EP98 文學烏亂濺：風頭水尾大發展？褲帶相縛的麥寮和六輕，歡迎麥寮少年來講新冊《台灣地方政治讀本》ft.林鴻揚

聽眾朋友逐家好，歡迎收聽阿愷之聲「文學烏亂濺」單元，這集欲介紹一本今年八月左岸文化出版的新冊《台灣地方政治讀本：來自青年世代的提問、實踐與反思》，咱邀請著這本冊的作者之一，也是阿愷臺大研究所時期的好朋友林鴻揚，來講伊的家鄉麥寮和六輕的故事。 風頭水尾大發展？褲帶相縛的麥寮和六輕？ 家族世代攏佇麥寮的鴻揚講著，六輕一直是地方居民無啥愛提起的話題，一方面是因為逐家已經慣習，另外一方面是因為內底有太濟袂使講予明的代誌。鴻揚國中時就出外讀冊，一直到研究所來到臺大地理學研究所，才決定轉來研究家己的家鄉，因為伊佇台北定定看著科學家和NGO對六輕的污染提出警告，但是鴻揚轉去麥寮時，續發現遮的人攏無意無意。 為啥麥寮人對六輕無意無意？到底咱對地方政治瞭解有偌濟？ 今年八月，主編嚴婉玲揣了一群作者來寫這本討論台灣地方政治的冊，雖然咱攏知影有人的所在就有政治，但至到底地方的政治生做啥款？這群作者的背景有記者、政治工作者、NGO工作者和研究生等等，各自攏對台灣各縣市有誠深入的觀察。林鴻揚佇這本冊內底就負責寫麥寮和六輕這个大企業的關係，到底企業按怎進入地方？地方按怎和企業互動？這篇文章將地方社會的運作寫了真立體，就親像佇現場。 阿愷之聲在此推薦這本冊，這本冊推薦兩種人看，一種是厝住佇中南部、東部抑是外島，每一遍轉去家鄉投票攏毋知影欲投予誰的人；另外一種是台北出世的囡仔、彼種叫是台北等於全台灣的人。這本《台灣地方政治讀本》內底每一篇的故事攏有夠寫實有夠好看，但是看了險些冷去，因為遮攏是台灣真正的故事。 聽眾朋友歡迎收聽本集節目，風颱天逐家要保重！ ＊來看冊：https://www.books.com.tw/products/0010964351 ＊歡迎贊助支持本節目： https://open.firstory.me/user/ckowqyem1p4lt08481nvounvr ＊歡迎call in本節目： https://open.firstory.me/user/ckowqyem1p4lt08481nvounvr/comments Powered by Firstory Hosting