Faatonutonu o le faauuga 2 (Conductors of the annointing 2)

OPEN HEAVENSMATALA LE LAGI MO LE ASO GAFUA 22 TESEMA 2025(tusia e Pastor EA Adeboye) Manatu Autu: Faatonutonu o le faauuga 2 (Conductors of the annointing 2)Tauloto Tusi Paia: Iopu 17:9 “O lē ‘ua amiotonu e tumau pea o ia i lona ala, o ia fo‘i ‘ua mamā ona lima e fa‘aopoopoina pea lona malosi.” ‭‭Faitauga - Tusi Paia: Salamo 24:1-5O ananafi na ou talanoa atu ai o lima e faatonutonuina le gaoioi o le faauuga mai le ulu o le tagata faatuatua. O mea e faia e le tagata faatuatua i ona lima e fua iai pe faapefea ona galue mai Agaga Paia. I le Esoto 17:8-17, ina ua sisii lima o Mose i luga o le mauga, na manumalo Mose i ona fili, peitai ina ua vaivai ma amata loa ona tuu i lalo ona lima, ua amata foi ona faiaina Isaraelu. I le Esoto 14:21-28, na faaaoga e Mose ona lima i se auala matautia, na faaloaloa ona lima i luga o le sami, ona agi mai lea o se matagi malosi mai sasae, ma ua saunia se ala e lei iai muamua. O le matagi mai sasae o se faailoga lea o le Agaga Paia i le Tusi Paia. I le 1981, ina ua faatoa maea ona tofia a’u e avea ma Taitaifono Aoao o le Ekalesia, na ou malaga atu i lo’u nuu i se vaega i Saute i Sisifo i Nigeria. Ua iloa ai, e leai se auala tuusao i lo matou nuu ma e pau le auala e mafai ona faia, o le ui atu i seisi nuu tuaoi, ona faatoa taunuu atu lea i lo matou nuu, ma e tusa ma le 70 km e faaopoopo i le matou malaga i le auala umi lea. Ina ua ou taunuu atu i lo matou nuu, na ou fai atu i ou tagata e tatalo ma ole atu i le Atua ia faia se auala tuusao e ui atu ai taaavale i lou nuu, ma fesootai ai i isi vaega o le atunuu. Na ou faasino iai le vaega  e tatau ona iai le auala.  Na sisii ou lima ma faapea atu, ‘i le suafa o Iesu, ia iai se auala’. E ono masina mulimuli ane, ae faia se faaiuga a le malo o le a fausia se auala i le vaega tonu lea. Sa leai se mafuaaga tatau na faia ai lea faaiuga ona o le taimi lea na pulea malosi ai e le fitafita,  na latou fausia aua na maua e le Atua lima o se tagata e mafai ona ia faaaogaina e saunia se ala i se nofoaga e lei iai muamua. Le au pele e, e manaomia e le Atua ou lima e faatonu ai vavega tetele i le lalolagi. Fai mai le Salamo 24:4, o i latou e iai lima mamā, e mafai ona o atu i le mauga o le Alii. E mamā ea ou lima e mafai ai e le Atua ona faaaoga? E mafai ea ona ia faaaogaina o se ala e faia ai lona finagalo i le lalolagi? E lē tatau ona tuua ou lima i se mea o iai le amioleaga (1 Tesalonia 5:22). Aua nei faaaogaina ou lima e avatu pe maua ai tupe i ala faaalatua, e faatigā ia Agaga Paia. Aua e te faaaogaina e faia ai le faitaaga pe fesuiaina fuainumera ina ia siitia lou tamaoaiga i se auala solitulafono, e faatiga foi ia Agaga Paia lena faiga. Ia faaavanoa ou lima e aoga i le Atua ina ia mafai ona ia faia ai galuega tetele e faaaogaina ai. TataloTamā, e avanoa o’u lima e aoga mo lau galuega i le asō ma aso uma, i le suafa o Iesu, Amene.