma e te iloa o na mea e ono aafia ai lau fanau ma ou suli, tamoe i le Atua mo lona alofa mutimutivale i le asō. Ole atu ia te ia e faamamā ia te oe e ala i lona toto ma suia ai le talaaga o lou aiga. E le afaina poo le a lou matua o iai, afai o loo e soifua pea, e iai pea le avanoa e toe faaleleia ma tuu se tofi lelei i lau fanau ma ou suli, i le suafa o Iesu, Amene. 

OPEN HEAVENSMATALA LE LAGI MO LE ASO SA 9 AOKUSO 2026(tusia e Pastor EA Adeboye) Manatu Autu: O le faauuga e le faatauina (The annointing Is Not For Sale) Tauloto Tusi Paia: Mataio 10:8 “Ia ‘outou fa‘amālōlō i ē mama‘i, fa‘amamā lepela, fa‘atutū i ē ‘ua oti, tutuli i temoni. ‘Ua maua fua ‘outou, ‘ia ‘outou foa‘ifuaina atu.”Faitauga - Tusi Paia: 1 Peteru 5:2-4A faauuina e le Atua se tagata, e finagalo o ia e faaaoga e lea tagata le faauuga e faamalosi ai i tagata ma talai le talalelei. E pei ona tatou faitauina mai le Tusi Paia o le asō, e lē finagalo le Atua e faaaogaina e maua ai ni tupe. E masani ona ou fai i faifeau o loo i lalo o lau taitaiga, a faaaoga i latou e le Atua e faia se vavega, e lē tatau ona latou faatauananu se taui, pe talia foi ni taui mai le tagata na maua le vavega. I le tauloto mai le Tusi Paia o le asō, na fetalai Iesu i lona ausoo na latou maua fua le faauuga ma e tatau foi ona latou foai fua atu. O Lē na faia vavega a le Atua, e lē o tagata na ia faauuina. O lona uiga, e lē tatau ona e manatu e maua mai ni mea i se tagata na maua sana vavega mai le Atua e ala i le faauuga ia te oe. O nisi o faifeau a le Atua ua o atu ma faatau atu suauu, vai, solosolo ma isi mea faapena, ua latou fai mai, ua maea faauuina i latou e o mai mo tatalo. O ia amioga e atagia ai o auauna o loo naunau e faaaoga seseina mamoe a le Atua ae ua lē faia tiute faaleoleo mamoe o le tausi ma fafaga. Le au pele e, e lē tatau ona e faaaogaina le faauuga ua tuu e le Atua i ou luga e faaaoga ai tagata. O nisi tagata e faatonu malosi mai e tatau ona faaigoa i latou o ‘ Tama i le Alii’ ona ua faaaoga e le Atua i latou e faamalolo ai ulu tigā. O le faauuga e lē agavaa ai se tasi e avea ma Alii i luga o isi tagata ae o le faauuga e tatau ona faaaogaina e auauna ai i tagata. Na silafia e Peteru o ia faaosoosoga e oo mai, o le mafuaaga lea na ia faatonu ai nisi o taitai o le Ekalesia i le faitauga mai le Tusi Paia o le asō e fafaga le fanau a le Atua ma le loto malie ma le mafaufau matala. Na ia lapatai foi ia aua nei faaaogaina le faauuga a le Atua i o latou olaga e maua ai ni mea. O Iesu Keriso o le faataitaiga sili, na faasino mai le ala e faaaogaina ai le faauuga a le Atua i luga o se tagata. Na ia faia galuega lelei ma faamalolo nisi na faapologaina e le tiapolo ( Galuega 10:38), na ia auauna foi i tagata na mulimuli ia te ia (Ioane 13:3-5). Le au pele e, e pei o Iesu, faaaoga le faauuga na e maua mai le Atua e faamanuia ai iai latou ua auina atu ia te oe, aua ete faaaogaina e maua ai ni mea. O Iesu o le leoleo mamoe sili ma e iai le aso e te avatu ai faamaumauga ole faaaogaina o mea uma ua ia foai atu ia te oe. Ia manatua lava o le faauuga mai le Atua o se auupega e te auauna ai ia te ia, aoao ona tagata, faamalieina ai manaoga ma talai le talalelei i tuluiga o le lalolagi. O le faauuga e lē faaaogaina e maua ai ni mea, ae ia auauna e faia le finagalo o lē na auina mai ai, i le suafa o Iesu, Amene. 

OPEN HEAVENSMATALA LE LAGI MO LE ASO TOONAI 8 AOKUSO 2026(tusia e Pastor EA Adeboye) Manatu Autu: O Lou Faaolataga E Le Faatauina (Your Salvation Is Not For Sale) Tauloto Tusi Paia: Mareko 8:36 “Auā se a le aogā i le tagata, pe ‘āfai na te maua le lalolagi uma, ‘ae māumau lona ola?”Faitauga - Tusi Paia: Mataio 26:15, 27:3-5I le lalolagi i aso nei, e toatele tagata o loo o latou faatauina atu o latou faaolataga mo ituaiga mea fa’atauvaa uma. O nisi ua faatau atu o latou faaolataga mo tupe a o isi, mo tulaga ma le ta’uta’ua. Peita’i e leai se mea o lenei lalolagi e tusa lona tau ma lou faaolataga. Soose mea e mana’o se tagata na te maua e mana’omia ai ona faatino e le tagata le agasala, o se mailei a le fili ia faatau ese ai e le uso lona faaolataga ma i’u ai i seoli. I le Mataio 16:26; na fesili Iesu i ona so’o, “Auā se a le aoga i le tagata pe afai na te maua le lalolagi uma ae maumau ai lona ola ? se a fo’i se mea e avatu e le tagata e togiola ai lona ola? O nei fesili o loo faatatau ma aoga pea lava mo i tatou i le asō. E leai se mea e maua i le faatau atu o le faaolataga o lou agaga mo soosemea auā e leai se mea i lenei lalolagi e sili ona taua pei o lou agaga. O Esau se fa’ata’ita’iga o se tagata na ia faafesui’a’i se mea taua mo mea le aoga ma e lē tumau. I le Kenese 25:29-34; na ia filifili e lafoa’i lona tulaga aloaia i le fale o lona tamā mo na o sina ipu polesi. Na ia faatau atu lona tofi ulumatua i se tau taugofie ona ua fia’ai ma i le Eperu 12:17; fai mai le Tusi Paia na te le’i maua se mea e liliu ai le loto o lona tamā e ui na fa’atoga ma le Faaeteete o ia ma loimata. E faapea fo’i Iuta, na faatau atu lona faaolataga mo tupe, e pei ona taua i le faitauga mai le Tusi Paia o le asō. Na ia lafoa’i a’oa’oga uma na ia maua mai ia Iesu i le alāvai mo tupe siliva e 30. Poo le a lava e faaosoosoina se tagata e faafesuiai ma lona faaolataga, ua na o le mana’o e faaumatia le uso. Atonu e te maua ai le fiafia vave ma le faamalieina i lea taimi, peita’i o le faamoemoe autu o le tiapolo o le gaoi, fasioti ma faaumatia (Ioane 10:10). O le tasi auala a le tiapolo e taumafai e faaosooso ai kerisiano e faatau ese o latou faaolataga o le faa talitonu o i latou e i ai agasala e tāua ma agasala e lē taua tele, ma o agasala ia e lē afaina pe a e faia. Peita’i e leai se agasala e faatino e lē matuiā i le silasila a le Atua. Soose tama’i se’e ese ma le amiotonu o se la’a ese mai lana puipuiga lavea’i ma le alofa mutimutivale. Fai mai le Failauga 10:8; e utia e se gata so’ose tasi na te lepeti se aupā. I se isi fa’aupuga, o le agasala e lamatia ai se uso i le osofaiga a le fili. Le au pele e, aua e te taalo i le agasala auā pau le mea e te maua o le pasese tu’usa’o i seoli. Ou te tatalo ia aua ne’i e faatauina le faaolataga o lou agaga mo soose mea o lenei lalolagi, i le suafa o Iesu, Amene.

OPEN HEAVENSMATALA LE LAGI MO LE ASO FARAILE 7 AOKUSO 2026(tusia e Pastor EA Adeboye) Manatu Autu: Tatalo mo lou pitonuu ma tuaoi (Prayers for your neighbourhood) Tauloto Tusi Paia: Roma 12:16 “Ia gatasitasi o ‘outou manatu; ‘aua le manatu i mea silisili, a ‘ia feoa‘i ma ē ‘ua fa‘amaulalo; ‘aua le fa‘afiapopoto.”Faitauga - Tusi Paia: Salamo 133:1-3TataloLe Alii e, ou te faafetai ia te oe mo lo matou pito nuu. Faafetai mo lau puipuiga ma le alofa mutimutivale ia te a’u ma ou tuaoi. Tamā, faamolemole puipui lo matou pitonuu i lou filemu. Faataga i matou ia matou nonofo filemu e aunoa ma le fefe poo faanoanoaga, i le suafa o Iesu. Lo matou Tamā, faamolemole ia iai galuega e faatupuina le tamaoaiga i lou pitonuu i le suafa o Iesu. Le Alii e,  faamolemole ia siomia lo matou pitonuu i  lou mamalu. Aua nei faatagaina ni faamai poo galuega amioleaga e faia i lo matou pitonuu, i le suafa o Iesu.Tamā, faamolemole, faamanuia i o matou tuaoi i lou filemu, olioli ma le soifua maloloina lelei. Ia tofo tagata uma o lou pitonuu i lou agalelei, i le suafa o Iesu. Tamā, faamanuia ma foai i o matou taitai le poto e faia ai faaiuga tonu e manuia ai lo matou pitonuu, i le suafa o Iesu. Le Alii e, ou te folafola atu, e leai se faalavelave faalenatura poo se faalavelave e faatupuina e tagata e tupu i lo matou nuu, i le suafa o Iesu. Faamolemole ia matou malu i lalo o ataata o ou apaau i taimi uma, i le suafa o Iesu.Le Alii e, faamolemole taitaiina mai tagata uma e lei faaolaina i lo matou pitonuu ina ia latou lafoai o latou ola ia te oe. Ia faataga i latou e maua lau faaolataga i le suafa o Iesu. Tamā, faamolemole auina atu le fesoasoani i e vaivai pe mativa i soo se itu i lo’u pitonuu. Ia latou tofo ma maua lau tausiga matautia, i le suafa o Iesu. Tamā faamolemole, faataga lou alofa e nofo tupu i lo matou pitonuu. Fesoasoani mai iai ia matou maua le loto gatasitasi ma ia alofa le tasi i leisi, i le suafa o Iesu. Tamā, faamolemole ia e talepe le malosi o le fili o loo taotaomia talavou i lo matou pitonuu. Ia nofotupu i o latou olaga lau amiotonu, i le suafa o Iesu. Tamā, ia e faamanuia i lo matou nuu, ia galue le mana o oe Agaga Paia i Ekalesia kerisiano uma i lo matou nuu e manumaloina agaga mo oe, i le suafa o Iesu e tatalo atu ai, Amene. 

OPEN HEAVENSMATALA LE LAGI MO LE ASO TOFI 6 AOKUSO 2026(tusia e Pastor EA Adeboye) Manatu Autu: E lē o le fitafita (Not by might) Tauloto Tusi Paia: Sakaria 4:6 “Ua tali mai o ia, ‘ua fai mai ‘iā te a‘u, o lo‘o fa‘apea mai: “O le afioga lenei a le ALI‘I ‘iā Serupapelu, o lo‘o fa‘apea mai: E lē o le fitafita, e lē o le malosi, a o lo‘u Agaga, ‘ua fetalai mai ai le ALI‘I o ‘au.”Faitauga - Tusi Paia: Failauga 9:11-12O le ituaiga tagata e te oo iai ao iai i le lalolagi nei, e lē fuaina tau o galuega na e faia. E iai se muagagana faa Aferika e faapea mai, ‘o le pisi solo mai i ma o e le mauoloa ai’. E sa’o lelei, mo se faataitaiga, o i latou e faigaluega i luga o le uafu e la’u uta mai le taeao seia oo i le po, o latou totogi e na o se vaega itiiti o le totogi o le pule o le uafu, o loo nofo i totonu o se potu ea malulu, inu lana ti ma saini pepa. E oo atu i faaiuga o le masina, o le totogi o le pule e leiloa pe sili atu i totogi o le la’u uta i le tausaga atoa. O le faitauga mai le Tusi Paia o le asō o loo faamanino mai ai, o se tagata tamoe saosaoa ma televave, e le faapea e mua ai i se tausinioga, e oo foi i se tagata malosi, e le faapea o le a ia malo ai i le taua ma ē ita mai. O loo faapea mai foi, ua lē i ai fo‘i i ē ‘ua popoto le mea e ‘ai, ‘ua lē i ai foi i ē ‘ua fa‘autauta le ‘oloa e tele. O lona uiga o le maualuga o faailoga ma le aoaoina o se tagata e lē fuaina ai le tele o le oa e na te maua. Ou te manatua ao ou iai i le nofoaga o togalauapiga i le va o le tausaga 1983 ma le 1984, ao ou mafuta ma le Atua, na ou tagi atu i le Atua faapea, ‘ou te lē o ole atu mo ni lavalava, poo se taavale, poo se fale foi. Sa fai lava au galuega masani o se faiaoga i le Iunivesite i le taimi na e fai mai ai ou te sau e auauna atu ia te oe. Na ou talia aua ou te fia auauna lava ia te oe, peitai ou te manaomia le mana ma le malosi e faia ai lau galuega. Ou te lē fia pei o isi faifeau, ou te fia tuputupu pea ma manuia’. I lo’u faatauanau atu pea, na ou faaopoopo atu, ‘Le Atua e, foai mai le mana ia te au, a lē o lena, avatu loa a’u’. Na pai atu i le Atua la’u tatalo, aua i le po lea, na luluina i se mafuie le laueleele, o le malosi ua ua oo atu i nuu tuaoi e faitau kilomita le mamao. Na asiasi mai le Alii ia te a’u ma aumai le mana e manuia ai. Le au pele e, e te manaomia le faauuga a le Atua e te manuia ai. O le Atua e na te avatu ia te oe le mana e maua ai le oloa e tele (Teuteronome 8:18), ua na o lona faauuga e aoaoina ai oe i mea uma e te manaomia ona iloa (1 Ioane 2:27), ma ua nā o ia e te mafaia ai mea uma (Filipi 4:13). O le mafuaaga lea e tatau ai ona e ole ma tagi atu i le Atua e faauu oe, e pei foi ona ou faia i le tele o tausaga talu ai. Ou te tatalo ia avatu e lo’u Tama ia te oe le malosi e manuia ai, i le suafa o Iesu. TataloLe Alii e, faamolemole, asiasi mai ia te a’u ma faamalosi mai ia te a’u ia ou manuia, i le suafa o Iesu, Amene. 

OPEN HEAVENSMATALA LE LAGI MO LE LULU 5 AOKUSO 2026(tusia e Pastor EA Adeboye) Manatu Autu: Faalogo i fautuaga (Be open to feedback) Tauloto Tusi Paia: Faataoto 1:5 “E fa‘alogo mai le tagata poto, e tupu ai pea lona poto; o lē ‘ua mafaufau fo‘i e maua e ia le poto e pule ai;”Faitauga - Tusi Paia: Galuega 18:24-28I lo matou nuu ou te sau ai, e iai se muagagana a toeaina e faapea, ‘e leiloa atu e le moli lalo o le tuugamoli’. O le uiga o lea muagagana, tusa poo a mea e tele e iloa e le tagata, e iai lava vaega o lona olaga e na te leiloa atu. O le mafuaaga tonu lava lea e tatau ai ona e gauai e faalogo i fautuaga mai isi tagata e vaavaai atu ma le faamaoni ia te oe i lo oe lava ia, I le Faaaliga 3:15-17, o loo fetalai le Alii, o le toatele o tagata e tusa ma o latou manatu, o loo talitonu o loo lelei mea uma iai latou aua o i latou e mauoa ma e leai se mea e mativa ai. Peitai i alāfua a le Atua, o i latou e malaia, pagātia, mativa, tauaso ma lē lavalavā.  Afai e faamaualuga tele se tagata e lē fia faalogo ini fautuaga, e vaai atu lava tagata o savali o ia agai i le lua ae tuu ai pea seia paū i le lua. Fai mai le Faataoto 24:6 o le toatele o faipule poo ē faufautua, e saogalemu ai. O tagata e talia gofie pe a faasa’o atu pe fautua atu foi iai, e tele ina latou alo ese mai faafitauli, peitai o i latou e manatu ua latou iloa mea uma, e pauu atu i faafitauli semanu e mafai ona alo ese ai. O loo faamatalaina Iesu, o ia o le poto ma le mana i le 1 Korinito 1:24, peitai ina ua afio mai i le lalolagi, na nofo o ia i lalo o aoaoga a faiaoga, faalogo ma fai ana fesili iai latou (Luka 2:46-47), ma na faamauina i le Tusi Paia na tuputupu ae o ia i le poto (Luka 2:52). Na gauai foi e faalogo i fautuaga e pei ona tusia i le Mataio 16:13-16, ina ua fesili atu i lona ausoo e ta’u atu pe fai mai e a tagata ia te ia, e oo i lona ausoo na fesili iai poo le a lo latou manatu ia te ia. I le faitauga mai le Tusi Paia o le asō, o Apolo o se faiaoga iloga o le Upu ae lei fetaui ma Akula ma Pisila. Ina ua faalogo i laua ia Apolo, na la iloa e manaomia le faamalamalama atili o nisi o vaega o le Upu a le Atua. O lea na la faamanino atili ai nisi o vaega o le upu. Na faalogo iai Apolo ma siitia lona tulaga o le faiaoga o le Upu ma ia aoao ai le au Iutaia, o Iesu o le Faaola. O le ala e gauai ai le tagata i e taitai ia te ia, talia ma faaaoga fautuaga, e fua iai pe tuputupu ae lona tagata, pe tumau i le mea e tasi. Le au pele e, afai e te fia tuputupu a’e i le poto, e tatau ona e faamaualalo e faalogo ma aoaoina mai isi tagata. E tatau foi ona e ole atu ia Agaga Paia mo lana taitaiga i taimi uma. Ou te tatalo ia faaauau pea ona e tuputupu ae i le poto ma le alofa tunoa o le Atua ma tagata, i le suafa o Iesu, Amene. 

