咕啦啦正能號2023年回顧

大家好，我係船長Coolala。。。我諗大家對呢句說話唔會陌生（梗係啦！集集都聽到）！2023年對『船長Coolala』及其『咕啦啦正能號』係一個新開始，亦都係我自己對自己嘅一個肯定。之所以開呢個頻度（不論係Podcast/Youtube）係因為聽得太多故事了；耳聽得太多人因為一啲經歷而失去自信，又或者係缺乏愛而誤會陪伴便等於愛繼而被人不斷利用及傷害再成為真正嘅墮落者「The Fallen」。 當然我唔係救世主，我都係一個普通人，都一樣有過經歷先會變成今日嘅我。膽小、怕事無信心其實都係我曾經嘅寫照；例如我會怕有人唔喜歡我把聲、我覺得無可能完成每一篇說書文、完全唔識後期製作、有冇人聽？有無人CLSS？又或者我又會唔會再次「半途而廢」呢？直至我不斷睇唔同嘅書！佢哋每一本都係一句「做咗先啦」！就係咁我就開始咗第一本說嘅書—『練習不生氣』。 咁我嘅勇氣係點樣嚟呢？其實係因為好多傾電話嘅時候，大家第一句都會問我：「你係唔係做電台架？」。。。問心。。。我都想，但事實並非如此；然後又有人話我把聲可以令到佢哋可以好好安睡，當然耳底下又聽到太多我上面所講嘅故事。我諗咗好耐與其一次只可以幫到一個人，咁不如錄一啲正能量故事未可以一舉幾得幫晒我上面所講嘅人？就係咁。。。 最初我真係諗住說故事架！但係原來一啲都唔容易！而有一日我去圖書館就借咗呢本『練習不生氣』，番到工作室睇睇下發現又真係幾好喎！先係短篇散文，而且每話都有一句金句，我諗我應該應付到嘅。就係咁我由開頭一日錄一集到後來一日錄幾集已經成為我每日嘅其中一種渴望快啲完成上架幫到人嘅動力，係唔係好天真呢？仲以為錄完呢101集就等如搞掂。。。點知原來又係另一個room挑戰嘅開始。。。 我租嘅工作間呢由於隔音設施比較差，無論係樓下後巷清潔工人嘅高談闊論（加粗口）、上下樓層嘅哈爾的移動城堡（板台車）、隔壁無論說話及開關門也十分豪氣的大姐和大叔（左右護法）、對面長期有拉膠紙聲嘅網上商店（傷人的店）、明知室內禁煙但總係令到成條走廊都係煙味嘅。。。當然唔少得打完齋唔要和尚嘅管理層啦（最快48小時訊息回覆除非你係潛在租客）。我就係喺呢個情況下錄音俾大家聽 ^_^ 之後就輪到『咕啦啦正能號』嘅LOGO設計、重錄（有雜聲）、重拾Facebook、重學IG同Youtube、每個貼文嘅設計、學剪片、調聲、動態效果、去邊到同點樣上架。。。等等將卡關嘅問題逐一尋找通關方法而最後我係可以揚帆出海俾大家聽到。 2023回顧文係我想話俾大家聽，自信同自愛都係要靠自己，其他人未必幫到你。好似我咁，都係由一隻怕事嘅『鵪鶉蛋』到咩都唔理做咗先算！邊學邊做，邊做邊試，就算有幾多困難都好都要一一跨過！將來係點我都唔會知架！我相信我係『天才兒童』但唔可以再俾自己「偶爾亦明瞭別讓潛力浪費 但發完力三秒還是怕倦坐低」！我唔理有無掌握到所謂嘅『流量密碼』，至少我做到先啦！就算只係一個。。。得一個人聽到而對佢有少少作用我都覺得值得同無悔，最起碼我唔想到第日後悔，後悔我無幫過人。。。「明明可寫出佳作那筆管 進殿堂前 枝枝只寫到一半」所以你哋都可以架！希望大家可以繼續支持，我哋一齊做真正嘅『天才兒童』 2023年12月28日 星期四23:11 喂！我哋2024年再見啦~~~ Social Handles： 撳呢度啦 / https://linktr.ee/p.coolala123⁠ 想俾啲鼓勵我可以去Youtube做齊CLSS同撳埋個鐘仔；又或者可以直接咁請我飲杯咖啡 ^_^ ⁠https://www.buymeacoffee.com/p.coolala123⁠ 多謝你哋嘅支持同鼓勵，希望我哋可以一齊走得更遠，令到身邊更多人都可以時時刻刻都被正能量包圍啦^3^ -- Hosting provided by SoundOn