Es raksteišu, bet voi tu skaiteisi? - Latgolys prozys skaitejumi 2023

Lai veicynuotu literarū procesu Latgolā i latgaliski raksteitūs tekstu radeišonu Latvejā, jau catūrtū reizi latgalīšu kulturys kusteiba “Volūda” izsludynuoja konkursu “Latgolys prozys skaitejumi”, aicynojūt pīsadaleit vysa vacuma Latgolys kulturtelpai pīdareigus autorus, kurī roksta prozu. “Latgolys prozys skaitejumūs 2023”, kurūs devize beja “Es raksteišu, bet voi tu skaiteisi?” tyka sajimts 21 vysaidu autoru dorbs kai latvīšu literarajā, tai latgalīšu rokstu volūdā. Par lobuokajim atzeiti literaturys telpā jau labi zynomu, kai ari vēļ naīpazeitu itaidu autoru – Alda Bukša, Ilzis Spergys, Vita Briška, Dāvida Rubena, Ilzis Aizsilys, Sarmītis Trūpys i Egitys Kancānis – prozys dorbi. Konkursa uzvarātuojs tiks paziņuots 7. decembrī konkursa nūslāguma pasuokumā “Proza i karbonadis” Rēzeknē. Ar mierki īsavērt Latgolys prozā, kai ari apsarunuot par i ar lobuokajim latgalīšu prozys autorim, sasateikam ar konkursa “Latgolys prozys skaitejumi” organizatoru, latgalīšu kulturys kusteibys “Volūda” (bīdreiba “LgSC”) puorstuovi Amandu Anusāni, īprīškejūs treis godu konkursa “Latgolys prozys skaitejumi” uzvarātuoju, ituo goda vīnu nu žurejis puorstuovu Anneli Slišāni, literaturzynuotnīku i žurejis lūcekli Valentinu Lukaševiču, kai ari vīnu nu septeņu literatu, kas itūgod atzeits par vīnu nu lobuokūs prozys dorbu autoru – Vitu Brišku. Literaturzynuotnīks Valentins Lukaševičs izsver, ka itūgod konkursam dasaceitūs dorbu vydā ir puorsteidzūši daudz laikmeteigu dorbu. „Latgalīši mani puorsteidze, ka jī tai interesanti, breivi, drūsmeigi rakstejuši. Cylvāku vajag pīrunuot lauzt klasiskū sižetu, jo klasiski tei jam ir taida lela trauma… Itūreiz latgalīši beja super breivi i jī breivi pludynuoja sovys atminis, puordūmys, fantazejis, emocejis, asociacejis. Tai interesanti pludynuoja. Cīši laikmeteigi.” Annele Slišāne, taipat kai puorejī sarunys dalinīki iz latgalīšu prozys i literaturys atteisteibu iz prīšku verās pozitivi. „Latgalīšu literatūra atsateista i maņ prīca, ite pīkrisšu Vaļukam (Valentins Lukaševičs), ka dorbi palīk kuo muokslys dorbi. Jī palīk lobuoki, kvalitativuoki i tod jim ir ari leluoka īspieja aptvert leluoku skaiteituoju lūku ni viņ Latgolā, bet ari Latvejā i pasaulī īt tuoluok. Palīk vaira skaiteituoju.” Turpynoj Valentins Lukaševičs „Verūtīs iz pādejim godim latgalīšu literaturā, es varātu pasaceit, ka tei nabyus vaira tei latgalīšu literatura, kura vacūs laikūs verās poļaku paraugus, krīvu, vuocu, latvīšu paraugus. Maņ grybātūs, lai piec godu desmit pasaruodeitu taids fenomens, kai soka, skandinavu detektivs, skandinavu kino i, par pīmāru, pasaceitu navys tikai Preiļu konceptualisti, bet, pīmāram, latgalīšu literatura i tu saprūti, ka tys ir koč kas atškireigs. Tys nav koč kaids susātivs nu Reigys tekstu. Tys ir piļneigi koč kas taids, beidzūt tik sovpateigs, tik originals. Kod pasaceis “latgalīšu literatura” i tu saprūti, ka tys ir koč kas tik unikals, ka tys nav ni ar kū saleidzynojams, ka tys ir koč kas, kas aizguojs pa prīšku vysam.”