OPEN HEAVENSMATALA LE LAGI MO LE ASO LUA 4 AOKUSO 2026(tusia e Pastor EA Adeboye) Manatu Autu: O lē manatu o lo’o tu ia 2 (He who thinks he stands 2) Tauloto Tusi Paia: Salamo 139:23-24 “Le Atua e, ‘ia e su‘esu‘e mai ‘iā te a‘u, ma ‘ia e silafia lo‘u loto; tofotofo mai ia ‘iā te a‘u, ma ‘ia e silafia ‘ou mānatunatu; ma ‘ia e silafia po o ‘iā te a‘u se ala e tigā ai; ma e ta‘ita‘iina mai a‘u i le ala o le fa‘avavau.”Faitauga - Tusi Paia: Mataio 7:21-23O le tu mo Iesu o se tasi lea itu, ao leisi itu, o le tu mo ia seia oo i le iuga. O le tu mo Keriso seia oo i le iuga e manaomia ai le fesoasoani a le Atua (Iuta 1:24), ma e tatau ona saili faifaipea i le Alii ina ia iloa poo le a le ituaiga tu o tu ai. Fai mai le ‭‭2 Korinito‬ ‭10‬:‭18‬ “Auā e lē talia o lē ‘ua vivi‘i o ia ‘iā te ia lava, a o lē ‘ua vi‘ia e le Ali‘i.”E toatele tagata e latou te viia i latou lava, e fua ia latou lava tapulaa, peitai ua leva na pauu. E silafia e le Atua i latou o loo tutū pea mo ia, o lona faavae e mautu ma e le finagalo i ni tagata e faaopoopo iai ni faavae lē moni (2 Timoteo 2:19). O loo tau mai iai tatou mai le faitauga o le Tusi Paia o le asō, i aso mulimuli, e toatele tagata o le a ō atu i le Atua ma le manatu maualuga e tatau ona latou maua le lagi, peitai o le a tuliesea i latou ma ta’ua o tagata amioleaga. O le a latou taumafai e finau atu i le Atua e fua ia latou lava tapulaa, e aofia ai galuega lelei ma le tetele na latou faia i le suafa o le Alii, peitai o le a teena i latou. Na manatu le perofeta o Isaia o loo ia tu mo le Atua seia oo ina ia asiasi atu i le nofoalii o le Atua ma iloa ai, o ia o se tagata laugutu leaga (Isaia 6:5). Le au pele e, aua nei e manatu o loo e tu pea ia Keriso, ia e suesue ia te oe lava, i taimi uma e fua i tapulaa a le Atua e faamautinoaina o loo e iai pea i le faatuatua. E te faia lea i le faatusatusa o au amio ma mea o loo faia, i le upu a le Atua. Mo se faataitaiga, o le a lau tali atu pe a le mafaufau mai se tagata ia te oe? A viia oe e tagata, e te fiafia iai ma e mimita, pe vave ona e ave le viiga i le Atua, o Lē na foai atu meaalofa o loo viia ai oe e tagata? A iai se avanoa e te auauna ai, e te taumafai ea e alo mai ai, ae naunau ia faaaloalo mai tagata ia te oe ona o lou tulaga ma mea ua e ausia? E vave ona e agamalu e pei o Iesu ma auauna atu i isi tagata? E te naunau ea ia fai lava le mea e te manao ai pe faataga Agaga Paia e fai lona finagalo? O le Upu a le Atua o le faata lea e te suesue ai pe o e tu pea mo ia pe leai. O loo faamalosi mai le Iakopo 1:23-25 iai tatou, ia aua le na o le faalogologo i le Upu a le Atua ae ia anaana iai. Aua nei e faapei o le tagata e vaai atu ini faaletonu i ona foliga ae le faia iai se fuafuaga. Ole atu ia Agaga Paia e faaali atu ia te oe  vaega e te lē o savali tonu ai e tusa ma lona finagalo, ina ia e faia vave suiga talafeagai. TataloTamā, faamolemole fesoasoani mai ia te a’u ina ia ou tu pea ia te oe seia oo i le iuga, i le suafa o Iesu, Amene. 

OPEN HEAVENSMATALA LE LAGI MO LE ASO GAFUA 3 AOKUSO 2026(tusia e Pastor EA Adeboye)Manatu Autu: O lē manatu o lo’o tu ia 1 (He who thinks he stands 1)Tauloto Tusi Paia: Luka 11:35 “O lenei, ‘ia oe ne‘i pogisā le malamalama ‘ua i totonu ‘iā te oe.”Faitauga - Tusi Paia: 1 Timoteo 4:13-16Fai mai le 1 Korinito 10:12, o lē manatu o lo‘o o tu ia, ‘inā fa‘aeteete ia ne‘i pa‘ū. O loo tau mai ai, e mafai e le tagata ona tu nei ae paū taeao pe afai e lē faaeteete. O le manatu e lē pau lava, e mafai ona paū ai se tagata na tū pea mo le Alii i se taimi umi. I le 53 tausaga o le ma savaliga ma le Alii, ua ou vaai i tagata e toatele ua pauu ona o le manatu faapea. E manatu e tu pea mo le Alii mo se taimi umi, ua manumalo foi i le tele o faaosoosoga, ma o manatu faapea e oo ai ina lē faaeteete. O se kerisiano, o loo mataitu lelei e le tiapolo oe i taimi uma, a e lē faaeteete i se vaega, e mafai ona ia faaaogaina e te paū ai. Ua ou faalogo i nisi tagata o le Atua e faapea mai, e mafai ona iai ma se tamaitai lē lavalavā (tulou) i se potu ae leai se mea e tupu. O lau fesili muamua, aisea e oo ai se tagata o le Atua i se potu ma se tamaitai e lē o sana ava? A oo se tagata o le Atua i se tulaga faapea, ua oo atu o ia i se tulaga e paū ai. Ou te fai lava i la’u fanau ia aua lana nei iai se tulaga e avea ai se tamaitai o se failautusi a se alii. Aua foi o lea alii o le a tele itula e faigaluega faatasi ai, e oo i le po i nisi taimi. Afai e manatu maualuga le tamaloa i lona malosiaga e tetee ai faaosoosoga, e ono avea ma ala e paū ai. O le manatu maualuga, e mafai ona taitaiina le toatele o tagata e faatalalē i faavae o lo tatou faaolataga. Mo se faataitaiga, o nisi faifeau ua talitonu e lē toe manaomia nisi o aoga Tusi Paia ona o le tele o le faauuga. O nisi e talitonu e lē toe manaomia ona faalogo pe tusi ma fai faamaumauga pe a lauga nisi  e maualalo atu tulaga i totonu o le lotu. Ao isi ua fai fonotaga i taimi o pese ma viiga o sauniga lotu. O faiga faapea e iloa ai ua manatu maualuga i tulaga o iai ma e ono oo atu ai ina pauū.Le au pele e, aua nei e manatu maualuga i le tulaga o iai lau savaliga ma le Atua. Aua nei e faatagaina mea tetele ua e ausia i taimi ua tuanai e taitai seseina ese oe mai faavae o le faaolataga. E lē taitai gata lou savali ma le faaeteete, suesue i le Tusi Paia, anapogi ma mafuta ma isi tagata faatuatua. Tusa poo le a le tulaga o lou tuputupu ae i le Alii, e lē mafai ona e tuua ia mea. Ou te tatalo ia fesoasoani atu le Atua ia te oe, ia e tu pea, seia oo i le iuga o lau savaliga i le lalolagi nei, i le suafa o Iesu, Amene.

OPEN HEAVENSMATALA LE LAGI MO LE ASO SA 2 AOKUSO 2026(tusia e Pastor EA Adeboye) Manatu Autu: Manumalo i faaosoosoga 3 (Overcoming temptations 3) Tauloto Tusi Paia: Luka 6:12 “O aso lava ia ‘ua maliu a‘e ai o Iesu i le mauga e tatalo; ‘ua aoina lana tatalo i le Atua.”Faitauga - Tusi Paia: Mataio 26:37-41O le faaupuga ‘o le kerisiano e lē tatalo o se kerisiano e leai se mana, e le o se fuaitau mai le Tusi Paia, peitai ua ou iloa e sa’o lelei. Afai e te lē avea le tatalo ma ituaiga olaga e te soifua ai, e te vaivai ma le lavatia faaosoosoga a le tiapolo pe a oo mai. I le Mataio 26:41, na fetalai Iesu i lona ausoo e faapea, ‘Ia ‘outou mataala ma tatalo ‘ina ne‘i o‘o mai le fa‘aosoosoga ‘iā te ‘outou; ‘ua mana‘o i ai le loto, a o le tino ‘ua vaivai.”O nisi tagata e naunau e ola ma manumalo i faaosoosoga, peitai e faiaina lava. A e suesue lelei iai, o tagata e feagai ma luitau faapea e vaivai le olaga tatalo. E ui e naunau e ola faapaiaina, e vaivai tele e lē lavatia ona tetee i faaosoosoga a le tiapolo aua e lē tatalo. Mo se faataitaiga, e lei lava ona tatalo Peteru i le fanua i Ketesemane, o lona uiga, e lē tatau ona faateia i lona faafiti faatolu ia Iesu i le maea ai ona ia folafola e fia ofo lona ola mo Iesu. Ana le tatalo Iesu mo Peteru, semanu e manumalo le tiapolo i le lulūina o ia e pei o le saito (Luka 22:31-32, 39-46). Afai o oe o se kerisiano, e tatau ona e saili malosi i le nofoaga o tatalo ina ia e tulai pea i taimi o faaosoosoga. Fai mai le Faataoto 24:10 afai ‘e te fa‘avaivai i le aso vale, ‘ua itiiti lava lou malosi. O tagata e momoe i taimi e tatau ona tatalo ai, e faavaivai i aso vale aua foi e lei faatupuina lona malosi i aso o le filemu. O soo se tagata soifua e iai le aso e feagai ai ma luitau. Na feagai Iesu ma ona luitau i Kolokota, peitai sa saunia lelei o ia mo lea aso. Ae lei faasatauroina o ia, na tatalo malosi seia oo ina afu toto o ia (Luka 22:44). Ina ua faalataina o ia e Iuta, faafiti Peteru ia te ia ma tuulafoaiina o ia e ona soo, na tali mai o ia i le alofa ma le agalelei. E oo i le taimi na faasatauro ai, na ia ole atu i le Atua e faamagalo i latou na faasatauro ia te ia (Luka 22:34). Ua na o se tagata ua faatupuina lona malosi faaleagaga i aso o le filemu e mafai ona tali atu e pei o Iesu i aso vale. Le au pele e, e te iloa le mafuaaga na faamalosi atu ai Paulo e tatalo e lē aunoa i le 1 Tesalonia 5:17? Aua foi e iai lo tatou fili e lē malolo, le tiapolo e faaosooso ia te oe e lē aunoa. Peitai, o se kerisiano tatalo e avatu ai le malosiaga e faamautinoa ai e lē faateia pe a oo mai faaosoosoga. E pei o le au aposetolo i le Galuega 6:4, ia e mataala ma toaga e tatalo. Ia faaauau pea ona faamalosi oe e le Atua matautia, i le suafa o Iesu, Amene.

OPEN HEAVENSMATALA LE LAGI MO LE ASO TOONAI 1 AOKUSO 2026(tusia e Pastor EA Adeboye) Manatu Autu: Manumalo i faaosoosoga 2 (Overcoming temptations 2) Tauloto Tusi Paia: Efeso 6:16-17 “Ia fa‘aopoopo i na mea uma ‘ona tago atu i le talipupuni o le fa‘atuatua, tou te mafai ai ‘ona tinei o ū fanafana mū uma lava, a lē o lo‘o leaga. Ma ‘ia ‘outou ‘ave le puloutau o le fa‘aolataga, ma le pelu a le Agaga, o le afioga lea a le Atua.”Faitauga - Tusi Paia: Salamo 119:9-17O se kerisiano na te lē su’esu’e I le Tusi Paia e lē aunoa e lē iloa le ala tonu e tali atu ai i faaosoosoga, ma o lea, e pa’ū pea o ia i taimi uma i le agasala. Ou te iloa lenei tulaga auā na manumalō Iesu i faaosoosoga uma a le tiapolo i lona taulotoina o Afioga Paia a le Atua (Luka 4:1-12). Mai la tatou upu tauloto o le asō tatou te iloa ai e le gata i le faatuatua ma le faaolataga, e manaomia fo’i e le kerisiano ona ia tauave le pelu o le Agaga, o le upu lea a le Atua. Soose kerisiano na te lē su’esu’e i lana Tusi Paia i taimi uma o se fitafita lea e leai se pelu. O le upu a le Atua o se auupega malosi e tau ai ma tete’e atu ai fo’i i faaosoosoga a le fili e tauai mai ia te oe. Fai mai Tavita i le Salamo 119:11; Ua ou teu i lo’u loto lau afioga, ina ne’i o’u agasala ia te oe. O le fuaiupu ua taua i luga ua ta’u mai ai ia i tatou a e mana’o e faatoilalo le agasala e tatau ona fa’atumulia le loto o le tagata i le upu a le Atua, o lea, e tatau ai ona e su’esu’e pea lava pea I Afioga Paia a le Atua ma mafaufau i ai i taimi uma. O le soifua e tusa ma le upu a le Atua e vavae’eseina ai i tatou mai le lalolagi ma avea i tatou o ipu ua faapaiaina mo le Atua (Ioane 17:17). Faapei ona e su’esu’e pea i le upu a le Atua ma usitai i ai, o le a e iloa ai o mea a le lalolagi sa masani ona fa’asesēina oe ua e le toe tosina i ai. A sau le tiapolo ma faaosooso ia te oe o le a mafai ona e tali; “Ua tusia” ona alu ese ai lea o le tiapolo mo se taimi umi e le toe sōsō atu ia te oe. O le upu a le Atua e fa’amalosia oe e te iloa lelei ai mailei a le fili ma e manumalō ai. O le tele o lou faatumu o oe lava i le upu a le Atua o le tele lea o lou malosi e fa’asagatau ai i osofaiga a le fili. Fai mai le Faataoto 1:17; auā e fofola fua se upega a ua iloa e se manulele. E faapei ona le ta’ita’i ulufale se manulele i se upega ua ia iloa na fofola e pu’e ai ma faaumatia ia, o le upu a le Atua o le a e poto ai ma mataala e vaai ma iloa mailei a le tiapolo. O lau ato manumalō e fa’ato’ilalo ai togafiti a satani. Aua e te tuulafoaiina au auupega o le manumalō, suesue lau Tusi Paia i taimi uma. Iloa le upu a le Atua faatatau i vaega ta’itasi o lou soifua, a o’o ina taumafai le tiapolo e faasesē oe i soose vaega, o le a e iloa tonu le upu ua tusia faatatau i lea mailei ma mafai ona faaaoga lea auupega e pupuni ai le leo o le fili. I lea taimi o le a le toe i ai se malosiaga o le agasala e manumalō ai ia te oe. O le upu a le Atua o lou talitā ma lau ato manumalō i faaosoosoga. I le suafa o Iesu. Amene.

OPEN HEAVENSMATALA LE LAGI MO LE ASO FARAILE 31 IULAI 2026(tusia e Pastor EA Adeboye) Manatu Autu: Manumalo i faaosoosoga 1 (Overcoming temptations 1) Tauloto Tusi Paia: 2 Peteru 3:18 “A ‘ia tutupu ‘outou i le alofa tunoa ma le poto i lo tatou Ali‘i, o lo tatou Fa‘aola lea o Iesu Keriso. ‘Ia ‘iā te ia le vi‘iga i ona po nei, ma ‘ia o‘o i le aso fa‘avavau. Amene.”Faitauga - Tusi Paia: Tito 2:11-12, Eperu 2:17-18O ananafi na ou talanoa atu i ala e te alo ese ai ma faaosoosoga i le alu ese lea ma tagata, o mea ma nofoaga e faaosoosoina ai oe ma sola ese  mai mea leaga eseese uma lava. Na ou faamamafa atu foi le mea moni, e faaosoosoina tagata uma e pei foi o Iesu na faaosoosoina i mea uma (Eperu 4:15). O le a ou faamatala atu i le asō ala e te manumalo ai i faaosoosoga e pei lava o Iesu na manumalo i faaosoosoga uma na oo mai i ona ala. O le mea muamua e tatau ona e maitau mai, e lē faatagaina e le Atua lou faaosoosoina e sili atu i le mea e te lavātia, “Ua lē maua ‘outou e se tofotofoga e ‘ese i lo tagata; a ‘ua fa‘amaoni le Atua, o lē na te lē tu‘uina atu ‘outou i le tofotofoga e sili i se mea ‘ua ‘outou lavātia, ‘ae sauni fo‘i fa‘atasi ma le tofotofoga se mea e sao ai, ‘ina ‘ia ‘outou lavā ‘o‘ono.” 1 Korinito‬ ‭10‬:‭13‬ ‭A oo mai faaosoosoga ia te oe, e tatau ona e iloa o loo ia te oe le malosiaga e manaomia e manumalo ai. O le mafuaaga e toilalo ai tagata i faaosoosoga ona latou te lē faaaogaina le malosiaga ua maea saunia e le Atua mo i latou. E ave la latou faamuamua i mea feilafi o loo faaosoosoina ai i latou e le tiapolo, ae lē faaaogaina le malosi ma le alofa tunoa ua saunia ma foai e le Atua iai latou, e manumalo ai i ia faaosoosoga. Na sau se tagata o le Atua ia te a’u ma faapea mai, ‘Tamā, ou te leiloa pe aisea ou te toilalo ai pea i le mulilua ma nisi o teine o le ekalesia. E masani lava ona ou leiloa se mea seia oo ina maea ona faatino’. Na ou tali atu ia te ia e faapea, ‘ae lei amata ona e tago e tatala lou ofu, o loo e iloa lelei lava e sese lau mea o le a faia, sa tatau ona taofi loa peitai ua taulai lau vaai i le suamalie ua faalala atu e le tiapolo i ou luma, ua e lē fia faalogo ai i le leo o Agaga Paia o loo fai atu ia te oe e aua le faia. E iai taimi e te lokaina ai le faitotoa e faamautinoaina ai, tusa pe auina atu e le Atua se tagata e taofia oe, o le a lē mafai. O le mafuaaga lena e te toilalo ai pea. Faalogo lelei i le leo o Agaga Paia pe a faiatu, taofi, aua le faia’. Le au pele e, faaaoga le alofa tunoa ua saunia e le Atua mo lana fanau e taofia i tatou mai le toilalo i faaosoosoga. E iai lava le ala e alu ese ai ma faaosoosoga, faalogo ia Agaga Paia, ma faaaoga le ala ua ia faaali atu ia te oe. Aua e te faatagaina le tiapolo e manumalo i lou agaga. Ia e faaaoga i taimi uma le alofa tunoa ua saunia e le Atua mo oe e manumalo ai i faaosoosoga, i le suafa o Iesu, Amene. 

