ဂျိတ်ခ်ပေါလ်နဲ့ မိုက်တိုင်ဆန် ထိုးမယ့်ပွဲကတော့ ကြည့်ကောင်းဖို့ ရှိနေပြီ

မြန်မာစံတော်ချိန် လာမယ့် နိုဝင်ဘာလ ၁၆ ရက်၊ စနေနေ့ မနက် ၅ နာရီရောက်ရင် ဂျိတ်ခ်ပေါလ်နဲ့ မိုက်တိုင်ဆန် တို့ ပါဝင်တဲ့ လက်ဝှေ့ပွဲကြီးကို ကျင်းပတော့မှာပါ။ အမေရိကန်ပြည်ထောင်စု၊ တက္ကဆက်ပြည်နယ်၊ အာလင်တန်မှာရှိတဲ့ AT&T အားကစားကွင်းကြီးထဲမှာ ဒီပွဲကို ကျင်းပသွားမယ်လို့ သိရှိရပါတယ်။ ဒါဟာ အမေရိကန်ဖွတ်ဘောကလပ် ဒဲလ်လတ်စ်ကောင်းဘွိုင်အသင်းပိုင်ဆိုင်တဲ့အားကစားကွင်းကြီးလည်းဖြစ်ပါတယ်။ အဲ့ဒီပွဲစဉ်မှာ တွဲဆိုင်းပေါင်း ၇ ဆိုင်းတောင် ပါဝင်မှာပါ။ ဂျိတ်ခ်ပေါလ်နဲ့ မိုက်တိုင်ဆန်တို့ကတော့ Main Event ခေါင်ပွဲစဉ်အဖြစ် ထိုးကြမှာဖြစ်ပါတယ်။ ပွဲချီတစ်ချီကို ပွဲချိန် နှစ်မိနစ်စီ ကြာမြင့်မှာဖြစ်ပြီး ၈ ချီပွဲအဖြစ် ထိုးသွားမှာပါ။ ဒီပွဲမှာ ၁၄ အောင်စ လေးတဲ့ ဘောက်ဆင်လက်အိတ်ကိုဝတ်ဆင်ပြီး ထိုးရမယ်လို့ သိရှိရပါတယ်။ ဟဲဗီးဝိတ်တန်းလက်ဝှေ့ပြိုင်ပွဲတွေမှာ ပုံမှန်အားဖြင့် ၁၀ အောင်စလေးတဲ့လက်အိတ်ကို ဝတ်ဆင်ပြီး ထိုးကြရပေမယ့် ဒီပွဲမှာတော့ ဂျိတ်ခ်ပေါလ်နဲ့ မိုက်တိုင်ဆန်တို့ကတော့ ပိုလေးတဲ့လက်အိတ်တွေကို ဝတ်ဆင်ပြီး ထိုးကြတော့မှာပါ။