Fa’asa’oloto Mai Fetu’u Tuufaasolo I Auga Tupulaga. (Deliverance From Generational Curses)

OPEN HEAVENSMATALA LE LAGI MO LE ASO SA 1 MATI 2026(tusia e Pastor EA Adeboye) Manatu Autu: Fa’asa’oloto Mai Fetu’u Tuufaasolo I Auga Tupulaga. (Deliverance From Generational Curses)Tauloto Tusi Paia: Efeso 1:3 “Ia fa‘afetaia le Atua, o le Tamā o lo tatou Ali‘i o Iesu Keriso, o lē ‘ua fa‘amanuia mai ‘iā i tatou i mea uma lava e manuia ai i la le Agaga, i mea o i le lagi, ‘ona o Keriso;”Faitauga - Tusi Paia: Ieremia 31:27-31Sa sau ia te a’u se tamaita’i e tolusefulu tolu (33) ona tausaga, ua fai lona aiga, mo se tatalo. O lona faafitauli, o loo fai pea ana feau vai (tulou) i le moega pe a moe i le po ma ua fa’amāasiasia ai lava ia. Sa ou fai i ai e lē o se faafitauli lea tulaga ma o le a avatu e le Atua ia te ia se totoga fou. Peita’i a’o lei faia le tatalo na fai mai le māfine, “Lau susuga e le na o a’u o loo mafatia i lea tulaga i lo’u aiga.” Na fa’aauau ona faamatala mai ia te a’u, e maua ai lona tinā, tinā o lona tinā, ma fafine uma o lona aiga i le fa’ama’i lea o le fa’asusū moega pe a momoe i le po (tulou). Na o’u iloa ai i le taimi lea o le faafitauli o le māfine e alu i auga tupulaga. I le suesuega atili o le mataupu na o’u iloa ai o le faafitauli na amata mai i se mea na tupu i le va o se isi tagata ma le tinā o lona tinā, ma folafola ai e lea tagata se fetu’u i luga o lona tinā matua e faapea, “e amata atu nei, o fafine uma o lou aiga o le a fa’asusũ moega (tulou), sa ou fai i le māfine, “tu’u lou ola iā Iesu Keriso ona e alu ese lea ma le toto o lou aiga fa’aletino ae avea oe ma tagata fou. Na talia e le tinā le faaolataga ma na fo’i mai i le aso no soso’o ai ma le olioli tele. O le taimi lea ua le sau na o ia, a ua omai ma isi fafine o lo latou aiga. Na faapea mai le māfine ia te a’u o le taimi muamua lea ua lelei ai sana moe i le po atoa ma ua le susū ai lona moega. O isi fafine na latou omai na ofo uma o latou ola ia Iesu ma na uma ai fo’i ma le fetu’u. Ou te avatu le talalelei mo oe, afai o aafia lou aiga i se fetu’u mo ni auga tupulaga, e faaumatia i le asō, i le suafa o Iesu. A omai tagata i totonu o le aiga o le Atua, na te fa’afouina mea uma lava i o latou olaga (2 Korinito 5:17), ma agava’a ai i latou i manuia tuufaasolo i auga tupulaga. Soosemea sa polokaina ma faalavelave i tagata ona e mafua mai o latou gafa ma tupuaga, o le taimi e avea ai Iesu Keriso ma o latou Fa’aola, e lē toe i ai se malosiaga o le fili ia i latou auā ua ulufale i latou i se aiga fou, aiga o le Atua. I lona aiga Paia, o i ai le ola, tamāoaiga, poto, fua tulu’i, olioli, filemu, ma mea lelei uma lava. O le soifua tului o se faamanuiaga mo i latou uma o i le aiga o le Atua, ma i vaega o le olaga na pagatia ai i latou ona o le agasala a o latou tuaā e tupuga mai ai, na folafola e le Atua o le a ia āsia i latou i lona alofa le mavae ma lona alofa mutimutivale (Esoto 20:6).I le aiga o le Atua, e lē toe sa’o ai le fa’aupuga faapea e ai e tamā le vine moto ae magiagia ai nifo o le fanau (Ieremia 31:28-30). E alu loa se uso ia Keriso, avea loa ia ma suli o le itū paia o le Atua ma avea ana faamanuiaga sautualasi ma vaega o lona olaga i aso ta’itasi, o measina ia a soose tagata faatuatua. Le au pele e, ua e auai i le aiga o le Atua? Ia faia sau faaiuga i le asō, I le suafa o Iesu, Amene.