OPEN HEAVENSMATALA LE LAGI MO LE ASO TOFI 30 IULAI 2026(tusia e Pastor EA Adeboye) Manatu Autu: Alo ese mai faaosoosoga (Avoiding temptation) Tauloto Tusi Paia: 1 Tesalonia 5:22 “Ia mamao ‘outou ma mea leaga ‘ese‘ese uma lava.”Faitauga - Tusi Paia: Iakopo 1:12-16 E oo tagata uma i faaosoosoga i soo se vaega o latou olaga. E oo ia Iesu Keriso na faaosoosoina i soo se itu, a’o iai i le lalolagi ( Eperu 4:15). Afai e mafai e le tiapolo ona faaosooso Iesu, e leai seisi e sao mai faaosoosoga. E ui i lea, e iai faaosoosoga e mafai ona alo ese ai. Fai mai le Iakopo 1:13-15 “A fa‘aosoosoina se tasi, ‘aua le fa‘apea, “‘Ua fa‘aosoosoina a‘u mai le Atua.” Auā e lē mafai ‘ona fa‘aosoosoina o le Atua i mea leaga, e lē fa‘aosooso atu fo‘i o ia i se tasi; Pe a tō le tu‘inanau ‘ona fānau mai ai lea o le agasala; a matua le agasala ‘ona fānaua mai ai lea o le oti.”O lona uiga afai o iai le tuinanau i lou olaga, e tatau ona e manumalo ai, aua a leai, e mafai ona taitaina oe i le agasala ma o le agasala e oo mai ai le oti. O le filifili i le ola, e tatau ona e faatoilaloina galuega o le tino i le fesoasoani a Agaga Paia (Kolose 3:5). Peitai ao e faatoilaloina galuega o le tino i le fesoasoani a Agaga Paia, e tatau ona e alo ese mai tagata, nofoaga ma soo se mea e faaosoosoina oe. Mo se faataitaiga, afai o se tagata e na te iloa e faaosoosoina gofie i le tupe, e lē tatau ona ia talia ma tauave tiute e vaaia tupe a isi tagata seiloga e mafai ona ia faatoilaloina le tuinanau o le tupe e ala i le fesoasoani a Agaga Paia. Le au pele e, o le faaosoosoga e pei o se manulele, e mafai ona lele i luga atu o lou ulu ma e te ono lē mafai ona taofia. Peitai e mafai ona e taofia le faia o sona faamoega i luga o lou ulu. Afai e te faatagaina e faia se faamoega i luga o lou ulu, e lē umi se taimi ae faatumulia lou ulu i leaga o le manu (tulou). O le mafuaaga lea e sili atu lava lou savali ese mai ia tulaga poo mea e ono faaosoosoina oe, aua foi a e talia faaosoosoga, e lē umi se taimi ae e iloa, ua pule i lou olaga. I se vaitau ao maua ma feoai faifeau sa ou vaaia i uila afi, na ou faasāina ona latou avea ni tamaitai i luga o uila afi. Aua foi e latalata tino pe a malaga faatasi i luga o uila afi, e ono totoina ni fatu i o la loto, e ono tupu mai ai se tulaga lamatia i le lumanai. O loo faatonu mai le tauloto mai le Tusi Paia iai tatou ia mamao ese mai mea leaga eseese uma lava. Atalii poo le afafine o le Atua, sola vave ese, mai soo se mea e ono faaosoosoina ai oe. Sola ese mai mea leaga ‘ese‘ese uma lava, i le suafa o Iesu, Amene. 

OPEN HEAVENSMATALA LE LAGI MO LE ASO LULU 29 IULAI 2026(tusia e Pastor EA Adeboye) Manatu Autu: O le lepa afi (The lake of fire) Tauloto Tusi Paia: Faaaliga 20:15 “Ai se tasi ‘ua iloa ‘ua lē tusia i le tusi o le ola, ‘ua lafoina lea i le lepa afi.”Faitauga - Tusi Paia: Faaaliga 21: 8, 26-27Na matua faateia a’u ina ua ou faalogo o fai mai se tagata i le tele o tausaga talu ai, ua sauni o ia e alu i seoli. Na ia fai mai foi e manao e alu ma ave lo’u tamā faaleagaga, o a’u ma se tasi tagata. O le tulaga e pito matautia, o lenei tagata o se faifeau toeaina i totonu o le Ekalesia i lea taimi. O loo lisi mai e le faitauga mai le Tusi Paia o le asō ituaiga tagata o loo sauniuni atu e avea le lepa afi ma o latou nofoaga moni. O nei tagata e latou te ono iloa le Atua ma vaai i ana galuega matautia mai lea taimi i lea taimi, peitai latou te filifili e ola i se ituaiga olaga e tetee i ala o le Atua. E ono lē mafai ona ou talanoa auiliili atu i ia ituaiga tagata taitasi peitai o le a ou talanoa atu i nisi o ia tagata. O loo iai tagata e matua fefefe e faailoa ma tauave le suafa o Iesu, o lona uiga latou te faafiti ia te ia i luma o tagata. I le Mataio 10:33, na fetalai Iesu e na te faafiti foi iai latou i luma o lona Tamā. E iai foi tagata e lē talitonu e iai se Atua. Fai mai e lē talitonu i se Atua, peitai e lē moni aua foi i le ogatotonu o latou loto, latou te iloa e iai le Atua. E valaau le Atua iai latou mai lea taimi i lea taimi, ma e latou te lagona o loo pai atu le Atua. Peitai e latou te filifili e lē talitonu ia te ia. E lē fia faalogo pe suesue i le Tusi Paia aua foi latou te lē fia talitonu iai. E iai foi leisi ituaiga o tagata e latou te faia mea e inosia i luma o le Atua, o fasioti tagata, faitaaga ma le mulilua. O tagata uma e filifili e ola i ia ituaiga olaga e ō i seoli pe afai e lē salamo. Tusa poo le a le foliga mai o ni tagata paia, o lo latou nofoaga tumau o le lepa afi. E faapena foi i latou o loo auauna i le tiapolo e pei o taulaitu, ifo i tupua, talitonu i Atua ese ma ē ei faapotopotoga faalilolilo e faia le amioleaga, e i’u uma lava i latou i le lepa afi. Mulimuli, o ē pepelo e maua foi i le iuga e tasi, e iu uma lava i le lepa afi. Le au pele e, ou te manao e te tago e suesue lelei lou olaga, a e iloa e te lavea i se tasi o ituaiga tagata o loo lisi mai i le faitauga mai le Tusi Paia o le asō, ou te faatauanau atu ia te oe, salamo nei ma sui loa le ituaiga olaga e te soifua ai aua foi o le lepa afi o se nofoaga e matautia faanoanoaga ma tigā. Ou te tatalo a afio mai Iesu i le lalolagi, o le a ta ulufale faatasi atu ma Ia i le parataiso, i le suafa o Iesu. Ia e faia mea uma lava ia aua lava nei e i’u i le lepa afi, i le suafa o Iesu, Amene. 

OPEN HEAVENSMATALA LE LAGI MO LE ASO LUA 28 IULAI 2026(tusia e Pastor EA Adeboye) Manatu Autu: Nofoaga i le lagi (Heavenly home) Tauloto Tusi Paia: Ioane 14:3 “Āfai fo‘i ‘ou te alu ma sauni se mea e nonofo ai ‘outou, ‘ou te toe sau, ‘ou te talia fo‘i ‘outou ‘ia fa‘atasi ma a‘u; ‘ina ‘ia i ai ‘outou i le mea ‘ou te i ai a‘u.”Faitauga - Tusi Paia: Faaaliga 21:1-11O ananafi na ou faamatalaina ai nisi tagata e latou te manatu o le lalolagi o lo latou nofoaga mau. Ae e iai foi seisi vaega o tagata e taulai la latou vaai i le lagi o lo latou nofoaga mau ma e ola i le lalolagi nei ina ia mautinoa e oo i le lagi. O au o se tasi o ia tagata. Na ou fai atu foi ananafi o le lalolagi ma mea uma o iai e gata, e lē tumau. I le Faaaliga 21:1, fai mai le Tusi Paia  o le lalolagi lenei e mavae atu, ona fai mai lea o le fuaiupu lona 2 e faapea:“Na ‘ou iloa fo‘i le ‘a‘ai pa‘ia, o Ierusalema fou, ‘ua alu ifo mai le Atua i le lagi, ‘ua saunia pei o se fa‘ato‘ānofotane ‘ua teuteuina mo lana tane.”O le fuaitau o loo taua i luga e tatou te malamalama ai, e mavae atu le lalolagi, ao tagata na tumau le faamaoni ia Iesu Keriso, le tane a le Ekalesia, o le a o atu i le Ierusalema fou, ua alu ifo mai le Atua i le lagi. A e faitau i le Tusi Paia faitau o le asō, o le a e iloa ai, o kerisiano moni, o le a latou mafuta ma le Atua i le aai e tasi  ma iai ma ia i taimi uma. O le a lē toe iai se faanoanoaga poo se loimata maligi mo i tatou e faavavau. O le mafuaaga lea ou te le manatu ai i mea ua ou fai taulaga ai ae ia ou alu i le lagi. Aua foi ou te iloa lelei, a ou oo iai, o le ou maua le olioli e faavavau. E moni fai mai le Roma 8:35-39, o le a leai se mea e na te faate’aeseina i tatou mai le alofa o le Tamā, ma ou te matua naunau e mafuta e faavavau ma ia. E lē o sou nofoaga le lalolagi, o lona uiga e leai se mea e sili atu i lou alu i le lagi. A vaai mai tagata o loo faaauau a’u tatalo ma savali solo i lou matua ua iai nei, malaga i soo se nofoaga e lauga ai, foai i e matitiva, faaalu lou taimi ma mea uma ia te a’u mo le Atua, e latou te lē iloa pe malamalama, ae o loo ou faaputuina oa mo a’u i le lagi aua foi o le nofoaga moni lea ou te iai e faavavau. Ua faaalia mai ia te a’u ni nai faaaliga o le lagi i ni nai taimi. O soo se tagata ua oo i le matagofie o le lagi e lē toe fia alu i seisi lava nofoaga aua o le mamalu o le Atua o le a faamalamalamaina le aai, ma o le tamai mamoe o le malamalama lea i totonu ( Faaaliga 21:23). Le au pele e, ia e faia mea uma e te mafaia e faamautinoaina e te maua le lagi. Ou te tatalo ia ou fetaui ma vaai ia te oe i le lagi, i le suafa o Iesu, Amene. 

OPEN HEAVENSMATALA LE LAGI MO LE ASO GAFUA 27 IULAI 2026(tusia e Pastor EA Adeboye) Manatu Autu: Nofoaga i le lalolagi (Earthly home) Tauloto Tusi Paia: 2 Korinito 4:18 “O lo‘o matou lē mānatunatu i mea ‘ua va‘aia, a o mea e lē va‘aia; auā o mea ‘ua va‘aia e gata mai ia, a o mea e lē va‘aia e fa‘avavau ia.”Faitauga - Tusi Paia: Isaia 24:1-6E toatele tagata o loo ola i le olaga nei e pei o le lalolagi lo latou nofoaga e faavavau. O ia tagata e taulai le vaai i le tau o le faaputu o le oa i le lalolagi nei ma latou faamuamua ma tapuai i nei mea i le tino. Mo i latou, o mea o loo latou vaai atu iai ma umia e sili atu na taua i lo seisi lava mea. E naunau e feoai i taavale pito taugata, nonofo i fale tetele, aai i meaai mananaia tele ma faaputu tupe e faaaoga ai soo se auala. E pau le tulaga e faamuamua, o nei mea lē aoga ma e leai seisi mea e taua iai latou. O loo ta’u mai iai tatou e le Iakopo 4:4 o lē fefa‘auōa‘i ma le lalolagi o le ita lea i le Atua. O lona uiga o soo se tagata e manao ma naunau i mea o le lalolagi nei e sili atu i lō seisi lava mea, ma naunau e faia soo se mea e maua ai le oa, o ia o sē ita i le Atua. O le fuaitau lava lea e tasi, e faatatau foi i le tagata faitaaga pe mulilua. Aua foi o tatou kerisiano, o le Atua o Lē na faia i tatou, o le tane iai tatou(Isaia 54:5) ma o Ia e ona i tatou. O lona uiga, afai e manumalo se tagata poo se mea e aveesea o tatou loto mai la tatou tane, o loo tatou faia le mulilua. Le au pele e, ou te manao e te faitauina lelei le tauloto mai le Tusi Paia o le asō ma ia e taulotoina. Ou te fiafia pe afai e te faaaogaina o se Upu e taitaia oe aua foi e taua lou iloa, o mea uma o loo e vaai atu iai, e lē tumau, e gata. Mo se faataitaiga, o taavale sa feilafi ma taua i le 10 tausaga talu ai ua lē taulia i nei aso. E faapena foi le telefoni i tausaga e sefulu tausaga talu ai. O mea o le lalolagi nei e nā o sina taimi ma e leai sona aoga i le ola e faavavau. Peitai e faaaoga e le tiapolo nei mea o se mailei e faalavelave i tagata mai le faia o mea e aoga ma maua ai taui i le ola e faavavau. Mo se faataitaiga, o nisi e tamaitai talavou ua maileia atu e le faitaaga ona o le mananao i telefoni ma ofu taugata. Ua latou fesuiai lo latou teine muli ia maua ni mea ma oloa, ma e lē toe maua mai. Ua manatu o mea uma ua maua mai e aogā peitai e mafai ona leiloa aua e gata.Afafine poo le atalii o le Atua, faalogo lelei i upu a Iesu i le Mareko 8:36-37. E leai se mea i le lalolagi i le asō e taua atu i lou agaga, ma e leai se mea e sili ona taua ae leiloa ai lou agaga i seoli. Aua nei e talitonu i pepelo a le tiapolo, faamuamua ma taulai lau vaai i le Atua ma lona malo ae lē o mea o le lalolagi. O le lalolagi e lē o sou nofoaga moni, ua nā o se nofoga o loo e ui atu ai. TataloTamā, faamolemole fesoasoani mai ia te a’u ia taulai lau vaai ia tau o oe lava, ae lē o mea o le lalolagi nei, i le suafa o Iesu, Amene. 

OPEN HEAVENSMATALA LE LAGI MO LE ASO SA 26 IULAI 2026(tusia e Pastor EA Adeboye) Manatu Autu: E na te tauina taua mo oe (He fights your battles) Tauloto Tusi Paia: Esoto 15:3 “O le ALI‘I, o le toa lava ia, o le ALI‘I o lona suafa lea.”Faitauga - Tusi Paia: Teuteronome 20:1-4Ou te vivii lava i le Atua i taimi uma, ma e tele mafuaaga ou te faia ai ma e faaauau pea ona ou faia. O se tasi o mafuaaga ou te vivii ai pea i le Atua matautia aua e na te tauina taua mo a’u. O ia o le Toa Matautia e pei ona tusia i le tauloto mai le Tusi Paia o le asō. Ao avea a’u ma faiaoga i se Iunivesite i Nigeria i Aferika, e masani ona ou sau i le fale i taimi o malologa ou te ai ma malolo ona ou toe alu ai lea i a’u vasega o le afiafi. I se tasi aoauli, ina ua maea lau meaai o le aoauli, ona ou taoto lea i le nofoa i le potu malolo mo sina malologa. I lea vaitau, sa ou galue o se faifeau i se tasi aulotu ma e toatele tagata e o mai ma o atu i lo’u potu malolo. Ou te iloa a vaai mai tagata o moeiini ou mata o le a lē faalavelave mai, o lea na moeiini ou mata ma tuu ou lima i lalo o lou ulu e pei o se aluga. Na faafuasei ona sau se tagata i totonu o le potu malolo, uumau ou lima ma vae, tatao ma taumafai e sogi mai. Ose tagata e mafai ona faia lea tulaga e tatau ona umī, o lona uiga e lē o lo’u toalua. Na pupula ou mata ae nimo ese le temoni. Na maluluina uma lo’u tino. Ua ou tu i luga, oso i totonu o la’u taavale ma alu atu i le Iunivesite mo lau vasega o le afiafi. E lei leva ona uma lau vasega ae amata ona puai ma tatā le manava (tulou). Ina ua ou oo atu i le fale, na ou tolotolo i le fale ona o le vaivai o lo’u tino. Na ou faapea atu, ‘Tamā, o le a lenei mea? O a’u o lou atalii. Aisea ua tupu ai lenei mea ia te a’u?’ Na tali le Atua, ‘atalii, na ou manao e te vaai ma iloa sina vaega o taua o loo ou tauina mo oe’. E toatele tagata e manatu o loo soifua i le taimi nei ona o lo latou poto. Peitai, ana faataga e le Atua latou te tofo i sina vaega o taua o loo ia tauina mo latou i aso uma, semanu latou te iloa o loo soifua ona o le alofa tunoa o le Atua. Le au pele e, o loo e soifua i le asō, e lē faapea ona o ni mea ua e faia, ae ona o loo tauina e le Atua taua mo oe. O le mafuaaga lea e tatau ai lava ona e faafetai i le Atua aua e lē moe pe tulemoe o ia (Salamo  121:4) ma o le mafuaaga lena e na te tauina ai taua mo oe ao e moe. TataloTamā, faafetai mo lou tauaina o taua mo a’u, i le suafa o Iesu, Amene. 

