Gruomotplauktā par pyrmū komiksu latgaliski „Sunāns breiveibā”

Pi mikrofona par garuokim laikim jius uzrunoj Raibīs, kurš sovu reizi aizaraun ar literaturu, kai ari ar karikaturu zeimiešonu. Itamā reizē jis mums pastuosteis par naseņ izguojušū, pyrmū komiksu latgaliski „Sunāns breiveibā”. Komiksa autoris ir divejis jaunys mārgys, tekstu autore – literate i viesturneica Laura Melne, sovpus muokslineica ir Vivianna Maria Stanislavska. Izdeviejs – latgalīšu kulturys kusteiba „Volūda”. Verūtīs viesturē, Latvejā ar komiskim ir kai ir, drupeit biedeigi. Te es dūmoju taišni ar pošu latvīšu/latglīšu originaldorbim. Prūtams, munā atmiņā ir vēļ izdevnīceibys „Egmont” izdūtī komiksi, bet tī jau beja [voi ir] vysim zynomī amerikaņu aizjiuru varūņu pīdzeivuojumi, kur Donalds Daks i Mikejs Mauss runuoja latvyski. Nav jau tai, ka Latvejā piļneigi nivīns nazeimātu komiksus. Ir taids muokslinīku izdūts i veiduots komikss ar nūsaukumu „kuš!”. Bet nu molys verūtīs, tei auditoreja ir poši muokslinīki kai ari storptautyski pīaicynuoti muokslinīki, kur tikt uzjimtam jūs aprynduos nav nimoz tik vīglai. Īinteresātī klauseituoji par „kuš!” komiksu drūsai atrast škārsteiklā. Komikss „Sunāns breiveibā” ir latgalīšu pyrmais komikss, tys tīsa. Suoksim ar tū, ka komiksā viereibu pīvieršu, tai saceit, prakstiskajam veidam. Ir bīzī vuoki, kū mozuoka vacuma bārni var stypruok pačamdeit voi vuokūs īlaist zūbus, īšklopys ari ir nu styngruoka papeira.  I kas labi – burtu lelums ari ir izvālāts gūdam, jo navajadzēs saspryndzynuot acs. Komiksa stuosts ir taids pats kai nūsaukums – par sunāna pīdzeivuojumim, teikūt laukūs, breiveibā. Kai jam tī veicās, nu tys jums pošim juonūskaidroj, dabojūt rūkā itū komiksu. Komiksu žanrs, pa munam, ir unikals, jo tū var skaiteit kai lels, tai mozs. Komiksu vīgļuok ir ari tulkuot iz cytom volūdom. Laikā, kod jaunuoku cylvāku lūkā dominej manga animacejis i manga komiksi, latgaliskais komikss ir cīši apsveicams lokalais produkts. Tys apgolvuojums, ka komiksus skaita voi animacejis kinys verās viņ bārni, ir napatīss. Ja izavēlēsit nūsavērt kaidu nu japaņu režisora Hajao Mijazaki i juo studejis „Studio Džibli” taiseitū šedevru, varu apgolvuot, ka nu tuo skaistuma prīcuosīs kai jiusu vyda mozais, tai lelais bārns. Tū jums ari nūvieleju.