"ఏమిసంబంధము " . రచన కవిసామ్రాట్ విశ్వనాథ సత్యనారాయణ గారు

💐💐కథాభిమానులకు నమస్కారం 🙏 *ఈ వారం మనం వినబోయే కథ "ఏమిసంబంధము " . రచన కవిసామ్రాట్ విశ్వనాథ సత్యనారాయణ గారు* జ్ఞానపీఠ బహుమతి పొందిన శ్రీమద్రామాయణ కల్పవృక్షం కావ్యము, వేయిపడగలు , ఏకవీర , చెలియాలికట్ట వంటి నవలలు , విశ్వనాథ మధ్యాక్కరలు , కిన్నెరసాని పాటలు , ఋతుసంహారం గేయ కావ్యం ఇలా శతాధిక గ్రంథకర్త అయిన మాహానుభావుని కథ ఈ వారం వినిపించడం ఒక అదృష్టంగా భావిస్తున్నాను. విశ్వనాథ వారి చిన్నకథలు చదివితే , ఛాందస వాదిగా ఆయనకు ఎలా ముద్ర వేశారో అర్థం కాదు. సరళ గ్రాంధికంలో రాసిన ప్రస్తుత కథ "ఏమి సంబంధము " ప్లేటోనిక్ లవ్.... అనదగ్గ....అమలిన ప్రేమ భావనను అత్యంత సున్నితంగా హృదయానికి చేరువ అయ్యేలాగా చెప్పిన కథ.కల్పిత కథ అంటే నమ్మశక్యం కాదు.కారణం కథలో ఆయన సృష్టించిన పాత్రలు , సంఘటనలు , సమయాలు, సందర్భాలు అన్నీ కూడా సహజత్వానికి అతి దగ్గరగా...నిజంగా జరిగిన కథే అనిపిస్తుంది. వాస్తవ చిత్రణకి ఈ కథ అద్దం పడుతుంది. కథ చదివిన తరువాత మనసు మూగ వేదనకు గురి అవుతుంది. ఒక ప్రేమ కథను విశ్వనాథ వారు తమదైన రీతిలో అత్యంత సంస్కారభరితంగా చెప్పిన తీరు, కథ పేరులో ఉన్న వైరాగ్య భావన, ఆ మహానుభావుడికి చేతులెత్తి నివాళి అర్పించే విధంగా ఉంది ఈ కథ. ఆయన తిరుగాడిన విజయవాడలో , వారి ఇల్లు కల్ప వృక్షము ఉన్న మారుతినగర్ కి అతి సమీపంలో నివసిస్తూ వారి కథ చదివి వినిపించడం నాకు భగవంతుడు ఇచ్చిన వరం. వినండి విశ్వనాథ వారి ప్రేమకథ "ఏమిసంబంధము ".🙏మీ కొప్పర్తి రాంబాబు , Retd AGM Indian Bank Vijayawada. Ph 96770 15158.