Garðar: „Þess vegna er þetta svona hættulegt, maður fer strax í sjálfsmorðshugleiðingar“

Garðar Eyfjörð hefur glímt við margskonar fíkn frá unglingsaldri og verið umkringdur alkóhólistum og fíklum allt sitt líf. En hann segir að það sé ein fíkn sem er verst, spilafíknin.Garðar birti myndband á TikTok fyrir stuttu þar sem hann ræddi um spilafíkn og vandanum sem blasir við okkur í dag þegar áhrifavaldar, rapparar og önnur þekkt andlit eru fengin til að auglýsa fjárhættu- og veðmálafyrirtæki og virðist markhópurinn aðallega vera ungir karlmenn. Garðar segist vita til þess að drengir í níunda og tíunda bekk í grunnskóla séu að veðja í stærðfræðitímum.Hreinskilið og hispurslaust myndband Garðars vakti mikla athygli og er hann mættur í Fókus, viðtalsþátt DV, til að ræða um eigin reynslu af sjúkdómnum, baráttunni og batanum. Hann brennur fyrir að vekja athygli á málefninu en hann óttast um heilsu og líðan þeirra sem er verið að soga í þennan heim með fölskum loforðum um peninga og skemmtun. Hann segir þetta grafalvarlegt og hættulegt, en hann þekkir það vel. Hann hefur sjálfur komið nálægt því að taka eigið líf og hefur misst vin vegna sjúkdómsins.