OPEN HEAVENSMATALA LE LAGI MO LE ASO SATURDAY 25 IULAI 2026(tusia e Pastor EA Adeboye) Manatu Autu: Fa’amuamua Le Atua (Put God First) Tauloto Tusi Paia: Salamo 16:8 “Ou te tu‘u le ALI‘I i o‘u luma e lē aunoa; auā o i lo‘u itū taumatau o ia, e le fa‘agae‘etia ai lava a‘u.”Faitauga - Tusi Paia: 1 Tupu 17:8-16O le tasi o auala e mafai ai e le kerisiano ona fa’asao ma fa’atumauina lo latou tulaga o fanau a le Atua, o le faamuamua o Ia I mea uma. I le Kenese 22:1-18 na saili ai e le Atua Aperamo se’i ona silafia po o ai e sili ona tāua I lona soifua; po o le meaalofa a le Atua mo ia (Isaako) po o le na foaiina mai le meaalofa (o le Atua). Na fetalai le Atua ia Aperamo e ave lona atalii e toatasi e osi ai le taulaga ma, na pasi le suega a Aperamo. Na fa’amuamua e Aperamo le Atua ma filifili e usita’i ia te Ia. Na iloa e Aperamo o le Atua o lē na feliuaina lona tino ua oti, ia fanau mai ai se atalii, na te mafaia fo’i ona toe fa’atūina mai lona atalii mai le oti (Eperu 11:17-19). Ina ua fa’amalieina e Aperamo le finagalo o le Atua, na folafola e le Atua Silisili ese na te matua’i fa’ateleina lana fanau, ma o le asō e mafai ona maua le fanau a Aperamo i soose itu o le lalolagi. A e faamuamua le Atua o le a ia tofia faapitoa oe mo ana vavega mata’utia. I le tusi faitau mai le Tusi Paia o le asō na fetaia’i se tagata o le Atua ma se fafine ua oti lana tane ma ole atu ia te ia mo se meaai. Na tali le fafine ua oti lana tane, ua na o le lu’utaga o falaoa i le kate ma sina suāu’u itiiti i le fagu na o i laua ma si ana tama e lava ai mo se la aiga mulimuli ona la oti lea. Peita’i na avatu e le fafine le meaai e tausami ai le tagata o le Atua ma, i le taimi atoa seia o’o ina uma le oge, na maua pea meaai a le fafine ma lana tama e le’i matelaina pe galala i lā’ua. I le Luka 4:25-26 ua ta’u mai e le Tusi Paia ia i tatou sa toatele fafine ua oti a latou tane i le nuu o Isaraelu e mafai ona auina atu i ai Elia le perofeta i lea taimi. Peita’i ou te talitonu na tofia faapitoa le tinā lenei e le Atua mo lana tausiga e le gata auā na ia silafia e faamuamua e le fafine lona Atua. O le tasi auala e te fa’amuamua ai le Atua i lou olaga o lou avatu ia te Ia o ulua’i fua o au seleselega. Ou te ofo i nisi tagata e faigata ona ofo a latou ulua’i seleselega i le Atua. I le Faataoto 3: 9-10; ua fetalai le Atua a e ava ia te Ia i au ulua’i fua, ona tutumu ai lea o ou fale saito i le mau e feosofi fo’i au tu’ugauaina i le uaina fou. E lē mafai ona e faamuamua le Atua i au tupe ae e ola mativa pe tau fa’asoasoa. Tau lava o lou fai fa’apei ona fetalai mai le Atua ma tu’u atu ia te ia ou manaoga uma ma isi vaega o totoe. O le isi auala e fa’amuamua ai le Atua o le fa’ataua ma tausisi o ana poloaiga. O le tasi mea aupito tāua i le Atua o le fa’aolaina o agaga. I le Luka 19:10; na fetalai Iesu na afio mai e saili ma fa’aola i le na leiloa. O le manumalōina o agaga ma fai ma so’o e tāua i le Atua o lea la e tatau fo’i ona taua ia te oe. Le au pele e, ta’u atu i nisi faatatau ia Iesu i le asō ma avea oe o se tasi e fa’amalosi’au e lē aunoa i lo latou tutupu fa’aleagaga. Alu i ni maila faaopopo e fa’amautinoa o mulimuli se isi uso ia Iesu ona faapitoa lea ona tusi aao le Atua ia te oe mo ana vavega mata’utia. I le suafa o Iesu, Amene.

OPEN HEAVENSMATALA LE LAGI MO LE ASO FARAILE 24  IULAI 2026(tusia e Pastor EA Adeboye) Manatu Autu: Faatumauina o lou saolotoga 2 (Sustaining your freedom 2) Tauloto Tusi Paia: Salamo 100:2 “Ia ‘outou ‘au‘auna atu i le ALI‘I ma le fiafia; ō mai ia ‘outou i ona luma ma le ‘alaga fiafia.”Faitauga - Tusi Paia: Luka 17:12-19O ananafi, na ou talanoa atu i le auala e faatumauina ai e se tagata lona saolotoga, o le vivii lea i le Atua. O le asō, o le a ou talanoa atu i le faafetai, tapuaiga faifaipea ma le galue punouai i le Alii, o laasaga e tatau i se tagata ona faia e faatumauina lona saolotoga. I le faitauga mai le Tusi Paia o le asō, na alalaga atu lepela e toasefulu ia Iesu mo lona alofa mutimutivale, ona ia faatonuina lea o i latou e o e vaai le ositaulaga sili. Ao agai atu, na latou iloa, ua malolō i latou, peitai e na o le toatasi le tagata na toe foi e faafetai ia Iesu. Na toe foi atu i le pese ma viiga ma le leo tele e viia ai le Atua. E lei maasiasi e avatu le viiga ma le faafetai i le Atua, o le taui, na avatu ia te ia seisi vavega, ua maloloina atoatoa. E iai se muagagana faa Aferika e faapea o se tamaitiiti e loto faafetai i meaalofa e maua i le asō, e mautinoa e tele atu isi meaalofa e maua i le lumanai. A e avatu le faafetai i le Atua matautia mo mea uma ua ia faia mo oe, ua faatulagaina foi lou tagata e maua atili mai ia te ia. O le vivii i le Atua faifai pea e avea ma masani, o seisi laasaga lea i le faatumauina o le faasaolotoina moni. I le 2 Tupu 5:1-7, na faasaoloto e le Atua Naamanu mai le avega mamafa o le lepela. Ina ua maea ona faamaloloina, na fai le faaiuga a Naamanu e na o le Atua Matautia o le a ia tapuai iai i lona olaga atoa, ma ou te mautinoa na faatumauina lona faasaolotoina e lē toe suia. E tatau foi ona faia sau faaiuga o le a e tapuai, ua nā o le Atua lava i lou olaga atoa. E tatau foi ona faaavanoaina se nofoaga e te tapuai ma mafuta ai i le Atua o se masani i aso uma, e lē faailogaina lona tele poo fea. Ou te manatua sa iai se taimi e pau le nofoaga e mafai ai ona ou tapuai i le Atua e aunoa ma se faalavelave, o le fale lē taua. E tatau foi ona faamautinoa e saunia lou loto e tapuai ia te ia i taimi uma. O seisi ki e faatumauina ai le saolotoga, o le auauna faamaoni i le Atua ma lou loto atoa. A aveese e le Atua avega a se tagata, e tatau i lea tagata ona auauna i le Alii ma lona loto atoa ma faamaoni i le nofoaga o galue ai. I le Mareko 5:1-20 ina ua faasaolotoina e Iesu le tamaloa i Katara, na ia faatonuina e alu e talai i ana uo. A lafoai lou ola o se mea faigaluega i aao o le Atua e faalauteleina lona malo, e le mafai e le tiapolo ona toe ulufia oe. Ou te tatalo ao e faafetai  tele i le Atua Malosi, tapuai faifaipea ma auauna ia te ia ma lou loto atoa, e na te faasaoina mea uma o loo e manumalo ai ma faatupuina pea faamanuiaga i lou olaga, i le suafa o Iesu. TataloTamā, faamolemole fesoasoani mai ia te a’u ia ou maua se loto e faafetai ia te oe ia faifaipea ma auauna ia te oe ma le loto atoa i aso uma o lo’u ola, i le suafa o Iesu, Amene. 

OPEN HEAVENSMATALA LE LAGI MO LE ASO TOFI 23  IULAI 2026(tusia e Pastor EA Adeboye) Manatu Autu: Faatumauina o lou saolotoga (Sustaining your freedom) Tauloto Tusi Paia: Salamo 9:2 “Ou te fiafia ma ‘ou ‘oli‘oli ‘iā te oe; ‘ou te pese lava i lou suafa, lē Silisili‘ese.”Faitauga - Tusi Paia: Salamo 149:1-9Afai o se tagata o loo i lalo o avega mamafa a satani ae valaau atu i le Atua mo se fesoasoani, e afio mai le Atua ma fesoasoani i lea tagata. Peitai a maea ona faia le faasaolotoga, e iai tulaga e tatau i lea tagata ona faia ma tumau ai ina ia aua lava nei toe tuua e satani ia te ia seisi avega e mamafa atu. Mo se faataitaiga, na faafofoga le Atua i le tagi atu o le fanauga a Isaraelu ao nofo pologa ai, na afio mai ma laveai iai latou (Esoto 3:7-9), peitai e iai laasaga e tatau ona latou faia e mautinoa ai e lē toe foi i le pologa i o latou matai Aikupito. O loo faamatala e le Mataio 12:43-45, afai e faasaolotoina se tagata mai le avega o le ulufia e temoni ae gaogao pea, e toe foi mai le avega e sili atu ona leaga, aua o le temoni na alu ese, o le a alu ma aumai isi temoni e fitu e sili atu ona leaga ma toe ulufia lea tagata ona sili atu lea ona leaga o lona iuga i lo le amataga. Ou te tatalo, o soo se vaega o lou olaga o loo manao le tiapolo e sili atu ona leaga le iuga i lo le amataga, ia faaleaogaina e le Atua matautia ana fuafuagaAfai e faasaolotoina se tagata mai avega, o le mea muamua e na te faia e tuli ese ai le fili ma faamautinoa e lē toe foi mai, o le vivii i le Atua ia faifai pea. O loo faamatala e le Galuega 3:8 le tala o le tamaloa pipili sa nofo i le nofoaga e taua o le ‘Faitotoa Matagofie’ o le malumalu. Ina ua asiasi atu le Atua ia te ia ma aveesea le avega o le tumau i le mea e tasi, mativa ma le maasiasi, ona amata lea ona savali, osooso ma vivii i le Atua e aunoa ma se manatu poo ai o tilotilo atu. O lea tagata na fanau mai o pipili, ma i le taimi na faamalolo ai, ua sili atu ma le 40 ona tausaga (Galuega 4:22). O lona uiga sa fesiitai mai lea nofoaga i leisi mo le 40 tausaga ma e lē mafai ona ulufale i le malumalu e aunoa ma le fesoasoani. E leiloa pe sa faia sana tatalo leoleoa e faapea, ‘Le Atua e, maimau pe ana iai ni ou vae ina ia mafai ona ou ulufale i le malumalu, siva ma vivii ia te oe aua e onomea ia te oe’. O le mafuaga lea na osooso ai ma vivii i le Atua ma le olioli tele ina ua faasaolotoina. Le au pele e, e lelei le Atua ia te oe?ua ia aveesea au avega? Vivii ia te ia ia faulai, i soo se mea ma soo se taimi. E pei ona tatou iloa mai le faitauga o le Tusi Paia o le asō, faatumu lou fofoga i ona viiga. Siva ma faaaoga mea faili e vivii ai ia te ia, aua e tatau ma onomea ia te ia le viiga. O le viiga o se auupega malosi e faatumauina lou manumalo ma le saolotoga, i le suafa o Iesu, Amene. 

OPEN HEAVENSMATALA LE LAGI MO LE ASO LULU 22  IULAI 2026(tusia e Pastor EA Adeboye) Manatu Autu: O ki i le saolotoga 3 (The keys to freedom 3) Tauloto Tusi Paia: Salamo 18:6 “Ona ‘ou vala‘au atu ai lea i le ALI‘I i lo‘u puapuagā, ma ‘ou ‘alaga atu i lo‘u Atua; na fa‘afofoga mai o ia i lona malumalu i lo‘u leo, na o‘o atu ‘iā te ia la‘u ‘alaga i ona lava fofoga.”Faitauga - Tusi Paia: Salamo 3:1-4I aso e lua ua mavae atu, na ou talanoa atu i laasaga e faia e soo se tagata o loo amo avega mamafa a le tiapolo ina ia faasaolotoina ai. O le asō, o le a faaiu atu lenei mataupu faasolo i le faamamafa lea o le mafuaaga e tatau ai e se tagata o loo i lalo o avega a le tiapolo ona alaga atu i le Atua mo le faasaolotoga. Ou te masani ona ou ofo pe a ou vaai i tagata e lē faatauaina le taimi o tatalo. O le faanoanoaga, o tagata faapea, o loo faamaimauina latou taimi, ma e seasea maua tali o latou tatalo. E leai se tagata, e oo iai latou o loo amo avega a le tiapolo e tatau ona faatalale pe a oo i taimi o tatalo. Aua foi e aoga tele le tatalo faatauanau a le tagata amiotonu (Iakopo 5:16), ae lē o le tatalo e na o le faataunuu. Mo se faataitaiga, i le Mareko 10:46-52, ana le alaga atu Patimaio ia Iesu mo se fesoasoani, semanu e tauaso pea. E faapena foi i le Mataio 15:21-28, ana le saili fesoasoani le fafine Kanana ia Iesu ma tumau i lana faatoga atu ia te Ia, semanu e lē faasaolotoina lana tama. O Tavita o se tagata e masani ona alaga atu i le Atua mo le manumalo pe a oo i taimi o taua. O le tele o taimi i ana Salamo, na ia tusia ai lona alaga ma tagi atu i le Atua mo le fesoasoani. Mo se faataitaiga i le Salamo 3:4, na ia tusia, “Na ‘ou vala‘au i le ALI‘I i lo‘u leo; ‘ua fa‘afofoga mai fo‘i o ia ‘iā te a‘u mai lona mauga pa‘ia.” E pei a ona valaau Tavita i le Alii ma lona leo, e tatau i soo se atalii poo se afafine o le Atua ona alaga atu ia te ia i soo se taimi o puapuaga. E leai se isi tagata e sili atu ona talafeagai e alaga atu mo oe, ua na o oe lava aua foi ua na o oe e sili ona aafia i le tulaga lea. O le mafuaaga lea e feoai ai tagata mai lea nofoaga i lea nofoaga e saili tagata e tatalo mo latou, o e tatalo atu i le Atua mo latou. O le mafuaaga lea e tumau ai i latou i saisaitiaga mo se taimi umi. I le tauloto mai le Tusi Paia i le asō, fai mai Tavita na ia valaau atu i le Atua ma alaga atu i lona puapuaga, ona faafofoga mai lea o le Atua i lona leo mai lona malumalu. E lē mafai ona pupuni fofoga o le Atua i se tagata o loo alaga atu ia te ia ma le loto momomo (Salamo 51:17). Le au pele e, e le tatau ona e faavaivai i le tatalo pe afai e taitaina oe e tatalo seia faafofoga mai le Atua, e tatau ona e totogiina le tau o le saolotoga i le nofoaga o tatalo. Ou te tatalo e vave ona tali atu le Atua ia te oe i soo se taimi e te alaga atu ai ia te ia, i le suafa o Iesu. O i latou e alaga atu i le Atua i taimi o puapuaga, e latou te maua lana faaolataga, i le suafa o Iesu, Amene. 

OPEN HEAVENSMATALA LE LAGI MO LE ASO LUA 21  IULAI 2026(tusia e Pastor EA Adeboye) Manatu Autu: O ki i le saolotoga 2 (The keys to freedom 2) Tauloto Tusi Paia: Teuteronome 30:15 “Fa‘auta mai, na ‘ou tu‘uina atu i ou luma i le aso nei o le ola ma le manuia, o le oti fo‘i ma le malaia;”Faitauga - Tusi Paia: Esoto 21:1-6O ananafi, na ou taua ai o le laasaga muamua e tatau ona faia e se tagata o loo i lalo o avega mamafa a satani ina ia saoloto mai lea saisaitiaga, o le tautino o loo iai se avega ma e manaomia le fesoasoani mai le Atua e aveesea ai. O le asō, o le a ou talanoa atu i le laasaga e sosoo ai e faia e tagata ina ia maua le manumalo. O le tautino e manaomia le fesoasoani, o le laasaga muamua lea e saoloto ai mai saisaitiaga a satani, o le laasaga lona lua o le naunau e talia le fesoasoani. I le Ioane 5:2-9, na fesili Iesu i se tamaloa sa ma’i mo le 38 tausaga, ‘e te fia malolo ea?’. E ono manatu se tagata e leai se mea e tau fesili ai fua i se tagata ua umi ona tigaina e fia malolo. Peitai na fesili Iesu i le fesili aua e lē o tagata uma e manaomia le fesoasoani, o nisi tagata e fiafia i latou avega ma e lē naunau e faasaoloto latou. O loo faaalia mai le faitauga o le Tusi Paia o le asō, a fiafia pologa i latou  noanoaga, e mafai e latou matai ona faailoga i latou o pologa mo le olaga atoa. Tusa poo le a le umi ona pologa le tagata, o le aso e filifili ai o ia e fia saoloto, o iina e faamau faailoga ai le amataga o lana malaga i le saolotoga. Mo se faataitaiga, o le aso na saili ai e le fafine puna toto ia Iesu i le Mataio 9:20-22, mo lona faasaolotoga, o le aso foi lea na tafiesea ai saisaitiaga o le 12 tausaga. E mafai e le Atua matautia ona faasaoloto soo se tagata o i lalo o avega mamafa a le tiapolo, e oo i se tagata o loo i le tafeaga (Isaia 49:24-26), peitai e tatau ona naunau ia faasaolotoina. Le au pele e, o soo se kerisiano o taalo i fiafiaga o le agasala, o loo i lalo o ia o saisaitiaga a le tiapolo ma o loo manino e lē fia saoloto. O soo se tagata e faapea mai o se kerisiano faatuatua ae uo pea ma tagata e faaosoosoina o ia e faia le agasala, o loo i lalo o ia i avega a satani ma e lē mafai ona saoloto seiloga e faia sana faaiuga e momotu ia mafutaga. E lē lava i se tagata le tau o le tautino e fia saoloto, e tatau ona faaalia lona naunau e saoloto i ana mea e faia. E tatau i lea tagata ona ola faapaiaina ma toaga e tatalo, fai ma masani le suesue le Tusi Paia ma mafuta ma isi kerisiano faatuatua. E finau ma tau le Atua mo i latou, ma foai atu iai le saolotoga atoatoa, i le suafa o Iesu, Amene. 

