Faatele (Multiply)

OPEN HEAVENS MATALA LE LAGI MO LE ASO LULU 21 IANUARI 2026 (tusia e Pastor EA Adeboye) Manatu Autu: Faatele (Multiply) Tauloto Tusi Paia: Teuteronome 1:11 “Ia atili fa‘ato‘ateleina ‘outou e le ALI‘I le Atua o ‘outou tamā, ‘ia fa‘ato‘aafeina lo ‘outou faitau, ma ‘ia manuia ‘outou ‘iā te ia, e pei ‘ona fetalai mai o ia ‘iā te ‘outou” Faitauga - Tusi Paia: Kenese 26:12-14 E lelei le tuputupu pea, peitai e tusa ma le Kenese1:27-28, o lou tuputupu ae, e tatau ona faateleina. O le uluai fuafuaga a le Atua ia faatupuina ma faateleina ae lē na o le faaopoopoina. O le tuputupu e ala i le faaopoopo e lelei, peitai o le tulaga pito maualalo lena. Mo se faataitaiga, e tatau i se tamaitiiti ona siitia mai i se vasega i le vasega i luga atu i le tausaga e sosoo ai. Peitai o se tamaitiiti e siitia i le lua vasega i le tausaga, e iloga ma tulaga ese o ia. I lou tulaga o se atalii poo se afafine o le Atua, e te lē pei o le toatele, e taua oe, o lona uiga, e le gata e tatau ona e tuputupu pea, e tatau ona faateleina i soo se vaega o lou olaga. I le faitauga o le Tusi Paia o le asō, e tatou te iloa ai o Isaako na lūlū i le nuu, ma i le tausaga lava lea, e fua tai selau na ia seleseleina. Fai mai le tauloto mai le Tusi Paia o le asō, e mafai e le Atua ona faateleina oe e faato’aafeina. I le Kenese 21:1-7, e toatasi le atalii o Aperaamo ma Sarai, o Isaako. Peitai i le Kenese 25:21-26, na faamauina e le Tusi Paia na fanau mai ia Isaako se masaga. A e faitau atu i le Kenese 35:22-26, o se tasi o le masaga na fanau mai ai le 12 atalii na tupuga mai ai le 70 o tagata ma i le Esoto 12:37, o lenei fuainumera ua siitia i le 600,000 alii ae lei faitauina tamaiti ma fafine. Atalii poo le afafine o le Atua, ‘aua le faatapulaaina lou tagata i le na o le saili e tuputupu e ala i le faaopoopo. E tatau ona taulai lau faamuamua ia faateleina, aua o le finagalo lea o le Atua mo oe. Ina ua avea a’u ma taitai aoao o le Ekalesia RCCG, sa 39 o’u tausaga. Na faaalia e le Agua i lo’u tama faaleagaga o le tagata e sui ia te ia, o le a faalauteleina le Ekalesia i le lalolagi atoa, e ui e na o totonu o Nigeria sa iai i lea taimi. Ana faapea na ou saili ia siitia e ala i le faaopoopo, e siitia atu i se atunuu e tasi i le tausaga e faatuina ai le malo o le Atua, semanu e faapenei faatoa oo atu le lotu i le 45 atunuu, ae lē o le 190 atunuu e pei ona iai nei. E matua lēai se ala e ono mafai ai ona ausia la matou galuega mai le Atua pe ana leai le faateleina. Le au pele e, o le ausia moni o le fuafuaga a le Atua mo lou olaga, e tatau ona e saili e faateleina. Na ia avatu le pule mo le faateleina mai lava i le amataga o le foafoaga i le Kenese 1:28. ‘Aua le faagataina le malosiaga o loo ia te oe, ona o lou mafaufau e lē naunau ia faateleina. Faatuatua i le Atua e faalautele lou siomaga ia faateleina, ma o le a ia faateleina oe, e ala i lona alofa tunoa. Afai o oe o se afafine poo se atalii o le Atua, aua e te malie i le faaopoopo, ae saili atu ia faateleina, i le suafa o Iesu, Amene.