Gruomotplaukts - “Kai palikt par eistynu luoci”

 “Kolnasātys” gruomotplaukta rubrikā latgalīšu kulturys ziņu portala lakuga.lv redaktore Laura Melne itūreiz īpazeistynuos ar jaunu gruomotu bārnim latgaliski – “Kai palikt par eistynu luoci”. Tim, kas sekoj leidza nūtikšonom latgalīšu literaturā, luocāns Meikuleņš i juo draugi jau ir pazeistami nu Meldrys Gailānis 2018. godā izguojušuos gruomotys “Meikuleņš īpazeist omotus”. Niu mozuokī skaiteituoji var turpynuot īpazeit jūs pīdzeivuojumus jaunā gruomotā – “Kai palikt par eistynu luoci”, kas veļteita emoceju saprasšonai i pījimšonai. Lai ari gruomotys nūsaukumā tys dūmuots drupeit cytā nūzeimē, luocāns Meikuleņš patīseibā ari ir eistyns luocs. Nazkod tū, tūreiz vēļ ar vuordu Mikijs, duovonā konkursā sajāmuse Meldrys Gailānis vacuokuo meita. Meldra kai jau literate radejuse par luocānu puosokys, kū stuostejuse sovim bārnim. Kod vacuokuo meita Madara Luīze izauguse, Meikuleņš tics juos mozajai muosai Irbei Bārbalai, tok mamys puosokys turpynuojušuos. I, dzeivojūt Latgolā, Mikijs puorguojs iz latgalīšu volūdu i reizē ari nūmainejs vuordu iz Meikuleņu. Obejis meitys sovuos stuostūs par luocāna puosokom pasadalejušys ari iz gruomotys pādejuo vuoka, tok publicitatis materiali viestej, ka “Kai palikt par eistynu luoci” jau ir autoris veļtejums sovim unukim – Madarys Luīzis dālim. Izdavums ir boguoteigai ilustrāts – pi tuo, taipat kai īprīškejuos gruomotys par luocānu Meikuleņu, struoduojuse muokslineica Līga Munda. Kotra nu sešu puosoku viestej par kaidu emoceju – naticeibu sev, augstpruoteibu, sirdeigumu, rībumu pret cytaidū, baili, skumi i prīcu. Piec kotrys puosokys sekoj socialuos pedagogis Laurys Mičulis-Šustis sagataveituo dorba lopa par konkretū emoceju, kas bārnim ļaun tū lobuok saprast. Tamuos ir kai praktiski aizdavumi, kur koč kai juozeimej voi juoroksta, deļtuo vajadzeigys lopys i rokstomī pīdarumi, tai, pīmāram, pavuiceiba, kai tikt golā ar sirdeigumu voi, es saceitu, pat trauksmi, kas nūderēs na viņ bārnim, tok ari pīaugušajim. Taipat gruomotys nūslāgumā ir psihologis Ingys Gedrimys ceļa vuordi par puosoku nūzeimi bārnu atteisteibā. Gruomotys mierkauditoreja ir pyrmsškolys i suokumškolys vacuma bārnim, tok ruodīs, ka vysulobuok tū byutu skaiteit kūpā ar kaidu pīaugušū.