OPEN HEAVENSMATALA LE LAGI MO LE ASO GAFUA 20  IULAI 2026(tusia e Pastor EA Adeboye) Manatu Autu: O ki i le saolotoga 1 (The keys to freedom 1) Tauloto Tusi Paia: Salamo 72:12 “Auā e lavea‘i e ia o lē mativa i lona ‘alaga mai; ‘atoa ma lē ‘ua puapuagātia ma lē ‘ua leai sona fesoasoani.”Faitauga - Tusi Paia: Mareko 10:46-52E lē finagalo le Atua e iai se tagata i lalo o avega mamafa a satani. O le mafuaaga lea na fetalai ai Iesu, “Ia ‘outou ō mai ‘iā te a‘u, o ‘outou uma o ē tigāina ma mafatia i avega, o a‘u fo‘i e mālōlō ai ‘outou.” (Mataio‬ ‭11‬:‭28‬). E sili atu le mafai e le Atua ona gagau le amo o avega a le fili i soo se tagata (Isaia 10:27) peitai e tatau pea i tagata ona tautino e manaomia lona faasaolotoina. I tausaga e tele ua leva, na aumai e se tamaloa lana avā ia te au ma faapea, ‘Tamā, fesoasoani mai ia te au. O la’u avā o le taulaitu’. Na ou fesili i lana avā pe moni ae faafiti. Na ou fai iai afai o ia o se taulaitu, e mafai ona ou tatalo mo ia ona faasaolotoina lea. Peitai na finau pea e lē o ia o se taulaitu ma e lē manao e faia se galuega mo le faasa’olotoina. Ona ou tatalo lea e faapea, ‘afai e lē o oe o se taulaitu o le a e manuia pea, peitai afai o oe o se taulaitu, ou te saisaia soo se temoni o galue i totonu ia te oe, i le suafa o Iesu’. E tolu masinoa mulimuli ane, ua toe aumaia o ia ia te a’u ua fufula atoa le tino, ua faaluaina le tele o lona tino. O le temoni na ou saisaitia ua leaga i totonu o ia.O le laasaga muamua i soo se tagata o i lalo o avega a le tiapolo o le tautino lea e lea tagata o loo ia amoina se avega ma e fia saoloto. Seiloga lava e tautino e lea tagata, e lē mafai ona faasaolotoina. E faapena foi le tagata ua malie lava e tauave le ma’i, lagona nofo toatasi, pa, faanoanoaga poo le tigā, o le a faaauau ai pea ona nofo i lalo o avega a satani. I se taimi e lei leva atu, sa tale lava se tamaloa ma ua aumaia ia te a’u mo tatalo. Sa ou manatu ou te le fesili iai ae na o le tatalo, peitai ua ou faia ma masani le faia o fesili muamua. O lea na ou fesili iai, ‘lau susuga, o le a se mea ou te fesoasoani ai ia te oe?’ E ui o loo manino e ma’i, ae na ou fia iloa poo le a le mea e manao iai, e pei ona fesili Iesu ia Patimaio i le faitauga mai le Tusi Paia o le asō. Na ou ofo ina ua fai mai ou te tatalo ia alu ese lemu lona tale. Le au pele e, o e i lalo o avega a satani i soo se vaega o lou olaga? Tautino e te manaomia le fesoasoani a le Atua ma alaga atu ia te ia ia gagau eseina vave ma ia atoatoa. E vave mai o ia e fesoasoani ia te oe i le suafa matautia o Iesu. O le laasaga muamua i le maua o le saolotoga mai avega a le tiapolo, o le tautino e te manaomia le fesoasoani, i le suafa o Iesu, Amene. 

OPEN HEAVENSMATALA LE LAGI MO LE ASO SA 19  IULAI 2026(tusia e Pastor EA Adeboye) Manatu Autu: Faasaolotoga mai avega o galuega ma aoaoga (Deliverance from career and academic burdens) Tauloto Tusi Paia: Faataoto  4:18“A o le ala o ē amiotonu, e tusa ia ma le malamalama o le ao, o lo‘o tupu pea lona malamalama e o‘o i le totonu o le la.”Faitauga - Tusi Paia: Luka 5:1-7I le faitauga mai le Tusi Paia o le asō, sa fagota Peteru i le po atoa ae leai se i’a na maua. E manatu sa fememeai, ma ou te malamalama lelei i le tulaga sa iai aua ou te fiafia e fagota. E masani ona ou alu e fagota e malolo ai mai galuega, e iai taimi e na o le lima minute ae maua le i’a. Ae iai foi taimi e atoa le itula e leai ma se i’a e maua. Sa leai se aoga o le tautiga o Peteru i lea po, e le faapea sa lē galue malosi, ae ona ua lē ō gatasi mea uma ma ia. Ao ou faiaoga i le Iunivesite, sa iai se faasalalauga o se avanoa faigaluega i se kamupani ma sa talosaga iai se polofesa. Na valaaulia mai mo se faatalatalanoaga, ma ina ua taunuu atu i le nofoaga e faia ai, ua ia iloa o le taitaifono o le komiti e faia le faatalatalanoaga o se alii talavou na aoga ia te ia e lei leva ona faauu. Ina ua iloa atu e le polofesa o ia, na faamalulu iai e sesē le potu o loo iai. Peitai na faailoa iai e le alii talavou o loo sa’o lelei le potu. Na lagona le maasiasi tele o le polofesa ona e lē o le tulaga lea e tatau ona iai i lona olaga galue. O nisi tagata e lē manuia i latou galuega ma aoaoga ona e lē o le paie, ae ona o loo latou tauaveina ni avega mamafa o le tetee mai le tiapolo e taofia i latou mai le ausia o tulaga manuia. O ia tagata e lē taitai manuia tusa poo le a le taumafai. Peitai a afio mai iai Iesu, Lē tauave avega, e liliuina o latou tulaga mo le lelei. E iai se alii talavou na sau ia te a’u mo tatalo. Fai mai e tetee a lona pule ia te ia ona o lona faatuatuaga kerisiano. Na oo ina fai mai lona pule, e lē taitai siitia lona tulaga pe afai e pule pea o ia. Ona o lea tulaga, na tumau pea le tulaga e aunoa ma se siitaga i le ofisa. Na ma tatalo ma folafola i le suafa o Iesu o soo se mauga o loo polokaina lona ala mo siitaga, ia liaieseina. E lei leva, ae faasee atu lona pule i seisi lala, ona maua lea o le siitaga a lea alii talavou. E lei leva se taimi ae toe faafoi mai lana pule i le lala lea e iai le alii talavou, e oo ane i le taimi lea, ua tutusa la tulaga ma lana pule sa iai muamua. E na o le tasi le folafolaga na faia i le suafa o Lē tauave avega, na liliuina lona tulaga mo le lelei. Le au pele e, o e tumau pea i le tulaga e tasi i lau galuega poo lau aoga? Ou te folafola atu i le asō o soo se avega o le tetee mai i le tupu ma siitia o lau galuega ma le aoaoga, ia tafiesea i le suafa o Iesu. TataloLe Alii e, faamolemole faasaoloto ia te a’u mai soo se mea o tetee mai i lo’u olaga, i le suafa o Iesu, Amene. 

OPEN HEAVENSMATALA LE LAGI MO LE ASO TOONAI 18  IULAI 2026(tusia e Pastor EA Adeboye) Manatu Autu: Faasaolotoga mai avega i le agaga (Deliverance from spiritual burdens) Tauloto Tusi Paia: Ioane 8:36 “O lenei pe ā tu‘u sa‘oloto ‘outou e le Atali‘i, ‘ona sa‘oloto fa‘amaoni ai lea o ‘outou.”Faitauga - Tusi Paia: Mareko 1:23-27A’o soifua si o’u tinā, sa ou alu i se tasi aso e asi, ma sa ave ifo ai se tamā ia te a’u faapea ou te tatalo ai. Na fai mai le tamā ia te a’u na te manaomia le fesoasoani peita’i ou te vaai atu ia te ia, e leai ma se mea o faaletonu. Ina ua ia iloa mai ou foliga le mautonu, na faapea mai ia te a’u, “Silasila mai,” sa tago o ia i totonu o ona lauulu ma aumai I fafo se mogamoga (tulou). Na ia faapea mai, “ E lē o a’u o se taulaitu. Ua na ona o’u fa’aali atu o le ituaiga malaia i le agaga o ia te a’u. Sa ia toe tu’u ona tamatama’ilima i totonu o ona lauulu ma toe aumai i fafo se isi ituaiga iniseti. Ona ia fai mai lea ou te faalogo toto’a a’o ia tuu mai lona ogalima latalata i lo’u taliga, ma ou faalogoina ai le leo o se uila afi o fa’aolaola. Ina ua maea nei mea uma, sa ou fai i le tamā lenei e tu’u lona ola iā Iesu, ma sa faapea ona ia faia. Ona o’u tagi atu lea i le lavea’i sili e afio mai ma fa’aali lona mana i le faafitauli o le tamā ona alu ai lea o le uso. I le lua vaiaso mulimuli ane, na o’u toe alu ai e vaai lo’u tinā ae toe alu ifo ai le tagata lenei vaai a’u. I le taimi lea, ua olioli lava auā ua fa’asa’olotoina atoatoa o ia. Ua pupula ona foliga ma aulelei. Ou te faatonu afai o e tauaveina soose ituaiga o avega i le agaga, ua fa’asa’olotoina oe i le suafa o Iesu. O avega fa’aleagaga e eseese ala e omai ai, o nisi o auala e aofia ai sauaga, saisaitiaga, faapologaina ma ma’i temoni. Ua ta’u mai ia i tatou i le faitauga mai le Tusi Paia o le asō le tala i se tagata na fa’ataugāina e se temoni. Ina ua ia vaai atu iā Iesu, i totonu o le malumalu na alaga atu le agaga leaga i totonu ia te ia faapea; “Aue, Iesu e, le Nasareta e! se a lau na ia te i matou? Ua e maliu mai ea ia fano i matou? Ua o’u iloa oe, o le Paia o le Atua.” Ona vavao atu lea o Iesu i le agaga leaga ma tuli ia te ia i fafo mai le tagata sa ulutinoina. Tatou te lē iloa po o le a le umi na i ai lea alii i le pologa; peita’i ina ua la fetaia’i ma Iesu, na siitia ai ma gausia le avega fa’aleagaga sa ia tauaveina. Le au pele e, o e tauamoina se avega fa’aleagaga? O lua tauivi ea ma ni saisaitiaga po o ni sauaga faatemoni? Ou te mana’o e te silafia o Iesu le tauaveina avega e mafai ona siitia lau avega mai ou tauau. Pau lau mea e fai o le faaaloalo i lana valaaulia o loo i le Mataio 11:28. Ou te tatalo ia siitia e le na te tauaveina avega uma, soose ituaiga avega o i lou olaga po o olaga o e pele ia te oe i le asō i le suafa mamana o Iesu. Tatalo. Tamā faamolemole faaumatia so’ose taupulepulega a le tiapolo e fa’ae’e se avega fa’aleagaga i o’u luga poo luga o lo’u aiga, i le suafa o Iesu. Amene.

OPEN HEAVENSMATALA LE LAGI MO LE ASO FARAILE 17  IULAI 2026(tusia e Pastor EA Adeboye) Manatu Autu: Faasaolotoga mai avega o faaipoipoga (Deliverance from marital burdens) Tauloto Tusi Paia: Salamo 46:9 “Ua faaiua e ia o taua e o‘o lava i tulu‘iga o le lalolagi; ‘ua gagau e ia le ‘aufana ma vavae le tao; ‘ua susunuina fo‘i e ia kariota i le afi.”Faitauga - Tusi Paia: Ioane 2:1-11 O le asō, o le a ou talanoa atu i se tasi o avega, o le avega o faaipoipoga. E inoino satani i mea uma na faia e le Atua e aofia ai ma le faaipoipoga, o le mafuaaga lea e taumafai ai lava e faavevesi le faaipoipoga paia ua osia i le va o le tane ma le avā. E iai taimi e taumafai lava e taofia le alii ma le tamaitai e aua le faaipoipo ao isi taimi, e sau ma aumai faafitauli eseese e taofia ai le fiafia o lea ulugalii i le filemu ma le malologa lelei i lo la aiga. O le faitauga mai le Tusi Paia o le asō o loo faamatala ai le faaipoipoga i Kana i Kalilaia. E leiloa pe na manatu le tama faaipoipo ua saunia mea uma e manaomia mo le aso o le faaipoipoga. Peitai na faafuasei ona lē tofu le uaina. E mautinoa ua amata ona oo mai le maasiasi seia oo ina afio iai le Atua Matautia. I le 1 Samuelu 1:1-20, o loo faamatala ai le tala ia Hana e pā. Na tauemu ē na ita ma tetee ia te ia i aso uma, ma ua matuā faigata lona olaga. E na te lei fuafuaina e pā, ae na oo mai le pā, ma e leai se mea e mafai ona ia faia. Na afio mai Lē tauave avega i lona olaga ma ua ia fanauina se fanau e toa ono e aofia ai ma le perofeta tautaua o Samuelu. O Sarai foi na amo le avega o le lē fanau seia oo ina asiasi ia te ia ma lana tane Lē tauave avega i le Kenese 18:1-6. Ae lei afio mai Lē tauave avega i le la ulugalii, ua tele tausaga o pā Sara ma o le mafuaaga lea na ataata ai ina ua fai atu o le a fanau i le tausaga e sosoo ai. Afai o loo e saili pea ia maua sau pepe ma ua leai se faamoemoe e maua ai sau pepe,ou te manao ia e iloa, o Lē tauave avega, e nate saunia le faamoemoe i tulaga ua leai se faamoemoe,  ma e na te mafai ona faaofo ia te oe. I le suafa e sili i suafa uma lava, ou te folafola atu, o soo se avā e pā o faitau pe faalogo i lenei faamalosiau, ua lata mai ona e pese i le olioli. Le au pele e, e leai se luitau o ni faaipoipoga e lē mafai e le mana o le Atua ona faatoilaloina. E mafai e le Alii ona faatonu ia iai le filemu i se mea o loo vevesi ma leai se loto gatasi, e mafai foi ona ia faafilemuina soo se afā i soo se faaipoipoga. Afai ua e faaipoipo ae o loo e ui i faigata ma afā i lau faaipoipoga, ou te tatalo ia afio atu Lē tauave avega i le taimi nei, ona e pese ai lea i se pese fou, i le suafa o Iesu. Afai foi ua e matua ua tatau ona e faaipoipo ae lei faaipoipo lava, ou te folafola atu e saunia e le Atua matautia sou tofi e amiolelei e te faaipoipo iai, i le suafa o Iesu. E leai se luitau poo se faafitauli i se faaipoipoga a se ulugalii e lē mafai e le Atua ona faatoilalo, i le suafa o Iesu, Amene. 

OPEN HEAVENSMATALA LE LAGI MO LE ASO TOFI 16  IULAI 2026(tusia e Pastor EA Adeboye) Manatu Autu: Faasaolotoga mai avega o aitalafu (Deliverance from the burden of debts) Tauloto Tusi Paia: Luka 4:18 “Ua i o‘u luga le Agaga o le Ali‘i, auā ‘ua nā fa‘au‘u mai ‘iā te a‘u e folafola le tala lelei i ē matitiva. ‘Ua ‘auina mai a‘u e ia e fa‘amālōlō i ē loto momomo, e tala‘i le sa‘olotoga i le tāfeaga, ma ‘ia pupula mata o ē tauaso, e tu‘u sa‘oloto i ē ‘ua fa‘asauāina,”Faitauga - Tusi Paia: 2 Tupu 4:1-7O le asō, o le a ou talanoa atu i se tasi o avega, o le avega o le aitalafu. I ni tausaga talu ai, sa iai la matou teine faigaluega e usu a lana pese e faapea, ‘o le afi o loo mu ai le laau, ae lē mu le laau. E matautia lo tatou Atua,’ i soo se taimi e fai atu e usu mai se pese i le taimi o faigalotu a le matou aiga. E iai se aso na ou fesili iai, i le laau e lē mu lea e fiafia e pese ai. Ina ua ou fesili iai, na ou iloa ai, na avea o ia ma tagata teufale ona o le tele o aitalafu a ona matua ua le mafai ona totogi. O lea na manatu ai e matou te totogiina nei aitalafu. Ina ua maea ona totogi aitalafu, o le taimi na sosoo ai na fai atu e usu mai se pese i taimi o tatalo, ua pese mai i se pese fou. Ua pese mai faapea, ‘ua ia faia mo a’u. O le mea e lē mafai e lo’u tamā ona faia, ua ia faia mo a’u’. Afai o e amo se avega o aitalafu, ou te tatalo ia e pese pei o le pese a lenei tinā, i le suafa o Iesu. O le faitauga mai le Tusi Paia o le asō, o loo faamatala ai le tala i le fafine ua oti lana tane, o le avā a se tasi o atalii o perofeta, ua maliu ae tuua se aitalafu. Ina ua o mai tagata o loo aitalafu ai e ave lana fanau tama e faatau o ni pologa e totogi ai le aitalafu, na ia tagi atu i Lē tauave avega, aua ua leai seisi mea e mafai ona ia faia, ona liua lea o mea uma mo le lelei. Na saunia e le Afua mea e sili atu mo ia, e totogi ai aitalafu ma ola lelei ai, ma lana fanau tama. O le finagalo o le Atua ia ola lana fanau e saoloto mai aitalafu aua o aitalafu o ni avega mamafa ma o ē aitalafu e pologa i ē o nofo aitalafu ai. O le mafuaaga lea e fai mai ai le Faataoto 22:7 e pule le mau‘oa i ē matitiva. E pau le tulaga o loo faataga e le Atua e te aitalafu ai i tagata o le alofa (Roma 13:8). Afai o ē pologa i avega o aitalafu, valaau i le Atua i le asō ma ole atu ia te ia e liliuina lou tulaga i le lelei. Poo le ā lava le aofaiga o le aitalafu, e afio mai Lē tauave avega ma fesoasoani ia te oe e te manumalo ai. Fai mai le 2 Korinito 9:8, e mafai e le Atua ‘ona fa‘afaula‘i ‘o mea alofa uma ia te oe ‘ina ‘ia faula‘i ‘iā te oe galuega lelei uma. E na te faamautinoaina e te saoloto mai aitalafu, ma avatu le mana e maua ai le oloa (Teuteronome 8:18) ma e nonō atu tupe i atunuu (Teuteronome 15:6). Ou te tatalo ia faamanuia le Atua ia te oe mai le faulai o mea mai ia te ia, ina ia e nonō atu i atunuu, i le suafa o Iesu, Amene. 

OPEN HEAVENSMATALA LE LAGI MO LE ASO LULU 15 IULAI 2026(tusia e Pastor EA Adeboye) Manatu Autu: Faasaolotoga mai avega o le mativa i le oa (Deliverance from material burden) Tauloto Tusi Paia:Ioelu 2:25 “Ou te taui atu ‘iā te ‘outou o tausaga na ‘aina e le sē akerise, ma le sē aleka, ma le se kasili, ma le sē kasama, o la‘u itūtau‘a tele na ‘ou ‘auina atu ‘iā te ‘outou.”Faitauga - Tusi Paia: Hakai 1:2-8O le a ou talanoa atu i le asō i le avega o le mativa i le oa o seisi vaega lea o avega. E saili le tiapolo e tuu avega o le leai o se oa i tagata, aua e na te iloa a ola se tagata i le mativa, e faigofie i lea tagata ona paū atu i faaosoosoga o le oa. Na vaai atu le fafine ua oti lana tane i Sarefata ma lana tama ua faaitiitia atu lava la meaai seia oo ina na o le toe tasi le aiga o totoe. Ua atili ai le mafatia ona sa oge le nuu uma, ua mago le laueleele ma ua leai seisi faamoemoega e maua ai seisi meaai. O lea na la sauni ai e ai le meaai mulimuli ma sauni e oti. Peitai, na afio mai Lē tauave avega ma liliu mea uma, ma o mea sa lē lava ua lava ma totoe e tausi ai i laua i le taimi o le oge (1 Tupu 17:7-16). Ou te tatalo e faasaoloto oe e le Atua Matautia mai soo se avega o le leai o se oa i lou olaga, i le suafa o Iesu. Sa iai se tamaloa mauoa na misa ma lona toalua. Ao vevela le la misa, na fai atu le avā i lana tane, o le taimi e uma ai i laua, o le a ia savali i soo se nuu e fia alu iai. Na ata le tamaloa aua i lea taimi, e sefulu fa ana taavale o loo iai. Peitai e lei leva ae amata ona faaletonu mea uma, seia oo ina totoe na o le tasi le taavale ma le $50 tala i lana taga. Na amata ona mafaufau faapea, ‘ a ou faaaogaina le $50 tala e utu ai le taavale, o le a leai se tupe ou te ai ai. Peitai afai ou te faatauina se meaai, o le a ou savali i soo se mea ou te fia alu iai, e pei ona fai mai ai la’u avā’. O le taimi la lea, na sau ai loa ia Iesu Keriso, ona tauave lea e Iesu lana mataupu. Ao faasoa mai lana tautinoga, ua tatala ona fale e lua i le taimi e tasi. I le faitauga mai le Tusi Paia o le asō, na tetee atu Hakai i le au Isaraelu ona ua latou faatafunaina le fale o le Atua ma ua ola tau oi latou lava. Na fai atu iai latou o le mafuaaga lea o le lēlava o le oa iai latou. Na tele mea na lulu ae itiiti mea na selesele, ae o le itiiti na maua, ua tele ina mou atu. Le au pele e, afai e te fia maua le mauoa, saili i le Atua, o lona malo ma lana amiotonu ma lou loto atoa. Vaai lelei lana pisinisi aua e mautinoa e na te foai atu ia te oe le faulai o le oa i aso uma o lou olaga. Afai ua leiloa soo se oa, liliu i le Atua i le asō, e na te toe faafoisia mea uma ia te oe, e pei ona ia folafola i le tauloto mai le Tusi Paia o le asō, i le suafa o Iesu, Amene. 

OPEN HEAVENSMATALA LE LAGI MO LE ASO LUA 14 IULAI 2026(tusia e Pastor EA Adeboye) Manatu Autu: Faasaolotoga mai avega o le tino (Deliverance from physical burden) Tauloto Tusi Paia:Mataio 9:35 “Ua fa‘ata‘amilo Iesu i ‘a‘ai uma ma faoa ‘a‘ai, ‘ua a‘oa‘o i o latou sunako ma tala‘i le tala lelei o le mālō, ‘ua ia fa‘amālōlō fo‘i i ma‘i uma ma ma‘i tigā uma o le nu‘u.”Faitauga - Tusi Paia: Isaia 61:1-4I le Ioane 19:16-17, sa taitai atu e nisi o fitafita Iesu i Kolokota e faatauroina, na latou faia ia amo e Iesu le satauro mamafa. Sa matua sasaina o ia, o lona uiga sa vaivai o ia, ae na latou faia ia amoina e Iesu lenei avega mamafa na o ia. I le ala, na latou fetaui ma se tamaloa mai Kurene e igoa ia Simona, ou te talitonu na taitaia e le Atua o ia e fesoasoani ia Iesu i le amoina o le satauro i le nofoaga na faasatauroina ai (Mataio 27:32). O Simona lea o se faataitaiga o se tagata amo avega, na fesoasoani ia Iesu e amo le avega mamafa. Le au pele e, e finagalo Iesu Keriso e fesoasoani ia te oe e tauave soo se avega e ono taotaomia oe i lalo. O le mafuaaga lea e tatau ai ona e sau ia te ia ma soo se avega o loo e tauaveina ina ia faamatuu ese ma oe, ae e malolo (Mataio 11:28). E taua le maitau mai, e iai le eseesega o avega. Mo se faataitaiga, o Naamanu o lana avega o le tino, o se faamai e leai se fofō (2 Tupu 5:1). E faapena foi i le Luka 13:10-17, o loo faaalia ai se fafine ma le agaga vaivai ua faano’uno’u ai. O soo se nofoaga na alu iai, e vaai atu lava tagata i le avega o loo ia amoina, tusa poo le a lona taumafai, e lē mafai ona tū sa’o i luga. E faapena foi i le Ioane 5:2-9, o loo faamatala e le Tusi Paia le tala o le tamaloa sa iai i le vai i Petesa mo le 38 tausaga. Ua umi tele o pologa ma ou te manatu ua tuulafoaina e lona aiga ma ana uo ona o lona ma’i. Ae i le alofa mutimutivale o le Atua, o Iesu o Lē tauave avega, na oo atu ia te ia ma ua aveeseina lana avega i le taimi lava lena. Na faamatala foi e le Mareko 3:1-6 le tala o se tamaloa na iai sona ma’i faapitoa. E gase se tasi o ona lima, o lona uiga e leai se ola o iai ma e lē o toe aogā i se galuega. Ua faaitiitia mea e na te faia ona e na o le tasi le lima lelei. Peitai ina ua fetaui ma Lē tauave avega i le sunako, na oo atu lona alofa mutimutivale ia te ia ma ua faamaloloina lona lima gase. Ou te tatalo mo oe o soo se vaega o lou olaga o loo faaitiiti pea ona o se tulaga lē atoatoa o le tino, e oo atu le Atua Matautia ia te oe, ma faamalolo ia te oe ia e malolo ma le atoatoa. Le au pele e, ua e loto vaivai ea ona o se faaletonu i le tino? Aua e te faavaivai, ae alu atu i le nofoalii o le Atua i lona alofa tunoa ma lafoai atu lena avega ia te ia. E nate tauave au avega mo oe ma aveesea soo se mea o taotaomia i lalo lou olaga, i le suafa o Iesu, Amene. 

OPEN HEAVENSMATALA LE LAGI MO LE ASO GAFUA 13 IULAI 2026(tusia e Pastor EA Adeboye) Manatu Autu: Mafuta lelei ma lou toalua (Spend quality time with your spouse) Tauloto Tusi Paia:Failauga 9:9 “Ia e fiafia i lou ola fa‘atasi ma le avā ‘ua e alofa i ai, i aso uma o lou ola fa‘atauva‘a, ‘ua foa‘iina e le Atua ‘iā te oe i lalo o le lā, o ou aso fa‘atauva‘a uma; auā o lou tofi lea i lenei olaga ma lau galuega ‘ua e galue ai i lalo o le lā.”Faitauga - Tusi Paia: Faataoto 5:15-19Ou te faanoanoa lava pe a lē tele se taimi e mafuta ai se ulugalii. O ia ulugalii e eseese i le aso atoa ona o galuega ma e fetaui pe a o mai i le fale e momoe i le po ona toe usu foi lea i le taeao. E oo i le faaiuga o le vaiaso, a le faigaluega, e o atu i isi foi faatasiga e aunoa ma le toalua. E lē tatau ona faapea aua afai e te alofa moni i se tagata, e te faaavanoa lava le taimi e mafuta ai ma ia, ma o le tele o le taimi e mafuta faatasi ai, o le siitia foi lena o le alofa o le tasi i le isi.I ni tausaga talu ai, e iai se fafine na ia tautino mai ia te a’u e lē fia malolo mai lona ma’i, aua a oo ina malolō, e lē tele se taimi o lona toalua e mafuta ai ma ia. Peitai, o lea ua ma’i, e vave mai lava i le fale pe a manava galuega. O tane ma avā, e lē tatau ona faatalalē ia latou taitoalua ona o galuega poo seisi lava mea. E tatau ona tele taimi e mafuta lelei ai e fausia sootaga malosi. O ulugalii faaipoipo, e tatau foi ona tatalo faatasi, ma o le faanoanoaga e seasea ona tatalo faatasi ulugalii. E ono ō mai faatasi i fonotaga tatalo, e tatalo faatasi ai ma isi tagata, peitai a foi i le fale, e masani ona lelavavā tele ua le mafai ai ona tatalo faatasi. O se tasi o auala e mafai ai ona faamalosia ma mafanafana se mafutaga a se ulugalii pe a fai ma masani le tatalo faatasi. O le tatalo e faamalosia ai sootaga o le faaipoipoga ma faamausalī le alofa i le va o se tane ma le avā. Ua silia ma le 59 tausaga talu ona ma faaipoipo ma lo’u toalua ma e ma te masani i le taliē ma fiafia faatasi. O i maua o se ulugalii e mafanafana le mafutaga, e lē na o se tane ma se ava o nonofo faatasi i se fale e tasi. E tatau i le tane ma le avā ona taaloalo ma taliē. A lagona le ataata ma taliē i totonu o se aiga, e laitiiti lava se avanoa e misa ai. E tatau i tane ma avā ona mafaufau lelei i mea e taaalo ai, faafiafia ai ma taliē ai i le fale e faamāmā ai le siomaga ma faatumu ai i le olioli. Mulimuli, e tatau i tagata faaipoipo ona faaavanoa taimi e fai ai ni upu lelei e faamalosi ai i latou toalua. E lē tatau ona manatu mamā i lea tulaga, ae e tatau ona saili auala e faailoa atu ai i latou toalua lo latou taua ma faafetai iai mo mea uma o latou faia. Ou te tatalo ia siitia ma faamalosia e le Atua mafutaga uma a ulugali o loo tuufaatasia e le sakarameta o le faaipoipoga, i le suafa o Iesu, Amene. 

OPEN HEAVENSMATALA LE LAGI MO LE ASO SA 12 IULAI 2026(tusia e Pastor EA Adeboye) Manatu Autu: Galuega Mata’utia (Mighty Works) Tauloto Tusi Paia:Mareko 9:23 “Ona fetalai atu lea o Iesu ‘iā te ia, “‘Ai se mea ‘e te mafaia. Auā e mafaia mea uma lava i lē fa‘atuatua.”Faitauga - Tusi Paia: Mareko 6:1-6Ua faailoa mai e le tusi o Ieremia 32:19; ia I tatou, o le Atua Silisiliese e mata’utia i galuega. E finagalo le Atua e fai galuega Silisili. Paga lea, peita’i i le tusi faitau mai le Tusi Paia o le asō, ua lē mafai e Iesu ona faataunuu galuega mamana i totonu o lona lava nuu ona o le lē faatuatua o tagata. O le lē talitonu ma le masalosalo o le a lē mafai ai e se uso ona vaai i galuega mamana a le Atua i lona olaga. A i ai le faatuatua ma le talitonu o le a fa’aalia i le olaga o le uso galuega mata’utia a le Atua Silisili ese. E fiafia le Atua e fai galuega silisili ma na te sailia ni atalii ma ni afafine e galulue faatasi ma Ia. O loo saili mai o Ia mo ni tane ma ni fafine e faia galuega e sili atu i mea na faia e le Alii o Iesu Keriso a o i ai o Ia i le lalolagi. Peita’i e manaomia le faatuatua i le Alii o Iesu Keriso pe afai e te mana’o e mafai ona e faia galuega e sili atu i mea na Ia faia (Ioane 14:12). Le au pele e, e te lē manaomia sou auai atu i se aoga fa’afaifeau pe maua se tulaga faapitoa e faatino ai galuega tetele; pau le tulaga manaomia o lou faatuatua. Ina ua latalata i le taimi e afio a’e ai Iesu i le lagi, na ia poloa’i i ona so’o, e tāla’i atu le talalelei i le lalolagi uma ma ta’u atu iai latou, faailoga tetele e mulimuli atu iai latou. Na ia fetalai, ua iai latou le mana e tutuli ai temoni, tautalatala i gagana fou, fetagofi i latou i gata ma fa’ae’e o latou lima i luga o e mama’i (Mareko 16:15-18). Pau le mea e agava’a ai i latou e fai nei galuega uma o le faatuatua ia te Ia.Atalii ma le afafine o le Atua, e finagalo le Atua e faatino galuega silisili e ala ia te oe. E finagalo e fa’aaogā oe e fai ma ana uatogi o le taua e faaumatia ai galuega a le pouliuli (Ieremia 51:20). Peita’i e ao ona e faatuatua i le Atua e taunuu ai mea nei. E moni o Ia o le Atua e Pule aoao e mafaia ona fai soosemea e finagalo ai, peita’i e finagalo o Ia i le faatuatua ia mafaia ai mea uma mo oe (Mareko 9:23). Na e faatagaina le lē talitonu e faaseseina oe ma aveese oe mai galuega mamana na finagalo le Atua e faataunuu e auala ia te oe? Afai na e faia, ole atu mo lona alofa mutimutivale i le asō. Faatumu lou loto i lana upu auā o lou faalogo pea lava pea i le upu a le Atua e tupu ai lou faatuatua. Fai mai le tusi o Roma 10:17; e tupu le faatuatua i le taulogologo atu, o le taulogologo atu fo’i o i le Afioga a le Atua lea. E ao fo’i ona e sola ese mai soosemea e faavaivaia lou faatuatua. O Iesu Keriso e tumau ananafi, o le asō ma le faavavau (Eperu 13:8) ma o mea mata’utia ua ia faia mo isi, ma auala atu i isi, e mafai fo’i ona Ia faia mo oe ma ala atu ia te oe. Pau lava ia e faatuatua. Tula’i i luga ma galue. I le suafa o Iesu, Amene.

OPEN HEAVENSMATALA LE LAGI MO LE ASO TOONAI 11 IULAI 2026(tusia e Pastor EA Adeboye) Manatu Autu: Aua nei e manatu ua e matua tele e vivii ( Never outgrow praise ) Tauloto Tusi Paia:Eperu 13:15 “O lenei, o ‘iā tatou te avatu so‘o ai le taulaga o le vi‘iga i le Atua, o le fua lea o tatou laugutu, o lo‘o fa‘afetai atu i lona suafa.”Faitauga - Tusi Paia: Salamo 63:3-5O se tasi o auala e faatoilalo ai e le tiapolo le toatele o kerisiano faatuatua o le vaai maualalo lea i pese ma viiga i latou Ekalesia. O ia kerisiano faatuatua e lē fia auai i taimi o viiga pe faatali foi e o mai i le lotu pe a maea pese ma viiga. E manatu o le vivii i le Atua ma siva mo ia o mea a tamaiti poo ua matua tele faaleagaga e lē tatau ai ona toe siva ma vivii ia te ia. I luma o fofoga o le Atua, o tatou uma o lana fanau aua o le afe tausaga e tutusa ma le aso e tasi i ona luma ( 2 Peteru 3:8). O lona uiga o le silasila mai a le Atua, e leai seisi i le lalolagi i le asō ua atoa se aso i lona matua. O le viiga o se tasi o auupega malosi o loo i kerisiano. Fai mai le Salamo 22:3, ‘“A o oe, e pa‘ia oe; o lo‘o e ti‘eti‘e i vi‘iga a Isaraelu.” O lona uiga o lau viiga e tatai mai ai le mamalu o le Atua, a afio mai le Atua i se nofoaga, e lē afio fua mai. E afio mai ma meaalofa, faamalologa ma faamanuiaga. Ina ua faaaogaina e Iosefatu ma tagata o Iuta le viiga o se auupega, na toe fetauai lava o latou fili seia oo ina faaumatia e i latou lava (2 Nofoaiga Tupu 20:22-24). O nisi o taua, e pau le auala e manumalo ai o le viiga ma le siva malosi i luma o le Atua.Fai mai le Galuega 16:25-26 “O le tulua o po ma ao ‘ua tatalo ai ma pepese o Paulo ma Sila, i le Atua; ‘ua fa‘alogo fo‘i ‘iā te i lā‘ua e ‘ua noanoatia. ‘Ona fa‘afuase‘i mai lea o le mafui‘e tele, ‘ua lūlūina ai fa‘avae o le fale puipui; ‘ua matala mai ai uma faitoto‘a, ‘ua maunuunu ai fo‘i o latou noanoaga uma lava.”Fai mai le Tusi Paia, o Paulo ma Sila, na la avatu le taulaga o pese ma viiga i le Atua ao iai i le falepuipui. Na tali mai le Atua i le luluina o le mafuie, ua talaia uma faitotoa ma ua matalatala uma noanoataga o pagota. E leai seisi e vivii i le Atua ma le loto atoa ae tumau ona saisaitia. A e vivii i le Atua ma lou loto atoa, e tulai mai le Atua i lona malosi atoa e fesoasoani ia te oe ma faamanuia ia te oe. Le au pele e, e lē tatau ona e faatagaina e te oo i le tulaga e te manatu ai ua e matua tele e lē talafeagai ona e toe pese ma vivii. Na manatu Mekala o le vivii i le Atua o se tulaga maulalo tele i lona tulaga tau tupu, ma o le taui, na lē fanau i lona olaga atoa ( 2 Samuelu 6:16-23). E tatau ona e sau i luma o lou Tamā o se tasi o lana fanau ma vivii ia te ia ma lou loto atoa. I le Salamo 50:23, o loo fetalai le Atua, o lē faia le vi‘iga ma taulaga ia te ia, o lea tagata e āva ‘iā te ia; ma afai e āva ma viia le Atua i lou olaga, o lona matagofie o le a faailoa ia te oe ma mea uma i lou olaga. Ou te tatalo, ao e vivii i le Atua, o lona mamalu o le a faaalia i lou olaga i le suafa o Iesu. Aua nei e manatu ua e matua tele mo le viiga aua e taua ma pele i le finagalo o le Atua, i le suafa o Iesu, Amene. 

OPEN HEAVENSMATALA LE LAGI MO LE ASO FARAILE 10 IULAI 2026(tusia e Pastor EA Adeboye) Manatu Autu: Keriso i totonu ia te oe (Christ in you ) Tauloto Tusi Paia: Kolose 1:27 “Na finagalo fo‘i le Atua ‘ona fa‘ailoa atu ‘iā i latou le uiga o le silisili o le lelei o lenei mea lilo o i nu‘u ‘ese, o Keriso lea o lo‘o ‘iā te ‘outou, o le fa‘amoemoe i le manuia.”Faitauga - Tusi Paia: Galuega 16:19-34O le taimi muamua na ou asiasi ai i le falepuipui, o le 1975, na ma o ma se faifeau toeaina a le lotu, na ma vaai ai i se alii talavou o tā le piano ma siva ma le olioli. Na ou fesili i le faifeau toeaina pe ua lata ona tatala i tua lenei alii talavou. Na tali mai e leai se faamoemoe e tatala ai i tua ona e solo atoa i le falepuipui lona faasalaga. Na ou fesili i le faifeau pe aisea e olioli ai e ui e faigata lona tulaga, ae tali mai, o loo olioli ona ua ia feiloai ma Iesu Keriso i le falepuipui. Le au pele e, afai o e ui i se tulaga faigata, ou te manao ia e iloa, tusa poo le a le leaga o lena tulaga, o loo iai le mafuaaga e te olioli ai pe afai o loo ia te oe Iesu. O le tauloto mai le Tusi Paia o le asō, fai mai o Keriso o loo ia te oe o le faamoemoe lea o le manuia. A iai Iesu i se tagata, tusa poo le a le mea o ui ai, o lea tagata e iai lona faamoemoe mo se lumanai manuia. Sa tusi se pese e se fatupese e faapea, ‘ou te fiafia ona ou te ia Iesu’. Na tusia foi se pese a seisi fatu pese faapea, ‘ona e ola o Ia i totonu ia te a’u, ou te mafai ona feiloai atu a taeao’. E tatau ona faapea au folafolaga o se tagata faatuatua, tusa pe o loo tuu pea oe i lalo e le tiapolo. Fai mai le Faataoto 24:16, e ono paū faafitu le kerisiano amiotonu peitai e toe tulai pea. O lona uiga o le tulaga faaletonu o loo e iai, e lē mafai ona taofia oe i lalo i se tulaga tumau. Ina ua faia e le tiapolo le faasatauroina ma le maliu o Iesu, na ia manatu ua manumalo. Peitai i le 1 Korinito 2:8, o loo faapea mai, ‘ana iloa e le perenise o lenei lalolagi, po ‘ua latou lē fa‘asatauroina le Ali‘i e ona le manuia. Ana latou iloa o le maliu o Iesu e oo ai ina faaumatia a’ia’i i latou, po ua latou taofia lona maliu. I le faitauga mai le Tusi Paia o le asō, na manatu le tiapolo ua ia manumalo i le taofia o Paulo ma Sila ma faafalepuipuiina i laua. E na te leiloa, na finagalo le Atua e late iai i le falepuipui ina ia faaolaina le pule o le falepuipui ma lona aiga. O mailei a le tiapolo e faia ina ia e paū, e i’u lava i le siitia pea o le Atua i lou olaga. Fanau a le Atua, o e ui ea i se tulaga faigata ma le lē mautonu? Olioli aua o Keriso i totonu ia te oe o lou faamoemoe o le manuia. Aua e te faavaivai pe fememeai. Ia e malolo ma le mautinoa o soo se mea o loo e ui ai, e saunia ai e le Atua se auala e faalauiloa ai lona mamalu i lou olaga, pe afai e te tumau pea ia Keriso. Tau ina ia faaali e Keriso lona manuia i lou olaga, i le suafa o Iesu. Afai o iai Keriso i totonu ia te oe, olioli pea, i le suafa o Iesu, Amene. 

OPEN HEAVENSMATALA LE LAGI MO LE ASO TOFI 9 IULAI 2026(tusia e Pastor EA Adeboye) Manatu Autu: Taulaga o ē oti (The city of the dead ) Tauloto Tusi Paia: Kolose 2:13 “O ‘outou fo‘i sa oti i amio leaga ma le lē peritomeina o ‘outou tino, na ia fa‘aola mai fa‘atasi ma ia, ‘ina ‘ua fa‘amāgaloina mai a tatou amioga leaga uma lava.”Faitauga - Tusi Paia: Efeso 2:1-6I le tele o tausaga talu ai, na ou asiasi ai i se tasi o atunuu e pito i telē le fanuatanu i le lalolagi atoa. I luga o soo se fanuaoti, e iai ni oga simā tetele ma e o mai nisi o tagata e leai ni nofoaga e nonofo ai o le taulaga, fai ai o latou faleie na nonofo ai i luga o nei oga simā. O le mafuaaga lea e taua ai lea fanuatanu, o le taulaga o ē oti. Le au pele e, e te iloa o tagata e lei tuuina atu o latou ola ia Keriso pe faapea mai foi ua faaolaina ae o loo ola pea i le agasala, o loo ola i se taulaga o e oti i le agaga? O le faitauga mai le Tusi Paia o le asō o loo ta’u mai ai iai tatou sa tatou oti i le agasala ae lei faaolaina i tatou e Iesu e ala i lona maliu ma le toetu. Na afio o ia i le taulaga o ē oti ma aumai le ki o seoli ma le oti mai ia Satani (Faaaliga 1:18). Na maliu Iesu ina ia aua nei iai se tasi e ui i le tigā matuitui o le oti e faavavau. Ou te fautua malosi atu ia te oe ina ia faasaoina oe mai le faafanoga, talia Iesu e avea ma ou Alii ma Faaola ae lei tuai. Liliu ia te ia i le asō, ona ia suia lea o lou nofoaga mai le taulaga o ē oti i le ‘Malo o le Ola’. Afai o oe o se tasi o fanau a le Atua, o lau matafaioi o le talai atu le talalelei iai latou e lei talia ma tuuina atu o latou ola ia Iesu Keriso. Aua e te pisi i au lava pisinisi ae e faatalalē i le pisinisi a le Alii o le molimau atu i agaga o loo leiloa pea. O nisi taimi o le faamanuiaga o loo e naunau iai o loo nanāina i lou usitai lea i le poloaiga a le Alii e talai le talalelei ma fai nuu uma ma so’o. I le tele o tausaga talu ai, e iai se tamaitai sa tatalo lava i le Atua mo sona toalua ma na fai iai le Atua, ‘alu e manumaloina agaga. O lou toalua e lei avea lava ma sui o lo’u aiga’. Na usitai ma taulai lana vaai i le talai atu i ē o leiloa. Ina ua maea le 6 masina, na sau ia te a’u ma faapea mai, ‘Tamā, e iai lo’u faafitauli’. Na ou fesili iai poo le a le faafitauli ae faapea mai, ‘o se tagata fou faatoa faaolaina na ou taitaia ia Keriso ua fai mai e fia faaipoipo ia te a’u’. Na ou fai iai e tatalo ma talia pe afai ua ia mautinoa o lona tofi lea. O le asō, o i laua o se ulugalii pito sili ona lelei ou te iloa. Le au pele e, afai ua faaolaina oe e le Atua mai le taulaga o ē oti, ‘aua e te manatu tau o oe lava, talai atu iai latou o loo nonofo pea i lea taulaga ina ia latou faatasi ma oe i le malo o le ola. O le matafaioi a soo se kerisiano o le talai atu iai latou o loo nonofo pea i le taulaga o ē oti, i le suafa o Iesu, Amene. 

OPEN HEAVENSMATALA LE LAGI MO LE ASO LULU 8 IULAI 2026(tusia e Pastor EA Adeboye) Manatu Autu: Ia sili atu le tatalo (Exceed in prayer ) Tauloto Tusi Paia:Efeso 6:18 “Ia ‘outou tatalo i le Agaga i aso uma lava i talotaloga ma fa‘atoga uma; ‘ia ‘outou mataala pea i lenei lava mea, ma matuā tausisi i le fa‘atoga mo tagata pa‘ia uma lava;”Faitauga - Tusi Paia: Kenese 32:24-30 I se vaitaimi i le 1975, o lo’u tamā faaleagaga, na sau ma nofo i lo’u tamai fale i se aai i Saute i Sisifo o Nigeria. E ui o se fale e faia i le palapala ae teuteu i le simā, sa ou fiafia lava e talimalo ai i lo’u tamā faaleagaga. Ua oo i le po ua  maea ma tatalo faatasi ona ou sauni lea ou te alu ou te moe. Ao ou savali i le potu ou te moe, ou te vaai atu o loo tootuli lava lou tamā ma tatalo. Ina ua ou ala i se taimi i le tulua o po ma ao ma ou toe ala i le 5.30 i le taeao, na ou ofo i lou vaai i le toeaina o loo tootuli lava ma tatalo. Ua ou popole ma ou fesili atu iai pe iai se faafitauli ua tupu, ae faapea mai ua lata ona ou malamalama lea. O loo ou mulimuli i ona tulaga vae e amata mai i lea aso, ma ou te malamalama moni, o tatou kerisano faatuatua, e tatau ona tatou tatalo e le aunoa (1 Tesalonia 5:17). Le au pele e, o loo valaau le Atua i lana fanau ia ola i se olaga tatalo. Peitai ane, o le toatele o kerisiano e lē iloa se mafuaaga e tatalo ai pe afai o loo sologa lelei mea mo i latou. E latou te manatu e leai se mafuaaga e tatalo ai fua aua e lē o ui ini luitau ma faigata. Peitai, afai o oe o se tasi o fanau moni a le Atua, e tatau ona e tatalo e lē aunoa. Tusa poo le a le faatele ona e tatalo, e mafai lava ona siitia pea i le nofoaga o tatalo. Aua nei avea lou olaga tatalo o loo iai nei, tusa poo le a le lelei o iai, e te manatu ai o le maualuga lena e gata ai. Finau pea ia siitia ina ia aua ai nei e malolo ma gata ai lou finafinau pea. Ina ua avea au ma taitai aoao o le Ekalesia RCCG, na ou alu ma ave au uo e toaono i se nofoaga i Matū totonu o Nigeria e tatalo ai mo le 36 itula e leai se malolo. Ina ua maea matou tatalo mo le36 itula, na faaalia mai e le Atua nisi o mea iai matou. Ua matou lagona le fiafia ma manatu ua matou faia ma ausia se galuega tele. Peitai i le vaiaso na sosoo ai, na ou faalogo i se tamaloa na tatalo mo le 30 aso e leai se malolo. I le faitauga mai le Tusi Paia o le asō, na tatou vaai ai ia Iakopo o loo tauivi seia ona maua le faamanuiaga mai le Atua, na suia ai lona olaga atoa. Le au pele e, e finagalo le Atua ia te oe e te tumau ia te ia i le tatalo e aunoa ma le faavaivai (Luka 18:1). Aua e te malolo pe talai ni tulaga tetele ua e ausia i le tatalo, ae e tatau ona e saili ia sili ma siitia pea. Tau ina ia faifaipea ona faamalosi atu le Alii ia te oe ao e  faatalitali ia te ia, mo soo se fuata o lou olaga, i le suafa o Iesu. E finagalo le Atua ia e siitia pea i le nofoaga o tatalo, i le suafa o Iesu, Amene. 

OPEN HEAVENSMATALA LE LAGI MO LE ASO LUA 7 IULAI 2026(tusia e Pastor EA Adeboye) Manatu Autu: O le ala e faaleleia ai (His refining process ) Tauloto Tusi Paia: Salamo 105:18-19 “Ua latou fa‘atigā i ona vae i le noanoaga; ‘ua o‘o lava o ia i le u‘amea; ‘ua o‘o i le tau na taunu‘u ai lana afioga. O le afioga a le ALI‘I na tofotofo ai ‘iā te ia.”Faitauga - Tusi Paia: Esoto 13:17-18 O le Atua i Lona poto, e na te ave lana fanau i le ala e savali ma ui ai, ia ausia tulaga tetele. E na te faaaogaina laasaga uma e faatonu lelei ai a latou amio ma vavaeeseina i latou mai soo se mea e taofia pe faaumatia ai i latou e aunoa ma le ausia o tulaga tetele. Mo se faataitaiga, ae lei ausia e Iosefa lona tulaga maualuga, na ave e le Atua o ia ma ui i le tulaga pito sili ona maualalo, i le fale o Potifara, o le falepuipui e saunia ai lana amio ia lelei ao sauniuni atu e avea ma alii sili i Aikupito. O le tauloto mai le Tusi Paia o le asō o loo fai mai, na oo o ia i uamea seia taunuu le Upu a le Atua. O le Upu a le Atua na tofotofo ia te ia seia faamaonia ua saunia lelei mo tulaga tetele. Na faapena foi Tavita, na ui foi i ala o le Atua e saunia ai i le avea ma tupu. O lona ala i le avea ma tupu na iloa ai le tele o luitau, e aofia ai le nofoesea i le vao. O le ala i tulaga tetele e masani ona tele ai luitau ma faigata. O le ala moni i tulaga tetele e lē faigofie, peitai e iai lona taui lelei. Na faamatala e le Aposetolo o Paulo lea ala o le ‘puapuaga mamasagia’ i le 2 Korinito 4:17. Peitai tusa poo le a le faigata o le ala, e lē mafai ona faatusaina i le maualuga ma le matagofie  o le mamalu ua maea saunia e le Atua mo i tatou. O tagata e fia ausia tulaga tetele e aunoa ma le ui i ala ua saunia e le Atua, e lē umi ona iai i ia tulaga tetele pe a oo iai. E pei o le tupu o Saulo, na i’u ina ia lē toe maua ia tulaga ona o amio ma vaivaiga sa tatau ona aotauina mai ai. O i latou e filifili e ui i ala o le Atua e i’u ane lava e tulai mai e famamaina e pei o le auro maoi. E avea ma alii ma tamaitai e faatuatuaina e le Atua ma le tele o punaoa ma le vaaia o tagata. E oo i lo tatou Alii o Iesu Keriso na ui i ala o le Atua , ma ina ua oo mai le taimi moni e faia ma faatinoina ai le galuega a le Atua, na papatisoina o ia ma ua afio mai le Agaga o le Atua ia te ia ( Mataio 3:16-17). E lei amata ona faia vavega ina ua uma ona fanau mai, aua e lē mafai ona faatuina mai e le Atua se tagata e aunoa ma lona tofotofo ma saunia o ia. E pei ona tatou iloa mai le faitauga mai le Tusi Paia o le asō, na taitai e le Atua le fanauga a Isaraelu i le ala ma ua malaga atu i le nuu na folafolaina i le ala umi. E lei finagalo o ia e toe foi i latou i Aikupito i le taimi muamua e fetaui ai ma se taua. Na finagalo e fesoasoani iai latou ina ia avea ma se nuu malosi ma mausalī. Le au pele e, o ave oe e le Atua i se ala e faaleleia atili ai lou tagata ae ua faigata ia te oe? Ou te faamalosi ia te oe ia e filigā ao e ui ai, aua o le vaega lea o fuafuaga a le Alii e saunia ai oe mo tulaga tetele e moni ma mausalī. Tatalo, Le Alii e, faamolemole fesoasoani mai ia te a’u ina ia ou ui i le ala e faaleleia atili ai lo’u tagata ma le manuia, i le suafa o Iesu, Amene. 

OPEN HEAVENSMATALA LE LAGI MO LE ASO GAFUA 6 IULAI 2026(tusia e Pastor EA Adeboye) Manatu Autu: E te iai iina? (Will you be there? ) Tauloto Tusi Paia: Ioane 14:3 “Āfai fo‘i ‘ou te alu ma sauni se mea e nonofo ai ‘outou, ‘ou te toe sau, ‘ou te talia fo‘i ‘outou ‘ia fa‘atasi ma a‘u; ‘ina ‘ia i ai ‘outou i le mea ‘ou te i ai a‘u.”Faitauga - Tusi Paia: Faaaliga 21:1-27 O le taimi muamua na ou malaga ai i Amerika o le vaitau o le tau mafanafana i le 1979 ma e pei ua ou oo i le lagi. Na ou nofo i Tulsa, ma i lea taulaga, e susulu a le lā e oo i le leva o le afiafi. O le mamā ia o le auala e mafai ona e nofo i autafa ma ai ai. O le faletaele o le faletalimalo na ou iai, e tolu paipa, o le paipa malulu, mafanafana ma le vevela. E le gata i lea, e ola a le eletise e lē pē ma ua matagofie mea uma. Ina ua maea vaiaso e lua,  ua ou toe foi i Nigeria, ma ao agai atu le vaalelei e tu laueleele, na ou tilotilo atu i fafo o le faamalama ma iloa le eseesega tele o le nofoaga sa ou iai ma le nofoaga o le a ou toe foi atu iai, aua o ia aso, e lei atinae tele Nigeria e pei o nei aso. Le au pele e, o le mea na ou vaai iai i Tulsa i Amerika i tausaga e tele talu ai, e lē mafai ona faatusaina i le lagi. I le lagi, e leai se po, aua i le faitauga mai le Tusi Paia o le asō, o loo faamalamalama mai iai tatou e faapea: “E lē aogā fo‘i i le ‘a‘ai ‘ona pupula i ai o le lā, po o le masina; auā o le pupula o le Atua ‘ua fa‘amalamalamaina ai ia, o le Tama‘i Mamoe fo‘i o lona molī lea.” (Faaaliga 21:23). O le lagi o se  nofoaga e lē tatau ona misia e se tagata, ma ou te tatalo ia aua lana nei e misia i le suafa o Iesu. O le lagi o le folafolaga a le Atua i tagata faatuatua uma. Na fetalai Iesu i le tauloto mai le Tusi Paia o le asō o le mea e iai o ia, e tatou te iai faatasi ma ia. Afai ua e tuuina atu lou ola ia Iesu ma o loo e mulimuli pea ia te ia, e te iu foi i le mea o loo iai o Ia, pe a maea lou taimi i le lalolagi nei. A ō tamaiti i le aoga, e latou te iloa a maea le aoga i le aso, e toe foi i le fale i o latou matua. E faapena foi la, afai o le Atua o lou Tamā moni, o loo mautinoa le folafolaga e te nofo tupu ma ia e faavavau i le maea ai o lou taimi i le lalolagi nei. Peiti, e nā o i latou ua lafoai o latou ola ia Iesu e mafai ona taua o fanau a le Atua, ma e nā o lana fanau foi e nonofo ma ia e faavavau i le lagi. Le au pele e, o e mautinoa le nofoaga e te nofo ai e faavavau? Afai e te fia faamautinoa lou nofo ai i le lagi, e lē tatau ona e agasala i le loto. E tatau ona e faamaoni ia Iesu Keriso ma faia lona finagalo i taimi uma. Ua fai la’u faaiuga e teena le agasala ma tumau faamaoni ia Iesu Keriso, ina ia ou nofo ma ia e faavavau i le lagi. Ou te vaai ia te oe iina? O fea e te nofo ai e faavavau, o le lagi poo seoli? I le suafa o Iesu, Amene. 

OPEN HEAVENSMATALA LE LAGI MO LE ASO SA 5 IULAI 2026(tusia e Pastor EA Adeboye) Manatu Autu: O Le A Lou Naunautaiga Loloto? (What Is Your Deepest Desire? ) Tauloto Tusi Paia: Salamo 130:6 “O lo‘o fa‘atalitali atu lo‘u agaga i le Ali‘i e sili i ē o leoleo ‘ona fa‘atalitali i le taeao; e sili lava i ē o leoleo ‘ona fa‘atalitali i le taeao.”Faitauga - Tusi Paia: Ioane 12:20-21 Fai mai le Salamo 27:4 “E tasi le mea ‘ua ‘ou ole atu ai i le ALI‘I, o le mea lava lea ‘ou te sā‘ili atu ai; ‘ia ‘ou nofo i le fale o le ALI‘I i aso uma o lo‘u ola, ‘ina ‘ia ‘ou iloa atu ai le matagofie o le ALI‘I, ma ‘ou sā‘ili i lona malumalu.”  I le fuaiupu mai le Tusi Paia ua taua i luga ma le tele o isi fa’ata’ita’iga i totonu o le Tusi Paia, o loo faailoa ai e Tavita lona naunautaiga e nofo i le mamalu o le Atua. I le Salamo 63:1-2; na ia fa’aalia ai le fa’anaunauga o lona loto e ala saili i le Atua ma iloa lona malosi ma lona mamalu. I le fuaiupu e 6 o le mataupu lava lea na fai mai ai Tavita na te manatua le Atua i luga o lona moega ma manatunatu ia te Ia i leoleoga o le po. E faapea fo’i i le fuaiupu tauloto o le asō na ia faapea mai, o loo faatalitali lona agaga i le Alii e sili atu ia i latou o ē leoleo ma faatalitali i le taeao. O tagata leoleo e lē aunoa ona fia vaai atu i le tafa mai o ata latou te saoloto ai e mālōlō ma mapu ai, ma na faatusa e Tavita lona matua’i naunau mo le Atua e pei o lo latou manana’o ma faatalitali mo le tafa o ata. Le au pele e, o le a, po o ai o e sailia? I le tusi faitau mai le Tusi Paia o le asō, sa i ai se Eleni na o atu e tapua’i i se tausamiga i Ierusalema, ma ina ua o latou vaaia Filipo, na o latou faapea, “Le alii e, matou te fia feiloai ma Iesu.” Afai e avatu e le Atua se avanoa ia te oe i le asō e ole atu ai i soo se mea, o le a se manaoga o le a e fai? E te ole atu ea mo mea e uma le aoga pe a uma le olaga nei, pe e te mana’o ia e vaai ia Iesu? O tagata e saili i le Atua mo na o mea o le lalolagi e lē mafai ona fa’amalieina auā o ia mea e i’u ina mou atu. Peita’i o i latou e saili i le Atua ma lona mālō ma le loto atoa latou te maua lava o Ia (Ieremia 29:13) ma i’u i le fa’amalieina atoatoa, auā o isi mea uma latou te manaomia e fa’aopoopoina ia i latou (Mataio 6:33).E fa’alatalata le Atua e lē aunoa i e fa’alatalata atu ia te Ia (Iakopo 4:8). Na ia fa’aalia manino lea tulaga i le la sootaga ma Tavita. E te mana’o e alofa le Atua ia te oe i se ala faapitoa? E te mana’o e faatasi mai o Ia ia te oe i taimi uma? Ia avea la ma ou naunautaiga loloto le faafiafia ia te Ia e le aunoa (Tesalonia 4:1) ma ia fa’aauau ona e tupu ma ola i lou iloa o Ia (Filipi 3:10).Atalii /afafine o le Atua, o le a le tagi ogaoga i lou loto? O le a se mea o e ala ai i le po? O e mafaufau i taimi uma pe faafefea ona faaputu ma faateleina mea fa’aletino mo oe lava? Po o e manatu pe faafefea ona e iloa atili le Atua? Po’o le a lava le mea o e fiaai ma fiainu i ai, e fua iai le mea e te maua, e pei ona fai mai le tusi o Mataio 5:6; “Amuia i latou e fiaaai ma fiainu i le amiotonu auā e maoona i latou.” Ou te tatalo ia e saili I fofoga o le Atua ma lou loto atoa ma ia e soifua ma iloa le matagofie o lona Paia, I le suafa o Iesu. O le a le tagi ma le naunautaiga loloto o loo ia te oe? Mea i le tino poo Iesu? I le suafa o Iesu, Amene.

OPEN HEAVENSMATALA LE LAGI MO LE ASO TOONAI 4 IULAI 2026(tusia e Pastor EA Adeboye) Manatu Autu: Manū O Ao (While It Is Day) Tauloto Tusi Paia: Ioane 11:9 “Ona tali atu lea o Iesu, “E lē ‘ua sefulu ‘ea ma le lua itūlā i le ao? ‘Āfai e savali se tasi i le ao, e lē tausuai o ia, auā e va‘ai o ia i le malamalama o lenei lalolagi.”Faitauga - Tusi Paia: Iosua 13:1-5 O le fa’amatalaina o nisi o galuega tetele a Iosua e maua i le tusi o Iosua 12. Ua fa’amamafa e le mataupu, tupu uma na fa’ato’ilalo e Iosua ma fanua na umia e Isaraelu. E moni o se lisi umi lava o manumalō, ma o so’o se uso na te ausia mea sa mafaia e Iosua, e mitamita i galuega faapea. Peita’i i le mataupu soso’o ane ai, o le faitauga fo’i lea o le Tusi Paia o le asō, na fetalai le Atua ia Iosua, e ui ua toeaina ia, o loo tele pea fanua e tatau ona umia. Ona muamua lea o le Atua e lisi fanua uma o totoe e le’i fa’ato’ilaloina ma faailoa ai ia Iosua o loo tele pea galuega e ao ona fai. Le au pele e, e i ai se taimi faatulagaina e tatau ai ona e faia galuega a lē na auina mai oe. I le tusi o Ioane 9:4; na fetalai Iesu “E tatau ona o’u faia galuega a le ua auina mai a’u, manū o ao; e o’o mai le po, e le mafaia e se tasi ona galue ai.” O tagata soifua uma, e i ai le ao ma le po. O le ao o le vaega o le olaga o se uso a’o talavou ma mataalia. I le ao, o le vaitau lea o loo i ai i se uso le malosi e lauga solo ai le talalelei a Keriso ma mafai ona anapogi ma tatalo poo le a lava le umi e mana’o ai. Peita’i a o’o mai le po e ono fa’aitiitia le malosi o le tagata. E le gata i lea, a o’o mai le po o nisi tagata, e maua i ma’i ma ua le mafai ona fa’aauau le galulue. O lona uiga afai o loo e maua le avanoa e fai ai le galuega a le Atua i le taimi lenei, fai ma lou malosi ma lou manatu atoa. Tusa pe afai ua tele tausaga o lou soifua, o le mea moni, o loo e soifua pea o lona uiga o loo tele pea galuega e mafai ona e faia mo le Atua, faapei ona ia fa’aali ia Iosua i le faitauga mai le Tusi Paia o le asō. E 24 itula o le aso. Pe a ma le afa o nei itula e fa’ailogaina i le i ai o le susulu o le la, ma i totonu o nei itula o le toatele o tagata e galulue ai i a latou lava fuafuaga. A mavae itula o le malamalama e oo mai le pogisa. Na fetalai Iesu i le tusi o Ioane 11:10; afai e savali se tasi i le po, e tautevateva o ia. O lona uiga o le taimi lenei e auauna ai i le Atua ma faia soose galuega na te tuuina mai i ou lima. E tatau ona e galue nei auā a o’o mai le po; e leai se isi, e aofia ai ma oe, e mafai ona galue. O lenei, galue a o i ai pea le ao. Aua le faatuai i le galuega a le Atua. Faamalōlō i e mama’i; lauga le talalelei, tuliese temoni, faufautua i le augatupulaga o soso’o mai ma fa’asusulu lou malamalama ia susulu atu i tagata uma ia o latou fa’amanūina ai lou Tama o i le lagi. Galue manū o ao. I le suafa o Iesu, Amene.

OPEN HEAVENSMATALA LE LAGI MO LE ASO FARAILE 3 IULAI 2026(tusia e Pastor EA Adeboye) Manatu Autu: Tatalo mo le au matutua (Prayers for the elders) Tauloto Tusi Paia: Teuteronome 34:7 “Ua oti fo‘i Mose ‘ina ‘ua selau ma le lua sefulu ona tausaga; e le‘i puaoa ona mata, e le‘i mavae fo‘i lona malosi.”Faitauga - Tusi Paia: Salamo 92:12-15TataloTamā, ou te faafetai ia te oe mo tagata matutua i lo’u aiga, ekalesia ma le nuu. Faafetai i lau puipuiga, tausiga, taitaiga ma faamanuiaga i latou olaga. Le Alii e, faamolemole fesoasoani i tagata matutua i lou siomaga ia tupu lauolaola pea i le mafaufau, i le tino ma le agaga ao faasolo ina matutua pea. Ia aua nei mama’i ao faasolo atu ina matutua, i le suafa o Iesu. Tamā, ia mumū pea le afi o lou malō i olaga o le au matutua i la matou Ekalesia. Ia latou fua pea ni fua i lou malo, i le suafa o Iesu. Le Alii e, faamolemole faaauau pea ona liligi ifo i toeaina uma i lou siomaga le poto mai ia te oe ina ia latou taitai i tupulaga laiti i le ala tonu. Le Alii e, faamolemole ia siomia tagata matutua uma i lo’u siomaga i lou filemu. Ia mamao mai latou le fememeai ma faanoanoaga, i le suafa o Iesu. Le Alii e, ou te tatalo, o tagata matutua uma i lou aiga, lotu ma le nuu o le a latou ausia faamoemoega mo latou olaga. Ia aua lava nei momotuina i latou ae lei oo i lo latou taimi, i le suafa o Iesu. Tamā, faamolemole faataga tagata matutua uma i lou siomaga ia latou maua le mafutaga vavalalata i lou mamalu ao faasolo pea ina matutua, i le suafa o Iesu. Tamā, faamolemole ia faataga tagata matuatua uma i lou siomaga ia siomia i latou i le alofa ma le alofa mutimutivale. Ia aua nei latou iai i se tulaga ua leai se tausiga poo se lagolago mo i latou ao faasolo ina matutua, i le suafa o Iesu. Tamā, faamolemole aapa atu ou a’ao faamalolo i soo se tagata matua o loo ma’i. Ia toe faafoisia vave lo latou malosi ma le soifua maloloina lelei i le suafa o Iesu. Tamā, faamolemole ia siomia soo se tagata matua o loo faanoanoa ona o le maliu o se tagata e pele ia te ia i lou alofa faamafanafana. Ia latou maua lou olioli ma le filemu e sili atu i mea e te manatunatu iai, i le suafa o Iesu. Le Alii e, faamolemole ia laveaiina agaga uma o tagata matutua e lei iloa lava lau afio ma toe faafoisia i latou ua toe foi i tua ina ia toe foi ma ia te oe ae lei ō ese mai lenei lalolagi, i le suafa o Iesu. Tamā, faamanuia i tagata matutua uma i lo’u aiga, la’u Ekalesia ma le nuu i le suafa o Iesu. Faafetai Tamā ua e faafofoga ia matou tatalo, ma e te vave tali mai, i le suafa o Iesu e tatalo atu ai, Amene.

OPEN HEAVENSMATALA LE LAGI MO LE ASO TOFI 2 IULAI 2026(tusia e Pastor EA Adeboye) Manatu Autu: Faaopoopo ma faaopoopo (More after more) Tauloto Tusi Paia: Luka 1:53 “Ua fagaina e ia i mea lelei ē sa fia ‘a‘ai, a o ē mau mea ‘ua aufuaina atu e ia.”Faitauga - Tusi Paia: Filipi 3:5-14I  le faitauga mai le Tusi Paia o le asō, sa faamalau mai e Paulo nisi o matatia na ia ausia. Na ia fai mai o ia na peritomeina i le po valu, e mai le ‘āiga o Isaraelu, o le itū‘āiga o Peniamina, o le Eperu o sa Eperū, ma o ia o le faresaio. Ina ua maea ona ia faamatala faailoga ma tomai na ia ausia, ona ia faapea mai lea ua ia manatu e lē aogā ia mea uma ‘ona o Keriso.E manino o Paulo o se tasi o le au aposetolo e maualuga lona aoaoina. O ia o se loia ma se faresaio, sa aoaoina e se faiaoga tautaua i ia vaitau o Kamalielu ( Galuega 22:3). A faatusa i nei aso, na alu i le Iunivesite pito maualuga ma aoga i lalo o polofesa tautaua tomai ma faailoga. Sa ia ausia mea e viia ai tagata. Peitai, ina ua ia tuuina lona ola ia Iesu, na ia tuuina uma mea na ia ausia i lalo o aao o Keriso ma faataga le Alii e faaaogaina mo le faalauteleina o lona malo. Na faamaualalo o ia ma gauai ia Anania, o le soo o Keriso i Tamaseko ma alu i ana misiona e talai le talalelei ma Panapa, o le sa Levī. E lei faatagaina e Paulo mea na ia ausia e taofia lona saili pea i le Alii ma lona loto atoa. O le mealilo o matatia na ausia e Paulo o lana savaliga ma le Atua e pei ona maua i le Filipi 3:13 “Le ‘au uso e, ‘ou te lē manatu ‘ua ‘ou maua, a o le mea e tasi ‘ou te faia, ‘ou te fa‘agalogalo i mea ‘ua tuana‘i, ‘ou te momo‘e punou a‘i fo‘i i mea o lumana‘i.”Sa filiga pea Paulo ia aoaoina pea. E na te lei faatagaina mea ua ia iloa e taofia lona iloa o mea o loo fia faaali atu e le Atua ia te ia. O le tulaga lea e tatau ona e iai pe afai e te fia savali vavalata ma le Atua, e ausia mea tetele mo lona malō. Fai mai le Auega 3:23, o lona alofa mutimutivale e fou i taeao uma. Afai e te uu mau pea i le alofa mutimutivale o ananafi, e faapefea ona e maua le vaega o le asō? E iai lava le faaopoopo i mea o loo e maua i le asō, ma e mafai e le Atua ona foai atu mea faaopoopo e sili atu i mea ua maea ona ia foai atu ia te oe. Peitai seiloga e te faamaualalo e maua mai le Alii ona e maua lea o le faaopoopo mai ia te ia. O se tasi o fili o le tuputupu pea o le mafaufau ua taunuu. O le taimi e manatu ai le tagata ua latou taunuu (ausia le faatumutumuga o lona olaga), ua latou taofia le tuputupu a’e. Le au pele e, ole atu i le Atua e fesoasoani ia te oe e tausia se loto e fiaai mo ia ma saili faifaipea e ausia mea tetele mo lona malo. E na te foai atu le faulai o lona alofa tunoa, ina ia e tumau pea ia te ia ma ona manuia. TataloTamā, faamolemole foai mai ia te a’u le fia ai e saili ai pea ia te oe, i le suafa o Iesu, Amene. 

OPEN HEAVENSMATALA LE LAGI MO LE ASO LULU 1 IULAI 2026(tusia e Pastor EA Adeboye) Manatu Autu: Aua nei pō lau vaai (Dont lose your sight) Tauloto Tusi Paia: Salamo 13:3 “Le ALI‘I lo‘u Atua, ‘ia e silasila mai ma tali mai ‘iā te a‘u; ‘ia e fa‘amalamalamaina o‘u mata, ne‘i ‘ou moe i le oti;”Faitauga - Tusi Paia: Faamasino 16:4-26O le faitauga mai le Tusi Paia o le asō, na faatauanau Talila ia Samasoni e faaali atu ia te ia le mealilo o lona malosi, ona ia logoina lea o le au Filisitia. Na faaaogaina e le au Filisitia lea faamatalaga e sele uma ai lona lauulu ao moe i vae o Talila, na latou saisai ia te ia, sali ese ona mata (tulou) ma faafalepuipui ia te ia. Peitai ua maea sina taimi, ona toe tutupu lea o le lauulu o Samasoni peitai e na te lei toe maua lana vaai. O le tagata na ia fasia se leona i ona lima, fasioti i le faitau afe o tagata i le auvae o le asini, amo le faitotoa o le aai ma tuu i luga o le mauga, ua ia faalagolago i se tamaitiiti e taitai ia te ia ina ia aua nei sulu pe paū, ona o le alu i le fafine mai nuu ese, le Filisitia ma soli ai tulafono a le Atua. O i latou o loo taaalo i le agasala, e lamatia i latou i le pō o le vaai, e pei o Samasoni. O le tiapolo ma ana ‘au, fai mai le Efeso 6:12, o alii o le pouliuli i lenei lalolagi ma e naunau e ola uma tagata i le pouliuli e pei o i latou. O le mafuaaga lea e latou te lē taofia se mea ae ia faapogisāina le vaai faaleagaga a le kerisiano faatuatua. O kerisiano e pō le vaai faaleagaga, e amata ona faapea mai o mea lelei e leaga ao mea leaga e lelei. E avea foi i latou ma pologa i mea sa latou manumalo ai muamua. O le mafuaaga lea o se tagata o le Atua e masani ona lauga e tetee i le agasala, mo se faataitaiga, ua amata ona faapea mai o le mulilua e lē o se agasala. O sea tagata e ono sese le sii mau mai le Tusi Paia ina ia tau faamalamalama ai lona tauaso. E masani ona faaosofia e le tiapolo kerisiano faatuatua ia faapogisaina le vaai, i le faaaogaina lea o latou vaivaiga ia pauū atu ai i le agasala, e pei o Samasoni. Ae lei paū Samasoni, sa vaavaai ma maitau pea e le au Filisitia, ma iloa ai lona vaivaiga o le tuinanau i tamaitai, o lea na latou taupulepule ai ma Talila ina ia paū o ia. E faapena foi le tiapolo, e vaavaai ma maitau tagata ina ia iloa o latou vaivaiga, ona ia faaosoosoina lea ia agasala, ona faoa lea o latou vaai faaleagaga. Aua nei e paū i lenei mailei. Le au pele e, o fai ea ma e paū atu i le agasala? O e ola ea i le agasala ae o loo taumafai lava e faafoliga o se kerisiano faamaoni? Aua e te faatagaina Satani e manumalo i le aveesea o ou mata faaleagaga ina ia ona faapologa ia te oe. Alu i le Atua ma le loto maualalo ma ole atu mo se fesoasoani. E na te avatu le alofa tunoa i ē loto maualalo (Iakopo 4:6) ma o lona alofa tunoa e fesoasoani ia te oe e manumalo ai i le agasala (Roma 6:14). Ia aua lava nei pō lau vaai, i le suafa o Iesu. Aua e te taalo i le agasala i nei pō lau vaai faaleagaga, i le suafa o Iesu, Amene.